𑁩. 𑀧𑀼𑀕𑁆𑀕𑀮𑀯𑀕𑁆𑀕𑁄

𑁧. 𑀲𑀫𑀺𑀤𑁆𑀥𑀲𑀼𑀢𑁆𑀢𑀁

𑁨𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀲𑀫𑀺𑀤𑁆𑀥𑁄 [𑀲𑀯𑀺𑀝𑁆𑀞𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 [𑀫𑀳𑀸𑀓𑁄𑀝𑁆𑀞𑀺𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀲𑀫𑀺𑀤𑁆𑀥, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 [𑀤𑀺𑀝𑁆𑀞𑀧𑁆𑀧𑀢𑁆𑀢𑁄 (𑀓.)], 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀢𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺?

‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀬𑁆𑀯𑀸𑀬𑀁 [𑀬𑁄𑀬𑀁 (𑀓.)] 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀲𑁆𑀲, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀢𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺?

‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻, 𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀲𑁆𑀲, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀢𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺?

‘‘𑀢𑀬𑁄𑀫𑁂, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀇𑀫𑁂𑀲𑀁, 𑀆𑀯𑀼𑀲𑁄, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄, 𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀔𑀫𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀲𑁆𑀲, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀜𑁆𑀘 𑀲𑀫𑀺𑀤𑁆𑀥𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄, 𑀅𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀬𑀣𑀸𑀲𑀓𑀁 𑀧𑀝𑀺𑀪𑀸𑀦𑀁. 𑀆𑀬𑀸𑀫𑀸𑀯𑀼𑀲𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑁆𑀲𑀸𑀫. 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀘 𑀲𑀫𑀺𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀲𑀫𑀺𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀆𑀬𑀲𑁆𑀫𑀢𑀸 𑀘 𑀲𑀫𑀺𑀤𑁆𑀥𑁂𑀦 𑀆𑀬𑀲𑁆𑀫𑀢𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

‘‘𑀦 𑀔𑁆𑀯𑁂𑀢𑁆𑀣, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀓𑀭𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀁 𑁋 ‘𑀅𑀬𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’𑀢𑀺. 𑀞𑀸𑀦𑀜𑁆𑀳𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀢𑀺 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀲𑁆𑀯𑀸𑀲𑁆𑀲 [𑀲𑁆𑀯𑀸𑀬𑀁 (𑀲𑁆𑀬𑀸. 𑀓𑀁. 𑀧𑀻.), 𑀲𑁄𑀬𑀁 (𑀓.)] 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻 𑀲𑁆𑀯𑀸𑀲𑁆𑀲 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸, 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑁄𑀧𑀲𑁆𑀲 [𑀲𑁄𑀬𑀁 (𑀓.)] 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸.

‘‘𑀦 𑀔𑁆𑀯𑁂𑀢𑁆𑀣, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀓𑀭𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀁 𑁋 ‘𑀅𑀬𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’𑀢𑀺. 𑀞𑀸𑀦𑀜𑁆𑀳𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀢𑀺 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻 𑀲𑁆𑀯𑀸𑀲𑁆𑀲 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀲𑁆𑀯𑀸𑀲𑁆𑀲 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸, 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑁄𑀧𑀲𑁆𑀲 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸.

‘‘𑀦 𑀔𑁆𑀯𑁂𑀢𑁆𑀣, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀓𑀭𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀁 𑁋 ‘𑀅𑀬𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’𑀢𑀺. 𑀞𑀸𑀦𑀜𑁆𑀳𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀚𑁆𑀚𑀢𑀺 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑁆𑀯𑀸𑀲𑁆𑀲 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀲𑁆𑀯𑀸𑀲𑁆𑀲 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸, 𑀬𑁄 𑀘𑀸𑀬𑀁 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻 𑀲𑁄𑀧𑀲𑁆𑀲 𑀲𑀓𑀤𑀸𑀕𑀸𑀫𑀻 𑀯𑀸 𑀅𑀦𑀸𑀕𑀸𑀫𑀻 𑀯𑀸.

‘‘𑀦 𑀔𑁆𑀯𑁂𑀢𑁆𑀣, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀓𑀭𑀁 𑀏𑀓𑀁𑀲𑁂𑀦 𑀩𑁆𑀬𑀸𑀓𑀸𑀢𑀼𑀁 𑁋 ‘𑀅𑀬𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’’𑀢𑀺. 𑀧𑀞𑀫𑀁.

