(𑁨𑁦) 𑁫. 𑀫𑀳𑀸𑀯𑀕𑁆𑀕𑁄

𑁧. 𑀲𑁄𑀢𑀸𑀦𑀼𑀕𑀢𑀲𑀼𑀢𑁆𑀢𑀁

𑁧𑁯𑁧. ‘‘𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 [𑀫𑀼𑀝𑁆𑀞𑀲𑁆𑀲𑀢𑀻 (𑀲𑀻.)] 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺 [𑀧𑀺𑀮𑀧𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺; 𑀅𑀧𑀺 𑀘 𑀔𑁄 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀯𑀸 𑀲𑁄 𑀥𑀫𑁆𑀫𑀯𑀺𑀦𑀬𑁄, 𑀬𑀢𑁆𑀣𑀸𑀳𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺’𑀦𑁆𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀫𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀓𑀼𑀲𑀮𑁄 𑀪𑁂𑀭𑀺𑀲𑀤𑁆𑀤𑀲𑁆𑀲. 𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀪𑁂𑀭𑀺𑀲𑀤𑁆𑀤𑀁 𑀲𑀼𑀡𑁂𑀬𑁆𑀬. 𑀢𑀲𑁆𑀲 𑀦 𑀳𑁂𑀯 𑀔𑁄 𑀅𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑁋 ‘𑀪𑁂𑀭𑀺𑀲𑀤𑁆𑀤𑁄 𑀦𑀼 𑀔𑁄, 𑀦 𑀦𑀼 𑀔𑁄 𑀪𑁂𑀭𑀺𑀲𑀤𑁆𑀤𑁄’𑀢𑀺! 𑀅𑀣 𑀔𑁄 𑀪𑁂𑀭𑀺𑀲𑀤𑁆𑀤𑁄𑀢𑁆𑀯𑁂𑀯 𑀦𑀺𑀝𑁆𑀞𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺; 𑀅𑀧𑀺 𑀘 𑀔𑁄 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀯𑀸 𑀲𑁄 𑀥𑀫𑁆𑀫𑀯𑀺𑀦𑀬𑁄, 𑀬𑀢𑁆𑀣𑀸𑀳𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺’𑀦𑁆𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺, 𑀦𑀧𑀺 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀅𑀧𑀺 𑀘 𑀔𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀯𑀸 𑀲𑁄 𑀥𑀫𑁆𑀫𑀯𑀺𑀦𑀬𑁄, 𑀬𑀢𑁆𑀣𑀸𑀳𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺’𑀦𑁆𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀓𑀼𑀲𑀮𑁄 𑀲𑀗𑁆𑀔𑀲𑀤𑁆𑀤𑀲𑁆𑀲. 𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀔𑀲𑀤𑁆𑀤𑀁 𑀲𑀼𑀡𑁂𑀬𑁆𑀬. 𑀢𑀲𑁆𑀲 𑀦 𑀳𑁂𑀯 𑀔𑁄 𑀅𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑁋 ‘𑀲𑀗𑁆𑀔𑀲𑀤𑁆𑀤𑁄 𑀦𑀼 𑀔𑁄, 𑀦 𑀦𑀼 𑀔𑁄 𑀲𑀗𑁆𑀔𑀲𑀤𑁆𑀤𑁄’𑀢𑀺! 𑀅𑀣 𑀔𑁄 𑀲𑀗𑁆𑀔𑀲𑀤𑁆𑀤𑁄𑀢𑁆𑀯𑁂𑀯 𑀦𑀺𑀝𑁆𑀞𑀁 𑀕𑀘𑁆𑀙𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺, 𑀦𑀧𑀺 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀅𑀧𑀺 𑀘 𑀔𑁄 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀯𑀸 𑀲𑁄 𑀥𑀫𑁆𑀫𑀯𑀺𑀦𑀬𑁄, 𑀬𑀢𑁆𑀣𑀸𑀳𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺’𑀦𑁆𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺, 𑀦𑀧𑀺 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀧𑀺 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀅𑀧𑀺 𑀘 𑀔𑁄 𑀑𑀧𑀧𑀸𑀢𑀺𑀓𑁄 𑀑𑀧𑀧𑀸𑀢𑀺𑀓𑀁 𑀲𑀸𑀭𑁂𑀢𑀺 𑁋 ‘𑀲𑀭𑀲𑀺 𑀢𑁆𑀯𑀁, 𑀫𑀸𑀭𑀺𑀲, 𑀲𑀭𑀲𑀺 𑀢𑁆𑀯𑀁, 𑀫𑀸𑀭𑀺𑀲, 𑀬𑀢𑁆𑀣 𑀫𑀬𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀫𑁆𑀳𑀸’𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀲𑀭𑀸𑀫𑀺, 𑀫𑀸𑀭𑀺𑀲, 𑀲𑀭𑀸𑀫𑀺, 𑀫𑀸𑀭𑀺𑀲𑀸’𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀳𑀸𑀬𑀓𑀸 𑀲𑀳𑀧𑀁𑀲𑀼𑀓𑀻𑀴𑀺𑀓𑀸 [𑀲𑀳𑀧𑀁𑀲𑀼𑀓𑀻𑀴𑀓𑀸 (𑀲𑁆𑀬𑀸. 𑀓𑀁.)]. 𑀢𑁂 𑀓𑀤𑀸𑀘𑀺 𑀓𑀭𑀳𑀘𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁. 𑀅𑀜𑁆𑀜𑁄 𑀧𑀦 [𑀲𑀫𑀸𑀕𑀘𑁆𑀙𑁂𑀬𑁆𑀬𑀼𑀁, 𑀢𑀫𑁂𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀤𑀫𑁆𑀧𑀺, 𑀲𑀫𑁆𑀫, 𑀲𑀭𑀲𑀺, 𑀇𑀤𑀫𑁆𑀧𑀺, 𑀲𑀫𑁆𑀫, 𑀲𑀭𑀲𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀭𑀸𑀫𑀺, 𑀲𑀫𑁆𑀫, 𑀲𑀭𑀸𑀫𑀺, 𑀲𑀫𑁆𑀫𑀸’𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀢𑀲𑁆𑀲 𑀢𑁂 𑀥𑀫𑁆𑀫𑀸 𑀲𑁄𑀢𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀯𑀘𑀲𑀸 𑀧𑀭𑀺𑀘𑀺𑀢𑀸, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀲𑁄 𑀫𑀼𑀝𑁆𑀞𑀲𑁆𑀲𑀢𑀺 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀦 𑀳𑁂𑀯 𑀔𑁄 𑀲𑀼𑀔𑀺𑀦𑁄 𑀥𑀫𑁆𑀫𑀧𑀤𑀸 𑀧𑁆𑀮𑀯𑀦𑁆𑀢𑀺, 𑀦𑀧𑀺 𑀪𑀺𑀓𑁆𑀔𑀼 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀧𑀺 𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀧𑀭𑀺𑀲𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀅𑀧𑀺 𑀘 𑀔𑁄 𑀑𑀧𑀧𑀸𑀢𑀺𑀓𑁄 𑀑𑀧𑀧𑀸𑀢𑀺𑀓𑀁 𑀲𑀸𑀭𑁂𑀢𑀺 𑁋 ‘𑀲𑀭𑀲𑀺 𑀢𑁆𑀯𑀁, 𑀫𑀸𑀭𑀺𑀲, 𑀲𑀭𑀲𑀺 𑀢𑁆𑀯𑀁, 𑀫𑀸𑀭𑀺𑀲, 𑀬𑀢𑁆𑀣 𑀫𑀬𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀫𑁆𑀳𑀸’𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀲𑀭𑀸𑀫𑀺, 𑀫𑀸𑀭𑀺𑀲, 𑀲𑀭𑀸𑀫𑀺, 𑀫𑀸𑀭𑀺𑀲𑀸’𑀢𑀺. 𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄; 𑀅𑀣 𑀔𑁄 𑀲𑁄 𑀲𑀢𑁆𑀢𑁄 𑀔𑀺𑀧𑁆𑀧𑀁𑀬𑁂𑀯 𑀯𑀺𑀲𑁂𑀲𑀕𑀸𑀫𑀻 𑀳𑁄𑀢𑀺. 𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀧𑀸𑀝𑀺𑀓𑀗𑁆𑀔𑁄. 𑀲𑁄𑀢𑀸𑀦𑀼𑀕𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁, 𑀯𑀘𑀲𑀸 𑀧𑀭𑀺𑀘𑀺𑀢𑀸𑀦𑀁, 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀦𑀁 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀦𑀁 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀧𑀞𑀫𑀁.

𑁨. 𑀞𑀸𑀦𑀲𑀼𑀢𑁆𑀢𑀁

𑁧𑁯𑁨. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑀸𑀦𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀸𑀲𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀁𑀯𑁄𑀳𑀸𑀭𑁂𑀦, 𑀪𑀺𑀓𑁆𑀔𑀯𑁂, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀆𑀧𑀤𑀸𑀲𑀼, 𑀪𑀺𑀓𑁆𑀔𑀯𑁂, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦. 𑀲𑀸𑀓𑀘𑁆𑀙𑀸𑀬, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸𑀢𑀺.

[𑀲𑀁. 𑀦𑀺. 𑁧.𑁧𑁨𑁨] ‘‘‘𑀲𑀁𑀯𑀸𑀲𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀔𑀡𑁆𑀟𑀓𑀸𑀭𑀻 𑀙𑀺𑀤𑁆𑀤𑀓𑀸𑀭𑀻 𑀲𑀩𑀮𑀓𑀸𑀭𑀻 𑀓𑀫𑁆𑀫𑀸𑀲𑀓𑀸𑀭𑀻, 𑀦 𑀲𑀦𑁆𑀢𑀢𑀓𑀸𑀭𑀻 𑀦 𑀲𑀦𑁆𑀢𑀢𑀯𑀼𑀢𑁆𑀢𑀺 [𑀲𑀢𑀢𑀯𑀼𑀢𑁆𑀢𑀺 (𑀲𑁆𑀬𑀸. 𑀓𑀁.)]; 𑀲𑀻𑀮𑁂𑀲𑀼 𑀤𑀼𑀲𑁆𑀲𑀻𑀮𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀲𑀻𑀮𑀯𑀸’’’𑀢𑀺.

