𑁪. 𑀲𑀼𑀫𑀦𑀯𑀕𑁆𑀕𑁄

𑁧. 𑀲𑀼𑀫𑀦𑀲𑀼𑀢𑁆𑀢𑀁

𑁩𑁧. 𑀏𑀓𑀁 𑀲𑀫𑀬𑀁…𑀧𑁂… 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀼𑀫𑀦𑀸 𑀭𑀸𑀚𑀓𑀼𑀫𑀸𑀭𑀻 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀧𑀜𑁆𑀘𑀳𑀺 𑀭𑀸𑀚𑀓𑀼𑀫𑀸𑀭𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀲𑀼𑀫𑀦𑀸 𑀭𑀸𑀚𑀓𑀼𑀫𑀸𑀭𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀲𑁆𑀲𑀼, 𑀪𑀦𑁆𑀢𑁂, 𑀪𑀕𑀯𑀢𑁄 𑀤𑁆𑀯𑁂 𑀲𑀸𑀯𑀓𑀸 𑀲𑀫𑀲𑀤𑁆𑀥𑀸 𑀲𑀫𑀲𑀻𑀮𑀸 𑀲𑀫𑀧𑀜𑁆𑀜𑀸 𑁋 𑀏𑀓𑁄 𑀤𑀸𑀬𑀓𑁄, 𑀏𑀓𑁄 𑀅𑀤𑀸𑀬𑀓𑁄. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀼𑀁. 𑀤𑁂𑀯𑀪𑀽𑀢𑀸𑀦𑀁 𑀧𑀦 𑀦𑁂𑀲𑀁 [𑀢𑁂𑀲𑀁 (𑀲𑀻.)], 𑀪𑀦𑁆𑀢𑁂, 𑀲𑀺𑀬𑀸 𑀯𑀺𑀲𑁂𑀲𑁄, 𑀲𑀺𑀬𑀸 𑀦𑀸𑀦𑀸𑀓𑀭𑀡’’𑀦𑁆𑀢𑀺?

‘‘𑀲𑀺𑀬𑀸, 𑀲𑀼𑀫𑀦𑁂’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀤𑁂𑀯𑀪𑀽𑀢𑁄 𑀲𑀫𑀸𑀦𑁄 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺 𑁋 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸, 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦, 𑀤𑀺𑀩𑁆𑀩𑁂𑀦 𑀲𑀼𑀔𑁂𑀦, 𑀤𑀺𑀩𑁆𑀩𑁂𑀦 𑀬𑀲𑁂𑀦, 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦. 𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀤𑁂𑀯𑀪𑀽𑀢𑁄 𑀲𑀫𑀸𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺’’.

‘‘𑀲𑀘𑁂 𑀧𑀦 𑀢𑁂, 𑀪𑀦𑁆𑀢𑁂, 𑀢𑀢𑁄 𑀘𑀼𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀧𑀦 𑀦𑁂𑀲𑀁, 𑀪𑀦𑁆𑀢𑁂, 𑀲𑀺𑀬𑀸 𑀯𑀺𑀲𑁂𑀲𑁄, 𑀲𑀺𑀬𑀸 𑀦𑀸𑀦𑀸𑀓𑀭𑀡’’𑀦𑁆𑀢𑀺? ‘‘𑀲𑀺𑀬𑀸, 𑀲𑀼𑀫𑀦𑁂’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺 𑁋 𑀫𑀸𑀦𑀼𑀲𑀓𑁂𑀦 𑀆𑀬𑀼𑀦𑀸, 𑀫𑀸𑀦𑀼𑀲𑀓𑁂𑀦 𑀯𑀡𑁆𑀡𑁂𑀦, 𑀫𑀸𑀦𑀼𑀲𑀓𑁂𑀦 𑀲𑀼𑀔𑁂𑀦, 𑀫𑀸𑀦𑀼𑀲𑀓𑁂𑀦 𑀬𑀲𑁂𑀦, 𑀫𑀸𑀦𑀼𑀲𑀓𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦. 𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺’’.

‘‘𑀲𑀘𑁂 𑀧𑀦 𑀢𑁂, 𑀪𑀦𑁆𑀢𑁂, 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸𑀦𑀁 𑀧𑀦 𑀦𑁂𑀲𑀁, 𑀪𑀦𑁆𑀢𑁂, 𑀲𑀺𑀬𑀸 𑀯𑀺𑀲𑁂𑀲𑁄, 𑀲𑀺𑀬𑀸 𑀦𑀸𑀦𑀸𑀓𑀭𑀡’’𑀦𑁆𑀢𑀺? ‘‘𑀲𑀺𑀬𑀸, 𑀲𑀼𑀫𑀦𑁂’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺 𑁋 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄, 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄, 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀢𑀺 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄, 𑀬𑀸𑀘𑀺𑀢𑁄𑀯 𑀩𑀳𑀼𑀮𑀁 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺 𑀅𑀧𑁆𑀧𑀁 𑀅𑀬𑀸𑀘𑀺𑀢𑁄. 𑀬𑁂𑀳𑀺 𑀔𑁄 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺 𑀢𑁆𑀬𑀲𑁆𑀲 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀓𑀸𑀬𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦, 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀯𑀘𑀻𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦, 𑀫𑀦𑀸𑀧𑁂𑀦𑁂𑀯 𑀩𑀳𑀼𑀮𑀁 𑀫𑀦𑁄𑀓𑀫𑁆𑀫𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀅𑀧𑁆𑀧𑀁 𑀅𑀫𑀦𑀸𑀧𑁂𑀦, 𑀫𑀦𑀸𑀧𑀁𑀬𑁂𑀯 𑀩𑀳𑀼𑀮𑀁 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺 𑀅𑀧𑁆𑀧𑀁 𑀅𑀫𑀦𑀸𑀧𑀁. 𑀬𑁄 𑀲𑁄, 𑀲𑀼𑀫𑀦𑁂, 𑀤𑀸𑀬𑀓𑁄 𑀲𑁄 𑀅𑀫𑀼𑀁 𑀅𑀤𑀸𑀬𑀓𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀻’’𑀢𑀺.

‘‘𑀲𑀘𑁂 𑀧𑀦 𑀢𑁂, 𑀪𑀦𑁆𑀢𑁂, 𑀉𑀪𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀁 𑀧𑀦 𑀦𑁂𑀲𑀁, 𑀪𑀦𑁆𑀢𑁂, 𑀲𑀺𑀬𑀸 𑀯𑀺𑀲𑁂𑀲𑁄, 𑀲𑀺𑀬𑀸 𑀦𑀸𑀦𑀸𑀓𑀭𑀡’’𑀦𑁆𑀢𑀺? ‘‘𑀏𑀢𑁆𑀣 𑀔𑁄 𑀧𑀦𑁂𑀲𑀸𑀳𑀁, 𑀲𑀼𑀫𑀦𑁂, 𑀦 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺 [𑀯𑀺𑀫𑀼𑀢𑁆𑀢𑀦𑁆𑀢𑀺 (𑀲𑁆𑀬𑀸. 𑀓𑀁.)].

