𑁫. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀁

𑁧𑁦𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀨𑀸𑀲𑀼𑀯𑀺𑀳𑀸𑀭𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁…𑀧𑁂… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘. 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀸’’𑀢𑀺. 𑀧𑀜𑁆𑀘𑀫𑀁.