(𑁧𑁯) 𑁪. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀁

𑁧𑁮𑁧. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑁄𑀥𑀸𑀚𑀻𑀯𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀬𑁄𑀥𑀸𑀚𑀻𑀯𑁄 𑀞𑀸𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀤𑀽𑀭𑁂𑀧𑀸𑀢𑀻 𑀘, 𑀅𑀓𑁆𑀔𑀡𑀯𑁂𑀥𑀻 𑀘, 𑀫𑀳𑀢𑁄 𑀘 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑁄𑀥𑀸𑀚𑀻𑀯𑁄 𑀭𑀸𑀚𑀸𑀭𑀳𑁄 𑀳𑁄𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀞𑀸𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀤𑀽𑀭𑁂𑀧𑀸𑀢𑀻 𑀘, 𑀅𑀓𑁆𑀔𑀡𑀯𑁂𑀥𑀻 𑀘, 𑀫𑀳𑀢𑁄 𑀘 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀞𑀸𑀦𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺…𑀧𑁂… 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀞𑀸𑀦𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀽𑀭𑁂𑀧𑀸𑀢𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀽𑀭𑁂𑀧𑀸𑀢𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀡𑀯𑁂𑀥𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀔𑀡𑀯𑁂𑀥𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀳𑀢𑁄 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀳𑀦𑁆𑀢𑀁 𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀳𑀢𑁄 𑀓𑀸𑀬𑀲𑁆𑀲 𑀧𑀤𑀸𑀮𑁂𑀢𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀳𑀼𑀦𑁂𑀬𑁆𑀬𑁄 𑀳𑁄𑀢𑀺…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀧𑀞𑀫𑀁.

𑁨. 𑀧𑀸𑀝𑀺𑀪𑁄𑀕𑀲𑀼𑀢𑁆𑀢𑀁

𑁧𑁮𑁨. [𑀓𑀣𑀸. 𑁬𑁨𑁪] ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? ‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁; ‘𑀩𑁆𑀬𑀸𑀥𑀺𑀥𑀫𑁆𑀫𑀁 𑀫𑀸 𑀩𑁆𑀬𑀸𑀥𑀺𑀬𑀻’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁; ‘𑀫𑀭𑀡𑀥𑀫𑁆𑀫𑀁 𑀫𑀸 𑀫𑀻𑀬𑀻’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁; ‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀓𑀢𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀲𑀁𑀓𑀺𑀮𑁂𑀲𑀺𑀓𑀸𑀦𑀺 𑀧𑁄𑀦𑁄𑀪𑀯𑀺𑀓𑀸𑀦𑀺 𑀲𑀤𑀭𑀸𑀦𑀺 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀓𑀸𑀦𑀺, 𑀢𑁂𑀲𑀁 𑀯𑀺𑀧𑀸𑀓𑁄 𑀫𑀸 𑀦𑀺𑀩𑁆𑀩𑀢𑁆𑀢𑀻’𑀢𑀺 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁.

‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀦𑀢𑁆𑀣𑀺 𑀓𑁄𑀘𑀺 𑀧𑀸𑀝𑀺𑀪𑁄𑀕𑁄 𑁋 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀲𑀼𑀢𑀲𑀼𑀢𑁆𑀢𑀁

𑁧𑁮𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 [𑀏𑀯𑀁𑀤𑀺𑀝𑁆𑀞𑀻 (𑀲𑀩𑁆𑀩𑀢𑁆𑀣)] 𑁋 ‘𑀬𑁄 𑀓𑁄𑀘𑀺 𑀤𑀺𑀝𑁆𑀞𑀁 𑀪𑀸𑀲𑀢𑀺 𑁋 𑀏𑀯𑀁 𑀫𑁂 𑀤𑀺𑀝𑁆𑀞𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁄 𑀤𑁄𑀲𑁄; 𑀬𑁄 𑀓𑁄𑀘𑀺 𑀲𑀼𑀢𑀁 𑀪𑀸𑀲𑀢𑀺 𑁋 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁄 𑀤𑁄𑀲𑁄; 𑀬𑁄 𑀓𑁄𑀘𑀺 𑀫𑀼𑀢𑀁 𑀪𑀸𑀲𑀢𑀺 𑁋 𑀏𑀯𑀁 𑀫𑁂 𑀫𑀼𑀢𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁄 𑀤𑁄𑀲𑁄; 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀸𑀢𑀁 𑀪𑀸𑀲𑀢𑀺 𑁋 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀢𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁄 𑀤𑁄𑀲𑁄’’’𑀢𑀺.

‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀤𑀺𑀝𑁆𑀞𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦 𑀧𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀤𑀺𑀝𑁆𑀞𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀲𑀼𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦 𑀧𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀲𑀼𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀫𑀼𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦 𑀧𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀫𑀼𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺; 𑀦 𑀧𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺.

‘‘𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀤𑀺𑀝𑁆𑀞𑀁 𑀪𑀸𑀲𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑀜𑁆𑀘 𑀔𑁆𑀯𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀤𑀺𑀝𑁆𑀞𑀁 𑀅𑀪𑀸𑀲𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀤𑀺𑀝𑁆𑀞𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺.

‘‘𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀢𑀁 𑀪𑀸𑀲𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀼𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑀜𑁆𑀘 𑀔𑁆𑀯𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀲𑀼𑀢𑀁 𑀅𑀪𑀸𑀲𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀲𑀼𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺.

‘‘𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀫𑀼𑀢𑀁 𑀪𑀸𑀲𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀫𑀼𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑀜𑁆𑀘 𑀔𑁆𑀯𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀫𑀼𑀢𑀁 𑀅𑀪𑀸𑀲𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀫𑀼𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺.

‘‘𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀯𑀺𑀜𑁆𑀜𑀸𑀢𑀁 𑀪𑀸𑀲𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀯𑀺𑀜𑁆𑀜𑀸𑀢𑀁 𑀦 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑀜𑁆𑀘 𑀔𑁆𑀯𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀯𑀺𑀜𑁆𑀜𑀸𑀢𑀁 𑀅𑀪𑀸𑀲𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀯𑀺𑀜𑁆𑀜𑀸𑀢𑀁 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’’𑀢𑀺.

𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺. 𑀢𑀢𑀺𑀬𑀁.

𑁪. 𑀅𑀪𑀬𑀲𑀼𑀢𑁆𑀢𑀁

𑁧𑁮𑁪. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 𑁋 ‘𑀦𑀢𑁆𑀣𑀺 𑀬𑁄 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲𑀸’’’𑀢𑀺. ‘‘𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲; 𑀅𑀢𑁆𑀣𑀺 𑀧𑀦, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑁄 𑀅𑀯𑀺𑀕𑀢𑀧𑁂𑀫𑁄 𑀅𑀯𑀺𑀕𑀢𑀧𑀺𑀧𑀸𑀲𑁄 𑀅𑀯𑀺𑀕𑀢𑀧𑀭𑀺𑀴𑀸𑀳𑁄 𑀅𑀯𑀺𑀕𑀢𑀢𑀡𑁆𑀳𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀧𑀺𑀬𑀸 𑀯𑀢 𑀫𑀁 𑀓𑀸𑀫𑀸 𑀚𑀳𑀺𑀲𑁆𑀲𑀦𑁆𑀢𑀺, 𑀧𑀺𑀬𑁂 𑀘𑀸𑀳𑀁 𑀓𑀸𑀫𑁂 𑀚𑀳𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺 𑀅𑀯𑀺𑀕𑀢𑀘𑁆𑀙𑀦𑁆𑀤𑁄 𑀅𑀯𑀺𑀕𑀢𑀧𑁂𑀫𑁄 𑀅𑀯𑀺𑀕𑀢𑀧𑀺𑀧𑀸𑀲𑁄 𑀅𑀯𑀺𑀕𑀢𑀧𑀭𑀺𑀴𑀸𑀳𑁄 𑀅𑀯𑀺𑀕𑀢𑀢𑀡𑁆𑀳𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀧𑀺𑀬𑁄 𑀯𑀢 𑀫𑀁 𑀓𑀸𑀬𑁄 𑀚𑀳𑀺𑀲𑁆𑀲𑀢𑀺, 𑀧𑀺𑀬𑀜𑁆𑀘𑀸𑀳𑀁 𑀓𑀸𑀬𑀁 𑀚𑀳𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀅𑀓𑀢𑀓𑀮𑁆𑀬𑀸𑀡𑁄 𑀳𑁄𑀢𑀺 𑀅𑀓𑀢𑀓𑀼𑀲𑀮𑁄 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑁄 𑀓𑀢𑀧𑀸𑀧𑁄 𑀓𑀢𑀮𑀼𑀤𑁆𑀤𑁄 𑀓𑀢𑀓𑀺𑀩𑁆𑀩𑀺𑀲𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁; 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲𑀁. 𑀬𑀸𑀯𑀢𑀸, 𑀪𑁄, 𑀅𑀓𑀢𑀓𑀮𑁆𑀬𑀸𑀡𑀸𑀦𑀁 𑀅𑀓𑀢𑀓𑀼𑀲𑀮𑀸𑀦𑀁 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀓𑀢𑀧𑀸𑀧𑀸𑀦𑀁 𑀓𑀢𑀮𑀼𑀤𑁆𑀤𑀸𑀦𑀁 𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀕𑀢𑀺 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀓𑀗𑁆𑀔𑀻 𑀳𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀻 𑀅𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀗𑁆𑀔𑀻 𑀯𑀢𑀫𑁆𑀳𑀺 𑀯𑀺𑀘𑀺𑀓𑀺𑀘𑁆𑀙𑀻 𑀅𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂’𑀢𑀺. 𑀲𑁄 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺, 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀪𑀸𑀬𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑁆𑀢𑀸𑀭𑁄 𑀫𑀭𑀡𑀥𑀫𑁆𑀫𑀸 𑀲𑀫𑀸𑀦𑀸 𑀪𑀸𑀬𑀦𑁆𑀢𑀺, 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺 𑀫𑀭𑀡𑀲𑁆𑀲.

‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀯𑀺𑀕𑀢𑀧𑁂𑀫𑁄 𑀯𑀺𑀕𑀢𑀧𑀺𑀧𑀸𑀲𑁄 𑀯𑀺𑀕𑀢𑀧𑀭𑀺𑀴𑀸𑀳𑁄 𑀯𑀺𑀕𑀢𑀢𑀡𑁆𑀳𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀧𑀺𑀬𑀸 𑀯𑀢 𑀫𑀁 𑀓𑀸𑀫𑀸 𑀚𑀳𑀺𑀲𑁆𑀲𑀦𑁆𑀢𑀺, 𑀧𑀺𑀬𑁂 𑀘𑀸𑀳𑀁 𑀓𑀸𑀫𑁂 𑀚𑀳𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂 𑀯𑀻𑀢𑀭𑀸𑀕𑁄 𑀳𑁄𑀢𑀺 𑀯𑀺𑀕𑀢𑀘𑁆𑀙𑀦𑁆𑀤𑁄 𑀯𑀺𑀕𑀢𑀧𑁂𑀫𑁄 𑀯𑀺𑀕𑀢𑀧𑀺𑀧𑀸𑀲𑁄 𑀯𑀺𑀕𑀢𑀧𑀭𑀺𑀴𑀸𑀳𑁄 𑀯𑀺𑀕𑀢𑀢𑀡𑁆𑀳𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀧𑀺𑀬𑁄 𑀯𑀢 𑀫𑀁 𑀓𑀸𑀬𑁄 𑀚𑀳𑀺𑀲𑁆𑀲𑀢𑀺, 𑀧𑀺𑀬𑀜𑁆𑀘𑀸𑀳𑀁 𑀓𑀸𑀬𑀁 𑀚𑀳𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀅𑀓𑀢𑀧𑀸𑀧𑁄 𑀳𑁄𑀢𑀺 𑀅𑀓𑀢𑀮𑀼𑀤𑁆𑀤𑁄 𑀅𑀓𑀢𑀓𑀺𑀩𑁆𑀩𑀺𑀲𑁄 𑀓𑀢𑀓𑀮𑁆𑀬𑀸𑀡𑁄 𑀓𑀢𑀓𑀼𑀲𑀮𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀓𑀢𑀁 𑀯𑀢 𑀫𑁂 𑀧𑀸𑀧𑀁, 𑀅𑀓𑀢𑀁 𑀮𑀼𑀤𑁆𑀤𑀁, 𑀅𑀓𑀢𑀁 𑀓𑀺𑀩𑁆𑀩𑀺𑀲𑀁; 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀓𑀼𑀲𑀮𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡𑀁. 𑀬𑀸𑀯𑀢𑀸, 𑀪𑁄, 𑀅𑀓𑀢𑀧𑀸𑀧𑀸𑀦𑀁 𑀅𑀓𑀢𑀮𑀼𑀤𑁆𑀤𑀸𑀦𑀁 𑀅𑀓𑀢𑀓𑀺𑀩𑁆𑀩𑀺𑀲𑀸𑀦𑀁 𑀓𑀢𑀓𑀮𑁆𑀬𑀸𑀡𑀸𑀦𑀁 𑀓𑀢𑀓𑀼𑀲𑀮𑀸𑀦𑀁 𑀓𑀢𑀪𑀻𑀭𑀼𑀢𑁆𑀢𑀸𑀡𑀸𑀦𑀁 𑀕𑀢𑀺 𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀅𑀓𑀗𑁆𑀔𑀻 𑀳𑁄𑀢𑀺 𑀅𑀯𑀺𑀘𑀺𑀓𑀺𑀘𑁆𑀙𑀻 𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂. 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀕𑀸𑀴𑁆𑀳𑁄 𑀭𑁄𑀕𑀸𑀢𑀗𑁆𑀓𑁄 𑀨𑀼𑀲𑀢𑀺. 𑀢𑀲𑁆𑀲 𑀅𑀜𑁆𑀜𑀢𑀭𑁂𑀦 𑀕𑀸𑀴𑁆𑀳𑁂𑀦 𑀭𑁄𑀕𑀸𑀢𑀗𑁆𑀓𑁂𑀦 𑀨𑀼𑀝𑁆𑀞𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀓𑀗𑁆𑀔𑀻 𑀯𑀢𑀫𑁆𑀳𑀺 𑀅𑀯𑀺𑀘𑀺𑀓𑀺𑀘𑁆𑀙𑀻 𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂’𑀢𑀺. 𑀲𑁄 𑀦 𑀲𑁄𑀘𑀢𑀺 𑀦 𑀓𑀺𑀮𑀫𑀢𑀺 𑀦 𑀧𑀭𑀺𑀤𑁂𑀯𑀢𑀺, 𑀦 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺, 𑀦 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀦 𑀪𑀸𑀬𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺 𑀫𑀭𑀡𑀲𑁆𑀲. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑁆𑀢𑀸𑀭𑁄 𑀫𑀭𑀡𑀥𑀫𑁆𑀫𑀸 𑀲𑀫𑀸𑀦𑀸 𑀦 𑀪𑀸𑀬𑀦𑁆𑀢𑀺, 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺 𑀫𑀭𑀡𑀲𑁆𑀲𑀸’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀲𑀼𑀢𑁆𑀢𑀁

𑁧𑁮𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀧𑀭𑀺𑀩𑁆𑀩𑀸𑀚𑀓𑀸 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀧𑀝𑀺𑀯𑀲𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑀅𑀦𑁆𑀦𑀪𑀸𑀭𑁄 𑀯𑀭𑀥𑀭𑁄 𑀲𑀓𑀼𑀮𑀼𑀤𑀸𑀬𑀻 𑀘 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀧𑀭𑀺𑀩𑁆𑀩𑀸𑀚𑀓𑀸. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀺, 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘 𑁋