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯𑀜𑁆𑀘𑀺𑀤𑀁, 𑀪𑀦𑁆𑀢𑁂, 𑀅𑀮𑀫𑁂𑀯 𑀤𑀸𑀦𑀸𑀦𑀺 𑀤𑀸𑀢𑀼𑀁 𑀅𑀮𑀁 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁; 𑀬𑀢𑁆𑀭 𑀳𑀺 𑀦𑀸𑀫 𑀤𑁂𑀯𑀪𑀽𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀻’’𑀢𑀺. ‘‘𑀏𑀯𑀫𑁂𑀢𑀁, 𑀲𑀼𑀫𑀦𑁂! 𑀅𑀮𑀜𑁆𑀳𑀺, 𑀲𑀼𑀫𑀦𑁂, 𑀤𑀸𑀦𑀸𑀦𑀺 𑀤𑀸𑀢𑀼𑀁 𑀅𑀮𑀁 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁! 𑀤𑁂𑀯𑀪𑀽𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀉𑀧𑀓𑀸𑀭𑀸𑀦𑀺 𑀧𑀼𑀜𑁆𑀜𑀸𑀦𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 [𑀇𑀤𑀁 𑀯𑀢𑁆𑀯𑀸 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀬𑀣𑀸𑀧𑀺 𑀘𑀦𑁆𑀤𑁄 𑀯𑀺𑀫𑀮𑁄, 𑀕𑀘𑁆𑀙𑀁 𑀆𑀓𑀸𑀲𑀥𑀸𑀢𑀼𑀬𑀸;

𑀲𑀩𑁆𑀩𑁂 𑀢𑀸𑀭𑀸𑀕𑀡𑁂 𑀮𑁄𑀓𑁂, 𑀆𑀪𑀸𑀬 𑀅𑀢𑀺𑀭𑁄𑀘𑀢𑀺.

‘‘𑀢𑀣𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄;

𑀲𑀩𑁆𑀩𑁂 𑀫𑀘𑁆𑀙𑀭𑀺𑀦𑁄 𑀮𑁄𑀓𑁂, 𑀘𑀸𑀕𑁂𑀦 𑀅𑀢𑀺𑀭𑁄𑀘𑀢𑀺.

‘‘𑀬𑀣𑀸𑀧𑀺 𑀫𑁂𑀖𑁄 𑀣𑀦𑀬𑀁, 𑀯𑀺𑀚𑁆𑀚𑀼𑀫𑀸𑀮𑀻 𑀲𑀢𑀓𑁆𑀓𑀓𑀼;

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀢𑀺, 𑀅𑀪𑀺𑀯𑀲𑁆𑀲𑀁 𑀯𑀲𑀼𑀦𑁆𑀥𑀭𑀁.

‘‘𑀏𑀯𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀫𑀘𑁆𑀙𑀭𑀺𑀁 𑀅𑀥𑀺𑀕𑀡𑁆𑀳𑀸𑀢𑀺, 𑀧𑀜𑁆𑀘𑀞𑀸𑀦𑁂𑀳𑀺 𑀧𑀡𑁆𑀟𑀺𑀢𑁄.

‘‘𑀆𑀬𑀼𑀦𑀸 𑀬𑀲𑀲𑀸 𑀘𑁂𑀯 [𑀆𑀬𑀼𑀦𑀸 𑀘 𑀬𑀲𑁂𑀦 𑀘 (𑀓.)], 𑀯𑀡𑁆𑀡𑁂𑀦 𑀘 𑀲𑀼𑀔𑁂𑀦 𑀘;

𑀲 𑀯𑁂 𑀪𑁄𑀕𑀧𑀭𑀺𑀩𑁆𑀬𑀽𑀴𑁆𑀳𑁄 [𑀪𑁄𑀕𑀧𑀭𑀺𑀩𑁆𑀩𑀽𑀴𑁆𑀳𑁄 (𑀲𑀻.)], 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. 𑀧𑀞𑀫𑀁;

𑁨. 𑀘𑀼𑀦𑁆𑀤𑀻𑀲𑀼𑀢𑁆𑀢𑀁

𑁩𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀘𑀼𑀦𑁆𑀤𑀻 𑀭𑀸𑀚𑀓𑀼𑀫𑀸𑀭𑀻 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀓𑀼𑀫𑀸𑀭𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀘𑀼𑀦𑁆𑀤𑀻 𑀭𑀸𑀚𑀓𑀼𑀫𑀸𑀭𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀪𑀸𑀢𑀸 𑀘𑀼𑀦𑁆𑀤𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄, 𑀲𑁄 𑀏𑀯𑀫𑀸𑀳 𑁋 ‘𑀬𑀤𑁂𑀯 𑀲𑁄 𑀳𑁄𑀢𑀺 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄, 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁𑀬𑁂𑀯 𑀉𑀧𑀧𑀚𑁆𑀚𑀢𑀺, 𑀦𑁄 𑀤𑀼𑀕𑁆𑀕𑀢𑀺’𑀦𑁆𑀢𑀺. 𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫𑀺 𑁋 ‘𑀓𑀣𑀁𑀭𑀽𑀧𑁂 𑀔𑁄, 𑀪𑀦𑁆𑀢𑁂, 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁𑀬𑁂𑀯 𑀉𑀧𑀧𑀚𑁆𑀚𑀢𑀺, 𑀦𑁄 𑀤𑀼𑀕𑁆𑀕𑀢𑀺𑀁? 𑀓𑀣𑀁𑀭𑀽𑀧𑁂 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁𑀬𑁂𑀯 𑀉𑀧𑀧𑀚𑁆𑀚𑀢𑀺, 𑀦𑁄 𑀤𑀼𑀕𑁆𑀕𑀢𑀺𑀁? 𑀓𑀣𑀁𑀭𑀽𑀧𑁂 𑀲𑀗𑁆𑀖𑁂 𑀧𑀲𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁𑀬𑁂𑀯 𑀉𑀧𑀧𑀚𑁆𑀚𑀢𑀺, 𑀦𑁄 𑀤𑀼𑀕𑁆𑀕𑀢𑀺𑀁? 𑀓𑀣𑀁𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁𑀬𑁂𑀯 𑀉𑀧𑀧𑀚𑁆𑀚𑀢𑀺, 𑀦𑁄 𑀤𑀼𑀕𑁆𑀕𑀢𑀺’’’𑀦𑁆𑀢𑀺?

‘‘𑀬𑀸𑀯𑀢𑀸, 𑀘𑀼𑀦𑁆𑀤𑀺, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 [𑀅𑀧𑀸𑀤𑀸 𑀯𑀸 𑀤𑁆𑀯𑀻𑀧𑀸𑀤𑀸 𑀯𑀸𑀘𑀢𑀼𑀧𑁆𑀧𑀸𑀤𑀸 𑀯𑀸 𑀩𑀳𑀼𑀧𑁆𑀧𑀸𑀤𑀸 𑀯𑀸 (𑀲𑀻.) 𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦] 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑁂 𑀔𑁄, 𑀘𑀼𑀦𑁆𑀤𑀺, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀘𑀼𑀦𑁆𑀤𑀺, 𑀥𑀫𑁆𑀫𑀸 𑀲𑀗𑁆𑀔𑀢𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀬𑁂, 𑀘𑀼𑀦𑁆𑀤𑀺, 𑀅𑀭𑀺𑀬𑁂 𑀅𑀝𑁆𑀞𑀗𑁆𑀕𑀺𑀓𑁂 𑀫𑀕𑁆𑀕𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀘𑀼𑀦𑁆𑀤𑀺, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 [𑀢𑁂𑀲𑀁 𑀥𑀫𑁆𑀫𑀸𑀦𑀁 (𑀲𑀻. 𑀧𑀻. 𑀓.)] 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀯𑀝𑁆𑀝𑀼𑀧𑀘𑁆𑀙𑁂𑀤𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑁂 𑀔𑁄, 𑀘𑀼𑀦𑁆𑀤𑀺, 𑀯𑀺𑀭𑀸𑀕𑁂 𑀥𑀫𑁆𑀫𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀘𑀼𑀦𑁆𑀤𑀺, 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀬𑁂 𑀔𑁄, 𑀘𑀼𑀦𑁆𑀤𑀺, 𑀲𑀗𑁆𑀖𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀘𑀼𑀦𑁆𑀤𑀺, 𑀲𑀻𑀮𑀸𑀦𑀺, 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑀢𑁂𑀲𑀁 [𑀅𑀭𑀺𑀬𑀓𑀦𑁆𑀢𑀸𑀦𑀺𑀢𑁂𑀲𑀁 (𑀲𑀻. 𑀲𑁆𑀬𑀸. 𑀓𑀁.)] 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀬𑁂 𑀔𑁄, 𑀘𑀼𑀦𑁆𑀤𑀺, 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀅𑀕𑁆𑀕𑁂 𑀢𑁂 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀅𑀕𑁆𑀕𑁂 𑀔𑁄 𑀧𑀦 𑀧𑀭𑀺𑀧𑀽𑀭𑀓𑀸𑀭𑀻𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺.

