𑁧𑁦. 𑀧𑀭𑀺𑀩𑁆𑀩𑀸𑀚𑀓𑀲𑀼𑀢𑁆𑀢𑀁

𑁩𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀧𑀭𑀺𑀩𑁆𑀩𑀸𑀚𑀓𑀸 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑁂 [𑀲𑀧𑁆𑀧𑀺𑀦𑀺𑀬𑀸 𑀢𑀻𑀭𑁂 (𑀲𑀻. 𑀧𑀻.), 𑀲𑀺𑀧𑁆𑀧𑀺𑀦𑀺𑀬𑀸 𑀢𑀻𑀭𑁂 (𑀲𑁆𑀬𑀸. 𑀓𑀁.), 𑀲𑀺𑀧𑁆𑀧𑀺𑀦𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 (𑀓.)] 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀧𑀝𑀺𑀯𑀲𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑀅𑀦𑁆𑀦𑀪𑀸𑀭𑁄 𑀯𑀭𑀥𑀭𑁄 𑀲𑀓𑀼𑀮𑀼𑀤𑀸𑀬𑀻 𑀘 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀧𑀭𑀺𑀩𑁆𑀩𑀸𑀚𑀓𑀸. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀲𑀺𑀧𑁆𑀧𑀺𑀦𑀺𑀓𑀸𑀢𑀻𑀭𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀧𑀭𑀺𑀩𑁆𑀩𑀸𑀚𑀓𑀸, 𑀥𑀫𑁆𑀫𑀧𑀤𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺 𑀭𑀢𑁆𑀢𑀜𑁆𑀜𑀸𑀦𑀺 𑀯𑀁𑀲𑀜𑁆𑀜𑀸𑀦𑀺 𑀧𑁄𑀭𑀸𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺, 𑀦 𑀲𑀁𑀓𑀻𑀬𑀦𑁆𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀦𑀪𑀺𑀚𑁆𑀛𑀸, 𑀧𑀭𑀺𑀩𑁆𑀩𑀸𑀚𑀓𑀸, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀅𑀩𑁆𑀬𑀸𑀧𑀸𑀤𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀥𑀫𑁆𑀫𑀧𑀤𑀁…𑀧𑁂… 𑀲𑀫𑁆𑀫𑀸𑀲𑀢𑀺, 𑀧𑀭𑀺𑀩𑁆𑀩𑀸𑀚𑀓𑀸, 𑀥𑀫𑁆𑀫𑀧𑀤𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀭𑀺𑀩𑁆𑀩𑀸𑀚𑀓𑀸, 𑀥𑀫𑁆𑀫𑀧𑀤𑀁 𑀅𑀕𑁆𑀕𑀜𑁆𑀜𑀁 𑀭𑀢𑁆𑀢𑀜𑁆𑀜𑀁 𑀯𑀁𑀲𑀜𑁆𑀜𑀁 𑀧𑁄𑀭𑀸𑀡𑀁 𑀅𑀲𑀁𑀓𑀺𑀡𑁆𑀡𑀁 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀁, 𑀦 𑀲𑀁𑀓𑀻𑀬𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀁 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀇𑀫𑀸𑀦𑀺 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑀅𑀕𑁆𑀕𑀜𑁆𑀜𑀸𑀦𑀺 𑀭𑀢𑁆𑀢𑀜𑁆𑀜𑀸𑀦𑀺 𑀯𑀁𑀲𑀜𑁆𑀜𑀸𑀦𑀺 𑀧𑁄𑀭𑀸𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀸𑀦𑀺 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺, 𑀦 𑀲𑀁𑀓𑀻𑀬𑀦𑁆𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀦𑀺 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑁂𑀢𑀁 𑀅𑀦𑀪𑀺𑀚𑁆𑀛𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀅𑀪𑀺𑀚𑁆𑀛𑀸𑀮𑀼𑀁 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀢𑀫𑀳𑀁 𑀢𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀁 𑁋 ‘𑀏𑀢𑀼 𑀯𑀤𑀢𑀼 𑀩𑁆𑀬𑀸𑀳𑀭𑀢𑀼 𑀧𑀲𑁆𑀲𑀸𑀫𑀺𑀲𑁆𑀲𑀸𑀦𑀼𑀪𑀸𑀯’𑀦𑁆𑀢𑀺. 