‘‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀅𑀔𑀡𑁆𑀟𑀓𑀸𑀭𑀻 𑀅𑀘𑁆𑀙𑀺𑀤𑁆𑀤𑀓𑀸𑀭𑀻 𑀅𑀲𑀩𑀮𑀓𑀸𑀭𑀻 𑀅𑀓𑀫𑁆𑀫𑀸𑀲𑀓𑀸𑀭𑀻 𑀲𑀦𑁆𑀢𑀢𑀓𑀸𑀭𑀻 𑀲𑀦𑁆𑀢𑀢𑀯𑀼𑀢𑁆𑀢𑀺; 𑀲𑀻𑀮𑁂𑀲𑀼 𑀲𑀻𑀮𑀯𑀸 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀤𑀼𑀲𑁆𑀲𑀻𑀮𑁄’𑀢𑀺. ‘𑀲𑀁𑀯𑀸𑀲𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀁𑀯𑁄𑀳𑀸𑀭𑁂𑀦, 𑀪𑀺𑀓𑁆𑀔𑀯𑁂, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑁄𑀳𑀭𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀜𑁆𑀜𑀣𑀸 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀏𑀓𑁂𑀦 𑀏𑀓𑁄 𑀯𑁄𑀳𑀭𑀢𑀺, 𑀅𑀜𑁆𑀜𑀣𑀸 𑀤𑁆𑀯𑀻𑀳𑀺, 𑀅𑀜𑁆𑀜𑀣𑀸 𑀢𑀻𑀳𑀺, 𑀅𑀜𑁆𑀜𑀣𑀸 𑀲𑀫𑁆𑀩𑀳𑀼𑀮𑁂𑀳𑀺; 𑀯𑁄𑀓𑁆𑀓𑀫𑀢𑀺 𑀅𑀬𑀫𑀸𑀬𑀲𑁆𑀫𑀸 𑀧𑀼𑀭𑀺𑀫𑀯𑁄𑀳𑀸𑀭𑀸 𑀧𑀘𑁆𑀙𑀺𑀫𑀯𑁄𑀳𑀸𑀭𑀁; 𑀅𑀧𑀭𑀺𑀲𑀼𑀤𑁆𑀥𑀯𑁄𑀳𑀸𑀭𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀧𑀭𑀺𑀲𑀼𑀤𑁆𑀥𑀯𑁄𑀳𑀸𑀭𑁄’’’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑁄𑀳𑀭𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀣𑁂𑀯 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀏𑀓𑁂𑀦 𑀏𑀓𑁄 𑀯𑁄𑀳𑀭𑀢𑀺, 𑀢𑀣𑀸 𑀤𑁆𑀯𑀻𑀳𑀺, 𑀢𑀣𑀸 𑀢𑀻𑀳𑀺, 𑀢𑀣𑀸 𑀲𑀫𑁆𑀩𑀳𑀼𑀮𑁂𑀳𑀺. 𑀦𑀸𑀬𑀫𑀸𑀬𑀲𑁆𑀫𑀸 𑀯𑁄𑀓𑁆𑀓𑀫𑀢𑀺 𑀧𑀼𑀭𑀺𑀫𑀯𑁄𑀳𑀸𑀭𑀸 𑀧𑀘𑁆𑀙𑀺𑀫𑀯𑁄𑀳𑀸𑀭𑀁; 𑀧𑀭𑀺𑀲𑀼𑀤𑁆𑀥𑀯𑁄𑀳𑀸𑀭𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀅𑀧𑀭𑀺𑀲𑀼𑀤𑁆𑀥𑀯𑁄𑀳𑀸𑀭𑁄’𑀢𑀺. ‘𑀲𑀁𑀯𑁄𑀳𑀸𑀭𑁂𑀦, 𑀪𑀺𑀓𑁆𑀔𑀯𑁂, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀆𑀧𑀤𑀸𑀲𑀼, 𑀪𑀺𑀓𑁆𑀔𑀯𑁂, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄, 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄, 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀢𑀣𑀸𑀪𑀽𑀢𑁄 𑀔𑁄 𑀅𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀢𑀣𑀸𑀪𑀽𑀢𑁄 𑀅𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀣𑀸𑀪𑀽𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀬𑀣𑀸𑀪𑀽𑀢𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀮𑁄𑀓𑁄 𑀘 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀺 𑁋 𑀮𑀸𑀪𑁄 𑀘, 𑀅𑀮𑀸𑀪𑁄 𑀘, 𑀬𑀲𑁄 𑀘, 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀘, 𑀧𑀲𑀁𑀲𑀸 𑀘, 𑀲𑀼𑀔𑀜𑁆𑀘, 𑀤𑀼𑀓𑁆𑀔𑀜𑁆𑀘𑀸’𑀢𑀺. 𑀲𑁄 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀢𑀣𑀸𑀪𑀽𑀢𑁄 𑀔𑁄 𑀅𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀢𑀣𑀸𑀪𑀽𑀢𑁄 𑀅𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀣𑀸𑀪𑀽𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀬𑀣𑀸𑀪𑀽𑀢𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀮𑁄𑀓𑀁 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀮𑁄𑀓𑁄 𑀘 𑀅𑀝𑁆𑀞 𑀮𑁄𑀓𑀥𑀫𑁆𑀫𑁂 𑀅𑀦𑀼𑀧𑀭𑀺𑀯𑀢𑁆𑀢𑀢𑀺 𑁋 𑀮𑀸𑀪𑁄 𑀘, 𑀅𑀮𑀸𑀪𑁄 𑀘, 𑀬𑀲𑁄 𑀘, 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀘, 𑀧𑀲𑀁𑀲𑀸 𑀘, 𑀲𑀼𑀔𑀜𑁆𑀘, 𑀤𑀼𑀓𑁆𑀔𑀜𑁆𑀘𑀸’𑀢𑀺. 𑀲𑁄 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. ‘𑀆𑀧𑀤𑀸𑀲𑀼, 𑀪𑀺𑀓𑁆𑀔𑀯𑁂, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀸𑀓𑀘𑁆𑀙𑀸𑀬, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀸𑀬𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀬𑀣𑀸 𑀘 𑀧𑀜𑁆𑀳𑀸𑀲𑀫𑀼𑀤𑀸𑀳𑀸𑀭𑁄, 𑀤𑀼𑀧𑁆𑀧𑀜𑁆𑀜𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀧𑀜𑁆𑀜𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀦 𑀘𑁂𑀯 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀁 𑀉𑀤𑀸𑀳𑀭𑀢𑀺 𑀲𑀦𑁆𑀢𑀁 𑀧𑀡𑀻𑀢𑀁 𑀅𑀢𑀓𑁆𑀓𑀸𑀯𑀘𑀭𑀁 𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀁. 𑀬𑀜𑁆𑀘 𑀅𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀪𑀸𑀲𑀢𑀺 𑀢𑀲𑁆𑀲 𑀘 𑀦𑀧𑁆𑀧𑀝𑀺𑀩𑀮𑁄 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁. 𑀤𑀼𑀧𑁆𑀧𑀜𑁆𑀜𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀧𑀜𑁆𑀜𑀯𑀸’’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀉𑀤𑀓𑀭𑀳𑀤𑀲𑁆𑀲 𑀢𑀻𑀭𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀧𑀭𑀺𑀢𑁆𑀢𑀁 𑀫𑀘𑁆𑀙𑀁 𑀉𑀫𑁆𑀫𑀼𑀚𑁆𑀚𑀫𑀸𑀦𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀫𑀘𑁆𑀙𑀲𑁆𑀲 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀊𑀫𑀺𑀖𑀸𑀢𑁄 𑀬𑀣𑀸 𑀘 𑀯𑁂𑀕𑀸𑀬𑀺𑀢𑀢𑁆𑀢𑀁, 𑀧𑀭𑀺𑀢𑁆𑀢𑁄 𑀅𑀬𑀁 𑀫𑀘𑁆𑀙𑁄, 𑀦𑀸𑀬𑀁 𑀫𑀘𑁆𑀙𑁄 𑀫𑀳𑀦𑁆𑀢𑁄’𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀸𑀬𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀬𑀣𑀸 𑀘 𑀧𑀜𑁆𑀳𑀸𑀲𑀫𑀼𑀤𑀸𑀳𑀸𑀭𑁄, 𑀤𑀼𑀧𑁆𑀧𑀜𑁆𑀜𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀧𑀜𑁆𑀜𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀦 𑀘𑁂𑀯 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀁 𑀉𑀤𑀸𑀳𑀭𑀢𑀺 𑀲𑀦𑁆𑀢𑀁 𑀧𑀡𑀻𑀢𑀁 𑀅𑀢𑀓𑁆𑀓𑀸𑀯𑀘𑀭𑀁 𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀁. 𑀬𑀜𑁆𑀘 𑀅𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀲 𑀘 𑀦 𑀧𑀝𑀺𑀩𑀮𑁄 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁. 𑀤𑀼𑀧𑁆𑀧𑀜𑁆𑀜𑁄 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀧𑀜𑁆𑀜𑀯𑀸’’’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀸𑀬𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀬𑀣𑀸 𑀘 𑀧𑀜𑁆𑀳𑀸𑀲𑀫𑀼𑀤𑀸𑀳𑀸𑀭𑁄, 𑀧𑀜𑁆𑀜𑀯𑀸 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀕𑀫𑁆𑀪𑀻𑀭𑀜𑁆𑀘𑁂𑀯 𑀅𑀢𑁆𑀣𑀧𑀤𑀁 𑀉𑀤𑀸𑀳𑀭𑀢𑀺 𑀲𑀦𑁆𑀢𑀁 𑀧𑀡𑀻𑀢𑀁 𑀅𑀢𑀓𑁆𑀓𑀸𑀯𑀘𑀭𑀁 𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀁. 𑀬𑀜𑁆𑀘 𑀅𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀲 𑀘 𑀧𑀝𑀺𑀩𑀮𑁄 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁. 𑀧𑀜𑁆𑀜𑀯𑀸 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄’’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀉𑀤𑀓𑀭𑀳𑀤𑀲𑁆𑀲 𑀢𑀻𑀭𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀫𑀘𑁆𑀙𑀁 𑀉𑀫𑁆𑀫𑀼𑀚𑁆𑀚𑀫𑀸𑀦𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀫𑀘𑁆𑀙𑀲𑁆𑀲 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀊𑀫𑀺𑀖𑀸𑀢𑁄 𑀬𑀣𑀸 𑀘 𑀯𑁂𑀕𑀸𑀬𑀺𑀢𑀢𑁆𑀢𑀁, 𑀫𑀳𑀦𑁆𑀢𑁄 𑀅𑀬𑀁 𑀫𑀘𑁆𑀙𑁄, 𑀦𑀸𑀬𑀁 𑀫𑀘𑁆𑀙𑁄 𑀧𑀭𑀺𑀢𑁆𑀢𑁄’𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀸𑀓𑀘𑁆𑀙𑀸𑀬𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀣𑀸 𑀔𑁄 𑀇𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀫𑁆𑀫𑀕𑁆𑀕𑁄 𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄 𑀬𑀣𑀸 𑀘 𑀧𑀜𑁆𑀳𑀸𑀲𑀫𑀼𑀤𑀸𑀳𑀸𑀭𑁄, 𑀧𑀜𑁆𑀜𑀯𑀸 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀕𑀫𑁆𑀪𑀻𑀭𑀜𑁆𑀘𑁂𑀯 𑀅𑀢𑁆𑀣𑀧𑀤𑀁 𑀉𑀤𑀸𑀳𑀭𑀢𑀺 𑀲𑀦𑁆𑀢𑀁 𑀧𑀡𑀻𑀢𑀁 𑀅𑀢𑀓𑁆𑀓𑀸𑀯𑀘𑀭𑀁 𑀦𑀺𑀧𑀼𑀡𑀁 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀁. 𑀬𑀜𑁆𑀘 𑀅𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀲 𑀘 𑀧𑀝𑀺𑀩𑀮𑁄 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼𑀁. 𑀧𑀜𑁆𑀜𑀯𑀸 𑀅𑀬𑀫𑀸𑀬𑀲𑁆𑀫𑀸, 𑀦𑀸𑀬𑀫𑀸𑀬𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄’𑀢𑀺.

‘‘‘𑀲𑀸𑀓𑀘𑁆𑀙𑀸𑀬, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸, 𑀦 𑀇𑀢𑁆𑀢𑀭𑀁; 𑀫𑀦𑀲𑀺𑀓𑀭𑁄𑀢𑀸, 𑀦𑁄 𑀅𑀫𑀦𑀲𑀺𑀓𑀭𑁄𑀢𑀸; 𑀧𑀜𑁆𑀜𑀯𑀢𑀸, 𑀦𑁄 𑀤𑀼𑀧𑁆𑀧𑀜𑁆𑀜𑁂𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀪𑀤𑁆𑀤𑀺𑀬𑀲𑀼𑀢𑁆𑀢𑀁

𑁧𑁯𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀤𑁆𑀤𑀺𑀬𑁄 𑀮𑀺𑀘𑁆𑀙𑀯𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀤𑁆𑀤𑀺𑀬𑁄 𑀮𑀺𑀘𑁆𑀙𑀯𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀫𑀸𑀬𑀸𑀯𑀻 𑀲𑀫𑀡𑁄 𑀕𑁄𑀢𑀫𑁄 𑀆𑀯𑀝𑁆𑀝𑀦𑀺𑀁 𑀫𑀸𑀬𑀁 [𑀆𑀯𑀝𑁆𑀝𑀦𑀻𑀫𑀸𑀬𑀁 (𑀲𑀻.), 𑀆𑀯𑀝𑁆𑀝𑀦𑀺𑀫𑀸𑀬𑀁 (𑀲𑁆𑀬𑀸. 𑀓𑀁. 𑀓.) 𑀫. 𑀦𑀺. 𑁨.𑁬𑁦 𑀧𑀲𑁆𑀲𑀺𑀢𑀩𑁆𑀩𑀁] 𑀚𑀸𑀦𑀸𑀢𑀺 𑀬𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑀸𑀯𑀓𑁂 𑀆𑀯𑀝𑁆𑀝𑁂𑀢𑀻’𑀢𑀺. 𑀬𑁂 𑀢𑁂, 𑀪𑀦𑁆𑀢𑁂, 𑀏𑀯𑀫𑀸𑀳𑀁𑀲𑀼 𑁋 ‘𑀫𑀸𑀬𑀸𑀯𑀻 𑀲𑀫𑀡𑁄 𑀕𑁄𑀢𑀫𑁄 𑀆𑀯𑀝𑁆𑀝𑀦𑀺𑀁 𑀫𑀸𑀬𑀁 𑀚𑀸𑀦𑀸𑀢𑀺 𑀬𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑀸𑀯𑀓𑁂 𑀆𑀯𑀝𑁆𑀝𑁂𑀢𑀻’𑀢𑀺, 𑀓𑀘𑁆𑀘𑀺 𑀢𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸 𑀳𑀺 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢’’𑀦𑁆𑀢𑀺?

