𑁧. 𑀆𑀯𑀭𑀡𑀲𑀼𑀢𑁆𑀢𑀁

𑁫𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀩𑁆𑀬𑀸𑀧𑀸𑀤𑁄, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑁄 𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁄 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁄. 𑀣𑀺𑀦𑀫𑀺𑀤𑁆𑀥𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀁 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀁. 𑀯𑀺𑀘𑀺𑀓𑀺𑀘𑁆𑀙𑀸, 𑀪𑀺𑀓𑁆𑀔𑀯𑁂, 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀯𑀭𑀡𑀸 𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑀸 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀆𑀯𑀭𑀡𑁂 𑀦𑀻𑀯𑀭𑀡𑁂 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀅𑀧𑁆𑀧𑀳𑀸𑀬, 𑀅𑀩𑀮𑀸𑀬 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀸𑀬 𑀅𑀢𑁆𑀢𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀪𑀬𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸 𑀤𑀽𑀭𑀗𑁆𑀕𑀫𑀸 [𑀤𑀽𑀭𑀕𑀫𑀸 (𑀲𑀻.)] 𑀲𑀻𑀖𑀲𑁄𑀢𑀸 𑀳𑀸𑀭𑀳𑀸𑀭𑀺𑀦𑀻. 𑀢𑀲𑁆𑀲𑀸 𑀧𑀼𑀭𑀺𑀲𑁄 𑀉𑀪𑀢𑁄 𑀦𑀗𑁆𑀕𑀮𑀫𑀼𑀔𑀸𑀦𑀺 𑀯𑀺𑀯𑀭𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑁂 𑀦𑀤𑀺𑀬𑀸 𑀲𑁄𑀢𑁄 𑀯𑀺𑀓𑁆𑀔𑀺𑀢𑁆𑀢𑁄 𑀯𑀺𑀲𑀝𑁄 𑀩𑁆𑀬𑀸𑀤𑀺𑀡𑁆𑀡𑁄 𑀦𑁂𑀯 [𑀦 𑀘𑁂𑀯 (𑀓.)] 𑀤𑀽𑀭𑀗𑁆𑀕𑀫𑁄 𑀅𑀲𑁆𑀲 𑀦 [𑀦 𑀘 (𑀓.)] 𑀲𑀻𑀖𑀲𑁄𑀢𑁄 𑀦 [𑀦 𑀘 (𑀓.)] 𑀳𑀸𑀭𑀳𑀸𑀭𑀻 [𑀳𑀸𑀭𑀳𑀸𑀭𑀺𑀡𑀻 (𑀲𑀻.)]. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀯𑀢 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀆𑀯𑀭𑀡𑁂 𑀦𑀻𑀯𑀭𑀡𑁂 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀅𑀧𑁆𑀧𑀳𑀸𑀬, 𑀅𑀩𑀮𑀸𑀬 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀸𑀬 𑀅𑀢𑁆𑀢𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀪𑀬𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀢𑁆𑀢𑀭𑀺 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀆𑀯𑀭𑀡𑁂 𑀦𑀻𑀯𑀭𑀡𑁂 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀧𑀳𑀸𑀬, 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀅𑀢𑁆𑀢𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀪𑀬𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀢𑁆𑀢𑀭𑀺 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸 𑀤𑀽𑀭𑀗𑁆𑀕𑀫𑀸 𑀲𑀻𑀖𑀲𑁄𑀢𑀸 𑀳𑀸𑀭𑀳𑀸𑀭𑀺𑀦𑀻. 𑀢𑀲𑁆𑀲𑀸 𑀧𑀼𑀭𑀺𑀲𑁄 𑀉𑀪𑀢𑁄 𑀦𑀗𑁆𑀕𑀮𑀫𑀼𑀔𑀸𑀦𑀺 𑀧𑀺𑀤𑀳𑁂𑀬𑁆𑀬. 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑁂 𑀦𑀤𑀺𑀬𑀸 𑀲𑁄𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑁄 𑀅𑀯𑀺𑀲𑀝𑁄 𑀅𑀩𑁆𑀬𑀸𑀤𑀺𑀡𑁆𑀡𑁄 𑀤𑀽𑀭𑀗𑁆𑀕𑀫𑁄 𑀘𑁂𑀯 𑀅𑀲𑁆𑀲 𑀲𑀻𑀖𑀲𑁄𑀢𑁄 𑀘 𑀳𑀸𑀭𑀳𑀸𑀭𑀻 𑀘. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀯𑀢 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀆𑀯𑀭𑀡𑁂 𑀦𑀻𑀯𑀭𑀡𑁂 𑀘𑁂𑀢𑀲𑁄 𑀅𑀚𑁆𑀛𑀸𑀭𑀼𑀳𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀧𑀳𑀸𑀬, 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀅𑀢𑁆𑀢𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀪𑀬𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺 𑀉𑀢𑁆𑀢𑀭𑀺 𑀯𑀸 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀧𑀞𑀫𑀁.