‘‘𑀅𑀕𑁆𑀕𑀢𑁄 𑀯𑁂 𑀧𑀲𑀦𑁆𑀦𑀸𑀦𑀁, 𑀅𑀕𑁆𑀕𑀁 𑀥𑀫𑁆𑀫𑀁 𑀯𑀺𑀚𑀸𑀦𑀢𑀁;

𑀅𑀕𑁆𑀕𑁂 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸𑀦𑀁, 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀦𑀼𑀢𑁆𑀢𑀭𑁂.

‘‘𑀅𑀕𑁆𑀕𑁂 𑀥𑀫𑁆𑀫𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀭𑀸𑀕𑀽𑀧𑀲𑀫𑁂 𑀲𑀼𑀔𑁂;

𑀅𑀕𑁆𑀕𑁂 𑀲𑀗𑁆𑀖𑁂 𑀧𑀲𑀦𑁆𑀦𑀸𑀦𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

‘‘𑀅𑀕𑁆𑀕𑀲𑁆𑀫𑀺𑀁 𑀤𑀸𑀦𑀁 𑀤𑀤𑀢𑀁, 𑀅𑀕𑁆𑀕𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀅𑀕𑁆𑀕𑀁 𑀆𑀬𑀼 𑀘 𑀯𑀡𑁆𑀡𑁄 𑀘, 𑀬𑀲𑁄 𑀓𑀺𑀢𑁆𑀢𑀺 𑀲𑀼𑀔𑀁 𑀩𑀮𑀁.

‘‘𑀅𑀕𑁆𑀕𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻, 𑀅𑀕𑁆𑀕𑀥𑀫𑁆𑀫𑀲𑀫𑀸𑀳𑀺𑀢𑁄;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀅𑀕𑁆𑀕𑀧𑁆𑀧𑀢𑁆𑀢𑁄 𑀧𑀫𑁄𑀤𑀢𑀻’’𑀢𑀺. 𑀤𑀼𑀢𑀺𑀬𑀁;

