𑁭. 𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀁

𑁫𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀮𑀺𑀬𑁂𑀲𑀼 𑀯𑀺𑀳𑀭𑀢𑀺 𑀧𑀚𑁆𑀚𑀦𑀺𑀓𑀁 [𑀲𑀚𑁆𑀚𑀦𑁂𑀮𑀁 (𑀲𑀻. 𑀧𑀻.), 𑀧𑀚𑁆𑀚𑀦𑁂𑀮𑀁 (𑀲𑁆𑀬𑀸. 𑀓𑀁.)] 𑀦𑀸𑀫 𑀓𑁄𑀮𑀺𑀬𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀼𑀧𑁆𑀧𑀯𑀸𑀲𑀸𑀬 𑀓𑁄𑀮𑀺𑀬𑀥𑀻𑀢𑀼𑀬𑀸 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀦𑁆𑀢𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀲𑀼𑀧𑁆𑀧𑀯𑀸𑀲𑀁 𑀓𑁄𑀮𑀺𑀬𑀥𑀻𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀪𑁄𑀚𑀦𑀁, 𑀲𑀼𑀧𑁆𑀧𑀯𑀸𑀲𑁂, 𑀤𑁂𑀦𑁆𑀢𑀻 𑀅𑀭𑀺𑀬𑀲𑀸𑀯𑀺𑀓𑀸 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁 𑀤𑁂𑀢𑀺, 𑀲𑀼𑀔𑀁 𑀤𑁂𑀢𑀺, 𑀩𑀮𑀁 𑀤𑁂𑀢𑀺. 𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸 𑀆𑀬𑀼𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀯𑀡𑁆𑀡𑀁 𑀤𑀢𑁆𑀯𑀸 𑀯𑀡𑁆𑀡𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀲𑀼𑀔𑀁 𑀤𑀢𑁆𑀯𑀸 𑀲𑀼𑀔𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀩𑀮𑀁 𑀤𑀢𑁆𑀯𑀸 𑀩𑀮𑀲𑁆𑀲 𑀪𑀸𑀕𑀺𑀦𑀻 𑀳𑁄𑀢𑀺 𑀤𑀺𑀩𑁆𑀩𑀲𑁆𑀲 𑀯𑀸 𑀫𑀸𑀦𑀼𑀲𑀲𑁆𑀲 𑀯𑀸. 𑀪𑁄𑀚𑀦𑀁, 𑀲𑀼𑀧𑁆𑀧𑀯𑀸𑀲𑁂, 𑀤𑁂𑀦𑁆𑀢𑀻 𑀅𑀭𑀺𑀬𑀲𑀸𑀯𑀺𑀓𑀸 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀤𑁂𑀢𑀻’’𑀢𑀺.

‘‘𑀲𑀼𑀲𑀗𑁆𑀔𑀢𑀁 𑀪𑁄𑀚𑀦𑀁 𑀬𑀸 𑀤𑀤𑀸𑀢𑀺,

𑀲𑀼𑀘𑀺𑀁 𑀧𑀡𑀻𑀢𑀁 [𑀲𑀼𑀧𑀡𑀻𑀢𑀁 (𑀓.)] 𑀭𑀲𑀲𑀸 𑀉𑀧𑁂𑀢𑀁;

𑀲𑀸 𑀤𑀓𑁆𑀔𑀺𑀡𑀸 𑀉𑀚𑁆𑀚𑀼𑀕𑀢𑁂𑀲𑀼 𑀤𑀺𑀦𑁆𑀦𑀸,

𑀘𑀭𑀡𑀽𑀧𑀧𑀦𑁆𑀦𑁂𑀲𑀼 𑀫𑀳𑀕𑁆𑀕𑀢𑁂𑀲𑀼;

𑀧𑀼𑀜𑁆𑀜𑁂𑀦 𑀧𑀼𑀜𑁆𑀜𑀁 𑀲𑀁𑀲𑀦𑁆𑀤𑀫𑀸𑀦𑀸,

𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 𑀯𑀡𑁆𑀡𑀺𑀢𑀸.

‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸,

𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁,

𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺. 𑀲𑀢𑁆𑀢𑀫𑀁;