𑁧𑁦. 𑀕𑀺𑀳𑀺𑀲𑀸𑀫𑀻𑀘𑀺𑀲𑀼𑀢𑁆𑀢𑀁

𑁬𑁦. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀺𑀳𑀺𑀲𑀸𑀫𑀻𑀘𑀺𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀬𑀲𑁄𑀧𑀝𑀺𑀮𑀸𑀪𑀺𑀦𑀺𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀕𑀳𑀧𑀢𑀺, 𑀅𑀭𑀺𑀬𑀲𑀸𑀯𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺 𑀘𑀻𑀯𑀭𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺 𑀧𑀺𑀡𑁆𑀟𑀧𑀸𑀢𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺 𑀲𑁂𑀦𑀸𑀲𑀦𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀺𑀳𑀺𑀲𑀸𑀫𑀻𑀘𑀺𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀬𑀲𑁄𑀧𑀝𑀺𑀮𑀸𑀪𑀺𑀦𑀺𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺.

‘‘𑀕𑀺𑀳𑀺𑀲𑀸𑀫𑀻𑀘𑀺𑀧𑀝𑀺𑀧𑀤𑀁, 𑀧𑀝𑀺𑀧𑀚𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀲𑀫𑁆𑀫𑀕𑁆𑀕𑀢𑁂 𑀲𑀻𑀮𑀯𑀦𑁆𑀢𑁂, 𑀘𑀻𑀯𑀭𑁂𑀦 𑀉𑀧𑀝𑁆𑀞𑀺𑀢𑀸.

𑀧𑀺𑀡𑁆𑀟𑀧𑀸𑀢𑀲𑀬𑀦𑁂𑀦, 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑁂𑀦 𑀘;

𑀢𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀲𑀕𑁆𑀕𑀜𑁆𑀘 𑀓𑀫𑀢𑀺𑀝𑁆𑀞𑀸𑀦𑀁 [𑀲𑀕𑁆𑀕𑀜𑁆𑀘 𑀲𑀧𑁆𑀧𑀢𑀺𑀝𑁆𑀞𑀸𑀦𑀁 (𑀓.)], 𑀓𑀫𑁆𑀫𑀁 𑀓𑀢𑁆𑀯𑀸𑀦 𑀪𑀤𑁆𑀤𑀓’’𑀦𑁆𑀢𑀺. 𑀤𑀲𑀫𑀁;

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀧𑀞𑀫𑁄.