(𑁧𑁮) 𑁩. 𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑁄

𑁧. 𑀘𑁂𑀢𑀦𑀸𑀲𑀼𑀢𑁆𑀢𑀁

𑁧𑁭𑁧. [𑀓𑀣𑀸. 𑁫𑁩𑁯] ‘‘𑀓𑀸𑀬𑁂 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀯𑀸𑀘𑀸𑀬 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀯𑀘𑀻𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀫𑀦𑁂 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯.

‘‘𑀲𑀸𑀫𑀁 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀧𑀭𑁂 𑀯𑀸𑀲𑁆𑀲 [𑀧𑀭𑁂 𑀯𑀸 𑀢𑀲𑁆𑀲 (𑀓.)] 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁. 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀲𑀸𑀫𑀁 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀧𑀭𑁂 𑀯𑀸𑀲𑁆𑀲 𑀢𑀁, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺; 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀲𑀸𑀫𑀁 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀧𑀭𑁂 𑀯𑀸𑀲𑁆𑀲 𑀢𑀁, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁; 𑀅𑀲𑀫𑁆𑀧𑀚𑀸𑀦𑁄 𑀯𑀸 𑀢𑀁, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁.

‘‘𑀇𑀫𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀯𑀺𑀚𑁆𑀚𑀸 𑀅𑀦𑀼𑀧𑀢𑀺𑀢𑀸, 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑁄 𑀓𑀸𑀬𑁄 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁, 𑀲𑀸 𑀯𑀸𑀘𑀸 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁, 𑀲𑁄 𑀫𑀦𑁄 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁, 𑀔𑁂𑀢𑁆𑀢𑀁 𑀢𑀁 [𑀯𑀢𑁆𑀣𑀼𑀁 𑀢𑀁 (𑀲𑀩𑁆𑀩𑀢𑁆𑀣)] 𑀦 𑀳𑁄𑀢𑀺…𑀧𑁂… 𑀯𑀢𑁆𑀣𑀼𑀁 𑀢𑀁 𑀦 𑀳𑁄𑀢𑀺…𑀧𑁂… 𑀆𑀬𑀢𑀦𑀁 𑀢𑀁 𑀦 𑀳𑁄𑀢𑀺…𑀧𑁂… 𑀅𑀥𑀺𑀓𑀭𑀡𑀁 𑀢𑀁 𑀦 𑀳𑁄𑀢𑀺 𑀬𑀁𑀧𑀘𑁆𑀘𑀬𑀸𑀲𑁆𑀲 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀓𑀫𑀢𑀺, 𑀦𑁄 𑀧𑀭𑀲𑀜𑁆𑀘𑁂𑀢𑀦𑀸. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀧𑀭𑀲𑀜𑁆𑀘𑁂𑀢𑀦𑀸 𑀓𑀫𑀢𑀺, 𑀦𑁄 𑀅𑀢𑁆𑀢𑀲𑀜𑁆𑀘𑁂𑀢𑀦𑀸. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀘 𑀓𑀫𑀢𑀺 𑀧𑀭𑀲𑀜𑁆𑀘𑁂𑀢𑀦𑀸 𑀘. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄, 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀦𑁂𑀯𑀢𑁆𑀢𑀲𑀜𑁆𑀘𑁂𑀢𑀦𑀸 𑀓𑀫𑀢𑀺, 𑀦𑁄 𑀧𑀭𑀲𑀜𑁆𑀘𑁂𑀢𑀦𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺 𑁋 ‘𑀢𑀢𑁆𑀭, 𑀪𑀦𑁆𑀢𑁂, 𑀬𑀸𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀓𑀫𑀢𑀺 𑀦𑁄 𑀧𑀭𑀲𑀜𑁆𑀘𑁂𑀢𑀦𑀸, 𑀅𑀢𑁆𑀢𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀺 𑀳𑁄𑀢𑀺. 𑀢𑀢𑁆𑀭, 𑀪𑀦𑁆𑀢𑁂, 𑀬𑀸𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀧𑀭𑀲𑀜𑁆𑀘𑁂𑀢𑀦𑀸 𑀓𑀫𑀢𑀺 𑀦𑁄 𑀅𑀢𑁆𑀢𑀲𑀜𑁆𑀘𑁂𑀢𑀦𑀸, 𑀧𑀭𑀲𑀜𑁆𑀘𑁂𑀢𑀦𑀸𑀳𑁂𑀢𑀼 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀺 𑀳𑁄𑀢𑀺. 𑀢𑀢𑁆𑀭, 𑀪𑀦𑁆𑀢𑁂, 𑀬𑀸𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀘 𑀓𑀫𑀢𑀺 𑀧𑀭𑀲𑀜𑁆𑀘𑁂𑀢𑀦𑀸 𑀘, 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀘 𑀧𑀭𑀲𑀜𑁆𑀘𑁂𑀢𑀦𑀸 𑀘 𑀳𑁂𑀢𑀼 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀺 𑀳𑁄𑀢𑀺. 𑀢𑀢𑁆𑀭, 𑀪𑀦𑁆𑀢𑁂, 𑀬𑀸𑀬𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁂 𑀦𑁂𑀯 𑀅𑀢𑁆𑀢𑀲𑀜𑁆𑀘𑁂𑀢𑀦𑀸 𑀓𑀫𑀢𑀺 𑀦𑁄 𑀧𑀭𑀲𑀜𑁆𑀘𑁂𑀢𑀦𑀸, 𑀓𑀢𑀫𑁂 𑀢𑁂𑀦 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸’’’𑀢𑀺? ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸, 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀸 𑀢𑁂𑀦 𑀤𑀝𑁆𑀞𑀩𑁆𑀩𑀸’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀆𑀕𑀸𑀫𑀺𑀦𑁄 𑀳𑁄𑀦𑁆𑀢𑀺 𑀆𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢𑀁? 𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀅𑀦𑀸𑀕𑀸𑀫𑀺𑀦𑁄 𑀳𑁄𑀦𑁆𑀢𑀺 𑀅𑀦𑀸𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢’’𑀦𑁆𑀢𑀺? ‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺; 𑀢𑀢𑁆𑀣 𑀞𑀺𑀢𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻 𑀅𑀧𑀭𑀺𑀳𑀻𑀦𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁄 𑀘𑀼𑀢𑁄 𑀆𑀕𑀸𑀫𑀻 𑀳𑁄𑀢𑀺 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁.

