𑁮. 𑀲𑀼𑀤𑀢𑁆𑀢𑀲𑀼𑀢𑁆𑀢𑀁

𑁫𑁮. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑁄𑀚𑀦𑀁, 𑀕𑀳𑀧𑀢𑀺, 𑀤𑀤𑀫𑀸𑀦𑁄 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀯𑀡𑁆𑀡𑀁 𑀤𑀢𑁆𑀯𑀸… 𑀲𑀼𑀔𑀁 𑀤𑀢𑁆𑀯𑀸… 𑀩𑀮𑀁 𑀤𑀢𑁆𑀯𑀸 𑀩𑀮𑀲𑁆𑀲 𑀪𑀸𑀕𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀪𑁄𑀚𑀦𑀁, 𑀕𑀳𑀧𑀢𑀺, 𑀤𑀤𑀫𑀸𑀦𑁄 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀻’’𑀢𑀺.

[𑀫𑀳𑀸𑀯. 𑁨𑁮𑁨] ‘‘𑀬𑁄 𑀲𑀜𑁆𑀜𑀢𑀸𑀦𑀁 𑀧𑀭𑀤𑀢𑁆𑀢𑀪𑁄𑀚𑀺𑀦𑀁,

𑀓𑀸𑀮𑁂𑀦 𑀲𑀓𑁆𑀓𑀘𑁆𑀘 𑀤𑀤𑀸𑀢𑀺 𑀪𑁄𑀚𑀦𑀁;

𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺,

𑀆𑀬𑀼𑀜𑁆𑀘 𑀯𑀡𑁆𑀡𑀜𑁆𑀘 𑀲𑀼𑀔𑀁 𑀩𑀮𑀜𑁆𑀘.

‘‘𑀲𑁄 𑀆𑀬𑀼𑀤𑀸𑀬𑀻 𑀯𑀡𑁆𑀡𑀤𑀸𑀬𑀻 [𑀲𑁄 𑀆𑀬𑀼𑀤𑀸𑀬𑀻 𑀩𑀮𑀤𑀸𑀬𑀻 (𑀲𑀻. 𑀧𑀻.), 𑀆𑀬𑀼𑀤𑀸𑀬𑀻 𑀩𑀮𑀤𑀸𑀬𑀻 (𑀲𑁆𑀬𑀸. 𑀓𑀁.)], 𑀲𑀼𑀔𑀁 𑀩𑀮𑀁 𑀤𑀤𑁄 [𑀲𑀼𑀔𑀁 𑀯𑀡𑁆𑀡𑀁 𑀤𑀤𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀼𑀔𑀩𑀮𑀤𑀤𑁄 (𑀓.)] 𑀦𑀭𑁄;

𑀤𑀻𑀖𑀸𑀬𑀼 𑀬𑀲𑀯𑀸 𑀳𑁄𑀢𑀺, 𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀢𑀻’’𑀢𑀺. 𑀅𑀝𑁆𑀞𑀫𑀁;