𑁫. 𑀧𑀜𑁆𑀘𑀫𑀧𑀡𑁆𑀡𑀸𑀲𑀓𑀁

(𑁨𑁧) 𑁧. 𑀲𑀧𑁆𑀧𑀼𑀭𑀺𑀲𑀯𑀕𑁆𑀕𑁄

𑁧. 𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀁

𑁨𑁦𑁧. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑁂 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺 [𑀧𑀼. 𑀧. 𑁧𑁩𑁫]. 𑀧𑀞𑀫𑀁.

𑁨. 𑀅𑀲𑁆𑀲𑀤𑁆𑀥𑀲𑀼𑀢𑁆𑀢𑀁

𑁨𑁦𑁨. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀲𑁆𑀲𑀤𑁆𑀥𑀺𑀬𑁂 [𑀅𑀲𑀤𑁆𑀥𑀸𑀬 (𑀓.)] 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀳𑀺𑀭𑀺𑀓𑀢𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀧𑁆𑀧𑀲𑁆𑀲𑀼𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀼𑀲𑀻𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑁄𑀲𑀚𑁆𑀚𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀝𑁆𑀞𑀲𑁆𑀲𑀘𑁆𑀘𑁂 [𑀫𑀼𑀝𑁆𑀞𑀲𑀘𑁆𑀘𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺, 𑀧𑀭𑀜𑁆𑀘 𑀤𑀼𑀧𑁆𑀧𑀜𑁆𑀜𑀢𑀸𑀬 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀲𑀢𑀺𑀫𑀸 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀳𑀺𑀭𑀺𑀫𑀸 𑀳𑁄𑀢𑀺, 𑀧𑀭𑀜𑁆𑀘 𑀳𑀺𑀭𑀺𑀫𑀢𑀸𑀬 [𑀳𑀺𑀭𑀺𑀲𑀫𑁆𑀧𑀤𑀸𑀬 (𑀓.)] 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀑𑀢𑁆𑀢𑀧𑁆𑀧𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀩𑀸𑀳𑀼𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀭𑀜𑁆𑀘 𑀯𑀻𑀭𑀺𑀬𑀸𑀭𑀫𑁆𑀪𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀢𑀺𑀉𑀧𑀝𑁆𑀞𑀸𑀦𑁂 [𑀲𑀢𑀺𑀧𑀝𑁆𑀞𑀸𑀦𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀢𑁆𑀢𑀓𑀫𑁆𑀫𑀲𑀼𑀢𑁆𑀢𑀁

𑁨𑁦𑁩. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑁂 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄, 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺. 𑀢𑀢𑀺𑀬𑀁.

𑁪. 𑀤𑀲𑀓𑀫𑁆𑀫𑀲𑀼𑀢𑁆𑀢𑀁

𑁨𑁦𑁪. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀦𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀝𑁆𑀞𑀗𑁆𑀕𑀺𑀓𑀲𑀼𑀢𑁆𑀢𑀁

𑁨𑁦𑁫. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀘𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀆𑀚𑀻𑀯𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀆𑀚𑀻𑀯𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀯𑀸𑀬𑀸𑀫𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀲𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀲𑀢𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀲𑀫𑀸𑀥𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀲𑀫𑀸𑀥𑀺𑀫𑁆𑀳𑀺 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀆𑀚𑀻𑀯𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀯𑀸𑀬𑀸𑀫𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀲𑀢𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀲𑀫𑀕𑁆𑀕𑀲𑀼𑀢𑁆𑀢𑀁

𑁨𑁦𑁬. ‘‘𑀅𑀲𑀧𑁆𑀧𑀼𑀭𑀺𑀲𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘; 𑀲𑀧𑁆𑀧𑀼𑀭𑀺𑀲𑀜𑁆𑀘, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 …𑀧𑁂… 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑁂𑀦 𑀅𑀲𑀧𑁆𑀧𑀼𑀭𑀺𑀲𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑁂𑀦 𑀲𑀧𑁆𑀧𑀼𑀭𑀺𑀲𑀢𑀭𑁄’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀧𑀸𑀧𑀥𑀫𑁆𑀫𑀲𑀼𑀢𑁆𑀢𑀁

