𑁪. 𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀁

𑁪𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀕𑁆𑀕𑀲𑁆𑀲 𑀕𑀳𑀧𑀢𑀺𑀦𑁄 𑀯𑁂𑀲𑀸𑀮𑀺𑀓𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑀁 𑀫𑁂, 𑀪𑀦𑁆𑀢𑁂, 𑀲𑀸𑀮𑀧𑀼𑀧𑁆𑀨𑀓𑀁 [𑀲𑀸𑀮𑀺𑀧𑀼𑀧𑁆𑀨𑀓𑀁 (𑀓.)] 𑀔𑀸𑀤𑀦𑀻𑀬𑀁; 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑀁 𑀫𑁂, 𑀪𑀦𑁆𑀢𑁂, 𑀲𑀫𑁆𑀧𑀦𑁆𑀦𑀓𑁄𑀮𑀓𑀁 𑀲𑀽𑀓𑀭𑀫𑀁𑀲𑀁 [𑀲𑀫𑁆𑀧𑀦𑁆𑀦𑀲𑀽𑀓𑀭𑀫𑀁𑀲𑀁 (𑀲𑀻.), 𑀲𑀫𑁆𑀧𑀦𑁆𑀦𑀯𑀭𑀲𑀽𑀓𑀭𑀫𑀁𑀲𑀁 (𑀲𑁆𑀬𑀸.)]; 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑀁 𑀫𑁂, 𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀢𑁂𑀮𑀓𑀁 [𑀦𑀺𑀩𑀤𑁆𑀥𑀢𑁂𑀮𑀓𑀁 (𑀧𑀻. 𑀲𑀻. 𑀅𑀝𑁆𑀞.), 𑀦𑀺𑀩𑁆𑀩𑀝𑁆𑀝𑀢𑁂𑀮𑀓𑀁 (𑀲𑁆𑀬𑀸. 𑀅𑀝𑁆𑀞.)] 𑀦𑀸𑀮𑀺𑀬𑀲𑀸𑀓𑀁; 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑁄 𑀫𑁂, 𑀪𑀦𑁆𑀢𑁂, 𑀲𑀸𑀮𑀻𑀦𑀁 𑀑𑀤𑀦𑁄 𑀯𑀺𑀘𑀺𑀢𑀓𑀸𑀴𑀓𑁄 [𑀯𑀺𑀕𑀢𑀓𑀸𑀮𑀓𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀅𑀦𑁂𑀓𑀲𑀽𑀧𑁄 𑀅𑀦𑁂𑀓𑀩𑁆𑀬𑀜𑁆𑀚𑀦𑁄; 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑀸𑀦𑀺 𑀫𑁂, 𑀪𑀦𑁆𑀢𑁂, 𑀓𑀸𑀲𑀺𑀓𑀸𑀦𑀺 𑀯𑀢𑁆𑀣𑀸𑀦𑀺; 𑀢𑀸𑀦𑀺 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬.

‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’𑀦𑁆𑀢𑀺. 𑀫𑀦𑀸𑀧𑁄 𑀫𑁂, 𑀪𑀦𑁆𑀢𑁂, 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑀢𑁆𑀣𑀢𑁄 𑀧𑀝𑀮𑀺𑀓𑀢𑁆𑀣𑀢𑁄 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄 [𑀓𑀸𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄 (𑀲𑀻.)] 𑀲𑀉𑀢𑁆𑀢𑀭𑀘𑁆𑀙𑀤𑁄 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑁄. 𑀅𑀧𑀺 𑀘, 𑀪𑀦𑁆𑀢𑁂, 𑀫𑀬𑀫𑁆𑀧𑁂𑀢𑀁 𑀚𑀸𑀦𑀸𑀫 𑁋 ‘𑀦𑁂𑀢𑀁 𑀪𑀕𑀯𑀢𑁄 𑀓𑀧𑁆𑀧𑀢𑀻’𑀢𑀺. 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀦𑁆𑀤𑀦𑀨𑀮𑀓𑀁 𑀅𑀕𑁆𑀖𑀢𑀺 𑀅𑀥𑀺𑀓𑀲𑀢𑀲𑀳𑀲𑁆𑀲𑀁; 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬. 𑀅𑀣 𑀔𑁄 𑀪𑀕𑀯𑀸 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀯𑁂𑀲𑀸𑀮𑀺𑀓𑀁 𑀇𑀫𑀺𑀦𑀸 𑀅𑀦𑀼𑀫𑁄𑀤𑀦𑀻𑀬𑁂𑀦 𑀅𑀦𑀼𑀫𑁄𑀤𑀺 𑁋

