𑁧𑁦. 𑀤𑀼𑀢𑀺𑀬𑀲𑁂𑀔𑀲𑀼𑀢𑁆𑀢𑀁

𑁯𑁦. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀩𑀳𑀼𑀓𑀺𑀘𑁆𑀘𑁄 𑀳𑁄𑀢𑀺 𑀩𑀳𑀼𑀓𑀭𑀡𑀻𑀬𑁄 𑀯𑀺𑀬𑀢𑁆𑀢𑁄 𑀓𑀺𑀁𑀓𑀭𑀡𑀻𑀬𑁂𑀲𑀼; 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀫𑁆𑀫𑁂𑀦 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺; 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦; 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀅𑀓𑀸𑀮𑁂𑀦 𑀕𑀸𑀫𑀁 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺; 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀬𑀸𑀬𑀁 𑀓𑀣𑀸 𑀆𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀦 𑀅𑀓𑀺𑀘𑁆𑀙𑀮𑀸𑀪𑀻 𑀦 𑀅𑀓𑀲𑀺𑀭𑀮𑀸𑀪𑀻 [𑀓𑀺𑀘𑁆𑀙𑀮𑀸𑀪𑀻 𑀓𑀲𑀺𑀭𑀮𑀸𑀪𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻)]; 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀦𑀸𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀦 𑀩𑀳𑀼𑀓𑀺𑀘𑁆𑀘𑁄 𑀳𑁄𑀢𑀺 𑀦 𑀩𑀳𑀼𑀓𑀭𑀡𑀻𑀬𑁄 𑀯𑀺𑀬𑀢𑁆𑀢𑁄 𑀓𑀺𑀁𑀓𑀭𑀡𑀻𑀬𑁂𑀲𑀼; 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀦 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀫𑁆𑀫𑁂𑀦 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀺; 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦; 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀦 𑀅𑀢𑀺𑀓𑀸𑀮𑁂𑀦 𑀕𑀸𑀫𑀁 𑀧𑀯𑀺𑀲𑀢𑀺, 𑀦𑀸𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺; 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀬𑀸𑀬𑀁 𑀓𑀣𑀸 𑀆𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻; 𑀦 𑀭𑀺𑀜𑁆𑀘𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀅𑀦𑀼𑀬𑀼𑀜𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀤𑀲𑀫𑀁.

𑀣𑁂𑀭𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.