(𑁨𑁫) 𑁫. 𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄

𑁧. 𑀧𑀞𑀫𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀤𑀼𑀘𑁆𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀺; 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀘𑁆𑀘𑀭𑀺𑀢𑁂.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀲𑀼𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀼𑀘𑀭𑀺𑀢𑁂’’𑀢𑀺. 𑀧𑀞𑀫𑀁.

𑁨. 𑀧𑀞𑀫𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁨. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀓𑀸𑀬𑀲𑀼𑀘𑀭𑀺𑀢𑁂…𑀧𑁂…. 𑀤𑀼𑀢𑀺𑀬𑀁.

𑁩. 𑀧𑀞𑀫𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁩. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀯𑀘𑀻𑀲𑀼𑀘𑀭𑀺𑀢𑁂…𑀧𑁂…. 𑀢𑀢𑀺𑀬𑀁.

𑁪. 𑀧𑀞𑀫𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁪. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀫𑀦𑁄𑀲𑀼𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀫𑀦𑁄𑀲𑀼𑀘𑀭𑀺𑀢𑁂’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀤𑀼𑀘𑁆𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀺; 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀢𑀺; 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀘𑁆𑀘𑀭𑀺𑀢𑁂.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀦𑀺𑀲𑀁𑀲𑀸 𑀲𑀼𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀢𑀺; 𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀼𑀘𑀭𑀺𑀢𑁂’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁬. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀓𑀸𑀬𑀲𑀼𑀘𑀭𑀺𑀢𑁂…𑀧𑁂…. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁭. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀯𑀘𑀻𑀲𑀼𑀘𑀭𑀺𑀢𑁂…𑀧𑁂…. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁪𑁮. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂…𑀧𑁂… 𑀆𑀦𑀺𑀲𑀁𑀲𑀸 𑀫𑀦𑁄𑀲𑀼𑀘𑀭𑀺𑀢𑁂. 𑀓𑀢𑀫𑁂 𑀧𑀜𑁆𑀘? 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀯𑀤𑀢𑀺; 𑀅𑀦𑀼𑀯𑀺𑀘𑁆𑀘 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀢𑀺; 𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀫𑀦𑁄𑀲𑀼𑀘𑀭𑀺𑀢𑁂’’𑀢𑀺. 𑀅𑀝𑁆𑀞𑀫𑀁.

𑁯. 𑀲𑀺𑀯𑀣𑀺𑀓𑀲𑀼𑀢𑁆𑀢𑀁

𑁨𑁪𑁯. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀲𑀺𑀯𑀣𑀺𑀓𑀸𑀬 [𑀲𑀻𑀯𑀣𑀺𑀓𑀸𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀓𑀢𑀫𑁂 𑀧𑀜𑁆𑀘? 𑀅𑀲𑀼𑀘𑀺, 𑀤𑀼𑀕𑁆𑀕𑀦𑁆𑀥𑀸, 𑀲𑀧𑁆𑀧𑀝𑀺𑀪𑀬𑀸, 𑀯𑀸𑀴𑀸𑀦𑀁 𑀅𑀫𑀦𑀼𑀲𑁆𑀲𑀸𑀦𑀁 𑀆𑀯𑀸𑀲𑁄, 𑀩𑀳𑀼𑀦𑁄 𑀚𑀦𑀲𑁆𑀲 𑀆𑀭𑁄𑀤𑀦𑀸 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀲𑀺𑀯𑀣𑀺𑀓𑀸𑀬.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀫𑁂 𑀆𑀤𑀻𑀦𑀯𑀸 𑀲𑀺𑀯𑀣𑀺𑀓𑀽𑀧𑀫𑁂 𑀧𑀼𑀕𑁆𑀕𑀮𑁂. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀤𑀫𑀲𑁆𑀲 𑀅𑀲𑀼𑀘𑀺𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀺𑀓𑁆𑀔𑀯𑁂, 𑀲𑀺𑀯𑀣𑀺𑀓𑀸 𑀅𑀲𑀼𑀘𑀺; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀢𑀲𑁆𑀲 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀇𑀤𑀫𑀲𑁆𑀲 𑀤𑀼𑀕𑁆𑀕𑀦𑁆𑀥𑀢𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀺𑀓𑁆𑀔𑀯𑁂, 𑀲𑀺𑀯𑀣𑀺𑀓𑀸 𑀤𑀼𑀕𑁆𑀕𑀦𑁆𑀥𑀸; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀢𑀫𑁂𑀦𑀁 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑁆𑀢𑀺. 𑀇𑀤𑀫𑀲𑁆𑀲 𑀲𑀧𑁆𑀧𑀝𑀺𑀪𑀬𑀲𑁆𑀫𑀺𑀁 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀺𑀓𑁆𑀔𑀯𑁂, 𑀲𑀺𑀯𑀣𑀺𑀓𑀸 𑀲𑀧𑁆𑀧𑀝𑀺𑀪𑀬𑀸; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀲𑁄 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀪𑀸𑀕𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺. 𑀇𑀤𑀫𑀲𑁆𑀲 𑀯𑀸𑀴𑀸𑀯𑀸𑀲𑀲𑁆𑀫𑀺𑀁 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀺𑀓𑁆𑀔𑀯𑁂, 𑀲𑀺𑀯𑀣𑀺𑀓𑀸 𑀯𑀸𑀴𑀸𑀦𑀁 𑀅𑀫𑀦𑀼𑀲𑁆𑀲𑀸𑀦𑀁 𑀆𑀯𑀸𑀲𑁄; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺.