‘‘𑀇𑀥 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺; 𑀢𑀢𑁆𑀣 𑀞𑀺𑀢𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀻 𑀅𑀧𑀭𑀺𑀳𑀻𑀦𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁄 𑀘𑀼𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁.

‘‘𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀆𑀕𑀸𑀫𑀺𑀦𑁄 𑀳𑁄𑀦𑁆𑀢𑀺 𑀆𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢𑀁. 𑀅𑀬𑀁 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀅𑀦𑀸𑀕𑀸𑀫𑀺𑀦𑁄 𑀳𑁄𑀦𑁆𑀢𑀺 𑀅𑀦𑀸𑀕𑀦𑁆𑀢𑀸𑀭𑁄 𑀇𑀢𑁆𑀣𑀢𑁆𑀢’’𑀦𑁆𑀢𑀺. 𑀧𑀞𑀫𑀁.

𑁨. 𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑀁

𑁧𑁭𑁨. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀅𑀤𑁆𑀥𑀫𑀸𑀲𑀽𑀧𑀲𑀫𑁆𑀧𑀦𑁆𑀦𑁂𑀦 𑀫𑁂, 𑀆𑀯𑀼𑀲𑁄, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀲𑀘𑁆𑀙𑀺𑀓𑀢𑀸 𑀑𑀥𑀺𑀲𑁄 𑀩𑁆𑀬𑀜𑁆𑀚𑀦𑀲𑁄. 𑀢𑀫𑀳𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀸𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸, 𑀲𑁄 𑀫𑀁 𑀧𑀜𑁆𑀳𑁂𑀦. 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀬𑁄 𑀦𑁄 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄.