𑁨𑁦𑁭. ‘‘𑀧𑀸𑀧𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀧𑀸𑀧𑁂𑀦 𑀧𑀸𑀧𑀢𑀭𑀜𑁆𑀘; 𑀓𑀮𑁆𑀬𑀸𑀡𑀜𑁆𑀘, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑁂𑀦 𑀧𑀸𑀧𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑁂𑀦 𑀧𑀸𑀧𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀧𑀸𑀧𑀥𑀫𑁆𑀫𑀲𑀼𑀢𑁆𑀢𑀁

𑁨𑁦𑁮. ‘‘𑀧𑀸𑀧𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀧𑀸𑀧𑁂𑀦 𑀧𑀸𑀧𑀢𑀭𑀜𑁆𑀘; 𑀓𑀮𑁆𑀬𑀸𑀡𑀜𑁆𑀘, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁…𑀧𑁂… 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑁂𑀦 𑀧𑀸𑀧𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑁂𑀦 𑀧𑀸𑀧𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 …𑀧𑁂… 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑁂𑀦 𑀓𑀮𑁆𑀬𑀸𑀡𑀢𑀭𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀢𑀢𑀺𑀬𑀧𑀸𑀧𑀥𑀫𑁆𑀫𑀲𑀼𑀢𑁆𑀢𑀁

𑁨𑁦𑁯. ‘‘𑀧𑀸𑀧𑀥𑀫𑁆𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑀜𑁆𑀘; 𑀓𑀮𑁆𑀬𑀸𑀡𑀥𑀫𑁆𑀫𑀜𑁆𑀘, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑁄? 𑀇𑀥 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑁄’’𑀢𑀺. 𑀦𑀯𑀫𑀁.

𑁧𑁦. 𑀘𑀢𑀼𑀢𑁆𑀣𑀧𑀸𑀧𑀥𑀫𑁆𑀫𑀲𑀼𑀢𑁆𑀢𑀁

𑁨𑁧𑁦. ‘‘𑀧𑀸𑀧𑀥𑀫𑁆𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑀜𑁆𑀘; 𑀓𑀮𑁆𑀬𑀸𑀡𑀥𑀫𑁆𑀫𑀜𑁆𑀘, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀥𑀫𑁆𑀫𑁂𑀦 𑀧𑀸𑀧𑀥𑀫𑁆𑀫𑀢𑀭𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺…𑀧𑁂… 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀜𑀸𑀡𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀜𑀸𑀡𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀸𑀤𑀧𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑀢𑀭𑁄’’𑀢𑀺. 𑀤𑀲𑀫𑀁.

𑀲𑀧𑁆𑀧𑀼𑀭𑀺𑀲𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀲𑁆𑀲𑀤𑁆𑀥𑀁, 𑀲𑀢𑁆𑀢𑀓𑀫𑁆𑀫𑀁 𑀅𑀣𑁄 𑀘 𑀤𑀲𑀓𑀫𑁆𑀫𑀁;

𑀅𑀝𑁆𑀞𑀗𑁆𑀕𑀺𑀓𑀜𑁆𑀘 𑀤𑀲𑀫𑀕𑁆𑀕𑀁, 𑀤𑁆𑀯𑁂 𑀧𑀸𑀧𑀥𑀫𑁆𑀫𑀸 𑀅𑀧𑀭𑁂 𑀤𑁆𑀯𑁂𑀢𑀺.

