𑁫. 𑀤𑀸𑀦𑀸𑀦𑀺𑀲𑀁𑀲𑀲𑀼𑀢𑁆𑀢𑀁

𑁩𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀤𑀸𑀦𑁂 𑀆𑀦𑀺𑀲𑀁𑀲𑀸. 𑀓𑀢𑀫𑁂 𑀧𑀜𑁆𑀘? 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄; 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀪𑀚𑀦𑁆𑀢𑀺; 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀕𑀺𑀳𑀺𑀥𑀫𑁆𑀫𑀸 𑀅𑀦𑀧𑀕𑀢𑁄 [𑀕𑀺𑀳𑀺𑀥𑀫𑁆𑀫𑀸 𑀅𑀦𑀧𑁂𑀢𑁄 (𑀲𑀻. 𑀧𑀻.), 𑀕𑀺𑀳𑀺𑀥𑀫𑁆𑀫𑀫𑀦𑀼𑀧𑀕𑀢𑁄 (𑀓.)] 𑀳𑁄𑀢𑀺; 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀤𑀸𑀦𑁂 𑀆𑀦𑀺𑀲𑀁𑀲𑀸’’𑀢𑀺.

‘‘𑀤𑀤𑀫𑀸𑀦𑁄 𑀧𑀺𑀬𑁄 𑀳𑁄𑀢𑀺, 𑀲𑀢𑀁 𑀥𑀫𑁆𑀫𑀁 𑀅𑀦𑀼𑀓𑁆𑀓𑀫𑀁;

𑀲𑀦𑁆𑀢𑁄 𑀦𑀁 𑀲𑀤𑀸 𑀪𑀚𑀦𑁆𑀢𑀺 [𑀲𑀦𑁆𑀢𑁄 𑀪𑀚𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸 (𑀲𑀻.)], 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀬𑁄.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. 𑀧𑀜𑁆𑀘𑀫𑀁;