𑁪. 𑀤𑁂𑀯𑀤𑀽𑀢𑀯𑀕𑁆𑀕𑁄

𑁧.𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀁

𑁩𑁧. ‘‘𑀲𑀩𑁆𑀭𑀳𑁆𑀫𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀧𑀼𑀩𑁆𑀩𑀸𑀘𑀭𑀺𑀬𑀓𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. 𑀲𑀸𑀳𑀼𑀦𑁂𑀬𑁆𑀬𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀓𑀼𑀮𑀸𑀦𑀺 𑀬𑁂𑀲𑀁 𑀧𑀼𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀚𑁆𑀛𑀸𑀕𑀸𑀭𑁂 𑀧𑀽𑀚𑀺𑀢𑀸 𑀳𑁄𑀦𑁆𑀢𑀺. ‘𑀩𑁆𑀭𑀳𑁆𑀫𑀸’𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. ‘𑀧𑀼𑀩𑁆𑀩𑀸𑀘𑀭𑀺𑀬𑀸’𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. ‘𑀆𑀳𑀼𑀦𑁂𑀬𑁆𑀬𑀸’𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀳𑀼𑀓𑀸𑀭𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁, 𑀆𑀧𑀸𑀤𑀓𑀸 𑀧𑁄𑀲𑀓𑀸, 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺.

‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂;

𑀆𑀳𑀼𑀦𑁂𑀬𑁆𑀬𑀸 𑀘 𑀧𑀼𑀢𑁆𑀢𑀸𑀦𑀁, 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸.

‘‘𑀢𑀲𑁆𑀫𑀸 𑀳𑀺 𑀦𑁂 𑀦𑀫𑀲𑁆𑀲𑁂𑀬𑁆𑀬, 𑀲𑀓𑁆𑀓𑀭𑁂𑀬𑁆𑀬 𑀘 𑀧𑀡𑁆𑀟𑀺𑀢𑁄;

𑀅𑀦𑁆𑀦𑁂𑀦 𑀅𑀣 𑀧𑀸𑀦𑁂𑀦, 𑀯𑀢𑁆𑀣𑁂𑀦 𑀲𑀬𑀦𑁂𑀦 𑀘;

𑀉𑀘𑁆𑀙𑀸𑀤𑀦𑁂𑀦 𑀦𑁆𑀳𑀸𑀧𑀦𑁂𑀦 [𑀦𑀳𑀸𑀧𑀦𑁂𑀦 (𑀲𑀻.)], 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘.

‘‘𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 [𑀇𑀥 𑀘𑁂𑀯 (𑀲𑀻.)] 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺 [𑀲𑀕𑁆𑀕𑁂 𑀘 𑀫𑁄𑀤𑀢𑀻𑀢𑀺 (𑀲𑀻.) 𑀇𑀢𑀺𑀯𑀼. 𑁧𑁦𑁬 𑀇𑀢𑀺𑀯𑀼𑀢𑁆𑀢𑀓𑁂]. 𑀧𑀞𑀫𑀁;

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁩𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼; 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺? ‘‘𑀲𑀺𑀬𑀸, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼; 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼; 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺?

‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀲𑀺𑀬𑀸 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀲𑀫𑀸𑀥𑀺𑀧𑀝𑀺𑀮𑀸𑀪𑁄 𑀬𑀣𑀸 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦𑀸𑀲𑁆𑀲𑀼; 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺.

‘‘𑀇𑀤𑀜𑁆𑀘 𑀧𑀦 𑀫𑁂𑀢𑀁, 𑀆𑀦𑀦𑁆𑀤, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀧𑀸𑀭𑀸𑀬𑀦𑁂 𑀧𑀼𑀡𑁆𑀡𑀓𑀧𑀜𑁆𑀳𑁂 𑁋

‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺𑀁 𑀧𑀭𑁄𑀧𑀭𑀸𑀦𑀺 [𑀧𑀭𑁄𑀯𑀭𑀸𑀦𑀺 (𑀲𑀻. 𑀧𑀻.) 𑀲𑀼. 𑀦𑀺. 𑁧𑁦𑁫𑁪; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸 𑁭𑁩],

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 [𑀅𑀦𑀺𑀖𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀦𑀖𑁄 (?)] 𑀦𑀺𑀭𑀸𑀲𑁄,

𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺. 𑀤𑀼𑀢𑀺𑀬𑀁;

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁩𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀯𑀺𑀢𑁆𑀣𑀸𑀭𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀧𑀺 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁; 𑀅𑀜𑁆𑀜𑀸𑀢𑀸𑀭𑁄 𑀘 𑀤𑀼𑀮𑁆𑀮𑀪𑀸’’𑀢𑀺. ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄, 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄 𑀬𑀁 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦𑀧𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦𑀧𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀸’𑀢𑀺. 𑀏𑀯𑀜𑁆𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀺𑀓𑁆𑀔𑀺𑀢𑀩𑁆𑀩𑀁.

‘‘𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺, 𑀬𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑁄 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸 𑀦 𑀳𑁄𑀦𑁆𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺; 𑀅𑀬𑀁 𑀯𑀼𑀘𑁆𑀘𑀢𑀺, 𑀲𑀸𑀭𑀺𑀧𑀼𑀢𑁆𑀢 𑁋 ‘𑀪𑀺𑀓𑁆𑀔𑀼 𑀅𑀘𑁆𑀙𑁂𑀘𑁆𑀙𑀺 [𑀅𑀘𑁆𑀙𑁂𑀚𑁆𑀚𑀺 (𑀲𑁆𑀬𑀸. 𑀓𑀁. 𑀓.)] 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 [𑀯𑀸𑀯𑀢𑁆𑀢𑀬𑀺 (𑀲𑀻. 𑀧𑀻.)] 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲’. 𑀇𑀤𑀜𑁆𑀘 𑀧𑀦 𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀧𑀸𑀭𑀸𑀬𑀦𑁂 [𑀧𑀸𑀭𑀸𑀬𑀡𑁂 (𑀲𑀻.)] 𑀉𑀤𑀬𑀧𑀜𑁆𑀳𑁂 𑁋

‘‘𑀧𑀳𑀸𑀦𑀁 𑀓𑀸𑀫𑀲𑀜𑁆𑀜𑀸𑀦𑀁, 𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁;

𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁, 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀁.

‘‘𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁, 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦’’𑀦𑁆𑀢𑀺 [𑀲𑀼. 𑀦𑀺. 𑁧𑁧𑁧𑁨; 𑀘𑀽𑀴𑀦𑀺. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸 𑁧𑁩𑁧]. 𑀢𑀢𑀺𑀬𑀁;

𑁪. 𑀦𑀺𑀤𑀸𑀦𑀲𑀼𑀢𑁆𑀢𑀁

𑁩𑁪. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬.

‘‘𑀬𑀁, 𑀪𑀺𑀓𑁆𑀔𑀯𑁂, 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀮𑁄𑀪𑀚𑀁 𑀮𑁄𑀪𑀦𑀺𑀤𑀸𑀦𑀁 𑀮𑁄𑀪𑀲𑀫𑀼𑀤𑀬𑀁, 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺 𑀢𑀢𑁆𑀣 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚 𑀯𑀸 [𑀉𑀧𑀧𑀚𑁆𑀚𑁂 𑀯𑀸 (𑀲𑀻. 𑀲𑁆𑀬𑀸. 𑀓𑀁.) 𑀉𑀧𑀧𑀚𑁆𑀚𑀺𑀢𑁆𑀯𑀸𑀢𑀺 𑀫. 𑀦𑀺. 𑁩.𑁩𑁦𑁩 𑀧𑀸𑀴𑀺𑀬𑀸 𑀲𑀁𑀯𑀡𑁆𑀡𑀦𑀸] 𑀅𑀧𑀭𑁂 𑀯𑀸 [𑀅𑀧𑀭𑀸𑀧𑀭𑁂 𑀯𑀸 (𑀓.)] 𑀧𑀭𑀺𑀬𑀸𑀬𑁂.