(𑁨𑁨) 𑁨. 𑀧𑀭𑀺𑀲𑀸𑀯𑀕𑁆𑀕𑁄

𑁧. 𑀧𑀭𑀺𑀲𑀸𑀲𑀼𑀢𑁆𑀢𑀁

𑁨𑁧𑁧. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀤𑀽𑀲𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀯𑁂 [𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 (𑀧𑀻. 𑀓.)], 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀲𑀤𑀽𑀲𑀦𑁄; 𑀪𑀺𑀓𑁆𑀔𑀼𑀦𑀻, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀧𑀭𑀺𑀲𑀤𑀽𑀲𑀦𑀸; 𑀉𑀧𑀸𑀲𑀓𑁄, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀲𑀤𑀽𑀲𑀦𑁄; 𑀉𑀧𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀧𑀭𑀺𑀲𑀤𑀽𑀲𑀦𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀭𑀺𑀲𑀤𑀽𑀲𑀦𑀸.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀲𑁄𑀪𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀧𑀭𑀺𑀲𑀲𑁄𑀪𑀦𑁄; 𑀪𑀺𑀓𑁆𑀔𑀼𑀦𑀻, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀭𑀺𑀲𑀲𑁄𑀪𑀦𑀸; 𑀉𑀧𑀸𑀲𑀓𑁄, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀧𑀭𑀺𑀲𑀲𑁄𑀪𑀦𑁄; 𑀉𑀧𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀭𑀺𑀲𑀲𑁄𑀪𑀦𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀭𑀺𑀲𑀲𑁄𑀪𑀦𑀸’’𑀢𑀺. 𑀧𑀞𑀫𑀁.

𑁨. 𑀤𑀺𑀝𑁆𑀞𑀺𑀲𑀼𑀢𑁆𑀢𑀁

𑁨𑁧𑁨. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀲𑀼𑀘𑀭𑀺𑀢𑁂𑀦, 𑀯𑀘𑀻𑀲𑀼𑀘𑀭𑀺𑀢𑁂𑀦, 𑀫𑀦𑁄𑀲𑀼𑀘𑀭𑀺𑀢𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀓𑀢𑀜𑁆𑀜𑀼𑀢𑀸𑀲𑀼𑀢𑁆𑀢𑀁

𑁨𑁧𑁩. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀅𑀓𑀢𑀜𑁆𑀜𑀼𑀢𑀸 𑀅𑀓𑀢𑀯𑁂𑀤𑀺𑀢𑀸 [𑀅𑀓𑀢𑀜𑁆𑀜𑀼𑀢𑀸𑀅𑀓𑀢𑀯𑁂𑀤𑀺𑀢𑀸𑀬 (𑀲𑀻.)] 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀲𑀼𑀘𑀭𑀺𑀢𑁂𑀦, 𑀯𑀘𑀻𑀲𑀼𑀘𑀭𑀺𑀢𑁂𑀦, 𑀫𑀦𑁄𑀲𑀼𑀘𑀭𑀺𑀢𑁂𑀦, 𑀓𑀢𑀜𑁆𑀜𑀼𑀢𑀸𑀓𑀢𑀯𑁂𑀤𑀺𑀢𑀸 [𑀓𑀢𑀜𑁆𑀜𑀼𑀢𑀸𑀓𑀢𑀯𑁂𑀤𑀺𑀢𑀸𑀬 (𑀲𑀻.)] 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀢𑀢𑀺𑀬𑀁.

𑁪. 𑀧𑀸𑀡𑀸𑀢𑀺𑀧𑀸𑀢𑀻𑀲𑀼𑀢𑁆𑀢𑀁

𑁨𑁧𑁪. …𑀧𑁂… 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺…𑀧𑁂… 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀫𑀕𑁆𑀕𑀲𑀼𑀢𑁆𑀢𑀁

𑁨𑁧𑁫. …𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀘𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀫𑀕𑁆𑀕𑀲𑀼𑀢𑁆𑀢𑀁

𑁨𑁧𑁬. …𑀧𑁂… 𑀫𑀺𑀘𑁆𑀙𑀸𑀆𑀚𑀻𑀯𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀯𑁄𑀳𑀸𑀭𑀧𑀣𑀲𑀼𑀢𑁆𑀢𑀁

𑁨𑁧𑁭. …𑀧𑁂… 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀅𑀲𑀼𑀢𑁂 𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀫𑀼𑀢𑁂 𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂… 𑀅𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀅𑀲𑀼𑀢𑁂 𑀅𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀫𑀼𑀢𑁂 𑀅𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀯𑁄𑀳𑀸𑀭𑀧𑀣𑀲𑀼𑀢𑁆𑀢𑀁

𑁨𑁧𑁮. …𑀧𑁂… 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀲𑀼𑀢𑁂 𑀅𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀫𑀼𑀢𑁂 𑀅𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀲𑀼𑀢𑁂 𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀫𑀼𑀢𑁂 𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺. 𑀅𑀝𑁆𑀞𑀫𑀁.