𑁩. 𑀉𑀕𑁆𑀕𑀳𑀲𑀼𑀢𑁆𑀢𑀁

𑁩𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑀤𑁆𑀤𑀺𑀬𑁂 𑀯𑀺𑀳𑀭𑀢𑀺 𑀚𑀸𑀢𑀺𑀬𑀸 𑀯𑀦𑁂. 𑀅𑀣 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀅𑀢𑁆𑀢𑀘𑀢𑀼𑀢𑁆𑀣𑁄 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀉𑀕𑁆𑀕𑀳𑀲𑁆𑀲 𑀫𑁂𑀡𑁆𑀟𑀓𑀦𑀢𑁆𑀢𑀼𑀦𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀪𑀕𑀯𑀦𑁆𑀢𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀕𑁆𑀕𑀳𑁄 𑀫𑁂𑀡𑁆𑀟𑀓𑀦𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸 𑀫𑁂, 𑀪𑀦𑁆𑀢𑁂, 𑀓𑀼𑀫𑀸𑀭𑀺𑀬𑁄 𑀧𑀢𑀺𑀓𑀼𑀮𑀸𑀦𑀺 𑀕𑀫𑀺𑀲𑁆𑀲𑀦𑁆𑀢𑀺. 𑀑𑀯𑀤𑀢𑀼 𑀢𑀸𑀲𑀁, 𑀪𑀦𑁆𑀢𑁂, 𑀪𑀕𑀯𑀸; 𑀅𑀦𑀼𑀲𑀸𑀲𑀢𑀼 𑀢𑀸𑀲𑀁, 𑀪𑀦𑁆𑀢𑁂, 𑀪𑀕𑀯𑀸, 𑀬𑀁 𑀢𑀸𑀲𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀓𑀼𑀫𑀸𑀭𑀺𑀬𑁄 𑀏𑀢𑀤𑀯𑁄𑀘 𑁋 ‘‘𑀢𑀲𑁆𑀫𑀸𑀢𑀺𑀳, 𑀓𑀼𑀫𑀸𑀭𑀺𑀬𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀲𑁆𑀲 𑀯𑁄 [𑀬𑀲𑁆𑀲 𑀔𑁄 (𑀲𑀻. 𑀲𑁆𑀬𑀸. 𑀓𑀁.)] 𑀫𑀸𑀢𑀸𑀧𑀺𑀢𑀭𑁄 𑀪𑀢𑁆𑀢𑀼𑀦𑁄 𑀤𑀲𑁆𑀲𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄 𑀅𑀦𑀼𑀓𑀫𑁆𑀧𑀓𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀢𑀲𑁆𑀲 𑀪𑀯𑀺𑀲𑁆𑀲𑀸𑀫 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀺𑀬𑁄 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀺𑀬𑁄 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀺𑀬𑁄 𑀫𑀦𑀸𑀧𑀘𑀸𑀭𑀺𑀦𑀺𑀬𑁄 𑀧𑀺𑀬𑀯𑀸𑀤𑀺𑀦𑀺𑀬𑁄’𑀢𑀺. 𑀏𑀯𑀜𑁆𑀳𑀺 𑀯𑁄, 𑀓𑀼𑀫𑀸𑀭𑀺𑀬𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀓𑀼𑀫𑀸𑀭𑀺𑀬𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁂 𑀢𑁂 𑀪𑀢𑁆𑀢𑀼 𑀕𑀭𑀼𑀦𑁄 [𑀕𑀼𑀭𑀼𑀦𑁄 (𑀓.)] 𑀪𑀯𑀺𑀲𑁆𑀲𑀦𑁆𑀢𑀺 𑀫𑀸𑀢𑀸𑀢𑀺 𑀯𑀸 𑀧𑀺𑀢𑀸𑀢𑀺 𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀸, 𑀢𑁂 𑀲𑀓𑁆𑀓𑀭𑀺𑀲𑁆𑀲𑀸𑀫 𑀕𑀭𑀼𑀁 𑀓𑀭𑀺𑀲𑁆𑀲𑀸𑀫 [𑀕𑀭𑀼𑀓𑀭𑀺𑀲𑁆𑀲𑀸𑀫 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀦𑁂𑀲𑁆𑀲𑀸𑀫 𑀧𑀽𑀚𑁂𑀲𑁆𑀲𑀸𑀫 𑀅𑀩𑁆𑀪𑀸𑀕𑀢𑁂 𑀘 𑀆𑀲𑀦𑁄𑀤𑀓𑁂𑀦 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀸’𑀢𑀺 [𑀧𑀽𑀚𑁂𑀲𑁆𑀲𑀸𑀫𑀸𑀢𑀺 (𑀲𑀻.)]. 𑀏𑀯𑀜𑁆𑀳𑀺 𑀯𑁄, 𑀓𑀼𑀫𑀸𑀭𑀺𑀬𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀓𑀼𑀫𑀸𑀭𑀺𑀬𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁂 𑀢𑁂 𑀪𑀢𑁆𑀢𑀼 𑀅𑀩𑁆𑀪𑀦𑁆𑀢𑀭𑀸 𑀓𑀫𑁆𑀫𑀦𑁆𑀢𑀸 𑀉𑀡𑁆𑀡𑀸𑀢𑀺 𑀯𑀸 𑀓𑀧𑁆𑀧𑀸𑀲𑀸𑀢𑀺 𑀯𑀸, 𑀢𑀢𑁆𑀣 𑀤𑀓𑁆𑀔𑀸 𑀪𑀯𑀺𑀲𑁆𑀲𑀸𑀫 𑀅𑀦𑀮𑀲𑀸, 𑀢𑀢𑁆𑀭𑀼𑀧𑀸𑀬𑀸𑀬 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀅𑀮𑀁 𑀓𑀸𑀢𑀼𑀁 𑀅𑀮𑀁 𑀲𑀁𑀯𑀺𑀥𑀸𑀢𑀼’𑀦𑁆𑀢𑀺. 𑀏𑀯𑀜𑁆𑀳𑀺 𑀯𑁄, 𑀓𑀼𑀫𑀸𑀭𑀺𑀬𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀓𑀼𑀫𑀸𑀭𑀺𑀬𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑁄 𑀲𑁄 𑀪𑀢𑁆𑀢𑀼 𑀅𑀩𑁆𑀪𑀦𑁆𑀢𑀭𑁄 [𑀅𑀩𑁆𑀪𑀦𑁆𑀢𑀭𑁂 (𑀓.)] 𑀅𑀦𑁆𑀢𑁄𑀚𑀦𑁄 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀲𑀁 𑀓𑀢𑀜𑁆𑀘 𑀓𑀢𑀢𑁄 𑀚𑀸𑀦𑀺𑀲𑁆𑀲𑀸𑀫 𑀅𑀓𑀢𑀜𑁆𑀘 𑀅𑀓𑀢𑀢𑁄 𑀚𑀸𑀦𑀺𑀲𑁆𑀲𑀸𑀫, 𑀕𑀺𑀮𑀸𑀦𑀓𑀸𑀦𑀜𑁆𑀘 𑀩𑀮𑀸𑀩𑀮𑀁 𑀚𑀸𑀦𑀺𑀲𑁆𑀲𑀸𑀫, 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀜𑁆𑀘𑀲𑁆𑀲 𑀧𑀘𑁆𑀘𑀁𑀲𑁂𑀦 [𑀧𑀘𑁆𑀘𑀬𑀁 𑀢𑁂𑀦 (𑀓. 𑀲𑀻.), 𑀧𑀘𑁆𑀘𑀬𑀁𑀲𑁂𑀦 (𑀲𑁆𑀬𑀸. 𑀓𑀁.), 𑀧𑀘𑁆𑀘𑀬𑀁 𑀲𑁂𑀦𑀸𑀲𑀦𑀁 𑀧𑀘𑁆𑀘𑀢𑁆𑀢𑀁𑀲𑁂𑀦 (𑀓.) 𑀅. 𑀦𑀺. 𑁮.𑁪𑁬] 𑀲𑀁𑀯𑀺𑀪𑀚𑀺𑀲𑁆𑀲𑀸𑀫𑀸’𑀢𑀺 [𑀯𑀺𑀪𑀚𑀺𑀲𑁆𑀲𑀸𑀫𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁.)]. 𑀏𑀯𑀜𑁆𑀳𑀺 𑀯𑁄, 𑀓𑀼𑀫𑀸𑀭𑀺𑀬𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀢𑀲𑁆𑀫𑀸𑀢𑀺𑀳, 𑀓𑀼𑀫𑀸𑀭𑀺𑀬𑁄, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀪𑀢𑁆𑀢𑀸 𑀆𑀳𑀭𑀺𑀲𑁆𑀲𑀢𑀺 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸, 𑀢𑀁 𑀆𑀭𑀓𑁆𑀔𑁂𑀦 [𑀢𑀁 𑀆𑀭𑀓𑁆𑀔𑀸𑀬 (𑀲𑀻.)] 𑀕𑀼𑀢𑁆𑀢𑀺𑀬𑀸 𑀲𑀫𑁆𑀧𑀸𑀤𑁂𑀲𑁆𑀲𑀸𑀫, 𑀢𑀢𑁆𑀣 𑀘 𑀪𑀯𑀺𑀲𑁆𑀲𑀸𑀫 𑀅𑀥𑀼𑀢𑁆𑀢𑀻 𑀅𑀣𑁂𑀦𑀻 𑀅𑀲𑁄𑀡𑁆𑀟𑀻 𑀅𑀯𑀺𑀦𑀸𑀲𑀺𑀓𑀸𑀬𑁄’𑀢𑀺. 𑀏𑀯𑀜𑁆𑀳𑀺 𑀯𑁄, 𑀓𑀼𑀫𑀸𑀭𑀺𑀬𑁄, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀇𑀫𑁂𑀳𑀺 𑀔𑁄, 𑀓𑀼𑀫𑀸𑀭𑀺𑀬𑁄, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀫𑀦𑀸𑀧𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻’’𑀢𑀺.

‘‘𑀬𑁄 𑀦𑀁 𑀪𑀭𑀢𑀺 𑀲𑀩𑁆𑀩𑀤𑀸, 𑀦𑀺𑀘𑁆𑀘𑀁 𑀆𑀢𑀸𑀧𑀺 𑀉𑀲𑁆𑀲𑀼𑀓𑁄;

𑀲𑀩𑁆𑀩𑀓𑀸𑀫𑀳𑀭𑀁 𑀧𑁄𑀲𑀁, 𑀪𑀢𑁆𑀢𑀸𑀭𑀁 𑀦𑀸𑀢𑀺𑀫𑀜𑁆𑀜𑀢𑀺.

‘‘𑀦 𑀘𑀸𑀧𑀺 𑀲𑁄𑀢𑁆𑀣𑀺 𑀪𑀢𑁆𑀢𑀸𑀭𑀁, 𑀇𑀲𑁆𑀲𑀸𑀘𑀸𑀭𑁂𑀦 [𑀇𑀘𑁆𑀙𑀸𑀘𑀸𑀭𑁂𑀦 (𑀲𑀻.), 𑀇𑀲𑁆𑀲𑀸𑀯𑀸𑀤𑁂𑀦 (𑀧𑀻.)] 𑀭𑁄𑀲𑀬𑁂;

𑀪𑀢𑁆𑀢𑀼 𑀘 𑀕𑀭𑀼𑀦𑁄 𑀲𑀩𑁆𑀩𑁂, 𑀧𑀝𑀺𑀧𑀽𑀚𑁂𑀢𑀺 𑀧𑀡𑁆𑀟𑀺𑀢𑀸.

