𑁨. 𑀲𑀧𑁆𑀧𑀼𑀭𑀺𑀲𑀲𑀼𑀢𑁆𑀢𑀁

𑁪𑁨. ‘‘𑀲𑀧𑁆𑀧𑀼𑀭𑀺𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀮𑁂 𑀚𑀸𑀬𑀫𑀸𑀦𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀫𑀸𑀢𑀸𑀧𑀺𑀢𑀽𑀦𑀁 [𑀫𑀸𑀢𑀸𑀧𑀺𑀢𑀼𑀦𑁆𑀦𑀁 (𑀲𑀻. 𑀧𑀻.)] 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀧𑀼𑀢𑁆𑀢𑀤𑀸𑀭𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀫𑁂𑀖𑁄 𑀲𑀩𑁆𑀩𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄 𑀓𑀼𑀮𑁂 𑀚𑀸𑀬𑀫𑀸𑀦𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀧𑀼𑀢𑁆𑀢𑀤𑀸𑀭𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺; 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻’’𑀢𑀺.

‘‘𑀳𑀺𑀢𑁄 𑀩𑀳𑀼𑀦𑁆𑀦𑀁 𑀧𑀝𑀺𑀧𑀚𑁆𑀚 𑀪𑁄𑀕𑁂, 𑀢𑀁 𑀤𑁂𑀯𑀢𑀸 𑀭𑀓𑁆𑀔𑀢𑀺 𑀥𑀫𑁆𑀫𑀕𑀼𑀢𑁆𑀢𑀁;

𑀩𑀳𑀼𑀲𑁆𑀲𑀼𑀢𑀁 𑀲𑀻𑀮𑀯𑀢𑀽𑀧𑀧𑀦𑁆𑀦𑀁, 𑀥𑀫𑁆𑀫𑁂 𑀞𑀺𑀢𑀁 𑀦 𑀯𑀺𑀚𑀳𑀢𑀺 [𑀯𑀺𑀚𑀳𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀺𑀢𑁆𑀢𑀺.

‘‘𑀥𑀫𑁆𑀫𑀝𑁆𑀞𑀁 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀘𑁆𑀘𑀯𑀸𑀤𑀺𑀁 𑀳𑀺𑀭𑀻𑀫𑀦𑀁;

𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺;

𑀤𑁂𑀯𑀸𑀧𑀺 𑀦𑀁 𑀧𑀲𑀁𑀲𑀦𑁆𑀢𑀺, 𑀩𑁆𑀭𑀳𑁆𑀫𑀼𑀦𑀸𑀧𑀺 𑀧𑀲𑀁𑀲𑀺𑀢𑁄’’𑀢𑀺. 𑀤𑀼𑀢𑀺𑀬𑀁;