‘‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧𑀁,

𑀬𑁄 𑀉𑀚𑁆𑀚𑀼𑀪𑀽𑀢𑁂𑀲𑀼 [𑀉𑀚𑀼𑀪𑀽𑀢𑁂𑀲𑀼 (𑀲𑁆𑀬𑀸. 𑀓𑀁. 𑀧𑀻.)] 𑀤𑀤𑀸𑀢𑀺 𑀙𑀦𑁆𑀤𑀲𑀸;

𑀅𑀘𑁆𑀙𑀸𑀤𑀦𑀁 𑀲𑀬𑀦𑀫𑀦𑁆𑀦𑀧𑀸𑀦𑀁 [𑀲𑀬𑀦𑀫𑀣𑀦𑁆𑀦𑀧𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)],

𑀦𑀸𑀦𑀸𑀧𑁆𑀧𑀓𑀸𑀭𑀸𑀦𑀺 𑀘 𑀧𑀘𑁆𑀘𑀬𑀸𑀦𑀺.

‘‘𑀘𑀢𑁆𑀢𑀜𑁆𑀘 𑀫𑀼𑀢𑁆𑀢𑀜𑁆𑀘 𑀅𑀦𑀼𑀕𑁆𑀕𑀳𑀻𑀢𑀁 [𑀅𑀦𑀕𑁆𑀕𑀳𑀻𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)],

𑀔𑁂𑀢𑁆𑀢𑀽𑀧𑀫𑁂 𑀅𑀭𑀳𑀦𑁆𑀢𑁂 𑀯𑀺𑀤𑀺𑀢𑁆𑀯𑀸;

𑀲𑁄 𑀤𑀼𑀘𑁆𑀘𑀚𑀁 𑀲𑀧𑁆𑀧𑀼𑀭𑀺𑀲𑁄 𑀘𑀚𑀺𑀢𑁆𑀯𑀸,

𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀉𑀕𑁆𑀕𑀁 𑀕𑀳𑀧𑀢𑀺𑀁 𑀯𑁂𑀲𑀸𑀮𑀺𑀓𑀁 𑀇𑀫𑀺𑀦𑀸 𑀅𑀦𑀼𑀫𑁄𑀤𑀦𑀻𑀬𑁂𑀦 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀉𑀕𑁆𑀕𑁄 𑀕𑀳𑀧𑀢𑀺 𑀯𑁂𑀲𑀸𑀮𑀺𑀓𑁄 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀚𑁆𑀚𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀉𑀕𑁆𑀕𑁄 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀉𑀕𑁆𑀕𑀁 𑀤𑁂𑀯𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀉𑀕𑁆𑀕, 𑀬𑀣𑀸𑀥𑀺𑀧𑁆𑀧𑀸𑀬𑁄’’𑀢𑀺? ‘‘𑀢𑀕𑁆𑀖 𑀫𑁂, 𑀪𑀕𑀯𑀸, 𑀬𑀣𑀸𑀥𑀺𑀧𑁆𑀧𑀸𑀬𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀕𑁆𑀕𑀁 𑀤𑁂𑀯𑀧𑀼𑀢𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀫𑀦𑀸𑀧𑀤𑀸𑀬𑀻 𑀮𑀪𑀢𑁂 𑀫𑀦𑀸𑀧𑀁,

𑀅𑀕𑁆𑀕𑀲𑁆𑀲 𑀤𑀸𑀢𑀸 𑀮𑀪𑀢𑁂 𑀧𑀼𑀦𑀕𑁆𑀕𑀁;

𑀯𑀭𑀲𑁆𑀲 𑀤𑀸𑀢𑀸 𑀯𑀭𑀮𑀸𑀪𑀺 𑀳𑁄𑀢𑀺,

𑀲𑁂𑀝𑁆𑀞𑀁 𑀤𑀤𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦𑀁.

‘‘𑀬𑁄 𑀅𑀕𑁆𑀕𑀤𑀸𑀬𑀻 𑀯𑀭𑀤𑀸𑀬𑀻, 𑀲𑁂𑀝𑁆𑀞𑀤𑀸𑀬𑀻 𑀘 𑀬𑁄 𑀦𑀭𑁄;

𑀤𑀻𑀖𑀸𑀬𑀼 𑀬𑀲𑀯𑀸 𑀳𑁄𑀢𑀺, 𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁;