𑁯. 𑀪𑁄𑀚𑀦𑀲𑀼𑀢𑁆𑀢𑀁

𑁫𑁯. ‘‘𑀪𑁄𑀚𑀦𑀁, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁄 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀯𑀡𑁆𑀡𑀁 𑀤𑀢𑁆𑀯𑀸… 𑀲𑀼𑀔𑀁 𑀤𑀢𑁆𑀯𑀸… 𑀩𑀮𑀁 𑀤𑀢𑁆𑀯𑀸 𑀩𑀮𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀪𑁄𑀚𑀦𑀁, 𑀪𑀺𑀓𑁆𑀔𑀯𑁂, 𑀤𑀤𑀫𑀸𑀦𑁄 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀻’’𑀢𑀺.

[𑀫𑀳𑀸𑀯. 𑁨𑁮𑁨] ‘‘𑀬𑁄 𑀲𑀜𑁆𑀜𑀢𑀸𑀦𑀁 𑀧𑀭𑀤𑀢𑁆𑀢𑀪𑁄𑀚𑀺𑀦𑀁,

𑀓𑀸𑀮𑁂𑀦 𑀲𑀓𑁆𑀓𑀘𑁆𑀘 𑀤𑀤𑀸𑀢𑀺 𑀪𑁄𑀚𑀦𑀁;

𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺,

𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘.

‘‘𑀲𑁄 𑀆𑀬𑀼𑀤𑀸𑀬𑀻 𑀯𑀡𑁆𑀡𑀤𑀸𑀬𑀻, 𑀲𑀼𑀔𑀁 𑀩𑀮𑀁 𑀤𑀤𑁄 𑀦𑀭𑁄;

𑀤𑀻𑀖𑀸𑀬𑀼 𑀬𑀲𑀯𑀸 𑀳𑁄𑀢𑀺, 𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀢𑀻’’𑀢𑀺. 𑀦𑀯𑀫𑀁;