𑁭. 𑀅𑀪𑀺𑀡𑁆𑀳𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀞𑀸𑀦𑀲𑀼𑀢𑁆𑀢𑀁

𑁫𑁭. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀦𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. 𑀓𑀢𑀫𑀸𑀦𑀺 𑀧𑀜𑁆𑀘? ‘𑀚𑀭𑀸𑀥𑀫𑁆𑀫𑁄𑀫𑁆𑀳𑀺, 𑀚𑀭𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. ‘𑀩𑁆𑀬𑀸𑀥𑀺𑀥𑀫𑁆𑀫𑁄𑀫𑁆𑀳𑀺, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. ‘𑀫𑀭𑀡𑀥𑀫𑁆𑀫𑁄𑀫𑁆𑀳𑀺, 𑀫𑀭𑀡𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. ‘𑀲𑀩𑁆𑀩𑁂𑀳𑀺 𑀫𑁂 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. ‘𑀓𑀫𑁆𑀫𑀲𑁆𑀲𑀓𑁄𑀫𑁆𑀳𑀺, 𑀓𑀫𑁆𑀫𑀤𑀸𑀬𑀸𑀤𑁄 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑀝𑀺𑀲𑀭𑀡𑁄. 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀚𑀭𑀸𑀥𑀫𑁆𑀫𑁄𑀫𑁆𑀳𑀺, 𑀚𑀭𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀬𑁄𑀩𑁆𑀩𑀦𑁂 𑀬𑁄𑀩𑁆𑀩𑀦𑀫𑀤𑁄, 𑀬𑁂𑀦 𑀫𑀤𑁂𑀦 𑀫𑀢𑁆𑀢𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀬𑁄 𑀬𑁄𑀩𑁆𑀩𑀦𑁂 𑀬𑁄𑀩𑁆𑀩𑀦𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀯𑀸 𑀧𑀳𑀻𑀬𑀢𑀺 𑀢𑀦𑀼 𑀯𑀸 𑀧𑀦 𑀳𑁄𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀚𑀭𑀸𑀥𑀫𑁆𑀫𑁄𑀫𑁆𑀳𑀺, 𑀚𑀭𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀩𑁆𑀬𑀸𑀥𑀺𑀥𑀫𑁆𑀫𑁄𑀫𑁆𑀳𑀺, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀆𑀭𑁄𑀕𑁆𑀬𑁂 𑀆𑀭𑁄𑀕𑁆𑀬𑀫𑀤𑁄, 𑀬𑁂𑀦 𑀫𑀤𑁂𑀦 𑀫𑀢𑁆𑀢𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀬𑁄 𑀆𑀭𑁄𑀕𑁆𑀬𑁂 𑀆𑀭𑁄𑀕𑁆𑀬𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀯𑀸 𑀧𑀳𑀻𑀬𑀢𑀺 𑀢𑀦𑀼 𑀯𑀸 𑀧𑀦 𑀳𑁄𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀩𑁆𑀬𑀸𑀥𑀺𑀥𑀫𑁆𑀫𑁄𑀫𑁆𑀳𑀺, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀫𑀭𑀡𑀥𑀫𑁆𑀫𑁄𑀫𑁆𑀳𑀺, 𑀫𑀭𑀡𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑁂 𑀚𑀻𑀯𑀺𑀢𑀫𑀤𑁄, 𑀬𑁂𑀦 𑀫𑀤𑁂𑀦 𑀫𑀢𑁆𑀢𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀬𑁄 𑀚𑀻𑀯𑀺𑀢𑁂 𑀚𑀻𑀯𑀺𑀢𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀯𑀸 𑀧𑀳𑀻𑀬𑀢𑀺 𑀢𑀦𑀼 𑀯𑀸 𑀧𑀦 𑀳𑁄𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀫𑀭𑀡𑀥𑀫𑁆𑀫𑁄𑀫𑁆𑀳𑀺, 𑀫𑀭𑀡𑀁 𑀅𑀦𑀢𑀻𑀢𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀲𑀩𑁆𑀩𑁂𑀳𑀺 𑀫𑁂 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀧𑀺𑀬𑁂𑀲𑀼 𑀫𑀦𑀸𑀧𑁂𑀲𑀼 𑀬𑁄 𑀙𑀦𑁆𑀤𑀭𑀸𑀕𑁄 𑀬𑁂𑀦 𑀭𑀸𑀕𑁂𑀦 𑀭𑀢𑁆𑀢𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀬𑁄 𑀧𑀺𑀬𑁂𑀲𑀼 𑀫𑀦𑀸𑀧𑁂𑀲𑀼 𑀙𑀦𑁆𑀤𑀭𑀸𑀕𑁄 𑀲𑁄 𑀲𑀩𑁆𑀩𑀲𑁄 𑀯𑀸 𑀧𑀳𑀻𑀬𑀢𑀺 𑀢𑀦𑀼 𑀯𑀸 𑀧𑀦 𑀳𑁄𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀲𑀩𑁆𑀩𑁂𑀳𑀺 𑀫𑁂 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀓𑀫𑁆𑀫𑀲𑁆𑀲𑀓𑁄𑀫𑁆𑀳𑀺, 𑀓𑀫𑁆𑀫𑀤𑀸𑀬𑀸𑀤𑁄 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑀝𑀺𑀲𑀭𑀡𑁄, 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀲𑀩𑁆𑀩𑀲𑁄 𑀯𑀸 𑀤𑀼𑀘𑁆𑀘𑀭𑀺𑀢𑀁 𑀧𑀳𑀻𑀬𑀢𑀺 𑀢𑀦𑀼 𑀯𑀸 𑀧𑀦 𑀳𑁄𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘𑀓𑀫𑁆𑀫𑀲𑁆𑀲𑀓𑁄𑀫𑁆𑀳𑀺, 𑀓𑀫𑁆𑀫𑀤𑀸𑀬𑀸𑀤𑁄 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑀝𑀺𑀲𑀭𑀡𑁄, 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸.