‘‘𑀬𑀁, 𑀪𑀺𑀓𑁆𑀔𑀯𑁂, 𑀤𑁄𑀲𑀧𑀓𑀢𑀁 𑀓𑀫𑁆𑀫𑀁 𑀤𑁄𑀲𑀚𑀁 𑀤𑁄𑀲𑀦𑀺𑀤𑀸𑀦𑀁 𑀤𑁄𑀲𑀲𑀫𑀼𑀤𑀬𑀁, 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺 𑀢𑀢𑁆𑀣 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑁄𑀳𑀧𑀓𑀢𑀁 𑀓𑀫𑁆𑀫𑀁 𑀫𑁄𑀳𑀚𑀁 𑀫𑁄𑀳𑀦𑀺𑀤𑀸𑀦𑀁 𑀫𑁄𑀳𑀲𑀫𑀼𑀤𑀬𑀁, 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺 𑀢𑀢𑁆𑀣 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀻𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀸𑀤𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺 𑀲𑀼𑀔𑁂𑀢𑁆𑀢𑁂 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺. 𑀤𑁂𑀯𑁄 𑀘 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀏𑀯𑀲𑁆𑀲𑀼 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼𑀁. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀮𑁄𑀪𑀚𑀁 𑀮𑁄𑀪𑀦𑀺𑀤𑀸𑀦𑀁 𑀮𑁄𑀪𑀲𑀫𑀼𑀤𑀬𑀁, 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺 𑀢𑀢𑁆𑀣 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂.

‘‘𑀬𑀁 𑀤𑁄𑀲𑀧𑀓𑀢𑀁 𑀓𑀫𑁆𑀫𑀁…𑀧𑁂… 𑀬𑀁 𑀫𑁄𑀳𑀧𑀓𑀢𑀁 𑀓𑀫𑁆𑀫𑀁 𑀫𑁄𑀳𑀚𑀁 𑀫𑁄𑀳𑀦𑀺𑀤𑀸𑀦𑀁 𑀫𑁄𑀳𑀲𑀫𑀼𑀤𑀬𑀁, 𑀬𑀢𑁆𑀣𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀢𑀺 𑀢𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀬𑀢𑁆𑀣 𑀢𑀁 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺 𑀢𑀢𑁆𑀣 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬.

‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀅𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀅𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬.

‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀅𑀮𑁄𑀪𑀚𑀁 𑀅𑀮𑁄𑀪𑀦𑀺𑀤𑀸𑀦𑀁 𑀅𑀮𑁄𑀪𑀲𑀫𑀼𑀤𑀬𑀁, 𑀮𑁄𑀪𑁂 𑀯𑀺𑀕𑀢𑁂 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁.

‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀤𑁄𑀲𑀧𑀓𑀢𑀁 𑀓𑀫𑁆𑀫𑀁 𑀅𑀤𑁄𑀲𑀚𑀁 𑀅𑀤𑁄𑀲𑀦𑀺𑀤𑀸𑀦𑀁 𑀅𑀤𑁄𑀲𑀲𑀫𑀼𑀤𑀬𑀁, 𑀤𑁄𑀲𑁂 𑀯𑀺𑀕𑀢𑁂 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁.

‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀫𑁄𑀳𑀧𑀓𑀢𑀁 𑀓𑀫𑁆𑀫𑀁 𑀅𑀫𑁄𑀳𑀚𑀁 𑀅𑀫𑁄𑀳𑀦𑀺𑀤𑀸𑀦𑀁 𑀅𑀫𑁄𑀳𑀲𑀫𑀼𑀤𑀬𑀁, 𑀫𑁄𑀳𑁂 𑀯𑀺𑀕𑀢𑁂 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀻𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀸𑀤𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺. 𑀢𑀸𑀦𑀺 𑀧𑀼𑀭𑀺𑀲𑁄 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬. 𑀅𑀕𑁆𑀕𑀺𑀦𑀸 𑀟𑀳𑀺𑀢𑁆𑀯𑀸 𑀫𑀲𑀺𑀁 𑀓𑀭𑁂𑀬𑁆𑀬. 𑀫𑀲𑀺𑀁 𑀓𑀭𑀺𑀢𑁆𑀯𑀸 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀡𑁂𑀬𑁆𑀬 [𑀑𑀧𑀼𑀦𑁂𑀬𑁆𑀬 (𑀲𑀻. 𑀧𑀻.)] 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬. 𑀏𑀯𑀲𑁆𑀲𑀼 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀸𑀦𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀺 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀺 𑀅𑀦𑀪𑀸𑀯𑀗𑁆𑀓𑀢𑀸𑀦𑀺 [𑀅𑀦𑀪𑀸𑀯𑀓𑀢𑀸𑀦𑀺 (𑀲𑀻. 𑀧𑀻.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀦𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀅𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀅𑀮𑁄𑀪𑀚𑀁 𑀅𑀮𑁄𑀪𑀦𑀺𑀤𑀸𑀦𑀁 𑀅𑀮𑁄𑀪𑀲𑀫𑀼𑀤𑀬𑀁, 𑀮𑁄𑀪𑁂 𑀯𑀺𑀕𑀢𑁂 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁.

‘‘𑀬𑀁 𑀅𑀤𑁄𑀲𑀧𑀓𑀢𑀁 𑀓𑀫𑁆𑀫𑀁…𑀧𑁂… 𑀬𑀁 𑀅𑀫𑁄𑀳𑀧𑀓𑀢𑀁 𑀓𑀫𑁆𑀫𑀁 𑀅𑀫𑁄𑀳𑀚𑀁 𑀅𑀫𑁄𑀳𑀦𑀺𑀤𑀸𑀦𑀁 𑀅𑀫𑁄𑀳𑀲𑀫𑀼𑀤𑀬𑀁, 𑀫𑁄𑀳𑁂 𑀯𑀺𑀕𑀢𑁂 𑀏𑀯𑀁 𑀢𑀁 𑀓𑀫𑁆𑀫𑀁 𑀧𑀳𑀻𑀦𑀁 𑀳𑁄𑀢𑀺…𑀧𑁂… 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺.

‘‘𑀮𑁄𑀪𑀚𑀁 𑀤𑁄𑀲𑀚𑀜𑁆𑀘𑁂𑀯 [𑀤𑁄𑀲𑀚𑀁 𑀓𑀫𑁆𑀫𑀁 (𑀓.)], 𑀫𑁄𑀳𑀚𑀜𑁆𑀘𑀸𑀧𑀯𑀺𑀤𑁆𑀤𑀲𑀼;

𑀬𑀁 𑀢𑁂𑀦 𑀧𑀓𑀢𑀁 𑀓𑀫𑁆𑀫𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀇𑀥𑁂𑀯 𑀢𑀁 𑀯𑁂𑀤𑀦𑀺𑀬𑀁, 𑀯𑀢𑁆𑀣𑀼 𑀅𑀜𑁆𑀜𑀁 𑀦 𑀯𑀺𑀚𑁆𑀚𑀢𑀺.

‘‘𑀢𑀲𑁆𑀫𑀸 𑀮𑁄𑀪𑀜𑁆𑀘 𑀤𑁄𑀲𑀜𑁆𑀘, 𑀫𑁄𑀳𑀚𑀜𑁆𑀘𑀸𑀧𑀺 𑀯𑀺𑀤𑁆𑀤𑀲𑀼;

𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑀬𑀁 𑀪𑀺𑀓𑁆𑀔𑀼, 𑀲𑀩𑁆𑀩𑀸 𑀤𑀼𑀕𑁆𑀕𑀢𑀺𑀬𑁄 𑀚𑀳𑁂’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀳𑀢𑁆𑀣𑀓𑀲𑀼𑀢𑁆𑀢𑀁

𑁩𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀕𑁄𑀫𑀕𑁆𑀕𑁂 𑀲𑀺𑀁𑀲𑀧𑀸𑀯𑀦𑁂 𑀧𑀡𑁆𑀡𑀲𑀦𑁆𑀣𑀭𑁂. 𑀅𑀣 𑀔𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀕𑁄𑀫𑀕𑁆𑀕𑁂 𑀲𑀺𑀁𑀲𑀧𑀸𑀯𑀦𑁂 𑀧𑀡𑁆𑀡𑀲𑀦𑁆𑀣𑀭𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀳𑀢𑁆𑀣𑀓𑁄 𑀆𑀴𑀯𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀼𑀔𑀫𑀲𑀬𑀺𑀢𑁆𑀣𑀸’’𑀢𑀺? ‘‘𑀏𑀯𑀁, 𑀓𑀼𑀫𑀸𑀭, 𑀲𑀼𑀔𑀫𑀲𑀬𑀺𑀢𑁆𑀣𑀁. 𑀬𑁂 𑀘 𑀧𑀦 𑀮𑁄𑀓𑁂 𑀲𑀼𑀔𑀁 𑀲𑁂𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺.

