𑁬. 𑀆𑀬𑀸𑀘𑀦𑀲𑀼𑀢𑁆𑀢𑀁

𑁧𑁭𑁬. ‘‘𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄 𑀳𑁄𑀫𑀺 𑀬𑀸𑀤𑀺𑀲𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’𑀢𑀺 [𑀅. 𑀦𑀺. 𑁨.𑁧𑁩𑁧 𑀇𑀤𑀁 𑀲𑀼𑀢𑁆𑀢𑀁 𑀆𑀕𑀢𑀁]. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸.

‘‘𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑀸 𑀳𑁄𑀫𑀺 𑀬𑀸𑀤𑀺𑀲𑀸 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘𑀸’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀬𑀤𑀺𑀤𑀁 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘.

‘‘𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁄 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄 𑀳𑁄𑀫𑀺 𑀬𑀸𑀤𑀺𑀲𑁄 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁, 𑀬𑀤𑀺𑀤𑀁 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄.

‘‘𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑀸 𑀳𑁄𑀫𑀺 𑀬𑀸𑀤𑀺𑀲𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’’𑀢𑀺. 𑀙𑀝𑁆𑀞𑀁.