‘‘𑀲 𑀔𑁄 [𑀲𑀘𑁂 (𑀧𑀻. 𑀓.)] 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀅𑀳𑀜𑁆𑀜𑁂𑀯𑁂𑀓𑁄 𑀚𑀭𑀸𑀥𑀫𑁆𑀫𑁄 [𑀅𑀳𑀜𑁆𑀘𑁂𑀯𑁂𑀓𑁄 𑀚𑀭𑀸𑀥𑀫𑁆𑀫𑁄𑀫𑁆𑀳𑀺 (𑀓.)] 𑀚𑀭𑀁 𑀅𑀦𑀢𑀻𑀢𑁄, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀚𑀭𑀸𑀥𑀫𑁆𑀫𑀸 𑀚𑀭𑀁 𑀅𑀦𑀢𑀻𑀢𑀸’𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀅𑀳𑀜𑁆𑀜𑁂𑀯𑁂𑀓𑁄 𑀩𑁆𑀬𑀸𑀥𑀺𑀥𑀫𑁆𑀫𑁄 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀩𑁆𑀬𑀸𑀥𑀺𑀥𑀫𑁆𑀫𑀸 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑀸’𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀅𑀳𑀜𑁆𑀜𑁂𑀯𑁂𑀓𑁄 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸 𑀫𑀭𑀡𑀁 𑀅𑀦𑀢𑀻𑀢𑀸’𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀫𑀬𑁆𑀳𑁂𑀯𑁂𑀓𑀲𑁆𑀲 𑀲𑀩𑁆𑀩𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄, 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀅𑀳𑀜𑁆𑀜𑁂𑀯𑁂𑀓𑁄 𑀓𑀫𑁆𑀫𑀲𑁆𑀲𑀓𑁄 𑀓𑀫𑁆𑀫𑀤𑀸𑀬𑀸𑀤𑁄 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑁆𑀧𑀝𑀺𑀲𑀭𑀡𑁄, 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑁄 𑀪𑀯𑀺𑀲𑁆𑀲𑀸𑀫𑀺; 𑀅𑀣 𑀔𑁄 𑀬𑀸𑀯𑀢𑀸 𑀲𑀢𑁆𑀢𑀸𑀦𑀁 𑀆𑀕𑀢𑀺 𑀕𑀢𑀺 𑀘𑀼𑀢𑀺 𑀉𑀧𑀧𑀢𑁆𑀢𑀺 𑀲𑀩𑁆𑀩𑁂 𑀲𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀺 𑀓𑀫𑁆𑀫𑀩𑀦𑁆𑀥𑀼 𑀓𑀫𑁆𑀫𑀧𑁆𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀢𑀲𑁆𑀲 𑀢𑀁 𑀞𑀸𑀦𑀁 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀁𑀬𑁄𑀚𑀦𑀸𑀦𑀺 𑀲𑀩𑁆𑀩𑀲𑁄 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀻’’𑀢𑀺.

