𑁭. 𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀁

𑁬𑁮. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀣𑀸𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀢𑀻𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺. 𑀅𑀦𑀸𑀕𑀢𑀁 𑀯𑀸, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺. 𑀏𑀢𑀭𑀳𑀺 𑀯𑀸, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬 𑁋 ‘𑀏𑀯𑀁 𑀳𑁄𑀢𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦’’’𑀦𑁆𑀢𑀺 [𑀏𑀯𑀁 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 (𑀲𑀻. 𑀧𑀻. 𑀓.), 𑀏𑀯𑀁 𑀳𑁄𑀢𑀺 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 (𑀲𑁆𑀬𑀸. 𑀓𑀁.)].

‘‘𑀓𑀣𑀸𑀲𑀫𑁆𑀧𑀬𑁄𑀕𑁂𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄 𑀬𑀤𑀺 𑀯𑀸 𑀓𑀘𑁆𑀙𑁄 𑀬𑀤𑀺 𑀯𑀸 𑀅𑀓𑀘𑁆𑀙𑁄𑀢𑀺. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀦 𑀏𑀓𑀁𑀲𑁂𑀦 𑀩𑁆𑀬𑀸𑀓𑀭𑁄𑀢𑀺, 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀦 𑀯𑀺𑀪𑀚𑁆𑀚 𑀩𑁆𑀬𑀸𑀓𑀭𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀦 𑀧𑀝𑀺𑀧𑀼𑀘𑁆𑀙𑀸 𑀩𑁆𑀬𑀸𑀓𑀭𑁄𑀢𑀺, 𑀞𑀧𑀦𑀻𑀬𑀁 𑀧𑀜𑁆𑀳𑀁 𑀦 𑀞𑀧𑁂𑀢𑀺 [𑀣𑀧𑀦𑀻𑀬𑀁 𑀧𑀜𑁆𑀳𑀁 𑀦 𑀣𑀧𑁂𑀢𑀺 (𑀓.)], 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑀘𑁆𑀙𑁄 𑀳𑁄𑀢𑀺. 𑀲𑀘𑁂 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀭𑁄𑀢𑀺, 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀯𑀺𑀪𑀚𑁆𑀚 𑀩𑁆𑀬𑀸𑀓𑀭𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑀁 𑀧𑀜𑁆𑀳𑀁 𑀧𑀝𑀺𑀧𑀼𑀘𑁆𑀙𑀸 𑀩𑁆𑀬𑀸𑀓𑀭𑁄𑀢𑀺, 𑀞𑀧𑀦𑀻𑀬𑀁 𑀧𑀜𑁆𑀳𑀁 𑀞𑀧𑁂𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀓𑀘𑁆𑀙𑁄 𑀳𑁄𑀢𑀺.

‘‘𑀓𑀣𑀸𑀲𑀫𑁆𑀧𑀬𑁄𑀕𑁂𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄 𑀬𑀤𑀺 𑀯𑀸 𑀓𑀘𑁆𑀙𑁄 𑀬𑀤𑀺 𑀯𑀸 𑀅𑀓𑀘𑁆𑀙𑁄𑀢𑀺. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀞𑀸𑀦𑀸𑀞𑀸𑀦𑁂 𑀦 𑀲𑀡𑁆𑀞𑀸𑀢𑀺 𑀧𑀭𑀺𑀓𑀧𑁆𑀧𑁂 𑀦 𑀲𑀡𑁆𑀞𑀸𑀢𑀺 𑀅𑀜𑁆𑀜𑀸𑀢𑀯𑀸𑀤𑁂 [𑀅𑀜𑁆𑀜𑀯𑀸𑀤𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀜𑁆𑀜𑀸𑀢𑀯𑀸𑀭𑁂 (𑀓.)] 𑀦 𑀲𑀡𑁆𑀞𑀸𑀢𑀺 𑀧𑀝𑀺𑀧𑀤𑀸𑀬 𑀦 𑀲𑀡𑁆𑀞𑀸𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑀘𑁆𑀙𑁄 𑀳𑁄𑀢𑀺. 𑀲𑀘𑁂 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀞𑀸𑀦𑀸𑀞𑀸𑀦𑁂 𑀲𑀡𑁆𑀞𑀸𑀢𑀺 𑀧𑀭𑀺𑀓𑀧𑁆𑀧𑁂 𑀲𑀡𑁆𑀞𑀸𑀢𑀺 𑀅𑀜𑁆𑀜𑀸𑀢𑀯𑀸𑀤𑁂 𑀲𑀡𑁆𑀞𑀸𑀢𑀺 𑀧𑀝𑀺𑀧𑀤𑀸𑀬 𑀲𑀡𑁆𑀞𑀸𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀓𑀘𑁆𑀙𑁄 𑀳𑁄𑀢𑀺.

