(𑁬) 𑁧. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀧𑀞𑀫𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁫𑁨. 𑀅𑀣 𑀔𑁄 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀫𑀲𑁆𑀲𑀼, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸; 𑀢𑁂 𑀘𑀫𑁆𑀳𑀸 𑀅𑀓𑀢𑀓𑀮𑁆𑀬𑀸𑀡𑀸 𑀅𑀓𑀢𑀓𑀼𑀲𑀮𑀸 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸. 𑀑𑀯𑀤𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄, 𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀬𑀁 𑀅𑀫𑁆𑀳𑀸𑀓𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀢𑀕𑁆𑀖 𑀢𑀼𑀫𑁆𑀳𑁂, 𑀩𑁆𑀭𑀸𑀳𑁆𑀫𑀡𑀸, 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸; 𑀢𑁂 𑀘𑀢𑁆𑀣 𑀅𑀓𑀢𑀓𑀮𑁆𑀬𑀸𑀡𑀸 𑀅𑀓𑀢𑀓𑀼𑀲𑀮𑀸 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸. 𑀉𑀧𑀦𑀻𑀬𑀢𑀺 𑀔𑁄 𑀅𑀬𑀁, 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁄 𑀚𑀭𑀸𑀬 𑀩𑁆𑀬𑀸𑀥𑀺𑀦𑀸 𑀫𑀭𑀡𑁂𑀦. 𑀏𑀯𑀁 𑀉𑀧𑀦𑀻𑀬𑀫𑀸𑀦𑁂 𑀔𑁄, 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁂 𑀚𑀭𑀸𑀬 𑀩𑁆𑀬𑀸𑀥𑀺𑀦𑀸 𑀫𑀭𑀡𑁂𑀦, 𑀬𑁄 𑀇𑀥 𑀓𑀸𑀬𑁂𑀦 𑀲𑀁𑀬𑀫𑁄 𑀯𑀸𑀘𑀸𑀬 𑀲𑀁𑀬𑀫𑁄 𑀫𑀦𑀲𑀸 𑀲𑀁𑀬𑀫𑁄, 𑀢𑀁 𑀢𑀲𑁆𑀲 𑀧𑁂𑀢𑀲𑁆𑀲 𑀢𑀸𑀡𑀜𑁆𑀘 𑀮𑁂𑀡𑀜𑁆𑀘 𑀤𑀻𑀧𑀜𑁆𑀘 𑀲𑀭𑀡𑀜𑁆𑀘 𑀧𑀭𑀸𑀬𑀡𑀜𑁆𑀘𑀸’’𑀢𑀺.

‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼,

𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀺.

‘‘𑀬𑁄𑀥 𑀓𑀸𑀬𑁂𑀦 𑀲𑀁𑀬𑀫𑁄, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀢𑀁 𑀢𑀲𑁆𑀲 𑀧𑁂𑀢𑀲𑁆𑀲 𑀲𑀼𑀔𑀸𑀬 𑀳𑁄𑀢𑀺,

𑀬𑀁 𑀚𑀻𑀯𑀫𑀸𑀦𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺. [𑀲𑀁. 𑀦𑀺. 𑁧.𑁧𑁦𑁦] 𑀧𑀞𑀫𑀁;

𑁨. 𑀤𑀼𑀢𑀺𑀬𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁫𑁩. 𑀅𑀣 𑀔𑁄 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀫𑀲𑁆𑀲𑀼, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸; 𑀢𑁂 𑀘𑀫𑁆𑀳𑀸 𑀅𑀓𑀢𑀓𑀮𑁆𑀬𑀸𑀡𑀸 𑀅𑀓𑀢𑀓𑀼𑀲𑀮𑀸 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸. 𑀑𑀯𑀤𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄, 𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀬𑀁 𑀅𑀫𑁆𑀳𑀸𑀓𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀢𑀕𑁆𑀖 𑀢𑀼𑀫𑁆𑀳𑁂, 𑀩𑁆𑀭𑀸𑀳𑁆𑀫𑀡𑀸, 𑀚𑀺𑀡𑁆𑀡𑀸 𑀯𑀼𑀤𑁆𑀥𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀯𑀻𑀲𑀯𑀲𑁆𑀲𑀲𑀢𑀺𑀓𑀸 𑀚𑀸𑀢𑀺𑀬𑀸; 𑀢𑁂 𑀘𑀢𑁆𑀣 𑀅𑀓𑀢𑀓𑀮𑁆𑀬𑀸𑀡𑀸 𑀅𑀓𑀢𑀓𑀼𑀲𑀮𑀸 𑀅𑀓𑀢𑀪𑀻𑀭𑀼𑀢𑁆𑀢𑀸𑀡𑀸. 𑀆𑀤𑀺𑀢𑁆𑀢𑁄 𑀔𑁄 𑀅𑀬𑀁, 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁄 𑀚𑀭𑀸𑀬 𑀩𑁆𑀬𑀸𑀥𑀺𑀦𑀸 𑀫𑀭𑀡𑁂𑀦. 𑀏𑀯𑀁 𑀆𑀤𑀺𑀢𑁆𑀢𑁂 𑀔𑁄, 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁂 𑀚𑀭𑀸𑀬 𑀩𑁆𑀬𑀸𑀥𑀺𑀦𑀸 𑀫𑀭𑀡𑁂𑀦, 𑀬𑁄 𑀇𑀥 𑀓𑀸𑀬𑁂𑀦 𑀲𑀁𑀬𑀫𑁄 𑀯𑀸𑀘𑀸𑀬 𑀲𑀁𑀬𑀫𑁄 𑀫𑀦𑀲𑀸 𑀲𑀁𑀬𑀫𑁄, 𑀢𑀁 𑀢𑀲𑁆𑀲 𑀧𑁂𑀢𑀲𑁆𑀲 𑀢𑀸𑀡𑀜𑁆𑀘 𑀮𑁂𑀡𑀜𑁆𑀘 𑀤𑀻𑀧𑀜𑁆𑀘 𑀲𑀭𑀡𑀜𑁆𑀘 𑀧𑀭𑀸𑀬𑀡𑀜𑁆𑀘𑀸’’𑀢𑀺.

‘‘𑀆𑀤𑀺𑀢𑁆𑀢𑀲𑁆𑀫𑀺𑀁 𑀅𑀕𑀸𑀭𑀲𑁆𑀫𑀺𑀁, 𑀬𑀁 𑀦𑀻𑀳𑀭𑀢𑀺 𑀪𑀸𑀚𑀦𑀁;

𑀢𑀁 𑀢𑀲𑁆𑀲 𑀳𑁄𑀢𑀺 𑀅𑀢𑁆𑀣𑀸𑀬, 𑀦𑁄 𑀘 𑀬𑀁 𑀢𑀢𑁆𑀣 𑀟𑀬𑁆𑀳𑀢𑀺.