‘‘𑀅𑀤𑁆𑀥𑀫𑀸𑀲𑀽𑀧𑀲𑀫𑁆𑀧𑀦𑁆𑀦𑁂𑀦 𑀫𑁂, 𑀆𑀯𑀼𑀲𑁄, 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀲𑀘𑁆𑀙𑀺𑀓𑀢𑀸 𑀑𑀥𑀺𑀲𑁄 𑀩𑁆𑀬𑀜𑁆𑀚𑀦𑀲𑁄. 𑀢𑀫𑀳𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀸𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸, 𑀲𑁄 𑀫𑀁 𑀧𑀜𑁆𑀳𑁂𑀦. 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀬𑁄 𑀦𑁄 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄.

‘‘𑀅𑀤𑁆𑀥𑀫𑀸𑀲𑀽𑀧𑀲𑀫𑁆𑀧𑀦𑁆𑀦𑁂𑀦 𑀫𑁂, 𑀆𑀯𑀼𑀲𑁄, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀘𑁆𑀙𑀺𑀓𑀢𑀸 𑀑𑀥𑀺𑀲𑁄 𑀩𑁆𑀬𑀜𑁆𑀚𑀦𑀲𑁄. 𑀢𑀫𑀳𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀸𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸, 𑀲𑁄 𑀫𑀁 𑀧𑀜𑁆𑀳𑁂𑀦. 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀬𑁄 𑀦𑁄 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄.

‘‘𑀅𑀤𑁆𑀥𑀫𑀸𑀲𑀽𑀧𑀲𑀫𑁆𑀧𑀦𑁆𑀦𑁂𑀦 𑀫𑁂, 𑀆𑀯𑀼𑀲𑁄, 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀲𑀘𑁆𑀙𑀺𑀓𑀢𑀸 𑀑𑀥𑀺𑀲𑁄 𑀩𑁆𑀬𑀜𑁆𑀚𑀦𑀲𑁄. 𑀢𑀫𑀳𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀸𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺. 𑀬𑀲𑁆𑀲 𑀔𑁄 𑀧𑀦𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸, 𑀲𑁄 𑀫𑀁 𑀧𑀜𑁆𑀳𑁂𑀦. 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀬𑁄 𑀦𑁄 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀳𑀸𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁧𑁭𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀬𑀣𑀸 𑀓𑀣𑀁 𑀧𑀦, 𑀆𑀯𑀼𑀲𑁄, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. 𑀬𑀸𑀯𑀢𑀸, 𑀆𑀯𑀼𑀲𑁄, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀢𑀺 𑀢𑀸𑀯𑀢𑀸 𑀧𑀧𑀜𑁆𑀘𑀲𑁆𑀲 𑀕𑀢𑀺; 𑀬𑀸𑀯𑀢𑀸 𑀧𑀧𑀜𑁆𑀘𑀲𑁆𑀲 𑀕𑀢𑀺 𑀢𑀸𑀯𑀢𑀸 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀢𑀺. 𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀧𑀧𑀜𑁆𑀘𑀦𑀺𑀭𑁄𑀥𑁄 𑀧𑀧𑀜𑁆𑀘𑀯𑀽𑀧𑀲𑀫𑁄’’𑀢𑀺. 𑀢𑀢𑀺𑀬𑀁.

𑁪. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁧𑁭𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑁄𑀝𑁆𑀞𑀺𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘 𑁋

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’’𑀢𑀺?

‘‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’’.

‘‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀫𑀸 𑀳𑁂𑀯𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀬𑀣𑀸 𑀓𑀣𑀁 𑀧𑀦𑀸𑀯𑀼𑀲𑁄, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺?

‘‘‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀅𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. ‘𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀜𑁆𑀜𑀁 𑀓𑀺𑀜𑁆𑀘𑀻’𑀢𑀺, 𑀇𑀢𑀺 𑀯𑀤𑀁 𑀅𑀧𑁆𑀧𑀧𑀜𑁆𑀘𑀁 𑀧𑀧𑀜𑁆𑀘𑁂𑀢𑀺. 𑀬𑀸𑀯𑀢𑀸, 𑀆𑀯𑀼𑀲𑁄, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀢𑀺 𑀢𑀸𑀯𑀢𑀸 𑀧𑀧𑀜𑁆𑀘𑀲𑁆𑀲 𑀕𑀢𑀺. 𑀬𑀸𑀯𑀢𑀸 𑀧𑀧𑀜𑁆𑀘𑀲𑁆𑀲 𑀕𑀢𑀺 𑀢𑀸𑀯𑀢𑀸 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀢𑀺. 𑀙𑀦𑁆𑀦𑀁, 𑀆𑀯𑀼𑀲𑁄, 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀧𑀧𑀜𑁆𑀘𑀦𑀺𑀭𑁄𑀥𑁄 𑀧𑀧𑀜𑁆𑀘𑀯𑀽𑀧𑀲𑀫𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀧𑀯𑀸𑀡𑀲𑀼𑀢𑁆𑀢𑀁

