(𑁧𑁮) 𑁩. 𑀉𑀧𑀸𑀲𑀓𑀯𑀕𑁆𑀕𑁄

𑁧. 𑀲𑀸𑀭𑀚𑁆𑀚𑀲𑀼𑀢𑁆𑀢𑀁

𑁧𑁭𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀲𑀸𑀭𑀚𑁆𑀚𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀲𑀸𑀭𑀚𑁆𑀚𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀯𑀺𑀲𑀸𑀭𑀤𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀯𑀺𑀲𑀸𑀭𑀤𑁄 𑀳𑁄𑀢𑀻’’𑀢𑀺. 𑀧𑀞𑀫𑀁.

𑁨. 𑀯𑀺𑀲𑀸𑀭𑀤𑀲𑀼𑀢𑁆𑀢𑀁

𑁧𑁭𑁨. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀅𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀅𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀯𑀺𑀲𑀸𑀭𑀤𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀦𑀺𑀭𑀬𑀲𑀼𑀢𑁆𑀢𑀁

𑁧𑁭𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀢𑀢𑀺𑀬𑀁.

𑁪. 𑀯𑁂𑀭𑀲𑀼𑀢𑁆𑀢𑀁

𑁧𑁭𑁪. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀜𑁆𑀘, 𑀕𑀳𑀧𑀢𑀺, 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀅𑀧𑁆𑀧𑀳𑀸𑀬 ‘𑀤𑀼𑀲𑁆𑀲𑀻𑀮𑁄’ 𑀇𑀢𑀺 𑀯𑀼𑀘𑁆𑀘𑀢𑀺, 𑀦𑀺𑀭𑀬𑀜𑁆𑀘 𑀉𑀧𑀧𑀚𑁆𑀚𑀢𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀧𑀸𑀡𑀸𑀢𑀺𑀧𑀸𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁, 𑀫𑀼𑀲𑀸𑀯𑀸𑀤𑀁, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑁋 𑀇𑀫𑀸𑀦𑀺 𑀔𑁄, 𑀕𑀳𑀧𑀢𑀺, 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀅𑀧𑁆𑀧𑀳𑀸𑀬 ‘𑀤𑀼𑀲𑁆𑀲𑀻𑀮𑁄’ 𑀇𑀢𑀺 𑀯𑀼𑀘𑁆𑀘𑀢𑀺, 𑀦𑀺𑀭𑀬𑀜𑁆𑀘 𑀉𑀧𑀧𑀚𑁆𑀚𑀢𑀺.

‘‘𑀧𑀜𑁆𑀘, 𑀕𑀳𑀧𑀢𑀺, 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀧𑀳𑀸𑀬 ‘𑀲𑀻𑀮𑀯𑀸’ 𑀇𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀕𑀢𑀺𑀜𑁆𑀘 𑀉𑀧𑀧𑀚𑁆𑀚𑀢𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀧𑀸𑀡𑀸𑀢𑀺𑀧𑀸𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁, 𑀫𑀼𑀲𑀸𑀯𑀸𑀤𑀁, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑁋 𑀇𑀫𑀸𑀦𑀺 𑀔𑁄, 𑀕𑀳𑀧𑀢𑀺, 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀧𑀳𑀸𑀬 ‘𑀲𑀻𑀮𑀯𑀸’ 𑀇𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀕𑀢𑀺𑀜𑁆𑀘 𑀉𑀧𑀧𑀚𑁆𑀚𑀢𑀺.

‘‘𑀬𑀁, 𑀕𑀳𑀧𑀢𑀺, 𑀧𑀸𑀡𑀸𑀢𑀺𑀧𑀸𑀢𑀻 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀦𑁂𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀦 𑀲𑀫𑁆𑀧𑀭𑀸𑀬𑀺𑀓𑀁 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀲𑁆𑀲 𑀏𑀯𑀁 𑀢𑀁 𑀪𑀬𑀁 𑀯𑁂𑀭𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺.

‘‘𑀬𑀁, 𑀕𑀳𑀧𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻…𑀧𑁂….

‘‘𑀬𑀁, 𑀕𑀳𑀧𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻…𑀧𑁂….

‘‘𑀬𑀁, 𑀕𑀳𑀧𑀢𑀺, 𑀫𑀼𑀲𑀸𑀯𑀸𑀤𑀻…𑀧𑁂….

‘‘𑀬𑀁, 𑀕𑀳𑀧𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀧𑀘𑁆𑀘𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀦𑁂𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀦 𑀲𑀫𑁆𑀧𑀭𑀸𑀬𑀺𑀓𑀁 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀲𑁆𑀲 𑀏𑀯𑀁 𑀢𑀁 𑀪𑀬𑀁 𑀯𑁂𑀭𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀻’’𑀢𑀺.

‘‘𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺;

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺.

‘‘𑀅𑀧𑁆𑀧𑀳𑀸𑀬 𑀧𑀜𑁆𑀘 𑀯𑁂𑀭𑀸𑀦𑀺, 𑀤𑀼𑀲𑁆𑀲𑀻𑀮𑁄 𑀇𑀢𑀺 𑀯𑀼𑀘𑁆𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.

‘‘𑀬𑁄 𑀧𑀸𑀡𑀁 𑀦𑀸𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀁 𑀦 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀢𑀺, 𑀧𑀭𑀤𑀸𑀭𑀁 𑀦 𑀕𑀘𑁆𑀙𑀢𑀺;

𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀦𑀸𑀦𑀼𑀬𑀼𑀜𑁆𑀚𑀢𑀺.