𑁨. 𑀕𑀺𑀮𑀸𑀦𑀲𑀼𑀢𑁆𑀢𑀁

𑁨𑁨. [𑀧𑀼. 𑀧. 𑁯𑁪] ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀕𑀺𑀮𑀸𑀦𑁄 𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀅𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀮𑀪𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀅𑀮𑀪𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀦𑁂𑀯 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀕𑀺𑀮𑀸𑀦𑁄 𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀅𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀮𑀪𑀦𑁆𑀢𑁄 𑀯𑀸 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀮𑀪𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀅𑀮𑀪𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀕𑀺𑀮𑀸𑀦𑁄 𑀮𑀪𑀦𑁆𑀢𑁄𑀯 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀦𑁄 𑀅𑀮𑀪𑀦𑁆𑀢𑁄 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀕𑀺𑀮𑀸𑀦𑁄 𑀮𑀪𑀦𑁆𑀢𑁄𑀯 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁 𑀦𑁄 𑀅𑀮𑀪𑀦𑁆𑀢𑁄 𑀯𑀼𑀝𑁆𑀞𑀸𑀢𑀺 𑀢𑀫𑁆𑀳𑀸 𑀆𑀩𑀸𑀥𑀸, 𑀇𑀫𑀁 𑀔𑁄, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀁 𑀧𑀝𑀺𑀘𑁆𑀘 𑀕𑀺𑀮𑀸𑀦𑀪𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀅𑀦𑀼𑀜𑁆𑀜𑀸𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀦𑀼𑀜𑁆𑀜𑀸𑀢𑁄. 𑀇𑀫𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀁 𑀧𑀝𑀺𑀘𑁆𑀘 𑀅𑀜𑁆𑀜𑁂𑀧𑀺 𑀕𑀺𑀮𑀸𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀕𑀺𑀮𑀸𑀦𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄𑀫𑁂 𑀕𑀺𑀮𑀸𑀦𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀅𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀅𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀦𑁂𑀯 𑀑𑀓𑁆𑀓𑀫𑀢𑀺 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁.

‘‘𑀇𑀥, 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀅𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀅𑀮𑀪𑀦𑁆𑀢𑁄 𑀯𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀑𑀓𑁆𑀓𑀫𑀢𑀺 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀮𑀪𑀦𑁆𑀢𑁄𑀯 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀦𑁄 𑀅𑀮𑀪𑀦𑁆𑀢𑁄 𑀑𑀓𑁆𑀓𑀫𑀢𑀺 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀮𑀪𑀦𑁆𑀢𑁄𑀯 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀦𑁄 𑀅𑀮𑀪𑀦𑁆𑀢𑁄, 𑀮𑀪𑀦𑁆𑀢𑁄𑀯 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀯𑀦𑀸𑀬 𑀦𑁄 𑀅𑀮𑀪𑀦𑁆𑀢𑁄 𑀑𑀓𑁆𑀓𑀫𑀢𑀺 𑀦𑀺𑀬𑀸𑀫𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀇𑀫𑀁 𑀔𑁄 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀁 𑀧𑀝𑀺𑀘𑁆𑀘 𑀥𑀫𑁆𑀫𑀤𑁂𑀲𑀦𑀸 𑀅𑀦𑀼𑀜𑁆𑀜𑀸𑀢𑀸. 𑀇𑀫𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀁 𑀧𑀝𑀺𑀘𑁆𑀘 𑀅𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. ‘‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀕𑀺𑀮𑀸𑀦𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀲𑀗𑁆𑀔𑀸𑀭𑀲𑀼𑀢𑁆𑀢𑀁

