(𑁭) 𑁨. 𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑁄

𑁧. 𑀧𑀢𑁆𑀢𑀓𑀫𑁆𑀫𑀲𑀼𑀢𑁆𑀢𑀁

𑁬𑁧. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀺, 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀪𑁄𑀕𑀸 𑀫𑁂 𑀉𑀧𑁆𑀧𑀚𑁆𑀚𑀦𑁆𑀢𑀼 𑀲𑀳𑀥𑀫𑁆𑀫𑁂𑀦𑀸𑀢𑀺, 𑀅𑀬𑀁 𑀧𑀞𑀫𑁄 𑀥𑀫𑁆𑀫𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁.

‘‘𑀪𑁄𑀕𑁂 𑀮𑀤𑁆𑀥𑀸 𑀲𑀳𑀥𑀫𑁆𑀫𑁂𑀦 𑀬𑀲𑁄 𑀫𑁂 𑀆𑀕𑀘𑁆𑀙𑀢𑀼 𑀲𑀳 𑀜𑀸𑀢𑀻𑀳𑀺 𑀲𑀳 𑀉𑀧𑀚𑁆𑀛𑀸𑀬𑁂𑀳𑀻𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁.

‘‘𑀪𑁄𑀕𑁂 𑀮𑀤𑁆𑀥𑀸 𑀲𑀳𑀥𑀫𑁆𑀫𑁂𑀦 𑀬𑀲𑀁 𑀮𑀤𑁆𑀥𑀸 𑀲𑀳 𑀜𑀸𑀢𑀻𑀳𑀺 𑀲𑀳 𑀉𑀧𑀚𑁆𑀛𑀸𑀬𑁂𑀳𑀺 𑀘𑀺𑀭𑀁 𑀚𑀻𑀯𑀸𑀫𑀺 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀫𑀻𑀢𑀺, 𑀅𑀬𑀁 𑀢𑀢𑀺𑀬𑁄 𑀥𑀫𑁆𑀫𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁.

‘‘𑀪𑁄𑀕𑁂 𑀮𑀤𑁆𑀥𑀸 𑀲𑀳𑀥𑀫𑁆𑀫𑁂𑀦 𑀬𑀲𑀁 𑀮𑀤𑁆𑀥𑀸 𑀲𑀳 𑀜𑀸𑀢𑀻𑀳𑀺 𑀲𑀳 𑀉𑀧𑀚𑁆𑀛𑀸𑀬𑁂𑀳𑀺 𑀘𑀺𑀭𑀁 𑀚𑀻𑀯𑀺𑀢𑁆𑀯𑀸 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀸𑀫𑀻𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁. 𑀇𑀫𑁂 𑀔𑁄, 𑀕𑀳𑀧𑀢𑀺, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁.

‘‘𑀇𑀫𑁂𑀲𑀁 𑀔𑁄, 𑀕𑀳𑀧𑀢𑀺, 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀤𑁆𑀥𑀸𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀘𑀸𑀕𑀲𑀫𑁆𑀧𑀤𑀸, 𑀧𑀜𑁆𑀜𑀸𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀸? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺, 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀲𑀻𑀮𑀲𑀫𑁆𑀧𑀤𑀸? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀲𑀻𑀮𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀘𑀸𑀕𑀲𑀫𑁆𑀧𑀤𑀸? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀘𑀸𑀕𑀲𑀫𑁆𑀧𑀤𑀸.

‘‘𑀓𑀢𑀫𑀸 𑀘, 𑀕𑀳𑀧𑀢𑀺, 𑀧𑀜𑁆𑀜𑀸𑀲𑀫𑁆𑀧𑀤𑀸? 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑁂𑀦, 𑀕𑀳𑀧𑀢𑀺, 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀺. 𑀅𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀦𑁆𑀢𑁄 𑀬𑀲𑀸 𑀘 𑀲𑀼𑀔𑀸 𑀘 𑀥𑀁𑀲𑀢𑀺. 𑀩𑁆𑀬𑀸𑀧𑀸𑀤𑀸𑀪𑀺𑀪𑀽𑀢𑁂𑀦, 𑀕𑀳𑀧𑀢𑀺, 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀺. 𑀅𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀦𑁆𑀢𑁄 𑀬𑀲𑀸 𑀘 𑀲𑀼𑀔𑀸 𑀘 𑀥𑀁𑀲𑀢𑀺. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁂𑀦, 𑀕𑀳𑀧𑀢𑀺, 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀺. 𑀅𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀦𑁆𑀢𑁄 𑀬𑀲𑀸 𑀘 𑀲𑀼𑀔𑀸 𑀘 𑀥𑀁𑀲𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀪𑀺𑀪𑀽𑀢𑁂𑀦, 𑀕𑀳𑀧𑀢𑀺, 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀺. 𑀅𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀦𑁆𑀢𑁄 𑀬𑀲𑀸 𑀘 𑀲𑀼𑀔𑀸 𑀘 𑀥𑀁𑀲𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀪𑀺𑀪𑀽𑀢𑁂𑀦, 𑀕𑀳𑀧𑀢𑀺, 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀢𑀺. 𑀅𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀓𑀺𑀘𑁆𑀘𑀁 𑀅𑀧𑀭𑀸𑀥𑁂𑀦𑁆𑀢𑁄 𑀬𑀲𑀸 𑀘 𑀲𑀼𑀔𑀸 𑀘 𑀥𑀁𑀲𑀢𑀺.