‘‘𑀓𑀸𑀬 𑀦𑀼𑀢𑁆𑀣, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? ‘‘𑀇𑀥, 𑀪𑁄 𑀕𑁄𑀢𑀫, 𑀅𑀫𑁆𑀳𑀸𑀓𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀺, 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻’’’𑀢𑀺.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀧𑀭𑀺𑀩𑁆𑀩𑀸𑀚𑀓𑀸, 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀧𑀭𑀺𑀩𑁆𑀩𑀸𑀚𑀓𑀸, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀲𑀩𑁆𑀩𑁂 𑀧𑀸𑀡𑀸 𑀅𑀯𑀚𑁆𑀛𑀸’𑀢𑀺. 𑀇𑀢𑀺 𑀯𑀤𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀁 𑀆𑀳, 𑀦𑁄 𑀫𑀼𑀲𑀸. 𑀲𑁄 𑀢𑁂𑀦 𑀦 𑀲𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺. 𑀅𑀧𑀺 𑀘 𑀬𑀤𑁂𑀯 𑀢𑀢𑁆𑀣 𑀲𑀘𑁆𑀘𑀁 𑀢𑀤𑀪𑀺𑀜𑁆𑀜𑀸𑀬 𑀧𑀸𑀡𑀸𑀦𑀁𑀬𑁂𑀯 𑀅𑀦𑀼𑀤𑁆𑀤𑀬𑀸𑀬 [𑀢𑀤𑀪𑀺𑀜𑁆𑀜𑀸𑀬 𑀅𑀦𑀼𑀤𑀬𑀸𑀬 (𑀓.)] 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀧𑀭𑀺𑀩𑁆𑀩𑀸𑀚𑀓𑀸, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀲𑀩𑁆𑀩𑁂 𑀓𑀸𑀫𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺. 𑀇𑀢𑀺 𑀯𑀤𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀫𑀸𑀳, 𑀦𑁄 𑀫𑀼𑀲𑀸. 𑀲𑁄 𑀢𑁂𑀦 𑀦 𑀲𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺. 𑀅𑀧𑀺 𑀘 𑀬𑀤𑁂𑀯 𑀢𑀢𑁆𑀣 𑀲𑀘𑁆𑀘𑀁 𑀢𑀤𑀪𑀺𑀜𑁆𑀜𑀸𑀬 𑀓𑀸𑀫𑀸𑀦𑀁𑀬𑁂𑀯 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀧𑀭𑀺𑀩𑁆𑀩𑀸𑀚𑀓𑀸, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀲𑀩𑁆𑀩𑁂 𑀪𑀯𑀸 𑀅𑀦𑀺𑀘𑁆𑀘𑀸…𑀧𑁂… 𑀪𑀯𑀸𑀦𑀁𑀬𑁂𑀯 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀧𑀭𑀺𑀩𑁆𑀩𑀸𑀚𑀓𑀸, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀦𑀸𑀳𑀁 𑀓𑁆𑀯𑀘𑀦𑀺 [𑀓𑁆𑀯𑀘𑀦 (𑀲𑀻. 𑀲𑁆𑀬𑀸.)] 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁 𑀦 𑀘 𑀫𑀫 𑀓𑁆𑀯𑀘𑀦𑀺 𑀓𑀢𑁆𑀣𑀘𑀺 𑀓𑀺𑀜𑁆𑀘𑀦𑀢𑀢𑁆𑀣𑀻’𑀢𑀺. 𑀇𑀢𑀺 𑀯𑀤𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀁 𑀆𑀳, 𑀦𑁄 𑀫𑀼𑀲𑀸. 𑀲𑁄 𑀢𑁂𑀦 𑀦 𑀲𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀫𑀜𑁆𑀜𑀢𑀺, 𑀦 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀦 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺. 𑀅𑀧𑀺 𑀘 𑀬𑀤𑁂𑀯 𑀢𑀢𑁆𑀣 𑀲𑀘𑁆𑀘𑀁 𑀢𑀤𑀪𑀺𑀜𑁆𑀜𑀸𑀬 𑀆𑀓𑀺𑀜𑁆𑀘𑀜𑁆𑀜𑀁𑀬𑁂𑀯 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀘𑀢𑁆𑀢𑀸𑀭𑀺 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀉𑀫𑁆𑀫𑀕𑁆𑀕𑀲𑀼𑀢𑁆𑀢𑀁

𑁧𑁮𑁬. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁂𑀦 𑀦𑀼 𑀔𑁄, 𑀪𑀦𑁆𑀢𑁂, 𑀮𑁄𑀓𑁄 𑀦𑀻𑀬𑀢𑀺, 𑀓𑁂𑀦 𑀮𑁄𑀓𑁄 𑀧𑀭𑀺𑀓𑀲𑁆𑀲𑀢𑀺, 𑀓𑀲𑁆𑀲 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻’’𑀢𑀺?

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀪𑀤𑁆𑀤𑀓𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀉𑀫𑁆𑀫𑀕𑁆𑀕𑁄 [𑀉𑀫𑁆𑀫𑀗𑁆𑀕𑁄 (𑀲𑁆𑀬𑀸. 𑀓.)], 𑀪𑀤𑁆𑀤𑀓𑀁 𑀧𑀝𑀺𑀪𑀸𑀦𑀁, 𑀓𑀮𑁆𑀬𑀸𑀡𑀻 [𑀓𑀮𑁆𑀬𑀸𑀡𑀸 (𑀓.)] 𑀧𑀭𑀺𑀧𑀼𑀘𑁆𑀙𑀸. 𑀏𑀯𑀜𑁆𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀼𑀘𑁆𑀙𑀲𑀺 𑁋 ‘𑀓𑁂𑀦 𑀦𑀼 𑀔𑁄, 𑀪𑀦𑁆𑀢𑁂, 𑀮𑁄𑀓𑁄 𑀦𑀻𑀬𑀢𑀺, 𑀓𑁂𑀦 𑀮𑁄𑀓𑁄 𑀧𑀭𑀺𑀓𑀲𑁆𑀲𑀢𑀺, 𑀓𑀲𑁆𑀲 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀘𑀺𑀢𑁆𑀢𑁂𑀦 𑀔𑁄, 𑀪𑀺𑀓𑁆𑀔𑀼, 𑀮𑁄𑀓𑁄 𑀦𑀻𑀬𑀢𑀺, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀺, 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁆𑀲 𑀯𑀲𑀁 𑀕𑀘𑁆𑀙𑀢𑀻’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀳𑁄𑀢𑀻’’𑀢𑀺?

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀪𑀤𑁆𑀤𑀓𑁄 𑀔𑁄 𑀢𑁂, 𑀪𑀺𑀓𑁆𑀔𑀼 𑀉𑀫𑁆𑀫𑀕𑁆𑀕𑁄, 𑀪𑀤𑁆𑀤𑀓𑀁 𑀧𑀝𑀺𑀪𑀸𑀦𑀁, 𑀓𑀮𑁆𑀬𑀸𑀡𑀻 𑀧𑀭𑀺𑀧𑀼𑀘𑁆𑀙𑀸. 𑀏𑀯𑀜𑁆𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀼𑀘𑁆𑀙𑀲𑀺 𑁋 ‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀳𑁄𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀩𑀳𑀽 𑀔𑁄, 𑀪𑀺𑀓𑁆𑀔𑀼, 𑀫𑀬𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 [𑀩𑀳𑀼 𑀔𑁄 𑀪𑀺𑀓𑁆𑀔𑀼 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 (𑀓.)] 𑁋 𑀲𑀼𑀢𑁆𑀢𑀁, 𑀕𑁂𑀬𑁆𑀬𑀁, 𑀯𑁂𑀬𑁆𑀬𑀸𑀓𑀭𑀡𑀁, 𑀕𑀸𑀣𑀸, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀚𑀸𑀢𑀓𑀁, 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀯𑁂𑀤𑀮𑁆𑀮𑀁. 𑀘𑀢𑀼𑀧𑁆𑀧𑀤𑀸𑀬 𑀘𑁂𑀧𑀺, 𑀪𑀺𑀓𑁆𑀔𑀼, 𑀕𑀸𑀣𑀸𑀬 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘‘𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀳𑁄𑀢𑀻’’𑀢𑀺?

