𑁫. 𑀘𑀡𑁆𑀟𑀸𑀮𑀲𑀼𑀢𑁆𑀢𑀁

𑁧𑁭𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘 [𑀉𑀧𑀸𑀲𑀓𑀧𑀢𑀺𑀓𑀺𑀝𑁆𑀞𑁄 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺; 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺; 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺 𑀦𑁄 𑀓𑀫𑁆𑀫𑀁; 𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺; 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘 [𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄 𑀘 (𑀧𑀻. 𑀓.)]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀳𑁄𑀢𑀺; 𑀲𑀻𑀮𑀯𑀸 𑀳𑁄𑀢𑀺; 𑀅𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀧𑀘𑁆𑀘𑁂𑀢𑀺 𑀦𑁄 𑀫𑀗𑁆𑀕𑀮𑀁; 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺; 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘𑀸’’𑀢𑀺. 𑀧𑀜𑁆𑀘𑀫𑀁.