‘‘𑀲 𑀔𑁄 𑀲𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀺. 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀩𑁆𑀬𑀸𑀧𑀸𑀤𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀧𑀚𑀳𑀢𑀺.

‘‘𑀬𑀢𑁄 𑀘 𑀔𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺. 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺, 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄 𑀧𑀳𑀻𑀦𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀆𑀧𑀸𑀢𑀤𑀲𑁄 [𑀆𑀧𑀸𑀣𑀤𑀲𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 [𑀳𑀸𑀲𑀧𑀜𑁆𑀜𑁄 (𑀓.)]. 𑀅𑀬𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀇𑀫𑁂𑀲𑀁 𑀔𑁄, 𑀕𑀳𑀧𑀢𑀺, 𑀘𑀢𑀼𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀲 𑀔𑁄 𑀲𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀘𑀢𑁆𑀢𑀸𑀭𑀺 𑀧𑀢𑁆𑀢𑀓𑀫𑁆𑀫𑀸𑀦𑀺 𑀓𑀢𑁆𑀢𑀸 𑀳𑁄𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀭𑀢𑀺. 𑀇𑀤𑀫𑀲𑁆𑀲 𑀧𑀞𑀫𑀁 𑀞𑀸𑀦𑀕𑀢𑀁 𑀳𑁄𑀢𑀺 𑀧𑀢𑁆𑀢𑀕𑀢𑀁 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀁.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀬𑀸 𑀢𑀸 𑀳𑁄𑀦𑁆𑀢𑀺 𑀆𑀧𑀤𑀸 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀅𑀧𑁆𑀧𑀺𑀬𑀢𑁄 𑀯𑀸 𑀤𑀸𑀬𑀸𑀤𑀢𑁄 [𑀅. 𑀦𑀺. 𑁫.𑁪𑁧], 𑀢𑀣𑀸𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀭𑀺𑀬𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁄𑀢𑁆𑀣𑀺𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺. 𑀇𑀤𑀫𑀲𑁆𑀲 𑀤𑀼𑀢𑀺𑀬𑀁 𑀞𑀸𑀦𑀕𑀢𑀁 𑀳𑁄𑀢𑀺 𑀧𑀢𑁆𑀢𑀕𑀢𑀁 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀁.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀧𑀜𑁆𑀘𑀩𑀮𑀺𑀁 𑀓𑀢𑁆𑀢𑀸 𑀳𑁄𑀢𑀺 𑁋 𑀜𑀸𑀢𑀺𑀩𑀮𑀺𑀁, 𑀅𑀢𑀺𑀣𑀺𑀩𑀮𑀺𑀁, 𑀧𑀼𑀩𑁆𑀩𑀧𑁂𑀢𑀩𑀮𑀺𑀁, 𑀭𑀸𑀚𑀩𑀮𑀺𑀁, 𑀤𑁂𑀯𑀢𑀸𑀩𑀮𑀺𑀁. 𑀇𑀤𑀫𑀲𑁆𑀲 𑀢𑀢𑀺𑀬𑀁 𑀞𑀸𑀦𑀕𑀢𑀁 𑀳𑁄𑀢𑀺 𑀧𑀢𑁆𑀢𑀕𑀢𑀁 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀁.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀤𑀧𑁆𑀧𑀫𑀸𑀤𑀸 𑀧𑀝𑀺𑀯𑀺𑀭𑀢𑀸 𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀲𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀇𑀤𑀫𑀲𑁆𑀲 𑀘𑀢𑀼𑀢𑁆𑀣𑀁 𑀞𑀸𑀦𑀕𑀢𑀁 𑀳𑁄𑀢𑀺 𑀧𑀢𑁆𑀢𑀕𑀢𑀁 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀁.

‘‘𑀲 𑀔𑁄 𑀲𑁄, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀢𑁆𑀢𑀓𑀫𑁆𑀫𑀸𑀦𑀺 𑀓𑀢𑁆𑀢𑀸 𑀳𑁄𑀢𑀺. 𑀬𑀲𑁆𑀲 𑀓𑀲𑁆𑀲𑀘𑀺, 𑀕𑀳𑀧𑀢𑀺, 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀢𑁆𑀢𑀓𑀫𑁆𑀫𑁂𑀳𑀺 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀕𑀳𑀧𑀢𑀺, 𑀪𑁄𑀕𑀸 𑀅𑀝𑁆𑀞𑀸𑀦𑀕𑀢𑀸 𑀅𑀧𑀢𑁆𑀢𑀕𑀢𑀸 𑀅𑀦𑀸𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀸. 𑀬𑀲𑁆𑀲 𑀓𑀲𑁆𑀲𑀘𑀺, 𑀕𑀳𑀧𑀢𑀺, 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀢𑁆𑀢𑀓𑀫𑁆𑀫𑁂𑀳𑀺 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀕𑀳𑀧𑀢𑀺, 𑀪𑁄𑀕𑀸 𑀞𑀸𑀦𑀕𑀢𑀸 𑀧𑀢𑁆𑀢𑀕𑀢𑀸 𑀆𑀬𑀢𑀦𑀲𑁄 𑀧𑀭𑀺𑀪𑀼𑀢𑁆𑀢𑀸’’𑀢𑀺.