𑁧𑁭𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀸𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑁆𑀭 𑀯𑀺𑀚𑁆𑀚𑀸𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺?

‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀳𑁄𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀸𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑁆𑀭 𑀯𑀺𑀚𑁆𑀚𑀸𑀘𑀭𑀡𑁂𑀦𑀦𑁆𑀢𑀓𑀭𑁄 𑀳𑁄𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀬𑀣𑀸 𑀓𑀣𑀁 𑀧𑀦𑀸𑀯𑀼𑀲𑁄, 𑀅𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺?

‘‘𑀯𑀺𑀚𑁆𑀚𑀸𑀬 𑀘𑁂, 𑀆𑀯𑀼𑀲𑁄, 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲, 𑀲𑀉𑀧𑀸𑀤𑀸𑀦𑁄𑀯 𑀲𑀫𑀸𑀦𑁄 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲. 𑀘𑀭𑀡𑁂𑀦 𑀘𑁂, 𑀆𑀯𑀼𑀲𑁄, 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲, 𑀲𑀉𑀧𑀸𑀤𑀸𑀦𑁄𑀯 𑀲𑀫𑀸𑀦𑁄 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲. 𑀯𑀺𑀚𑁆𑀚𑀸𑀘𑀭𑀡𑁂𑀦 𑀘𑁂, 𑀆𑀯𑀼𑀲𑁄, 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲, 𑀲𑀉𑀧𑀸𑀤𑀸𑀦𑁄𑀯 𑀲𑀫𑀸𑀦𑁄 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲. 𑀅𑀜𑁆𑀜𑀢𑁆𑀭 𑀯𑀺𑀚𑁆𑀚𑀸𑀘𑀭𑀡𑁂𑀦 𑀘𑁂, 𑀆𑀯𑀼𑀲𑁄, 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲, 𑀧𑀼𑀣𑀼𑀚𑁆𑀚𑀦𑁄 𑀅𑀦𑁆𑀢𑀓𑀭𑁄 𑀅𑀪𑀯𑀺𑀲𑁆𑀲. 𑀧𑀼𑀣𑀼𑀚𑁆𑀚𑀦𑁄 𑀳𑀺, 𑀆𑀯𑀼𑀲𑁄, 𑀅𑀜𑁆𑀜𑀢𑁆𑀭 𑀯𑀺𑀚𑁆𑀚𑀸𑀘𑀭𑀡𑁂𑀦. 𑀘𑀭𑀡𑀯𑀺𑀧𑀦𑁆𑀦𑁄 𑀔𑁄, 𑀆𑀯𑀼𑀲𑁄, 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺. 𑀘𑀭𑀡𑀲𑀫𑁆𑀧𑀦𑁆𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀬𑀣𑀸𑀪𑀽𑀢𑀁 𑀚𑀸𑀦𑀁 𑀧𑀲𑁆𑀲𑀁 𑀅𑀦𑁆𑀢𑀓𑀭𑁄 𑀳𑁄𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀆𑀬𑀸𑀘𑀦𑀲𑀼𑀢𑁆𑀢𑀁

𑁧𑁭𑁬. ‘‘𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄 𑀳𑁄𑀫𑀺 𑀬𑀸𑀤𑀺𑀲𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’𑀢𑀺 [𑀅. 𑀦𑀺. 𑁨.𑁧𑁩𑁧 𑀇𑀤𑀁 𑀲𑀼𑀢𑁆𑀢𑀁 𑀆𑀕𑀢𑀁]. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸.

‘‘𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑀸 𑀳𑁄𑀫𑀺 𑀬𑀸𑀤𑀺𑀲𑀸 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘𑀸’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀬𑀤𑀺𑀤𑀁 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘.

