(𑁧𑁦) 𑁫. 𑀓𑀓𑀼𑀥𑀯𑀕𑁆𑀕𑁄

𑁧. 𑀧𑀞𑀫𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁯𑁧. ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀤𑀸. 𑀓𑀢𑀫𑀸 𑀧𑀜𑁆𑀘? 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀲𑀼𑀢𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀫𑁆𑀧𑀤𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁯𑁨. ‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀤𑀸. 𑀓𑀢𑀫𑀸 𑀧𑀜𑁆𑀘? 𑀲𑀻𑀮𑀲𑀫𑁆𑀧𑀤𑀸, 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸, 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀫𑁆𑀧𑀤𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀁

𑁯𑁩. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺; 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺; 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺; 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺; 𑀲𑀫𑁆𑀫𑀤𑁂𑀯 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀸𑀦𑀻’’𑀢𑀺. 𑀢𑀢𑀺𑀬𑀁.

𑁪. 𑀨𑀸𑀲𑀼𑀯𑀺𑀳𑀸𑀭𑀲𑀼𑀢𑁆𑀢𑀁

𑁯𑁪. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀨𑀸𑀲𑀼𑀯𑀺𑀳𑀸𑀭𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀨𑀸𑀲𑀼𑀯𑀺𑀳𑀸𑀭𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀓𑀼𑀧𑁆𑀧𑀲𑀼𑀢𑁆𑀢𑀁

𑁯𑁫. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑁄𑀢𑀺, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑁄𑀢𑀺, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑁄𑀢𑀺, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑁄𑀢𑀺, 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀼𑀢𑀥𑀭𑀲𑀼𑀢𑁆𑀢𑀁

𑁯𑁬. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀲𑁂𑀯𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀝𑁆𑀞𑁄 𑀳𑁄𑀢𑀺 𑀅𑀧𑁆𑀧𑀓𑀺𑀘𑁆𑀘𑁄 𑀲𑀼𑀪𑀭𑁄 𑀲𑀼𑀲𑀦𑁆𑀢𑁄𑀲𑁄 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀼; 𑀅𑀧𑁆𑀧𑀸𑀳𑀸𑀭𑁄 𑀳𑁄𑀢𑀺 𑀅𑀦𑁄𑀤𑀭𑀺𑀓𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄; 𑀅𑀧𑁆𑀧𑀫𑀺𑀤𑁆𑀥𑁄 𑀳𑁄𑀢𑀺 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄; 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀲𑁂𑀯𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀓𑀣𑀸𑀲𑀼𑀢𑁆𑀢𑀁

𑁯𑁭. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀝𑁆𑀞𑁄 𑀳𑁄𑀢𑀺 𑀅𑀧𑁆𑀧𑀓𑀺𑀘𑁆𑀘𑁄 𑀲𑀼𑀪𑀭𑁄 𑀲𑀼𑀲𑀦𑁆𑀢𑁄𑀲𑁄 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀼; 𑀅𑀧𑁆𑀧𑀸𑀳𑀸𑀭𑁄 𑀳𑁄𑀢𑀺 𑀅𑀦𑁄𑀤𑀭𑀺𑀓𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄; 𑀅𑀧𑁆𑀧𑀫𑀺𑀤𑁆𑀥𑁄 𑀳𑁄𑀢𑀺 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄; 𑀬𑀸𑀬𑀁 𑀓𑀣𑀸 𑀆𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀆𑀭𑀜𑁆𑀜𑀓𑀲𑀼𑀢𑁆𑀢𑀁

𑁯𑁮. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀝𑁆𑀞𑁄 𑀳𑁄𑀢𑀺 𑀅𑀧𑁆𑀧𑀓𑀺𑀘𑁆𑀘𑁄 𑀲𑀼𑀪𑀭𑁄 𑀲𑀼𑀲𑀦𑁆𑀢𑁄𑀲𑁄 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀼; 𑀅𑀧𑁆𑀧𑀸𑀳𑀸𑀭𑁄 𑀳𑁄𑀢𑀺 𑀅𑀦𑁄𑀤𑀭𑀺𑀓𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄; 𑀅𑀧𑁆𑀧𑀫𑀺𑀤𑁆𑀥𑁄 𑀳𑁄𑀢𑀺 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄; 𑀆𑀭𑀜𑁆𑀜𑀓𑁄 𑀳𑁄𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁄; 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀓𑀼𑀧𑁆𑀧𑀁 𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀲𑀻𑀳𑀲𑀼𑀢𑁆𑀢𑀁