‘‘𑀩𑁆𑀬𑀸𑀥𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄;

𑀬𑀣𑀸 𑀥𑀫𑁆𑀫𑀸 𑀢𑀣𑀸 𑀲𑀢𑁆𑀢𑀸 [𑀲𑀦𑁆𑀢𑀸 (𑀲𑁆𑀬𑀸. 𑀓𑀁.)], 𑀚𑀺𑀕𑀼𑀘𑁆𑀙𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸.

‘‘𑀅𑀳𑀜𑁆𑀘𑁂 𑀢𑀁 𑀚𑀺𑀕𑀼𑀘𑁆𑀙𑁂𑀬𑁆𑀬𑀁, 𑀏𑀯𑀁 𑀥𑀫𑁆𑀫𑁂𑀲𑀼 𑀧𑀸𑀡𑀺𑀲𑀼;

𑀦 𑀫𑁂𑀢𑀁 𑀧𑀢𑀺𑀭𑀽𑀧𑀲𑁆𑀲, 𑀫𑀫 𑀏𑀯𑀁 𑀯𑀺𑀳𑀸𑀭𑀺𑀦𑁄.

‘‘𑀲𑁄𑀳𑀁 𑀏𑀯𑀁 𑀯𑀺𑀳𑀭𑀦𑁆𑀢𑁄, 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀁;

𑀆𑀭𑁄𑀕𑁆𑀬𑁂 𑀬𑁄𑀩𑁆𑀩𑀦𑀲𑁆𑀫𑀺𑀜𑁆𑀘, 𑀚𑀻𑀯𑀺𑀢𑀲𑁆𑀫𑀺𑀜𑁆𑀘 𑀬𑁂 𑀫𑀤𑀸.

‘‘𑀲𑀩𑁆𑀩𑁂 𑀫𑀤𑁂 𑀅𑀪𑀺𑀪𑁄𑀲𑁆𑀫𑀺, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄 [𑀦𑁂𑀓𑁆𑀔𑀫𑁆𑀫𑁂 𑀤𑀝𑁆𑀞𑀼 𑀔𑁂𑀫𑀢𑀁 (𑀅. 𑀦𑀺. 𑁩.𑁩𑁯) 𑀉𑀪𑀬𑀢𑁆𑀣𑀧𑀺 𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺];

𑀢𑀲𑁆𑀲 𑀫𑁂 𑀅𑀳𑀼 𑀉𑀲𑁆𑀲𑀸𑀳𑁄, 𑀦𑀺𑀩𑁆𑀩𑀸𑀦𑀁 𑀅𑀪𑀺𑀧𑀲𑁆𑀲𑀢𑁄.

‘‘𑀦𑀸𑀳𑀁 𑀪𑀩𑁆𑀩𑁄 𑀏𑀢𑀭𑀳𑀺, 𑀓𑀸𑀫𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁;

𑀅𑀦𑀺𑀯𑀢𑁆𑀢𑀺 [𑀅𑀦𑀺𑀯𑀢𑁆𑀢𑀻 (?)] 𑀪𑀯𑀺𑀲𑁆𑀲𑀸𑀫𑀺, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄’’𑀢𑀺. 𑀲𑀢𑁆𑀢𑀫𑀁;