𑁨𑁩. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀬𑀸𑀩𑀚𑁆𑀛𑀁 [𑀲𑀩𑁆𑀬𑀸𑀧𑀚𑁆𑀛𑀁 (𑀲𑀩𑁆𑀩𑀢𑁆𑀣) 𑀏𑀯𑀫𑀼𑀧𑀭𑀺𑀧𑀺] 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀏𑀓𑀦𑁆𑀢𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀲𑀢𑁆𑀢𑀸 𑀦𑁂𑀭𑀬𑀺𑀓𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀅𑀩𑁆𑀬𑀸𑀩𑀚𑁆𑀛𑀁 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀅𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀅𑀩𑁆𑀬𑀸𑀩𑀚𑁆𑀛𑁂𑀳𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀅𑀩𑁆𑀬𑀸𑀩𑀚𑁆𑀛𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀏𑀓𑀦𑁆𑀢𑀲𑀼𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑀘𑀻𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸, 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀫𑀦𑁄𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀮𑁄𑀓𑀁 𑀉𑀧𑀧𑀦𑁆𑀦𑀁 𑀲𑀫𑀸𑀦𑀁 𑀲𑀩𑁆𑀬𑀸𑀩𑀚𑁆𑀛𑀸𑀧𑀺 𑀅𑀩𑁆𑀬𑀸𑀩𑀚𑁆𑀛𑀸𑀧𑀺 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀲𑁄 𑀲𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀅𑀩𑁆𑀬𑀸𑀩𑀚𑁆𑀛𑁂𑀳𑀺𑀧𑀺 𑀨𑀲𑁆𑀲𑁂𑀳𑀺 𑀨𑀼𑀝𑁆𑀞𑁄 𑀲𑀫𑀸𑀦𑁄 𑀲𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀅𑀩𑁆𑀬𑀸𑀩𑀚𑁆𑀛𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀁, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂 𑀘 𑀤𑁂𑀯𑀸 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀩𑀳𑀼𑀓𑀸𑀭𑀲𑀼𑀢𑁆𑀢𑀁

𑁨𑁪. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑀸. 𑀓𑀢𑀫𑁂 𑀢𑀬𑁄? 𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀁 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀁 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀧𑀼𑀕𑁆𑀕𑀮𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀓𑀸𑀭𑀸.

‘‘𑀇𑀫𑁂𑀳𑀺 𑀘 𑀧𑀦, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀧𑀼𑀕𑁆𑀕𑀮𑁂𑀳𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀜𑁆𑀜𑁄 𑀧𑀼𑀕𑁆𑀕𑀮𑁄 𑀩𑀳𑀼𑀓𑀸𑀭𑁄𑀢𑀺 𑀯𑀤𑀸𑀫𑀺. 𑀇𑀫𑁂𑀲𑀁 𑀧𑀦, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀚𑀺𑀭𑀽𑀧𑀫𑀲𑀼𑀢𑁆𑀢𑀁

𑁨𑁫. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄, 𑀯𑀺𑀚𑁆𑀚𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄, 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀝𑁆𑀞𑀸𑀭𑀼𑀓𑁄 [𑀤𑀼𑀝𑁆𑀞𑀸𑀭𑀼𑀓𑀸 (𑀲𑀻.)] 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 [𑀓𑀣𑀮𑀸𑀬 (𑀲𑁆𑀬𑀸. 𑀓𑀁. 𑀓.), 𑀓𑀞𑀮𑁂𑀦-𑀓𑀣𑀮𑁂𑀦 (𑀅𑀝𑁆𑀞𑀓𑀣𑀸)] 𑀯𑀸 𑀖𑀝𑁆𑀝𑀺𑀢𑁄 [𑀖𑀝𑁆𑀝𑀺𑀢𑀸 (𑀲𑀻.)] 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀆𑀲𑀯𑀁 𑀤𑁂𑀢𑀺 [𑀅𑀲𑁆𑀲𑀯𑀦𑁄𑀢𑀺 (𑀲𑀻.)]; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀼𑀓𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬 𑀭𑀽𑀧𑀸𑀦𑀺 𑀧𑀲𑁆𑀲𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀚𑀺𑀭𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀪𑁂𑀚𑁆𑀚𑀁 𑀫𑀡𑀺 𑀯𑀸 𑀧𑀸𑀲𑀸𑀡𑁄 𑀯𑀸; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀚𑀺𑀭𑀽𑀧𑀫𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄. ‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’’𑀦𑁆𑀢𑀺 [𑀧𑀼. 𑀧. 𑁧𑁦𑁨]. 𑀧𑀜𑁆𑀘𑀫𑀁.