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀪𑀤𑁆𑀤𑀓𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀉𑀫𑁆𑀫𑀕𑁆𑀕𑁄, 𑀪𑀤𑁆𑀤𑀓𑀁 𑀧𑀝𑀺𑀪𑀸𑀦𑀁, 𑀓𑀮𑁆𑀬𑀸𑀡𑀻 𑀧𑀭𑀺𑀧𑀼𑀘𑁆𑀙𑀸. 𑀏𑀯𑀜𑁆𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀼𑀘𑁆𑀙𑀲𑀺 𑁋 ‘𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀳𑁄𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀲𑀼𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀅𑀢𑁆𑀣𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺; ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀲𑀼𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀅𑀢𑁆𑀣𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺; ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀲𑀼𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀅𑀢𑁆𑀣𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺; ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀲𑀼𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀅𑀢𑁆𑀣𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀲𑀼𑀢𑀯𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀳𑁄𑀢𑀻’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘‘𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄 𑀳𑁄𑀢𑀻’’𑀢𑀺?

‘‘𑀲𑀸𑀥𑀼 𑀲𑀸𑀥𑀼 𑀪𑀺𑀓𑁆𑀔𑀼! 𑀪𑀤𑁆𑀤𑀓𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀉𑀫𑁆𑀫𑀕𑁆𑀕𑁄, 𑀪𑀤𑁆𑀤𑀓𑀁 𑀧𑀝𑀺𑀪𑀸𑀦𑀁, 𑀓𑀮𑁆𑀬𑀸𑀡𑀻 𑀧𑀭𑀺𑀧𑀼𑀘𑁆𑀙𑀸. 𑀏𑀯𑀜𑁆𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀼𑀘𑁆𑀙𑀲𑀺 𑁋 ‘𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄 𑀳𑁄𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀇𑀥, 𑀪𑀺𑀓𑁆𑀔𑀼, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀉𑀪𑀬𑀳𑀺𑀢𑀲𑀩𑁆𑀩𑀮𑁄𑀓𑀳𑀺𑀢𑀫𑁂𑀯 𑀘𑀺𑀦𑁆𑀢𑀬𑀫𑀸𑀦𑁄 𑀘𑀺𑀦𑁆𑀢𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀧𑀡𑁆𑀟𑀺𑀢𑁄 𑀫𑀳𑀸𑀧𑀜𑁆𑀜𑁄 𑀳𑁄𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀁

𑁧𑁮𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀚𑀸𑀦𑁂𑀬𑁆𑀬 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀅𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑁋 ‘𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺? ‘‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 ‘𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺. ‘‘𑀚𑀸𑀦𑁂𑀬𑁆𑀬 𑀧𑀦, 𑀪𑁄 𑀕𑁄𑀢𑀫, 𑀅𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑁋 ‘𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 ‘𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺. ‘‘𑀚𑀸𑀦𑁂𑀬𑁆𑀬 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑁋 ‘𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺? ‘‘𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 ‘𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺. ‘‘𑀚𑀸𑀦𑁂𑀬𑁆𑀬 𑀧𑀦, 𑀪𑁄 𑀕𑁄𑀢𑀫, 𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑁋 ‘𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 ‘𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁, 𑀪𑁄𑀢𑀸 𑀕𑁄𑀢𑀫𑁂𑀦 𑁋 ‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’’’𑀦𑁆𑀢𑀺.