‘‘𑀏𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 ‘𑀲𑀫𑀡𑁄 𑀦𑁄 𑀕𑀭𑀽’𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺, 𑀅𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀧𑀚𑀳𑁂𑀬𑁆𑀬𑀸𑀣.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀮𑁄𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺? ‘‘𑀅𑀳𑀺𑀢𑀸𑀬, 𑀪𑀦𑁆𑀢𑁂’’. ‘‘𑀮𑀼𑀤𑁆𑀥𑁄 𑀧𑀦𑀸𑀬𑀁, 𑀪𑀤𑁆𑀤𑀺𑀬, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀮𑁄𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 [𑀢𑀤𑀢𑁆𑀣𑀸𑀬 (𑀓.) 𑀅. 𑀦𑀺. 𑁩.𑁬𑁬] 𑀲𑀫𑀸𑀤𑀧𑁂𑀢𑀺 𑀬𑀁𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀤𑁄𑀲𑁄 𑀧𑀼𑀭𑀺𑀲𑀲𑁆𑀲…𑀧𑁂… 𑀫𑁄𑀳𑁄 𑀧𑀼𑀭𑀺𑀲𑀲𑁆𑀲…𑀧𑁂… 𑀲𑀸𑀭𑀫𑁆𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺? ‘‘𑀅𑀳𑀺𑀢𑀸𑀬, 𑀪𑀦𑁆𑀢𑁂’’. ‘‘𑀲𑀸𑀭𑀤𑁆𑀥𑁄 𑀧𑀦𑀸𑀬𑀁, 𑀪𑀤𑁆𑀤𑀺𑀬, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀲𑀸𑀭𑀫𑁆𑀪𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀲𑀫𑀸𑀤𑀧𑁂𑀢𑀺 𑀬𑀁𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺? ‘‘𑀅𑀓𑀼𑀲𑀮𑀸, 𑀪𑀦𑁆𑀢𑁂’’. ‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺? ‘‘𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺? ‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂’’. ‘‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀸? 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀪𑀤𑁆𑀤𑀺𑀬, 𑀬𑀁 𑀢𑀁 𑀢𑁂 𑀅𑀯𑁄𑀘𑀼𑀫𑁆𑀳𑀸 𑁋 𑀏𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 ‘𑀲𑀫𑀡𑁄 𑀦𑁄 𑀕𑀭𑀽’𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀅𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀧𑀚𑀳𑁂𑀬𑁆𑀬𑀸𑀣𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀏𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 ‘𑀲𑀫𑀡𑁄 𑀦𑁄 𑀕𑀭𑀽’𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺, 𑀅𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀅𑀮𑁄𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺? ‘‘𑀳𑀺𑀢𑀸𑀬, 𑀪𑀦𑁆𑀢𑁂’’. ‘‘𑀅𑀮𑀼𑀤𑁆𑀥𑁄 𑀧𑀦𑀸𑀬𑀁, 𑀪𑀤𑁆𑀤𑀺𑀬, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀮𑁄𑀪𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀦 𑀲𑀫𑀸𑀤𑀧𑁂𑀢𑀺 𑀬𑀁’𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀅𑀤𑁄𑀲𑁄 𑀧𑀼𑀭𑀺𑀲𑀲𑁆𑀲…𑀧𑁂… 𑀅𑀫𑁄𑀳𑁄 𑀧𑀼𑀭𑀺𑀲𑀲𑁆𑀲…𑀧𑁂… 𑀅𑀲𑀸𑀭𑀫𑁆𑀪𑁄 𑀧𑀼𑀭𑀺𑀲𑀲𑁆𑀲 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀳𑀺𑀢𑀸𑀬 𑀯𑀸 𑀅𑀳𑀺𑀢𑀸𑀬 𑀯𑀸’’𑀢𑀺? ‘‘𑀳𑀺𑀢𑀸𑀬, 𑀪𑀦𑁆𑀢𑁂’’. ‘‘𑀅𑀲𑀸𑀭𑀤𑁆𑀥𑁄 𑀧𑀦𑀸𑀬𑀁, 𑀪𑀤𑁆𑀤𑀺𑀬, 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀲𑀸𑀭𑀫𑁆𑀪𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀦𑁂𑀯 𑀧𑀸𑀡𑀁 𑀳𑀦𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺, 𑀦 𑀫𑀼𑀲𑀸 𑀪𑀡𑀢𑀺, 𑀧𑀭𑀫𑁆𑀧𑀺 𑀢𑀣𑀢𑁆𑀢𑀸𑀬 𑀦 𑀲𑀫𑀸𑀤𑀧𑁂𑀢𑀺 𑀬𑀁’𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀤𑁆𑀤𑀺𑀬, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸’’𑀢𑀺? ‘‘𑀓𑀼𑀲𑀮𑀸, 𑀪𑀦𑁆𑀢𑁂’’. ‘‘𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸’’𑀢𑀺? ‘‘𑀅𑀦𑀯𑀚𑁆𑀚𑀸, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸’’𑀢𑀺? ‘‘𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀪𑀦𑁆𑀢𑁂’’. ‘‘𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸? 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺.

‘‘𑀇𑀢𑀺 𑀔𑁄, 𑀪𑀤𑁆𑀤𑀺𑀬, 𑀬𑀁 𑀢𑀁 𑀢𑁂 𑀅𑀯𑁄𑀘𑀼𑀫𑁆𑀳𑀸 𑁋 𑀏𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀫𑀸 𑀅𑀦𑀼𑀲𑁆𑀲𑀯𑁂𑀦, 𑀫𑀸 𑀧𑀭𑀫𑁆𑀧𑀭𑀸𑀬, 𑀫𑀸 𑀇𑀢𑀺𑀓𑀺𑀭𑀸𑀬, 𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦, 𑀫𑀸 𑀢𑀓𑁆𑀓𑀳𑁂𑀢𑀼, 𑀫𑀸 𑀦𑀬𑀳𑁂𑀢𑀼, 𑀫𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦, 𑀫𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸, 𑀫𑀸 𑀪𑀩𑁆𑀩𑀭𑀽𑀧𑀢𑀸𑀬, 𑀫𑀸 ‘𑀲𑀫𑀡𑁄 𑀦𑁄 𑀕𑀭𑀽’𑀢𑀺. 𑀬𑀤𑀸 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀅𑀢𑁆𑀢𑀦𑀸𑀯 𑀚𑀸𑀦𑁂𑀬𑁆𑀬𑀸𑀣 𑁋 ‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸, 𑀇𑀫𑁂 𑀥𑀫𑁆𑀫𑀸 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺, 𑀅𑀣 𑀢𑀼𑀫𑁆𑀳𑁂, 𑀪𑀤𑁆𑀤𑀺𑀬, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀣𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀬𑁂 𑀔𑁄 𑀢𑁂, 𑀪𑀤𑁆𑀤𑀺𑀬, 𑀮𑁄𑀓𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀢𑁂 𑀲𑀸𑀯𑀓𑀁 𑀏𑀯𑀁 𑀲𑀫𑀸𑀤𑀧𑁂𑀦𑁆𑀢𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀮𑁄𑀪𑀁 𑀯𑀺𑀦𑁂𑀬𑁆𑀬 [𑀯𑀺𑀦𑁂𑀬𑁆𑀬 𑀯𑀺𑀦𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓𑀁.)] 𑀯𑀺𑀳𑀭𑀸𑀳𑀺. 𑀮𑁄𑀪𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀦𑁆𑀢𑁄 𑀦 𑀮𑁄𑀪𑀚𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀤𑁄𑀲𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀸𑀳𑀺. 𑀤𑁄𑀲𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀦𑁆𑀢𑁄 𑀦 𑀤𑁄𑀲𑀚𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀫𑁄𑀳𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀸𑀳𑀺. 𑀫𑁄𑀳𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀦𑁆𑀢𑁄 𑀦 𑀫𑁄𑀳𑀚𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀲𑀸𑀭𑀫𑁆𑀪𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀸𑀳𑀺. 𑀲𑀸𑀭𑀫𑁆𑀪𑀁 𑀯𑀺𑀦𑁂𑀬𑁆𑀬 𑀯𑀺𑀳𑀭𑀦𑁆𑀢𑁄 𑀦 𑀲𑀸𑀭𑀫𑁆𑀪𑀚𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀪𑀤𑁆𑀤𑀺𑀬𑁄 𑀮𑀺𑀘𑁆𑀙𑀯𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

‘‘𑀅𑀧𑀺 𑀦𑀼 𑀢𑀸𑀳𑀁, 𑀪𑀤𑁆𑀤𑀺𑀬, 𑀏𑀯𑀁 𑀅𑀯𑀘𑀁 𑁋 ‘𑀏𑀳𑀺 𑀫𑁂 𑀢𑁆𑀯𑀁, 𑀪𑀤𑁆𑀤𑀺𑀬, 𑀲𑀸𑀯𑀓𑁄 𑀳𑁄𑀳𑀺; 𑀅𑀳𑀁 𑀲𑀢𑁆𑀣𑀸 𑀪𑀯𑀺𑀲𑁆𑀲𑀸𑀫𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀏𑀯𑀁𑀯𑀸𑀤𑀺𑀁 𑀔𑁄 𑀫𑀁, 𑀪𑀤𑁆𑀤𑀺𑀬, 𑀏𑀯𑀫𑀓𑁆𑀔𑀸𑀬𑀺𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑁋 ‘𑀫𑀸𑀬𑀸𑀯𑀻 𑀲𑀫𑀡𑁄 𑀕𑁄𑀢𑀫𑁄 𑀆𑀯𑀝𑁆𑀝𑀦𑀺𑀁 𑀫𑀸𑀬𑀁 𑀚𑀸𑀦𑀸𑀢𑀺 𑀬𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑀸𑀯𑀓𑁂 𑀆𑀯𑀝𑁆𑀝𑁂𑀢𑀻’’’𑀢𑀺. ‘‘𑀪𑀤𑁆𑀤𑀺𑀓𑀸, 𑀪𑀦𑁆𑀢𑁂, 𑀆𑀯𑀝𑁆𑀝𑀦𑀻 𑀫𑀸𑀬𑀸. 𑀓𑀮𑁆𑀬𑀸𑀡𑀻, 𑀪𑀦𑁆𑀢𑁂, 𑀆𑀯𑀝𑁆𑀝𑀦𑀻 𑀫𑀸𑀬𑀸. 𑀧𑀺𑀬𑀸 𑀫𑁂, 𑀪𑀦𑁆𑀢𑁂, 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁, 𑀧𑀺𑀬𑀸𑀦𑀫𑁆𑀧𑀺 𑀫𑁂 𑀅𑀲𑁆𑀲 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀩𑁆𑀩𑁂 𑀘𑁂𑀧𑀺, 𑀪𑀦𑁆𑀢𑁂, 𑀔𑀢𑁆𑀢𑀺𑀬𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁, 𑀲𑀩𑁆𑀩𑁂𑀲𑀫𑁆𑀧𑀺𑀲𑁆𑀲 𑀔𑀢𑁆𑀢𑀺𑀬𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀩𑁆𑀩𑁂 𑀘𑁂𑀧𑀺, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸… 𑀯𑁂𑀲𑁆𑀲𑀸 … 𑀲𑀼𑀤𑁆𑀤𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁, 𑀲𑀩𑁆𑀩𑁂𑀲𑀫𑁆𑀧𑀺𑀲𑁆𑀲 𑀲𑀼𑀤𑁆𑀤𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀏𑀯𑀫𑁂𑀢𑀁, 𑀪𑀤𑁆𑀤𑀺𑀬, 𑀏𑀯𑀫𑁂𑀢𑀁, 𑀪𑀤𑁆𑀤𑀺𑀬! 𑀲𑀩𑁆𑀩𑁂 𑀘𑁂𑀧𑀺, 𑀪𑀤𑁆𑀤𑀺𑀬, 𑀔𑀢𑁆𑀢𑀺𑀬𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑀸𑀬 𑀓𑀼𑀲𑀮𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀬, 𑀲𑀩𑁆𑀩𑁂𑀲𑀫𑁆𑀧𑀺𑀲𑁆𑀲 𑀔𑀢𑁆𑀢𑀺𑀬𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀩𑁆𑀩𑁂 𑀘𑁂𑀧𑀺, 𑀪𑀤𑁆𑀤𑀺𑀬, 𑀩𑁆𑀭𑀸𑀳𑁆𑀫𑀡𑀸… 𑀯𑁂𑀲𑁆𑀲𑀸… 𑀲𑀼𑀤𑁆𑀤𑀸 𑀆𑀯𑀝𑁆𑀝𑁂𑀬𑁆𑀬𑀼𑀁 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑀸𑀬 𑀓𑀼𑀲𑀮𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀬, 𑀲𑀩𑁆𑀩𑁂𑀲𑀫𑁆𑀧𑀺𑀲𑁆𑀲 𑀲𑀼𑀤𑁆𑀤𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀲𑀤𑁂𑀯𑀓𑁄 𑀘𑁂𑀧𑀺, 𑀪𑀤𑁆𑀤𑀺𑀬, 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁 [𑀆𑀯𑀝𑁆𑀝𑁂𑀬𑁆𑀬 (?)] 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑀸𑀬 𑀓𑀼𑀲𑀮𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀬, 𑀲𑀤𑁂𑀯𑀓𑀲𑁆𑀲𑀧𑀺𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬. 𑀇𑀫𑁂 𑀘𑁂𑀧𑀺, 𑀪𑀤𑁆𑀤𑀺𑀬, 𑀫𑀳𑀸𑀲𑀸𑀮𑀸 𑀇𑀫𑀸𑀬 𑀆𑀯𑀝𑁆𑀝𑀦𑀺𑀬𑀸 𑀆𑀯𑀝𑁆𑀝𑁂𑀬𑁆𑀬𑀼𑀁 𑀅𑀓𑀼𑀲𑀮𑀥𑀫𑁆𑀫𑀧𑁆𑀧𑀳𑀸𑀦𑀸𑀬 𑀓𑀼𑀲𑀮𑀥𑀫𑁆𑀫𑀽𑀧𑀲𑀫𑁆𑀧𑀤𑀸𑀬, 𑀇𑀫𑁂𑀲𑀫𑁆𑀧𑀺𑀲𑁆𑀲 𑀫𑀳𑀸𑀲𑀸𑀮𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 ( ) [(𑀲𑀘𑁂 𑀘𑁂𑀢𑁂𑀬𑁆𑀬𑀼𑀁) (𑀲𑀻. 𑀲𑁆𑀬𑀸. 𑀓𑀁. 𑀧𑀻.), (𑀆𑀯𑀝𑁆𑀝𑁂𑀬𑁆𑀬𑀼𑀁) (𑀓.) 𑀅. 𑀦𑀺. 𑁮.𑁪𑁪]. 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑀸’’𑀢𑀺! 𑀢𑀢𑀺𑀬𑀁.

