𑁪. 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀁

𑁨𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀓𑁂𑀢𑁂 𑀯𑀺𑀳𑀭𑀢𑀺 𑀓𑀸𑀴𑀓𑀸𑀭𑀸𑀫𑁂 [𑀓𑁄𑀴𑀺𑀓𑀸𑀭𑀸𑀫𑁂 (𑀓.)]. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺.

‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀁 𑀢𑀣𑀸𑀕𑀢𑀲𑁆𑀲 𑀯𑀺𑀤𑀺𑀢𑀁, 𑀢𑀁 𑀢𑀣𑀸𑀕𑀢𑁄 𑀦 𑀉𑀧𑀝𑁆𑀞𑀸𑀲𑀺.

‘‘𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀯𑀤𑁂𑀬𑁆𑀬𑀁, 𑀢𑀁 𑀫𑀫𑀲𑁆𑀲 𑀫𑀼𑀲𑀸.

‘‘𑀬𑀁, 𑀪𑀺𑀓𑁆𑀔𑀯𑁂…𑀧𑁂… 𑀢𑀫𑀳𑀁 𑀚𑀸𑀦𑀸𑀫𑀺 𑀘 𑀦 𑀘 𑀚𑀸𑀦𑀸𑀫𑀻𑀢𑀺 𑀯𑀤𑁂𑀬𑁆𑀬𑀁, 𑀢𑀁𑀧𑀲𑁆𑀲 [𑀢𑀁 𑀧𑀺𑀲𑁆𑀲 (𑀲𑁆𑀬𑀸. 𑀓𑀁.), 𑀢𑀁 𑀫𑀫𑀲𑁆𑀲 (𑀓.)] 𑀢𑀸𑀤𑀺𑀲𑀫𑁂𑀯.

‘‘𑀬𑀁, 𑀪𑀺𑀓𑁆𑀔𑀯𑁂…𑀧𑁂… 𑀢𑀫𑀳𑀁 𑀦𑁂𑀯 𑀚𑀸𑀦𑀸𑀫𑀺 𑀦 𑀦 𑀚𑀸𑀦𑀸𑀫𑀻𑀢𑀺 𑀯𑀤𑁂𑀬𑁆𑀬𑀁, 𑀢𑀁 𑀫𑀫𑀲𑁆𑀲 𑀓𑀮𑀺.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀤𑀝𑁆𑀞𑀸 𑀤𑀝𑁆𑀞𑀩𑁆𑀩𑀁, 𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀺, 𑀅𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀺, 𑀤𑀝𑁆𑀞𑀩𑁆𑀩𑀁 𑀦 𑀫𑀜𑁆𑀜𑀢𑀺, 𑀤𑀝𑁆𑀞𑀸𑀭𑀁 𑀦 𑀫𑀜𑁆𑀜𑀢𑀺; 𑀲𑀼𑀢𑁆𑀯𑀸 𑀲𑁄𑀢𑀩𑁆𑀩𑀁, 𑀲𑀼𑀢𑀁 𑀦 𑀫𑀜𑁆𑀜𑀢𑀺, 𑀅𑀲𑀼𑀢𑀁 𑀦 𑀫𑀜𑁆𑀜𑀢𑀺, 𑀲𑁄𑀢𑀩𑁆𑀩𑀁 𑀦 𑀫𑀜𑁆𑀜𑀢𑀺, 𑀲𑁄𑀢𑀸𑀭𑀁 𑀦 𑀫𑀜𑁆𑀜𑀢𑀺; 𑀫𑀼𑀢𑁆𑀯𑀸 𑀫𑁄𑀢𑀩𑁆𑀩𑀁, 𑀫𑀼𑀢𑀁 𑀦 𑀫𑀜𑁆𑀜𑀢𑀺, 𑀅𑀫𑀼𑀢𑀁 𑀦 𑀫𑀜𑁆𑀜𑀢𑀺, 𑀫𑁄𑀢𑀩𑁆𑀩𑀁 𑀦 𑀫𑀜𑁆𑀜𑀢𑀺, 𑀫𑁄𑀢𑀸𑀭𑀁 𑀦 𑀫𑀜𑁆𑀜𑀢𑀺; 𑀯𑀺𑀜𑁆𑀜𑀢𑁆𑀯𑀸 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀯𑀺𑀜𑁆𑀜𑀸𑀢𑀁 𑀦 𑀫𑀜𑁆𑀜𑀢𑀺, 𑀅𑀯𑀺𑀜𑁆𑀜𑀸𑀢𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀸𑀭𑀁 𑀦 𑀫𑀜𑁆𑀜𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀢𑀸𑀤𑀻𑀬𑁂𑀯 𑀢𑀸𑀤𑀻 [𑀢𑀸𑀤𑀺𑀲𑁄𑀯 𑀢𑀸𑀤𑀻 (𑀲𑁆𑀬𑀸. 𑀓𑀁.), 𑀢𑀸𑀤𑀺𑀲𑁂 𑀬𑁂𑀯 𑀢𑀸𑀤𑀻 (𑀧𑀻.), 𑀢𑀸𑀤𑀻𑀬𑁂𑀯 𑀢𑀸𑀤𑀻𑀬𑁂𑀯𑁂𑀓𑀸 (𑀓.)]. 𑀢𑀫𑁆𑀳𑀸 𑀘 𑀧𑀦 𑀢𑀸𑀤𑀺𑀫𑁆𑀳𑀸 [𑀢𑀸𑀤𑀺𑀢𑀫𑁆𑀳𑀸 (𑀲𑀻. 𑀧𑀻.)] 𑀅𑀜𑁆𑀜𑁄 𑀢𑀸𑀤𑀻 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺.

‘‘𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸,

𑀅𑀚𑁆𑀛𑁄𑀲𑀺𑀢𑀁 𑀲𑀘𑁆𑀘𑀫𑀼𑀢𑀁 𑀧𑀭𑁂𑀲𑀁;

𑀦 𑀢𑁂𑀲𑀼 𑀢𑀸𑀤𑀻 𑀲𑀬𑀲𑀁𑀯𑀼𑀢𑁂𑀲𑀼,

𑀲𑀘𑁆𑀘𑀁 𑀫𑀼𑀲𑀸 𑀯𑀸𑀧𑀺 𑀧𑀭𑀁 𑀤𑀳𑁂𑀬𑁆𑀬.

‘‘𑀏𑀢𑀜𑁆𑀘 𑀲𑀮𑁆𑀮𑀁 𑀧𑀝𑀺𑀓𑀘𑁆𑀘 [𑀧𑀝𑀺𑀕𑀘𑁆𑀘 (𑀲𑀻. 𑀧𑀻.)] 𑀤𑀺𑀲𑁆𑀯𑀸,

𑀅𑀚𑁆𑀛𑁄𑀲𑀺𑀢𑀸 𑀬𑀢𑁆𑀣 𑀧𑀚𑀸 𑀯𑀺𑀲𑀢𑁆𑀢𑀸;

𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀁,

𑀅𑀚𑁆𑀛𑁄𑀲𑀺𑀢𑀁 𑀦𑀢𑁆𑀣𑀺 𑀢𑀣𑀸𑀕𑀢𑀸𑀦’’𑀦𑁆𑀢𑀺. 𑀘𑀢𑀼𑀢𑁆𑀣𑀁;