‘‘𑀪𑀼𑀢𑁆𑀢𑀸 𑀪𑁄𑀕𑀸 𑀪𑀢𑀸 𑀪𑀘𑁆𑀘𑀸 [𑀕𑀢𑀸 𑀪𑀽𑀢𑀸 (𑀓.) 𑀪𑀝𑀸 𑀪𑀘𑁆𑀘𑀸 (𑀲𑁆𑀬𑀸. 𑀓𑀁.)], 𑀯𑀺𑀢𑀺𑀡𑁆𑀡𑀸 𑀆𑀧𑀤𑀸𑀲𑀼 𑀫𑁂;

𑀉𑀤𑁆𑀥𑀕𑁆𑀕𑀸 𑀤𑀓𑁆𑀔𑀺𑀡𑀸 𑀤𑀺𑀦𑁆𑀦𑀸, 𑀅𑀣𑁄 𑀧𑀜𑁆𑀘𑀩𑀮𑀻 𑀓𑀢𑀸;

𑀉𑀧𑀝𑁆𑀞𑀺𑀢𑀸 𑀲𑀻𑀮𑀯𑀦𑁆𑀢𑁄, 𑀲𑀜𑁆𑀜𑀢𑀸 𑀩𑁆𑀭𑀳𑁆𑀫𑀘𑀸𑀭𑀬𑁄.

‘‘𑀬𑀤𑀢𑁆𑀣𑀁 𑀪𑁄𑀕𑀁 𑀇𑀘𑁆𑀙𑁂𑀬𑁆𑀬, 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀅𑀦𑀦𑀼𑀢𑀸𑀧𑀺𑀬𑀁.

‘‘𑀏𑀢𑀁 [𑀏𑀯𑀁 (𑀓.)] 𑀅𑀦𑀼𑀲𑁆𑀲𑀭𑀁 𑀫𑀘𑁆𑀘𑁄, 𑀅𑀭𑀺𑀬𑀥𑀫𑁆𑀫𑁂 𑀞𑀺𑀢𑁄 𑀦𑀭𑁄;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. 𑀧𑀞𑀫𑀁;

𑁨. 𑀆𑀦𑀡𑁆𑀬𑀲𑀼𑀢𑁆𑀢𑀁

𑁬𑁨. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀕𑀳𑀧𑀢𑀺, 𑀲𑀼𑀔𑀸𑀦𑀺 𑀅𑀥𑀺𑀕𑀫𑀦𑀻𑀬𑀸𑀦𑀺 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀬𑁂𑀦 𑀲𑀫𑀬𑀁 𑀉𑀧𑀸𑀤𑀸𑀬. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀢𑁆𑀣𑀺𑀲𑀼𑀔𑀁, 𑀪𑁄𑀕𑀲𑀼𑀔𑀁, 𑀆𑀦𑀡𑁆𑀬𑀲𑀼𑀔𑀁 [𑀅𑀡𑀡𑀲𑀼𑀔𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀅𑀦𑀯𑀚𑁆𑀚𑀲𑀼𑀔𑀁.

‘‘𑀓𑀢𑀫𑀜𑁆𑀘, 𑀕𑀳𑀧𑀢𑀺, 𑀅𑀢𑁆𑀣𑀺𑀲𑀼𑀔𑀁? 𑀇𑀥, 𑀕𑀳𑀧𑀢𑀺, 𑀓𑀼𑀮𑀧𑀼𑀢𑁆𑀢𑀲𑁆𑀲 𑀪𑁄𑀕𑀸 𑀳𑁄𑀦𑁆𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸. 𑀲𑁄 ‘𑀪𑁄𑀕𑀸 𑀫𑁂 𑀅𑀢𑁆𑀣𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀸 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑀸 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸’𑀢𑀺 𑀅𑀥𑀺𑀕𑀘𑁆𑀙𑀢𑀺 𑀲𑀼𑀔𑀁, 𑀅𑀥𑀺𑀕𑀘𑁆𑀙𑀢𑀺 𑀲𑁄𑀫𑀦𑀲𑁆𑀲𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀅𑀢𑁆𑀣𑀺𑀲𑀼𑀔𑀁.

‘‘𑀓𑀢𑀫𑀜𑁆𑀘, 𑀕𑀳𑀧𑀢𑀺, 𑀪𑁄𑀕𑀲𑀼𑀔𑀁? 𑀇𑀥, 𑀕𑀳𑀧𑀢𑀺, 𑀓𑀼𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀧𑀭𑀺𑀪𑀼𑀜𑁆𑀚𑀢𑀺 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀢𑀺. 𑀲𑁄 ‘𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑁂𑀳𑀺 𑀪𑁄𑀕𑁂𑀳𑀺 𑀩𑀸𑀳𑀸𑀩𑀮𑀧𑀭𑀺𑀘𑀺𑀢𑁂𑀳𑀺 𑀲𑁂𑀤𑀸𑀯𑀓𑁆𑀔𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑁂𑀳𑀺 𑀥𑀫𑁆𑀫𑀮𑀤𑁆𑀥𑁂𑀳𑀺 𑀧𑀭𑀺𑀪𑀼𑀜𑁆𑀚𑀸𑀫𑀺 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀫𑀻’𑀢𑀺 𑀅𑀥𑀺𑀕𑀘𑁆𑀙𑀢𑀺 𑀲𑀼𑀔𑀁, 𑀅𑀥𑀺𑀕𑀘𑁆𑀙𑀢𑀺 𑀲𑁄𑀫𑀦𑀲𑁆𑀲𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀪𑁄𑀕𑀲𑀼𑀔𑀁.