𑁪. 𑀲𑀸𑀫𑀼𑀕𑀺𑀬𑀲𑀼𑀢𑁆𑀢𑀁

𑁧𑁯𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀮𑀺𑀬𑁂𑀲𑀼 𑀯𑀺𑀳𑀭𑀢𑀺 𑀲𑀸𑀫𑀼𑀕𑀁 𑀦𑀸𑀫 [𑀲𑀸𑀧𑀽𑀕𑀁 𑀦𑀸𑀫 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑁄𑀮𑀺𑀬𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀲𑀸𑀫𑀼𑀕𑀺𑀬𑀸 𑀓𑁄𑀮𑀺𑀬𑀧𑀼𑀢𑁆𑀢𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀲𑀸𑀫𑀼𑀕𑀺𑀬𑁂 𑀓𑁄𑀮𑀺𑀬𑀧𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀤𑀓𑁆𑀔𑀸𑀢𑀸𑀦𑀺 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 [𑀲𑁄𑀓𑀧𑀭𑀺𑀤𑁆𑀤𑀯𑀸𑀦𑀁 (𑀲𑀻.)] 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁, 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁, 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁, 𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁.

‘‘𑀓𑀢𑀫𑀜𑁆𑀘, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺. 𑀇𑀢𑀺 𑀏𑀯𑀭𑀽𑀧𑀺𑀁 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺 𑀧𑀭𑀺𑀧𑀽𑀭𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺, 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁.

‘‘𑀓𑀢𑀫𑀜𑁆𑀘, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺. 𑀇𑀢𑀺 𑀏𑀯𑀭𑀽𑀧𑀺𑀁 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺 𑀧𑀭𑀺𑀧𑀽𑀭𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺, 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁.

‘‘𑀓𑀢𑀫𑀜𑁆𑀘, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁? 𑀇𑀥, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺. 𑀇𑀢𑀺 𑀏𑀯𑀭𑀽𑀧𑀺𑀁 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀧𑀭𑀺𑀧𑀽𑀭𑀁 𑀯𑀸…𑀧𑁂… 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺, 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁.

‘‘𑀓𑀢𑀫𑀜𑁆𑀘, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁? 𑀲 𑀔𑁄 𑀲𑁄, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀅𑀭𑀺𑀬𑀲𑀸𑀯𑀓𑁄 𑀇𑀫𑀺𑀦𑀸 𑀘 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀫𑀺𑀦𑀸 𑀘 𑀘𑀺𑀢𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀫𑀺𑀦𑀸 𑀘 𑀤𑀺𑀝𑁆𑀞𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺, 𑀯𑀺𑀫𑁄𑀘𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀢𑀺. 𑀲𑁄 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀯𑀺𑀫𑁄𑀘𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀢𑁆𑀯𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀲𑀼𑀤𑁆𑀥𑀺. 𑀇𑀢𑀺 𑀏𑀯𑀭𑀽𑀧𑀺𑀁 𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀧𑀭𑀺𑀧𑀽𑀭𑀁 𑀯𑀸 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺 𑀧𑀭𑀺𑀧𑀽𑀭𑀁 𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺, 𑀬𑁄 𑀢𑀢𑁆𑀣 𑀙𑀦𑁆𑀤𑁄 𑀘 𑀯𑀸𑀬𑀸𑀫𑁄 𑀘 𑀉𑀲𑁆𑀲𑀸𑀳𑁄 𑀘 𑀉𑀲𑁆𑀲𑁄𑀴𑁆𑀳𑀻 𑀘 𑀅𑀧𑁆𑀧𑀝𑀺𑀯𑀸𑀦𑀻 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘, 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀯𑀺𑀫𑀼𑀢𑁆𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀁.

‘‘𑀇𑀫𑀸𑀦𑀺 𑀔𑁄, 𑀩𑁆𑀬𑀕𑁆𑀖𑀧𑀚𑁆𑀚𑀸, 𑀘𑀢𑁆𑀢𑀸𑀭𑀺 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀤𑀓𑁆𑀔𑀸𑀢𑀸𑀦𑀺 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀧𑁆𑀧𑀲𑀼𑀢𑁆𑀢𑀁

𑁧𑁯𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀯𑀧𑁆𑀧𑁄 𑀲𑀓𑁆𑀓𑁄 𑀦𑀺𑀕𑀡𑁆𑀞𑀲𑀸𑀯𑀓𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀧𑁆𑀧𑀁 𑀲𑀓𑁆𑀓𑀁 𑀦𑀺𑀕𑀡𑁆𑀞𑀲𑀸𑀯𑀓𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀲𑁆𑀲, 𑀯𑀧𑁆𑀧, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀫𑀦𑀲𑀸 𑀲𑀁𑀯𑀼𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 [𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 (𑀓.)] 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀧𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀢𑀁 𑀞𑀸𑀦𑀁. 𑀇𑀥𑀲𑁆𑀲, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀁. 𑀢𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺. 𑀅𑀬𑀜𑁆𑀘𑁂𑀯 𑀔𑁄 𑀧𑀦 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀯𑀧𑁆𑀧𑁂𑀦 𑀲𑀓𑁆𑀓𑁂𑀦 𑀦𑀺𑀕𑀡𑁆𑀞𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀉𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀓𑀸𑀬 𑀦𑀼𑀢𑁆𑀣, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸; 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀯𑀧𑁆𑀧𑀁 𑀲𑀓𑁆𑀓𑀁 𑀦𑀺𑀕𑀡𑁆𑀞𑀲𑀸𑀯𑀓𑀁 𑀏𑀢𑀤𑀯𑁄𑀘𑀁 𑁋 ‘𑀇𑀥𑀲𑁆𑀲, 𑀯𑀧𑁆𑀧, 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀫𑀦𑀲𑀸 𑀲𑀁𑀯𑀼𑀢𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀯𑀧𑁆𑀧𑁄 𑀲𑀓𑁆𑀓𑁄 𑀦𑀺𑀕𑀡𑁆𑀞𑀲𑀸𑀯𑀓𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀧𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀢𑀁 𑀞𑀸𑀦𑀁. 𑀇𑀥𑀲𑁆𑀲, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀧𑀸𑀧𑀓𑀫𑁆𑀫𑀁 𑀓𑀢𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀁. 𑀢𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’𑀦𑁆𑀢𑀺. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀯𑀧𑁆𑀧𑁂𑀦 𑀲𑀓𑁆𑀓𑁂𑀦 𑀦𑀺𑀕𑀡𑁆𑀞𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸; 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀯𑀧𑁆𑀧𑀁 𑀲𑀓𑁆𑀓𑀁 𑀦𑀺𑀕𑀡𑁆𑀞𑀲𑀸𑀯𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀫𑁂 𑀢𑁆𑀯𑀁, 𑀯𑀧𑁆𑀧, 𑀅𑀦𑀼𑀜𑁆𑀜𑁂𑀬𑁆𑀬𑀜𑁆𑀘𑁂𑀯 𑀅𑀦𑀼𑀚𑀸𑀦𑁂𑀬𑁆𑀬𑀸𑀲𑀺, 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀜𑁆𑀘 𑀧𑀝𑀺𑀓𑁆𑀓𑁄𑀲𑁂𑀬𑁆𑀬𑀸𑀲𑀺, 𑀬𑀲𑁆𑀲 𑀘 𑀫𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑁂𑀬𑁆𑀬𑀸𑀲𑀺 𑀫𑀫𑁂𑀯𑁂𑀢𑁆𑀣 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀲𑀺 𑁋 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺, 𑀲𑀺𑀬𑀸 𑀦𑁄 𑀏𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺. ‘‘𑀅𑀦𑀼𑀜𑁆𑀜𑁂𑀬𑁆𑀬𑀜𑁆𑀘𑁂𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺, 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀜𑁆𑀘 𑀧𑀝𑀺𑀓𑁆𑀓𑁄𑀲𑀺𑀲𑁆𑀲𑀸𑀫𑀺, 𑀬𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁𑀬𑁂𑀯𑁂𑀢𑁆𑀣 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑁋 ‘𑀇𑀤𑀁 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺? 𑀳𑁄𑀢𑀼 𑀦𑁄 𑀏𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀧𑁆𑀧, 𑀬𑁂 𑀓𑀸𑀬𑀲𑀫𑀸𑀭𑀫𑁆𑀪𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀓𑀸𑀬𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀲𑁆𑀲 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺, 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺 [𑀯𑀺𑀜𑁆𑀜𑀽𑀳𑀻𑀢𑀺 (𑀲𑀻. 𑀧𑀻. 𑀓.) 𑀲𑀁. 𑀦𑀺. 𑁪.𑁩𑁬𑁪 𑀧𑀲𑁆𑀲𑀺𑀢𑀩𑁆𑀩𑀁]. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀧𑁆𑀧, 𑀬𑁂 𑀯𑀘𑀻𑀲𑀫𑀸𑀭𑀫𑁆𑀪𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀯𑀘𑀻𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀲𑁆𑀲 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀧𑁆𑀧, 𑀬𑁂 𑀫𑀦𑁄𑀲𑀫𑀸𑀭𑀫𑁆𑀪𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀦𑁄𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀲𑁆𑀲 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀧𑁆𑀧, 𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀲𑁄 𑀦𑀯𑀜𑁆𑀘 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀼𑀭𑀸𑀡𑀜𑁆𑀘 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀯𑀧𑁆𑀧, 𑀢𑀁 𑀞𑀸𑀦𑀁 𑀬𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀸 𑀆𑀲𑀯𑀸 𑀅𑀲𑁆𑀲𑀯𑁂𑀬𑁆𑀬𑀼𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀔𑁄, 𑀯𑀧𑁆𑀧, 𑀪𑀺𑀓𑁆𑀔𑀼𑀦𑁄 𑀙 𑀲𑀢𑀢𑀯𑀺𑀳𑀸𑀭𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂... 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺; 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺; ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀯𑀧𑁆𑀧, 𑀣𑀽𑀡𑀁 𑀧𑀝𑀺𑀘𑁆𑀘 𑀙𑀸𑀬𑀸 𑀧𑀜𑁆𑀜𑀸𑀬𑀢𑀺. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑁆𑀤𑀸𑀮𑀧𑀺𑀝𑀓𑀁 𑀆𑀤𑀸𑀬. 𑀲𑁄 𑀢𑀁 𑀣𑀽𑀡𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬; 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀺𑀔𑀡𑁂𑀬𑁆𑀬; 𑀧𑀮𑀺𑀔𑀡𑀺𑀢𑁆𑀯𑀸 𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀉𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀺 [𑀉𑀲𑀻𑀭𑀦𑀸𑀴𑀫𑀢𑁆𑀢𑀸𑀦𑀺𑀧𑀺 (𑀲𑀻.)]. 𑀲𑁄 𑀢𑀁 𑀣𑀽𑀡𑀁 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑁂𑀬𑁆𑀬. 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀢𑁆𑀯𑀸 𑀨𑀸𑀮𑁂𑀬𑁆𑀬. 𑀨𑀸𑀮𑁂𑀢𑁆𑀯𑀸 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑁂𑀬𑁆𑀬. 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀢𑁆𑀯𑀸 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀬𑁆𑀬. 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀢𑁆𑀯𑀸 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬. 𑀅𑀕𑁆𑀕𑀺𑀦𑀸 𑀟𑀳𑁂𑀢𑁆𑀯𑀸 𑀫𑀲𑀺𑀁 𑀓𑀭𑁂𑀬𑁆𑀬. 𑀫𑀲𑀺𑀁 𑀓𑀭𑀺𑀢𑁆𑀯𑀸 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀡𑁂𑀬𑁆𑀬 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬. 𑀏𑀯𑀁 𑀳𑀺𑀲𑁆𑀲, 𑀯𑀧𑁆𑀧, 𑀬𑀸 𑀣𑀽𑀡𑀁 𑀧𑀝𑀺𑀘𑁆𑀘 𑀙𑀸𑀬𑀸 𑀲𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸.

