𑁧. 𑀲𑀫𑁆𑀫𑀼𑀢𑀺𑀧𑁂𑀬𑁆𑀬𑀸𑀮𑀁

𑁧. 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑀼𑀢𑁆𑀢𑀁

𑁨𑁭𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 [𑀦 𑀲𑀫𑁆𑀫𑀦𑀺𑀢𑀩𑁆𑀩𑁄 (𑀓.) 𑀘𑀽𑀴𑀯. 𑁩𑁨𑁬 𑀧𑀲𑁆𑀲𑀺𑀢𑀩𑁆𑀩𑀁]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀁 𑀦 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀲𑀫𑁆𑀫𑀢𑁄 [𑀲𑀫𑁆𑀫𑀢𑁄𑀧𑀺 (𑀲𑀻.)] 𑀦 𑀧𑁂𑀲𑁂𑀢𑀩𑁆𑀩𑁄…𑀧𑁂… 𑀲𑀫𑁆𑀫𑀢𑁄 𑀧𑁂𑀲𑁂𑀢𑀩𑁆𑀩𑁄… 𑀩𑀸𑀮𑁄 𑀯𑁂𑀤𑀺𑀢𑀩𑁆𑀩𑁄… 𑀧𑀡𑁆𑀟𑀺𑀢𑁄 𑀯𑁂𑀤𑀺𑀢𑀩𑁆𑀩𑁄… 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺… 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺… 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂… 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀧𑀞𑀫𑀁.

𑁨-𑁧𑁪. 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀲𑀼𑀢𑁆𑀢𑀸𑀤𑀺𑀢𑁂𑀭𑀲𑀓𑀁

𑁨𑁭𑁩-𑁨𑁮𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀁 𑀦 𑀚𑀸𑀦𑀸𑀢𑀺…𑀧𑁂… 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀁 𑀚𑀸𑀦𑀸𑀢𑀺…𑀧𑁂….

𑀲𑁂𑀦𑀸𑀲𑀦𑀕𑀸𑀳𑀸𑀧𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 [𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁.)] 𑀦 𑀚𑀸𑀦𑀸𑀢𑀺…𑀧𑁂… 𑀲𑁂𑀦𑀸𑀲𑀦𑀕𑀸𑀳𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 [𑀧𑀜𑁆𑀜𑀢𑁆𑀢𑀸𑀧𑀜𑁆𑀜𑀢𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁.)] 𑀚𑀸𑀦𑀸𑀢𑀺…𑀧𑁂….

𑀪𑀡𑁆𑀟𑀸𑀕𑀸𑀭𑀺𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀼𑀢𑁆𑀢𑀸𑀕𑀼𑀢𑁆𑀢𑀁 𑀦 𑀚𑀸𑀦𑀸𑀢𑀺… 𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀼𑀢𑁆𑀢𑀸𑀕𑀼𑀢𑁆𑀢𑀁 𑀚𑀸𑀦𑀸𑀢𑀺…𑀧𑁂….

𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀦 𑀚𑀸𑀦𑀸𑀢𑀺… 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 …𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀚𑀸𑀦𑀸𑀢𑀺…𑀧𑁂….

𑀘𑀻𑀯𑀭𑀪𑀸𑀚𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀪𑀸𑀚𑀺𑀢𑀸𑀪𑀸𑀚𑀺𑀢𑀁 𑀦 𑀚𑀸𑀦𑀸𑀢𑀺… 𑀘𑀻𑀯𑀭𑀪𑀸𑀚𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀪𑀸𑀚𑀺𑀢𑀸𑀪𑀸𑀚𑀺𑀢𑀁 𑀚𑀸𑀦𑀸𑀢𑀺…𑀧𑁂….

𑀬𑀸𑀕𑀼𑀪𑀸𑀚𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀬𑀸𑀕𑀼𑀪𑀸𑀚𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂….

𑀨𑀮𑀪𑀸𑀚𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀨𑀮𑀪𑀸𑀚𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂….

𑀔𑀚𑁆𑀚𑀓𑀪𑀸𑀚𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀪𑀸𑀚𑀺𑀢𑀸𑀪𑀸𑀚𑀺𑀢𑀁 𑀦 𑀚𑀸𑀦𑀸𑀢𑀺… 𑀔𑀚𑁆𑀚𑀓𑀪𑀸𑀚𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀪𑀸𑀚𑀺𑀢𑀸𑀪𑀸𑀚𑀺𑀢𑀁 𑀚𑀸𑀦𑀸𑀢𑀺…𑀧𑁂….

𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀯𑀺𑀲𑁆𑀲𑀚𑁆𑀚𑀺𑀢𑀸𑀯𑀺𑀲𑁆𑀲𑀚𑁆𑀚𑀺𑀢𑀁 𑀦 𑀚𑀸𑀦𑀸𑀢𑀺… 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀯𑀺𑀲𑁆𑀲𑀚𑁆𑀚𑀺𑀢𑀸𑀯𑀺𑀲𑁆𑀲𑀚𑁆𑀚𑀺𑀢𑀁 𑀚𑀸𑀦𑀸𑀢𑀺….

𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀦 𑀚𑀸𑀦𑀸𑀢𑀺 … 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀚𑀸𑀦𑀸𑀢𑀺….

𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀦 𑀚𑀸𑀦𑀸𑀢𑀺… 𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀕𑀳𑀺𑀢𑀸𑀕𑀳𑀺𑀢𑀁 𑀚𑀸𑀦𑀸𑀢𑀺….

𑀆𑀭𑀸𑀫𑀺𑀓𑀧𑁂𑀲𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀆𑀭𑀸𑀫𑀺𑀓𑀧𑁂𑀲𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂….

𑀲𑀸𑀫𑀡𑁂𑀭𑀧𑁂𑀲𑀓𑁄 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂… 𑀲𑀸𑀫𑀡𑁂𑀭𑀧𑁂𑀲𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄…𑀧𑁂….

𑀲𑀫𑁆𑀫𑀢𑁄 𑀦 𑀧𑁂𑀲𑁂𑀢𑀩𑁆𑀩𑁄…𑀧𑁂… 𑀲𑀫𑁆𑀫𑀢𑁄 𑀧𑁂𑀲𑁂𑀢𑀩𑁆𑀩𑁄…𑀧𑁂….

𑀲𑀸𑀫𑀡𑁂𑀭𑀧𑁂𑀲𑀓𑁄 𑀩𑀸𑀮𑁄 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀧𑀡𑁆𑀟𑀺𑀢𑁄 𑀯𑁂𑀤𑀺𑀢𑀩𑁆𑀩𑁄… 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺… 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺… 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂… 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀧𑁂𑀲𑀺𑀢𑀸𑀧𑁂𑀲𑀺𑀢𑀁 𑀚𑀸𑀦𑀸𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀘𑀼𑀤𑁆𑀤𑀲𑀫𑀁.

𑀲𑀫𑁆𑀫𑀼𑀢𑀺𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.