‘‘𑀓𑀢𑀫𑀜𑁆𑀘, 𑀕𑀳𑀧𑀢𑀺, 𑀆𑀦𑀡𑁆𑀬𑀲𑀼𑀔𑀁? 𑀇𑀥, 𑀕𑀳𑀧𑀢𑀺, 𑀓𑀼𑀮𑀧𑀼𑀢𑁆𑀢𑁄 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀥𑀸𑀭𑁂𑀢𑀺 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸. 𑀲𑁄 ‘𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀥𑀸𑀭𑁂𑀫𑀺 [𑀓𑀺𑀜𑁆𑀘𑀺 𑀯𑀸 𑀤𑁂𑀢𑀺 (𑀓.)] 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸’𑀢𑀺 𑀅𑀥𑀺𑀕𑀘𑁆𑀙𑀢𑀺 𑀲𑀼𑀔𑀁, 𑀅𑀥𑀺𑀕𑀘𑁆𑀙𑀢𑀺 𑀲𑁄𑀫𑀦𑀲𑁆𑀲𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀆𑀦𑀡𑁆𑀬𑀲𑀼𑀔𑀁.

‘‘𑀓𑀢𑀫𑀜𑁆𑀘, 𑀕𑀳𑀧𑀢𑀺, 𑀅𑀦𑀯𑀚𑁆𑀚𑀲𑀼𑀔𑀁? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀅𑀦𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀲𑁄 ‘𑀅𑀦𑀯𑀚𑁆𑀚𑁂𑀦𑀫𑁆𑀳𑀺 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀦𑀯𑀚𑁆𑀚𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀦𑀯𑀚𑁆𑀚𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄’𑀢𑀺 𑀅𑀥𑀺𑀕𑀘𑁆𑀙𑀢𑀺 𑀲𑀼𑀔𑀁, 𑀅𑀥𑀺𑀕𑀘𑁆𑀙𑀢𑀺 𑀲𑁄𑀫𑀦𑀲𑁆𑀲𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀺, 𑀅𑀦𑀯𑀚𑁆𑀚𑀲𑀼𑀔𑀁. 𑀇𑀫𑀸𑀦𑀺 𑀔𑁄, 𑀕𑀳𑀧𑀢𑀺, 𑀘𑀢𑁆𑀢𑀸𑀭𑀺 𑀲𑀼𑀔𑀸𑀦𑀺 𑀅𑀥𑀺𑀕𑀫𑀦𑀻𑀬𑀸𑀦𑀺 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀬𑁂𑀦 𑀲𑀫𑀬𑀁 𑀉𑀧𑀸𑀤𑀸𑀬𑀸’’𑀢𑀺.

‘‘𑀆𑀦𑀡𑁆𑀬𑀲𑀼𑀔𑀁 𑀜𑀢𑁆𑀯𑀸𑀦, 𑀅𑀣𑁄 𑀅𑀢𑁆𑀣𑀺𑀲𑀼𑀔𑀁 𑀧𑀭𑀁;

𑀪𑀼𑀜𑁆𑀚𑀁 𑀪𑁄𑀕𑀲𑀼𑀔𑀁 𑀫𑀘𑁆𑀘𑁄, 𑀢𑀢𑁄 𑀧𑀜𑁆𑀜𑀸 𑀯𑀺𑀧𑀲𑁆𑀲𑀢𑀺.

‘‘𑀯𑀺𑀧𑀲𑁆𑀲𑀫𑀸𑀦𑁄 𑀚𑀸𑀦𑀸𑀢𑀺, 𑀉𑀪𑁄 𑀪𑁄𑀕𑁂 𑀲𑀼𑀫𑁂𑀥𑀲𑁄;

𑀅𑀦𑀯𑀚𑁆𑀚𑀲𑀼𑀔𑀲𑁆𑀲𑁂𑀢𑀁, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺. 𑀤𑀼𑀢𑀺𑀬𑀁;

𑁩. 𑀩𑁆𑀭𑀳𑁆𑀫𑀲𑀼𑀢𑁆𑀢𑀁

𑁬𑁩. ‘‘𑀲𑀩𑁆𑀭𑀳𑁆𑀫𑀓𑀸𑀦𑀺, 𑀪𑀺𑀓𑁆𑀔𑀯𑁂 [𑀇𑀢𑀺𑀯𑀼. 𑁧𑁦𑁬], 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺, 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀧𑀼𑀩𑁆𑀩𑀤𑁂𑀯𑀢𑀸𑀦𑀺 [𑀲𑀧𑀼𑀩𑁆𑀩𑀤𑁂𑀯𑀸𑀦𑀺 (𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀸𑀳𑀼𑀦𑁂𑀬𑁆𑀬𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺.

‘‘𑀩𑁆𑀭𑀳𑁆𑀫𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 [𑀫𑀸𑀢𑀸𑀧𑀺𑀢𑀼𑀦𑁆𑀦𑀁 (𑀲𑀻. 𑀧𑀻.)] 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀩𑁆𑀩𑀤𑁂𑀯𑀢𑀸𑀢𑀺 [𑀧𑀼𑀩𑁆𑀩𑀤𑁂𑀯𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁.)], 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀳𑀼𑀦𑁂𑀬𑁆𑀬𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀳𑀼𑀓𑀸𑀭𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀢𑁆𑀢𑀸𑀦𑀁 𑀆𑀧𑀸𑀤𑀓𑀸 𑀧𑁄𑀲𑀓𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄’’𑀢𑀺.

‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;

𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.

‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;

𑀅𑀦𑁆𑀦𑁂𑀦 𑀅𑀣 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦, 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘.

‘‘𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺. 𑀢𑀢𑀺𑀬𑀁;

𑁪. 𑀦𑀺𑀭𑀬𑀲𑀼𑀢𑁆𑀢𑀁

𑁬𑁪. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺.

‘‘𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀫𑀼𑀲𑀸𑀯𑀸𑀤𑁄 𑀘 𑀯𑀼𑀘𑁆𑀘𑀢𑀺;

𑀧𑀭𑀤𑀸𑀭𑀕𑀫𑀦𑀜𑁆𑀘𑀸𑀧𑀺, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀭𑀽𑀧𑀲𑀼𑀢𑁆𑀢𑀁

𑁬𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀬𑁂 𑀘 𑀭𑀽𑀧𑁂 𑀧𑀫𑀸𑀡𑀺𑀁𑀲𑀼 [𑀬𑁂 𑀘 𑀭𑀽𑀧𑁂𑀦 𑀧𑀸𑀫𑀺𑀁𑀲𑀼 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀬𑁂 𑀘 𑀖𑁄𑀲𑁂𑀦 𑀅𑀦𑁆𑀯𑀕𑀽;

𑀙𑀦𑁆𑀤𑀭𑀸𑀕𑀯𑀲𑀽𑀧𑁂𑀢𑀸, 𑀦𑀸𑀪𑀺𑀚𑀸𑀦𑀦𑁆𑀢𑀺 𑀢𑁂 𑀚𑀦𑀸 [𑀦 𑀢𑁂 𑀚𑀸𑀦𑀦𑁆𑀢𑀺 𑀢𑀁 𑀚𑀦𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀦 𑀧𑀲𑁆𑀲𑀢𑀺;

𑀲𑀫𑀦𑁆𑀢𑀸𑀯𑀭𑀡𑁄 𑀩𑀸𑀮𑁄, 𑀲 𑀯𑁂 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀩𑀳𑀺𑀤𑁆𑀥𑀸 𑀨𑀮𑀤𑀲𑁆𑀲𑀸𑀯𑀻, 𑀲𑁄𑀧𑀺 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

‘‘𑀅𑀚𑁆𑀛𑀢𑁆𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀯𑀺𑀦𑀻𑀯𑀭𑀡𑀤𑀲𑁆𑀲𑀸𑀯𑀻, 𑀦 𑀲𑁄 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻’’𑀢𑀺. 𑀧𑀜𑁆𑀘𑀫𑀁;

𑁬. 𑀲𑀭𑀸𑀕𑀲𑀼𑀢𑁆𑀢𑀁

𑁬𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀭𑀸𑀕𑁄, 𑀲𑀤𑁄𑀲𑁄, 𑀲𑀫𑁄𑀳𑁄, 𑀲𑀫𑀸𑀦𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀲𑀸𑀭𑀢𑁆𑀢𑀸 𑀭𑀚𑀦𑀻𑀬𑁂𑀲𑀼, 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄;

𑀫𑁄𑀳𑁂𑀦 𑀆𑀯𑀼𑀢𑀸 [𑀅𑀥𑀫𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀢𑁆𑀢𑀸, 𑀩𑀤𑁆𑀥𑀸 [𑀩𑀦𑁆𑀥𑀸 (𑀓.)] 𑀯𑀟𑁆𑀠𑁂𑀦𑁆𑀢𑀺 𑀩𑀦𑁆𑀥𑀦𑀁.

‘‘𑀭𑀸𑀕𑀚𑀁 𑀤𑁄𑀲𑀚𑀜𑁆𑀘𑀸𑀧𑀺, 𑀫𑁄𑀳𑀚𑀁 𑀘𑀸𑀧𑀯𑀺𑀤𑁆𑀤𑀲𑀽;

𑀓𑀭𑁄𑀦𑁆𑀢𑀸𑀓𑀼𑀲𑀮𑀁 𑀓𑀫𑁆𑀫𑀁 [𑀥𑀫𑁆𑀫𑀁 (𑀓.)], 𑀲𑀯𑀺𑀖𑀸𑀢𑀁 𑀤𑀼𑀔𑀼𑀤𑁆𑀭𑀬𑀁.

‘‘𑀅𑀯𑀺𑀚𑁆𑀚𑀸𑀦𑀺𑀯𑀼𑀢𑀸 𑀧𑁄𑀲𑀸, 𑀅𑀦𑁆𑀥𑀪𑀽𑀢𑀸 𑀅𑀘𑀓𑁆𑀔𑀼𑀓𑀸;

𑀬𑀣𑀸 𑀥𑀫𑁆𑀫𑀸 𑀢𑀣𑀸 𑀲𑀦𑁆𑀢𑀸, 𑀦 𑀢𑀲𑁆𑀲𑁂𑀯𑀦𑁆𑀢𑀺 [𑀦𑀲𑁆𑀲𑁂𑀯𑀦𑁆𑀢𑀺 (𑀲𑀻.)] 𑀫𑀜𑁆𑀜𑀭𑁂’’𑀢𑀺. 𑀙𑀝𑁆𑀞𑀁;

𑁭. 𑀅𑀳𑀺𑀭𑀸𑀚𑀲𑀼𑀢𑁆𑀢𑀁

𑁬𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀳𑀺𑀦𑀸 𑀤𑀝𑁆𑀞𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀳𑀺𑀦𑀸 𑀤𑀝𑁆𑀞𑁄 𑀓𑀸𑀮𑀗𑁆𑀓𑀢𑁄’’𑀢𑀺.