‘‘𑀲𑀤𑁆𑀥𑁄, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑁄 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑁄 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑁄 𑀳𑁄𑀫𑀺 𑀬𑀸𑀤𑀺𑀲𑁄 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁, 𑀬𑀤𑀺𑀤𑀁 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄.

‘‘𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 𑁋 ‘𑀢𑀸𑀤𑀺𑀲𑀸 𑀳𑁄𑀫𑀺 𑀬𑀸𑀤𑀺𑀲𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’𑀢𑀺. 𑀏𑀲𑀸, 𑀪𑀺𑀓𑁆𑀔𑀯𑁂, 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’’𑀢𑀺. 𑀙𑀝𑁆𑀞𑀁.

𑁭. 𑀭𑀸𑀳𑀼𑀮𑀲𑀼𑀢𑁆𑀢𑀁

𑁧𑁭𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸 𑀘, 𑀭𑀸𑀳𑀼𑀮, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀬𑀸 𑀘 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸. ‘𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀣𑀯𑀻𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀧𑀣𑀯𑀻𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺.

‘‘𑀬𑀸 𑀘, 𑀭𑀸𑀳𑀼𑀮, 𑀅𑀚𑁆𑀛𑀢𑁆𑀢𑀺𑀓𑀸 𑀆𑀧𑁄𑀥𑀸𑀢𑀼 𑀬𑀸 𑀘 𑀩𑀸𑀳𑀺𑀭𑀸 𑀆𑀧𑁄𑀥𑀸𑀢𑀼, 𑀆𑀧𑁄𑀥𑀸𑀢𑀼𑀭𑁂𑀯𑁂𑀲𑀸. ‘𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀆𑀧𑁄𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀆𑀧𑁄𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺.

‘‘𑀬𑀸 𑀘, 𑀭𑀸𑀳𑀼𑀮, 𑀅𑀚𑁆𑀛𑀢𑁆𑀢𑀺𑀓𑀸 𑀢𑁂𑀚𑁄𑀥𑀸𑀢𑀼 𑀬𑀸 𑀘 𑀩𑀸𑀳𑀺𑀭𑀸 𑀢𑁂𑀚𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼𑀭𑁂𑀯𑁂𑀲𑀸. ‘𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀢𑁂𑀚𑁄𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀢𑁂𑀚𑁄𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺.

‘‘𑀬𑀸 𑀘, 𑀭𑀸𑀳𑀼𑀮, 𑀅𑀚𑁆𑀛𑀢𑁆𑀢𑀺𑀓𑀸 𑀯𑀸𑀬𑁄𑀥𑀸𑀢𑀼 𑀬𑀸 𑀘 𑀩𑀸𑀳𑀺𑀭𑀸 𑀯𑀸𑀬𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼𑀭𑁂𑀯𑁂𑀲𑀸. ‘𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺, 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀯𑀸𑀬𑁄𑀥𑀸𑀢𑀼𑀬𑀸 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀸𑀬𑁄𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺.

‘‘𑀬𑀢𑁄 𑀔𑁄, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀇𑀫𑀸𑀲𑀼 𑀘𑀢𑀽𑀲𑀼 𑀥𑀸𑀢𑀽𑀲𑀼 𑀦𑁂𑀯𑀢𑁆𑀢𑀸𑀦𑀁 𑀦 𑀅𑀢𑁆𑀢𑀦𑀺𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀚𑀫𑁆𑀩𑀸𑀮𑀻𑀲𑀼𑀢𑁆𑀢𑀁