‘‘𑀏𑀯𑀁 𑀆𑀤𑀺𑀢𑁆𑀢𑁄 𑀔𑁄 [𑀏𑀯𑀁 𑀆𑀤𑀻𑀯𑀺𑀢𑁄 (𑀲𑀻. 𑀧𑀻.), 𑀏𑀯𑀁 𑀆𑀤𑀺𑀢𑁆𑀢𑀓𑁄 (𑀲𑁆𑀬𑀸. 𑀓𑀁.) 𑀲𑀁. 𑀦𑀺. 𑁧.𑁪𑁧] 𑀮𑁄𑀓𑁄, 𑀚𑀭𑀸𑀬 𑀫𑀭𑀡𑁂𑀦 𑀘;

𑀦𑀻𑀳𑀭𑁂𑀣𑁂𑀯 𑀤𑀸𑀦𑁂𑀦, 𑀤𑀺𑀦𑁆𑀦𑀁 𑀳𑁄𑀢𑀺 𑀲𑀼𑀦𑀻𑀳𑀢𑀁 [𑀲𑀼𑀦𑀺𑀩𑁆𑀪𑀢𑀁 (𑀓.)].

‘‘𑀬𑁄𑀥 𑀓𑀸𑀬𑁂𑀦 𑀲𑀁𑀬𑀫𑁄, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀢𑀁 𑀢𑀲𑁆𑀲 𑀧𑁂𑀢𑀲𑁆𑀲 𑀲𑀼𑀔𑀸𑀬 𑀳𑁄𑀢𑀺,

𑀬𑀁 𑀚𑀻𑀯𑀫𑀸𑀦𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺. 𑀤𑀼𑀢𑀺𑀬𑀁;

𑁩. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁫𑁪. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄’𑀢𑀺, 𑀪𑁄 𑀕𑁄𑀢𑀫, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 [𑀑𑀧𑀦𑀬𑀺𑀓𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀧𑀜𑁆𑀘𑀫𑀲𑀼𑀢𑁆𑀢𑀲𑁆𑀲 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. (𑀭𑀢𑁆𑀢𑁄 𑀔𑁄…𑀧𑁂… 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀭𑀸𑀕𑁂 𑀧𑀳𑀻𑀦𑀸 𑀦𑁂𑀯 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀭𑀢𑁆𑀢𑁄 𑀔𑁄…𑀧𑁂… 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.) [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀲𑀻. 𑀲𑁆𑀬𑀸. 𑀓𑀁. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺, 𑀇𑀥𑀧𑀺 𑀤𑀼𑀝𑁆𑀞𑀫𑀽𑀴𑁆𑀳𑀯𑀸𑀭𑁂𑀲𑀼] 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺…𑀧𑁂….

‘‘𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀤𑁄𑀲𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀫𑁆𑀧𑀺 [𑀦 𑀘𑁂𑀢𑀲𑀺𑀓𑀁 (𑀲𑀻. 𑀲𑁆𑀬𑀸. 𑀓.)] 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺…𑀧𑁂….

‘‘𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀭𑀺𑀩𑁆𑀩𑀸𑀚𑀓𑀲𑀼𑀢𑁆𑀢𑀁

𑁫𑁫. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄’𑀢𑀺, 𑀪𑁄 𑀕𑁄𑀢𑀫, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺.

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺…𑀧𑁂….

‘‘𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑁂𑀦…𑀧𑁂… 𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄, 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀦 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺.

‘‘𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀦𑀺𑀩𑁆𑀩𑀼𑀢𑀲𑀼𑀢𑁆𑀢𑀁

𑁫𑁬. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦’𑀦𑁆𑀢𑀺, 𑀪𑁄 𑀕𑁄𑀢𑀫, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻’’𑀢𑀺?

‘‘𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺.

‘‘𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡…𑀧𑁂… 𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀦 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺.

‘‘𑀬𑀢𑁄 𑀔𑁄 𑀅𑀬𑀁, 𑀩𑁆𑀭𑀸𑀳𑁆𑀫𑀡 [𑀬𑀢𑁄 𑀘 𑀔𑁄 𑀅𑀬𑀁 𑀩𑁆𑀭𑀸𑀳𑁆𑀫𑀡 (𑀲𑀻.), 𑀬𑀢𑁄 𑀔𑁄 𑀩𑁆𑀭𑀸𑀳𑁆𑀫𑀡 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 (𑀓.)], 𑀅𑀦𑀯𑀲𑁂𑀲𑀁 𑀭𑀸𑀕𑀓𑁆𑀔𑀬𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁂𑀲𑀁 𑀤𑁄𑀲𑀓𑁆𑀔𑀬𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁂𑀲𑀁 𑀫𑁄𑀳𑀓𑁆𑀔𑀬𑀁 𑀧𑀝𑀺𑀲𑀁𑀯𑁂𑀤𑁂𑀢𑀺; 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀦𑀺𑀩𑁆𑀩𑀸𑀦𑀁 𑀳𑁄𑀢𑀺 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻’’𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀧𑀮𑁄𑀓𑀲𑀼𑀢𑁆𑀢𑀁

𑁫𑁭. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀧𑀼𑀩𑁆𑀩𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀧𑀼𑀩𑁆𑀩𑁂 𑀲𑀼𑀤𑀁 [𑀧𑀼𑀩𑁆𑀩𑀲𑁆𑀲𑀼𑀤𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀬𑀁 𑀮𑁄𑀓𑁄 𑀅𑀯𑀻𑀘𑀺 𑀫𑀜𑁆𑀜𑁂 𑀨𑀼𑀝𑁄 𑀅𑀳𑁄𑀲𑀺 𑀫𑀦𑀼𑀲𑁆𑀲𑁂𑀳𑀺, 𑀓𑀼𑀓𑁆𑀓𑀼𑀝𑀲𑀁𑀧𑀸𑀢𑀺𑀓𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄’𑀢𑀺. 𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦𑁂𑀢𑀭𑀳𑀺 𑀫𑀦𑀼𑀲𑁆𑀲𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀦𑀼𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀸𑀫𑀸𑀧𑀺 𑀅𑀕𑀸𑀫𑀸 𑀳𑁄𑀦𑁆𑀢𑀺, 𑀦𑀺𑀕𑀫𑀸𑀧𑀺 𑀅𑀦𑀺𑀕𑀫𑀸 𑀳𑁄𑀦𑁆𑀢𑀺, 𑀦𑀕𑀭𑀸𑀧𑀺 𑀅𑀦𑀕𑀭𑀸 𑀳𑁄𑀦𑁆𑀢𑀺, 𑀚𑀦𑀧𑀤𑀸𑀧𑀺 𑀅𑀚𑀦𑀧𑀤𑀸 𑀳𑁄𑀦𑁆𑀢𑀻’’𑀢𑀺?