‘‘𑀦 𑀳𑀺 𑀦𑀽𑀦 [𑀦 𑀳 𑀦𑀽𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑀺. 𑀲𑀘𑁂 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑁂𑀬𑁆𑀬, 𑀦 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀳𑀺𑀦𑀸 𑀤𑀝𑁆𑀞𑁄 𑀓𑀸𑀮𑀗𑁆𑀓𑀭𑁂𑀬𑁆𑀬.

‘‘𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀯𑀺𑀭𑀽𑀧𑀓𑁆𑀔𑀁 𑀅𑀳𑀺𑀭𑀸𑀚𑀓𑀼𑀮𑀁, 𑀏𑀭𑀸𑀧𑀣𑀁 𑀅𑀳𑀺𑀭𑀸𑀚𑀓𑀼𑀮𑀁, 𑀙𑀩𑁆𑀬𑀸𑀧𑀼𑀢𑁆𑀢𑀁 𑀅𑀳𑀺𑀭𑀸𑀚𑀓𑀼𑀮𑀁, 𑀓𑀡𑁆𑀳𑀸𑀕𑁄𑀢𑀫𑀓𑀁 𑀅𑀳𑀺𑀭𑀸𑀚𑀓𑀼𑀮𑀁. 𑀦 𑀳𑀺 𑀦𑀽𑀦 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑀺. 𑀲𑀘𑁂 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑁂𑀬𑁆𑀬, 𑀦 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀳𑀺𑀦𑀸 𑀤𑀝𑁆𑀞𑁄 𑀓𑀸𑀮𑀗𑁆𑀓𑀭𑁂𑀬𑁆𑀬.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀺 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀨𑀭𑀺𑀢𑀼𑀁 𑀅𑀢𑁆𑀢𑀕𑀼𑀢𑁆𑀢𑀺𑀬𑀸 𑀅𑀢𑁆𑀢𑀭𑀓𑁆𑀔𑀸𑀬 𑀅𑀢𑁆𑀢𑀧𑀭𑀺𑀢𑁆𑀢𑀸𑀬𑀸’’𑀢𑀺.

[𑀘𑀽𑀴𑀯. 𑁨𑁫𑁧; 𑀚𑀸. 𑁧.𑁨.𑁧𑁦𑁫 𑀧𑀲𑁆𑀲𑀺𑀢𑀩𑁆𑀩𑀁] ‘‘𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀏𑀭𑀸𑀧𑀣𑁂𑀳𑀺 𑀫𑁂;

𑀙𑀩𑁆𑀬𑀸𑀧𑀼𑀢𑁆𑀢𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀓𑀡𑁆𑀳𑀸𑀕𑁄𑀢𑀫𑀓𑁂𑀳𑀺 𑀘.

‘‘𑀅𑀧𑀸𑀤𑀓𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀤𑁆𑀯𑀺𑀧𑀸𑀤𑀓𑁂𑀳𑀺 [𑀤𑀺𑀧𑀸𑀤𑀓𑁂𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑁂;

𑀘𑀢𑀼𑀧𑁆𑀧𑀤𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀩𑀳𑀼𑀧𑁆𑀧𑀤𑁂𑀳𑀺 𑀫𑁂.

‘‘𑀫𑀸 𑀫𑀁 𑀅𑀧𑀸𑀤𑀓𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀤𑁆𑀯𑀺𑀧𑀸𑀤𑀓𑁄 [𑀤𑀺𑀧𑀸𑀤𑀓𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)];

𑀫𑀸 𑀫𑀁 𑀘𑀢𑀼𑀧𑁆𑀧𑀤𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀩𑀳𑀼𑀧𑁆𑀧𑀤𑁄.

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸 𑀘 𑀓𑁂𑀯𑀮𑀸;

𑀲𑀩𑁆𑀩𑁂 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀼, 𑀫𑀸 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀲𑁆𑀬𑀸. 𑀓𑀁. 𑀓.)] 𑀧𑀸𑀧𑀫𑀸𑀕𑀫𑀸.

‘‘𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄, 𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄;

𑀅𑀧𑁆𑀧𑀫𑀸𑀡𑁄 𑀲𑀗𑁆𑀖𑁄, 𑀧𑀫𑀸𑀡𑀯𑀦𑁆𑀢𑀸𑀦𑀺 𑀲𑀭𑀻𑀲𑀧𑀸𑀦𑀺 [𑀲𑀺𑀭𑀺𑀁𑀲𑀧𑀸𑀦𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

‘‘𑀅𑀳𑀺𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀉𑀡𑁆𑀡𑀦𑀸𑀪𑀻 𑀲𑀭𑀩𑀽 𑀫𑀽𑀲𑀺𑀓𑀸;

𑀓𑀢𑀸 𑀫𑁂 𑀭𑀓𑁆𑀔𑀸 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸 [𑀓𑀢𑀁 𑀫𑁂 𑀧𑀭𑀺𑀢𑁆𑀢𑀁 (?)], 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀺;

𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄, 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦’’𑀦𑁆𑀢𑀺. 𑀲𑀢𑁆𑀢𑀫𑀁;

𑁮. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀁

𑁬𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀤𑁂𑀯𑀤𑀢𑁆𑀢𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀤𑁂𑀯𑀤𑀢𑁆𑀢𑀁 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀢𑀯𑀥𑀸𑀬, 𑀪𑀺𑀓𑁆𑀔𑀯𑁂 [𑀘𑀽𑀴𑀯. 𑁨𑁫𑁨; 𑀲𑀁. 𑀦𑀺. 𑁨.𑁧𑁮𑁪], 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺. 𑀧𑀭𑀸𑀪𑀯𑀸𑀬, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀤𑀮𑀻 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑁂𑀴𑀼 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀴𑁄 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀢𑀭𑀻 𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀸𑀪𑀯𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀻’’𑀢𑀺.

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺 [𑀘𑀽𑀴𑀯. 𑁩𑁩𑁫; 𑀲𑀁. 𑀦𑀺. 𑁧.𑁧𑁮𑁩; 𑁨.𑁧𑁮𑁪; 𑀦𑁂𑀢𑁆𑀢𑀺. 𑁯𑁦]. 𑀅𑀝𑁆𑀞𑀫𑀁;

𑁯. 𑀧𑀥𑀸𑀦𑀲𑀼𑀢𑁆𑀢𑀁

𑁬𑁯. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀥𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀲𑀁𑀯𑀭𑀧𑁆𑀧𑀥𑀸𑀦𑀁, 𑀧𑀳𑀸𑀦𑀧𑁆𑀧𑀥𑀸𑀦𑀁, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀳𑀸𑀦𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀳𑀸𑀦𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀯𑀦𑀸𑀧𑁆𑀧𑀥𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀭𑀓𑁆𑀔𑀡𑀸𑀧𑁆𑀧𑀥𑀸𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀧𑀥𑀸𑀦𑀸𑀦𑀻’’𑀢𑀺.

‘‘𑀲𑀁𑀯𑀭𑁄 𑀘 𑀧𑀳𑀸𑀦𑀜𑁆𑀘, 𑀪𑀸𑀯𑀦𑀸 𑀅𑀦𑀼𑀭𑀓𑁆𑀔𑀡𑀸;

𑀏𑀢𑁂 𑀧𑀥𑀸𑀦𑀸 𑀘𑀢𑁆𑀢𑀸𑀭𑁄, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀬𑁄 𑀳𑀺 [𑀬𑁂𑀳𑀺 (?)] 𑀪𑀺𑀓𑁆𑀔𑀼 𑀇𑀥𑀸𑀢𑀸𑀧𑀻, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺. 𑀦𑀯𑀫𑀁;