‘‘𑀏𑀓𑀫𑀺𑀤𑀁, 𑀪𑁄 𑀕𑁄𑀢𑀫, 𑀲𑀫𑀬𑀁 𑀢𑁄𑀤𑁂𑀬𑁆𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀢𑀺 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑀺 𑁋 ‘𑀩𑀸𑀮𑁄 𑀅𑀬𑀁 𑀭𑀸𑀚𑀸 𑀏𑀴𑁂𑀬𑁆𑀬𑁄 𑀲𑀫𑀡𑁂 𑀭𑀸𑀫𑀧𑀼𑀢𑁆𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀲𑀫𑀡𑁂 𑀘 𑀧𑀦 𑀭𑀸𑀫𑀧𑀼𑀢𑁆𑀢𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀢𑀺, 𑀬𑀤𑀺𑀤𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫’𑀦𑁆𑀢𑀺. 𑀇𑀫𑁂𑀧𑀺 𑀭𑀜𑁆𑀜𑁄 𑀏𑀴𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑀓𑀸 𑀩𑀸𑀮𑀸 𑁋 𑀬𑀫𑀓𑁄 𑀫𑁄𑀕𑁆𑀕𑀮𑁆𑀮𑁄 [𑀧𑀼𑀕𑁆𑀕𑀮𑁄 (𑀓.)] 𑀉𑀕𑁆𑀕𑁄 𑀦𑀸𑀯𑀺𑀦𑁆𑀤𑀓𑀻 𑀕𑀦𑁆𑀥𑀩𑁆𑀩𑁄 𑀅𑀕𑁆𑀕𑀺𑀯𑁂𑀲𑁆𑀲𑁄, 𑀬𑁂 𑀲𑀫𑀡𑁂 𑀭𑀸𑀫𑀧𑀼𑀢𑁆𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀲𑀫𑀡𑁂 𑀘 𑀧𑀦 𑀭𑀸𑀫𑀧𑀼𑀢𑁆𑀢𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀬𑀤𑀺𑀤𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺. 𑀢𑁆𑀬𑀸𑀲𑁆𑀲𑀼𑀤𑀁 𑀢𑁄𑀤𑁂𑀬𑁆𑀬𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀺𑀦𑀸 𑀦𑀬𑁂𑀦 𑀦𑁂𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄, 𑀧𑀡𑁆𑀟𑀺𑀢𑁄 𑀭𑀸𑀚𑀸 𑀏𑀴𑁂𑀬𑁆𑀬𑁄 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑁄’𑀢𑀺? ‘𑀏𑀯𑀁, 𑀪𑁄, 𑀧𑀡𑁆𑀟𑀺𑀢𑁄 𑀭𑀸𑀚𑀸 𑀏𑀴𑁂𑀬𑁆𑀬𑁄 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑁄’’’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀪𑁄, 𑀲𑀫𑀡𑁄 𑀭𑀸𑀫𑀧𑀼𑀢𑁆𑀢𑁄 𑀭𑀜𑁆𑀜𑀸 𑀏𑀴𑁂𑀬𑁆𑀬𑁂𑀦 𑀧𑀡𑁆𑀟𑀺𑀢𑁂𑀦 𑀧𑀡𑁆𑀟𑀺𑀢𑀢𑀭𑁄 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀦 𑀅𑀮𑀫𑀢𑁆𑀣𑀤𑀲𑀢𑀭𑁄, 𑀢𑀲𑁆𑀫𑀸 𑀭𑀸𑀚𑀸 𑀏𑀴𑁂𑀬𑁆𑀬𑁄 𑀲𑀫𑀡𑁂 𑀭𑀸𑀫𑀧𑀼𑀢𑁆𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀲𑀫𑀡𑁂 𑀘 𑀧𑀦 𑀭𑀸𑀫𑀧𑀼𑀢𑁆𑀢𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀢𑀺, 𑀬𑀤𑀺𑀤𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁’’.

‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄, 𑀧𑀡𑁆𑀟𑀺𑀢𑀸 𑀭𑀜𑁆𑀜𑁄 𑀏𑀴𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑀓𑀸 𑁋 𑀬𑀫𑀓𑁄 𑀫𑁄𑀕𑁆𑀕𑀮𑁆𑀮𑁄 𑀉𑀕𑁆𑀕𑁄 𑀦𑀸𑀯𑀺𑀦𑁆𑀤𑀓𑀻 𑀕𑀦𑁆𑀥𑀩𑁆𑀩𑁄 𑀅𑀕𑁆𑀕𑀺𑀯𑁂𑀲𑁆𑀲𑁄, 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑀸𑀢𑀺? ‘𑀏𑀯𑀁, 𑀪𑁄, 𑀧𑀡𑁆𑀟𑀺𑀢𑀸 𑀭𑀜𑁆𑀜𑁄 𑀏𑀴𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑀓𑀸 𑁋 𑀬𑀫𑀓𑁄 𑀫𑁄𑀕𑁆𑀕𑀮𑁆𑀮𑁄 𑀉𑀕𑁆𑀕𑁄 𑀦𑀸𑀯𑀺𑀦𑁆𑀤𑀓𑀻 𑀕𑀦𑁆𑀥𑀩𑁆𑀩𑁄 𑀅𑀕𑁆𑀕𑀺𑀯𑁂𑀲𑁆𑀲𑁄, 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑀸’’’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀪𑁄, 𑀲𑀫𑀡𑁄 𑀭𑀸𑀫𑀧𑀼𑀢𑁆𑀢𑁄 𑀭𑀜𑁆𑀜𑁄 𑀏𑀴𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑀓𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀧𑀡𑁆𑀟𑀺𑀢𑀢𑀭𑁄 𑀓𑀭𑀡𑀻𑀬𑀸𑀥𑀺𑀓𑀭𑀡𑀻𑀬𑁂𑀲𑀼 𑀯𑀘𑀦𑀻𑀬𑀸𑀥𑀺𑀯𑀘𑀦𑀻𑀬𑁂𑀲𑀼 𑀅𑀮𑀫𑀢𑁆𑀣𑀤𑀲𑀢𑀭𑁂𑀳𑀺 𑀅𑀮𑀫𑀢𑁆𑀣𑀤𑀲𑀢𑀭𑁄, 𑀢𑀲𑁆𑀫𑀸 𑀭𑀜𑁆𑀜𑁄 𑀏𑀴𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑀓𑀸 𑀲𑀫𑀡𑁂 𑀭𑀸𑀫𑀧𑀼𑀢𑁆𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸; 𑀲𑀫𑀡𑁂 𑀘 𑀧𑀦 𑀭𑀸𑀫𑀧𑀼𑀢𑁆𑀢𑁂 𑀏𑀯𑀭𑀽𑀧𑀁 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀬𑀤𑀺𑀤𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄, 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀸𑀯 𑀲𑀼𑀪𑀸𑀲𑀺𑀢𑀁 𑀘𑀺𑀤𑀁 𑀪𑁄𑀢𑀸 𑀕𑁄𑀢𑀫𑁂𑀦 𑁋 ‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀝𑁆𑀞𑀸𑀦𑀁 𑀅𑀦𑀯𑀓𑀸𑀲𑁄 𑀬𑀁 𑀅𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀞𑀸𑀦𑀁 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯𑀦𑁆𑀢𑀺. 𑀏𑀢𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀞𑀸𑀦𑀁 𑀯𑀺𑀚𑁆𑀚𑀢𑀺 𑀬𑀁 𑀲𑀧𑁆𑀧𑀼𑀭𑀺𑀲𑁄 𑀅𑀲𑀧𑁆𑀧𑀼𑀭𑀺𑀲𑀁 𑀚𑀸𑀦𑁂𑀬𑁆𑀬 𑁋 𑀅𑀲𑀧𑁆𑀧𑀼𑀭𑀺𑀲𑁄 𑀅𑀬𑀁 𑀪𑀯’𑀦𑁆𑀢𑀺. 𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑁄 𑀕𑁄𑀢𑀫, 𑀕𑀘𑁆𑀙𑀸𑀫. 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺. 𑀲𑀢𑁆𑀢𑀫𑀁.