‘‘𑀲𑀻𑀢𑀸, 𑀪𑀦𑁆𑀢𑁂, 𑀳𑁂𑀫𑀦𑁆𑀢𑀺𑀓𑀸 𑀭𑀢𑁆𑀢𑀺, 𑀅𑀦𑁆𑀢𑀭𑀝𑁆𑀞𑀓𑁄 𑀳𑀺𑀫𑀧𑀸𑀢𑀲𑀫𑀬𑁄, 𑀔𑀭𑀸 𑀕𑁄𑀓𑀡𑁆𑀝𑀓𑀳𑀢𑀸 𑀪𑀽𑀫𑀺, 𑀢𑀦𑀼𑀓𑁄 𑀧𑀡𑁆𑀡𑀲𑀦𑁆𑀣𑀭𑁄, 𑀯𑀺𑀭𑀴𑀸𑀦𑀺 𑀭𑀼𑀓𑁆𑀔𑀲𑁆𑀲 𑀧𑀢𑁆𑀢𑀸𑀦𑀺, 𑀲𑀻𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺, 𑀲𑀻𑀢𑁄 𑀘 𑀯𑁂𑀭𑀫𑁆𑀪𑁄 𑀯𑀸𑀢𑁄 𑀯𑀸𑀬𑀢𑀺. 𑀅𑀣 𑀘 𑀧𑀦 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀏𑀯𑀁, 𑀓𑀼𑀫𑀸𑀭, 𑀲𑀼𑀔𑀫𑀲𑀬𑀺𑀢𑁆𑀣𑀁. 𑀬𑁂 𑀘 𑀧𑀦 𑀮𑁄𑀓𑁂 𑀲𑀼𑀔𑀁 𑀲𑁂𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’’𑀢𑀺.

‘‘𑀢𑁂𑀦 𑀳𑀺, 𑀓𑀼𑀫𑀸𑀭, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑀼𑀫𑀸𑀭, 𑀇𑀥𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀓𑀽𑀝𑀸𑀕𑀸𑀭𑀁 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀦𑀺𑀯𑀸𑀢𑀁 𑀨𑀼𑀲𑀺𑀢𑀕𑁆𑀕𑀴𑀁 𑀧𑀺𑀳𑀺𑀢𑀯𑀸𑀢𑀧𑀸𑀦𑀁. 𑀢𑀢𑁆𑀭𑀲𑁆𑀲 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑀢𑁆𑀣𑀢𑁄 𑀧𑀝𑀺𑀓𑀢𑁆𑀣𑀢𑁄 𑀧𑀝𑀮𑀺𑀓𑀢𑁆𑀣𑀢𑁄 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄 [𑀓𑀸𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑁄 (𑀲𑀻.)] 𑀲𑀉𑀢𑁆𑀢𑀭𑀘𑁆𑀙𑀤𑁄 𑀉𑀪𑀢𑁄 𑀮𑁄𑀳𑀺𑀢𑀓𑀽𑀧𑀥𑀸𑀦𑁄; 𑀢𑁂𑀮𑀧𑁆𑀧𑀤𑀻𑀧𑁄 𑀘𑁂𑀢𑁆𑀣 𑀛𑀸𑀬𑁂𑀬𑁆𑀬 [𑀚𑀸𑀮𑁂𑀬𑁆𑀬 (𑀓.)]; 𑀘𑀢𑀲𑁆𑀲𑁄 𑀘 [𑀢𑀲𑁆𑀲𑁂𑀯 (𑀓.)] 𑀧𑀚𑀸𑀧𑀢𑀺𑀬𑁄 𑀫𑀦𑀸𑀧𑀸𑀫𑀦𑀸𑀧𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀅𑀲𑁆𑀲𑀼. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑀼𑀫𑀸𑀭, 𑀲𑀼𑀔𑀁 𑀯𑀸 𑀲𑁄 𑀲𑀬𑁂𑀬𑁆𑀬 𑀦𑁄 𑀯𑀸? 𑀓𑀣𑀁 𑀯𑀸 𑀢𑁂 𑀏𑀢𑁆𑀣 𑀳𑁄𑀢𑀻’’𑀢𑀺? ‘‘𑀲𑀼𑀔𑀁 𑀲𑁄, 𑀪𑀦𑁆𑀢𑁂, 𑀲𑀬𑁂𑀬𑁆𑀬. 𑀬𑁂 𑀘 𑀧𑀦 𑀮𑁄𑀓𑁂 𑀲𑀼𑀔𑀁 𑀲𑁂𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑀼𑀫𑀸𑀭, 𑀅𑀧𑀺 𑀦𑀼 𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀭𑀸𑀕𑀚𑀸 𑀧𑀭𑀺𑀴𑀸𑀳𑀸 𑀓𑀸𑀬𑀺𑀓𑀸 𑀯𑀸 𑀘𑁂𑀢𑀲𑀺𑀓𑀸 𑀯𑀸 𑀬𑁂𑀳𑀺 𑀲𑁄 𑀭𑀸𑀕𑀚𑁂𑀳𑀺 𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀫𑀸𑀦𑁄 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺.

‘‘𑀬𑁂𑀳𑀺 𑀔𑁄 𑀲𑁄, 𑀓𑀼𑀫𑀸𑀭, 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀭𑀸𑀕𑀚𑁂𑀳𑀺 𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀫𑀸𑀦𑁄 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬, 𑀲𑁄 𑀭𑀸𑀕𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀢𑀲𑁆𑀫𑀸𑀳𑀁 𑀲𑀼𑀔𑀫𑀲𑀬𑀺𑀢𑁆𑀣𑀁.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑀼𑀫𑀸𑀭, 𑀅𑀧𑀺 𑀦𑀼 𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀤𑁄𑀲𑀚𑀸 𑀧𑀭𑀺𑀴𑀸𑀳𑀸…𑀧𑁂… 𑀫𑁄𑀳𑀚𑀸 𑀧𑀭𑀺𑀴𑀸𑀳𑀸 𑀓𑀸𑀬𑀺𑀓𑀸 𑀯𑀸 𑀘𑁂𑀢𑀲𑀺𑀓𑀸 𑀯𑀸 𑀬𑁂𑀳𑀺 𑀲𑁄 𑀫𑁄𑀳𑀚𑁂𑀳𑀺 𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀫𑀸𑀦𑁄 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺.

‘‘𑀬𑁂 𑀳𑀺 𑀔𑁄 𑀲𑁄, 𑀓𑀼𑀫𑀸𑀭, 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀫𑁄𑀳𑀚𑁂𑀳𑀺 𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀟𑀬𑁆𑀳𑀫𑀸𑀦𑁄 𑀤𑀼𑀓𑁆𑀔𑀁 𑀲𑀬𑁂𑀬𑁆𑀬, 𑀲𑁄 𑀫𑁄𑀳𑁄 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀗𑁆𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀢𑀲𑁆𑀫𑀸𑀳𑀁 𑀲𑀼𑀔𑀫𑀲𑀬𑀺𑀢𑁆𑀣’’𑀦𑁆𑀢𑀺.

[𑀘𑀽𑀴𑀯. 𑁩𑁦𑁫; 𑀲𑀁. 𑀦𑀺. 𑁧.𑁨𑁪𑁨] ‘‘𑀲𑀩𑁆𑀩𑀤𑀸 𑀯𑁂 𑀲𑀼𑀔𑀁 𑀲𑁂𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀦𑀺𑀩𑁆𑀩𑀼𑀢𑁄;

𑀬𑁄 𑀦 𑀮𑀺𑀫𑁆𑀧𑀢𑀺 [𑀮𑀺𑀧𑁆𑀧𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀓𑀸𑀫𑁂𑀲𑀼, 𑀲𑀻𑀢𑀺𑀪𑀽𑀢𑁄 𑀦𑀺𑀭𑀽𑀧𑀥𑀺.