𑁬. 𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀁

𑁨𑁬. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀳𑀻𑀦𑁄 𑀳𑁄𑀢𑀺 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀅𑀦𑀼𑀤𑁆𑀤𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀓𑀫𑁆𑀧𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀤𑀺𑀲𑁄 𑀳𑁄𑀢𑀺 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀻𑀮𑀲𑀸𑀫𑀜𑁆𑀜𑀕𑀢𑀸𑀦𑀁 𑀲𑀢𑀁 𑀲𑀻𑀮𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀧𑀯𑀢𑁆𑀢𑀺𑀦𑀻 [𑀧𑀯𑀢𑁆𑀢𑀦𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀧𑀼. 𑀧. 𑁧𑁨𑁨 𑀧𑀲𑁆𑀲𑀺𑀢𑀩𑁆𑀩𑀁] 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺. 𑀲𑀫𑀸𑀥𑀺𑀲𑀸𑀫𑀜𑁆𑀜𑀕𑀢𑀸𑀦𑀁 𑀲𑀢𑀁 𑀲𑀫𑀸𑀥𑀺𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀧𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺. 𑀧𑀜𑁆𑀜𑀸𑀲𑀸𑀫𑀜𑁆𑀜𑀕𑀢𑀸𑀦𑀁 𑀲𑀢𑀁 𑀧𑀜𑁆𑀜𑀸𑀓𑀣𑀸 𑀘 𑀦𑁄 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀧𑀯𑀢𑁆𑀢𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀲𑀸 𑀘 𑀦𑁄 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀥𑀺𑀓𑁄 𑀳𑁄𑀢𑀺 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀢𑀺 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺, 𑀧𑀭𑀺𑀧𑀽𑀭𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀺; 𑀅𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺, 𑀧𑀭𑀺𑀧𑀽𑀭𑀁 𑀯𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀺; 𑀅𑀧𑀭𑀺𑀧𑀽𑀭𑀁 𑀯𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀺, 𑀧𑀭𑀺𑀧𑀽𑀭𑀁 𑀯𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀜𑀸𑀬 𑀅𑀦𑀼𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀦𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 𑀪𑀚𑁂𑀣𑀸’’𑀢𑀺. 𑀙𑀝𑁆𑀞𑀁;

𑁭. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀲𑀼𑀢𑁆𑀢𑀁

𑁨𑁭. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄, 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀣 𑀔𑁄 𑀦𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑁋 ‘𑀧𑀸𑀧𑀫𑀺𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀳𑀺 𑀕𑀽𑀣𑀕𑀢𑁄 𑀓𑀺𑀜𑁆𑀘𑀸𑀧𑀺 𑀦 𑀤𑀁𑀲𑀢𑀺 [𑀟𑀁𑀲𑀢𑀺 (𑀲𑀻. 𑀲𑁆𑀬𑀸.), 𑀟𑀲𑁆𑀲𑀢𑀺 (𑀧𑀻.)], 𑀅𑀣 𑀔𑁄 𑀦𑀁 𑀫𑀓𑁆𑀔𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀺𑀜𑁆𑀘𑀸𑀧𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀣 𑀔𑁄 𑀦𑀁 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑁋 ‘𑀧𑀸𑀧𑀫𑀺𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀸𑀧𑀲𑀳𑀸𑀬𑁄 𑀧𑀸𑀧𑀲𑀫𑁆𑀧𑀯𑀗𑁆𑀓𑁄’𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀝𑁆𑀞𑀸𑀭𑀼𑀓𑁄 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀖𑀝𑁆𑀝𑀺𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀆𑀲𑀯𑀁 𑀤𑁂𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀦𑁆𑀤𑀼𑀓𑀸𑀮𑀸𑀢𑀁 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀖𑀝𑁆𑀝𑀺𑀢𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀺; 𑀏𑀯𑀫𑁂𑀯𑀁 𑀔𑁄 𑀪𑀺𑀓𑁆𑀔𑀯𑁂…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀽𑀣𑀓𑀽𑀧𑁄 𑀓𑀝𑁆𑀞𑁂𑀦 𑀯𑀸 𑀓𑀞𑀮𑀸𑀬 𑀯𑀸 𑀖𑀝𑁆𑀝𑀺𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀓𑁆𑀓𑁄𑀲𑁂𑀬𑁆𑀬𑀧𑀺 𑀫𑀁 𑀧𑀭𑀺𑀪𑀸𑀲𑁂𑀬𑁆𑀬𑀧𑀺 𑀫𑀁 𑀅𑀦𑀢𑁆𑀣𑀫𑁆𑀧𑀺 𑀫𑀁 𑀓𑀭𑁂𑀬𑁆𑀬𑀸𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀏𑀯𑀭𑀽𑀧𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀣 𑀔𑁄 𑀦𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑁋 ‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄’𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄 𑀪𑀚𑀺𑀢𑀩𑁆𑀩𑁄 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄. ‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’’𑀦𑁆𑀢𑀺.