‘‘𑀉𑀝𑁆𑀞𑀸𑀳𑀺𑀓𑀸 [𑀉𑀝𑁆𑀞𑀸𑀬𑀺𑀓𑀸 (𑀲𑁆𑀬𑀸. 𑀓𑀁. 𑀓.)] 𑀅𑀦𑀮𑀲𑀸, 𑀲𑀗𑁆𑀕𑀳𑀺𑀢𑀧𑀭𑀺𑀚𑁆𑀚𑀦𑀸;

𑀪𑀢𑁆𑀢𑀼 𑀫𑀦𑀸𑀧𑀁 [𑀫𑀦𑀸𑀧𑀸 (𑀲𑀻.)] 𑀘𑀭𑀢𑀺, 𑀲𑀫𑁆𑀪𑀢𑀁 𑀅𑀦𑀼𑀭𑀓𑁆𑀔𑀢𑀺.

‘‘𑀬𑀸 𑀏𑀯𑀁 𑀯𑀢𑁆𑀢𑀢𑀻 𑀦𑀸𑀭𑀻, 𑀪𑀢𑁆𑀢𑀼𑀙𑀦𑁆𑀤𑀯𑀲𑀸𑀦𑀼𑀕𑀸;

𑀫𑀦𑀸𑀧𑀸 𑀦𑀸𑀫 𑀢𑁂 𑀤𑁂𑀯𑀸, 𑀬𑀢𑁆𑀣 𑀲𑀸 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁;

𑁪. 𑀲𑀻𑀳𑀲𑁂𑀦𑀸𑀧𑀢𑀺𑀲𑀼𑀢𑁆𑀢𑀁

𑁩𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺?

‘‘𑀲𑀓𑁆𑀓𑀸, 𑀲𑀻𑀳𑀸’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀤𑀸𑀬𑀓𑁄, 𑀲𑀻𑀳, 𑀤𑀸𑀦𑀧𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄. 𑀬𑀫𑁆𑀧𑀺, 𑀲𑀻𑀳, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀇𑀤𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁.

‘‘𑀧𑀼𑀦 𑀘𑀧𑀭𑀁, 𑀲𑀻𑀳, 𑀤𑀸𑀬𑀓𑀁 𑀤𑀸𑀦𑀧𑀢𑀺𑀁 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀚𑀦𑁆𑀢𑀺. 𑀬𑀫𑁆𑀧𑀺, 𑀲𑀻𑀳, 𑀤𑀸𑀬𑀓𑀁 𑀤𑀸𑀦𑀧𑀢𑀺𑀁 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀚𑀦𑁆𑀢𑀺, 𑀇𑀤𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁.

‘‘𑀧𑀼𑀦 𑀘𑀧𑀭𑀁, 𑀲𑀻𑀳, 𑀤𑀸𑀬𑀓𑀲𑁆𑀲 𑀤𑀸𑀦𑀧𑀢𑀺𑀦𑁄 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀬𑀫𑁆𑀧𑀺, 𑀲𑀻𑀳, 𑀤𑀸𑀬𑀓𑀲𑁆𑀲 𑀤𑀸𑀦𑀧𑀢𑀺𑀦𑁄 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀇𑀤𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁.

‘‘𑀧𑀼𑀦 𑀘𑀧𑀭𑀁, 𑀲𑀻𑀳, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀬𑀁 𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 [𑀯𑀺𑀲𑀸𑀭𑀤𑁄𑀯 (𑀲𑀻.) 𑀅. 𑀦𑀺. 𑁭.𑁫𑁭 𑀧𑀲𑁆𑀲𑀺𑀢𑀩𑁆𑀩𑀁] 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀬𑀫𑁆𑀧𑀺, 𑀲𑀻𑀳, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀬𑀁 𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄, 𑀇𑀤𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀤𑀸𑀦𑀨𑀮𑀁.

‘‘𑀧𑀼𑀦 𑀘𑀧𑀭𑀁, 𑀲𑀻𑀳, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀬𑀫𑁆𑀧𑀺, 𑀲𑀻𑀳, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺, 𑀇𑀤𑀁 [𑀇𑀤𑀫𑁆𑀧𑀺 𑀲𑀻𑀳 (𑀓.)] 𑀲𑀫𑁆𑀧𑀭𑀸𑀬𑀺𑀓𑀁 𑀤𑀸𑀦𑀨𑀮’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺 𑀲𑀦𑁆𑀤𑀺𑀝𑁆𑀞𑀺𑀓𑀸𑀦𑀺 𑀤𑀸𑀦𑀨𑀮𑀸𑀦𑀺 𑀅𑀓𑁆𑀔𑀸𑀢𑀸𑀦𑀺, 𑀦𑀸𑀳𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺; 𑀅𑀳𑀁 𑀧𑁂𑀢𑀸𑀦𑀺 𑀚𑀸𑀦𑀸𑀫𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺; 𑀫𑀁 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀚𑀦𑁆𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺; 𑀫𑀬𑁆𑀳𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀻𑀳𑁄 𑀲𑁂𑀦𑀸𑀧𑀢𑀺 𑀤𑀸𑀬𑀓𑁄 𑀓𑀸𑀭𑀓𑁄 𑀲𑀗𑁆𑀖𑀼𑀧𑀝𑁆𑀞𑀸𑀓𑁄’𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀬𑀁 𑀬𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀸𑀫𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀸𑀫𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺 𑀲𑀦𑁆𑀤𑀺𑀝𑁆𑀞𑀺𑀓𑀸𑀦𑀺 𑀤𑀸𑀦𑀨𑀮𑀸𑀦𑀺 𑀅𑀓𑁆𑀔𑀸𑀢𑀸𑀦𑀺, 𑀦𑀸𑀳𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺; 𑀅𑀳𑀁 𑀧𑁂𑀢𑀸𑀦𑀺 𑀚𑀸𑀦𑀸𑀫𑀺. 𑀬𑀜𑁆𑀘 𑀔𑁄 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀤𑀸𑀬𑀓𑁄, 𑀲𑀻𑀳, 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’𑀢𑀺, 𑀏𑀢𑀸𑀳𑀁 𑀦 𑀚𑀸𑀦𑀸𑀫𑀺; 𑀏𑀢𑁆𑀣 𑀘 𑀧𑀦𑀸𑀳𑀁 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀻’’𑀢𑀺. ‘‘𑀏𑀯𑀫𑁂𑀢𑀁, 𑀲𑀻𑀳, 𑀏𑀯𑀫𑁂𑀢𑀁, 𑀲𑀻𑀳! 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺.

‘‘𑀤𑀤𑀁 𑀧𑀺𑀬𑁄 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽,

𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺 𑀬𑀲𑁄 𑀘 𑀯𑀟𑁆𑀠𑀢𑀺 [𑀬𑀲𑀲𑁆𑀲 𑀯𑀟𑁆𑀠𑀢𑀺 (𑀲𑁆𑀬𑀸. 𑀓𑀁.), 𑀬𑀲𑀁 𑀧𑀯𑀟𑁆𑀠𑀢𑀺 (𑀓.)];

𑀅𑀫𑀗𑁆𑀓𑀼𑀪𑀽𑀢𑁄 𑀧𑀭𑀺𑀲𑀁 𑀯𑀺𑀕𑀸𑀳𑀢𑀺,

𑀯𑀺𑀲𑀸𑀭𑀤𑁄 𑀳𑁄𑀢𑀺 𑀦𑀭𑁄 𑀅𑀫𑀘𑁆𑀙𑀭𑀻.