‘‘𑀲𑀩𑁆𑀩𑀸 𑀆𑀲𑀢𑁆𑀢𑀺𑀬𑁄 𑀙𑁂𑀢𑁆𑀯𑀸, 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭𑀁;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀲𑀦𑁆𑀢𑀺𑀁 𑀧𑀧𑁆𑀧𑀼𑀬𑁆𑀬 𑀘𑁂𑀢𑀲𑁄’’𑀢𑀺. 𑀧𑀜𑁆𑀘𑀫𑀁;

𑁬. 𑀤𑁂𑀯𑀤𑀽𑀢𑀲𑀼𑀢𑁆𑀢𑀁

𑁩𑁬. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀽𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀬𑀫𑀲𑁆𑀲 𑀭𑀜𑁆𑀜𑁄 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁, 𑀤𑁂𑀯, 𑀧𑀼𑀭𑀺𑀲𑁄 𑀅𑀫𑀢𑁆𑀢𑁂𑀬𑁆𑀬𑁄 𑀅𑀧𑁂𑀢𑁆𑀢𑁂𑀬𑁆𑀬𑁄 𑀅𑀲𑀸𑀫𑀜𑁆𑀜𑁄 𑀅𑀩𑁆𑀭𑀳𑁆𑀫𑀜𑁆𑀜𑁄, 𑀦 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻. 𑀇𑀫𑀲𑁆𑀲 𑀤𑁂𑀯𑁄 𑀤𑀡𑁆𑀟𑀁 𑀧𑀡𑁂𑀢𑀽’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄, 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀆𑀲𑀻𑀢𑀺𑀓𑀁 𑀯𑀸 𑀦𑀸𑀯𑀼𑀢𑀺𑀓𑀁 𑀯𑀸 𑀯𑀲𑁆𑀲𑀲𑀢𑀺𑀓𑀁 𑀯𑀸 [𑀧𑀲𑁆𑀲 𑀫. 𑀦𑀺. 𑁩.𑁨𑁬𑁩] 𑀚𑀸𑀢𑀺𑀬𑀸 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 𑀤𑀡𑁆𑀟𑀧𑀭𑀸𑀬𑀡𑀁 [𑀤𑀡𑁆𑀟𑀧𑀭𑀸𑀬𑀦𑀁 (𑀲𑁆𑀬𑀸. 𑀓𑀁. 𑀧𑀻.)] 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 𑀕𑀢𑀬𑁄𑀩𑁆𑀩𑀦𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀺𑀮𑀽𑀦𑀁 𑀔𑀮𑁆𑀮𑀺𑀢𑀲𑀺𑀭𑀁 [𑀔𑀮𑀺𑀢𑀁 𑀲𑀺𑀭𑁄 (𑀲𑀻. 𑀧𑀻.), 𑀔𑀮𑀺𑀢𑀲𑀺𑀭𑀁 (𑀲𑁆𑀬𑀸. 𑀓𑀁.) 𑀫. 𑀦𑀺. 𑁩.𑁨𑁬𑁩] 𑀯𑀮𑀺𑀢𑀁 𑀢𑀺𑀮𑀓𑀸𑀳𑀢𑀕𑀢𑁆𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄, 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀚𑀭𑀸𑀥𑀫𑁆𑀫𑁄 𑀚𑀭𑀁 𑀅𑀦𑀢𑀻𑀢𑁄, 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂. 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄, 𑀧𑀼𑀭𑀺𑀲, 𑀧𑀫𑀸𑀤𑀢𑀸𑀬 [𑀧𑀫𑀸𑀤𑀯𑀢𑀸𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀫. 𑀦𑀺. 𑁩.𑁨𑁬𑁨] 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁 [𑀢𑀁 (𑀓.)], 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 [𑀢𑁂 (𑀓.)] 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 [𑀢𑀁 𑀔𑁄 𑀧𑀦𑁂𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀁 𑀓𑀫𑁆𑀫𑀁 (𑀲𑀻.)] 𑀦𑁂𑀯 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁; 𑀅𑀣 𑀔𑁄 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸, 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’𑀢𑀺. ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁, 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁, 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁, 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀩𑁆𑀬𑀸𑀥𑀺𑀥𑀫𑁆𑀫𑁄 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄, 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂. 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁; 𑀅𑀣 𑀔𑁄 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸, 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀧𑀸𑀢𑀼𑀪𑀽𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀦 𑀢𑁆𑀯𑀁 𑀅𑀤𑁆𑀤𑀲 𑀫𑀦𑀼𑀲𑁆𑀲𑁂𑀲𑀼 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀏𑀓𑀸𑀳𑀫𑀢𑀁 𑀯𑀸 𑀤𑁆𑀯𑀻𑀳𑀫𑀢𑀁 𑀯𑀸 𑀢𑀻𑀳𑀫𑀢𑀁 𑀯𑀸 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀚𑀸𑀢’𑀦𑁆𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀅𑀤𑁆𑀤𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀲𑁆𑀲 𑀢𑁂 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄, 𑀳𑀦𑁆𑀤𑀸𑀳𑀁 𑀓𑀮𑁆𑀬𑀸𑀡𑀁 𑀓𑀭𑁄𑀫𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’𑀢𑀺? 𑀲𑁄 𑀏𑀯𑀫𑀸𑀳 𑁋 ‘𑀦𑀸𑀲𑀓𑁆𑀔𑀺𑀲𑁆𑀲𑀁, 𑀪𑀦𑁆𑀢𑁂. 𑀧𑀫𑀸𑀤𑀲𑁆𑀲𑀁, 𑀪𑀦𑁆𑀢𑁂’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀏𑀯𑀫𑀸𑀳 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀧𑀫𑀸𑀤𑀢𑀸𑀬 𑀦 𑀓𑀮𑁆𑀬𑀸𑀡𑀫𑀓𑀸𑀲𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀕𑁆𑀖 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺 𑀬𑀣𑀸 𑀢𑀁 𑀧𑀫𑀢𑁆𑀢𑀁. 𑀢𑀁 𑀔𑁄 𑀧𑀦 𑀢𑁂 𑀏𑀢𑀁 𑀧𑀸𑀧𑀓𑀫𑁆𑀫𑀁 𑀦𑁂𑀯 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁; 𑀅𑀣 𑀔𑁄 𑀢𑀬𑀸𑀯𑁂𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁. 𑀢𑁆𑀯𑀜𑁆𑀜𑁂𑀯𑁂𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀲𑀻’’’𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀬𑀫𑁄 𑀭𑀸𑀚𑀸 𑀢𑀢𑀺𑀬𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀢𑀼𑀡𑁆𑀳𑀻 𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀁 𑀦𑀸𑀫 𑀓𑀸𑀭𑀡𑀁 𑀓𑀭𑁄𑀦𑁆𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑀲𑁆𑀫𑀺𑀁 𑀳𑀢𑁆𑀣𑁂 𑀕𑀫𑁂𑀦𑁆𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀤𑀼𑀢𑀺𑀬𑀲𑁆𑀫𑀺𑀁 𑀧𑀸𑀤𑁂 𑀕𑀫𑁂𑀦𑁆𑀢𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀁 𑀫𑀚𑁆𑀛𑁂 𑀉𑀭𑀲𑁆𑀫𑀺𑀁 𑀕𑀫𑁂𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 [𑀢𑀺𑀧𑁆𑀧𑀸 (𑀲𑀻.)] 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀺𑀬𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀲𑀁𑀯𑁂𑀲𑁂𑀢𑁆𑀯𑀸 [𑀲𑀁𑀓𑀟𑁆𑀠𑀺𑀢𑁆𑀯𑀸 (𑀓.)] 𑀓𑀼𑀥𑀸𑀭𑀻𑀳𑀺 𑀢𑀘𑁆𑀙𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀺𑀬𑀢𑀺, 𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺.

‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑁆𑀢𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀆𑀤𑀺𑀢𑁆𑀢𑀸𑀬 𑀪𑀽𑀫𑀺𑀬𑀸 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 [𑀲𑀜𑁆𑀚𑁄𑀢𑀺𑀪𑀽𑀢𑀸𑀬 (𑀲𑁆𑀬𑀸. 𑀓𑀁.)] 𑀲𑀸𑀭𑁂𑀦𑁆𑀢𑀺𑀧𑀺 𑀧𑀘𑁆𑀘𑀸𑀲𑀸𑀭𑁂𑀦𑁆𑀢𑀺𑀧𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀫𑀳𑀦𑁆𑀢𑀁 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀭𑁄𑀧𑁂𑀦𑁆𑀢𑀺𑀧𑀺 𑀑𑀭𑁄𑀧𑁂𑀦𑁆𑀢𑀺𑀧𑀺…𑀧𑁂… 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀕𑀳𑁂𑀢𑁆𑀯𑀸 𑀢𑀢𑁆𑀢𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀦𑁆𑀢𑀺, 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬. 𑀲𑁄 𑀢𑀢𑁆𑀣 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑁄 𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀅𑀥𑁄 𑀕𑀘𑁆𑀙𑀢𑀺, 𑀲𑀓𑀺𑀫𑁆𑀧𑀺 𑀢𑀺𑀭𑀺𑀬𑀁 𑀕𑀘𑁆𑀙𑀢𑀺. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀯𑁂𑀤𑀺𑀬𑀢𑀺, 𑀦 𑀘 𑀢𑀸𑀯 𑀓𑀸𑀮𑀁 𑀓𑀭𑁄𑀢𑀺 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻𑀳𑁄𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀲𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀺𑀭𑀬𑁄 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’𑀢𑀺 [𑀧𑁂. 𑀯. 𑁭𑁦-𑁭𑁧, 𑁨𑁪𑁦-𑁨𑁪𑁧].

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀬𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀓𑀺𑀭, 𑀪𑁄, 𑀮𑁄𑀓𑁂 𑀧𑀸𑀧𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀢𑁂 𑀏𑀯𑀭𑀽𑀧𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑀻𑀬𑀦𑁆𑀢𑀺. 𑀅𑀳𑁄 𑀯𑀢𑀸𑀳𑀁 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀘 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀜𑁆𑀘𑀸𑀳𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀁. 𑀲𑁄 𑀘 𑀫𑁂 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀢𑀲𑁆𑀲 𑀘𑀸𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬’𑀦𑁆𑀢𑀺. 𑀢𑀁 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀦 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀼𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺, 𑀅𑀧𑀺 𑀘 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑁂𑀯 𑀫𑁂 𑀲𑀸𑀫𑀁 𑀜𑀸𑀢𑀁 𑀲𑀸𑀫𑀁 𑀤𑀺𑀝𑁆𑀞𑀁 𑀲𑀸𑀫𑀁 𑀯𑀺𑀤𑀺𑀢𑀁 𑀢𑀤𑁂𑀯𑀸𑀳𑀁 𑀯𑀤𑀸𑀫𑀻’’𑀢𑀺.

‘‘𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀺, 𑀬𑁂 𑀧𑀫𑀚𑁆𑀚𑀦𑁆𑀢𑀺 𑀫𑀸𑀡𑀯𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺, 𑀳𑀻𑀦𑀓𑀸𑀬𑀽𑀧𑀕𑀸 𑀦𑀭𑀸.

‘‘𑀬𑁂 𑀘 𑀔𑁄 𑀤𑁂𑀯𑀤𑀽𑀢𑁂𑀳𑀺, 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀇𑀥;

𑀘𑁄𑀤𑀺𑀢𑀸 𑀦𑀧𑁆𑀧𑀫𑀚𑁆𑀚𑀦𑁆𑀢𑀺, 𑀅𑀭𑀺𑀬𑀥𑀫𑁆𑀫𑁂 𑀓𑀼𑀤𑀸𑀘𑀦𑀁.

‘‘𑀉𑀧𑀸𑀤𑀸𑀦𑁂 𑀪𑀬𑀁 𑀤𑀺𑀲𑁆𑀯𑀸, 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁂;

𑀅𑀦𑀼𑀧𑀸𑀤𑀸 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁂.

‘‘𑀢𑁂 𑀅𑀧𑁆𑀧𑀫𑀢𑁆𑀢𑀸 [𑀢𑁂 𑀔𑁄𑀧𑁆𑀧𑀫𑀢𑁆𑀢𑀸 (𑀲𑀻.), 𑀢𑁂 𑀔𑁂𑀫𑀧𑁆𑀧𑀢𑁆𑀢𑀸 (𑀲𑁆𑀬𑀸. 𑀓𑀁. 𑀧𑀻.) 𑀫. 𑀦𑀺. 𑁩.𑁨𑁭𑁧] 𑀲𑀼𑀔𑀺𑀦𑁄 [𑀲𑀼𑀔𑀺𑀢𑀸 (𑀲𑀻. 𑀲𑁆𑀬𑀸.)], 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑀸, 𑀲𑀩𑁆𑀩𑀤𑀼𑀓𑁆𑀔𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺. 𑀙𑀝𑁆𑀞𑀁;

𑁭. 𑀘𑀢𑀼𑀫𑀳𑀸𑀭𑀸𑀚𑀲𑀼𑀢𑁆𑀢𑀁

𑁩𑁭. ‘‘𑀅𑀝𑁆𑀞𑀫𑀺𑀬𑀁, 𑀪𑀺𑀓𑁆𑀔𑀯𑁂, 𑀧𑀓𑁆𑀔𑀲𑁆𑀲 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀺 𑁋 ‘𑀓𑀘𑁆𑀘𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺. 𑀘𑀸𑀢𑀼𑀤𑁆𑀤𑀲𑀺𑀁, 𑀪𑀺𑀓𑁆𑀔𑀯𑁂, 𑀧𑀓𑁆𑀔𑀲𑁆𑀲 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀧𑀼𑀢𑁆𑀢𑀸 𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀺 𑁋 ‘𑀓𑀘𑁆𑀘𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺. 𑀢𑀤𑀳𑀼, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀲𑀸𑀫𑀜𑁆𑀜𑁂𑀯 𑀇𑀫𑀁 𑀮𑁄𑀓𑀁 𑀅𑀦𑀼𑀯𑀺𑀘𑀭𑀦𑁆𑀢𑀺 𑁋 ‘𑀓𑀘𑁆𑀘𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’’’𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀳𑁄𑀦𑁆𑀢𑀺 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀆𑀭𑁄𑀘𑁂𑀦𑁆𑀢𑀺 𑁋 ‘𑀅𑀧𑁆𑀧𑀓𑀸 𑀔𑁄, 𑀫𑀸𑀭𑀺𑀲𑀸, 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺. 𑀢𑁂𑀦 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀦𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑁋 ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺, 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’’𑀢𑀺.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀩𑀳𑀽 𑀳𑁄𑀦𑁆𑀢𑀺 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺. 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀆𑀭𑁄𑀘𑁂𑀦𑁆𑀢𑀺 𑁋 ‘𑀩𑀳𑀽 𑀔𑁄, 𑀫𑀸𑀭𑀺𑀲𑀸, 𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂𑀲𑀼 𑀫𑀢𑁆𑀢𑁂𑀬𑁆𑀬𑀸 𑀧𑁂𑀢𑁆𑀢𑁂𑀬𑁆𑀬𑀸 𑀲𑀸𑀫𑀜𑁆𑀜𑀸 𑀩𑁆𑀭𑀳𑁆𑀫𑀜𑁆𑀜𑀸 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺 𑀧𑀝𑀺𑀚𑀸𑀕𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺. 𑀢𑁂𑀦, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑁋 ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺, 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬, 𑀬𑁄𑀧𑀺𑀲𑁆𑀲 [𑀬𑁄𑀧𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀸𑀤𑀺𑀲𑁄 𑀦𑀭𑁄’’𑀢𑀺.