‘‘𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀦𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 𑀪𑀚𑁂𑀣𑀸’’𑀢𑀺. 𑀲𑀢𑁆𑀢𑀫𑀁;

𑁮. 𑀕𑀽𑀣𑀪𑀸𑀡𑀻𑀲𑀼𑀢𑁆𑀢𑀁

𑁨𑁮. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀕𑀽𑀣𑀪𑀸𑀡𑀻, 𑀧𑀼𑀧𑁆𑀨𑀪𑀸𑀡𑀻, 𑀫𑀥𑀼𑀪𑀸𑀡𑀻. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀕𑀽𑀣𑀪𑀸𑀡𑀻? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 [𑀲𑀪𑀸𑀕𑀢𑁄 𑀯𑀸 𑀧𑀭𑀺𑀲𑀸𑀕𑀢𑁄 𑀯𑀸 (𑀲𑁆𑀬𑀸. 𑀓𑀁.)] 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺. 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺 [𑀫. 𑀦𑀺. 𑁧.𑁪𑁪𑁦; 𑀧𑀼. 𑀧. 𑁯𑁧]; 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀕𑀽𑀣𑀪𑀸𑀡𑀻.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀧𑁆𑀨𑀪𑀸𑀡𑀻? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀧𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺; 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀧𑀼𑀧𑁆𑀨𑀪𑀸𑀡𑀻.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀫𑀥𑀼𑀪𑀸𑀡𑀻? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀫𑀥𑀼𑀪𑀸𑀡𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀅𑀦𑁆𑀥𑀲𑀼𑀢𑁆𑀢𑀁

𑁨𑁯. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀦𑁆𑀥𑁄, 𑀏𑀓𑀘𑀓𑁆𑀔𑀼, 𑀤𑁆𑀯𑀺𑀘𑀓𑁆𑀔𑀼. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑁆𑀥𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀭𑀽𑀧𑀁 𑀘𑀓𑁆𑀔𑀼 𑀦 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀅𑀦𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀅𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀨𑀸𑀢𑀺𑀁 𑀓𑀭𑁂𑀬𑁆𑀬 [𑀨𑀸𑀢𑀺𑀓𑀭𑁂𑀬𑁆𑀬 (𑀲𑀻.)]; 𑀢𑀣𑀸𑀭𑀽𑀧𑀫𑁆𑀧𑀺𑀲𑁆𑀲 𑀘𑀓𑁆𑀔𑀼 𑀦 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀳𑀻𑀦𑀧𑁆𑀧𑀡𑀻𑀢𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀅𑀦𑁆𑀥𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀏𑀓𑀘𑀓𑁆𑀔𑀼? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀭𑀽𑀧𑀁 𑀘𑀓𑁆𑀔𑀼 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀅𑀦𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀅𑀥𑀺𑀕𑀘𑁆𑀙𑁂𑀬𑁆𑀬 𑀅𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀨𑀸𑀢𑀺𑀁 𑀓𑀭𑁂𑀬𑁆𑀬; 𑀢𑀣𑀸𑀭𑀽𑀧𑀁 𑀧𑀦𑀲𑁆𑀲 [𑀢𑀣𑀸𑀭𑀽𑀧𑀫𑁆𑀧𑀺𑀲𑁆𑀲 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀘𑀓𑁆𑀔𑀼 𑀦 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀳𑀻𑀦𑀧𑁆𑀧𑀡𑀻𑀢𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀏𑀓𑀘𑀓𑁆𑀔𑀼.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀤𑁆𑀯𑀺𑀘𑀓𑁆𑀔𑀼? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀭𑀽𑀧𑀁 𑀘𑀓𑁆𑀔𑀼 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀅𑀦𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀅𑀥𑀺𑀕𑀢𑀁 𑀯𑀸 𑀪𑁄𑀕𑀁 𑀨𑀸𑀢𑀺𑀁 𑀓𑀭𑁂𑀬𑁆𑀬; 𑀢𑀣𑀸𑀭𑀽𑀧𑀫𑁆𑀧𑀺𑀲𑁆𑀲 𑀘𑀓𑁆𑀔𑀼 𑀳𑁄𑀢𑀺 𑀬𑀣𑀸𑀭𑀽𑀧𑁂𑀦 𑀘𑀓𑁆𑀔𑀼𑀦𑀸 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬; 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀳𑀻𑀦𑀧𑁆𑀧𑀡𑀻𑀢𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬, 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀤𑁆𑀯𑀺𑀘𑀓𑁆𑀔𑀼. ‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’’𑀦𑁆𑀢𑀺.