‘‘𑀢𑀲𑁆𑀫𑀸 𑀳𑀺 𑀤𑀸𑀦𑀸𑀦𑀺 𑀤𑀤𑀦𑁆𑀢𑀺 𑀧𑀡𑁆𑀟𑀺𑀢𑀸,

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀼𑀔𑁂𑀲𑀺𑀦𑁄;

𑀢𑁂 𑀤𑀻𑀖𑀭𑀢𑁆𑀢𑀁 𑀢𑀺𑀤𑀺𑀯𑁂 𑀧𑀢𑀺𑀝𑁆𑀞𑀺𑀢𑀸,

𑀤𑁂𑀯𑀸𑀦𑀁 𑀲𑀳𑀩𑁆𑀬𑀕𑀢𑀸 𑀭𑀫𑀦𑁆𑀢𑀺 𑀢𑁂 [𑀲𑀳𑀩𑁆𑀬𑀢𑀁 𑀕𑀢𑀸 𑀭𑀫𑀦𑁆𑀢𑀺 (𑀲𑀻.), 𑀲𑀳𑀩𑁆𑀬𑀢𑀸 𑀭𑀫𑀦𑁆𑀢𑀺 𑀢𑁂 (𑀓.)].

‘‘𑀓𑀢𑀸𑀯𑀓𑀸𑀲𑀸 𑀓𑀢𑀓𑀼𑀲𑀮𑀸 𑀇𑀢𑁄 𑀘𑀼𑀢𑀸 [𑀢𑀢𑁄 𑀘𑀼𑀢𑀸 (𑀲𑀻.)],

𑀲𑀬𑀁𑀧𑀪𑀸 𑀅𑀦𑀼𑀯𑀺𑀘𑀭𑀦𑁆𑀢𑀺 𑀦𑀦𑁆𑀤𑀦𑀁 [𑀦𑀦𑁆𑀤𑀦𑁂 (𑀲𑁆𑀬𑀸. 𑀓𑀁.)];

𑀢𑁂 𑀢𑀢𑁆𑀣 𑀦𑀦𑁆𑀤𑀦𑁆𑀢𑀺 𑀭𑀫𑀦𑁆𑀢𑀺 𑀫𑁄𑀤𑀭𑁂,

𑀲𑀫𑀧𑁆𑀧𑀺𑀢𑀸 𑀓𑀸𑀫𑀕𑀼𑀡𑁂𑀳𑀺 𑀧𑀜𑁆𑀘𑀳𑀺;

‘‘𑀓𑀢𑁆𑀯𑀸𑀦 𑀯𑀸𑀓𑁆𑀬𑀁 𑀅𑀲𑀺𑀢𑀲𑁆𑀲 𑀢𑀸𑀤𑀺𑀦𑁄,

𑀭𑀫𑀦𑁆𑀢𑀺 𑀲𑀕𑁆𑀕𑁂 [𑀭𑀫𑀦𑁆𑀢𑀺 𑀲𑀼𑀫𑀦𑀸 (𑀓.), 𑀓𑀫𑀦𑁆𑀢𑀺 𑀲𑀩𑁆𑀩𑁂 (𑀲𑁆𑀬𑀸. 𑀓𑀁.)] 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀤𑀸𑀦𑀸𑀦𑀺𑀲𑀁𑀲𑀲𑀼𑀢𑁆𑀢𑀁

𑁩𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀤𑀸𑀦𑁂 𑀆𑀦𑀺𑀲𑀁𑀲𑀸. 𑀓𑀢𑀫𑁂 𑀧𑀜𑁆𑀘? 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀚𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀕𑀺𑀳𑀺𑀥𑀫𑁆𑀫𑀸 𑀅𑀦𑀧𑀕𑀢𑁄 [𑀕𑀺𑀳𑀺𑀥𑀫𑁆𑀫𑀸 𑀅𑀦𑀧𑁂𑀢𑁄 (𑀲𑀻. 𑀧𑀻.), 𑀕𑀺𑀳𑀺𑀥𑀫𑁆𑀫𑀫𑀦𑀼𑀧𑀕𑀢𑁄 (𑀓.)] 𑀳𑁄𑀢𑀺; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀤𑀸𑀦𑁂 𑀆𑀦𑀺𑀲𑀁𑀲𑀸’’𑀢𑀺.

‘‘𑀤𑀤𑀫𑀸𑀦𑁄 𑀧𑀺𑀬𑁄 𑀳𑁄𑀢𑀺, 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀁;

𑀲𑀦𑁆𑀢𑁄 𑀦𑀁 𑀲𑀤𑀸 𑀪𑀚𑀦𑁆𑀢𑀺 [𑀲𑀦𑁆𑀢𑁄 𑀪𑀚𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸 (𑀲𑀻.)], 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀬𑁄.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. 𑀧𑀜𑁆𑀘𑀫𑀁;

𑁬. 𑀓𑀸𑀮𑀤𑀸𑀦𑀲𑀼𑀢𑁆𑀢𑀁

𑁩𑁬. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀸𑀮𑀤𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀕𑀦𑁆𑀢𑀼𑀓𑀲𑁆𑀲 𑀤𑀸𑀦𑀁 𑀤𑁂𑀢𑀺; 𑀕𑀫𑀺𑀓𑀲𑁆𑀲 𑀤𑀸𑀦𑀁 𑀤𑁂𑀢𑀺; 𑀕𑀺𑀮𑀸𑀦𑀲𑁆𑀲 𑀤𑀸𑀦𑀁 𑀤𑁂𑀢𑀺; 𑀤𑀼𑀩𑁆𑀪𑀺𑀓𑁆𑀔𑁂 𑀤𑀸𑀦𑀁 𑀤𑁂𑀢𑀺; 𑀬𑀸𑀦𑀺 𑀢𑀸𑀦𑀺 𑀦𑀯𑀲𑀲𑁆𑀲𑀸𑀦𑀺 𑀦𑀯𑀨𑀮𑀸𑀦𑀺 𑀢𑀸𑀦𑀺 𑀧𑀞𑀫𑀁 𑀲𑀻𑀮𑀯𑀦𑁆𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀸𑀮𑀤𑀸𑀦𑀸𑀦𑀻’’𑀢𑀺.

‘‘𑀓𑀸𑀮𑁂 𑀤𑀤𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀓𑀸𑀮𑁂𑀦 𑀤𑀺𑀦𑁆𑀦𑀁 𑀅𑀭𑀺𑀬𑁂𑀲𑀼, 𑀉𑀚𑀼𑀪𑀽𑀢𑁂𑀲𑀼 𑀢𑀸𑀤𑀺𑀲𑀼.

‘‘𑀯𑀺𑀧𑁆𑀧𑀲𑀦𑁆𑀦𑀫𑀦𑀸 𑀢𑀲𑁆𑀲, 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸;

𑀬𑁂 𑀢𑀢𑁆𑀣 𑀅𑀦𑀼𑀫𑁄𑀤𑀦𑁆𑀢𑀺, 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀺 𑀯𑀸;

𑀦 𑀢𑁂𑀦 [𑀦 𑀢𑁂𑀲𑀁 (𑀧𑀻. 𑀓.)] 𑀤𑀓𑁆𑀔𑀺𑀡𑀸 𑀊𑀦𑀸, 𑀢𑁂𑀧𑀺 𑀧𑀼𑀜𑁆𑀜𑀲𑁆𑀲 𑀪𑀸𑀕𑀺𑀦𑁄.