𑁧𑁦. 𑀅𑀥𑀫𑁆𑀫𑀺𑀓𑀲𑀼𑀢𑁆𑀢𑀁

𑁭𑁦. ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀭𑀸𑀚𑀸𑀬𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀭𑀸𑀚𑀸𑀬𑀼𑀢𑁆𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀯𑀺𑀲𑀫𑀁 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑀺𑀲𑀫𑀁 𑀦𑀓𑁆𑀔𑀢𑁆𑀢𑁂𑀲𑀼 𑀢𑀸𑀭𑀓𑀭𑀽𑀧𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀯𑀺𑀲𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 [𑀭𑀢𑁆𑀢𑀺𑀤𑀺𑀯𑀸 (𑀓.)] 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑀺𑀲𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀯𑀺𑀲𑀫𑀁 𑀫𑀸𑀲𑀤𑁆𑀥𑀫𑀸𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑀺𑀲𑀫𑀁 𑀫𑀸𑀲𑀤𑁆𑀥𑀫𑀸𑀲𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀯𑀺𑀲𑀫𑀁 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀯𑀺𑀲𑀫𑀁 𑀉𑀢𑀼𑀲𑀁𑀯𑀘𑁆𑀙𑀭𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀯𑀺𑀲𑀫𑀁 𑀯𑀸𑀢𑀸 𑀯𑀸𑀬𑀦𑁆𑀢𑀺 𑀯𑀺𑀲𑀫𑀸 𑀅𑀧𑀜𑁆𑀚𑀲𑀸. 𑀯𑀺𑀲𑀫𑀁 𑀯𑀸𑀢𑁂𑀲𑀼 𑀯𑀸𑀬𑀦𑁆𑀢𑁂𑀲𑀼 𑀯𑀺𑀲𑀫𑁂𑀲𑀼 𑀅𑀧𑀜𑁆𑀚𑀲𑁂𑀲𑀼 𑀤𑁂𑀯𑀢𑀸 𑀧𑀭𑀺𑀓𑀼𑀧𑀺𑀢𑀸 𑀪𑀯𑀦𑁆𑀢𑀺. 𑀤𑁂𑀯𑀢𑀸𑀲𑀼 𑀧𑀭𑀺𑀓𑀼𑀧𑀺𑀢𑀸𑀲𑀼 𑀤𑁂𑀯𑁄 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺. 𑀤𑁂𑀯𑁂 𑀦 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀦𑁆𑀢𑁂 𑀯𑀺𑀲𑀫𑀧𑀸𑀓𑀸𑀦𑀺 [𑀯𑀺𑀲𑀫𑀧𑀸𑀓𑀻𑀦𑀺 (𑀲𑀻. 𑀲𑁆𑀬𑀸. 𑀓𑀁.), 𑀯𑀺𑀲𑀫𑀁 𑀧𑀸𑀓𑀸𑀦𑀺 (𑀓.)] 𑀲𑀲𑁆𑀲𑀸𑀦𑀺 𑀪𑀯𑀦𑁆𑀢𑀺. 𑀯𑀺𑀲𑀫𑀧𑀸𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀲𑁆𑀲𑀸𑀦𑀺 𑀫𑀦𑀼𑀲𑁆𑀲𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀅𑀧𑁆𑀧𑀸𑀬𑀼𑀓𑀸 𑀳𑁄𑀦𑁆𑀢𑀺 𑀤𑀼𑀩𑁆𑀩𑀡𑁆𑀡𑀸 𑀘 𑀩𑀯𑁆𑀳𑀸𑀩𑀸𑀥𑀸 [𑀩𑀳𑁆𑀯𑀸𑀩𑀸𑀥𑀸 (𑀓.)] 𑀘.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀭𑀸𑀚𑀸𑀦𑁄 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀭𑀸𑀚𑀸𑀬𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀭𑀸𑀚𑀸𑀬𑀼𑀢𑁆𑀢𑁂𑀲𑀼 𑀥𑀫𑁆𑀫𑀺𑀓𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀥𑀫𑁆𑀫𑀺𑀓𑁂𑀲𑀼 𑀦𑁂𑀕𑀫𑀚𑀸𑀦𑀧𑀤𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀥𑀫𑁆𑀫𑀺𑀓𑁂𑀲𑀼 𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀲𑀫𑀁 𑀦𑀓𑁆𑀔𑀢𑁆𑀢𑀸𑀦𑀺 𑀢𑀸𑀭𑀓𑀭𑀽𑀧𑀸𑀦𑀺 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀦𑀓𑁆𑀔𑀢𑁆𑀢𑁂𑀲𑀼 𑀢𑀸𑀭𑀓𑀭𑀽𑀧𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀲𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀲𑀫𑀁 𑀫𑀸𑀲𑀤𑁆𑀥𑀫𑀸𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀫𑀸𑀲𑀤𑁆𑀥𑀫𑀸𑀲𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀲𑀫𑀁 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀲𑀫𑀁 𑀉𑀢𑀼𑀲𑀁𑀯𑀘𑁆𑀙𑀭𑁂𑀲𑀼 𑀧𑀭𑀺𑀯𑀢𑁆𑀢𑀦𑁆𑀢𑁂𑀲𑀼 𑀲𑀫𑀁 𑀯𑀸𑀢𑀸 𑀯𑀸𑀬𑀦𑁆𑀢𑀺 𑀲𑀫𑀸 𑀧𑀜𑁆𑀚𑀲𑀸. 𑀲𑀫𑀁 𑀯𑀸𑀢𑁂𑀲𑀼 𑀯𑀸𑀬𑀦𑁆𑀢𑁂𑀲𑀼 𑀲𑀫𑁂𑀲𑀼 𑀧𑀜𑁆𑀚𑀲𑁂𑀲𑀼 𑀤𑁂𑀯𑀢𑀸 𑀅𑀧𑀭𑀺𑀓𑀼𑀧𑀺𑀢𑀸 𑀪𑀯𑀦𑁆𑀢𑀺. 𑀤𑁂𑀯𑀢𑀸𑀲𑀼 𑀅𑀧𑀭𑀺𑀓𑀼𑀧𑀺𑀢𑀸𑀲𑀼 𑀤𑁂𑀯𑁄 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺. 𑀤𑁂𑀯𑁂 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀦𑁆𑀢𑁂 𑀲𑀫𑀧𑀸𑀓𑀸𑀦𑀺 𑀲𑀲𑁆𑀲𑀸𑀦𑀺 𑀪𑀯𑀦𑁆𑀢𑀺. 𑀲𑀫𑀧𑀸𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀲𑁆𑀲𑀸𑀦𑀺 𑀫𑀦𑀼𑀲𑁆𑀲𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀤𑀻𑀖𑀸𑀬𑀼𑀓𑀸 𑀘 𑀳𑁄𑀦𑁆𑀢𑀺 𑀯𑀡𑁆𑀡𑀯𑀦𑁆𑀢𑁄 𑀘 𑀩𑀮𑀯𑀦𑁆𑀢𑁄 𑀘 𑀅𑀧𑁆𑀧𑀸𑀩𑀸𑀥𑀸 𑀘𑀸’’𑀢𑀺.

‘‘𑀕𑀼𑀦𑁆𑀦𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.

‘‘𑀏𑀯𑀫𑁂𑀯𑀁 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀓𑁆𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

‘‘𑀕𑀼𑀦𑁆𑀦𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀉𑀚𑀼𑀁 𑀕𑀘𑁆𑀙𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

‘‘𑀏𑀯𑀫𑁂𑀯𑀁 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 [𑀲𑁄 𑀘𑁂𑀯 (𑀲𑀻. 𑀧𑀻.), 𑀲𑁄 𑀘𑁂 (𑀲𑁆𑀬𑀸.)] 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄’’𑀢𑀺. 𑀤𑀲𑀫𑀁;

𑀧𑀢𑁆𑀢𑀓𑀫𑁆𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.