𑁩. 𑀮𑁄𑀓𑀲𑀼𑀢𑁆𑀢𑀁

𑁨𑁩. ‘‘𑀮𑁄𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀮𑁄𑀓𑀲𑁆𑀫𑀸 𑀢𑀣𑀸𑀕𑀢𑁄 𑀯𑀺𑀲𑀁𑀬𑀼𑀢𑁆𑀢𑁄. 𑀮𑁄𑀓𑀲𑀫𑀼𑀤𑀬𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀮𑁄𑀓𑀲𑀫𑀼𑀤𑀬𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄. 𑀮𑁄𑀓𑀦𑀺𑀭𑁄𑀥𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀮𑁄𑀓𑀦𑀺𑀭𑁄𑀥𑁄 𑀢𑀣𑀸𑀕𑀢𑀲𑁆𑀲 𑀲𑀘𑁆𑀙𑀺𑀓𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀢𑀣𑀸𑀕𑀢𑀲𑁆𑀲 𑀪𑀸𑀯𑀺𑀢𑀸.

‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀬𑀣𑀸𑀯𑀸𑀤𑀻, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄 𑀯𑀲𑀯𑀢𑁆𑀢𑀻. 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺’’.

‘‘𑀲𑀩𑁆𑀩𑀁 𑀮𑁄𑀓𑀁 𑀅𑀪𑀺𑀜𑁆𑀜𑀸𑀬, 𑀲𑀩𑁆𑀩𑀁 𑀮𑁄𑀓𑁂 𑀬𑀣𑀸𑀢𑀣𑀁;

𑀲𑀩𑁆𑀩𑀁 𑀮𑁄𑀓𑀁 [𑀲𑀩𑁆𑀩𑀮𑁄𑀓 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀲𑀁𑀬𑀼𑀢𑁆𑀢𑁄, 𑀲𑀩𑁆𑀩𑀮𑁄𑀓𑁂 𑀅𑀦𑀽𑀧𑀬𑁄.

‘‘𑀲 𑀯𑁂 𑀲𑀩𑁆𑀩𑀸𑀪𑀺𑀪𑀽 𑀥𑀻𑀭𑁄, 𑀲𑀩𑁆𑀩𑀕𑀦𑁆𑀣𑀧𑁆𑀧𑀫𑁄𑀘𑀦𑁄;

𑀨𑀼𑀝𑁆𑀞’𑀲𑁆𑀲 𑀧𑀭𑀫𑀸 𑀲𑀦𑁆𑀢𑀺, 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀁.

‘‘𑀏𑀲 𑀔𑀻𑀡𑀸𑀲𑀯𑁄 𑀩𑀼𑀤𑁆𑀥𑁄, 𑀅𑀦𑀻𑀖𑁄 𑀙𑀺𑀦𑁆𑀦𑀲𑀁𑀲𑀬𑁄;

𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄, 𑀯𑀺𑀫𑀼𑀢𑁆𑀢𑁄 𑀉𑀧𑀥𑀺𑀲𑀗𑁆𑀔𑀬𑁂.

‘‘𑀏𑀲 𑀲𑁄 𑀪𑀕𑀯𑀸 𑀩𑀼𑀤𑁆𑀥𑁄, 𑀏𑀲 𑀲𑀻𑀳𑁄 𑀅𑀦𑀼𑀢𑁆𑀢𑀭𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀻.

‘‘𑀇𑀢𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀬𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸;

𑀲𑀗𑁆𑀕𑀫𑁆𑀫 𑀢𑀁 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

‘‘𑀤𑀦𑁆𑀢𑁄 𑀤𑀫𑀬𑀢𑀁 𑀲𑁂𑀝𑁆𑀞𑁄, 𑀲𑀦𑁆𑀢𑁄 𑀲𑀫𑀬𑀢𑀁 𑀇𑀲𑀺;

𑀫𑀼𑀢𑁆𑀢𑁄 𑀫𑁄𑀘𑀬𑀢𑀁 𑀅𑀕𑁆𑀕𑁄, 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄.

‘‘𑀇𑀢𑀺 𑀳𑁂𑀢𑀁 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀢𑁂 [𑀦𑀢𑁆𑀣𑀺 𑀢𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. 𑀢𑀢𑀺𑀬𑀁;