𑁯. 𑀅𑀳𑀺𑀭𑀺𑀓𑀲𑀼𑀢𑁆𑀢𑀁

𑁨𑁧𑁯. …𑀧𑁂… 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺…𑀧𑁂… 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺. 𑀦𑀯𑀫𑀁.

𑁧𑁦. 𑀤𑀼𑀲𑁆𑀲𑀻𑀮𑀲𑀼𑀢𑁆𑀢𑀁

𑁨𑁨𑁦. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀤𑀲𑀫𑀁.

𑀧𑀭𑀺𑀲𑀸𑀯𑀕𑁆𑀕𑁄 [𑀲𑁄𑀪𑀦𑀯𑀕𑁆𑀕𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀭𑀺𑀲𑀸 𑀤𑀺𑀝𑁆𑀞𑀺 𑀅𑀓𑀢𑀜𑁆𑀜𑀼𑀢𑀸, 𑀧𑀸𑀡𑀸𑀢𑀺𑀧𑀸𑀢𑀸𑀧𑀺 𑀤𑁆𑀯𑁂 𑀫𑀕𑁆𑀕𑀸;

𑀤𑁆𑀯𑁂 𑀯𑁄𑀳𑀸𑀭𑀧𑀣𑀸 𑀯𑀼𑀢𑁆𑀢𑀸, 𑀅𑀳𑀺𑀭𑀺𑀓𑀁 𑀤𑀼𑀧𑁆𑀧𑀜𑁆𑀜𑁂𑀦 𑀘𑀸𑀢𑀺.

(𑁨𑁩) 𑁩. 𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄

𑁧. 𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁨𑁨𑁧. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀼𑀘𑀭𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀘𑁆𑀘𑀯𑀸𑀘𑀸, 𑀅𑀧𑀺𑀲𑀼𑀡𑀸 𑀯𑀸𑀘𑀸, 𑀲𑀡𑁆𑀳𑀸 𑀯𑀸𑀘𑀸, 𑀫𑀦𑁆𑀢𑀯𑀸𑀘𑀸 [𑀫𑀦𑁆𑀢𑀸 𑀯𑀸𑀘𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀻’’𑀢𑀺. 𑀧𑀞𑀫𑀁.

𑁨. 𑀤𑀺𑀝𑁆𑀞𑀺𑀲𑀼𑀢𑁆𑀢𑀁

𑁨𑁨𑁨. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁; 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀘 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺.

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀅𑀦𑀯𑀚𑁆𑀚𑁄 𑀘 𑀳𑁄𑀢𑀺 𑀅𑀦𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀲𑀼𑀘𑀭𑀺𑀢𑁂𑀦, 𑀯𑀘𑀻𑀲𑀼𑀘𑀭𑀺𑀢𑁂𑀦, 𑀫𑀦𑁄𑀲𑀼𑀘𑀭𑀺𑀢𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀅𑀦𑀯𑀚𑁆𑀚𑁄 𑀘 𑀳𑁄𑀢𑀺 𑀅𑀦𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁; 𑀩𑀳𑀼𑀜𑁆𑀘 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀓𑀢𑀜𑁆𑀜𑀼𑀢𑀸𑀲𑀼𑀢𑁆𑀢𑀁