‘‘𑀏𑀯𑀫𑁂𑀯𑀁 𑀔𑁄, 𑀯𑀧𑁆𑀧, 𑀏𑀯𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙 𑀲𑀢𑀢𑀯𑀺𑀳𑀸𑀭𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄; 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺; 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺; ‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀇𑀥𑁂𑀯 𑀲𑀩𑁆𑀩𑀯𑁂𑀤𑀬𑀺𑀢𑀸𑀦𑀺 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀺’’.

𑀏𑀯𑀁 𑀯𑀼𑀢𑁆𑀢𑁂 𑀯𑀧𑁆𑀧𑁄 𑀲𑀓𑁆𑀓𑁄 𑀦𑀺𑀕𑀡𑁆𑀞𑀲𑀸𑀯𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀉𑀤𑀬𑀢𑁆𑀣𑀺𑀓𑁄 𑀅𑀲𑁆𑀲𑀧𑀡𑀺𑀬𑀁 𑀧𑁄𑀲𑁂𑀬𑁆𑀬. 𑀲𑁄 𑀉𑀤𑀬𑀜𑁆𑀘𑁂𑀯 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀉𑀢𑁆𑀢𑀭𑀺𑀜𑁆𑀘 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀉𑀤𑀬𑀢𑁆𑀣𑀺𑀓𑁄 𑀩𑀸𑀮𑁂 𑀦𑀺𑀕𑀡𑁆𑀞𑁂 𑀧𑀬𑀺𑀭𑀼𑀧𑀸𑀲𑀺𑀁. 𑀲𑁆𑀯𑀸𑀳𑀁 𑀉𑀤𑀬𑀜𑁆𑀘𑁂𑀯 𑀦𑀸𑀥𑀺𑀕𑀘𑁆𑀙𑀺𑀁, 𑀉𑀢𑁆𑀢𑀭𑀺𑀜𑁆𑀘 𑀓𑀺𑀮𑀫𑀣𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀳𑁄𑀲𑀺𑀁. 𑀏𑀲𑀸𑀳𑀁, 𑀪𑀦𑁆𑀢𑁂, 𑀅𑀚𑁆𑀚𑀢𑀕𑁆𑀕𑁂 𑀬𑁄 𑀫𑁂 𑀩𑀸𑀮𑁂𑀲𑀼 𑀦𑀺𑀕𑀡𑁆𑀞𑁂𑀲𑀼 𑀧𑀲𑀸𑀤𑁄 𑀢𑀁 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀡𑀸𑀫𑀺 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀫𑀺. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀲𑀸𑀴𑁆𑀳𑀲𑀼𑀢𑁆𑀢𑀁

𑁧𑁯𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀲𑀸𑀴𑁆𑀳𑁄 𑀘 𑀮𑀺𑀘𑁆𑀙𑀯𑀺 𑀅𑀪𑀬𑁄 𑀘 𑀮𑀺𑀘𑁆𑀙𑀯𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀸𑀴𑁆𑀳𑁄 𑀮𑀺𑀘𑁆𑀙𑀯𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀦𑁆𑀢𑀺, 𑀪𑀦𑁆𑀢𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑁆𑀯𑀬𑁂𑀦 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀁 𑀧𑀜𑁆𑀜𑀧𑁂𑀦𑁆𑀢𑀺 𑁋 𑀲𑀻𑀮𑀯𑀺𑀲𑀼𑀤𑁆𑀥𑀺𑀳𑁂𑀢𑀼 𑀘 𑀢𑀧𑁄𑀚𑀺𑀕𑀼𑀘𑁆𑀙𑀸𑀳𑁂𑀢𑀼 𑀘. 𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀓𑀺𑀫𑀸𑀳𑀸’’𑀢𑀺?

‘‘𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀔𑁄 𑀅𑀳𑀁, 𑀲𑀸𑀴𑁆𑀳, 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀗𑁆𑀕𑀦𑁆𑀢𑀺 𑀯𑀤𑀸𑀫𑀺. 𑀬𑁂 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀲𑀸𑀭𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀅𑀮𑁆𑀮𑀻𑀦𑀸 𑀯𑀺𑀳𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀢𑁂 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸𑀬. 𑀬𑁂𑀧𑀺 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸, 𑀅𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀧𑀼𑀭𑀺𑀲𑁄 𑀦𑀤𑀺𑀁 𑀢𑀭𑀺𑀢𑀼𑀓𑀸𑀫𑁄 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 [𑀓𑀼𑀥𑀸𑀭𑀺𑀁 (𑀓.)] 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀧𑀲𑁆𑀲𑁂𑀬𑁆𑀬 𑀫𑀳𑀢𑀺𑀁 𑀲𑀸𑀮𑀮𑀝𑁆𑀞𑀺𑀁 𑀉𑀚𑀼𑀁 𑀦𑀯𑀁 𑀅𑀓𑀼𑀓𑁆𑀓𑀼𑀘𑁆𑀘𑀓𑀚𑀸𑀢𑀁. 𑀢𑀫𑁂𑀦𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬; 𑀫𑀽𑀮𑁂 𑀙𑁂𑀢𑁆𑀯𑀸 𑀅𑀕𑁆𑀕𑁂 𑀙𑀺𑀦𑁆𑀤𑁂𑀬𑁆𑀬; 𑀅𑀕𑁆𑀕𑁂 𑀙𑁂𑀢𑁆𑀯𑀸 𑀲𑀸𑀔𑀸𑀧𑀮𑀸𑀲𑀁 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀬𑁆𑀬; 𑀲𑀸𑀔𑀸𑀧𑀮𑀸𑀲𑀁 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀢𑁆𑀯𑀸 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑁂𑀬𑁆𑀬; 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑁂𑀬𑁆𑀬; 𑀯𑀸𑀲𑀻𑀳𑀺 𑀢𑀘𑁆𑀙𑁂𑀢𑁆𑀯𑀸 𑀮𑁂𑀔𑀡𑀺𑀬𑀸 𑀮𑀺𑀔𑁂𑀬𑁆𑀬; 𑀮𑁂𑀔𑀡𑀺𑀬𑀸 𑀮𑀺𑀔𑀺𑀢𑁆𑀯𑀸 𑀧𑀸𑀲𑀸𑀡𑀕𑀼𑀴𑁂𑀦 𑀥𑁄𑀯𑁂𑀬𑁆𑀬 [𑀥𑁄𑀧𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]; 𑀧𑀸𑀲𑀸𑀡𑀕𑀼𑀴𑁂𑀦 𑀥𑁄𑀯𑁂𑀢𑁆𑀯𑀸 𑀦𑀤𑀺𑀁 𑀧𑀢𑀸𑀭𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀸𑀴𑁆𑀳, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀦𑀤𑀺𑀁 𑀢𑀭𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀲𑀼 𑀳𑀺, 𑀪𑀦𑁆𑀢𑁂, 𑀲𑀸𑀮𑀮𑀝𑁆𑀞𑀺 𑀩𑀳𑀺𑀤𑁆𑀥𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀅𑀦𑁆𑀢𑁄 𑀅𑀯𑀺𑀲𑀼𑀤𑁆𑀥𑀸. 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀸𑀮𑀮𑀝𑁆𑀞𑀺 𑀲𑀁𑀲𑀻𑀤𑀺𑀲𑁆𑀲𑀢𑀺, 𑀧𑀼𑀭𑀺𑀲𑁄 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀲𑀸𑀴𑁆𑀳, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀲𑀸𑀭𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀅𑀮𑁆𑀮𑀻𑀦𑀸 𑀯𑀺𑀳𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀢𑁂 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸𑀬. 𑀬𑁂𑀧𑀺 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸, 𑀅𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬.

‘‘𑀬𑁂 𑀘 𑀔𑁄 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀲𑀸𑀭𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀅𑀮𑁆𑀮𑀻𑀦𑀸 𑀯𑀺𑀳𑀭𑀦𑁆𑀢𑀺, 𑀪𑀩𑁆𑀩𑀸 𑀢𑁂 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸𑀬. 𑀬𑁂𑀧𑀺 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸, 𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀧𑀼𑀭𑀺𑀲𑁄 𑀦𑀤𑀺𑀁 𑀢𑀭𑀺𑀢𑀼𑀓𑀸𑀫𑁄 𑀢𑀺𑀡𑁆𑀳𑀁 𑀓𑀼𑀞𑀸𑀭𑀺𑀁 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀧𑀲𑁆𑀲𑁂𑀬𑁆𑀬 𑀫𑀳𑀢𑀺𑀁 𑀲𑀸𑀮𑀮𑀝𑁆𑀞𑀺𑀁 𑀉𑀚𑀼𑀁 𑀦𑀯𑀁 𑀅𑀓𑀼𑀓𑁆𑀓𑀼𑀘𑁆𑀘𑀓𑀚𑀸𑀢𑀁. 𑀢𑀫𑁂𑀦𑀁 𑀫𑀽𑀮𑁂 𑀙𑀺𑀦𑁆𑀤𑁂𑀬𑁆𑀬; 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀅𑀕𑁆𑀕𑁂 𑀙𑀺𑀦𑁆𑀤𑁂𑀬𑁆𑀬; 𑀅𑀕𑁆𑀕𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀔𑀸𑀧𑀮𑀸𑀲𑀁 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀬𑁆𑀬; 𑀲𑀸𑀔𑀸𑀧𑀮𑀸𑀲𑀁 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀢𑁆𑀯𑀸 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑁂𑀬𑁆𑀬; 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑁂𑀬𑁆𑀬; 𑀯𑀸𑀲𑀻𑀳𑀺 𑀢𑀘𑁆𑀙𑁂𑀢𑁆𑀯𑀸 𑀦𑀺𑀔𑀸𑀤𑀦𑀁 𑀆𑀤𑀸𑀬 𑀅𑀦𑁆𑀢𑁄 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀬𑁆𑀬; 𑀅𑀦𑁆𑀢𑁄 𑀲𑀼𑀯𑀺𑀲𑁄𑀥𑀺𑀢𑀁 𑀯𑀺𑀲𑁄𑀥𑁂𑀢𑁆𑀯𑀸 𑀮𑁂𑀔𑀡𑀺𑀬𑀸 𑀮𑀺𑀔𑁂𑀬𑁆𑀬; 𑀮𑁂𑀔𑀡𑀺𑀬𑀸 𑀮𑀺𑀔𑀺𑀢𑁆𑀯𑀸 𑀧𑀸𑀲𑀸𑀡𑀕𑀼𑀴𑁂𑀦 𑀥𑁄𑀯𑁂𑀬𑁆𑀬; 𑀧𑀸𑀲𑀸𑀡𑀕𑀼𑀴𑁂𑀦 𑀥𑁄𑀯𑁂𑀢𑁆𑀯𑀸 𑀦𑀸𑀯𑀁 𑀓𑀭𑁂𑀬𑁆𑀬; 𑀦𑀸𑀯𑀁 𑀓𑀢𑁆𑀯𑀸 𑀨𑀺𑀬𑀸𑀭𑀺𑀢𑁆𑀢𑀁 [𑀧𑀺𑀬𑀸𑀭𑀺𑀢𑁆𑀢𑀁 (𑀲𑀻. 𑀧𑀻.)] 𑀩𑀦𑁆𑀥𑁂𑀬𑁆𑀬; 𑀨𑀺𑀬𑀸𑀭𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀦𑀤𑀺𑀁 𑀧𑀢𑀸𑀭𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀸𑀴𑁆𑀳, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀦𑀤𑀺𑀁 𑀢𑀭𑀺𑀢𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀲𑀼 𑀳𑀺, 𑀪𑀦𑁆𑀢𑁂, 𑀲𑀸𑀮𑀮𑀝𑁆𑀞𑀺 𑀩𑀳𑀺𑀤𑁆𑀥𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀸, 𑀅𑀦𑁆𑀢𑁄 𑀲𑀼𑀯𑀺𑀲𑀼𑀤𑁆𑀥𑀸 𑀦𑀸𑀯𑀸𑀓𑀢𑀸 [𑀲𑀼𑀯𑀺𑀲𑀼𑀤𑁆𑀥𑀓𑀢𑀸 (𑀓.)] 𑀨𑀺𑀬𑀸𑀭𑀺𑀢𑁆𑀢𑀩𑀤𑁆𑀥𑀸. 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 ‘𑀦𑀸𑀯𑀸 𑀦 𑀲𑀁𑀲𑀻𑀤𑀺𑀲𑁆𑀲𑀢𑀺, 𑀧𑀼𑀭𑀺𑀲𑁄 𑀲𑁄𑀢𑁆𑀣𑀺𑀦𑀸 𑀧𑀸𑀭𑀁 𑀕𑀫𑀺𑀲𑁆𑀲𑀢𑀻’’’𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀲𑀸𑀴𑁆𑀳, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀲𑀸𑀭𑀸 𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀅𑀮𑁆𑀮𑀻𑀦𑀸 𑀯𑀺𑀳𑀭𑀦𑁆𑀢𑀺, 𑀪𑀩𑁆𑀩𑀸 𑀢𑁂 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸𑀬. 𑀬𑁂𑀧𑀺 𑀢𑁂, 𑀲𑀸𑀴𑁆𑀳, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸, 𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀬𑁄𑀥𑀸𑀚𑀻𑀯𑁄 𑀩𑀳𑀽𑀦𑀺 𑀘𑁂𑀧𑀺 𑀓𑀡𑁆𑀟𑀘𑀺𑀢𑁆𑀭𑀓𑀸𑀦𑀺 𑀚𑀸𑀦𑀸𑀢𑀺; 𑀅𑀣 𑀔𑁄 𑀲𑁄 𑀢𑀻𑀳𑀺 𑀞𑀸𑀦𑁂𑀳𑀺 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀢𑀻𑀳𑀺? 𑀤𑀽𑀭𑁂𑀧𑀸𑀢𑀻 𑀘, 𑀅𑀓𑁆𑀔𑀡𑀯𑁂𑀥𑀻 𑀘, 𑀫𑀳𑀢𑁄 𑀘 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀬𑁄𑀥𑀸𑀚𑀻𑀯𑁄 𑀤𑀽𑀭𑁂𑀧𑀸𑀢𑀻; 𑀏𑀯𑀫𑁂𑀯𑀁 𑀔𑁄, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀬𑁄𑀥𑀸𑀚𑀻𑀯𑁄 𑀅𑀓𑁆𑀔𑀡𑀯𑁂𑀥𑀻; 𑀏𑀯𑀫𑁂𑀯𑀁 𑀔𑁄, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀴𑁆𑀳, 𑀬𑁄𑀥𑀸𑀚𑀻𑀯𑁄 𑀫𑀳𑀢𑁄 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸; 𑀏𑀯𑀫𑁂𑀯𑀁 𑀔𑁄, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺, 𑀲𑀸𑀴𑁆𑀳, 𑀅𑀭𑀺𑀬𑀲𑀸𑀯𑀓𑁄 𑀫𑀳𑀦𑁆𑀢𑀁 𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀫𑀮𑁆𑀮𑀺𑀓𑀸𑀤𑁂𑀯𑀻𑀲𑀼𑀢𑁆𑀢𑀁