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸 𑀤𑀼𑀕𑁆𑀕𑀻𑀢𑀸 𑀦 𑀲𑀼𑀕𑀻𑀢𑀸 𑀤𑀼𑀩𑁆𑀪𑀸𑀲𑀺𑀢𑀸 𑀦 𑀲𑀼𑀪𑀸𑀲𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀓𑁆𑀓𑁄 𑀳𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀯𑀻𑀢𑀭𑀸𑀕𑁄 𑀅𑀯𑀻𑀢𑀤𑁄𑀲𑁄 𑀅𑀯𑀻𑀢𑀫𑁄𑀳𑁄.

‘‘𑀬𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁄 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀢𑀲𑁆𑀲 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 [𑀢𑀲𑁆𑀲 𑀔𑁄 𑀏𑀢𑀁 𑀪𑀺𑀓𑁆𑀔𑀼𑀦𑁄 (𑀲𑀻. 𑀲𑁆𑀬𑀸.), 𑀢𑀲𑁆𑀲 𑀔𑁄 𑀏𑀯𑀁 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑁄 (𑀓.)] 𑀓𑀮𑁆𑀮𑀁 𑀯𑀘𑀦𑀸𑀬 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬, 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄’’𑀢𑀺.

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁄 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀘𑀢𑀼𑀫𑀳𑀸𑀭𑀸𑀚𑀲𑀼𑀢𑁆𑀢𑀁

𑁩𑁮. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀦𑀼𑀦𑀬𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬, 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄’’𑀢𑀺.

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀕𑀸𑀣𑀸 𑀤𑀼𑀕𑁆𑀕𑀻𑀢𑀸 𑀦 𑀲𑀼𑀕𑀻𑀢𑀸 𑀤𑀼𑀩𑁆𑀪𑀸𑀲𑀺𑀢𑀸 𑀦 𑀲𑀼𑀪𑀸𑀲𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀓𑁆𑀓𑁄 𑀳𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀧𑀭𑀺𑀫𑀼𑀢𑁆𑀢𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀢𑀲𑁆𑀲 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀮𑁆𑀮𑀁 𑀯𑀘𑀦𑀸𑀬 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁;

𑀉𑀧𑁄𑀲𑀣𑀁 𑀉𑀧𑀯𑀲𑁂𑀬𑁆𑀬, 𑀬𑁄𑀧𑀺𑀲𑁆𑀲 𑀫𑀸𑀤𑀺𑀲𑁄 𑀦𑀭𑁄’’𑀢𑀺.

‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁄 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀭𑀺𑀫𑀼𑀢𑁆𑀢𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀲𑀼𑀔𑀼𑀫𑀸𑀮𑀲𑀼𑀢𑁆𑀢𑀁

𑁩𑁯. ‘‘𑀲𑀼𑀔𑀼𑀫𑀸𑀮𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀭𑀫𑀲𑀼𑀔𑀼𑀫𑀸𑀮𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑁄. 𑀫𑀫 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑀺𑀢𑀸 𑀳𑁄𑀦𑁆𑀢𑀺. 𑀏𑀓𑀢𑁆𑀣 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀮𑀁 𑀯𑀧𑁆𑀧𑀢𑀺 [𑀧𑀼𑀧𑁆𑀨𑀢𑀺 (𑀲𑀻. 𑀧𑀻.)], 𑀏𑀓𑀢𑁆𑀣 𑀧𑀤𑀼𑀫𑀁, 𑀏𑀓𑀢𑁆𑀣 𑀧𑀼𑀡𑁆𑀟𑀭𑀻𑀓𑀁, 𑀬𑀸𑀯𑀤𑁂𑀯 𑀫𑀫𑀢𑁆𑀣𑀸𑀬. 𑀦 𑀔𑁄 𑀧𑀦𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀓𑀸𑀲𑀺𑀓𑀁 𑀘𑀦𑁆𑀤𑀦𑀁 𑀥𑀸𑀭𑁂𑀫𑀺 [𑀓𑀸𑀲𑀺𑀓𑀁 𑀘𑀦𑁆𑀤𑀦𑀁 𑀥𑀸𑀭𑁂𑀫𑀺 (𑀲𑁆𑀬𑀸. 𑀓𑀁. 𑀓.), 𑀅𑀓𑀸𑀲𑀺𑀓𑀁 𑀥𑀸𑀭𑁂𑀫𑀺 (?)]. 𑀓𑀸𑀲𑀺𑀓𑀁, 𑀪𑀺𑀓𑁆𑀔𑀯𑁂, 𑀲𑀼 𑀫𑁂 𑀢𑀁 𑀯𑁂𑀞𑀦𑀁 𑀳𑁄𑀢𑀺, 𑀓𑀸𑀲𑀺𑀓𑀸 𑀓𑀜𑁆𑀘𑀼𑀓𑀸, 𑀓𑀸𑀲𑀺𑀓𑀁 𑀦𑀺𑀯𑀸𑀲𑀦𑀁, 𑀓𑀸𑀲𑀺𑀓𑁄 𑀉𑀢𑁆𑀢𑀭𑀸𑀲𑀗𑁆𑀕𑁄. 𑀭𑀢𑁆𑀢𑀺𑀦𑁆𑀤𑀺𑀯𑀁 [𑀭𑀢𑁆𑀢𑀺𑀤𑀺𑀯𑀁 (𑀓.)] 𑀔𑁄 𑀧𑀦 𑀫𑁂 𑀲𑀼 𑀢𑀁, 𑀪𑀺𑀓𑁆𑀔𑀯𑁂, 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀻𑀬𑀢𑀺 𑁋 ‘𑀫𑀸 𑀦𑀁 𑀨𑀼𑀲𑀺 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀢𑀺𑀡𑀁 𑀯𑀸 𑀭𑀚𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸’’’𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁 𑁋 𑀏𑀓𑁄 𑀳𑁂𑀫𑀦𑁆𑀢𑀺𑀓𑁄, 𑀏𑀓𑁄 𑀕𑀺𑀫𑁆𑀳𑀺𑀓𑁄, 𑀏𑀓𑁄 𑀯𑀲𑁆𑀲𑀺𑀓𑁄. 𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 [𑀧𑀭𑀺𑀘𑀸𑀭𑀺𑀬𑀫𑀸𑀦𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)] 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀸𑀫𑀺. 𑀬𑀣𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀲𑀁 𑀦𑀺𑀯𑁂𑀲𑀦𑁂 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀓𑀡𑀸𑀚𑀓𑀁 𑀪𑁄𑀚𑀦𑀁 𑀤𑀻𑀬𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬𑀁, 𑀏𑀯𑀫𑁂𑀯𑀲𑁆𑀲𑀼 𑀫𑁂, 𑀪𑀺𑀓𑁆𑀔𑀯𑁂, 𑀧𑀺𑀢𑀼 𑀦𑀺𑀯𑁂𑀲𑀦𑁂 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀲𑀸𑀮𑀺𑀫𑀁𑀲𑁄𑀤𑀦𑁄 𑀤𑀻𑀬𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀯𑀭𑀽𑀧𑁂𑀦 𑀘 𑀲𑀼𑀔𑀼𑀫𑀸𑀮𑁂𑀦 𑀏𑀢𑀤𑀳𑁄𑀲𑀺 𑁋 ‘𑀅𑀲𑁆𑀲𑀼𑀢𑀯𑀸 𑀔𑁄 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀦𑀸 𑀚𑀭𑀸𑀥𑀫𑁆𑀫𑁄 𑀲𑀫𑀸𑀦𑁄 𑀚𑀭𑀁 𑀅𑀦𑀢𑀻𑀢𑁄 𑀧𑀭𑀁 𑀚𑀺𑀡𑁆𑀡𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀅𑀢𑀺𑀲𑀺𑀢𑁆𑀯𑀸, 𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀚𑀭𑀸𑀥𑀫𑁆𑀫𑁄 𑀚𑀭𑀁 𑀅𑀦𑀢𑀻𑀢𑁄. 𑀅𑀳𑀜𑁆𑀘𑁂𑀯 [𑀅𑀳𑀜𑁆𑀘𑁂 (?)] 𑀔𑁄 𑀧𑀦 𑀚𑀭𑀸𑀥𑀫𑁆𑀫𑁄 𑀲𑀫𑀸𑀦𑁄 𑀚𑀭𑀁 𑀅𑀦𑀢𑀻𑀢𑁄 𑀧𑀭𑀁 𑀚𑀺𑀡𑁆𑀡𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑁂𑀬𑁆𑀬𑀁 𑀳𑀭𑀸𑀬𑁂𑀬𑁆𑀬𑀁 𑀚𑀺𑀕𑀼𑀘𑁆𑀙𑁂𑀬𑁆𑀬𑀁 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀬𑁄 𑀬𑁄𑀩𑁆𑀩𑀦𑁂 𑀬𑁄𑀩𑁆𑀩𑀦𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀧𑀳𑀻𑀬𑀺.

