𑁧. 𑀕𑀺𑀮𑀸𑀦𑀲𑀼𑀢𑁆𑀢𑀁

𑁧𑁨𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀕𑀺𑀮𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 𑀕𑀺𑀮𑀸𑀦𑀓𑀁; 𑀤𑀺𑀲𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀬𑀁 𑀓𑀺𑀜𑁆𑀘𑀺 [𑀬𑀁 𑀓𑀺𑀜𑁆𑀘𑀺 (𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 [𑀪𑀺𑀓𑁆𑀔𑀯𑁂 𑀤𑀼𑀩𑁆𑀩𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑀺𑀮𑀸𑀦𑀓𑀁 𑀧𑀜𑁆𑀘 𑀥𑀫𑁆𑀫𑀸 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀻’’’𑀢𑀺.

‘‘𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀢𑀺, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀻, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺], 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻, 𑀫𑀭𑀡𑀲𑀜𑁆𑀜𑀸 𑀔𑁄 𑀧𑀦𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺. 𑀬𑀁 𑀓𑀺𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀁 𑀤𑀼𑀩𑁆𑀩𑀮𑀁 𑀕𑀺𑀮𑀸𑀦𑀓𑀁 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀻’’’𑀢𑀺. 𑀧𑀞𑀫𑀁.