𑁯𑁯. ‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀢𑀺; 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀢𑀺; 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀢𑀼𑀤𑁆𑀤𑀺𑀲𑀸 (𑀲𑁆𑀬𑀸. 𑀓𑀁. 𑀧𑀻. 𑀓.) 𑀅. 𑀦𑀺. 𑁪.𑁩𑁩; 𑀲𑀁. 𑀦𑀺. 𑁩.𑁭𑁮 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀦𑀼𑀯𑀺𑀮𑁄𑀓𑁂𑀢𑀺; 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀢𑀼𑀤𑁆𑀤𑀺𑀲𑀸 (𑀲𑁆𑀬𑀸. 𑀓𑀁. 𑀧𑀻. 𑀓.) 𑀅. 𑀦𑀺. 𑁪.𑁩𑁩; 𑀲𑀁. 𑀦𑀺. 𑁩.𑁭𑁮 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺; 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀲𑁄 𑀳𑀢𑁆𑀣𑀺𑀲𑁆𑀲 𑀘𑁂𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀧𑀳𑀸𑀭𑀁 𑀤𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀫𑀳𑀺𑀁𑀲𑀲𑁆𑀲 [𑀫𑀳𑀺𑀲𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘𑁂𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀧𑀳𑀸𑀭𑀁 𑀤𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀕𑀯𑀲𑁆𑀲 𑀘𑁂𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀧𑀳𑀸𑀭𑀁 𑀤𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀤𑀻𑀧𑀺𑀲𑁆𑀲 𑀘𑁂𑀧𑀺 𑀧𑀳𑀸𑀭𑀁 𑀤𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀧𑀳𑀸𑀭𑀁 𑀤𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀔𑀼𑀤𑁆𑀤𑀓𑀸𑀦𑀜𑁆𑀘𑁂𑀧𑀺 𑀧𑀸𑀡𑀸𑀦𑀁 𑀧𑀳𑀸𑀭𑀁 𑀤𑁂𑀢𑀺 𑀅𑀦𑁆𑀢𑀫𑀲𑁄 𑀲𑀲𑀩𑀺𑀴𑀸𑀭𑀸𑀦𑀫𑁆𑀧𑀺 [𑀲𑀲𑀩𑀺𑀴𑀸𑀭𑀸𑀦𑀁 (𑀓.)], 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀧𑀳𑀸𑀭𑀁 𑀤𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀫𑀸 𑀫𑁂 𑀬𑁄𑀕𑁆𑀕𑀧𑀣𑁄 𑀦𑀲𑁆𑀲𑀸’𑀢𑀺.

‘‘𑀲𑀻𑀳𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀤𑀫𑀲𑁆𑀲 𑀳𑁄𑀢𑀺 𑀲𑀻𑀳𑀦𑀸𑀤𑀲𑁆𑀫𑀺𑀁. 𑀪𑀺𑀓𑁆𑀔𑀽𑀦𑀜𑁆𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀉𑀧𑀸𑀲𑀓𑀸𑀦𑀜𑁆𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀉𑀧𑀸𑀲𑀺𑀓𑀸𑀦𑀜𑁆𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁; 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑁆𑀢𑀫𑀲𑁄 𑀅𑀦𑁆𑀦𑀪𑀸𑀭𑀦𑁂𑀲𑀸𑀤𑀸𑀦𑀫𑁆𑀧𑀺 [𑀅𑀦𑁆𑀦𑀪𑀸𑀭𑀦𑁂𑀲𑀸𑀤𑀸𑀦𑀁 (𑀓.)], 𑀲𑀓𑁆𑀓𑀘𑁆𑀘𑀜𑁆𑀜𑁂𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀕𑀭𑀼, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀥𑀫𑁆𑀫𑀕𑀸𑀭𑀯𑁄’’𑀢𑀺. 𑀦𑀯𑀫𑀁.

𑁧𑁦. 𑀓𑀓𑀼𑀥𑀣𑁂𑀭𑀲𑀼𑀢𑁆𑀢𑀁

𑁧𑁦𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. [𑀘𑀽𑀴𑀯. 𑁩𑁩𑁩, 𑁩𑁪𑁧] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀓𑀼𑀥𑁄 𑀦𑀸𑀫 𑀓𑁄𑀮𑀺𑀬𑀧𑀼𑀢𑁆𑀢𑁄 [𑀓𑁄𑀴𑀻𑀬𑀧𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀓.)] 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄. 𑀢𑀲𑁆𑀲 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀳𑁄𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 [𑀫𑀸𑀕𑀥𑀺𑀓𑀸𑀦𑀺 (𑀲𑀻. 𑀧𑀻. 𑀓.)] 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺. 𑀲𑁄 𑀢𑁂𑀦 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦 𑀦𑁂𑀯 𑀅𑀢𑁆𑀢𑀸𑀦𑀁 [𑀦𑁂𑀯𑀢𑁆𑀢𑀸𑀦𑀁 𑀩𑁆𑀬𑀸𑀩𑀸𑀥𑁂𑀢𑀺 (𑀲𑀻.)] 𑀦𑁄 𑀧𑀭𑀁 𑀩𑁆𑀬𑀸𑀩𑀸𑀥𑁂𑀢𑀺.