‘‘𑀢𑀲𑁆𑀫𑀸 𑀤𑀤𑁂 𑀅𑀧𑁆𑀧𑀝𑀺𑀯𑀸𑀦𑀘𑀺𑀢𑁆𑀢𑁄, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺. 𑀙𑀝𑁆𑀞𑀁;

𑁯. 𑀪𑁄𑀚𑀦𑀲𑀼𑀢𑁆𑀢𑀁

𑁩𑁭. ‘‘𑀪𑁄𑀚𑀦𑀁, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁄 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀜𑁆𑀘 𑀞𑀸𑀦𑀸𑀦𑀺 𑀤𑁂𑀢𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺, 𑀧𑀝𑀺𑀪𑀸𑀦𑀁 [𑀧𑀝𑀺𑀪𑀸𑀡𑀁 (𑀲𑀻.)] 𑀤𑁂𑀢𑀺. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸; 𑀯𑀡𑁆𑀡𑀁 𑀤𑀢𑁆𑀯𑀸 𑀯𑀡𑁆𑀡𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸; 𑀲𑀼𑀔𑀁 𑀤𑀢𑁆𑀯𑀸 𑀲𑀼𑀔𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸; 𑀩𑀮𑀁 𑀤𑀢𑁆𑀯𑀸 𑀩𑀮𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸; 𑀧𑀝𑀺𑀪𑀸𑀦𑀁 𑀤𑀢𑁆𑀯𑀸 𑀧𑀝𑀺𑀪𑀸𑀦𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀪𑁄𑀚𑀦𑀁, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁄 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀤𑁂𑀢𑀻’’𑀢𑀺.

‘‘𑀆𑀬𑀼𑀤𑁄 𑀩𑀮𑀤𑁄 𑀥𑀻𑀭𑁄, 𑀯𑀡𑁆𑀡𑀤𑁄 𑀧𑀝𑀺𑀪𑀸𑀦𑀤𑁄;

𑀲𑀼𑀔𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻, 𑀲𑀼𑀔𑀁 𑀲𑁄 𑀅𑀥𑀺𑀕𑀘𑁆𑀙𑀢𑀺.

‘‘𑀆𑀬𑀼𑀁 𑀤𑀢𑁆𑀯𑀸 𑀩𑀮𑀁 𑀯𑀡𑁆𑀡𑀁, 𑀲𑀼𑀔𑀜𑁆𑀘 𑀧𑀝𑀺𑀪𑀸𑀦𑀓𑀁 [𑀧𑀝𑀺𑀪𑀸𑀡𑀓𑀁 (𑀲𑀻.), 𑀧𑀝𑀺𑀪𑀸𑀦𑀤𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)];

𑀤𑀻𑀖𑀸𑀬𑀼 𑀬𑀲𑀯𑀸 𑀳𑁄𑀢𑀺, 𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀫𑀁;

𑁮. 𑀲𑀤𑁆𑀥𑀲𑀼𑀢𑁆𑀢𑀁

𑁩𑁮. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑁂 𑀓𑀼𑀮𑀧𑀼𑀢𑁆𑀢𑁂 𑀆𑀦𑀺𑀲𑀁𑀲𑀸. 𑀓𑀢𑀫𑁂 𑀧𑀜𑁆𑀘? 𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀢𑁂 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀅𑀦𑀼𑀓𑀫𑁆𑀧𑀦𑁆𑀢𑀸 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑀜𑁆𑀜𑁂𑀯 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀤𑁂𑀲𑁂𑀦𑁆𑀢𑀺, 𑀦𑁄 𑀢𑀣𑀸 𑀅𑀲𑁆𑀲𑀤𑁆𑀥𑀁; 𑀲𑀤𑁆𑀥𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀲𑀤𑁆𑀥𑁂 𑀓𑀼𑀮𑀧𑀼𑀢𑁆𑀢𑁂 𑀆𑀦𑀺𑀲𑀁𑀲𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀽𑀫𑀺𑀬𑀁 𑀘𑀢𑀼𑀫𑀳𑀸𑀧𑀣𑁂 𑀫𑀳𑀸𑀦𑀺𑀕𑁆𑀭𑁄𑀥𑁄 𑀲𑀫𑀦𑁆𑀢𑀸 𑀧𑀓𑁆𑀔𑀻𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀝𑀺𑀲𑀭𑀡𑀁 𑀳𑁄𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦’’𑀦𑁆𑀢𑀺.

‘‘𑀲𑀸𑀔𑀸𑀧𑀢𑁆𑀢𑀨𑀮𑀽𑀧𑁂𑀢𑁄 [𑀲𑀸𑀔𑀸𑀧𑀢𑁆𑀢𑀩𑀳𑀼𑀧𑁂𑀢𑁄 (𑀓𑀢𑁆𑀣𑀘𑀺), 𑀲𑀸𑀔𑀸𑀧𑀢𑁆𑀢𑀧𑀮𑀸𑀲𑀽𑀧𑁂𑀢𑁄 (?)], 𑀔𑀦𑁆𑀥𑀺𑀫𑀸𑀯 [𑀔𑀦𑁆𑀥𑀺𑀫𑀸 𑀘 (𑀲𑀻.)] 𑀫𑀳𑀸𑀤𑀼𑀫𑁄;

𑀫𑀽𑀮𑀯𑀸 𑀨𑀮𑀲𑀫𑁆𑀧𑀦𑁆𑀦𑁄, 𑀧𑀢𑀺𑀝𑁆𑀞𑀸 𑀳𑁄𑀢𑀺 𑀧𑀓𑁆𑀔𑀺𑀦𑀁.

‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸;

𑀙𑀸𑀬𑀁 𑀙𑀸𑀬𑀢𑁆𑀣𑀺𑀓𑀸 [𑀙𑀸𑀬𑀢𑁆𑀣𑀺𑀦𑁄 (𑀲𑀻.)] 𑀬𑀦𑁆𑀢𑀺, 𑀨𑀮𑀢𑁆𑀣𑀸 𑀨𑀮𑀪𑁄𑀚𑀺𑀦𑁄.

‘‘𑀢𑀣𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀤𑁆𑀥𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁;

𑀦𑀺𑀯𑀸𑀢𑀯𑀼𑀢𑁆𑀢𑀺𑀁 𑀅𑀢𑁆𑀣𑀤𑁆𑀥𑀁, 𑀲𑁄𑀭𑀢𑀁 𑀲𑀔𑀺𑀮𑀁 𑀫𑀼𑀤𑀼𑀁.

‘‘𑀯𑀻𑀢𑀭𑀸𑀕𑀸 𑀯𑀻𑀢𑀤𑁄𑀲𑀸, 𑀯𑀻𑀢𑀫𑁄𑀳𑀸 𑀅𑀦𑀸𑀲𑀯𑀸;

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀲𑁂𑀯𑀦𑁆𑀢𑀺 𑀢𑀸𑀤𑀺𑀲𑀁 𑀦𑀭𑀁.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. 𑀅𑀝𑁆𑀞𑀫𑀁;

𑁯. 𑀧𑀼𑀢𑁆𑀢𑀲𑀼𑀢𑁆𑀢𑀁

𑁩𑁯. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀓𑀼𑀮𑁂 𑀚𑀸𑀬𑀫𑀸𑀦𑀁. 𑀓𑀢𑀫𑀸𑀦𑀺 𑀧𑀜𑁆𑀘? 𑀪𑀢𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺; 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺; 𑀓𑀼𑀮𑀯𑀁𑀲𑁄 𑀘𑀺𑀭𑀁 𑀞𑀲𑁆𑀲𑀢𑀺; 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀢𑀺; 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀗𑁆𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀻𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀓𑀼𑀮𑁂 𑀚𑀸𑀬𑀫𑀸𑀦’’𑀦𑁆𑀢𑀺.