‘‘𑀢𑀫𑁂𑀦𑀁 𑀅𑀲𑀼𑀘𑀺𑀦𑀸 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀲𑀼𑀘𑀺𑀦𑀸 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀲𑀼𑀘𑀺𑀦𑀸 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀤𑀺𑀲𑁆𑀯𑀸 𑀔𑀻𑀬𑀥𑀫𑁆𑀫𑀁 [𑀔𑀻𑀬𑀦𑀥𑀫𑁆𑀫𑀁 (𑀲𑀻.)] 𑀆𑀧𑀚𑁆𑀚𑀦𑁆𑀢𑀺 𑁋 ‘𑀅𑀳𑁄 𑀯𑀢 𑀦𑁄 𑀤𑀼𑀓𑁆𑀔𑀁 𑀬𑁂 𑀫𑀬𑀁 𑀏𑀯𑀭𑀽𑀧𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀸𑀫𑀸’𑀢𑀺! 𑀇𑀤𑀫𑀲𑁆𑀲 𑀆𑀭𑁄𑀤𑀦𑀸𑀬 𑀯𑀤𑀸𑀫𑀺. 𑀲𑁂𑀬𑁆𑀬𑀣𑀸𑀧𑀺 𑀲𑀸, 𑀪𑀺𑀓𑁆𑀔𑀯𑁂, 𑀲𑀺𑀯𑀣𑀺𑀓𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀆𑀭𑁄𑀤𑀦𑀸; 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀲𑀺𑀯𑀣𑀺𑀓𑀽𑀧𑀫𑁂 𑀧𑀼𑀕𑁆𑀕𑀮𑁂’’𑀢𑀺. 𑀦𑀯𑀫𑀁.

𑁧𑁦. 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑀲𑀼𑀢𑁆𑀢𑀁

𑁨𑁫𑁦. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂. 𑀓𑀢𑀫𑁂 𑀧𑀜𑁆𑀘? 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁂 𑀧𑀼𑀕𑁆𑀕𑀮𑁄 𑀅𑀪𑀺𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀲𑁄 𑀢𑀣𑀸𑀭𑀽𑀧𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀬𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀉𑀓𑁆𑀔𑀺𑀧𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀧𑀺𑀬𑁄 𑀫𑀦𑀸𑀧𑁄 𑀲𑁄 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑁄’𑀢𑀺. 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀸𑀤𑀩𑀳𑀼𑀮𑁄 𑀳𑁄𑀢𑀺. 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀸𑀤𑀩𑀳𑀼𑀮𑁄 𑀲𑀫𑀸𑀦𑁄 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀪𑀚𑀢𑀺. 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀅𑀪𑀚𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺. 𑀲𑀤𑁆𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀆𑀤𑀻𑀦𑀯𑁄 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀼𑀕𑁆𑀕𑀮𑁄 𑀅𑀪𑀺𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀲𑁄 𑀢𑀣𑀸𑀭𑀽𑀧𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀬𑀣𑀸𑀭𑀽𑀧𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀅𑀦𑁆𑀢𑁂 𑀦𑀺𑀲𑀻𑀤𑀸𑀧𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀧𑀺𑀬𑁄 𑀫𑀦𑀸𑀧𑁄 𑀲𑁄 𑀲𑀗𑁆𑀖𑁂𑀦 𑀅𑀦𑁆𑀢𑁂 𑀦𑀺𑀲𑀻𑀤𑀸𑀧𑀺𑀢𑁄’𑀢𑀺. 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀸𑀤𑀩𑀳𑀼𑀮𑁄 𑀳𑁄𑀢𑀺. 𑀪𑀺𑀓𑁆𑀔𑀽𑀲𑀼 𑀅𑀧𑁆𑀧𑀲𑀸𑀤𑀩𑀳𑀼𑀮𑁄 𑀲𑀫𑀸𑀦𑁄 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀪𑀚𑀢𑀺. 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀅𑀪𑀚𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺. 𑀲𑀤𑁆𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀆𑀤𑀻𑀦𑀯𑁄 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀼𑀕𑁆𑀕𑀮𑁄 𑀅𑀪𑀺𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀲𑁄 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑁄 𑀯𑀺𑀩𑁆𑀪𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀧𑀺𑀬𑁄 𑀫𑀦𑀸𑀧𑁄 𑀲𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀪𑀚𑀢𑀺. 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀅𑀪𑀚𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺. 𑀲𑀤𑁆𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀆𑀤𑀻𑀦𑀯𑁄 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀧𑀼𑀕𑁆𑀕𑀮𑀧𑁆𑀧𑀲𑀸𑀤𑁂’’𑀢𑀺. 𑀤𑀲𑀫𑀁.

𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.