𑁨𑁨𑁩. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀲𑀸𑀯𑀚𑁆𑀚𑁄 𑀘 𑀳𑁄𑀢𑀺 𑀲𑀸𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦, 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦, 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀅𑀓𑀢𑀜𑁆𑀜𑀼𑀢𑀸 𑀅𑀓𑀢𑀯𑁂𑀤𑀺𑀢𑀸 𑁋 𑀇𑀫𑁂𑀳𑀺…𑀧𑁂… 𑀧𑀡𑁆𑀟𑀺𑀢𑁄… 𑀓𑀸𑀬𑀲𑀼𑀘𑀭𑀺𑀢𑁂𑀦, 𑀯𑀘𑀻𑀲𑀼𑀘𑀭𑀺𑀢𑁂𑀦, 𑀫𑀦𑁄𑀲𑀼𑀘𑀭𑀺𑀢𑁂𑀦 𑀓𑀢𑀜𑁆𑀜𑀼𑀢𑀸𑀓𑀢𑀯𑁂𑀤𑀺𑀢𑀸…𑀧𑁂…. 𑀢𑀢𑀺𑀬𑀁.

𑁪. 𑀧𑀸𑀡𑀸𑀢𑀺𑀧𑀸𑀢𑀻𑀲𑀼𑀢𑁆𑀢𑀁

𑁨𑁨𑁪. … 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺…𑀧𑁂… 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂…. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀫𑀕𑁆𑀕𑀲𑀼𑀢𑁆𑀢𑀁

𑁨𑁨𑁫. … 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀘𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀳𑁄𑀢𑀺…𑀧𑁂…. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀫𑀕𑁆𑀕𑀲𑀼𑀢𑁆𑀢𑀁

𑁨𑁨𑁬. … 𑀫𑀺𑀘𑁆𑀙𑀸𑀆𑀚𑀻𑀯𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺 𑀳𑁄𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀆𑀚𑀻𑀯𑁄 𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀳𑁄𑀢𑀺…𑀧𑁂…. 𑀙𑀝𑁆𑀞𑀁.

𑁭. 𑀧𑀞𑀫𑀯𑁄𑀳𑀸𑀭𑀧𑀣𑀲𑀼𑀢𑁆𑀢𑀁

𑁨𑁨𑁭. … 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀅𑀲𑀼𑀢𑁂 𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀫𑀼𑀢𑁂 𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂… 𑀅𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀅𑀲𑀼𑀢𑁂 𑀅𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀫𑀼𑀢𑁂 𑀅𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀅𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂…. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀯𑁄𑀳𑀸𑀭𑀧𑀣𑀲𑀼𑀢𑁆𑀢𑀁

𑁨𑁨𑁮. … 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀲𑀼𑀢𑁂 𑀅𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀫𑀼𑀢𑁂 𑀅𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂… 𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀻 𑀳𑁄𑀢𑀺, 𑀲𑀼𑀢𑁂 𑀲𑀼𑀢𑀯𑀸𑀤𑀻 𑀳𑁄𑀢𑀺, 𑀫𑀼𑀢𑁂 𑀫𑀼𑀢𑀯𑀸𑀤𑀻 𑀳𑁄𑀢𑀺, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀻 𑀳𑁄𑀢𑀺…𑀧𑁂…. 𑀅𑀝𑁆𑀞𑀫𑀁.

𑁯. 𑀅𑀳𑀺𑀭𑀺𑀓𑀲𑀼𑀢𑁆𑀢𑀁

𑁨𑁨𑁯. … 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺…𑀧𑁂… 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺…𑀧𑁂…. 𑀦𑀯𑀫𑀁.

𑁧𑁦. 𑀤𑀼𑀧𑁆𑀧𑀜𑁆𑀜𑀲𑀼𑀢𑁆𑀢𑀁

𑁨𑁩𑁦. … 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺…𑀧𑁂… 𑀲𑀤𑁆𑀥𑁄 𑀳𑁄𑀢𑀺, 𑀲𑀻𑀮𑀯𑀸 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺, 𑀅𑀦𑀯𑀚𑁆𑀚𑁄 𑀘 𑀳𑁄𑀢𑀺 𑀅𑀦𑀦𑀼𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀁, 𑀩𑀳𑀼𑀜𑁆𑀘 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺. 𑀤𑀲𑀫𑀁.

