𑁧. 𑀆𑀤𑀺𑀬𑀲𑀼𑀢𑁆𑀢𑀁

𑁪𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀺, 𑀪𑁄𑀕𑀸𑀦𑀁 𑀆𑀤𑀺𑀬𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺; 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺; 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀅𑀬𑀁 𑀧𑀞𑀫𑁄 𑀪𑁄𑀕𑀸𑀦𑀁 𑀆𑀤𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀪𑁄𑀕𑀸𑀦𑀁 𑀆𑀤𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀬𑀸 𑀢𑀸 𑀳𑁄𑀦𑁆𑀢𑀺 𑀆𑀧𑀤𑀸 𑁋 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀅𑀧𑁆𑀧𑀺𑀬𑀢𑁄 𑀯𑀸 𑀤𑀸𑀬𑀸𑀤𑀢𑁄 [𑀅𑀧𑁆𑀧𑀺𑀬𑀢𑁄 𑀯𑀸 𑀤𑀸𑀬𑀸𑀤𑀢𑁄 𑀯𑀸 (𑀩𑀳𑀽𑀲𑀼) 𑀅. 𑀦𑀺. 𑁪.𑁬𑁧; 𑁫.𑁧𑁪𑁮] 𑁋 𑀢𑀣𑀸𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀪𑁄𑀕𑁂𑀳𑀺 𑀧𑀭𑀺𑀬𑁄𑀥𑀸𑀬 𑀯𑀢𑁆𑀢𑀢𑀺, 𑀲𑁄𑀢𑁆𑀣𑀺𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺. 𑀅𑀬𑀁 𑀢𑀢𑀺𑀬𑁄 𑀪𑁄𑀕𑀸𑀦𑀁 𑀆𑀤𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀧𑀜𑁆𑀘𑀩𑀮𑀺𑀁 𑀓𑀢𑁆𑀢𑀸 𑀳𑁄𑀢𑀺. 𑀜𑀸𑀢𑀺𑀩𑀮𑀺𑀁, 𑀅𑀢𑀺𑀣𑀺𑀩𑀮𑀺𑀁, 𑀧𑀼𑀩𑁆𑀩𑀧𑁂𑀢𑀩𑀮𑀺𑀁, 𑀭𑀸𑀚𑀩𑀮𑀺𑀁, 𑀤𑁂𑀯𑀢𑀸𑀩𑀮𑀺𑀁 𑁋 𑀅𑀬𑀁 𑀘𑀢𑀼𑀢𑁆𑀣𑁄 𑀪𑁄𑀕𑀸𑀦𑀁 𑀆𑀤𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀤𑀧𑁆𑀧𑀫𑀸𑀤𑀸 𑀧𑀝𑀺𑀯𑀺𑀭𑀢𑀸 𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺 𑀏𑀓𑀫𑀢𑁆𑀢𑀸𑀦𑀁 𑀲𑀫𑁂𑀦𑁆𑀢𑀺 𑀏𑀓𑀫𑀢𑁆𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀅𑀬𑀁 𑀧𑀜𑁆𑀘𑀫𑁄 𑀪𑁄𑀕𑀸𑀦𑀁 𑀆𑀤𑀺𑀬𑁄. 𑀇𑀫𑁂 𑀔𑁄, 𑀕𑀳𑀧𑀢𑀺, 𑀧𑀜𑁆𑀘 𑀪𑁄𑀕𑀸𑀦𑀁 𑀆𑀤𑀺𑀬𑀸.

‘‘𑀢𑀲𑁆𑀲 𑀘𑁂, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀇𑀫𑁂 𑀧𑀜𑁆𑀘 𑀪𑁄𑀕𑀸𑀦𑀁 𑀆𑀤𑀺𑀬𑁂 𑀆𑀤𑀺𑀬𑀢𑁄 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁂 𑀯𑀢 𑀪𑁄𑀕𑀸𑀦𑀁 𑀆𑀤𑀺𑀬𑀸 𑀢𑁂 𑀘𑀸𑀳𑀁 𑀆𑀤𑀺𑀬𑀸𑀫𑀺 𑀪𑁄𑀕𑀸 𑀘 𑀫𑁂 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀻’𑀢𑀺. 𑀇𑀢𑀺𑀲𑁆𑀲 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄. 𑀢𑀲𑁆𑀲 𑀘𑁂, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀇𑀫𑁂 𑀧𑀜𑁆𑀘 𑀪𑁄𑀕𑀸𑀦𑀁 𑀆𑀤𑀺𑀬𑁂 𑀆𑀤𑀺𑀬𑀢𑁄 𑀪𑁄𑀕𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁂 𑀯𑀢 𑀪𑁄𑀕𑀸𑀦𑀁 𑀆𑀤𑀺𑀬𑀸 𑀢𑁂 𑀘𑀸𑀳𑀁 𑀆𑀤𑀺𑀬𑀸𑀫𑀺 𑀪𑁄𑀕𑀸 𑀘 𑀫𑁂 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺. 𑀇𑀢𑀺𑀲𑁆𑀲 𑀳𑁄𑀢𑀺 [𑀇𑀢𑀺𑀲𑁆𑀲 𑀳𑁄𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, (𑀲𑀻. 𑀲𑁆𑀬𑀸.)] 𑀉𑀪𑀬𑁂𑀦𑁂𑀯 𑀅𑀯𑀺𑀧𑁆𑀧𑀝𑀺𑀲𑀸𑀭𑁄’’𑀢𑀺.

‘‘𑀪𑀼𑀢𑁆𑀢𑀸 𑀪𑁄𑀕𑀸 𑀪𑀢𑀸 𑀪𑀘𑁆𑀘𑀸 [𑀕𑀢𑀸 𑀢𑀘𑁆𑀙𑀸 (𑀓.)], 𑀯𑀺𑀢𑀺𑀡𑁆𑀡𑀸 𑀆𑀧𑀤𑀸𑀲𑀼 𑀫𑁂;

𑀉𑀤𑁆𑀥𑀕𑁆𑀕𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀅𑀣𑁄 𑀧𑀜𑁆𑀘𑀩𑀮𑀻𑀓𑀢𑀸;

𑀉𑀧𑀝𑁆𑀞𑀺𑀢𑀸 𑀲𑀻𑀮𑀯𑀦𑁆𑀢𑁄, 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀬𑁄.

‘‘𑀬𑀤𑀢𑁆𑀣𑀁 𑀪𑁄𑀕𑀁 𑀇𑀘𑁆𑀙𑁂𑀬𑁆𑀬, 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀅𑀦𑀦𑀼𑀢𑀸𑀧𑀺𑀬𑀁.

‘‘𑀏𑀢𑀁 [𑀏𑀯𑀁 (𑀓.)] 𑀅𑀦𑀼𑀲𑁆𑀲𑀭𑀁 𑀫𑀘𑁆𑀘𑁄, 𑀅𑀭𑀺𑀬𑀥𑀫𑁆𑀫𑁂 𑀞𑀺𑀢𑁄 𑀦𑀭𑁄;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺 [𑀧𑁂𑀘𑁆𑀘 𑀲𑀕𑁆𑀕𑁂 𑀘 𑀫𑁄𑀤𑀢𑀻𑀢𑀺 (𑀲𑀻. 𑀲𑁆𑀬𑀸.)]. 𑀧𑀞𑀫𑀁;