𑁧𑁯𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 [𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 ‘‘𑀤𑀼𑀩𑁆𑀩𑀡𑁄 𑀘 𑀳𑁄𑀢𑀺 𑀤𑀼𑀭𑀽𑀧𑁄 𑀲𑀼𑀧𑀸𑀧𑀓𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀼𑀮𑁆𑀮𑀺𑀗𑁆𑀕𑀺𑀓𑀯𑀲𑁂𑀦 𑀤𑀺𑀲𑁆𑀲𑀢𑀺] 𑀤𑀲𑁆𑀲𑀦𑀸𑀬; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘?

‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬; 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘?

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘?

‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘𑀸’’𑀢𑀺?

‘‘𑀇𑀥, 𑀫𑀮𑁆𑀮𑀺𑀓𑁂, 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀓𑁄𑀥𑀦𑀸 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑀸. 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑀸 [𑀲𑁄 (𑀲𑁆𑀬𑀸.)] 𑀦 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀇𑀲𑁆𑀲𑀸𑀫𑀦𑀺𑀓𑀸 [𑀇𑀲𑁆𑀲𑀸𑀫𑀦𑀓𑁄 (𑀲𑁆𑀬𑀸.)] 𑀔𑁄 𑀧𑀦 𑀳𑁄𑀢𑀺; 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀢𑀺 𑀉𑀧𑀤𑀼𑀲𑁆𑀲𑀢𑀺 𑀇𑀲𑁆𑀲𑀁 𑀩𑀦𑁆𑀥𑀢𑀺. 𑀲𑀸 𑀘𑁂 𑀢𑀢𑁄 𑀘𑀼𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑀸 [𑀲𑁄 (𑀲𑁆𑀬𑀸.)] 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀸𑀚𑀸𑀬𑀢𑀺 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘.

‘‘𑀇𑀥 𑀧𑀦, 𑀫𑀮𑁆𑀮𑀺𑀓𑁂, 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀓𑁄𑀥𑀦𑀸 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑀸. 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑀸 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀅𑀦𑀺𑀲𑁆𑀲𑀸𑀫𑀦𑀺𑀓𑀸 𑀔𑁄 𑀧𑀦 𑀳𑁄𑀢𑀺; 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀦 𑀇𑀲𑁆𑀲𑀢𑀺 𑀦 𑀉𑀧𑀤𑀼𑀲𑁆𑀲𑀢𑀺 𑀦 𑀇𑀲𑁆𑀲𑀁 𑀩𑀦𑁆𑀥𑀢𑀺. 𑀲𑀸 𑀘𑁂 𑀢𑀢𑁄 𑀘𑀼𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑀸 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀸𑀚𑀸𑀬𑀢𑀺 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬; 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘.

‘‘𑀇𑀥 𑀧𑀦, 𑀫𑀮𑁆𑀮𑀺𑀓𑁂, 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀓𑁆𑀓𑁄𑀥𑀦𑀸 𑀳𑁄𑀢𑀺 𑀅𑀦𑀼𑀧𑀸𑀬𑀸𑀲𑀩𑀳𑀼𑀮𑀸. 𑀩𑀳𑀼𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀦𑀸𑀪𑀺𑀲𑀚𑁆𑀚𑀢𑀺 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀢𑁆𑀣𑀻𑀬𑀢𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑀸 𑀦 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀇𑀲𑁆𑀲𑀸𑀫𑀦𑀺𑀓𑀸 𑀔𑁄 𑀧𑀦 𑀳𑁄𑀢𑀺; 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀢𑀺 𑀉𑀧𑀤𑀼𑀲𑁆𑀲𑀢𑀺 𑀇𑀲𑁆𑀲𑀁 𑀩𑀦𑁆𑀥𑀢𑀺. 𑀲𑀸 𑀘𑁂 𑀢𑀢𑁄 𑀘𑀼𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑀸 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀸𑀚𑀸𑀬𑀢𑀺 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘.

‘‘𑀇𑀥 𑀧𑀦, 𑀫𑀮𑁆𑀮𑀺𑀓𑁂, 𑀏𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀓𑁆𑀓𑁄𑀥𑀦𑀸 𑀳𑁄𑀢𑀺 𑀅𑀦𑀼𑀧𑀸𑀬𑀸𑀲𑀩𑀳𑀼𑀮𑀸. 𑀩𑀳𑀼𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀦𑀸𑀪𑀺𑀲𑀚𑁆𑀚𑀢𑀺 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀢𑁆𑀣𑀻𑀬𑀢𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑀸 𑀤𑀸𑀢𑀸 𑀳𑁄𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀅𑀦𑀺𑀲𑁆𑀲𑀸𑀫𑀦𑀺𑀓𑀸 𑀔𑁄 𑀧𑀦 𑀳𑁄𑀢𑀺; 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀦 𑀇𑀲𑁆𑀲𑀢𑀺 𑀦 𑀉𑀧𑀤𑀼𑀲𑁆𑀲𑀢𑀺 𑀦 𑀇𑀲𑁆𑀲𑀁 𑀩𑀦𑁆𑀥𑀢𑀺. 𑀲𑀸 𑀘𑁂 𑀢𑀢𑁄 𑀘𑀼𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀲𑀸 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀸𑀚𑀸𑀬𑀢𑀺 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸; 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘.

‘‘𑀅𑀬𑀁 𑀔𑁄, 𑀫𑀮𑁆𑀮𑀺𑀓𑁂, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘. 𑀅𑀬𑀁 𑀧𑀦, 𑀫𑀮𑁆𑀮𑀺𑀓𑁂, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀤𑀼𑀩𑁆𑀩𑀡𑁆𑀡𑀸 𑀘 𑀳𑁄𑀢𑀺 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬; 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘. 𑀅𑀬𑀁 𑀔𑁄, 𑀫𑀮𑁆𑀮𑀺𑀓𑁂, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸; 𑀤𑀮𑀺𑀤𑁆𑀤𑀸 𑀘 𑀳𑁄𑀢𑀺 𑀅𑀧𑁆𑀧𑀲𑁆𑀲𑀓𑀸 𑀅𑀧𑁆𑀧𑀪𑁄𑀕𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘. 𑀅𑀬𑀁 𑀧𑀦, 𑀫𑀮𑁆𑀮𑀺𑀓𑁂, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀫𑀸𑀢𑀼𑀕𑀸𑀫𑁄 𑀅𑀪𑀺𑀭𑀽𑀧𑀸 𑀘 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸; 𑀅𑀟𑁆𑀠𑀸 𑀘 𑀳𑁄𑀢𑀺 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀫𑀳𑁂𑀲𑀓𑁆𑀔𑀸 𑀘𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸 𑀦𑀽𑀦𑀸𑀳𑀁 [𑀲𑀸 𑀦𑀽𑀦𑀸𑀳𑀁 (𑀲𑁆𑀬𑀸.), 𑀬𑀁 𑀦𑀽𑀦𑀸𑀳𑀁 (𑀓.)] 𑀪𑀦𑁆𑀢𑁂, 𑀅𑀜𑁆𑀜𑀁 𑀚𑀸𑀢𑀺𑀁 [𑀅𑀜𑁆𑀜𑀸𑀬 𑀚𑀸𑀢𑀺𑀬𑀸 (𑀲𑁆𑀬𑀸.)] 𑀓𑁄𑀥𑀦𑀸 𑀅𑀳𑁄𑀲𑀺𑀁 𑀉𑀧𑀸𑀬𑀸𑀲𑀩𑀳𑀼𑀮𑀸, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀅𑀪𑀺𑀲𑀚𑁆𑀚𑀺𑀁 𑀓𑀼𑀧𑁆𑀧𑀺𑀁 𑀩𑁆𑀬𑀸𑀧𑀚𑁆𑀚𑀺𑀁 𑀧𑀢𑀺𑀢𑁆𑀣𑀻𑀬𑀺𑀁 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀺𑀁, 𑀲𑀸𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀤𑀼𑀩𑁆𑀩𑀡𑁆𑀡𑀸 𑀤𑀼𑀭𑀽𑀧𑀸 𑀲𑀼𑀧𑀸𑀧𑀺𑀓𑀸 𑀤𑀲𑁆𑀲𑀦𑀸𑀬.

‘‘𑀬𑀸 𑀦𑀽𑀦𑀸𑀳𑀁, 𑀪𑀦𑁆𑀢𑁂, 𑀅𑀜𑁆𑀜𑀁 𑀚𑀸𑀢𑀺𑀁 𑀤𑀸𑀢𑀸 𑀅𑀳𑁄𑀲𑀺𑀁 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀲𑀸𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀅𑀟𑁆𑀠𑀸 [𑀅𑀟𑁆𑀠𑀸 𑀘 (𑀲𑀻. 𑀧𑀻. 𑀓.)] 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸.

