𑁮. 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀲𑀼𑀢𑁆𑀢𑀁

𑁫𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸 𑀲𑀚𑁆𑀚𑀸𑀦𑀺 𑀥𑀦𑀽𑀦𑀺 𑀆𑀤𑀸𑀬 𑀓𑀼𑀓𑁆𑀓𑀼𑀭𑀲𑀗𑁆𑀖𑀧𑀭𑀺𑀯𑀼𑀢𑀸 𑀫𑀳𑀸𑀯𑀦𑁂 𑀅𑀦𑀼𑀘𑀗𑁆𑀓𑀫𑀫𑀸𑀦𑀸 𑀅𑀦𑀼𑀯𑀺𑀘𑀭𑀫𑀸𑀦𑀸 𑀅𑀤𑁆𑀤𑀲𑀼 𑀪𑀕𑀯𑀦𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁; 𑀤𑀺𑀲𑁆𑀯𑀸𑀦 𑀲𑀚𑁆𑀚𑀸𑀦𑀺 𑀥𑀦𑀽𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀓𑁆𑀓𑀼𑀭𑀲𑀗𑁆𑀖𑀁 𑀏𑀓𑀫𑀦𑁆𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀸 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸𑀦𑀸𑀫𑁄 𑀮𑀺𑀘𑁆𑀙𑀯𑀺 𑀫𑀳𑀸𑀯𑀦𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀤𑁆𑀤𑀲 𑀢𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑁂 𑀢𑀼𑀡𑁆𑀳𑀻𑀪𑀽𑀢𑁂 𑀢𑀼𑀡𑁆𑀳𑀻𑀪𑀽𑀢𑁂 𑀧𑀜𑁆𑀚𑀮𑀺𑀓𑁂 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑁂; 𑀤𑀺𑀲𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀮𑀺𑀘𑁆𑀙𑀯𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻’’’𑀢𑀺!