‘‘𑀏𑀢𑀭𑀳𑀺, 𑀩𑁆𑀭𑀸𑀳𑁆𑀫𑀡, 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸. 𑀢𑁂 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸 𑀢𑀺𑀡𑁆𑀳𑀸𑀦𑀺 𑀲𑀢𑁆𑀣𑀸𑀦𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 [𑀅𑀜𑁆𑀜𑀫𑀜𑁆𑀜𑀲𑁆𑀲 (𑀲𑀩𑁆𑀩𑀢𑁆𑀣)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀢𑁂𑀦 𑀩𑀳𑀽 𑀫𑀦𑀼𑀲𑁆𑀲𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑁂𑀢𑀭𑀳𑀺 𑀫𑀦𑀼𑀲𑁆𑀲𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀦𑀼𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀸𑀫𑀸𑀧𑀺 𑀅𑀕𑀸𑀫𑀸 𑀳𑁄𑀦𑁆𑀢𑀺, 𑀦𑀺𑀕𑀫𑀸𑀧𑀺 𑀅𑀦𑀺𑀕𑀫𑀸 𑀳𑁄𑀦𑁆𑀢𑀺, 𑀦𑀕𑀭𑀸𑀧𑀺 𑀅𑀦𑀕𑀭𑀸 𑀳𑁄𑀦𑁆𑀢𑀺, 𑀚𑀦𑀧𑀤𑀸𑀧𑀺 𑀅𑀚𑀦𑀧𑀤𑀸 𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀭𑀳𑀺 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸. 𑀢𑁂𑀲𑀁 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸𑀦𑀁 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸𑀦𑀁 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸𑀦𑀁 𑀤𑁂𑀯𑁄 𑀦 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑀢𑀺. 𑀢𑁂𑀦 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺 𑀤𑀼𑀲𑁆𑀲𑀲𑁆𑀲𑀁 𑀲𑁂𑀢𑀝𑁆𑀞𑀺𑀓𑀁 𑀲𑀮𑀸𑀓𑀸𑀯𑀼𑀢𑁆𑀢𑀁. 𑀢𑁂𑀦 𑀩𑀳𑀽 𑀫𑀦𑀼𑀲𑁆𑀲𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑁂𑀢𑀭𑀳𑀺 𑀫𑀦𑀼𑀲𑁆𑀲𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀦𑀼𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀸𑀫𑀸𑀧𑀺 𑀅𑀕𑀸𑀫𑀸 𑀳𑁄𑀦𑁆𑀢𑀺, 𑀦𑀺𑀕𑀫𑀸𑀧𑀺 𑀅𑀦𑀺𑀕𑀫𑀸 𑀳𑁄𑀦𑁆𑀢𑀺, 𑀦𑀕𑀭𑀸𑀧𑀺 𑀅𑀦𑀕𑀭𑀸 𑀳𑁄𑀦𑁆𑀢𑀺, 𑀚𑀦𑀧𑀤𑀸𑀧𑀺 𑀅𑀚𑀦𑀧𑀤𑀸 𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀭𑀳𑀺 𑀫𑀦𑀼𑀲𑁆𑀲𑀸 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸. 𑀢𑁂𑀲𑀁 𑀅𑀥𑀫𑁆𑀫𑀭𑀸𑀕𑀭𑀢𑁆𑀢𑀸𑀦𑀁 𑀯𑀺𑀲𑀫𑀮𑁄𑀪𑀸𑀪𑀺𑀪𑀽𑀢𑀸𑀦𑀁 𑀫𑀺𑀘𑁆𑀙𑀸𑀥𑀫𑁆𑀫𑀧𑀭𑁂𑀢𑀸𑀦𑀁 𑀬𑀓𑁆𑀔𑀸 𑀯𑀸𑀴𑁂 𑀅𑀫𑀦𑀼𑀲𑁆𑀲𑁂 𑀑𑀲𑁆𑀲𑀚𑁆𑀚𑀦𑁆𑀢𑀺 [𑀑𑀲𑁆𑀲𑀚𑀦𑁆𑀢𑀺 (𑀲𑀻.)], 𑀢𑁂𑀦 𑀩𑀳𑀽 𑀫𑀦𑀼𑀲𑁆𑀲𑀸 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑁂𑀢𑀭𑀳𑀺 𑀫𑀦𑀼𑀲𑁆𑀲𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀦𑀼𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀸𑀫𑀸𑀧𑀺 𑀅𑀕𑀸𑀫𑀸 𑀳𑁄𑀦𑁆𑀢𑀺, 𑀦𑀺𑀕𑀫𑀸𑀧𑀺 𑀅𑀦𑀺𑀕𑀫𑀸 𑀳𑁄𑀦𑁆𑀢𑀺, 𑀦𑀕𑀭𑀸𑀧𑀺 𑀅𑀦𑀕𑀭𑀸 𑀳𑁄𑀦𑁆𑀢𑀺, 𑀚𑀦𑀧𑀤𑀸𑀧𑀺 𑀅𑀚𑀦𑀧𑀤𑀸 𑀳𑁄𑀦𑁆𑀢𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑀁

𑁫𑁮. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 [𑀯𑀘𑁆𑀙𑀧𑀼𑀢𑁆𑀢𑁄 (𑀓.)] 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳 𑁋 ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦𑀸𑀜𑁆𑀜𑁂𑀲𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁; 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁; 𑀫𑀬𑁆𑀳𑀫𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁; 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺. 𑀬𑁂 𑀢𑁂, 𑀪𑁄 𑀕𑁄𑀢𑀫, 𑀏𑀯𑀫𑀸𑀳𑀁𑀲𑀼 ‘𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳 𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦𑀸𑀜𑁆𑀜𑁂𑀲𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁. 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁. 𑀫𑀬𑁆𑀳𑀫𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁. 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺. 𑀓𑀘𑁆𑀘𑀺 𑀢𑁂 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀼𑀢𑁆𑀢𑀯𑀸𑀤𑀺𑀦𑁄 𑀘 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄 [𑀯𑀸𑀤𑀸𑀦𑀼𑀯𑀸𑀤𑁄 (𑀓.)] 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺? 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸 𑀳𑀺 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺.

‘‘𑀬𑁂 𑀢𑁂, 𑀯𑀘𑁆𑀙, 𑀏𑀯𑀫𑀸𑀳𑀁𑀲𑀼 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳 𑁋 𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁…𑀧𑁂… 𑀦𑀸𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺 𑀦 𑀫𑁂 𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄. 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑀘 𑀧𑀦 𑀫𑀁 [𑀘 𑀧𑀦 𑀫𑀁 𑀢𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀲𑀢𑀸 𑀅𑀪𑀽𑀢𑁂𑀦. 𑀬𑁄 𑀔𑁄, 𑀯𑀘𑁆𑀙, 𑀧𑀭𑀁 𑀤𑀸𑀦𑀁 𑀤𑀤𑀦𑁆𑀢𑀁 𑀯𑀸𑀭𑁂𑀢𑀺 𑀲𑁄 𑀢𑀺𑀡𑁆𑀡𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀧𑀸𑀭𑀺𑀧𑀦𑁆𑀣𑀺𑀓𑁄. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀤𑀸𑀬𑀓𑀲𑁆𑀲 𑀧𑀼𑀜𑁆𑀜𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀮𑀸𑀪𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀅𑀢𑁆𑀢𑀸 𑀔𑀢𑁄 𑀘 𑀳𑁄𑀢𑀺 𑀉𑀧𑀳𑀢𑁄 𑀘. 𑀬𑁄 𑀔𑁄, 𑀯𑀘𑁆𑀙, 𑀧𑀭𑀁 𑀤𑀸𑀦𑀁 𑀤𑀤𑀦𑁆𑀢𑀁 𑀯𑀸𑀭𑁂𑀢𑀺 𑀲𑁄 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀧𑀸𑀭𑀺𑀧𑀦𑁆𑀣𑀺𑀓𑁄.

‘‘𑀅𑀳𑀁 𑀔𑁄 𑀧𑀦, 𑀯𑀘𑁆𑀙, 𑀏𑀯𑀁 𑀯𑀤𑀸𑀫𑀺 𑁋 𑀬𑁂 𑀳𑀺 𑀢𑁂 𑀘𑀦𑁆𑀤𑀦𑀺𑀓𑀸𑀬 𑀯𑀸 𑀑𑀮𑀺𑀕𑀮𑁆𑀮𑁂 𑀯𑀸 𑀧𑀸𑀡𑀸, 𑀢𑀢𑁆𑀭𑀧𑀺 𑀬𑁄 𑀣𑀸𑀮𑀺𑀥𑁄𑀯𑀦𑀁 [𑀣𑀸𑀮𑀓𑀥𑁄𑀯𑀦𑀁 (𑀓.)] 𑀯𑀸 𑀲𑀭𑀸𑀯𑀥𑁄𑀯𑀦𑀁 𑀯𑀸 𑀙𑀟𑁆𑀟𑁂𑀢𑀺 𑁋 𑀬𑁂 𑀢𑀢𑁆𑀣 𑀧𑀸𑀡𑀸 𑀢𑁂 𑀢𑁂𑀦 𑀬𑀸𑀧𑁂𑀦𑁆𑀢𑀽𑀢𑀺, 𑀢𑀢𑁄 𑀦𑀺𑀤𑀸𑀦𑀫𑁆𑀧𑀸𑀳𑀁, 𑀯𑀘𑁆𑀙, 𑀧𑀼𑀜𑁆𑀜𑀲𑁆𑀲 𑀆𑀕𑀫𑀁 𑀯𑀤𑀸𑀫𑀺. 𑀓𑁄 𑀧𑀦 𑀯𑀸𑀤𑁄 𑀫𑀦𑀼𑀲𑁆𑀲𑀪𑀽𑀢𑁂! 𑀅𑀧𑀺 𑀘𑀸𑀳𑀁, 𑀯𑀘𑁆𑀙, 𑀲𑀻𑀮𑀯𑀢𑁄 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀯𑀤𑀸𑀫𑀺, 𑀦𑁄 𑀢𑀣𑀸 𑀤𑀼𑀲𑁆𑀲𑀻𑀮𑀲𑁆𑀲, 𑀲𑁄 𑀘 𑀳𑁄𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄.

‘‘𑀓𑀢𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺? 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀦𑀁 𑀳𑁄𑀢𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀦𑀁 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺. 𑀇𑀫𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀺𑀧𑁆𑀧𑀳𑀻𑀦𑀸𑀦𑀺 𑀳𑁄𑀦𑁆𑀢𑀺.

‘‘𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺? 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀢𑀺 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁂 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀯𑀤𑀸𑀫𑀻’’𑀢𑀺.

‘‘𑀇𑀢𑀺 𑀓𑀡𑁆𑀳𑀸𑀲𑀼 𑀲𑁂𑀢𑀸𑀲𑀼, 𑀭𑁄𑀳𑀺𑀡𑀻𑀲𑀼 𑀳𑀭𑀻𑀲𑀼 𑀯𑀸;

𑀓𑀫𑁆𑀫𑀸𑀲𑀸𑀲𑀼 𑀲𑀭𑀽𑀧𑀸𑀲𑀼, 𑀕𑁄𑀲𑀼 𑀧𑀸𑀭𑁂𑀯𑀢𑀸𑀲𑀼 𑀯𑀸.

‘‘𑀬𑀸𑀲𑀼 𑀓𑀸𑀲𑀼𑀘𑀺 𑀏𑀢𑀸𑀲𑀼, 𑀤𑀦𑁆𑀢𑁄 𑀚𑀸𑀬𑀢𑀺 𑀧𑀼𑀗𑁆𑀕𑀯𑁄;

𑀥𑁄𑀭𑀬𑁆𑀳𑁄 𑀩𑀮𑀲𑀫𑁆𑀧𑀦𑁆𑀦𑁄, 𑀓𑀮𑁆𑀬𑀸𑀡𑀚𑀯𑀦𑀺𑀓𑁆𑀓𑀫𑁄;

𑀢𑀫𑁂𑀯 𑀪𑀸𑀭𑁂 𑀬𑀼𑀜𑁆𑀚𑀦𑁆𑀢𑀺, 𑀦𑀸𑀲𑁆𑀲 𑀯𑀡𑁆𑀡𑀁 𑀧𑀭𑀺𑀓𑁆𑀔𑀭𑁂.

‘‘𑀏𑀯𑀫𑁂𑀯𑀁 𑀫𑀦𑀼𑀲𑁆𑀲𑁂𑀲𑀼, 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀚𑀸𑀢𑀺𑀬𑁂;

𑀔𑀢𑁆𑀢𑀺𑀬𑁂 𑀩𑁆𑀭𑀸𑀳𑁆𑀫𑀡𑁂 𑀯𑁂𑀲𑁆𑀲𑁂, 𑀲𑀼𑀤𑁆𑀤𑁂 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑁂.

‘‘𑀬𑀸𑀲𑀼 𑀓𑀸𑀲𑀼𑀘𑀺 𑀏𑀢𑀸𑀲𑀼, 𑀤𑀦𑁆𑀢𑁄 𑀚𑀸𑀬𑀢𑀺 𑀲𑀼𑀩𑁆𑀩𑀢𑁄;

𑀥𑀫𑁆𑀫𑀝𑁆𑀞𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀘𑁆𑀘𑀯𑀸𑀤𑀻 𑀳𑀺𑀭𑀻𑀫𑀦𑁄.

‘‘𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻;

𑀧𑀦𑁆𑀦𑀪𑀸𑀭𑁄 𑀯𑀺𑀲𑀁𑀬𑀼𑀢𑁆𑀢𑁄, 𑀓𑀢𑀓𑀺𑀘𑁆𑀘𑁄 𑀅𑀦𑀸𑀲𑀯𑁄.

‘‘𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄;

𑀢𑀲𑁆𑀫𑀺𑀁𑀬𑁂𑀯 [𑀢𑀲𑁆𑀫𑀺𑀁 𑀯𑁂 (𑀲𑁆𑀬𑀸. 𑀓𑀁.)] 𑀯𑀺𑀭𑀚𑁂 𑀔𑁂𑀢𑁆𑀢𑁂, 𑀯𑀺𑀧𑀼𑀮𑀸 𑀳𑁄𑀢𑀺 𑀤𑀓𑁆𑀔𑀺𑀡𑀸.

‘‘𑀩𑀸𑀮𑀸 𑀘 𑀅𑀯𑀺𑀚𑀸𑀦𑀦𑁆𑀢𑀸, 𑀤𑀼𑀫𑁆𑀫𑁂𑀥𑀸 𑀅𑀲𑁆𑀲𑀼𑀢𑀸𑀯𑀺𑀦𑁄;

𑀩𑀳𑀺𑀤𑁆𑀥𑀸 𑀤𑁂𑀦𑁆𑀢𑀺 𑀤𑀸𑀦𑀸𑀦𑀺, 𑀦 𑀳𑀺 𑀲𑀦𑁆𑀢𑁂 𑀉𑀧𑀸𑀲𑀭𑁂.

‘‘𑀬𑁂 𑀘 𑀲𑀦𑁆𑀢𑁂 𑀉𑀧𑀸𑀲𑀦𑁆𑀢𑀺, 𑀲𑀧𑁆𑀧𑀜𑁆𑀜𑁂 𑀥𑀻𑀭𑀲𑀫𑁆𑀫𑀢𑁂;

𑀲𑀤𑁆𑀥𑀸 𑀘 𑀦𑁂𑀲𑀁 𑀲𑀼𑀕𑀢𑁂, 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸.

‘‘𑀤𑁂𑀯𑀮𑁄𑀓𑀜𑁆𑀘 𑀢𑁂 𑀬𑀦𑁆𑀢𑀺, 𑀓𑀼𑀮𑁂 𑀯𑀸 𑀇𑀥 𑀚𑀸𑀬𑀭𑁂;

𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀁, 𑀅𑀥𑀺𑀕𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺. 𑀲𑀢𑁆𑀢𑀫𑀁;

𑁮. 𑀢𑀺𑀓𑀡𑁆𑀡𑀲𑀼𑀢𑁆𑀢𑀁

𑁫𑁯. 𑀅𑀣 𑀔𑁄 𑀢𑀺𑀓𑀡𑁆𑀡𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀢𑀺𑀓𑀡𑁆𑀡𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀢𑁂𑀯𑀺𑀚𑁆𑀚𑀸𑀦𑀁 𑀲𑀼𑀤𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀡𑁆𑀡𑀁 𑀪𑀸𑀲𑀢𑀺 𑁋 ‘‘𑀏𑀯𑀫𑁆𑀧𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸, 𑀇𑀢𑀺𑀧𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺? ‘‘𑀇𑀥, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸, 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁, 𑀧𑀤𑀓𑁄, 𑀯𑁂𑀬𑁆𑀬𑀸𑀓𑀭𑀡𑁄, 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄𑀢𑀺. 𑀏𑀯𑀁 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺.

‘‘𑀅𑀜𑁆𑀜𑀣𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺? 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀢𑀺𑀓𑀡𑁆𑀡𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺, 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀅𑀬𑀫𑀲𑁆𑀲 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀅𑀬𑀫𑀲𑁆𑀲 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀫𑀲𑁆𑀲 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄’’𑀢𑀺.

‘‘𑀅𑀦𑀼𑀘𑁆𑀘𑀸𑀯𑀘𑀲𑀻𑀮𑀲𑁆𑀲, 𑀦𑀺𑀧𑀓𑀲𑁆𑀲 𑀘 𑀛𑀸𑀬𑀺𑀦𑁄;

𑀘𑀺𑀢𑁆𑀢𑀁 𑀬𑀲𑁆𑀲 𑀯𑀲𑀻𑀪𑀽𑀢𑀁, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

‘‘𑀢𑀁 𑀯𑁂 𑀢𑀫𑁄𑀦𑀼𑀤𑀁 𑀥𑀻𑀭𑀁, 𑀢𑁂𑀯𑀺𑀚𑁆𑀚𑀁 𑀫𑀘𑁆𑀘𑀼𑀳𑀸𑀬𑀺𑀦𑀁;

𑀳𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀆𑀳𑀼 𑀲𑀩𑁆𑀩𑀧𑁆𑀧𑀳𑀸𑀬𑀺𑀦𑀁.

‘‘𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀫𑁆𑀧𑀦𑁆𑀦𑀁, 𑀅𑀲𑀫𑁆𑀫𑀽𑀴𑁆𑀳𑀯𑀺𑀳𑀸𑀭𑀺𑀦𑀁;

𑀩𑀼𑀤𑁆𑀥𑀁 𑀅𑀦𑁆𑀢𑀺𑀫𑀤𑁂𑀳𑀺𑀦𑀁 [𑀅𑀦𑁆𑀢𑀺𑀫𑀲𑀸𑀭𑀻𑀭𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀕𑁄𑀢𑀫𑀁.

[𑀥. 𑀧. 𑁪𑁨𑁩; 𑀇𑀢𑀺𑀯𑀼. 𑁯𑁯] ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀻, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺.

‘‘𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀢𑀫𑀳𑀁 𑀯𑀤𑀸𑀫𑀺 𑀢𑁂𑀯𑀺𑀚𑁆𑀚𑀁, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦’’𑀦𑁆𑀢𑀺.