[𑀓𑀣𑀸. 𑁪𑁯𑁧] ‘‘𑀧𑀜𑁆𑀘 𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀁, 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀪𑀢𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺.

‘‘𑀓𑀼𑀮𑀯𑀁𑀲𑁄 𑀘𑀺𑀭𑀁 𑀢𑀺𑀝𑁆𑀞𑁂, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀢𑀺;

𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁, 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀢𑀺.

‘‘𑀞𑀸𑀦𑀸𑀦𑁂𑀢𑀸𑀦𑀺 𑀲𑀫𑁆𑀧𑀲𑁆𑀲𑀁, 𑀧𑀼𑀢𑁆𑀢𑀁 𑀇𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀦𑁄.

‘‘𑀪𑀭𑀦𑁆𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀁;

𑀓𑀭𑁄𑀦𑁆𑀢𑀺 𑀦𑁂𑀲𑀁 𑀓𑀺𑀘𑁆𑀘𑀸𑀦𑀺, 𑀬𑀣𑀸 𑀢𑀁 𑀧𑀼𑀩𑁆𑀩𑀓𑀸𑀭𑀺𑀦𑀁.

‘‘𑀑𑀯𑀸𑀤𑀓𑀸𑀭𑀻 𑀪𑀢𑀧𑁄𑀲𑀻, 𑀓𑀼𑀮𑀯𑀁𑀲𑀁 𑀅𑀳𑀸𑀧𑀬𑀁;

𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀧𑀼𑀢𑁆𑀢𑁄 𑀳𑁄𑀢𑀺 𑀧𑀲𑀁𑀲𑀺𑀬𑁄’’𑀢𑀺. 𑀦𑀯𑀫𑀁;

𑁧𑁦. 𑀫𑀳𑀸𑀲𑀸𑀮𑀧𑀼𑀢𑁆𑀢𑀲𑀼𑀢𑁆𑀢𑀁

𑁪𑁦. ‘‘𑀳𑀺𑀫𑀯𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀸𑀮𑀸 𑀧𑀜𑁆𑀘𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀦𑁆𑀢𑀺. 𑀓𑀢𑀫𑀸𑀳𑀺 𑀧𑀜𑁆𑀘𑀳𑀺? 𑀲𑀸𑀔𑀸𑀧𑀢𑁆𑀢𑀧𑀮𑀸𑀲𑁂𑀦 𑀯𑀟𑁆𑀠𑀦𑁆𑀢𑀺; 𑀢𑀘𑁂𑀦 𑀯𑀟𑁆𑀠𑀦𑁆𑀢𑀺; 𑀧𑀧𑀝𑀺𑀓𑀸𑀬 𑀯𑀟𑁆𑀠𑀦𑁆𑀢𑀺; 𑀨𑁂𑀕𑁆𑀕𑀼𑀦𑀸 𑀯𑀟𑁆𑀠𑀦𑁆𑀢𑀺; 𑀲𑀸𑀭𑁂𑀦 𑀯𑀟𑁆𑀠𑀦𑁆𑀢𑀺. 𑀳𑀺𑀫𑀯𑀦𑁆𑀢𑀁, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀁 𑀦𑀺𑀲𑁆𑀲𑀸𑀬 𑀫𑀳𑀸𑀲𑀸𑀮𑀸 𑀇𑀫𑀸𑀳𑀺 𑀧𑀜𑁆𑀘𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀦𑁆𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀁 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑁄𑀚𑀦𑁄 𑀧𑀜𑁆𑀘𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀢𑀺. 𑀓𑀢𑀫𑀸𑀳𑀺 𑀧𑀜𑁆𑀘𑀳𑀺? 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺; 𑀲𑀻𑀮𑁂𑀦 𑀯𑀟𑁆𑀠𑀢𑀺; 𑀲𑀼𑀢𑁂𑀦 𑀯𑀟𑁆𑀠𑀢𑀺; 𑀘𑀸𑀕𑁂𑀦 𑀯𑀟𑁆𑀠𑀢𑀺; 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺. 𑀲𑀤𑁆𑀥𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑁄𑀚𑀦𑁄 𑀇𑀫𑀸𑀳𑀺 𑀧𑀜𑁆𑀘𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀢𑀻’’𑀢𑀺.

‘‘𑀬𑀣𑀸 𑀳𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀢𑀁 𑀭𑀼𑀓𑁆𑀔𑀸 𑀉𑀧𑀦𑀺𑀲𑁆𑀲𑀸𑀬, 𑀯𑀟𑁆𑀠𑀦𑁆𑀢𑁂 𑀢𑁂 𑀯𑀦𑀧𑁆𑀧𑀢𑀻.

‘‘𑀢𑀣𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀤𑁆𑀥𑀁 𑀓𑀼𑀮𑀧𑀼𑀢𑁆𑀢𑀁 𑀇𑀫𑀁 [𑀓𑀼𑀮𑀧𑀢𑀺𑀁 𑀇𑀥 (𑀲𑀻.), 𑀓𑀼𑀮𑀧𑀼𑀢𑁆𑀢𑀁 𑀇𑀥 (𑀲𑁆𑀬𑀸.)];

𑀉𑀧𑀦𑀺𑀲𑁆𑀲𑀸𑀬 𑀯𑀟𑁆𑀠𑀦𑁆𑀢𑀺, 𑀧𑀼𑀢𑁆𑀢𑀤𑀸𑀭𑀸 𑀘 𑀩𑀦𑁆𑀥𑀯𑀸;

𑀅𑀫𑀘𑁆𑀘𑀸 𑀜𑀸𑀢𑀺𑀲𑀗𑁆𑀖𑀸 𑀘, 𑀬𑁂 𑀘𑀲𑁆𑀲 𑀅𑀦𑀼𑀚𑀻𑀯𑀺𑀦𑁄.

‘‘𑀢𑁆𑀬𑀲𑁆𑀲 𑀲𑀻𑀮𑀯𑀢𑁄 𑀲𑀻𑀮𑀁, 𑀘𑀸𑀕𑀁 𑀲𑀼𑀘𑀭𑀺𑀢𑀸𑀦𑀺 𑀘;

𑀧𑀲𑁆𑀲𑀫𑀸𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀬𑁂 𑀪𑀯𑀦𑁆𑀢𑀺 𑀯𑀺𑀘𑀓𑁆𑀔𑀡𑀸.

‘‘𑀇𑀫𑀁 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀫𑀕𑁆𑀕𑀁 [𑀲𑀕𑁆𑀕𑀁 (𑀲𑁆𑀬𑀸. 𑀓.)] 𑀲𑀼𑀕𑀢𑀺𑀕𑀸𑀫𑀺𑀦𑀁;

𑀦𑀦𑁆𑀤𑀺𑀦𑁄 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄’’𑀢𑀺. 𑀤𑀲𑀫𑀁;

𑀲𑀼𑀫𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.