𑁮. 𑀉𑀧𑀓𑀲𑀼𑀢𑁆𑀢𑀁

𑁧𑁮𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀉𑀧𑀓𑁄 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀧𑀓𑁄 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 𑁋 ‘𑀬𑁄 𑀓𑁄𑀘𑀺 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀢𑀺, 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑁄 𑀲𑀩𑁆𑀩𑁄 𑀲𑁄 [𑀲𑀩𑁆𑀩𑀲𑁄 (𑀲𑀻. 𑀧𑀻.)] 𑀦 𑀉𑀧𑀧𑀸𑀤𑁂𑀢𑀺. 𑀅𑀦𑀼𑀧𑀧𑀸𑀤𑁂𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀺 𑀉𑀧𑀯𑀚𑁆𑀚𑁄’’’𑀢𑀺. ‘‘𑀧𑀭𑀽𑀧𑀸𑀭𑀫𑁆𑀪𑀁 𑀘𑁂, 𑀉𑀧𑀓, 𑀯𑀢𑁆𑀢𑁂𑀢𑀺 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑁄 𑀦 𑀉𑀧𑀧𑀸𑀤𑁂𑀢𑀺, 𑀅𑀦𑀼𑀧𑀧𑀸𑀤𑁂𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀢𑀺 𑀉𑀧𑀯𑀚𑁆𑀚𑁄. 𑀢𑁆𑀯𑀁 𑀔𑁄, 𑀉𑀧𑀓, 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀲𑀺, 𑀧𑀭𑀽𑀧𑀸𑀭𑀫𑁆𑀪𑀁 𑀯𑀢𑁆𑀢𑁂𑀦𑁆𑀢𑁄 𑀦 𑀉𑀧𑀧𑀸𑀤𑁂𑀲𑀺, 𑀅𑀦𑀼𑀧𑀧𑀸𑀤𑁂𑀦𑁆𑀢𑁄 𑀕𑀸𑀭𑀬𑁆𑀳𑁄 𑀳𑁄𑀲𑀺 𑀉𑀧𑀯𑀚𑁆𑀚𑁄’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀉𑀫𑁆𑀫𑀼𑀚𑁆𑀚𑀫𑀸𑀦𑀓𑀁𑀬𑁂𑀯 𑀫𑀳𑀢𑀸 𑀧𑀸𑀲𑁂𑀦 𑀩𑀦𑁆𑀥𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀉𑀫𑁆𑀫𑀼𑀚𑁆𑀚𑀫𑀸𑀦𑀓𑁄𑀬𑁂𑀯 𑀪𑀕𑀯𑀢𑀸 𑀫𑀳𑀢𑀸 𑀯𑀸𑀤𑀧𑀸𑀲𑁂𑀦 [𑀫𑀳𑀢𑀸 𑀧𑀸𑀲𑁂𑀦 (𑀓.)] 𑀩𑀤𑁆𑀥𑁄’’𑀢𑀺.

‘‘𑀇𑀤𑀁 𑀅𑀓𑀼𑀲𑀮𑀦𑁆𑀢𑀺 𑀔𑁄, 𑀉𑀧𑀓, 𑀫𑀬𑀸 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸 𑀅𑀧𑀭𑀺𑀫𑀸𑀡𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑁋 𑀇𑀢𑀺𑀧𑀺𑀤𑀁 𑀅𑀓𑀼𑀲𑀮𑀦𑁆𑀢𑀺. 𑀢𑀁 𑀔𑁄 𑀧𑀦𑀺𑀤𑀁 𑀅𑀓𑀼𑀲𑀮𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀔𑁄, 𑀉𑀧𑀓, 𑀫𑀬𑀸 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸 𑀅𑀧𑀭𑀺𑀫𑀸𑀡𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑁋 𑀇𑀢𑀺𑀧𑀺𑀤𑀁 𑀅𑀓𑀼𑀲𑀮𑀁 𑀧𑀳𑀸𑀢𑀩𑁆𑀩𑀦𑁆𑀢𑀺.

‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀔𑁄, 𑀉𑀧𑀓, 𑀫𑀬𑀸 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸 𑀅𑀧𑀭𑀺𑀫𑀸𑀡𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑁋 𑀇𑀢𑀺𑀧𑀺𑀤𑀁 𑀓𑀼𑀲𑀮𑀦𑁆𑀢𑀺. 𑀢𑀁 𑀔𑁄 𑀧𑀦𑀺𑀤𑀁 𑀓𑀼𑀲𑀮𑀁 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀔𑁄, 𑀉𑀧𑀓, 𑀫𑀬𑀸 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀅𑀧𑀭𑀺𑀫𑀸𑀡𑀸 𑀧𑀤𑀸 𑀅𑀧𑀭𑀺𑀫𑀸𑀡𑀸 𑀩𑁆𑀬𑀜𑁆𑀚𑀦𑀸 𑀅𑀧𑀭𑀺𑀫𑀸𑀡𑀸 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑁋 𑀇𑀢𑀺𑀧𑀺𑀤𑀁 𑀓𑀼𑀲𑀮𑀁 𑀪𑀸𑀯𑁂𑀢𑀩𑁆𑀩’’𑀦𑁆𑀢𑀺.

𑀅𑀣 𑀔𑁄 𑀉𑀧𑀓𑁄 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀆𑀭𑁄𑀘𑁂𑀲𑀺.

𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀉𑀧𑀓𑀁 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀯 𑀥𑀁𑀲𑀻 𑀯𑀢𑀸𑀬𑀁 𑀮𑁄𑀡𑀓𑀸𑀭𑀤𑀸𑀭𑀓𑁄 𑀬𑀸𑀯 𑀫𑀼𑀔𑀭𑁄 𑀬𑀸𑀯 𑀧𑀕𑀩𑁆𑀩𑁄 𑀬𑀢𑁆𑀭 𑀳𑀺 𑀦𑀸𑀫 𑀢𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺; 𑀅𑀧𑁂𑀳𑀺 𑀢𑁆𑀯𑀁, 𑀉𑀧𑀓, 𑀯𑀺𑀦𑀲𑁆𑀲, 𑀫𑀸 𑀢𑀁 𑀅𑀤𑁆𑀤𑀲’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀲𑀘𑁆𑀙𑀺𑀓𑀭𑀡𑀻𑀬𑀲𑀼𑀢𑁆𑀢𑀁

𑁧𑁮𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀘𑁆𑀙𑀺𑀓𑀭𑀡𑀻𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑀡𑀻𑀬𑀸; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀢𑀺𑀬𑀸 𑀲𑀘𑁆𑀙𑀺𑀓𑀭𑀡𑀻𑀬𑀸; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀘𑀓𑁆𑀔𑀼𑀦𑀸 𑀲𑀘𑁆𑀙𑀺𑀓𑀭𑀡𑀻𑀬𑀸; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑀡𑀻𑀬𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑀡𑀻𑀬𑀸? 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑀡𑀻𑀬𑀸.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀢𑀺𑀬𑀸 𑀲𑀘𑁆𑀙𑀺𑀓𑀭𑀡𑀻𑀬𑀸? 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑀺𑀬𑀸 𑀲𑀘𑁆𑀙𑀺𑀓𑀭𑀡𑀻𑀬𑁄.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀘𑀓𑁆𑀔𑀼𑀦𑀸 𑀲𑀘𑁆𑀙𑀺𑀓𑀭𑀡𑀻𑀬𑀸? 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀦𑀸 𑀲𑀘𑁆𑀙𑀺𑀓𑀭𑀡𑀻𑀬𑁄.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑀡𑀻𑀬𑀸? 𑀆𑀲𑀯𑀸𑀦𑀁 𑀔𑀬𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑀡𑀻𑀬𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀲𑀘𑁆𑀙𑀺𑀓𑀭𑀡𑀻𑀬𑀸 𑀥𑀫𑁆𑀫𑀸’’𑀢𑀺. 𑀦𑀯𑀫𑀁.

𑁧𑁦. 𑀉𑀧𑁄𑀲𑀣𑀲𑀼𑀢𑁆𑀢𑀁

𑁧𑁯𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀅𑀧𑀮𑀸𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸 𑀦𑀺𑀧𑁆𑀧𑀮𑀸𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸 𑀲𑀼𑀤𑁆𑀥𑀸 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸𑀭𑀽𑀧𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀣𑀸𑀭𑀽𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸. 𑀬𑀣𑀸𑀭𑀽𑀧𑀸 𑀧𑀭𑀺𑀲𑀸 𑀤𑀼𑀮𑁆𑀮𑀪𑀸 𑀤𑀲𑁆𑀲𑀦𑀸𑀬𑀧𑀺 𑀮𑁄𑀓𑀲𑁆𑀫𑀺𑀁, 𑀢𑀣𑀸𑀭𑀽𑀧𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀣𑀸𑀭𑀽𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸. 𑀬𑀣𑀸𑀭𑀽𑀧𑀸 𑀧𑀭𑀺𑀲𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀢𑀣𑀸𑀭𑀽𑀧𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀣𑀸𑀭𑀽𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸. 𑀬𑀣𑀸𑀭𑀽𑀧𑀸𑀬 𑀧𑀭𑀺𑀲𑀸𑀬 𑀅𑀧𑁆𑀧𑀁 𑀤𑀺𑀦𑁆𑀦𑀁 𑀩𑀳𑀼 𑀳𑁄𑀢𑀺 𑀩𑀳𑀼 𑀤𑀺𑀦𑁆𑀦𑀁 𑀩𑀳𑀼𑀢𑀭𑀁, 𑀢𑀣𑀸𑀭𑀽𑀧𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀣𑀸𑀭𑀽𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸. 𑀬𑀣𑀸𑀭𑀽𑀧𑀁 𑀧𑀭𑀺𑀲𑀁 𑀅𑀮𑀁 𑀬𑁄𑀚𑀦𑀕𑀡𑀦𑀸𑀦𑀺𑀧𑀺 𑀤𑀲𑁆𑀲𑀦𑀸𑀬 𑀕𑀦𑁆𑀢𑀼𑀁 𑀅𑀧𑀺 𑀧𑀼𑀝𑁄𑀲𑁂𑀦𑀸𑀧𑀺, 𑀢𑀣𑀸𑀭𑀽𑀧𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, (𑀢𑀣𑀸𑀭𑀽𑀧𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸) [( ) 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺].

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀤𑁂𑀯𑀧𑁆𑀧𑀢𑁆𑀢𑀸 𑀯𑀺𑀳𑀭𑀦𑁆𑀢𑀺; 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑀸 𑀯𑀺𑀳𑀭𑀦𑁆𑀢𑀺; 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀸 𑀯𑀺𑀳𑀭𑀦𑁆𑀢𑀺; 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀭𑀺𑀬𑀧𑁆𑀧𑀢𑁆𑀢𑀸 𑀯𑀺𑀳𑀭𑀦𑁆𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁂𑀯𑀧𑁆𑀧𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑁂𑀯𑀧𑁆𑀧𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸… 𑀫𑀼𑀤𑀺𑀢𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀧𑁆𑀧𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀧𑁆𑀧𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺. 𑀤𑀲𑀫𑀁.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 [𑀬𑁄𑀥𑀸𑀚𑀻𑀯𑀯𑀕𑁆𑀕𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘𑀢𑀼𑀢𑁆𑀣𑁄.