‘‘𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀅𑀜𑁆𑀜𑀣𑀸, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀯𑀺𑀚𑁆𑀚𑁄, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺. 𑀇𑀫𑀲𑁆𑀲 𑀘 𑀧𑀦, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀯𑀺𑀚𑁆𑀚𑁄 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁’’.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀁

𑁬𑁦. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀲𑀲𑁆𑀲𑀼, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀯𑀸 𑀲𑀤𑁆𑀥𑀁 𑀯𑀸 𑀣𑀸𑀮𑀺𑀧𑀸𑀓𑁄 𑀯𑀸 𑀤𑁂𑀬𑁆𑀬𑀥𑀫𑁆𑀫𑀁 𑀯𑀸, 𑀢𑁂𑀯𑀺𑀚𑁆𑀚𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀤𑀸𑀦𑀁 𑀤𑀤𑁂𑀬𑁆𑀬𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺? ‘‘𑀇𑀥 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁, 𑀧𑀤𑀓𑁄, 𑀯𑁂𑀬𑁆𑀬𑀸𑀓𑀭𑀡𑁄, 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄𑀢𑀺. 𑀏𑀯𑀁 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺.

‘‘𑀅𑀜𑁆𑀜𑀣𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀢𑁂𑀯𑀺𑀚𑁆𑀚𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺? 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀅𑀬𑀫𑀲𑁆𑀲 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀅𑀬𑀫𑀲𑁆𑀲 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀫𑀲𑁆𑀲 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺; 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸; 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄’’𑀢𑀺.

‘‘𑀬𑁄 𑀲𑀻𑀮𑀩𑁆𑀩𑀢𑀲𑀫𑁆𑀧𑀦𑁆𑀦𑁄, 𑀧𑀳𑀺𑀢𑀢𑁆𑀢𑁄 𑀲𑀫𑀸𑀳𑀺𑀢𑁄;

𑀘𑀺𑀢𑁆𑀢𑀁 𑀬𑀲𑁆𑀲 𑀯𑀲𑀻𑀪𑀽𑀢𑀁, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

[𑀥. 𑀧. 𑁪𑁨𑁩; 𑀇𑀢𑀺𑀯𑀼. 𑁯𑁯] ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀻, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺.

‘‘𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀢𑀫𑀳𑀁 𑀯𑀤𑀸𑀫𑀺 𑀢𑁂𑀯𑀺𑀚𑁆𑀚𑀁, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦’’𑀦𑁆𑀢𑀺.

‘‘𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀻’’𑀢𑀺. ‘‘𑀅𑀜𑁆𑀜𑀣𑀸, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀯𑀺𑀚𑁆𑀚𑁄, 𑀅𑀜𑁆𑀜𑀣𑀸 𑀘 𑀧𑀦 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺. 𑀇𑀫𑀲𑁆𑀲 𑀘, 𑀪𑁄 𑀕𑁄𑀢𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀢𑁂𑀯𑀺𑀚𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀯𑀺𑀚𑁆𑀚𑁄 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁’’.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁

𑁬𑁧. 𑀅𑀣 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀫𑀲𑁆𑀲𑀼, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫. 𑀬𑀜𑁆𑀜𑀁 𑀬𑀚𑀸𑀫𑀧𑀺 𑀬𑀚𑀸𑀧𑁂𑀫𑀧𑀺. 𑀢𑀢𑁆𑀭, 𑀪𑁄 𑀕𑁄𑀢𑀫, 𑀬𑁄 𑀘𑁂𑀯 𑀬𑀚𑀢𑀺 [𑀬𑁄 𑀘𑁂𑀯 𑀬𑀜𑁆𑀜𑀁 𑀬𑀚𑀢𑀺 (𑀲𑁆𑀬𑀸. 𑀓𑀁.)] 𑀬𑁄 𑀘 𑀬𑀚𑀸𑀧𑁂𑀢𑀺 𑀲𑀩𑁆𑀩𑁂 𑀢𑁂 𑀅𑀦𑁂𑀓𑀲𑀸𑀭𑀻𑀭𑀺𑀓𑀁 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀬𑀤𑀺𑀤𑀁 𑀬𑀜𑁆𑀜𑀸𑀥𑀺𑀓𑀭𑀡𑀁. 𑀬𑁄 𑀧𑀦𑀸𑀬𑀁, 𑀪𑁄 𑀕𑁄𑀢𑀫, 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀓𑀼𑀮𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀲𑀫𑁂𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀢𑀺, 𑀏𑀯𑀫𑀲𑁆𑀲𑀸𑀬𑀁 𑀏𑀓𑀲𑀸𑀭𑀻𑀭𑀺𑀓𑀁 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀬𑀤𑀺𑀤𑀁 𑀧𑀩𑁆𑀩𑀚𑁆𑀚𑀸𑀥𑀺𑀓𑀭𑀡’’𑀦𑁆𑀢𑀺.

‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀏𑀯𑀫𑀸𑀳 𑁋 ‘𑀏𑀣𑀸𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀬𑀣𑀸𑀧𑀝𑀺𑀧𑀦𑁆𑀦𑁄 𑀅𑀳𑀁 𑀅𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀫𑀺; 𑀏𑀣 [𑀏𑀢𑀁 (𑀓.)], 𑀢𑀼𑀫𑁆𑀳𑁂𑀧𑀺 𑀢𑀣𑀸 𑀧𑀝𑀺𑀧𑀚𑁆𑀚𑀣, 𑀬𑀣𑀸𑀧𑀝𑀺𑀧𑀦𑁆𑀦𑀸 𑀢𑀼𑀫𑁆𑀳𑁂𑀧𑀺 𑀅𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺. 𑀇𑀢𑀺 𑀅𑀬𑀜𑁆𑀘𑁂𑀯 [𑀲𑀬𑀁 𑀘𑁂𑀯 (𑀓.)] 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀭𑁂 𑀘 𑀢𑀣𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀔𑁄 𑀧𑀦 𑀳𑁄𑀦𑁆𑀢𑀺 𑀅𑀦𑁂𑀓𑀸𑀦𑀺𑀧𑀺 𑀲𑀢𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀲𑀢𑀲𑀳𑀲𑁆𑀲𑀸𑀦𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀇𑀘𑁆𑀘𑀸𑀬𑀁 𑀏𑀯𑀁 𑀲𑀦𑁆𑀢𑁂 𑀏𑀓𑀲𑀸𑀭𑀻𑀭𑀺𑀓𑀸 𑀯𑀸 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸 𑀳𑁄𑀢𑀺 𑀅𑀦𑁂𑀓𑀲𑀸𑀭𑀻𑀭𑀺𑀓𑀸 𑀯𑀸, 𑀬𑀤𑀺𑀤𑀁 𑀧𑀩𑁆𑀩𑀚𑁆𑀚𑀸𑀥𑀺𑀓𑀭𑀡’’𑀦𑁆𑀢𑀺? ‘‘𑀇𑀘𑁆𑀘𑀸𑀬𑀫𑁆𑀧𑀺 [𑀇𑀘𑁆𑀘𑀸𑀬𑀦𑁆𑀢𑁂 (𑀓.)], 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀅𑀦𑁂𑀓𑀲𑀸𑀭𑀻𑀭𑀺𑀓𑀸 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸 𑀳𑁄𑀢𑀺, 𑀬𑀤𑀺𑀤𑀁 𑀧𑀩𑁆𑀩𑀚𑁆𑀚𑀸𑀥𑀺𑀓𑀭𑀡’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀕𑀸𑀭𑀯𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀲𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀤𑁆𑀯𑀺𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀓𑀢𑀫𑀸 𑀧𑀝𑀺𑀧𑀤𑀸 𑀔𑀫𑀢𑀺 𑀅𑀧𑁆𑀧𑀢𑁆𑀣𑀢𑀭𑀸 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀸 𑀘 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀕𑁄𑀢𑀫𑁄 𑀪𑀯𑀁 𑀘𑀸𑀦𑀦𑁆𑀤𑁄. 𑀏𑀢𑁂 𑀫𑁂 𑀧𑀼𑀚𑁆𑀚𑀸, 𑀏𑀢𑁂 𑀫𑁂 𑀧𑀸𑀲𑀁𑀲𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀕𑀸𑀭𑀯𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀢𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀧𑀼𑀘𑁆𑀙𑀸𑀫𑀺 𑁋 ‘𑀓𑁂 𑀯𑀸 𑀢𑁂 𑀧𑀼𑀚𑁆𑀚𑀸 𑀓𑁂 𑀯𑀸 𑀢𑁂 𑀧𑀸𑀲𑀁𑀲𑀸’𑀢𑀺? 𑀏𑀯𑀁 𑀔𑁄 𑀢𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀘𑁆𑀙𑀸𑀫𑀺 𑁋 ‘𑀇𑀫𑀸𑀲𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀤𑁆𑀯𑀺𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀓𑀢𑀫𑀸 𑀧𑀝𑀺𑀧𑀤𑀸 𑀔𑀫𑀢𑀺 𑀅𑀧𑁆𑀧𑀢𑁆𑀣𑀢𑀭𑀸 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀸 𑀘 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀕𑁄𑀢𑀫𑁄 𑀪𑀯𑀁 𑀘𑀸𑀦𑀦𑁆𑀤𑁄. 𑀏𑀢𑁂 𑀫𑁂 𑀧𑀼𑀚𑁆𑀚𑀸, 𑀏𑀢𑁂 𑀫𑁂 𑀧𑀸𑀲𑀁𑀲𑀸’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀕𑀸𑀭𑀯𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀢𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀧𑀼𑀘𑁆𑀙𑀸𑀫𑀺 𑁋 ‘𑀓𑁂 𑀯𑀸 𑀢𑁂 𑀧𑀼𑀚𑁆𑀚𑀸 𑀓𑁂 𑀯𑀸 𑀢𑁂 𑀧𑀸𑀲𑀁𑀲𑀸’𑀢𑀺? 𑀏𑀯𑀁 𑀔𑁄 𑀢𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀘𑁆𑀙𑀸𑀫𑀺 𑁋 ‘𑀇𑀫𑀸𑀲𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀤𑁆𑀯𑀺𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀓𑀢𑀫𑀸 𑀧𑀝𑀺𑀧𑀤𑀸 𑀔𑀫𑀢𑀺 𑀅𑀧𑁆𑀧𑀢𑁆𑀣𑀢𑀭𑀸 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀸 𑀘 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘𑀸’’’𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀕𑁄𑀢𑀫𑁄 𑀪𑀯𑀁 𑀘𑀸𑀦𑀦𑁆𑀤𑁄. 𑀏𑀢𑁂 𑀫𑁂 𑀧𑀼𑀚𑁆𑀚𑀸, 𑀏𑀢𑁂 𑀫𑁂 𑀧𑀸𑀲𑀁𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑀸𑀯 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀆𑀦𑀦𑁆𑀤𑁂𑀦 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀁𑀲𑀸𑀤𑁂𑀢𑀺 [𑀫. 𑀦𑀺. 𑁧.𑁩𑁩𑁭] 𑀦𑁄 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀬𑀁𑀦𑀽𑀦𑀸𑀳𑀁 𑀧𑀭𑀺𑀫𑁄𑀘𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀗𑁆𑀕𑀸𑀭𑀯𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀸 𑀦𑁆𑀯𑀚𑁆𑀚, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀦𑁆𑀢𑁂𑀧𑀼𑀭𑁂 𑀭𑀸𑀚𑀧𑀼𑀭𑀺𑀲𑀸𑀦𑀁 [𑀭𑀸𑀚𑀧𑀭𑀺𑀲𑀸𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀻’’𑀢𑀺? ‘‘𑀅𑀬𑀁 𑀔𑁆𑀯𑀚𑁆𑀚, 𑀪𑁄 𑀕𑁄𑀢𑀫, 𑀭𑀸𑀚𑀦𑁆𑀢𑁂𑀧𑀼𑀭𑁂 𑀭𑀸𑀚𑀧𑀼𑀭𑀺𑀲𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀧𑀼𑀩𑁆𑀩𑁂 𑀲𑀼𑀤𑀁 𑀅𑀧𑁆𑀧𑀢𑀭𑀸 𑀘𑁂𑀯 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁 𑀩𑀳𑀼𑀢𑀭𑀸 𑀘 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀼𑀁; 𑀏𑀢𑀭𑀳𑀺 𑀧𑀦 𑀩𑀳𑀼𑀢𑀭𑀸 𑀘𑁂𑀯 𑀪𑀺𑀓𑁆𑀔𑀽 𑀅𑀧𑁆𑀧𑀢𑀭𑀸 𑀘 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀦𑁆𑀢𑀻’𑀢𑀺. 𑀅𑀬𑀁 𑀔𑁆𑀯𑀚𑁆𑀚, 𑀪𑁄 𑀕𑁄𑀢𑀫, 𑀭𑀸𑀚𑀦𑁆𑀢𑁂𑀧𑀼𑀭𑁂 𑀭𑀸𑀚𑀧𑀼𑀭𑀺𑀲𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀻’’𑀢𑀺.

[𑀧𑀝𑀺. 𑀫. 𑁩.𑁩𑁦; 𑀤𑀻. 𑀦𑀺. 𑁧.𑁪𑁮𑁩] ‘‘𑀢𑀻𑀡𑀺 𑀔𑁄 𑀇𑀫𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁. 𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 ‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀢𑀺 [𑀧𑀭𑀸𑀫𑀲𑀢𑀺 (𑀤𑀻. 𑀦𑀺. 𑁧.𑁪𑁮𑁪; 𑀧𑀝𑀺. 𑀫. 𑁧.𑁧𑁦𑁨] 𑀧𑀭𑀺𑀫𑀚𑁆𑀚𑀢𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺’. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀦𑀧𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻’𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀏𑀯𑀫𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣; 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣; 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀇𑀫𑁂𑀲𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀢𑀺𑀡𑁆𑀡𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀓𑀢𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀔𑀫𑀢𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘𑀸’’𑀢𑀺?

