𑁫. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀁

𑁪𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸 𑀲𑁄𑀯𑀕𑁆𑀕𑀺𑀓𑀸 𑀲𑀼𑀔𑀯𑀺𑀧𑀸𑀓𑀸 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀓𑀢𑀫𑁂 𑀧𑀜𑁆𑀘? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄…𑀧𑁂… 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄…𑀧𑁂… 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀜𑁆𑀘𑀧𑀻𑀞𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄…𑀧𑁂….

‘‘𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀅𑀧𑁆𑀧𑀫𑀸𑀡𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀧𑁆𑀧𑀫𑀸𑀡𑁄 𑀢𑀲𑁆𑀲 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸 𑀲𑁄𑀯𑀕𑁆𑀕𑀺𑀓𑀸 𑀲𑀼𑀔𑀯𑀺𑀧𑀸𑀓𑀸 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀇𑀫𑁂𑀳𑀺 𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁂𑀳𑀺 𑀓𑀼𑀲𑀮𑀸𑀪𑀺𑀲𑀦𑁆𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀲𑀼𑀓𑀭𑀁 𑀧𑀼𑀜𑁆𑀜𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀼𑀓𑀭𑀁 𑀉𑀤𑀓𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸; 𑀅𑀣 𑀔𑁄 𑀅𑀲𑀗𑁆𑀔𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺’. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁂𑀳𑀺 𑀓𑀼𑀲𑀮𑀸𑀪𑀺𑀲𑀦𑁆𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀲𑀼𑀓𑀭𑀁 𑀧𑀼𑀜𑁆𑀜𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑁋 ‘𑀏𑀢𑁆𑀢𑀓𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄 𑀲𑁄𑀯𑀕𑁆𑀕𑀺𑀓𑁄 𑀲𑀼𑀔𑀯𑀺𑀧𑀸𑀓𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑁄 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀻’𑀢𑀺. 𑀅𑀣 𑀔𑁄 𑀅𑀲𑀗𑁆𑀔𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺.

‘‘𑀫𑀳𑁄𑀤𑀥𑀺𑀁 𑀅𑀧𑀭𑀺𑀫𑀺𑀢𑀁 𑀫𑀳𑀸𑀲𑀭𑀁,

𑀩𑀳𑀼𑀪𑁂𑀭𑀯𑀁 𑀭𑀢𑁆𑀦𑀕𑀡𑀸𑀦𑀫𑀸𑀮𑀬𑀁;

𑀦𑀚𑁆𑀚𑁄 𑀬𑀣𑀸 𑀦𑀭𑀕𑀡𑀲𑀗𑁆𑀖𑀲𑁂𑀯𑀺𑀢𑀸 [𑀫𑀘𑁆𑀙 𑀕𑀡𑀲𑀁𑀖𑀲𑁂𑀯𑀺𑀢𑀸 (𑀲𑁆𑀬𑀸. 𑀓𑀁. 𑀓.) 𑀲𑀁. 𑀦𑀺. 𑁫.𑁧𑁦𑁩𑁭 𑀧𑀲𑁆𑀲𑀺𑀢𑀩𑁆𑀩𑀁],

𑀧𑀼𑀣𑀽 𑀲𑀯𑀦𑁆𑀢𑀻 𑀉𑀧𑀬𑀦𑁆𑀢𑀺 𑀲𑀸𑀕𑀭𑀁.

‘‘𑀏𑀯𑀁 𑀦𑀭𑀁 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀁,

𑀲𑁂𑀬𑁆𑀬𑀸𑀦𑀺𑀲𑀚𑁆𑀚𑀢𑁆𑀣𑀭𑀡𑀲𑁆𑀲 𑀤𑀸𑀬𑀓𑀁;

𑀧𑀼𑀜𑁆𑀜𑀲𑁆𑀲 𑀥𑀸𑀭𑀸 𑀉𑀧𑀬𑀦𑁆𑀢𑀺 𑀧𑀡𑁆𑀟𑀺𑀢𑀁,

𑀦𑀚𑁆𑀚𑁄 𑀬𑀣𑀸 𑀯𑀸𑀭𑀺𑀯𑀳𑀸𑀯 𑀲𑀸𑀕𑀭’’𑀦𑁆𑀢𑀺. 𑀧𑀜𑁆𑀘𑀫𑀁;