‘‘𑀦 𑀘𑁂𑀯 𑀪𑁄𑀕𑀸 𑀢𑀣𑀸𑀭𑀽𑀧𑀸, 𑀦 𑀘 𑀧𑀼𑀜𑁆𑀜𑀸𑀦𑀺 𑀓𑀼𑀩𑁆𑀩𑀢𑀺;

𑀉𑀪𑀬𑀢𑁆𑀣 𑀓𑀮𑀺𑀕𑁆𑀕𑀸𑀳𑁄, 𑀅𑀦𑁆𑀥𑀲𑁆𑀲 𑀳𑀢𑀘𑀓𑁆𑀔𑀼𑀦𑁄.

‘‘𑀅𑀣𑀸𑀧𑀭𑀸𑀬𑀁 𑀅𑀓𑁆𑀔𑀸𑀢𑁄, 𑀏𑀓𑀘𑀓𑁆𑀔𑀼 𑀘 𑀧𑀼𑀕𑁆𑀕𑀮𑁄;

𑀥𑀫𑁆𑀫𑀸𑀥𑀫𑁆𑀫𑁂𑀦 𑀲𑀞𑁄𑀲𑁄 [𑀲𑀁𑀲𑀝𑁆𑀞𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀲𑀞𑁄𑀢𑀺 (𑀓.)], 𑀪𑁄𑀕𑀸𑀦𑀺 𑀧𑀭𑀺𑀬𑁂𑀲𑀢𑀺.

‘‘𑀣𑁂𑀬𑁆𑀬𑁂𑀦 𑀓𑀽𑀝𑀓𑀫𑁆𑀫𑁂𑀦, 𑀫𑀼𑀲𑀸𑀯𑀸𑀤𑁂𑀦 𑀘𑀽𑀪𑀬𑀁;

𑀓𑀼𑀲𑀮𑁄 𑀳𑁄𑀢𑀺 𑀲𑀗𑁆𑀖𑀸𑀢𑀼𑀁 [𑀲𑀁𑀳𑀸𑀢𑀼𑀁 (𑀲𑁆𑀬𑀸.)], 𑀓𑀸𑀫𑀪𑁄𑀕𑀻 𑀘 𑀫𑀸𑀦𑀯𑁄;

𑀇𑀢𑁄 𑀲𑁄 𑀦𑀺𑀭𑀬𑀁 𑀕𑀦𑁆𑀢𑁆𑀯𑀸, 𑀏𑀓𑀘𑀓𑁆𑀔𑀼 𑀯𑀺𑀳𑀜𑁆𑀜𑀢𑀺.

‘‘𑀤𑁆𑀯𑀺𑀘𑀓𑁆𑀔𑀼 𑀧𑀦 𑀅𑀓𑁆𑀔𑀸𑀢𑁄, 𑀲𑁂𑀝𑁆𑀞𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄;

𑀥𑀫𑁆𑀫𑀮𑀤𑁆𑀥𑁂𑀳𑀺 𑀪𑁄𑀕𑁂𑀳𑀺, 𑀉𑀝𑁆𑀞𑀸𑀦𑀸𑀥𑀺𑀕𑀢𑀁 𑀥𑀦𑀁.

‘‘𑀤𑀤𑀸𑀢𑀺 𑀲𑁂𑀝𑁆𑀞𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀕𑁆𑀕𑀫𑀸𑀦𑀲𑁄 𑀦𑀭𑁄;

𑀉𑀧𑁂𑀢𑀺 𑀪𑀤𑁆𑀤𑀓𑀁 𑀞𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺.

‘‘𑀅𑀦𑁆𑀥𑀜𑁆𑀘 𑀏𑀓𑀘𑀓𑁆𑀔𑀼𑀜𑁆𑀘, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂;

𑀤𑁆𑀯𑀺𑀘𑀓𑁆𑀔𑀼𑀁 𑀧𑀦 𑀲𑁂𑀯𑁂𑀣, 𑀲𑁂𑀝𑁆𑀞𑀁 𑀧𑀼𑀭𑀺𑀲𑀧𑀼𑀕𑁆𑀕𑀮’’𑀦𑁆𑀢𑀺. 𑀦𑀯𑀫𑀁;

𑁧𑁦. 𑀅𑀯𑀓𑀼𑀚𑁆𑀚𑀲𑀼𑀢𑁆𑀢𑀁

𑁩𑁦. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂 [𑀧𑀼. 𑀧. 𑁧𑁦𑁭-𑁧𑁦𑁮], 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀕𑁆𑀕𑀮𑁄, 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄, 𑀧𑀼𑀣𑀼𑀧𑀜𑁆𑀜𑁄 𑀧𑀼𑀕𑁆𑀕𑀮𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄𑀧𑀺 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀪𑁄 𑀦𑀺𑀓𑁆𑀓𑀼𑀚𑁆𑀚𑁄 [𑀦𑀺𑀓𑁆𑀓𑀼𑀚𑁆𑀚𑁄 (𑀲𑀻. 𑀧𑀻.)] 𑀢𑀢𑁆𑀭 𑀉𑀤𑀓𑀁 𑀆𑀲𑀺𑀢𑁆𑀢𑀁 𑀯𑀺𑀯𑀝𑁆𑀝𑀢𑀺, 𑀦𑁄 𑀲𑀡𑁆𑀞𑀸𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄𑀧𑀺 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯𑀸𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀕𑁆𑀕𑀮𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄 𑀘 𑀔𑁄 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯𑀸𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀉𑀘𑁆𑀙𑀗𑁆𑀕𑁂 𑀦𑀸𑀦𑀸𑀔𑀚𑁆𑀚𑀓𑀸𑀦𑀺 𑀆𑀓𑀺𑀡𑁆𑀡𑀸𑀦𑀺 𑁋 𑀢𑀺𑀮𑀸 𑀢𑀡𑁆𑀟𑀼𑀮𑀸 𑀫𑁄𑀤𑀓𑀸 𑀩𑀤𑀭𑀸. 𑀲𑁄 𑀢𑀫𑁆𑀳𑀸 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑁄 𑀲𑀢𑀺𑀲𑀫𑁆𑀫𑁄𑀲𑀸 𑀧𑀓𑀺𑀭𑁂𑀬𑁆𑀬. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄 𑀘 𑀔𑁄 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀦𑁂𑀯 𑀆𑀤𑀺𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀫𑀚𑁆𑀛𑀁 𑀫𑀦𑀲𑀺 𑀓𑀭𑁄𑀢𑀺, 𑀦 𑀧𑀭𑀺𑀬𑁄𑀲𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀕𑁆𑀕𑀮𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀧𑀜𑁆𑀜𑁄 𑀧𑀼𑀕𑁆𑀕𑀮𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄𑀧𑀺 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀫𑁆𑀪𑁄 𑀉𑀓𑁆𑀓𑀼𑀚𑁆𑀚𑁄 𑀢𑀢𑁆𑀭 𑀉𑀤𑀓𑀁 𑀆𑀲𑀺𑀢𑁆𑀢𑀁 𑀲𑀡𑁆𑀞𑀸𑀢𑀺 𑀦𑁄 𑀯𑀺𑀯𑀝𑁆𑀝𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑀸𑀫𑀁 𑀕𑀦𑁆𑀢𑀸 𑀳𑁄𑀢𑀺 𑀅𑀪𑀺𑀓𑁆𑀔𑀡𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲𑀯𑀦𑀸𑀬. 𑀢𑀲𑁆𑀲 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀦𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺; 𑀯𑀼𑀝𑁆𑀞𑀺𑀢𑁄𑀧𑀺 𑀢𑀫𑁆𑀳𑀸 𑀆𑀲𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀆𑀤𑀺𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀫𑀚𑁆𑀛𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺, 𑀧𑀭𑀺𑀬𑁄𑀲𑀸𑀦𑀫𑁆𑀧𑀺 𑀫𑀦𑀲𑀺 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀧𑀜𑁆𑀜𑁄 𑀧𑀼𑀕𑁆𑀕𑀮𑁄. ‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’’𑀦𑁆𑀢𑀺.

‘‘𑀅𑀯𑀓𑀼𑀚𑁆𑀚𑀧𑀜𑁆𑀜𑁄 𑀧𑀼𑀭𑀺𑀲𑁄, 𑀤𑀼𑀫𑁆𑀫𑁂𑀥𑁄 𑀅𑀯𑀺𑀘𑀓𑁆𑀔𑀡𑁄;

𑀅𑀪𑀺𑀓𑁆𑀔𑀡𑀫𑁆𑀧𑀺 𑀘𑁂 𑀳𑁄𑀢𑀺, 𑀕𑀦𑁆𑀢𑀸 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂.