‘‘𑀧𑀳𑀸𑀬 𑀧𑀜𑁆𑀘 𑀯𑁂𑀭𑀸𑀦𑀺, 𑀲𑀻𑀮𑀯𑀸 𑀇𑀢𑀺 𑀯𑀼𑀘𑁆𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀼𑀕𑀢𑀺𑀁 𑀲𑁄𑀧𑀧𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀘𑀡𑁆𑀟𑀸𑀮𑀲𑀼𑀢𑁆𑀢𑀁

𑁧𑁭𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘 [𑀉𑀧𑀸𑀲𑀓𑀧𑀢𑀺𑀓𑀺𑀝𑁆𑀞𑁄 𑀘 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺; 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺; 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀺 𑀦𑁄 𑀓𑀫𑁆𑀫𑀁; 𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺; 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀘𑀡𑁆𑀟𑀸𑀮𑁄 𑀘 𑀳𑁄𑀢𑀺 𑀉𑀧𑀸𑀲𑀓𑀫𑀮𑀜𑁆𑀘 𑀉𑀧𑀸𑀲𑀓𑀧𑀢𑀺𑀓𑀼𑀝𑁆𑀞𑁄 𑀘.

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘 [𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄 𑀘 (𑀧𑀻. 𑀓.)]. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑁄 𑀳𑁄𑀢𑀺; 𑀲𑀻𑀮𑀯𑀸 𑀳𑁄𑀢𑀺; 𑀅𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑁄𑀢𑀺, 𑀓𑀫𑁆𑀫𑀁 𑀧𑀘𑁆𑀘𑁂𑀢𑀺 𑀦𑁄 𑀫𑀗𑁆𑀕𑀮𑀁; 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺; 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄 𑀉𑀧𑀸𑀲𑀓𑀭𑀢𑀦𑀜𑁆𑀘 𑀳𑁄𑀢𑀺 𑀉𑀧𑀸𑀲𑀓𑀧𑀤𑀼𑀫𑀜𑁆𑀘 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀜𑁆𑀘𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀧𑀻𑀢𑀺𑀲𑀼𑀢𑁆𑀢𑀁

𑁧𑁭𑁬. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀼𑀫𑁆𑀳𑁂 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀦 𑀔𑁄, 𑀕𑀳𑀧𑀢𑀺, 𑀢𑀸𑀯𑀢𑀓𑁂𑀦𑁂𑀯 𑀢𑀼𑀝𑁆𑀞𑀺 𑀓𑀭𑀡𑀻𑀬𑀸 𑁋 ‘𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦𑀸’𑀢𑀺. 𑀢𑀲𑁆𑀫𑀸𑀢𑀺𑀳, 𑀕𑀳𑀧𑀢𑀺, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀺 𑀫𑀬𑀁 𑀓𑀸𑀮𑁂𑀦 𑀓𑀸𑀮𑀁 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀫𑀸’𑀢𑀺! 𑀏𑀯𑀜𑁆𑀳𑀺 𑀯𑁄, 𑀕𑀳𑀧𑀢𑀺, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑁋 ‘𑀢𑀼𑀫𑁆𑀳𑁂 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀦 𑀔𑁄, 𑀕𑀳𑀧𑀢𑀺, 𑀢𑀸𑀯𑀢𑀓𑁂𑀦𑁂𑀯 𑀢𑀼𑀝𑁆𑀞𑀺 𑀓𑀭𑀡𑀻𑀬𑀸 𑁋 𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦𑀸𑀢𑀺. 𑀢𑀲𑁆𑀫𑀸𑀢𑀺𑀳, 𑀕𑀳𑀧𑀢𑀺, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀫𑀬𑀁 𑀓𑀸𑀮𑁂𑀦 𑀓𑀸𑀮𑀁 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀫𑀸𑀢𑀺! 𑀏𑀯𑀜𑁆𑀳𑀺 𑀯𑁄, 𑀕𑀳𑀧𑀢𑀺, 𑀲𑀺𑀓𑁆𑀔𑀺𑀢𑀩𑁆𑀩’𑀦𑁆𑀢𑀺. 𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀘𑀲𑁆𑀲 𑀞𑀸𑀦𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀸𑀫𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀸𑀫𑀽𑀧𑀲𑀁𑀳𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀫𑀸𑀦𑀺𑀲𑁆𑀲 𑀧𑀜𑁆𑀘 [𑀇𑀫𑀸𑀦𑀺 𑀧𑀜𑁆𑀘𑀲𑁆𑀲 (𑀲𑁆𑀬𑀸. 𑀓𑀁.)] 𑀞𑀸𑀦𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀲𑁆𑀫𑀺𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀘𑀲𑁆𑀲 𑀞𑀸𑀦𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀸𑀫𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀸𑀫𑀽𑀧𑀲𑀁𑀳𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀅𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀫𑁆𑀧𑀺𑀲𑁆𑀲 𑀓𑀼𑀲𑀮𑀽𑀧𑀲𑀁𑀳𑀺𑀢𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁, 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺. 𑀬𑀲𑁆𑀫𑀺𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀧𑀯𑀺𑀯𑁂𑀓𑀁 𑀧𑀻𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀇𑀫𑀸𑀦𑀺𑀲𑁆𑀲 [𑀇𑀫𑀸𑀦𑁂𑀢𑁆𑀣 (𑀲𑀻.)] 𑀧𑀜𑁆𑀘 𑀞𑀸𑀦𑀸𑀦𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀯𑀡𑀺𑀚𑁆𑀚𑀸𑀲𑀼𑀢𑁆𑀢𑀁

𑁧𑁭𑁭. ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸. 𑀓𑀢𑀫𑀸 𑀧𑀜𑁆𑀘? 𑀲𑀢𑁆𑀣𑀯𑀡𑀺𑀚𑁆𑀚𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸, 𑀫𑀁𑀲𑀯𑀡𑀺𑀚𑁆𑀚𑀸, 𑀫𑀚𑁆𑀚𑀯𑀡𑀺𑀚𑁆𑀚𑀸, 𑀯𑀺𑀲𑀯𑀡𑀺𑀚𑁆𑀚𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀡𑀺𑀚𑁆𑀚𑀸 𑀉𑀧𑀸𑀲𑀓𑁂𑀦 𑀅𑀓𑀭𑀡𑀻𑀬𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀭𑀸𑀚𑀸𑀲𑀼𑀢𑁆𑀢𑀁

𑁧𑁭𑁮. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄𑀢𑀺 [𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺 (𑀲𑀻.), 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 (𑀲𑁆𑀬𑀸. 𑀓𑀁. 𑀧𑀻.)]. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺. 𑀅𑀧𑀺 𑀘, 𑀔𑁆𑀯𑀲𑁆𑀲 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀺 [𑀢𑀣𑁂𑀯 𑀧𑀸𑀧𑀓𑀁 𑀓𑀫𑁆𑀫𑀁 𑀧𑀯𑁂𑀤𑀬𑀦𑁆𑀢𑀺 (𑀲𑀻.), 𑀢𑀤𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀢𑀺 (𑀲𑁆𑀬𑀸. 𑀓𑀁.)] 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 [𑀯𑁄𑀭𑁄𑀧𑁂𑀢𑀻𑀢𑀺 (𑀲𑁆𑀬𑀸. 𑀓𑀁.)]. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀺. 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’’𑀢𑀺? ‘‘𑀤𑀺𑀝𑁆𑀞𑀜𑁆𑀘 𑀦𑁄, 𑀪𑀦𑁆𑀢𑁂, 𑀲𑀼𑀢𑀜𑁆𑀘 𑀲𑀼𑀬𑁆𑀬𑀺𑀲𑁆𑀲𑀢𑀺 [𑀲𑀽𑀬𑀺𑀲𑁆𑀲𑀢𑀺 (𑀲𑀻. 𑀧𑀻.)] 𑀘𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺. 𑀅𑀧𑀺 𑀘 𑀔𑁆𑀯𑀲𑁆𑀲 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀺 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀻𑀢𑀺 [𑀆𑀤𑀺𑀬𑀢𑀺 (𑀲𑁆𑀬𑀸. 𑀓𑀁.)]. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀺. 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’’𑀢𑀺? ‘‘𑀤𑀺𑀝𑁆𑀞𑀜𑁆𑀘 𑀦𑁄, 𑀪𑀦𑁆𑀢𑁂, 𑀲𑀼𑀢𑀜𑁆𑀘 𑀲𑀼𑀬𑁆𑀬𑀺𑀲𑁆𑀲𑀢𑀺 𑀘𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺. 𑀅𑀧𑀺 𑀘 𑀔𑁆𑀯𑀲𑁆𑀲 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀺 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀧𑀭𑀺𑀢𑁆𑀣𑀻𑀲𑀼 𑀧𑀭𑀓𑀼𑀫𑀸𑀭𑀻𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀻𑀢𑀺 [𑀆𑀧𑀚𑁆𑀚𑀢𑀺 (𑀲𑁆𑀬𑀸. 𑀓𑀁.)]. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀺. 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’’𑀢𑀺? ‘‘𑀤𑀺𑀝𑁆𑀞𑀜𑁆𑀘 𑀦𑁄, 𑀪𑀦𑁆𑀢𑁂, 𑀲𑀼𑀢𑀜𑁆𑀘 𑀲𑀼𑀬𑁆𑀬𑀺𑀲𑁆𑀲𑀢𑀺 𑀘𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺. 𑀅𑀧𑀺 𑀘 𑀔𑁆𑀯𑀲𑁆𑀲 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀺 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀫𑀼𑀲𑀸𑀯𑀸𑀤𑁂𑀦 𑀅𑀢𑁆𑀣𑀁 𑀧𑀪𑀜𑁆𑀚𑀻𑀢𑀺 [𑀪𑀜𑁆𑀚𑀢𑀻𑀢𑀺 (𑀲𑀻.), 𑀪𑀜𑁆𑀚𑀢𑀺 (𑀲𑁆𑀬𑀸. 𑀓𑀁.), 𑀪𑀜𑁆𑀚𑀻𑀢𑀺 (𑀧𑀻.)]. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀫𑀼𑀲𑀸𑀯𑀸𑀤𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀺. 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’’𑀢𑀺? ‘‘𑀤𑀺𑀝𑁆𑀞𑀜𑁆𑀘 𑀦𑁄, 𑀪𑀦𑁆𑀢𑁂, 𑀲𑀼𑀢𑀜𑁆𑀘 𑀲𑀼𑀬𑁆𑀬𑀺𑀲𑁆𑀲𑀢𑀺 𑀘𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀧𑀳𑀸𑀬 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀫𑀬𑀸𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀤𑀺𑀝𑁆𑀞𑀁 𑀦 𑀲𑀼𑀢𑀁 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀧𑀳𑀸𑀬 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀻’𑀢𑀺. 𑀅𑀧𑀺 𑀘 𑀔𑁆𑀯𑀲𑁆𑀲 𑀢𑀣𑁂𑀯 𑀧𑀸𑀧𑀓𑀫𑁆𑀫𑀁 𑀧𑀯𑁂𑀤𑁂𑀦𑁆𑀢𑀺 𑁋 ‘𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁄 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺 [𑀯𑁄𑀭𑁄𑀧𑁂𑀢𑀺 (𑀲𑁆𑀬𑀸.)]; 𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁄 𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀺 [𑀆𑀤𑀺𑀬𑀢𑀺 (𑀲𑀻. 𑀲𑁆𑀬𑀸.)]; 𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁄 𑀧𑀭𑀺𑀢𑁆𑀣𑀻𑀲𑀼 𑀧𑀭𑀓𑀼𑀫𑀸𑀭𑀻𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺 [𑀆𑀧𑀚𑁆𑀚𑀢𑀺 (𑀲𑀻. 𑀲𑁆𑀬𑀸.)]; 𑀅𑀬𑀁 𑀧𑀼𑀭𑀺𑀲𑁄 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀁 𑀅𑀦𑀼𑀬𑀼𑀢𑁆𑀢𑁄 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀫𑀼𑀲𑀸𑀯𑀸𑀤𑁂𑀦 𑀅𑀢𑁆𑀣𑀁 𑀧𑀪𑀜𑁆𑀚𑀻𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀳𑁂𑀢𑀼 𑀳𑀦𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀦𑁆𑀢𑀺. 𑀅𑀧𑀺 𑀦𑀼 𑀢𑀼𑀫𑁆𑀳𑁂𑀳𑀺 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’’𑀢𑀺? ‘‘𑀤𑀺𑀝𑁆𑀞𑀜𑁆𑀘 𑀦𑁄, 𑀪𑀦𑁆𑀢𑁂, 𑀲𑀼𑀢𑀜𑁆𑀘 𑀲𑀼𑀬𑁆𑀬𑀺𑀲𑁆𑀲𑀢𑀺 𑀘𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀕𑀺𑀳𑀺𑀲𑀼𑀢𑁆𑀢𑀁

𑁧𑁭𑁯. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀁 𑀓𑀜𑁆𑀘𑀺 [𑀬𑀁 𑀓𑀺𑀜𑁆𑀘𑀺 (𑀲𑀻. 𑀧𑀻.)], 𑀲𑀸𑀭𑀺𑀧𑀼𑀢𑁆𑀢, 𑀚𑀸𑀦𑁂𑀬𑁆𑀬𑀸𑀣 𑀕𑀺𑀳𑀺𑀁 𑀑𑀤𑀸𑀢𑀯𑀲𑀦𑀁 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑀁 𑀘𑀢𑀼𑀦𑁆𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀺𑀁 𑀅𑀓𑀺𑀘𑁆𑀙𑀮𑀸𑀪𑀺𑀁 𑀅𑀓𑀲𑀺𑀭𑀮𑀸𑀪𑀺𑀁, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’’𑀢𑀺.

‘‘𑀓𑀢𑀫𑁂𑀲𑀼 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑁄 𑀳𑁄𑀢𑀺? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑁄 𑀳𑁄𑀢𑀺.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺, 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀬𑀫𑀲𑁆𑀲 𑀧𑀞𑀫𑁄 𑀆𑀪𑀺𑀘𑁂𑀢𑀲𑀺𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺 𑀅𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀅𑀬𑀫𑀲𑁆𑀲 𑀤𑀼𑀢𑀺𑀬𑁄 𑀆𑀪𑀺𑀘𑁂𑀢𑀲𑀺𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺 𑀅𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀅𑀬𑀫𑀲𑁆𑀲 𑀢𑀢𑀺𑀬𑁄 𑀆𑀪𑀺𑀘𑁂𑀢𑀲𑀺𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺 𑀅𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺 𑀅𑀘𑁆𑀙𑀺𑀤𑁆𑀤𑁂𑀳𑀺 𑀅𑀲𑀩𑀮𑁂𑀳𑀺 𑀅𑀓𑀫𑁆𑀫𑀸𑀲𑁂𑀳𑀺 𑀪𑀼𑀚𑀺𑀲𑁆𑀲𑁂𑀳𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀳𑀺 𑀅𑀧𑀭𑀸𑀫𑀝𑁆𑀞𑁂𑀳𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀅𑀬𑀫𑀲𑁆𑀲 𑀘𑀢𑀼𑀢𑁆𑀣𑁄 𑀆𑀪𑀺𑀘𑁂𑀢𑀲𑀺𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺 𑀅𑀯𑀺𑀲𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑁄𑀤𑀧𑀦𑀸𑀬. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻.

‘‘𑀬𑀁 𑀓𑀜𑁆𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀚𑀸𑀦𑁂𑀬𑁆𑀬𑀸𑀣 𑀕𑀺𑀳𑀺𑀁 𑀑𑀤𑀸𑀢𑀯𑀲𑀦𑀁 𑁋 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀁𑀯𑀼𑀢𑀓𑀫𑁆𑀫𑀦𑁆𑀢𑀁, 𑀇𑀫𑁂𑀲𑀜𑁆𑀘 𑀘𑀢𑀼𑀦𑁆𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀺𑀁 𑀅𑀓𑀺𑀘𑁆𑀙𑀮𑀸𑀪𑀺𑀁 𑀅𑀓𑀲𑀺𑀭𑀮𑀸𑀪𑀺𑀁, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’’𑀢𑀺.