𑁧𑁭𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁 [𑀢𑀲𑁆𑀲 𑀓𑁄 𑀏𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀏𑀯𑀁 𑀔𑁄 𑀢𑀲𑁆𑀲 (?) ‘‘𑀏𑀯𑀁 𑀳𑀺 𑀢𑀲𑁆𑀲𑀸 𑀪𑀺𑀓𑁆𑀔𑀯𑁂 𑀚𑀫𑁆𑀩𑀸𑀮𑀺𑀬𑀸’’𑀢𑀺 𑀧𑀸𑀞𑁄 𑀯𑀺𑀬], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀦 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀧𑀸𑀝𑀺𑀓𑀗𑁆𑀔𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀮𑁂𑀧𑀕𑀢𑁂𑀦 [𑀮𑀲𑀕𑀢𑁂𑀦 (𑀲𑀻. 𑀧𑀻.)] 𑀳𑀢𑁆𑀣𑁂𑀦 𑀲𑀸𑀔𑀁 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀲 𑀲𑁄 𑀳𑀢𑁆𑀣𑁄 𑀲𑀚𑁆𑀚𑁂𑀬𑁆𑀬𑀧𑀺 𑀕𑀡𑁆𑀳𑁂𑀬𑁆𑀬𑀧𑀺 [𑀕𑀬𑁆𑀳𑁂𑀬𑁆𑀬𑀧𑀺 (?)] 𑀩𑀚𑁆𑀛𑁂𑀬𑁆𑀬𑀧𑀺 [𑀔𑀚𑁆𑀚𑁂𑀬𑁆𑀬𑀧𑀺 (𑀲𑀻.)]; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀦 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀧𑀸𑀝𑀺𑀓𑀗𑁆𑀔𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀲𑀼𑀤𑁆𑀥𑁂𑀦 𑀳𑀢𑁆𑀣𑁂𑀦 𑀲𑀸𑀔𑀁 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀲 𑀲𑁄 𑀳𑀢𑁆𑀣𑁄 𑀦𑁂𑀯 𑀲𑀚𑁆𑀚𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀩𑀚𑁆𑀛𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀲𑀓𑁆𑀓𑀸𑀬𑀦𑀺𑀭𑁄𑀥𑀁 𑀫𑀦𑀲𑀺 𑀓𑀭𑁄𑀢𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀓𑁆𑀓𑀸𑀬𑀦𑀺𑀭𑁄𑀥𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀦 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀚𑀫𑁆𑀩𑀸𑀮𑀻 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸. 𑀢𑀲𑁆𑀲𑀸 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬, 𑀤𑁂𑀯𑁄 𑀘 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲𑀸, 𑀪𑀺𑀓𑁆𑀔𑀯𑁂, 𑀚𑀫𑁆𑀩𑀸𑀮𑀺𑀬𑀸 𑀦 𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦𑀧𑁆𑀧𑀲𑀻𑀤𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀦 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀚𑀫𑁆𑀩𑀸𑀮𑀻 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑀸. 𑀢𑀲𑁆𑀲𑀸 𑀧𑀼𑀭𑀺𑀲𑁄 𑀬𑀸𑀦𑀺 𑀘𑁂𑀯 𑀆𑀬𑀫𑀼𑀔𑀸𑀦𑀺 𑀢𑀸𑀦𑀺 𑀯𑀺𑀯𑀭𑁂𑀬𑁆𑀬, 𑀬𑀸𑀦𑀺 𑀘 𑀅𑀧𑀸𑀬𑀫𑀼𑀔𑀸𑀦𑀺 𑀢𑀸𑀦𑀺 𑀧𑀺𑀤𑀳𑁂𑀬𑁆𑀬, 𑀤𑁂𑀯𑁄 𑀘 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀜𑁆𑀳𑀺 𑀢𑀲𑁆𑀲𑀸, 𑀪𑀺𑀓𑁆𑀔𑀯𑁂, 𑀚𑀫𑁆𑀩𑀸𑀮𑀺𑀬𑀸 𑀆𑀴𑀺𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀲𑀦𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑀁 𑀫𑀦𑀲𑀺 𑀓𑀭𑁄𑀢𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀢𑀲𑁆𑀲 𑀔𑁄 𑀏𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸𑀧𑁆𑀧𑀪𑁂𑀤𑁄 𑀧𑀸𑀝𑀺𑀓𑀗𑁆𑀔𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁

𑁧𑁭𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻’’𑀢𑀺?

‘‘𑀇𑀥𑀸𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀢𑀸 𑀇𑀫𑀸 𑀳𑀸𑀦𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀞𑀺𑀢𑀺𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀯𑀺𑀲𑁂𑀲𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻’’𑀢𑀺.