‘‘𑀓𑀣𑀸𑀲𑀫𑁆𑀧𑀬𑁄𑀕𑁂𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄 𑀬𑀤𑀺 𑀯𑀸 𑀓𑀘𑁆𑀙𑁄 𑀬𑀤𑀺 𑀯𑀸 𑀅𑀓𑀘𑁆𑀙𑁄𑀢𑀺. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺, 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑀘𑁆𑀙𑁄 𑀳𑁄𑀢𑀺. 𑀲𑀘𑁂 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺 𑀦 𑀩𑀳𑀺𑀤𑁆𑀥𑀸 𑀓𑀣𑀁 𑀅𑀧𑀦𑀸𑀫𑁂𑀢𑀺, 𑀦 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀓𑀘𑁆𑀙𑁄 𑀳𑁄𑀢𑀺.

‘‘𑀓𑀣𑀸𑀲𑀫𑁆𑀧𑀬𑁄𑀕𑁂𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄 𑀬𑀤𑀺 𑀯𑀸 𑀓𑀘𑁆𑀙𑁄 𑀬𑀤𑀺 𑀯𑀸 𑀅𑀓𑀘𑁆𑀙𑁄𑀢𑀺. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀪𑀺𑀳𑀭𑀢𑀺 𑀅𑀪𑀺𑀫𑀤𑁆𑀤𑀢𑀺 𑀅𑀦𑀼𑀧𑀚𑀕𑁆𑀖𑀢𑀺 [𑀅𑀦𑀼𑀲𑀁𑀚𑀕𑁆𑀖𑀢𑀺 (𑀓.)] 𑀔𑀮𑀺𑀢𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀓𑀘𑁆𑀙𑁄 𑀳𑁄𑀢𑀺. 𑀲𑀘𑁂 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦𑀸𑀪𑀺𑀳𑀭𑀢𑀺 𑀦𑀸𑀪𑀺𑀫𑀤𑁆𑀤𑀢𑀺 𑀦 𑀅𑀦𑀼𑀧𑀚𑀕𑁆𑀖𑀢𑀺 𑀦 𑀔𑀮𑀺𑀢𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀲𑀦𑁆𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀓𑀘𑁆𑀙𑁄 𑀳𑁄𑀢𑀺.

‘‘𑀓𑀣𑀸𑀲𑀫𑁆𑀧𑀬𑁄𑀕𑁂𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄 𑀬𑀤𑀺 𑀯𑀸 𑀲𑀉𑀧𑀦𑀺𑀲𑁄 𑀬𑀤𑀺 𑀯𑀸 𑀅𑀦𑀼𑀧𑀦𑀺𑀲𑁄𑀢𑀺. 𑀅𑀦𑁄𑀳𑀺𑀢𑀲𑁄𑀢𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀦𑀺𑀲𑁄 𑀳𑁄𑀢𑀺, 𑀑𑀳𑀺𑀢𑀲𑁄𑀢𑁄 𑀲𑀉𑀧𑀦𑀺𑀲𑁄 𑀳𑁄𑀢𑀺. 𑀲𑁄 𑀲𑀉𑀧𑀦𑀺𑀲𑁄 𑀲𑀫𑀸𑀦𑁄 𑀅𑀪𑀺𑀚𑀸𑀦𑀸𑀢𑀺 𑀏𑀓𑀁 𑀥𑀫𑁆𑀫𑀁, 𑀧𑀭𑀺𑀚𑀸𑀦𑀸𑀢𑀺 𑀏𑀓𑀁 𑀥𑀫𑁆𑀫𑀁, 𑀧𑀚𑀳𑀢𑀺 𑀏𑀓𑀁 𑀥𑀫𑁆𑀫𑀁, 𑀲𑀘𑁆𑀙𑀺𑀓𑀭𑁄𑀢𑀺 𑀏𑀓𑀁 𑀥𑀫𑁆𑀫𑀁. 𑀲𑁄 𑀅𑀪𑀺𑀚𑀸𑀦𑀦𑁆𑀢𑁄 𑀏𑀓𑀁 𑀥𑀫𑁆𑀫𑀁, 𑀧𑀭𑀺𑀚𑀸𑀦𑀦𑁆𑀢𑁄 𑀏𑀓𑀁 𑀥𑀫𑁆𑀫𑀁, 𑀧𑀚𑀳𑀦𑁆𑀢𑁄 𑀏𑀓𑀁 𑀥𑀫𑁆𑀫𑀁, 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀏𑀓𑀁 𑀥𑀫𑁆𑀫𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀺. 𑀏𑀢𑀤𑀢𑁆𑀣𑀸, 𑀪𑀺𑀓𑁆𑀔𑀯𑁂, 𑀓𑀣𑀸; 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸; 𑀏𑀢𑀤𑀢𑁆𑀣𑀸 𑀉𑀧𑀦𑀺𑀲𑀸; 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁, 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺.

‘‘𑀬𑁂 𑀯𑀺𑀭𑀼𑀤𑁆𑀥𑀸 𑀲𑀮𑁆𑀮𑀧𑀦𑁆𑀢𑀺, 𑀯𑀺𑀦𑀺𑀯𑀺𑀝𑁆𑀞𑀸 𑀲𑀫𑀼𑀲𑁆𑀲𑀺𑀢𑀸;

𑀅𑀦𑀭𑀺𑀬𑀕𑀼𑀡𑀫𑀸𑀲𑀚𑁆𑀚, 𑀅𑀜𑁆𑀜𑁄𑀜𑁆𑀜𑀯𑀺𑀯𑀭𑁂𑀲𑀺𑀦𑁄.