‘‘𑀆𑀤𑀺𑀁 𑀓𑀣𑀸𑀬 𑀫𑀚𑁆𑀛𑀜𑁆𑀘, 𑀧𑀭𑀺𑀬𑁄𑀲𑀸𑀦𑀜𑁆𑀘 𑀢𑀸𑀤𑀺𑀲𑁄;

𑀉𑀕𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀜𑁆𑀜𑀸 𑀳𑀺𑀲𑁆𑀲 𑀦 𑀯𑀺𑀚𑁆𑀚𑀢𑀺.

‘‘𑀉𑀘𑁆𑀙𑀗𑁆𑀕𑀧𑀜𑁆𑀜𑁄 𑀧𑀼𑀭𑀺𑀲𑁄, 𑀲𑁂𑀬𑁆𑀬𑁄 𑀏𑀢𑁂𑀦 𑀯𑀼𑀘𑁆𑀘𑀢𑀺;

𑀅𑀪𑀺𑀓𑁆𑀔𑀡𑀫𑁆𑀧𑀺 𑀘𑁂 𑀳𑁄𑀢𑀺, 𑀕𑀦𑁆𑀢𑀸 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂.

‘‘𑀆𑀤𑀺𑀁 𑀓𑀣𑀸𑀬 𑀫𑀚𑁆𑀛𑀜𑁆𑀘, 𑀧𑀭𑀺𑀬𑁄𑀲𑀸𑀦𑀜𑁆𑀘 𑀢𑀸𑀤𑀺𑀲𑁄;

𑀦𑀺𑀲𑀺𑀦𑁆𑀦𑁄 𑀆𑀲𑀦𑁂 𑀢𑀲𑁆𑀫𑀺𑀁, 𑀉𑀕𑁆𑀕𑀳𑁂𑀢𑁆𑀯𑀸𑀦 𑀩𑁆𑀬𑀜𑁆𑀚𑀦𑀁;

𑀯𑀼𑀝𑁆𑀞𑀺𑀢𑁄 𑀦𑀧𑁆𑀧𑀚𑀸𑀦𑀸𑀢𑀺, 𑀕𑀳𑀺𑀢𑀁 𑀳𑀺𑀲𑁆𑀲 [𑀕𑀳𑀺𑀢𑀫𑁆𑀧𑀺𑀲𑁆𑀲 (𑀓.)] 𑀫𑀼𑀲𑁆𑀲𑀢𑀺.

‘‘𑀧𑀼𑀣𑀼𑀧𑀜𑁆𑀜𑁄 𑀘 𑀧𑀼𑀭𑀺𑀲𑁄, 𑀲𑁂𑀬𑁆𑀬𑁄 𑀏𑀢𑁂𑀳𑀺 [𑀏𑀢𑁂𑀦 (𑀓.)] 𑀯𑀼𑀘𑁆𑀘𑀢𑀺;

𑀅𑀪𑀺𑀓𑁆𑀔𑀡𑀫𑁆𑀧𑀺 𑀘𑁂 𑀳𑁄𑀢𑀺, 𑀕𑀦𑁆𑀢𑀸 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂.

‘‘𑀆𑀤𑀺𑀁 𑀓𑀣𑀸𑀬 𑀫𑀚𑁆𑀛𑀜𑁆𑀘, 𑀧𑀭𑀺𑀬𑁄𑀲𑀸𑀦𑀜𑁆𑀘 𑀢𑀸𑀤𑀺𑀲𑁄;

𑀦𑀺𑀲𑀺𑀦𑁆𑀦𑁄 𑀆𑀲𑀦𑁂 𑀢𑀲𑁆𑀫𑀺𑀁, 𑀉𑀕𑁆𑀕𑀳𑁂𑀢𑁆𑀯𑀸𑀦 𑀩𑁆𑀬𑀜𑁆𑀚𑀦𑀁.

‘‘𑀥𑀸𑀭𑁂𑀢𑀺 𑀲𑁂𑀝𑁆𑀞𑀲𑀗𑁆𑀓𑀧𑁆𑀧𑁄, 𑀅𑀩𑁆𑀬𑀕𑁆𑀕𑀫𑀸𑀦𑀲𑁄 𑀦𑀭𑁄;

𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀺𑀬𑀸’’𑀢𑀺. 𑀤𑀲𑀫𑀁;

𑀧𑀼𑀕𑁆𑀕𑀮𑀯𑀕𑁆𑀕𑁄 𑀢𑀢𑀺𑀬𑁄.