𑀅𑀣 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄’’𑀢𑀺. 𑀇𑀤𑀫𑀯𑁄𑀘 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀓𑀼𑀥𑁄 𑀦𑀸𑀫, 𑀪𑀦𑁆𑀢𑁂, 𑀓𑁄𑀮𑀺𑀬𑀧𑀼𑀢𑁆𑀢𑁄 𑀫𑀫𑀁 𑀉𑀧𑀝𑁆𑀞𑀸𑀓𑁄 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺. 𑀲𑁄 𑀢𑁂𑀦 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂𑀦 𑀦𑁂𑀯 𑀅𑀢𑁆𑀢𑀸𑀦𑀁 𑀦𑁄 𑀧𑀭𑀁 𑀩𑁆𑀬𑀸𑀩𑀸𑀥𑁂𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺. 𑀲𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄’𑀢𑀺. 𑀇𑀤𑀫𑀯𑁄𑀘, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

‘‘𑀓𑀺𑀁 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 ‘𑀬𑀁 𑀓𑀺𑀜𑁆𑀘𑀺 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀪𑀸𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸’’’𑀢𑀺? ‘‘𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀫𑁂, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑁋 ‘𑀬𑀁 𑀓𑀺𑀜𑁆𑀘𑀺 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀪𑀸𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸’’’𑀢𑀺. ‘‘𑀭𑀓𑁆𑀔𑀲𑁆𑀲𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀯𑀸𑀘𑀁! (𑀭𑀓𑁆𑀔𑀲𑁆𑀲𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀯𑀸𑀘𑀁) [( ) 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺 𑀘𑀽𑀴𑀯. 𑁩𑁩𑁩 𑀧𑀦 𑀲𑀩𑁆𑀩𑀢𑁆𑀣𑀧𑀺 𑀤𑀺𑀲𑁆𑀲𑀢𑀺𑀬𑁂𑀯]! 𑀇𑀤𑀸𑀦𑀺 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑀺𑀲𑁆𑀲𑀢𑀺.

‘‘𑀧𑀜𑁆𑀘𑀺𑀫𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 [𑀓𑀣𑀁 𑀦𑀼 𑀢𑀁 (𑀲𑀻.), 𑀓𑀣𑀁 𑀦𑀼 (𑀲𑁆𑀬𑀸. 𑀓𑀁. 𑀧𑀻. 𑀓.), 𑀓𑀣𑀁 𑀢𑀁 (𑀓𑀢𑁆𑀣𑀘𑀺)] 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫 𑁋 ‘𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀻𑀮𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀲𑀻𑀮𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺 [𑀧𑀘𑁆𑀘𑀸𑀲𑀺𑀁𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄 𑀧𑀭𑀺𑀬𑁄𑀤𑀸𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄’𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄 𑀧𑀭𑀺𑀬𑁄𑀤𑀸𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄’𑀢𑀺. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫 𑁋 ‘𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀆𑀚𑀻𑀯𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀆𑀚𑀻𑀯𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀸 𑀫𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑁄𑀤𑀸𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀸’𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀸 𑀫𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑁄𑀤𑀸𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀸’𑀢𑀺. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫 𑁋 ‘𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫 𑁋 ‘𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫 𑁋 ‘𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦; 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀇𑀫𑁂 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀜𑁆𑀘 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀅𑀳𑀁 𑀔𑁄 𑀧𑀦, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀦 𑀘 𑀫𑀁 𑀲𑀸𑀯𑀓𑀸 𑀲𑀻𑀮𑀢𑁄 𑀭𑀓𑁆𑀔𑀦𑁆𑀢𑀺, 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀲𑀻𑀮𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄 𑀧𑀭𑀺𑀬𑁄𑀤𑀸𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄’𑀢𑀺. 𑀦 𑀘 𑀫𑀁 𑀲𑀸𑀯𑀓𑀸 𑀆𑀚𑀻𑀯𑀢𑁄 𑀭𑀓𑁆𑀔𑀦𑁆𑀢𑀺, 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀆𑀚𑀻𑀯𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀸 𑀫𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑁄𑀤𑀸𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀸’𑀢𑀺. 𑀦 𑀘 𑀫𑀁 𑀲𑀸𑀯𑀓𑀸 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀦𑁆𑀢𑀺, 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀦 𑀘 𑀫𑀁 𑀲𑀸𑀯𑀓𑀸 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀦𑁆𑀢𑀺, 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀦 𑀘 𑀫𑀁 𑀲𑀸𑀯𑀓𑀸 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀦𑁆𑀢𑀺, 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺. 𑀤𑀲𑀫𑀁.

𑀓𑀓𑀼𑀥𑀯𑀕𑁆𑀕𑁄 𑀧𑀜𑁆𑀘𑀫𑁄.