𑀲𑁄 𑀯𑀢, 𑀧𑀭𑀺𑀩𑁆𑀩𑀸𑀚𑀓𑀸, 𑀅𑀦𑀪𑀺𑀚𑁆𑀛𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀅𑀪𑀺𑀚𑁆𑀛𑀸𑀮𑀼𑀁 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑁂𑀢𑀁 𑀅𑀩𑁆𑀬𑀸𑀧𑀸𑀤𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀁 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀢𑀫𑀳𑀁 𑀢𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀁 𑁋 ‘𑀏𑀢𑀼 𑀯𑀤𑀢𑀼 𑀩𑁆𑀬𑀸𑀳𑀭𑀢𑀼 𑀧𑀲𑁆𑀲𑀸𑀫𑀺𑀲𑁆𑀲𑀸𑀦𑀼𑀪𑀸𑀯’𑀦𑁆𑀢𑀺. 𑀲𑁄 𑀯𑀢, 𑀧𑀭𑀺𑀩𑁆𑀩𑀸𑀚𑀓𑀸, 𑀅𑀩𑁆𑀬𑀸𑀧𑀸𑀤𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀁 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑁂𑀢𑀁 𑀲𑀫𑁆𑀫𑀸𑀲𑀢𑀺𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀫𑀼𑀝𑁆𑀞𑀲𑁆𑀲𑀢𑀺𑀁 𑀅𑀲𑀫𑁆𑀧𑀚𑀸𑀦𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀢𑀫𑀳𑀁 𑀢𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀁 𑁋 ‘𑀏𑀢𑀼 𑀯𑀤𑀢𑀼 𑀩𑁆𑀬𑀸𑀳𑀭𑀢𑀼 𑀧𑀲𑁆𑀲𑀸𑀫𑀺𑀲𑁆𑀲𑀸𑀦𑀼𑀪𑀸𑀯’𑀦𑁆𑀢𑀺. 𑀲𑁄 𑀯𑀢, 𑀧𑀭𑀺𑀩𑁆𑀩𑀸𑀚𑀓𑀸, 𑀲𑀫𑁆𑀫𑀸𑀲𑀢𑀺𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀫𑀼𑀝𑁆𑀞𑀲𑁆𑀲𑀢𑀺𑀁 𑀅𑀲𑀫𑁆𑀧𑀚𑀸𑀦𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑁂𑀢𑀁 𑀲𑀫𑁆𑀫𑀸𑀲𑀫𑀸𑀥𑀺𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀅𑀲𑀫𑀸𑀳𑀺𑀢𑀁 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀢𑀫𑀳𑀁 𑀢𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬𑀁 𑁋 ‘𑀏𑀢𑀼 𑀯𑀤𑀢𑀼 𑀩𑁆𑀬𑀸𑀳𑀭𑀢𑀼 𑀧𑀲𑁆𑀲𑀸𑀫𑀺𑀲𑁆𑀲𑀸𑀦𑀼𑀪𑀸𑀯’𑀦𑁆𑀢𑀺. 𑀲𑁄 𑀯𑀢, 𑀧𑀭𑀺𑀩𑁆𑀩𑀸𑀚𑀓𑀸, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀥𑀫𑁆𑀫𑀧𑀤𑀁 𑀧𑀘𑁆𑀘𑀓𑁆𑀔𑀸𑀬 𑀅𑀲𑀫𑀸𑀳𑀺𑀢𑀁 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑀕𑀭𑀳𑀺𑀢𑀩𑁆𑀩𑀁 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀘𑀢𑁆𑀢𑀸𑀭𑁄 𑀲𑀳𑀥𑀫𑁆𑀫𑀺𑀓𑀸 𑀯𑀸𑀤𑀸𑀦𑀼𑀧𑀸𑀢𑀸 𑀕𑀸𑀭𑀬𑁆𑀳𑀸 𑀞𑀸𑀦𑀸 [𑀯𑀸𑀤𑀸𑀦𑀼𑀯𑀸𑀤𑀸 𑀕𑀸𑀭𑀬𑁆𑀳𑀁 𑀞𑀸𑀦𑀁 (𑀫. 𑀦𑀺. 𑁩.𑁮)] 𑀆𑀕𑀘𑁆𑀙𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀦𑀪𑀺𑀚𑁆𑀛𑀁 𑀘𑁂 𑀪𑀯𑀁 𑀥𑀫𑁆𑀫𑀧𑀤𑀁 𑀕𑀭𑀳𑀢𑀺 𑀧𑀝𑀺𑀓𑁆𑀓𑁄𑀲𑀢𑀺, 𑀬𑁂 𑀘 𑀳𑀺 [𑀬𑁂 𑀘 (𑀫. 𑀦𑀺. 𑁩.𑁧𑁪𑁨-𑁧𑁪𑁩)] 𑀅𑀪𑀺𑀚𑁆𑀛𑀸𑀮𑀽 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑁂 𑀪𑁄𑀢𑁄 𑀧𑀼𑀚𑁆𑀚𑀸 𑀢𑁂 𑀪𑁄𑀢𑁄 𑀧𑀸𑀲𑀁𑀲𑀸. 𑀅𑀩𑁆𑀬𑀸𑀧𑀸𑀤𑀁 𑀘𑁂 𑀪𑀯𑀁 𑀥𑀫𑁆𑀫𑀧𑀤𑀁 𑀕𑀭𑀳𑀢𑀺 𑀧𑀝𑀺𑀓𑁆𑀓𑁄𑀲𑀢𑀺, 𑀬𑁂 𑀘 𑀳𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑁂 𑀪𑁄𑀢𑁄 𑀧𑀼𑀚𑁆𑀚𑀸 𑀢𑁂 𑀪𑁄𑀢𑁄 𑀧𑀸𑀲𑀁𑀲𑀸. 𑀲𑀫𑁆𑀫𑀸𑀲𑀢𑀺𑀁 𑀘𑁂 𑀪𑀯𑀁 𑀥𑀫𑁆𑀫𑀧𑀤𑀁 𑀕𑀭𑀳𑀢𑀺 𑀧𑀝𑀺𑀓𑁆𑀓𑁄𑀲𑀢𑀺, 𑀬𑁂 𑀘 𑀳𑀺 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑁂 𑀪𑁄𑀢𑁄 𑀧𑀼𑀚𑁆𑀚𑀸 𑀢𑁂 𑀪𑁄𑀢𑁄 𑀧𑀸𑀲𑀁𑀲𑀸. 𑀲𑀫𑁆𑀫𑀸𑀲𑀫𑀸𑀥𑀺𑀁 𑀘𑁂 𑀪𑀯𑀁 𑀥𑀫𑁆𑀫𑀧𑀤𑀁 𑀕𑀭𑀳𑀢𑀺 𑀧𑀝𑀺𑀓𑁆𑀓𑁄𑀲𑀢𑀺, 𑀬𑁂 𑀘 𑀳𑀺 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑁂 𑀪𑁄𑀢𑁄 𑀧𑀼𑀚𑁆𑀚𑀸 𑀢𑁂 𑀪𑁄𑀢𑁄 𑀧𑀸𑀲𑀁𑀲𑀸.