‘‘𑀓𑁄 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻’’𑀢𑀺? ‘‘𑀇𑀥𑀸𑀯𑀼𑀲𑁄 𑀆𑀦𑀦𑁆𑀤, 𑀲𑀢𑁆𑀢𑀸 𑀇𑀫𑀸 𑀳𑀸𑀦𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀞𑀺𑀢𑀺𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀯𑀺𑀲𑁂𑀲𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀇𑀫𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑀁

𑁧𑁮𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀪𑁄𑀕𑀦𑀕𑀭𑁂 𑀯𑀺𑀳𑀭𑀢𑀺 𑀆𑀦𑀦𑁆𑀤𑀘𑁂𑀢𑀺𑀬𑁂 [𑀆𑀦𑀦𑁆𑀤𑁂 𑀘𑁂𑀢𑀺𑀬𑁂 (𑀤𑀻. 𑀦𑀺. 𑁨.𑁧𑁮𑁬) 𑀫𑀳𑀸𑀯. 𑁩𑁦𑁩 𑀧𑀦 𑀅𑀜𑁆𑀜𑀣𑀸 𑀆𑀕𑀢𑀁]. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀤𑁂𑀲𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁂, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺 [𑀑𑀲𑀸𑀭𑁂𑀢𑀩𑁆𑀩𑀸𑀦𑀺], 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 [𑀑𑀲𑀸𑀭𑀺𑀬𑀫𑀸𑀦𑀸𑀦𑀺] 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀺 [𑀑𑀲𑀭𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁮𑁮)] 𑀦 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺 𑀳𑁂𑀢𑀁 [𑀇𑀢𑀺 𑀳𑀺𑀤𑀁 (𑀲𑀻. 𑀲𑁆𑀬𑀸. 𑀓𑀁. 𑀓.)], 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣.

[𑀏𑀢𑁆𑀢𑀓𑁄 𑀧𑀸𑀞𑁄 𑀤𑀻𑀖𑀦𑀺𑀓𑀸𑀬𑁂 𑀦 𑀤𑀺𑀲𑁆𑀲𑀢𑀺, 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀤𑀲𑁆𑀲𑀺𑀢𑁄 𑀪𑀯𑁂𑀬𑁆𑀬] ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺 [𑀏𑀢𑁆𑀢𑀓𑁄 𑀧𑀸𑀞𑁄 𑀤𑀻𑀖𑀦𑀺𑀓𑀸𑀬𑁂 𑀦 𑀤𑀺𑀲𑁆𑀲𑀢𑀺, 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀤𑀲𑁆𑀲𑀺𑀢𑁄 𑀪𑀯𑁂𑀬𑁆𑀬]. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 𑀑𑀢𑀭𑀦𑁆𑀢𑀺 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀗𑁆𑀖𑁄 𑀯𑀺𑀳𑀭𑀢𑀺 𑀲𑀣𑁂𑀭𑁄 𑀲𑀧𑀸𑀫𑁄𑀓𑁆𑀔𑁄. 𑀢𑀲𑁆𑀲 𑀫𑁂 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀺 𑀦 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀗𑁆𑀖𑁄 𑀯𑀺𑀳𑀭𑀢𑀺 𑀲𑀣𑁂𑀭𑁄 𑀲𑀧𑀸𑀫𑁄𑀓𑁆𑀔𑁄. 𑀢𑀲𑁆𑀲 𑀫𑁂 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 𑀑𑀢𑀭𑀦𑁆𑀢𑀺 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸. 𑀢𑁂𑀲𑀁 𑀫𑁂 𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀺 𑀦 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸. 𑀢𑁂𑀲𑀁 𑀫𑁂 𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 𑀑𑀢𑀭𑀦𑁆𑀢𑀺 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀏𑀓𑁄 𑀣𑁂𑀭𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄. 𑀢𑀲𑁆𑀲 𑀫𑁂 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀺 𑀦 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑀲𑁆𑀲 𑀘 𑀣𑁂𑀭𑀲𑁆𑀲 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀏𑀓𑁄 𑀣𑁂𑀭𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄. 𑀢𑀲𑁆𑀲 𑀫𑁂 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀢𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 𑀑𑀢𑀭𑀦𑁆𑀢𑀺 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲; 𑀢𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺. 𑀤𑀲𑀫𑀁.

𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.