‘‘𑀬𑀸 𑀦𑀽𑀦𑀸𑀳𑀁, 𑀪𑀦𑁆𑀢𑁂, 𑀅𑀜𑁆𑀜𑀁 𑀚𑀸𑀢𑀺𑀁 𑀅𑀦𑀺𑀲𑁆𑀲𑀸𑀫𑀦𑀺𑀓𑀸 𑀅𑀳𑁄𑀲𑀺𑀁, 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀦 𑀇𑀲𑁆𑀲𑀺𑀁 𑀦 𑀉𑀧𑀤𑀼𑀲𑁆𑀲𑀺𑀁 𑀦 𑀇𑀲𑁆𑀲𑀁 𑀩𑀦𑁆𑀥𑀺𑀁, 𑀲𑀸𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀫𑀳𑁂𑀲𑀓𑁆𑀔𑀸. 𑀲𑀦𑁆𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀔𑀢𑁆𑀢𑀺𑀬𑀓𑀜𑁆𑀜𑀸𑀧𑀺 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀧𑀺 𑀕𑀳𑀧𑀢𑀺𑀓𑀜𑁆𑀜𑀸𑀧𑀺, 𑀢𑀸𑀲𑀸𑀳𑀁 𑀇𑀲𑁆𑀲𑀭𑀸𑀥𑀺𑀧𑀘𑁆𑀘𑀁 𑀓𑀸𑀭𑁂𑀫𑀺. 𑀏𑀲𑀸𑀳𑀁, 𑀪𑀦𑁆𑀢𑁂, 𑀅𑀚𑁆𑀚𑀢𑀕𑁆𑀕𑁂 𑀅𑀓𑁆𑀓𑁄𑀥𑀦𑀸 𑀪𑀯𑀺𑀲𑁆𑀲𑀸𑀫𑀺 𑀅𑀦𑀼𑀧𑀸𑀬𑀸𑀲𑀩𑀳𑀼𑀮𑀸, 𑀩𑀳𑀼𑀫𑁆𑀧𑀺 𑀯𑀼𑀢𑁆𑀢𑀸 𑀲𑀫𑀸𑀦𑀸 𑀦𑀸𑀪𑀺𑀲𑀚𑁆𑀚𑀺𑀲𑁆𑀲𑀸𑀫𑀺 𑀦 𑀓𑀼𑀧𑁆𑀧𑀺𑀲𑁆𑀲𑀸𑀫𑀺 𑀦 𑀩𑁆𑀬𑀸𑀧𑀚𑁆𑀚𑀺𑀲𑁆𑀲𑀸𑀫𑀺 𑀦 𑀧𑀢𑀺𑀢𑁆𑀣𑀻𑀬𑀺𑀲𑁆𑀲𑀸𑀫𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀦 𑀧𑀸𑀢𑀼𑀓𑀭𑀺𑀲𑁆𑀲𑀸𑀫𑀺; 𑀤𑀲𑁆𑀲𑀸𑀫𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀅𑀦𑀺𑀲𑁆𑀲𑀸𑀫𑀦𑀺𑀓𑀸 𑀪𑀯𑀺𑀲𑁆𑀲𑀸𑀫𑀺, 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀦 𑀇𑀲𑁆𑀲𑀺𑀲𑁆𑀲𑀸𑀫𑀺 𑀦 𑀉𑀧𑀤𑀼𑀲𑁆𑀲𑀺𑀲𑁆𑀲𑀸𑀫𑀺 𑀦 𑀇𑀲𑁆𑀲𑀁 𑀩𑀦𑁆𑀥𑀺𑀲𑁆𑀲𑀸𑀫𑀺. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀺𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀅𑀢𑁆𑀢𑀦𑁆𑀢𑀧𑀲𑀼𑀢𑁆𑀢𑀁

𑁧𑁯𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 [𑀧𑀼. 𑀧. 𑁧𑁭𑁪; 𑀫. 𑀦𑀺. 𑁨.𑁭; 𑀤𑀻. 𑀦𑀺. 𑁩.𑁩𑁧𑁪; 𑀅. 𑀦𑀺. 𑁩.𑁧𑁫𑁭-𑁧𑁬𑁩] 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀳𑁄𑀢𑀺 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀲𑁄 𑀦𑁂𑀯 𑀅𑀢𑁆𑀢𑀦𑁆𑀢𑀧𑁄 𑀦 𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀘𑁂𑀮𑀓𑁄 𑀳𑁄𑀢𑀺 𑀫𑀼𑀢𑁆𑀢𑀸𑀘𑀸𑀭𑁄 𑀳𑀢𑁆𑀣𑀸𑀧𑀮𑁂𑀔𑀦𑁄 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄 𑀦𑀸𑀪𑀺𑀳𑀝𑀁 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺. 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁 𑀦 𑀤𑀡𑁆𑀟𑀫𑀦𑁆𑀢𑀭𑀁 𑀦 𑀫𑀼𑀲𑀮𑀫𑀦𑁆𑀢𑀭𑀁 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀦 𑀕𑀩𑁆𑀪𑀺𑀦𑀺𑀬𑀸 𑀦 𑀧𑀸𑀬𑀫𑀸𑀦𑀸𑀬 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻 𑀦 𑀫𑀘𑁆𑀙𑀁 𑀦 𑀫𑀁𑀲𑀁 𑀦 𑀲𑀼𑀭𑀁 𑀦 𑀫𑁂𑀭𑀬𑀁 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺. 𑀲𑁄 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄; 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀢𑀺 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺…𑀧𑁂… 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺; 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀤𑁆𑀯𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺…𑀧𑁂… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀟𑁆𑀠𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

‘‘𑀲𑁄 𑀲𑀸𑀓𑀪𑀓𑁆𑀔𑁄𑀧𑀺 𑀳𑁄𑀢𑀺 𑀲𑀸𑀫𑀸𑀓𑀪𑀓𑁆𑀔𑁄𑀧𑀺 𑀳𑁄𑀢𑀺 𑀦𑀻𑀯𑀸𑀭𑀪𑀓𑁆𑀔𑁄𑀧𑀺 𑀳𑁄𑀢𑀺 𑀤𑀤𑁆𑀤𑀼𑀮𑀪𑀓𑁆𑀔𑁄𑀧𑀺 𑀳𑁄𑀢𑀺 𑀳𑀝𑀪𑀓𑁆𑀔𑁄𑀧𑀺 𑀳𑁄𑀢𑀺 𑀓𑀡𑀪𑀓𑁆𑀔𑁄𑀧𑀺 𑀳𑁄𑀢𑀺 𑀆𑀘𑀸𑀫𑀪𑀓𑁆𑀔𑁄𑀧𑀺 𑀳𑁄𑀢𑀺 𑀧𑀺𑀜𑁆𑀜𑀸𑀓𑀪𑀓𑁆𑀔𑁄𑀧𑀺 𑀳𑁄𑀢𑀺 𑀢𑀺𑀡𑀪𑀓𑁆𑀔𑁄𑀧𑀺 𑀳𑁄𑀢𑀺 𑀕𑁄𑀫𑀬𑀪𑀓𑁆𑀔𑁄𑀧𑀺 𑀳𑁄𑀢𑀺; 𑀯𑀦𑀫𑀽𑀮𑀨𑀮𑀸𑀳𑀸𑀭𑁄𑀧𑀺 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻.

‘‘𑀲𑁄 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀢𑀺 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺 𑀯𑀸𑀴𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺 𑀉𑀮𑀽𑀓𑀧𑀓𑁆𑀔𑀫𑁆𑀧𑀺 𑀥𑀸𑀭𑁂𑀢𑀺; 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄; 𑀉𑀩𑁆𑀪𑀝𑁆𑀞𑀓𑁄𑀧𑀺 𑀳𑁄𑀢𑀺 𑀆𑀲𑀦𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁄; 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄; 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺; 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀦𑁂𑀓𑀯𑀺𑀳𑀺𑀢𑀁 𑀓𑀸𑀬𑀲𑁆𑀲 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀳𑁄𑀢𑀺 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀑𑀭𑀩𑁆𑀪𑀺𑀓𑁄 𑀳𑁄𑀢𑀺 𑀲𑀽𑀓𑀭𑀺𑀓𑁄 𑀲𑀸𑀓𑀼𑀡𑀺𑀓𑁄 𑀫𑀸𑀕𑀯𑀺𑀓𑁄 𑀮𑀼𑀤𑁆𑀤𑁄 𑀫𑀘𑁆𑀙𑀖𑀸𑀢𑀓𑁄 𑀘𑁄𑀭𑁄 𑀘𑁄𑀭𑀖𑀸𑀢𑀓𑁄 𑀕𑁄𑀖𑀸𑀢𑀓𑁄 𑀩𑀦𑁆𑀥𑀦𑀸𑀕𑀸𑀭𑀺𑀓𑁄, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀳𑁄𑀢𑀺 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀭𑀸𑀚𑀸 𑀯𑀸 𑀳𑁄𑀢𑀺 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀳𑁄𑀢𑀺 𑀫𑀳𑀸𑀲𑀸𑀮𑁄. 𑀲𑁄 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀔𑀭𑀸𑀚𑀺𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀧𑁆𑀧𑀺𑀢𑁂𑀮𑁂𑀦 𑀓𑀸𑀬𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀫𑀕𑀯𑀺𑀲𑀸𑀡𑁂𑀦 𑀧𑀺𑀝𑁆𑀞𑀺𑀁 𑀓𑀡𑁆𑀟𑀼𑀯𑀫𑀸𑀦𑁄 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀢𑀺, 𑀲𑀤𑁆𑀥𑀺𑀁 𑀫𑀳𑁂𑀲𑀺𑀬𑀸 𑀩𑁆𑀭𑀸𑀳𑁆𑀫𑀡𑁂𑀦 𑀘 𑀧𑀼𑀭𑁄𑀳𑀺𑀢𑁂𑀦. 𑀲𑁄 𑀢𑀢𑁆𑀣 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀳𑀭𑀺𑀢𑀼𑀧𑀮𑀺𑀢𑁆𑀢𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀏𑀓𑀺𑀲𑁆𑀲𑀸𑀬 𑀕𑀸𑀯𑀺𑀬𑀸 𑀲𑀭𑀽𑀧𑀯𑀘𑁆𑀙𑀸𑀬 𑀬𑀁 𑀏𑀓𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀭𑀸𑀚𑀸 𑀬𑀸𑀧𑁂𑀢𑀺; 𑀬𑀁 𑀤𑀼𑀢𑀺𑀬𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀫𑀳𑁂𑀲𑀻 𑀬𑀸𑀧𑁂𑀢𑀺; 𑀬𑀁 𑀢𑀢𑀺𑀬𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑁄𑀳𑀺𑀢𑁄 𑀬𑀸𑀧𑁂𑀢𑀺; 𑀬𑀁 𑀘𑀢𑀼𑀢𑁆𑀣𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀅𑀕𑁆𑀕𑀺𑀁 𑀚𑀼𑀳𑀢𑀺 [𑀚𑀼𑀳𑀦𑁆𑀢𑀺 (𑀲𑀻. 𑀧𑀻.)]; 𑀅𑀯𑀲𑁂𑀲𑁂𑀦 𑀯𑀘𑁆𑀙𑀓𑁄 𑀬𑀸𑀧𑁂𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀏𑀢𑁆𑀢𑀓𑀸 𑀉𑀲𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀺𑀬𑁄 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀅𑀚𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀉𑀭𑀩𑁆𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, (𑀏𑀢𑁆𑀢𑀓𑀸 𑀅𑀲𑁆𑀲𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬,) [( ) 𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀏𑀢𑁆𑀢𑀓𑀸 𑀭𑀼𑀓𑁆𑀔𑀸 𑀙𑀺𑀚𑁆𑀚𑀦𑁆𑀢𑀼 𑀬𑀽𑀧𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀤𑀩𑁆𑀪𑀸 𑀮𑀽𑀬𑀦𑁆𑀢𑀼 𑀩𑀭𑀺𑀳𑀺𑀲𑀢𑁆𑀣𑀸𑀬𑀸’𑀢𑀺 [𑀧𑀭𑀺𑀓𑀫𑁆𑀫𑀢𑁆𑀣𑀸𑀬𑀸𑀢𑀺 (𑀓.)]. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸; 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬, 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺.

‘‘𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀅𑀲𑀤𑁆𑀥𑀫𑁆𑀫𑀸 𑀕𑀸𑀫𑀥𑀫𑁆𑀫𑀸. 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲. 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀦 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬; 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀢𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻; 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁.

‘‘𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀚𑁂𑀴𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀲𑀽𑀓𑀭𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀬𑀯𑀺𑀓𑁆𑀓𑀬𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀓𑁆𑀓𑁄𑀝𑀦𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺.

‘‘𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀓𑁆𑀔𑀻 𑀲𑀓𑀼𑀡𑁄 𑀬𑁂𑀦 𑀬𑁂𑀦𑁂𑀯 𑀟𑁂𑀢𑀺, 𑀲𑀧𑀢𑁆𑀢𑀪𑀸𑀭𑁄𑀯 𑀟𑁂𑀢𑀺; 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁; 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺; 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁; 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀩𑁆𑀬𑀸𑀲𑁂𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺.

