𑁨. 𑀤𑀼𑀢𑀺𑀬𑀉𑀭𑀼𑀯𑁂𑀮𑀲𑀼𑀢𑁆𑀢𑀁

𑁨𑁨. ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀸𑀫𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀲𑀼𑀢𑀁 𑀦𑁂𑀢𑀁 [𑀫𑁂𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀓.)], 𑀪𑁄 𑀕𑁄𑀢𑀫 𑁋 𑀦 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀤𑁆𑀥𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀢𑀣𑁂𑀯. 𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀤𑁆𑀥𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’’𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀦𑀬𑀺𑀫𑁂 [𑀦 𑀯𑀢 𑀫𑁂 (𑀲𑀻. 𑀧𑀻.), 𑀦 𑀘𑀬𑀺𑀫𑁂 (𑀲𑁆𑀬𑀸. 𑀓𑀁.), 𑀦 𑀯𑀢𑀺𑀫𑁂 (?)] 𑀆𑀬𑀲𑁆𑀫𑀦𑁆𑀢𑁄 𑀚𑀸𑀦𑀦𑁆𑀢𑀺 𑀣𑁂𑀭𑀁 𑀯𑀸 𑀣𑁂𑀭𑀓𑀭𑀡𑁂 𑀯𑀸 𑀥𑀫𑁆𑀫𑁂’𑀢𑀺. 𑀯𑀼𑀤𑁆𑀥𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀆𑀲𑀻𑀢𑀺𑀓𑁄 𑀯𑀸 𑀦𑀸𑀯𑀼𑀢𑀺𑀓𑁄 𑀯𑀸 𑀯𑀲𑁆𑀲𑀲𑀢𑀺𑀓𑁄 𑀯𑀸 𑀚𑀸𑀢𑀺𑀬𑀸. 𑀲𑁄 𑀘 𑀳𑁄𑀢𑀺 𑀅𑀓𑀸𑀮𑀯𑀸𑀤𑀻 𑀅𑀪𑀽𑀢𑀯𑀸𑀤𑀻 𑀅𑀦𑀢𑁆𑀣𑀯𑀸𑀤𑀻 𑀅𑀥𑀫𑁆𑀫𑀯𑀸𑀤𑀻 𑀅𑀯𑀺𑀦𑀬𑀯𑀸𑀤𑀻, 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀅𑀓𑀸𑀮𑁂𑀦 𑀅𑀦𑀧𑀤𑁂𑀲𑀁 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀣 𑀔𑁄 𑀲𑁄 ‘𑀩𑀸𑀮𑁄 𑀣𑁂𑀭𑁄’𑀢𑁆𑀯𑁂𑀯 [𑀢𑁂𑀯 (𑀲𑀻. 𑀧𑀻.)] 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀤𑀳𑀭𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀬𑀼𑀯𑀸 𑀲𑀼𑀲𑀼𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸. 𑀲𑁄 𑀘 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀅𑀣 𑀔𑁄 𑀲𑁄 ‘𑀧𑀡𑁆𑀟𑀺𑀢𑁄 𑀣𑁂𑀭𑁄’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀣𑁂𑀭𑀓𑀭𑀡𑀸 𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 [𑀲𑀸𑀢𑁆𑀣𑀸 𑀲𑀩𑁆𑀬𑀜𑁆𑀚𑀦𑀸 (𑀲𑀻. 𑀧𑀻.)] 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 [𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀸 (𑀲𑀻.)] 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 [𑀥𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀣𑁂𑀭𑀓𑀭𑀡𑀸 𑀥𑀫𑁆𑀫𑀸’’𑀢𑀺.

‘‘𑀬𑁄 𑀉𑀤𑁆𑀥𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀫𑁆𑀨𑀜𑁆𑀘 𑀩𑀳𑀼 𑀪𑀸𑀲𑀢𑀺;

𑀅𑀲𑀫𑀸𑀳𑀺𑀢𑀲𑀗𑁆𑀓𑀧𑁆𑀧𑁄, 𑀅𑀲𑀤𑁆𑀥𑀫𑁆𑀫𑀭𑀢𑁄 𑀫𑀕𑁄;

𑀆𑀭𑀸 𑀲𑁄 𑀣𑀸𑀯𑀭𑁂𑀬𑁆𑀬𑀫𑁆𑀳𑀸, 𑀧𑀸𑀧𑀤𑀺𑀝𑁆𑀞𑀺 𑀅𑀦𑀸𑀤𑀭𑁄.

‘‘𑀬𑁄 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀲𑀼𑀢𑀯𑀸 𑀧𑀝𑀺𑀪𑀸𑀦𑀯𑀸;

𑀲𑀜𑁆𑀜𑀢𑁄 𑀥𑀻𑀭𑁄 𑀥𑀫𑁆𑀫𑁂𑀲𑀼 [𑀲𑀜𑁆𑀜𑀢𑁄 𑀥𑀻𑀭𑀥𑀫𑁆𑀫𑁂𑀲𑀼 (𑀲𑀻.), 𑀲𑀁𑀬𑀼𑀢𑁆𑀢𑁄 𑀣𑀺𑀭𑀥𑀫𑁆𑀫𑁂𑀲𑀼 (𑀲𑁆𑀬𑀸. 𑀓𑀁.)], 𑀧𑀜𑁆𑀜𑀸𑀬𑀢𑁆𑀣𑀁 𑀯𑀺𑀧𑀲𑁆𑀲𑀢𑀺.

‘‘𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀔𑀺𑀮𑁄 𑀧𑀝𑀺𑀪𑀸𑀦𑀯𑀸;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻.

‘‘𑀢𑀫𑀳𑀁 𑀯𑀤𑀸𑀫𑀺 𑀣𑁂𑀭𑁄𑀢𑀺, 𑀬𑀲𑁆𑀲 𑀦𑁄 𑀲𑀦𑁆𑀢𑀺 𑀆𑀲𑀯𑀸;

𑀆𑀲𑀯𑀸𑀦𑀁 𑀔𑀬𑀸 𑀪𑀺𑀓𑁆𑀔𑀼, 𑀲𑁄 𑀣𑁂𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑀤𑀼𑀢𑀺𑀬𑀁;