𑁧𑁧. 𑀓𑀯𑀺𑀲𑀼𑀢𑁆𑀢𑀁

𑁨𑁩𑁧. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀓𑀯𑀻. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀘𑀺𑀦𑁆𑀢𑀸𑀓𑀯𑀺, 𑀲𑀼𑀢𑀓𑀯𑀺, 𑀅𑀢𑁆𑀣𑀓𑀯𑀺, 𑀧𑀝𑀺𑀪𑀸𑀦𑀓𑀯𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀓𑀯𑀻’’𑀢𑀺. 𑀏𑀓𑀸𑀤𑀲𑀫𑀁.

𑀤𑀼𑀘𑁆𑀘𑀭𑀺𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀼𑀘𑁆𑀘𑀭𑀺𑀢𑀁 𑀤𑀺𑀝𑁆𑀞𑀺 𑀅𑀓𑀢𑀜𑁆𑀜𑀽 𑀘, 𑀧𑀸𑀡𑀸𑀢𑀺𑀧𑀸𑀢𑀸𑀧𑀺 𑀤𑁆𑀯𑁂 𑀫𑀕𑁆𑀕𑀸;

𑀤𑁆𑀯𑁂 𑀯𑁄𑀳𑀸𑀭𑀧𑀣𑀸 𑀯𑀼𑀢𑁆𑀢𑀸, 𑀅𑀳𑀺𑀭𑀺𑀓𑀁 𑀤𑀼𑀧𑁆𑀧𑀜𑁆𑀜𑀓𑀯𑀺𑀦𑀸 𑀘𑀸𑀢𑀺.

(𑁨𑁪) 𑁪. 𑀓𑀫𑁆𑀫𑀯𑀕𑁆𑀕𑁄

𑁧. 𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀁

𑁨𑁩𑁨. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 [𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 (𑀲𑀻. 𑀲𑁆𑀬𑀸. 𑀧𑀻.) (𑀤𑀻. 𑀦𑀺. 𑁩.𑁩𑁧𑁨; 𑀫. 𑀦𑀺. 𑁨.𑁮𑁧)] 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺. 𑀧𑀞𑀫𑀁.

𑁨. 𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀁

𑁨𑁩𑁩. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀩𑁆𑀬𑀸𑀩𑀚𑁆𑀛𑀁 [𑀲𑀩𑁆𑀬𑀸𑀧𑀚𑁆𑀛𑀁 (𑀲𑀩𑁆𑀩𑀢𑁆𑀣)] 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 [𑀯𑁂𑀤𑀬𑀢𑀺 (𑀓.) 𑀅. 𑀦𑀺. 𑁬.𑁬𑁩] 𑀏𑀓𑀦𑁆𑀢𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀲𑀢𑁆𑀢𑀸 𑀦𑁂𑀭𑀬𑀺𑀓𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀅𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀅𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀏𑀓𑀦𑁆𑀢𑀲𑀼𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸𑀧𑀺 𑀅𑀩𑁆𑀬𑀸𑀩𑀚𑁆𑀛𑀸𑀧𑀺 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀅𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸, 𑀬𑀫𑀺𑀤𑀁 [𑀬𑀫𑁆𑀧𑀺𑀤𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸, 𑀬𑀫𑀺𑀤𑀁 [𑀬𑀫𑁆𑀧𑀺𑀤𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑁄𑀡𑀓𑀸𑀬𑀦𑀲𑀼𑀢𑁆𑀢𑀁

