𑁯. 𑀥𑀫𑁆𑀫𑀧𑀤𑀲𑀼𑀢𑁆𑀢𑀁

𑁨𑁯. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺 𑀭𑀢𑁆𑀢𑀜𑁆𑀜𑀸𑀦𑀺 𑀯𑀁𑀲𑀜𑁆𑀜𑀸𑀦𑀺 𑀧𑁄𑀭𑀸𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺, 𑀦 𑀲𑀁𑀓𑀻𑀬𑀦𑁆𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀦𑀪𑀺𑀚𑁆𑀛𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺.

‘‘𑀅𑀩𑁆𑀬𑀸𑀧𑀸𑀤𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺.

‘‘𑀲𑀫𑁆𑀫𑀸𑀲𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺.

‘‘𑀲𑀫𑁆𑀫𑀸𑀲𑀫𑀸𑀥𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺 𑀭𑀢𑁆𑀢𑀜𑁆𑀜𑀸𑀦𑀺 𑀯𑀁𑀲𑀜𑁆𑀜𑀸𑀦𑀺 𑀧𑁄𑀭𑀸𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺, 𑀦 𑀲𑀁𑀓𑀻𑀬𑀦𑁆𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀅𑀦𑀪𑀺𑀚𑁆𑀛𑀸𑀮𑀼 𑀯𑀺𑀳𑀭𑁂𑀬𑁆𑀬, 𑀅𑀩𑁆𑀬𑀸𑀧𑀦𑁆𑀦𑁂𑀦 𑀘𑁂𑀢𑀲𑀸;

𑀲𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑀲𑁆𑀲 [𑀏𑀓𑀕𑁆𑀕𑀘𑀺𑀢𑁆𑀢𑀸𑀬𑀁 (𑀓.)], 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄’’𑀢𑀺. 𑀦𑀯𑀫𑀁;