‘‘𑀅𑀲𑁆𑀲𑀼𑀢𑀯𑀸 𑀔𑁄 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀦𑀸 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀫𑀸𑀦𑁄 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄 𑀧𑀭𑀁 𑀩𑁆𑀬𑀸𑀥𑀺𑀢𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀅𑀢𑀺𑀲𑀺𑀢𑁆𑀯𑀸 𑁋 ‘𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀩𑁆𑀬𑀸𑀥𑀺𑀥𑀫𑁆𑀫𑁄 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄, 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀫𑀸𑀦𑁄 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄 𑀧𑀭𑀁 𑀩𑁆𑀬𑀸𑀥𑀺𑀓𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑁂𑀬𑁆𑀬𑀁 𑀳𑀭𑀸𑀬𑁂𑀬𑁆𑀬𑀁 𑀚𑀺𑀕𑀼𑀘𑁆𑀙𑁂𑀬𑁆𑀬𑀁, 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀬𑁄 𑀆𑀭𑁄𑀕𑁆𑀬𑁂 𑀆𑀭𑁄𑀕𑁆𑀬𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀧𑀳𑀻𑀬𑀺.

‘‘𑀅𑀲𑁆𑀲𑀼𑀢𑀯𑀸 𑀔𑁄 𑀧𑀼𑀣𑀼𑀚𑁆𑀚𑀦𑁄 𑀅𑀢𑁆𑀢𑀦𑀸 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀫𑀭𑀡𑀁 𑀅𑀦𑀢𑀻𑀢𑁄 𑀧𑀭𑀁 𑀫𑀢𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀅𑀢𑀺𑀲𑀺𑀢𑁆𑀯𑀸 𑁋 ‘𑀅𑀳𑀫𑁆𑀧𑀺 𑀔𑁄𑀫𑁆𑀳𑀺 𑀫𑀭𑀡𑀥𑀫𑁆𑀫𑁄, 𑀫𑀭𑀡𑀁 𑀅𑀦𑀢𑀻𑀢𑁄, 𑀅𑀳𑀁 𑀘𑁂𑀯 𑀔𑁄 𑀧𑀦 𑀫𑀭𑀡𑀥𑀫𑁆𑀫𑁄 𑀲𑀫𑀸𑀦𑁄 𑀫𑀭𑀡𑀁 𑀅𑀦𑀢𑀻𑀢𑁄 𑀧𑀭𑀁 𑀫𑀢𑀁 𑀤𑀺𑀲𑁆𑀯𑀸 𑀅𑀝𑁆𑀝𑀻𑀬𑁂𑀬𑁆𑀬𑀁 𑀳𑀭𑀸𑀬𑁂𑀬𑁆𑀬𑀁 𑀚𑀺𑀕𑀼𑀘𑁆𑀙𑁂𑀬𑁆𑀬𑀁, 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀬𑁄 𑀚𑀻𑀯𑀺𑀢𑁂 𑀚𑀻𑀯𑀺𑀢𑀫𑀤𑁄 𑀲𑁄 𑀲𑀩𑁆𑀩𑀲𑁄 𑀧𑀳𑀻𑀬𑀻’’𑀢𑀺.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀫𑀤𑀸. 𑀓𑀢𑀫𑁂 𑀢𑀬𑁄? 𑀬𑁄𑀩𑁆𑀩𑀦𑀫𑀤𑁄, 𑀆𑀭𑁄𑀕𑁆𑀬𑀫𑀤𑁄, 𑀚𑀻𑀯𑀺𑀢𑀫𑀤𑁄. 𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀆𑀭𑁄𑀕𑁆𑀬𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀚𑀻𑀯𑀺𑀢𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺.

‘‘𑀬𑁄𑀩𑁆𑀩𑀦𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀆𑀭𑁄𑀕𑁆𑀬𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼…𑀧𑁂… 𑀚𑀻𑀯𑀺𑀢𑀫𑀤𑀫𑀢𑁆𑀢𑁄 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀻’’𑀢𑀺.

‘‘𑀩𑁆𑀬𑀸𑀥𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀦𑁄;

𑀬𑀣𑀸𑀥𑀫𑁆𑀫𑀸 [𑀩𑁆𑀬𑀸𑀥𑀺𑀥𑀫𑁆𑀫𑁄 𑀚𑀭𑀸𑀥𑀫𑁆𑀫𑁄, 𑀅𑀣𑁄 𑀫𑀭𑀡𑀥𑀫𑁆𑀫𑀺𑀓𑁄; 𑀬𑀣𑀸 𑀥𑀫𑁆𑀫𑁄 (𑀓.)] 𑀢𑀣𑀸𑀲𑀦𑁆𑀢𑀸, 𑀚𑀺𑀕𑀼𑀘𑁆𑀙𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸.

‘‘𑀅𑀳𑀜𑁆𑀘𑁂 𑀢𑀁 𑀚𑀺𑀕𑀼𑀘𑁆𑀙𑁂𑀬𑁆𑀬𑀁, 𑀏𑀯𑀁𑀥𑀫𑁆𑀫𑁂𑀲𑀼 𑀧𑀸𑀡𑀺𑀲𑀼;

𑀦 𑀫𑁂𑀢𑀁 𑀧𑀢𑀺𑀭𑀽𑀧𑀲𑁆𑀲, 𑀫𑀫 𑀏𑀯𑀁 𑀯𑀺𑀳𑀸𑀭𑀺𑀦𑁄.

‘‘𑀲𑁄𑀳𑀁 𑀏𑀯𑀁 𑀯𑀺𑀳𑀭𑀦𑁆𑀢𑁄, 𑀜𑀢𑁆𑀯𑀸 𑀥𑀫𑁆𑀫𑀁 𑀦𑀺𑀭𑀽𑀧𑀥𑀺𑀁;

𑀆𑀭𑁄𑀕𑁆𑀬𑁂 𑀬𑁄𑀩𑁆𑀩𑀦𑀲𑁆𑀫𑀺𑀜𑁆𑀘, 𑀚𑀻𑀯𑀺𑀢𑀲𑁆𑀫𑀺𑀜𑁆𑀘 𑀬𑁂 𑀫𑀤𑀸.

‘‘𑀲𑀩𑁆𑀩𑁂 𑀫𑀤𑁂 𑀅𑀪𑀺𑀪𑁄𑀲𑁆𑀫𑀺 [𑀅𑀢𑀻𑀢𑁄𑀲𑁆𑀫𑀺 (𑀓.)], 𑀦𑁂𑀓𑁆𑀔𑀫𑁆𑀫𑁂 𑀤𑀝𑁆𑀞𑀼 𑀔𑁂𑀫𑀢𑀁;

𑀢𑀲𑁆𑀲 𑀫𑁂 𑀅𑀳𑀼 𑀉𑀲𑁆𑀲𑀸𑀳𑁄, 𑀦𑀺𑀩𑁆𑀩𑀸𑀦𑀁 𑀅𑀪𑀺𑀧𑀲𑁆𑀲𑀢𑁄.