‘‘𑀲𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, (𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄,) [( ) 𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼. 𑀫. 𑀦𑀺. 𑁧.𑁨𑁯𑁬; 𑀫. 𑀦𑀺. 𑁨.𑁧𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 [𑀲𑀫𑀦𑁆𑀦𑀸𑀕𑀢𑁄. 𑀲𑁄 (𑀓.)] 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑁆𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬…𑀧𑁂… 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬…𑀧𑁂… (𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂) 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀲𑁄 𑀦 𑀅𑀢𑁆𑀢𑀦𑁆𑀢𑀧𑁄 𑀦 𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀢𑀡𑁆𑀳𑀸𑀲𑀼𑀢𑁆𑀢𑀁

𑁧𑁯𑁯. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀢𑀡𑁆𑀳𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀚𑀸𑀮𑀺𑀦𑀺𑀁 𑀲𑀭𑀺𑀢𑀁 𑀯𑀺𑀲𑀝𑀁 𑀯𑀺𑀲𑀢𑁆𑀢𑀺𑀓𑀁, 𑀬𑀸𑀬 𑀅𑀬𑀁 𑀮𑁄𑀓𑁄 𑀉𑀤𑁆𑀥𑀲𑁆𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄 𑀕𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑁄 [𑀓𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯] 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑁄 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀝𑀸 𑀯𑀺𑀲𑀢𑁆𑀢𑀺𑀓𑀸, 𑀬𑀸𑀬 𑀅𑀬𑀁 𑀮𑁄𑀓𑁄 𑀉𑀤𑁆𑀥𑀲𑁆𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄 𑀕𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑁄 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑁄 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺? 𑀅𑀝𑁆𑀞𑀸𑀭𑀲 𑀔𑁄 𑀧𑀦𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬, 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬.

‘‘𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬? 𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀏𑀯𑀁𑀲𑁆𑀫𑀻𑀢𑀺 [𑀏𑀯𑀫𑀲𑁆𑀫𑀺 (𑀲𑀻.), 𑀏𑀯𑀲𑁆𑀫𑀺 (𑀲𑁆𑀬𑀸. 𑀓𑀁. 𑀧𑀻.) 𑀯𑀺𑀪. 𑁯𑁭𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀳𑁄𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀺, 𑀅𑀲𑀲𑁆𑀫𑀻𑀢𑀺 𑀳𑁄𑀢𑀺, 𑀲𑀢𑀲𑁆𑀫𑀻𑀢𑀺 𑀳𑁄𑀢𑀺, 𑀲𑀦𑁆𑀢𑀺 𑀳𑁄𑀢𑀺, 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 [𑀅𑀧𑀺𑀳 (𑀲𑀻. 𑀧𑀻.), 𑀅𑀧𑀺 (𑀲𑁆𑀬𑀸. 𑀓𑀁.)] 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 [𑀅𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 [𑀅𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 [𑀅𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬.

‘‘𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬? 𑀇𑀫𑀺𑀦𑀸𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀲𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀲𑀢𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺. 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬.

‘‘𑀇𑀢𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬, 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬. 𑀇𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀇𑀢𑀺 𑀏𑀯𑀭𑀽𑀧𑀸𑀦𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀏𑀯𑀁 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑀳𑁄𑀦𑁆𑀢𑀺.

‘‘𑀅𑀬𑀁 𑀔𑁄 𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀝𑀸 𑀯𑀺𑀲𑀢𑁆𑀢𑀺𑀓𑀸, 𑀬𑀸𑀬 𑀅𑀬𑀁 𑀮𑁄𑀓𑁄 𑀉𑀤𑁆𑀥𑀲𑁆𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑁄 𑀕𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑁄 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑁄 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀧𑁂𑀫𑀲𑀼𑀢𑁆𑀢𑀁

𑁨𑁦𑁦. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, (𑀧𑁂𑀫𑀸𑀦𑀺) [( ) 𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀚𑀸𑀬𑀦𑁆𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺, 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺, 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺, 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀇𑀝𑁆𑀞𑁄 𑀳𑁄𑀢𑀺 𑀓𑀦𑁆𑀢𑁄 𑀫𑀦𑀸𑀧𑁄. 𑀢𑀁 𑀧𑀭𑁂 𑀇𑀝𑁆𑀞𑁂𑀦 𑀓𑀦𑁆𑀢𑁂𑀦 𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀢𑀁 𑀧𑀭𑁂 𑀇𑀝𑁆𑀞𑁂𑀦 𑀓𑀦𑁆𑀢𑁂𑀦 𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀻’𑀢𑀺. 𑀲𑁄 𑀢𑁂𑀲𑀼 𑀧𑁂𑀫𑀁 𑀚𑀦𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀇𑀝𑁆𑀞𑁄 𑀳𑁄𑀢𑀺 𑀓𑀦𑁆𑀢𑁄 𑀫𑀦𑀸𑀧𑁄. 𑀢𑀁 𑀧𑀭𑁂 𑀅𑀦𑀺𑀝𑁆𑀞𑁂𑀦 𑀅𑀓𑀦𑁆𑀢𑁂𑀦 𑀅𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀢𑀁 𑀧𑀭𑁂 𑀅𑀦𑀺𑀝𑁆𑀞𑁂𑀦 𑀅𑀓𑀦𑁆𑀢𑁂𑀦 𑀅𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀻’𑀢𑀺. 𑀲𑁄 𑀢𑁂𑀲𑀼 𑀤𑁄𑀲𑀁 𑀚𑀦𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀅𑀦𑀺𑀝𑁆𑀞𑁄 𑀳𑁄𑀢𑀺 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄. 𑀢𑀁 𑀧𑀭𑁂 𑀅𑀦𑀺𑀝𑁆𑀞𑁂𑀦 𑀅𑀓𑀦𑁆𑀢𑁂𑀦 𑀅𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄, 𑀢𑀁 𑀧𑀭𑁂 𑀅𑀦𑀺𑀝𑁆𑀞𑁂𑀦 𑀅𑀓𑀦𑁆𑀢𑁂𑀦 𑀅𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀻’𑀢𑀺. 𑀲𑁄 𑀢𑁂𑀲𑀼 𑀧𑁂𑀫𑀁 𑀚𑀦𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲 𑀅𑀦𑀺𑀝𑁆𑀞𑁄 𑀳𑁄𑀢𑀺 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄. 𑀢𑀁 𑀧𑀭𑁂 𑀇𑀝𑁆𑀞𑁂𑀦 𑀓𑀦𑁆𑀢𑁂𑀦 𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀬𑁄 𑀔𑁄 𑀫𑁆𑀬𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄, 𑀢𑀁 𑀧𑀭𑁂 𑀇𑀝𑁆𑀞𑁂𑀦 𑀓𑀦𑁆𑀢𑁂𑀦 𑀫𑀦𑀸𑀧𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀻’𑀢𑀺. 𑀲𑁄 𑀢𑁂𑀲𑀼 𑀤𑁄𑀲𑀁 𑀚𑀦𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀧𑁂𑀫𑀸𑀦𑀺 𑀚𑀸𑀬𑀦𑁆𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀬𑀫𑁆𑀧𑀺𑀲𑁆𑀲 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑁄𑀧𑀺𑀲𑁆𑀲 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑀫𑁆𑀧𑀺𑀲𑁆𑀲 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑁄𑀧𑀺𑀲𑁆𑀲 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀬𑀫𑁆𑀧𑀺𑀲𑁆𑀲 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑁄𑀧𑀺𑀲𑁆𑀲 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑀫𑁆𑀧𑀺𑀲𑁆𑀲 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺, 𑀬𑁄𑀧𑀺𑀲𑁆𑀲 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀬𑀫𑁆𑀧𑀺𑀲𑁆𑀲 𑀧𑁂𑀫𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁, 𑀬𑁄𑀧𑀺𑀲𑁆𑀲 𑀧𑁂𑀫𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄, 𑀬𑀫𑁆𑀧𑀺𑀲𑁆𑀲 𑀤𑁄𑀲𑀸 𑀧𑁂𑀫𑀁 𑀚𑀸𑀬𑀢𑀺 𑀢𑀫𑁆𑀧𑀺𑀲𑁆𑀲 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁, 𑀬𑁄𑀧𑀺𑀲𑁆𑀲 𑀤𑁄𑀲𑀸 𑀤𑁄𑀲𑁄 𑀚𑀸𑀬𑀢𑀺 𑀲𑁄𑀧𑀺𑀲𑁆𑀲 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑁂𑀯 𑀉𑀲𑁆𑀲𑁂𑀦𑁂𑀢𑀺 𑀦 𑀧𑀝𑀺𑀲𑁂𑀦𑁂𑀢𑀺 [𑀦 𑀧𑀝𑀺𑀲𑁆𑀲𑁂𑀦𑁂𑀢𑀺 (𑀲𑀻. 𑀧𑀻.)] 𑀦 𑀥𑀽𑀧𑀸𑀬𑀢𑀺 𑀦 𑀧𑀚𑁆𑀚𑀮𑀢𑀺 𑀦 𑀲𑀫𑁆𑀧𑀚𑁆𑀛𑀸𑀬𑀢𑀺 [𑀦 𑀅𑀧𑀚𑁆𑀛𑀸𑀬𑀢𑀺 (𑀲𑀻.), 𑀦 𑀧𑀚𑁆𑀛𑀸𑀬𑀢𑀺 (𑀲𑁆𑀬𑀸. 𑀓𑀁. 𑀧𑀻.)].

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀲𑁆𑀲𑁂𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀁; 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀜𑁆𑀜𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀲𑀜𑁆𑀜𑀁, 𑀲𑀜𑁆𑀜𑀸𑀬 𑀯𑀸 𑀅𑀢𑁆𑀢𑀸𑀦𑀁; 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀲𑀗𑁆𑀔𑀸𑀭𑁂, 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀅𑀢𑁆𑀢𑀸𑀦𑀁; 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀲𑁆𑀲𑁂𑀦𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀉𑀲𑁆𑀲𑁂𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀦 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀁; 𑀦 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀲𑀜𑁆𑀜𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀲𑀜𑁆𑀜𑀁, 𑀦 𑀲𑀜𑁆𑀜𑀸𑀬 𑀯𑀸 𑀅𑀢𑁆𑀢𑀸𑀦𑀁; 𑀦 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀲𑀗𑁆𑀔𑀸𑀭𑁂, 𑀦 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀉𑀲𑁆𑀲𑁂𑀦𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑁂𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀦𑁆𑀢𑀁 𑀧𑀘𑁆𑀘𑀓𑁆𑀓𑁄𑀲𑀢𑀺, 𑀭𑁄𑀲𑀦𑁆𑀢𑀁 𑀧𑀝𑀺𑀭𑁄𑀲𑀢𑀺, 𑀪𑀡𑁆𑀟𑀦𑁆𑀢𑀁 𑀧𑀝𑀺𑀪𑀡𑁆𑀟𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑁂𑀦𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀝𑀺𑀲𑁂𑀦𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀦𑁆𑀢𑀁 𑀦 𑀧𑀘𑁆𑀘𑀓𑁆𑀓𑁄𑀲𑀢𑀺, 𑀭𑁄𑀲𑀦𑁆𑀢𑀁 𑀦 𑀧𑀝𑀺𑀭𑁄𑀲𑀢𑀺, 𑀪𑀡𑁆𑀟𑀦𑁆𑀢𑀁 𑀦 𑀧𑀝𑀺𑀪𑀡𑁆𑀟𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀝𑀺𑀲𑁂𑀦𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀽𑀧𑀸𑀬𑀢𑀺? 𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀏𑀯𑀁𑀲𑁆𑀫𑀻𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀺, 𑀅𑀲𑀲𑁆𑀫𑀻𑀢𑀺 𑀳𑁄𑀢𑀺, 𑀲𑀢𑀲𑁆𑀫𑀻𑀢𑀺 𑀳𑁄𑀢𑀺, 𑀲𑀦𑁆𑀢𑀺 𑀳𑁄𑀢𑀺, 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀅𑀧𑀺𑀳𑀁 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀽𑀧𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀥𑀽𑀧𑀸𑀬𑀢𑀺? 𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀇𑀢𑁆𑀣𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀏𑀯𑀁𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀅𑀲𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀲𑀢𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀢𑁆𑀣𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀧𑀺𑀳𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀧𑀺𑀳𑀁 𑀇𑀢𑁆𑀣𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀧𑀺𑀳𑀁 𑀏𑀯𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀧𑀺𑀳𑀁 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀦 𑀳𑁄𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀥𑀽𑀧𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀚𑁆𑀚𑀮𑀢𑀺? 𑀇𑀫𑀺𑀦𑀸 𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀲𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀲𑀢𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀇𑀢𑁆𑀣𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀏𑀯𑀁 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀚𑁆𑀚𑀮𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀚𑁆𑀚𑀮𑀢𑀺? 𑀇𑀫𑀺𑀦𑀸 𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀲𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀲𑀢𑀲𑁆𑀫𑀻𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀇𑀢𑁆𑀣𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀏𑀯𑀁 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀧𑀺𑀳𑀁 𑀅𑀜𑁆𑀜𑀣𑀸 𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺, 𑀇𑀫𑀺𑀦𑀸 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀚𑁆𑀚𑀮𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑁆𑀛𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀦 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑁆𑀛𑀸𑀬𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀲𑀫𑁆𑀧𑀚𑁆𑀛𑀸𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀲𑀫𑁆𑀧𑀚𑁆𑀛𑀸𑀬𑀢𑀻’’𑀢𑀺. 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀧𑀜𑁆𑀘𑀫𑁄.