‘‘𑀬𑁄 𑀔𑁄, 𑀧𑀭𑀺𑀩𑁆𑀩𑀸𑀚𑀓𑀸, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑀕𑀭𑀳𑀺𑀢𑀩𑁆𑀩𑀁 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀳𑀥𑀫𑁆𑀫𑀺𑀓𑀸 𑀯𑀸𑀤𑀸𑀦𑀼𑀧𑀸𑀢𑀸 𑀕𑀸𑀭𑀬𑁆𑀳𑀸 𑀞𑀸𑀦𑀸 𑀆𑀕𑀘𑁆𑀙𑀦𑁆𑀢𑀺. 𑀬𑁂𑀧𑀺 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀳𑁂𑀲𑀼𑀁 𑀉𑀓𑁆𑀓𑀮𑀸 𑀯𑀲𑁆𑀲𑀪𑀜𑁆𑀜𑀸 [𑀯𑀲𑁆𑀲𑀪𑀺𑀜𑁆𑀜𑀸 (𑀓.) 𑀲𑀁. 𑀦𑀺. 𑁩.𑁬𑁨 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀳𑁂𑀢𑀼𑀓𑀯𑀸𑀤𑀸 𑀅𑀓𑀺𑀭𑀺𑀬𑀯𑀸𑀤𑀸 𑀦𑀢𑁆𑀣𑀺𑀓𑀯𑀸𑀤𑀸, 𑀢𑁂𑀧𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀥𑀫𑁆𑀫𑀧𑀤𑀸𑀦𑀺 𑀦 𑀕𑀭𑀳𑀺𑀢𑀩𑁆𑀩𑀁 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁 𑀅𑀫𑀜𑁆𑀜𑀺𑀁𑀲𑀼. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀦𑀉𑀧𑀸𑀭𑀫𑁆𑀪𑀪𑀬𑀸’’𑀢𑀺 [𑀉𑀧𑀯𑀸𑀤𑀪𑀬𑀸𑀢𑀺 (𑀓.) 𑀫. 𑀦𑀺. 𑁩.𑁧𑁫𑁦; 𑀲𑀁. 𑀦𑀺. 𑁩.𑁬𑁨 𑀧𑀲𑁆𑀲𑀺𑀢𑀩𑁆𑀩𑀁].

‘‘𑀅𑀩𑁆𑀬𑀸𑀧𑀦𑁆𑀦𑁄 𑀲𑀤𑀸 𑀲𑀢𑁄, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄;

𑀅𑀪𑀺𑀚𑁆𑀛𑀸𑀯𑀺𑀦𑀬𑁂 𑀲𑀺𑀓𑁆𑀔𑀁, 𑀅𑀧𑁆𑀧𑀫𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀲𑀫𑀁;

𑀉𑀭𑀼𑀯𑁂𑀮𑀯𑀕𑁆𑀕𑁄 𑀢𑀢𑀺𑀬𑁄.