‘‘𑀤𑀼𑀩𑁆𑀪𑀸𑀲𑀺𑀢𑀁 𑀯𑀺𑀓𑁆𑀔𑀮𑀺𑀢𑀁, 𑀲𑀫𑁆𑀧𑀫𑁄𑀳𑀁 [𑀲𑀲𑀫𑁆𑀫𑁄𑀳𑀁 (𑀓.)] 𑀧𑀭𑀸𑀚𑀬𑀁;

𑀅𑀜𑁆𑀜𑁄𑀜𑁆𑀜𑀲𑁆𑀲𑀸𑀪𑀺𑀦𑀦𑁆𑀤𑀦𑁆𑀢𑀺, 𑀢𑀤𑀭𑀺𑀬𑁄 𑀓𑀣𑀦𑀸𑀘𑀭𑁂 [𑀢𑀤𑀭𑀺𑀬𑁄 𑀦 𑀓𑀣𑀁 𑀯𑀤𑁂 (𑀓.)].

‘‘𑀲𑀘𑁂 𑀘𑀲𑁆𑀲 𑀓𑀣𑀸𑀓𑀸𑀫𑁄, 𑀓𑀸𑀮𑀫𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀥𑀫𑁆𑀫𑀝𑁆𑀞𑀧𑀝𑀺𑀲𑀁𑀬𑀼𑀢𑁆𑀢𑀸, 𑀬𑀸 𑀅𑀭𑀺𑀬𑀘𑀭𑀺𑀢𑀸 [𑀅𑀭𑀺𑀬𑀜𑁆𑀘𑀭𑀺𑀢𑀸 (𑀲𑀻.), 𑀅𑀭𑀺𑀬𑀸𑀤𑀺𑀓𑀸 (𑀓.)] 𑀓𑀣𑀸.

‘‘𑀢𑀁 𑀓𑀣𑀁 𑀓𑀣𑀬𑁂 𑀥𑀻𑀭𑁄, 𑀅𑀯𑀺𑀭𑀼𑀤𑁆𑀥𑁄 𑀅𑀦𑀼𑀲𑁆𑀲𑀺𑀢𑁄;

𑀅𑀦𑀼𑀦𑁆𑀦𑀢𑁂𑀦 𑀫𑀦𑀲𑀸, 𑀅𑀧𑀴𑀸𑀲𑁄 𑀅𑀲𑀸𑀳𑀲𑁄.

‘‘𑀅𑀦𑀼𑀲𑀽𑀬𑀸𑀬𑀫𑀸𑀦𑁄 𑀲𑁄, 𑀲𑀫𑁆𑀫𑀤𑀜𑁆𑀜𑀸𑀬 𑀪𑀸𑀲𑀢𑀺;

𑀲𑀼𑀪𑀸𑀲𑀺𑀢𑀁 𑀅𑀦𑀼𑀫𑁄𑀤𑁂𑀬𑁆𑀬, 𑀤𑀼𑀩𑁆𑀪𑀝𑁆𑀞𑁂 𑀦𑀸𑀧𑀲𑀸𑀤𑀬𑁂 [𑀦𑀸𑀯𑀲𑀸𑀤𑀬𑁂 (𑀲𑀻. 𑀧𑀻.)].

‘‘𑀉𑀧𑀸𑀭𑀫𑁆𑀪𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀔𑀮𑀺𑀢𑀜𑁆𑀘 𑀦 𑀕𑀸𑀳𑀬𑁂 [𑀦 𑀪𑀸𑀲𑀬𑁂 (𑀓.)];

𑀦𑀸𑀪𑀺𑀳𑀭𑁂 𑀦𑀸𑀪𑀺𑀫𑀤𑁆𑀤𑁂, 𑀦 𑀯𑀸𑀘𑀁 𑀧𑀬𑀼𑀢𑀁 𑀪𑀡𑁂.

‘‘𑀅𑀜𑁆𑀜𑀸𑀢𑀢𑁆𑀣𑀁 𑀧𑀲𑀸𑀤𑀢𑁆𑀣𑀁, 𑀲𑀢𑀁 𑀯𑁂 𑀳𑁄𑀢𑀺 𑀫𑀦𑁆𑀢𑀦𑀸;

𑀏𑀯𑀁 𑀔𑁄 𑀅𑀭𑀺𑀬𑀸 𑀫𑀦𑁆𑀢𑁂𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀫𑀦𑁆𑀢𑀦𑀸;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀦 𑀲𑀫𑀼𑀲𑁆𑀲𑁂𑀬𑁆𑀬 𑀫𑀦𑁆𑀢𑀬𑁂’’𑀢𑀺. 𑀲𑀢𑁆𑀢𑀫𑀁;