‘‘𑀢𑀢𑁆𑀭, 𑀪𑁄 𑀕𑁄𑀢𑀫, 𑀬𑀤𑀺𑀤𑀁 [𑀬𑀫𑀺𑀤𑀁 (𑀲𑁆𑀬𑀸. 𑀓𑀁. 𑀧𑀻.)] 𑀧𑀸𑀝𑀺𑀳𑀸𑀭𑀺𑀬𑀁 𑀇𑀥𑁂𑀓𑀘𑁆𑀘𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀸𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺, 𑀇𑀤𑀁, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀬𑁄𑀯 [𑀬𑁄 𑀘 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀦𑀁 𑀓𑀭𑁄𑀢𑀺 𑀲𑁄𑀯 [𑀲𑁄𑀘 𑀘 (𑀲𑁆𑀬𑀸. 𑀓𑀁 𑀧𑀻. 𑀓.)] 𑀦𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑁄𑀯 [𑀬𑁄 𑀘 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀦𑀁 𑀓𑀭𑁄𑀢𑀺 𑀢𑀲𑁆𑀲𑁂𑀯 [𑀢𑀲𑁆𑀲𑀫𑁂𑀯 (𑀲𑀻. 𑀓.), 𑀢𑀲𑁆𑀲 𑀘𑁂𑀯 (𑀲𑁆𑀬𑀸. 𑀓𑀁. 𑀧𑀻.)] 𑀢𑀁 𑀳𑁄𑀢𑀺. 𑀇𑀤𑀁 𑀫𑁂, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀫𑀸𑀬𑀸𑀲𑀳𑀥𑀫𑁆𑀫𑀭𑀽𑀧𑀁 𑀯𑀺𑀬 𑀔𑀸𑀬𑀢𑀺.

‘‘𑀬𑀫𑁆𑀧𑀺𑀤𑀁, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀇𑀥𑁂𑀓𑀘𑁆𑀘𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺, 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑁄 𑀕𑁄𑀢𑀫, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺…𑀧𑁂… 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺…𑀧𑁂… 𑀦𑀧𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑁆𑀳𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻’𑀢𑀺, 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀤𑀫𑁆𑀧𑀺, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀬𑁄𑀯 𑀦𑀁 𑀓𑀭𑁄𑀢𑀺 𑀲𑁄𑀯 𑀦𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑁄𑀯 𑀦𑀁 𑀓𑀭𑁄𑀢𑀺 𑀢𑀲𑁆𑀲𑁂𑀯 𑀢𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀫𑁂, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀫𑀸𑀬𑀸𑀲𑀳𑀥𑀫𑁆𑀫𑀭𑀽𑀧𑀁 𑀯𑀺𑀬 𑀔𑀸𑀬𑀢𑀺.

‘‘𑀬𑀜𑁆𑀘 𑀔𑁄 𑀇𑀤𑀁, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀇𑀥𑁂𑀓𑀘𑁆𑀘𑁄 𑀏𑀯𑀁 𑀅𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣; 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣; 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀇𑀤𑀫𑁂𑀯, 𑀪𑁄 𑀕𑁄𑀢𑀫, 𑀧𑀸𑀝𑀺𑀳𑀸𑀭𑀺𑀬𑀁 𑀔𑀫𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀸𑀯𑀲𑀼𑀪𑀸𑀲𑀺𑀢𑀫𑀺𑀤𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀇𑀫𑁂𑀳𑀺 𑀘 𑀫𑀬𑀁 𑀢𑀻𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀥𑀸𑀭𑁂𑀫. 𑀪𑀯𑀜𑁆𑀳𑀺 𑀕𑁄𑀢𑀫𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺, 𑀪𑀯𑀜𑁆𑀳𑀺 𑀕𑁄𑀢𑀫𑁄 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻’𑀢𑀺. 𑀪𑀯𑀜𑁆𑀳𑀺 𑀕𑁄𑀢𑀫𑁄 𑀏𑀯𑀫𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣; 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣; 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’’’𑀢𑀺.

‘‘𑀅𑀤𑁆𑀥𑀸 𑀔𑁄 𑀢𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀆𑀲𑀚𑁆𑀚 𑀉𑀧𑀦𑀻𑀬 𑀯𑀸𑀘𑀸 𑀪𑀸𑀲𑀺𑀢𑀸; 𑀅𑀧𑀺 𑀘 𑀢𑁆𑀬𑀸𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀫𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀫𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸, 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀦𑀼𑀲𑀸𑀲𑀸𑀫𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣; 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣; 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’’’𑀢𑀺.

‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀏𑀓𑀪𑀺𑀓𑁆𑀔𑀼𑀧𑀺 𑀬𑁄 𑀇𑀫𑁂𑀳𑀺 𑀢𑀻𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀜𑁆𑀜𑀢𑁆𑀭 𑀪𑁄𑀢𑀸 𑀕𑁄𑀢𑀫𑁂𑀦𑀸’’𑀢𑀺? ‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀓𑀁𑀬𑁂𑀯 𑀲𑀢𑀁 𑀦 𑀤𑁆𑀯𑁂 𑀲𑀢𑀸𑀦𑀺 𑀦 𑀢𑀻𑀡𑀺 𑀲𑀢𑀸𑀦𑀺 𑀦 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀦 𑀧𑀜𑁆𑀘 𑀲𑀢𑀸𑀦𑀺, 𑀅𑀣 𑀔𑁄 𑀪𑀺𑀬𑁆𑀬𑁄𑀯, 𑀬𑁂 [𑀢𑁂 (𑀓.) 𑀧𑀲𑁆𑀲 𑀫. 𑀦𑀺. 𑁨.𑁧𑁯𑁫] 𑀪𑀺𑀓𑁆𑀔𑀽 𑀇𑀫𑁂𑀳𑀺 𑀢𑀻𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸’’𑀢𑀺. ‘‘𑀓𑀳𑀁 𑀧𑀦, 𑀪𑁄 𑀕𑁄𑀢𑀫, 𑀏𑀢𑀭𑀳𑀺 𑀢𑁂 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺? ‘‘𑀇𑀫𑀲𑁆𑀫𑀺𑀁𑀬𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼𑀲𑀗𑁆𑀖𑁂’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺, 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑀲𑀫𑀁.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀧𑀞𑀫𑁄.