𑁨𑁩𑁪. 𑀅𑀣 𑀔𑁄 𑀲𑀺𑀔𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀺𑀔𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀧𑀼𑀭𑀺𑀫𑀸𑀦𑀺, 𑀪𑁄 𑀕𑁄𑀢𑀫, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑁄𑀡𑀓𑀸𑀬𑀦𑁄 𑀫𑀸𑀡𑀯𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀓𑀫𑁆𑀫𑀸𑀦𑀁 𑀅𑀓𑀺𑀭𑀺𑀬𑀁 𑀧𑀜𑁆𑀜𑀧𑁂𑀢𑀺, 𑀲𑀩𑁆𑀩𑀓𑀫𑁆𑀫𑀸𑀦𑀁 𑀔𑁄 𑀧𑀦 𑀅𑀓𑀺𑀭𑀺𑀬𑀁 𑀧𑀜𑁆𑀜𑀧𑁂𑀦𑁆𑀢𑁄 𑀉𑀘𑁆𑀙𑁂𑀤𑀁 𑀆𑀳 𑀮𑁄𑀓𑀲𑁆𑀲 𑁋 𑀓𑀫𑁆𑀫𑀲𑀘𑁆𑀘𑀸𑀬𑀁 [𑀓𑀫𑁆𑀫𑀲𑀘𑁆𑀘𑀸𑀬𑀻 (𑀓.)], 𑀪𑁄, 𑀮𑁄𑀓𑁄 𑀓𑀫𑁆𑀫𑀲𑀫𑀸𑀭𑀫𑁆𑀪𑀝𑁆𑀞𑀸𑀬𑀻’’’𑀢𑀺.

‘‘𑀤𑀲𑁆𑀲𑀦𑀫𑁆𑀧𑀺 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑁄𑀡𑀓𑀸𑀬𑀦𑀲𑁆𑀲 𑀫𑀸𑀡𑀯𑀲𑁆𑀲 𑀦𑀸𑀪𑀺𑀚𑀸𑀦𑀸𑀫𑀺; 𑀓𑀼𑀢𑁄 𑀧𑀦𑁂𑀯𑀭𑀽𑀧𑁄 𑀓𑀣𑀸𑀲𑀮𑁆𑀮𑀸𑀧𑁄! 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀲𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀏𑀓𑀦𑁆𑀢𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀲𑀢𑁆𑀢𑀸 𑀦𑁂𑀭𑀬𑀺𑀓𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀅𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀅𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀏𑀓𑀦𑁆𑀢𑀲𑀼𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸𑀧𑀺 𑀅𑀩𑁆𑀬𑀸𑀩𑀚𑁆𑀛𑀸𑀧𑀺 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀅𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀺𑀬𑀢𑀺 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀢𑀢𑁆𑀭, 𑀩𑁆𑀭𑀸𑀳𑁆𑀫𑀡, 𑀬𑀫𑀺𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸, 𑀬𑀫𑀺𑀤𑀁 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸, 𑀬𑀫𑀺𑀤𑀁 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀁

𑁨𑁩𑁫. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀬𑀻 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺…𑀧𑁂… 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺? 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁…𑀧𑁂… 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀁

𑁨𑁩𑁬. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂𑀦 𑀫𑀸𑀢𑀸 [𑀏𑀓𑀘𑁆𑀘𑁄 𑀫𑀸𑀢𑀭𑀁 (𑀓.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸 𑀳𑁄𑀢𑀺, 𑀧𑀺𑀢𑀸 [𑀧𑀺𑀢𑀭𑀁 (𑀓.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄 [𑀯𑁄𑀭𑁄𑀧𑀺𑀢𑀸 (𑀓.)] 𑀳𑁄𑀢𑀺, 𑀅𑀭𑀳𑀁 [𑀅𑀭𑀳𑀦𑁆𑀢𑀁 (𑀓.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄 [𑀯𑁄𑀭𑁄𑀧𑀺𑀢𑀸 (𑀓.)] 𑀳𑁄𑀢𑀺, 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑀺𑀢𑀁 [𑀉𑀧𑁆𑀧𑀸𑀤𑀺𑀢𑀸 (𑀓.)] 𑀳𑁄𑀢𑀺, 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺 [𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 (𑀲𑀻. 𑀲𑁆𑀬𑀸. 𑀓𑀁.)] 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁.