𑁮. 𑀲𑀤𑁆𑀥𑀲𑀼𑀢𑁆𑀢𑀁

𑁩𑁮. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑁂 𑀓𑀼𑀮𑀧𑀼𑀢𑁆𑀢𑁂 𑀆𑀦𑀺𑀲𑀁𑀲𑀸. 𑀓𑀢𑀫𑁂 𑀧𑀜𑁆𑀘? 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀢𑁂 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀤𑁆𑀥𑁂 𑀓𑀼𑀮𑀧𑀼𑀢𑁆𑀢𑁂 𑀆𑀦𑀺𑀲𑀁𑀲𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀽𑀫𑀺𑀬𑀁 𑀘𑀢𑀼𑀫𑀳𑀸𑀧𑀣𑁂 𑀫𑀳𑀸𑀦𑀺𑀕𑁆𑀭𑁄𑀥𑁄 𑀲𑀫𑀦𑁆𑀢𑀸 𑀧𑀓𑁆𑀔𑀻𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀝𑀺𑀲𑀭𑀡𑀁 𑀳𑁄𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦’’𑀦𑁆𑀢𑀺.

‘‘𑀲𑀸𑀔𑀸𑀧𑀢𑁆𑀢𑀨𑀮𑀽𑀧𑁂𑀢𑁄 [𑀲𑀸𑀔𑀸𑀧𑀢𑁆𑀢𑀩𑀳𑀼𑀧𑁂𑀢𑁄 (𑀓𑀢𑁆𑀣𑀘𑀺), 𑀲𑀸𑀔𑀸𑀧𑀢𑁆𑀢𑀧𑀮𑀸𑀲𑀽𑀧𑁂𑀢𑁄 (?)], 𑀔𑀦𑁆𑀥𑀺𑀫𑀸𑀯 [𑀔𑀦𑁆𑀥𑀺𑀫𑀸 𑀘 (𑀲𑀻.)] 𑀫𑀳𑀸𑀤𑀼𑀫𑁄;

𑀫𑀽𑀮𑀯𑀸 𑀨𑀮𑀲𑀫𑁆𑀧𑀦𑁆𑀦𑁄, 𑀧𑀢𑀺𑀝𑁆𑀞𑀸 𑀳𑁄𑀢𑀺 𑀧𑀓𑁆𑀔𑀺𑀦𑀁.

‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸;

𑀙𑀸𑀬𑀁 𑀙𑀸𑀬𑀢𑁆𑀣𑀺𑀓𑀸 [𑀙𑀸𑀬𑀢𑁆𑀣𑀺𑀦𑁄 (𑀲𑀻.)] 𑀬𑀦𑁆𑀢𑀺, 𑀨𑀮𑀢𑁆𑀣𑀸 𑀨𑀮𑀪𑁄𑀚𑀺𑀦𑁄.

‘‘𑀢𑀣𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀤𑁆𑀥𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁;

𑀦𑀺𑀯𑀸𑀢𑀯𑀼𑀢𑁆𑀢𑀺𑀁 𑀅𑀢𑁆𑀣𑀤𑁆𑀥𑀁, 𑀲𑁄𑀭𑀢𑀁 𑀲𑀔𑀺𑀮𑀁 𑀫𑀼𑀤𑀼𑀁.

‘‘𑀯𑀻𑀢𑀭𑀸𑀕𑀸 𑀯𑀻𑀢𑀤𑁄𑀲𑀸, 𑀯𑀻𑀢𑀫𑁄𑀳𑀸 𑀅𑀦𑀸𑀲𑀯𑀸;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀲𑁂𑀯𑀦𑁆𑀢𑀺 𑀢𑀸𑀤𑀺𑀲𑀁 𑀦𑀭𑀁.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. 𑀅𑀝𑁆𑀞𑀫𑀁;