‘‘𑀦𑀺𑀭𑀬𑁂𑀲𑀼 𑀪𑀬𑀁 𑀤𑀺𑀲𑁆𑀯𑀸, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀅𑀭𑀺𑀬𑀥𑀫𑁆𑀫𑀁 𑀲𑀫𑀸𑀤𑀸𑀬, 𑀧𑀡𑁆𑀟𑀺𑀢𑁄 𑀧𑀭𑀺𑀯𑀚𑁆𑀚𑀬𑁂.

‘‘𑀦 𑀳𑀺𑀁𑀲𑁂 𑀧𑀸𑀡𑀪𑀽𑀢𑀸𑀦𑀺, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂;

𑀫𑀼𑀲𑀸 𑀘 𑀦 𑀪𑀡𑁂 𑀚𑀸𑀦𑀁, 𑀅𑀤𑀺𑀦𑁆𑀦𑀁 𑀦 𑀧𑀭𑀸𑀫𑀲𑁂.

‘‘𑀲𑁂𑀳𑀺 𑀤𑀸𑀭𑁂𑀳𑀺 𑀲𑀦𑁆𑀢𑀼𑀝𑁆𑀞𑁄, 𑀧𑀭𑀤𑀸𑀭𑀜𑁆𑀘 𑀆𑀭𑀫𑁂 [𑀦𑀸𑀭𑀫𑁂 (𑀲𑀻. 𑀲𑁆𑀬𑀸.)];

𑀫𑁂𑀭𑀬𑀁 𑀯𑀸𑀭𑀼𑀡𑀺𑀁 𑀚𑀦𑁆𑀢𑀼, 𑀦 𑀧𑀺𑀯𑁂 𑀘𑀺𑀢𑁆𑀢𑀫𑁄𑀳𑀦𑀺𑀁.

‘‘𑀅𑀦𑀼𑀲𑁆𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘𑀸𑀦𑀼𑀯𑀺𑀢𑀓𑁆𑀓𑀬𑁂;

𑀅𑀩𑁆𑀬𑀸𑀧𑀚𑁆𑀚𑀁 [𑀅𑀩𑁆𑀬𑀸𑀧𑀚𑁆𑀛𑀁 (?) 𑀅𑀩𑁆𑀬𑀸𑀧𑀚𑁆𑀛𑀁 (𑀓.)] 𑀳𑀺𑀢𑀁 𑀘𑀺𑀢𑁆𑀢𑀁, 𑀤𑁂𑀯𑀮𑁄𑀓𑀸𑀬 𑀪𑀸𑀯𑀬𑁂.

‘‘𑀉𑀧𑀝𑁆𑀞𑀺𑀢𑁂 𑀤𑁂𑀬𑁆𑀬𑀥𑀫𑁆𑀫𑁂, 𑀧𑀼𑀜𑁆𑀜𑀢𑁆𑀣𑀲𑁆𑀲 𑀚𑀺𑀕𑀻𑀲𑀢𑁄 [𑀚𑀺𑀕𑀺𑀁𑀲𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀲𑀦𑁆𑀢𑁂𑀲𑀼 𑀧𑀞𑀫𑀁 𑀤𑀺𑀦𑁆𑀦𑀸, 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸.

‘‘𑀲𑀦𑁆𑀢𑁄 𑀳𑀯𑁂 𑀧𑀯𑀓𑁆𑀔𑀸𑀫𑀺, 𑀲𑀸𑀭𑀺𑀧𑀼𑀢𑁆𑀢 𑀲𑀼𑀡𑁄𑀳𑀺 𑀫𑁂;

𑀇𑀢𑀺 𑀓𑀡𑁆𑀳𑀸𑀲𑀼 𑀲𑁂𑀢𑀸𑀲𑀼, 𑀭𑁄𑀳𑀺𑀡𑀻𑀲𑀼 𑀳𑀭𑀻𑀲𑀼 𑀯𑀸.

‘‘𑀓𑀫𑁆𑀫𑀸𑀲𑀸𑀲𑀼 𑀲𑀭𑀽𑀧𑀸𑀲𑀼, 𑀕𑁄𑀲𑀼 𑀧𑀸𑀭𑁂𑀯𑀢𑀸𑀲𑀼 𑀯𑀸;

𑀬𑀸𑀲𑀼 𑀓𑀸𑀲𑀼𑀘𑀺 𑀏𑀢𑀸𑀲𑀼, 𑀤𑀦𑁆𑀢𑁄 𑀚𑀸𑀬𑀢𑀺 𑀧𑀼𑀗𑁆𑀕𑀯𑁄.

‘‘𑀥𑁄𑀭𑀬𑁆𑀳𑁄 𑀩𑀮𑀲𑀫𑁆𑀧𑀦𑁆𑀦𑁄, 𑀓𑀮𑁆𑀬𑀸𑀡𑀚𑀯𑀦𑀺𑀓𑁆𑀓𑀫𑁄;

𑀢𑀫𑁂𑀯 𑀪𑀸𑀭𑁂 𑀬𑀼𑀜𑁆𑀚𑀦𑁆𑀢𑀺, 𑀦𑀸𑀲𑁆𑀲 𑀯𑀡𑁆𑀡𑀁 𑀧𑀭𑀺𑀓𑁆𑀔𑀭𑁂.