‘‘𑀓𑀺𑀁 𑀧𑀦 𑀢𑁆𑀯𑀁, 𑀫𑀳𑀸𑀦𑀸𑀫, 𑀏𑀯𑀁 𑀯𑀤𑁂𑀲𑀺 𑁋 ‘𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀚𑁆𑀚𑀻’’’𑀢𑀺? ‘‘𑀇𑀫𑁂, 𑀪𑀦𑁆𑀢𑁂, 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸 𑀘𑀡𑁆𑀟𑀸 𑀨𑀭𑀼𑀲𑀸 𑀅𑀧𑀸𑀦𑀼𑀪𑀸 [𑀅𑀧𑀚𑀳𑀸𑀢𑀺 (𑀲𑀻.), 𑀅𑀧𑀸𑀝𑀼𑀪𑀸 (𑀲𑁆𑀬𑀸. 𑀓𑀁.), 𑀅𑀧𑀚𑀳𑀸 (𑀧𑀻.), 𑀅𑀧𑀸𑀦𑀼𑀢𑀸 (𑀓𑀢𑁆𑀣𑀘𑀺)]. 𑀬𑀸𑀦𑀺𑀧𑀺 𑀢𑀸𑀦𑀺 𑀓𑀼𑀮𑁂𑀲𑀼 𑀧𑀳𑁂𑀡𑀓𑀸𑀦𑀺 [𑀧𑀳𑀻𑀦𑀓𑀸𑀦𑀺 (𑀲𑀻.), 𑀧𑀳𑀻𑀡𑀓𑀸𑀦𑀺 (𑀲𑁆𑀬𑀸. 𑀓𑀁. 𑀧𑀻.)] 𑀧𑀳𑀻𑀬𑀦𑁆𑀢𑀺, 𑀉𑀘𑁆𑀙𑀽𑀢𑀺 𑀯𑀸 𑀩𑀤𑀭𑀸𑀢𑀺 𑀯𑀸 𑀧𑀽𑀯𑀸𑀢𑀺 𑀯𑀸 𑀫𑁄𑀤𑀓𑀸𑀢𑀺 𑀯𑀸 𑀲𑀁𑀓𑀼𑀮𑀺𑀓𑀸𑀢𑀺 𑀯𑀸 [𑀲𑀓𑁆𑀔𑀮𑀺𑀓𑀸𑀢𑀺 𑀯𑀸 (𑀲𑀻. 𑀧𑀻.)], 𑀢𑀸𑀦𑀺 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺; 𑀓𑀼𑀮𑀺𑀢𑁆𑀣𑀻𑀦𑀫𑁆𑀧𑀺 𑀓𑀼𑀮𑀓𑀼𑀫𑀸𑀭𑀻𑀦𑀫𑁆𑀧𑀺 𑀧𑀘𑁆𑀙𑀸𑀮𑀺𑀬𑀁 𑀔𑀺𑀧𑀦𑁆𑀢𑀺. 𑀢𑁂 𑀤𑀸𑀦𑀺𑀫𑁂 𑀢𑀼𑀡𑁆𑀳𑀻𑀪𑀽𑀢𑀸 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑀻’’𑀢𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀜𑁆𑀘 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀬𑀤𑀺 𑀯𑀸 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲, 𑀬𑀤𑀺 𑀯𑀸 𑀭𑀝𑁆𑀞𑀺𑀓𑀲𑁆𑀲 𑀧𑁂𑀢𑁆𑀢𑀦𑀺𑀓𑀲𑁆𑀲 [𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀲𑁆𑀲 (𑀓.) 𑀅. 𑀦𑀺. 𑁫.𑁧𑁩𑁫, 𑁧𑁩𑁬 𑀧𑀲𑁆𑀲𑀺𑀢𑀩𑁆𑀩𑀁], 𑀬𑀤𑀺 𑀯𑀸 𑀲𑁂𑀦𑀸𑀬 𑀲𑁂𑀦𑀸𑀧𑀢𑀺𑀓𑀲𑁆𑀲, 𑀬𑀤𑀺 𑀯𑀸 𑀕𑀸𑀫𑀕𑀸𑀫𑀡𑀺𑀓𑀲𑁆𑀲, 𑀬𑀤𑀺 𑀯𑀸 𑀧𑀽𑀕𑀕𑀸𑀫𑀡𑀺𑀓𑀲𑁆𑀲, 𑀬𑁂 𑀯𑀸 𑀧𑀦 𑀓𑀼𑀮𑁂𑀲𑀼 𑀧𑀘𑁆𑀘𑁂𑀓𑀸𑀥𑀺𑀧𑀘𑁆𑀘𑀁 𑀓𑀸𑀭𑁂𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀢𑀫𑁂 𑀧𑀜𑁆𑀘? 𑀇𑀥, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀫𑀸𑀢𑀸𑀧𑀺𑀢𑀭𑁄 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀢𑀫𑁂𑀦𑀁 𑀫𑀸𑀢𑀸𑀧𑀺𑀢𑀭𑁄 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 ‘𑀘𑀺𑀭𑀁 𑀚𑀻𑀯, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀳𑀻’𑀢𑀺. 𑀫𑀸𑀢𑀸𑀧𑀺𑀢𑀸𑀦𑀼𑀓𑀫𑁆𑀧𑀺𑀢𑀲𑁆𑀲, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 [… 𑀲𑀸𑀫𑀦𑁆𑀢𑀲𑀁𑀯𑁄𑀳𑀸𑀭𑁂 (𑀲𑀻. 𑀧𑀻.)] 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀢𑀫𑁂𑀦𑀁 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 ‘𑀘𑀺𑀭𑀁 𑀚𑀻𑀯, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀳𑀻’𑀢𑀺. 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀸𑀦𑀼𑀓𑀫𑁆𑀧𑀺𑀢𑀲𑁆𑀲, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀲𑀸𑀫𑀦𑁆𑀢𑀲𑀩𑁆𑀬𑁄𑀳𑀸𑀭𑁂 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀢𑀫𑁂𑀦𑀁 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀲𑀸𑀫𑀦𑁆𑀢𑀲𑀩𑁆𑀬𑁄𑀳𑀸𑀭𑀸 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 ‘𑀘𑀺𑀭𑀁 𑀚𑀻𑀯, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀳𑀻’𑀢𑀺. 𑀔𑁂𑀢𑁆𑀢𑀓𑀫𑁆𑀫𑀦𑁆𑀢𑀲𑀸𑀫𑀦𑁆𑀢𑀲𑀩𑁆𑀬𑁄𑀳𑀸𑀭𑀸𑀦𑀼𑀓𑀫𑁆𑀧𑀺𑀢𑀲𑁆𑀲, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀬𑀸𑀯𑀢𑀸 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀢𑀫𑁂𑀦𑀁 𑀩𑀮𑀺𑀧𑀝𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 ‘𑀘𑀺𑀭𑀁 𑀚𑀻𑀯, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀳𑀻’𑀢𑀺. 𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑀲𑁆𑀲, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺. 𑀢𑀫𑁂𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 ‘𑀘𑀺𑀭𑀁 𑀚𑀻𑀯, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀳𑀻’𑀢𑀺. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀼𑀓𑀫𑁆𑀧𑀺𑀢𑀲𑁆𑀲, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀫𑀳𑀸𑀦𑀸𑀫, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀬𑀤𑀺 𑀯𑀸 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲, 𑀬𑀤𑀺 𑀯𑀸 𑀭𑀝𑁆𑀞𑀺𑀓𑀲𑁆𑀲 𑀧𑁂𑀢𑁆𑀢𑀦𑀺𑀓𑀲𑁆𑀲, 𑀬𑀤𑀺 𑀯𑀸 𑀲𑁂𑀦𑀸𑀬 𑀲𑁂𑀦𑀸𑀧𑀢𑀺𑀓𑀲𑁆𑀲, 𑀬𑀤𑀺 𑀯𑀸 𑀕𑀸𑀫𑀕𑀸𑀫𑀡𑀺𑀓𑀲𑁆𑀲, 𑀬𑀤𑀺 𑀯𑀸 𑀧𑀽𑀕𑀕𑀸𑀫𑀡𑀺𑀓𑀲𑁆𑀲, 𑀬𑁂 𑀯𑀸 𑀧𑀦 𑀓𑀼𑀮𑁂𑀲𑀼 𑀧𑀘𑁆𑀘𑁂𑀓𑀸𑀥𑀺𑀧𑀘𑁆𑀘𑀁 𑀓𑀸𑀭𑁂𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