‘‘𑀏𑀯𑀫𑁂𑀯𑀁 𑀫𑀦𑀼𑀲𑁆𑀲𑁂𑀲𑀼, 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀚𑀸𑀢𑀺𑀬𑁂;

𑀔𑀢𑁆𑀢𑀺𑀬𑁂 𑀩𑁆𑀭𑀸𑀳𑁆𑀫𑀡𑁂 𑀯𑁂𑀲𑁆𑀲𑁂, 𑀲𑀼𑀤𑁆𑀤𑁂 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑁂.

‘‘𑀬𑀸𑀲𑀼 𑀓𑀸𑀲𑀼𑀘𑀺 𑀏𑀢𑀸𑀲𑀼, 𑀤𑀦𑁆𑀢𑁄 𑀚𑀸𑀬𑀢𑀺 𑀲𑀼𑀩𑁆𑀩𑀢𑁄;

𑀥𑀫𑁆𑀫𑀝𑁆𑀞𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀘𑁆𑀘𑀯𑀸𑀤𑀻 𑀳𑀺𑀭𑀻𑀫𑀦𑁄.

‘‘𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻;

𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

‘‘𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄;

𑀢𑀲𑁆𑀫𑀺𑀜𑁆𑀘 𑀯𑀺𑀭𑀚𑁂 𑀔𑁂𑀢𑁆𑀢𑁂, 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸.

‘‘𑀩𑀸𑀮𑀸 𑀘 𑀅𑀯𑀺𑀚𑀸𑀦𑀦𑁆𑀢𑀸, 𑀤𑀼𑀫𑁆𑀫𑁂𑀥𑀸 𑀅𑀲𑁆𑀲𑀼𑀢𑀸𑀯𑀺𑀦𑁄;

𑀩𑀳𑀺𑀤𑁆𑀥𑀸 𑀤𑀤𑀦𑁆𑀢𑀺 𑀤𑀸𑀦𑀸𑀦𑀺, 𑀦 𑀳𑀺 𑀲𑀦𑁆𑀢𑁂 𑀉𑀧𑀸𑀲𑀭𑁂.

‘‘𑀬𑁂 𑀘 𑀲𑀦𑁆𑀢𑁂 𑀉𑀧𑀸𑀲𑀦𑁆𑀢𑀺, 𑀲𑀧𑁆𑀧𑀜𑁆𑀜𑁂 𑀥𑀻𑀭𑀲𑀫𑁆𑀫𑀢𑁂;

𑀲𑀤𑁆𑀥𑀸 𑀘 𑀦𑁂𑀲𑀁 𑀲𑀼𑀕𑀢𑁂, 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸.

‘‘𑀤𑁂𑀯𑀮𑁄𑀓𑀜𑁆𑀘 𑀢𑁂 𑀬𑀦𑁆𑀢𑀺, 𑀓𑀼𑀮𑁂 𑀯𑀸 𑀇𑀥 𑀚𑀸𑀬𑀭𑁂;

𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀁, 𑀅𑀥𑀺𑀕𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺. 𑀦𑀯𑀫𑀁;

𑁧𑁦. 𑀕𑀯𑁂𑀲𑀻𑀲𑀼𑀢𑁆𑀢𑀁

𑁧𑁮𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁; 𑀤𑀺𑀲𑁆𑀯𑀸𑀦 [𑀤𑀺𑀲𑁆𑀯𑀸 (𑀲𑀻. 𑀧𑀻.)] 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 [𑀉𑀓𑁆𑀓𑀫𑁆𑀫 (𑀓𑀢𑁆𑀣𑀘𑀺)] 𑀬𑁂𑀦 𑀢𑀁 𑀲𑀸𑀮𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀲𑀸𑀮𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀪𑀕𑀯𑀢𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬? 𑀦 𑀅𑀓𑀸𑀭𑀡𑁂𑀦 𑀢𑀣𑀸𑀕𑀢𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀪𑀕𑀯𑀢𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬? 𑀦 𑀅𑀓𑀸𑀭𑀡𑁂𑀦 𑀢𑀣𑀸𑀕𑀢𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀦𑀕𑀭𑀁 𑀅𑀳𑁄𑀲𑀺 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀩𑀳𑀼𑀚𑀦𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁. 𑀢𑀁 𑀔𑁄 𑀧𑀦𑀸𑀦𑀦𑁆𑀤, 𑀦𑀕𑀭𑀁 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀓𑀲𑁆𑀲𑀧𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀕𑀯𑁂𑀲𑀻 𑀦𑀸𑀫 𑀉𑀧𑀸𑀲𑀓𑁄 𑀅𑀳𑁄𑀲𑀺 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀻. 𑀕𑀯𑁂𑀲𑀺𑀦𑀸 𑀔𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀉𑀧𑀸𑀲𑀓𑀲𑀢𑀸𑀦𑀺 𑀧𑀝𑀺𑀤𑁂𑀲𑀺𑀢𑀸𑀦𑀺 𑀲𑀫𑀸𑀤𑀧𑀺𑀢𑀸𑀦𑀺 [𑀲𑀫𑀸𑀤𑀸𑀧𑀺𑀢𑀸𑀦𑀺 (?)] 𑀅𑀳𑁂𑀲𑀼𑀁 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀺𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀩𑀳𑀽𑀧𑀓𑀸𑀭𑁄 [𑀩𑀳𑀼𑀓𑀸𑀭𑁄 (𑀓𑀢𑁆𑀣𑀘𑀺)] 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸 [𑀲𑀫𑀸𑀤𑀸𑀧𑁂𑀢𑀸 (?)], 𑀅𑀳𑀜𑁆𑀘𑀫𑁆𑀳𑀺 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀻, 𑀇𑀫𑀸𑀦𑀺 𑀘 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀇𑀘𑁆𑀘𑁂𑀢𑀁 𑀲𑀫𑀲𑀫𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁; 𑀳𑀦𑁆𑀤𑀸𑀳𑀁 𑀅𑀢𑀺𑀭𑁂𑀓𑀸𑀬𑀸’’’𑀢𑀺.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀬𑁂𑀦 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘𑀅𑀚𑁆𑀚𑀢𑀕𑁆𑀕𑁂 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀁 𑀥𑀸𑀭𑁂𑀣𑀸’𑀢𑀺! 𑀅𑀣 𑀔𑁄, 𑀆𑀦𑀦𑁆𑀤, 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑁆𑀬𑁄 𑀔𑁄 𑀕𑀯𑁂𑀲𑀻 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀬𑁆𑀬𑁄 𑀳𑀺 𑀦𑀸𑀫 𑀕𑀯𑁂𑀲𑀻 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀪𑀯𑀺𑀲𑁆𑀲𑀢𑀺. 𑀓𑀺𑀫𑀗𑁆𑀕𑀁 [𑀓𑀺𑀫𑀗𑁆𑀕 (𑀲𑀻. 𑀧𑀻.)] 𑀧𑀦 𑀫𑀬’𑀦𑁆𑀢𑀺 [𑀧𑀦 𑀦 𑀫𑀬𑀦𑁆𑀢𑀺 (𑀲𑀻.) 𑀅. 𑀦𑀺. 𑁪.𑁧𑁫𑁯; 𑀘𑀽𑀴𑀯. 𑁩𑁩𑁦; 𑀲𑀁. 𑀦𑀺. 𑁫.𑁧𑁦𑁨𑁦 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀁]! 𑀅𑀣 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀬𑁂𑀦 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀯𑁂𑀲𑀺𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀚𑁆𑀚𑀢𑀕𑁆𑀕𑁂 𑀅𑀬𑁆𑀬𑁄 𑀕𑀯𑁂𑀲𑀻 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀥𑀸𑀭𑁂𑀢𑀽’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀺𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸, 𑀅𑀳𑀜𑁆𑀘𑀫𑁆𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻, 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀇𑀘𑁆𑀘𑁂𑀢𑀁 𑀲𑀫𑀲𑀫𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁; 𑀳𑀦𑁆𑀤𑀸𑀳𑀁 𑀅𑀢𑀺𑀭𑁂𑀓𑀸𑀬𑀸’’’𑀢𑀺!

‘‘𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀬𑁂𑀦 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘𑀅𑀚𑁆𑀚𑀢𑀕𑁆𑀕𑁂 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀁 𑀥𑀸𑀭𑁂𑀣 𑀆𑀭𑀸𑀘𑀸𑀭𑀺 [𑀅𑀦𑀸𑀘𑀸𑀭𑀺𑀁 (𑀧𑀻.)] 𑀯𑀺𑀭𑀢𑀁 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑁆𑀬𑁄 𑀔𑁄 𑀕𑀯𑁂𑀲𑀻 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀬𑁆𑀬𑁄 𑀳𑀺 𑀦𑀸𑀫 𑀕𑀯𑁂𑀲𑀻 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀢𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺! 𑀅𑀣 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀬𑁂𑀦 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀯𑁂𑀲𑀺𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀚𑁆𑀚𑀢𑀕𑁆𑀕𑁂 𑀅𑀬𑁆𑀬𑁄 𑀕𑀯𑁂𑀲𑀻 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀥𑀸𑀭𑁂𑀢𑀼 𑀆𑀭𑀸𑀘𑀸𑀭𑀺𑀦𑁄 𑀯𑀺𑀭𑀢𑀸 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀺𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀳𑀜𑁆𑀘𑀫𑁆𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀅𑀳𑀜𑁆𑀘𑀫𑁆𑀳𑀺 𑀩𑁆𑀭𑀳𑁆𑀫𑀘𑀸𑀭𑀻 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀆𑀭𑀸𑀘𑀸𑀭𑀺𑀦𑁄 𑀯𑀺𑀭𑀢𑀸 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀇𑀘𑁆𑀘𑁂𑀢𑀁 𑀲𑀫𑀲𑀫𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁; 𑀳𑀦𑁆𑀤𑀸𑀳𑀁 𑀅𑀢𑀺𑀭𑁂𑀓𑀸𑀬𑀸’’’𑀢𑀺.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀬𑁂𑀦 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘𑀅𑀚𑁆𑀚𑀢𑀕𑁆𑀕𑁂 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀏𑀓𑀪𑀢𑁆𑀢𑀺𑀓𑀁 𑀥𑀸𑀭𑁂𑀣 𑀭𑀢𑁆𑀢𑀽𑀧𑀭𑀢𑀁 𑀯𑀺𑀭𑀢𑀁 𑀯𑀺𑀓𑀸𑀮𑀪𑁄𑀚𑀦𑀸’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑁆𑀬𑁄 𑀔𑁄 𑀕𑀯𑁂𑀲𑀻 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀬𑁆𑀬𑁄 𑀳𑀺 𑀦𑀸𑀫 𑀕𑀯𑁂𑀲𑀻 𑀏𑀓𑀪𑀢𑁆𑀢𑀺𑀓𑁄 𑀪𑀯𑀺𑀲𑁆𑀲𑀢𑀺 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺! 𑀅𑀣 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀬𑁂𑀦 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀯𑁂𑀲𑀺𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀚𑁆𑀚𑀢𑀕𑁆𑀕𑁂 𑀅𑀬𑁆𑀬𑁄 𑀕𑀯𑁂𑀲𑀻 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀏𑀓𑀪𑀢𑁆𑀢𑀺𑀓𑁂 𑀥𑀸𑀭𑁂𑀢𑀼 𑀭𑀢𑁆𑀢𑀽𑀧𑀭𑀢𑁂 𑀯𑀺𑀭𑀢𑁂 𑀯𑀺𑀓𑀸𑀮𑀪𑁄𑀚𑀦𑀸’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀺𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀳𑀜𑁆𑀘𑀫𑁆𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀅𑀳𑀜𑁆𑀘𑀫𑁆𑀳𑀺 𑀩𑁆𑀭𑀳𑁆𑀫𑀘𑀸𑀭𑀻 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀆𑀭𑀸𑀘𑀸𑀭𑀺𑀦𑁄 𑀯𑀺𑀭𑀢𑀸 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀅𑀳𑀜𑁆𑀘𑀫𑁆𑀳𑀺 𑀏𑀓𑀪𑀢𑁆𑀢𑀺𑀓𑁄 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀏𑀓𑀪𑀢𑁆𑀢𑀺𑀓𑀸 𑀭𑀢𑁆𑀢𑀽𑀧𑀭𑀢𑀸 𑀯𑀺𑀭𑀢𑀸 𑀯𑀺𑀓𑀸𑀮𑀪𑁄𑀚𑀦𑀸. 