‘‘𑀫𑀸𑀢𑀸𑀧𑀺𑀢𑀼𑀓𑀺𑀘𑁆𑀘𑀓𑀭𑁄, 𑀧𑀼𑀢𑁆𑀢𑀤𑀸𑀭𑀳𑀺𑀢𑁄 𑀲𑀤𑀸;

𑀅𑀦𑁆𑀢𑁄𑀚𑀦𑀲𑁆𑀲 𑀅𑀢𑁆𑀣𑀸𑀬, 𑀬𑁂 𑀘𑀲𑁆𑀲 𑀅𑀦𑀼𑀚𑀻𑀯𑀺𑀦𑁄.

‘‘𑀉𑀪𑀺𑀦𑁆𑀦𑀜𑁆𑀘𑁂𑀯 𑀅𑀢𑁆𑀣𑀸𑀬, 𑀯𑀤𑀜𑁆𑀜𑀽 𑀳𑁄𑀢𑀺 𑀲𑀻𑀮𑀯𑀸;

𑀜𑀸𑀢𑀻𑀦𑀁 𑀧𑀼𑀩𑁆𑀩𑀧𑁂𑀢𑀸𑀦𑀁, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀚𑀻𑀯𑀢𑀁 [𑀚𑀻𑀯𑀺𑀦𑀁 (𑀲𑀻.), 𑀚𑀻𑀯𑀺𑀢𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)].

‘‘𑀲𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀤𑁂𑀯𑀢𑀸𑀦𑀜𑁆𑀘 𑀧𑀡𑁆𑀟𑀺𑀢𑁄;

𑀯𑀺𑀢𑁆𑀢𑀺𑀲𑀜𑁆𑀚𑀦𑀦𑁄 𑀳𑁄𑀢𑀺, 𑀥𑀫𑁆𑀫𑁂𑀦 𑀖𑀭𑀫𑀸𑀯𑀲𑀁.

‘‘𑀲𑁄 𑀓𑀭𑀺𑀢𑁆𑀯𑀸𑀦 𑀓𑀮𑁆𑀬𑀸𑀡𑀁, 𑀧𑀼𑀚𑁆𑀚𑁄 𑀳𑁄𑀢𑀺 𑀧𑀲𑀁𑀲𑀺𑀬𑁄;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. 𑀅𑀝𑁆𑀞𑀫𑀁;