𑀇𑀘𑁆𑀘𑁂𑀢𑀁 𑀲𑀫𑀲𑀫𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁; 𑀳𑀦𑁆𑀤𑀸𑀳𑀁 𑀅𑀢𑀺𑀭𑁂𑀓𑀸𑀬𑀸’’’𑀢𑀺.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀬𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’𑀦𑁆𑀢𑀺. 𑀅𑀮𑀢𑁆𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀻 𑀉𑀧𑀸𑀲𑀓𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀔𑁄 𑀧𑀦𑀸𑀦𑀦𑁆𑀤, 𑀕𑀯𑁂𑀲𑀻 𑀪𑀺𑀓𑁆𑀔𑀼 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀦𑀦𑁆𑀤, 𑀕𑀯𑁂𑀲𑀻 𑀪𑀺𑀓𑁆𑀔𑀼 𑀅𑀭𑀳𑀢𑀁 𑀅𑀳𑁄𑀲𑀺.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀢𑁂𑀲 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑁆𑀬𑁄 𑀔𑁄 𑀕𑀯𑁂𑀲𑀻 𑀅𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑁄 𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀤𑀧𑁂𑀢𑀸. 𑀅𑀬𑁆𑀬𑁄 𑀳𑀺 𑀦𑀸𑀫 𑀕𑀯𑁂𑀲𑀻 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺. 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺! 𑀅𑀣 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀬𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’𑀦𑁆𑀢𑀺. 𑀅𑀮𑀪𑀺𑀁𑀲𑀼 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀪𑀺𑀁𑀲𑀼 𑀉𑀧𑀲𑀫𑁆𑀧𑀤𑀁.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀕𑀯𑁂𑀲𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀇𑀫𑀲𑁆𑀲 𑀅𑀦𑀼𑀢𑁆𑀢𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀻 𑀳𑁄𑀫𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀅𑀳𑁄 𑀯𑀢𑀺𑀫𑀸𑀦𑀺𑀧𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀇𑀫𑀲𑁆𑀲 𑀅𑀦𑀼𑀢𑁆𑀢𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀦𑀺𑀓𑀸𑀫𑀮𑀸𑀪𑀺𑀦𑁄 𑀅𑀲𑁆𑀲𑀼 𑀅𑀓𑀺𑀘𑁆𑀙𑀮𑀸𑀪𑀺𑀦𑁄 𑀅𑀓𑀲𑀺𑀭𑀮𑀸𑀪𑀺𑀦𑁄’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀯𑀽𑀧𑀓𑀝𑁆𑀞𑀸 [𑀪𑀺𑀓𑁆𑀔𑀼𑀲𑀢𑀸𑀦𑀺 𑀏𑀓𑁂𑀓𑀸 𑀯𑀽𑀧𑀓𑀝𑁆𑀞𑀸 (𑀲𑁆𑀬𑀸. 𑀓𑀁.)] 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀦𑁆𑀢𑀸 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀺𑀁𑀲𑀼’’.

‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀯𑁂𑀲𑀻𑀧𑀫𑀼𑀔𑀸𑀦𑀺 𑀉𑀢𑁆𑀢𑀭𑀼𑀢𑁆𑀢𑀭𑀺 [𑀉𑀢𑁆𑀢𑀭𑀼𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀡𑀻𑀢𑀧𑀡𑀻𑀢𑀁 𑀯𑀸𑀬𑀫𑀫𑀸𑀦𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀸𑀓𑀁𑀲𑀼. 𑀢𑀲𑁆𑀫𑀸𑀢𑀺𑀳, 𑀆𑀦𑀦𑁆𑀤, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀢𑁆𑀢𑀭𑀼𑀢𑁆𑀢𑀭𑀺 𑀧𑀡𑀻𑀢𑀧𑀡𑀻𑀢𑀁 𑀯𑀸𑀬𑀫𑀫𑀸𑀦𑀸 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀯𑁄, 𑀆𑀦𑀦𑁆𑀤, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀤𑀲𑀫𑀁.

𑀉𑀧𑀸𑀲𑀓𑀯𑀕𑁆𑀕𑁄 𑀢𑀢𑀺𑀬𑁄.