‘‘𑀦𑀸𑀳𑀁 𑀪𑀩𑁆𑀩𑁄 𑀏𑀢𑀭𑀳𑀺, 𑀓𑀸𑀫𑀸𑀦𑀺 𑀧𑀝𑀺𑀲𑁂𑀯𑀺𑀢𑀼𑀁;

𑀅𑀦𑀺𑀯𑀢𑁆𑀢𑀺 𑀪𑀯𑀺𑀲𑁆𑀲𑀸𑀫𑀺, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄’’𑀢𑀺. 𑀦𑀯𑀫𑀁;

𑁧𑁦. 𑀆𑀥𑀺𑀧𑀢𑁂𑀬𑁆𑀬𑀲𑀼𑀢𑁆𑀢𑀁

𑁪𑁦. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀥𑀺𑀧𑀢𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁, 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼, 𑀦 𑀲𑁂𑀦𑀸𑀲𑀦𑀳𑁂𑀢𑀼, 𑀦 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀧𑀺 𑀘 𑀔𑁄𑀫𑁆𑀳𑀺 𑀑𑀢𑀺𑀡𑁆𑀡𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀤𑀼𑀓𑁆𑀔𑁄𑀢𑀺𑀡𑁆𑀡𑁄 𑀤𑀼𑀓𑁆𑀔𑀧𑀭𑁂𑀢𑁄. 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀬𑀸𑀤𑀺𑀲𑀓𑁂 [𑀬𑀸𑀤𑀺𑀲𑀓𑁂 𑀯𑀸 (𑀲𑀻. 𑀧𑀻. 𑀓.)] 𑀓𑀸𑀫𑁂 𑀑𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀢𑀸𑀤𑀺𑀲𑀓𑁂 𑀯𑀸 [𑀘 (𑀓.)] 𑀓𑀸𑀫𑁂 𑀧𑀭𑀺𑀬𑁂𑀲𑁂𑀬𑁆𑀬𑀁 𑀢𑀢𑁄 𑀯𑀸 [𑀘 (𑀓.)] 𑀧𑀸𑀧𑀺𑀝𑁆𑀞𑀢𑀭𑁂, 𑀦 𑀫𑁂𑀢𑀁 𑀧𑀢𑀺𑀭𑀽𑀧’𑀦𑁆𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀪𑀯𑀺𑀲𑁆𑀲𑀢𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕’𑀦𑁆𑀢𑀺. 𑀲𑁄 𑀅𑀢𑁆𑀢𑀸𑀦𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼, 𑀦 𑀲𑁂𑀦𑀸𑀲𑀦𑀳𑁂𑀢𑀼, 𑀦 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀧𑀺 𑀘 𑀔𑁄𑀫𑁆𑀳𑀺 𑀑𑀢𑀺𑀡𑁆𑀡𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀤𑀼𑀓𑁆𑀔𑁄𑀢𑀺𑀡𑁆𑀡𑁄 𑀤𑀼𑀓𑁆𑀔𑀧𑀭𑁂𑀢𑁄. 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸’𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀬𑁆𑀬𑀁, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀬𑁆𑀬𑀁, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀬𑁆𑀬𑀁, 𑀫𑀳𑀸 𑀔𑁄 𑀧𑀦𑀸𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀫𑀳𑀦𑁆𑀢𑀲𑁆𑀫𑀺𑀁 𑀔𑁄 𑀧𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀤𑁆𑀥𑀺𑀫𑀦𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄. 𑀢𑁂 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀧𑀚𑀸𑀦𑀦𑁆𑀢𑀺 [𑀚𑀸𑀦𑀦𑁆𑀢𑀺 (𑀓.)]. 𑀢𑁂𑀧𑀺 𑀫𑀁 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺. 𑀤𑁂𑀯𑀢𑀸𑀧𑀺 𑀔𑁄 𑀲𑀦𑁆𑀢𑀺 𑀇𑀤𑁆𑀥𑀺𑀫𑀦𑁆𑀢𑀺𑀦𑀺𑀬𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄. 𑀢𑀸 𑀤𑀽𑀭𑀢𑁄𑀧𑀺 𑀧𑀲𑁆𑀲𑀦𑁆𑀢𑀺, 𑀆𑀲𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺, 𑀘𑁂𑀢𑀲𑀸𑀧𑀺 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺. 𑀢𑀸𑀧𑀺 𑀫𑀁 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀯𑁄𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀪𑀯𑀺𑀲𑁆𑀲𑀢𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕’𑀦𑁆𑀢𑀺. 𑀲𑁄 𑀮𑁄𑀓𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦 𑀔𑁄 𑀧𑀦𑀸𑀳𑀁 𑀘𑀻𑀯𑀭𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀦 𑀧𑀺𑀡𑁆𑀟𑀧𑀸𑀢𑀳𑁂𑀢𑀼, 𑀦 𑀲𑁂𑀦𑀸𑀲𑀦𑀳𑁂𑀢𑀼, 𑀦 𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀅𑀧𑀺 𑀘 𑀔𑁄𑀫𑁆𑀳𑀺 𑀑𑀢𑀺𑀡𑁆𑀡𑁄 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀤𑀼𑀓𑁆𑀔𑁄𑀢𑀺𑀡𑁆𑀡𑁄 𑀤𑀼𑀓𑁆𑀔𑀧𑀭𑁂𑀢𑁄. 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸𑀢𑀺. 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀲𑀦𑁆𑀢𑀺 𑀔𑁄 𑀧𑀦 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀦𑁆𑀢𑀺. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀼𑀲𑀻𑀢𑁄 𑀯𑀺𑀳𑀭𑁂𑀬𑁆𑀬𑀁 𑀧𑀫𑀢𑁆𑀢𑁄, 𑀦 𑀫𑁂𑀢𑀁 𑀅𑀲𑁆𑀲 𑀧𑀢𑀺𑀭𑀽𑀧’𑀦𑁆𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬𑀁 𑀪𑀯𑀺𑀲𑁆𑀲𑀢𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸, 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕’𑀦𑁆𑀢𑀺. 𑀲𑁄 𑀥𑀫𑁆𑀫𑀁𑀬𑁂𑀯 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀆𑀥𑀺𑀧𑀢𑁂𑀬𑁆𑀬𑀸𑀦𑀻’’𑀢𑀺.

‘‘𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄;

𑀅𑀢𑁆𑀢𑀸 𑀢𑁂 𑀧𑀼𑀭𑀺𑀲 𑀚𑀸𑀦𑀸𑀢𑀺, 𑀲𑀘𑁆𑀘𑀁 𑀯𑀸 𑀬𑀤𑀺 𑀯𑀸 𑀫𑀼𑀲𑀸.

‘‘𑀓𑀮𑁆𑀬𑀸𑀡𑀁 𑀯𑀢 𑀪𑁄 𑀲𑀓𑁆𑀔𑀺, 𑀅𑀢𑁆𑀢𑀸𑀦𑀁 𑀅𑀢𑀺𑀫𑀜𑁆𑀜𑀲𑀺;

𑀬𑁄 𑀲𑀦𑁆𑀢𑀁 𑀅𑀢𑁆𑀢𑀦𑀺 𑀧𑀸𑀧𑀁, 𑀅𑀢𑁆𑀢𑀸𑀦𑀁 𑀧𑀭𑀺𑀕𑀽𑀳𑀲𑀺.

‘‘𑀧𑀲𑁆𑀲𑀦𑁆𑀢𑀺 𑀤𑁂𑀯𑀸 𑀘 𑀢𑀣𑀸𑀕𑀢𑀸 𑀘,

𑀮𑁄𑀓𑀲𑁆𑀫𑀺𑀁 𑀩𑀸𑀮𑀁 𑀯𑀺𑀲𑀫𑀁 𑀘𑀭𑀦𑁆𑀢𑀁;

𑀢𑀲𑁆𑀫𑀸 𑀳𑀺 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀓𑁄 𑀘 [𑀅𑀢𑁆𑀢𑀸𑀥𑀺𑀧𑀓𑁄 𑀲𑀓𑁄 𑀘𑀭𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)],

𑀮𑁄𑀓𑀸𑀥𑀺𑀧𑁄 𑀘 𑀦𑀺𑀧𑀓𑁄 𑀘 𑀛𑀸𑀬𑀻.

‘‘𑀥𑀫𑁆𑀫𑀸𑀥𑀺𑀧𑁄 𑀘 𑀅𑀦𑀼𑀥𑀫𑁆𑀫𑀘𑀸𑀭𑀻,

𑀦 𑀳𑀻𑀬𑀢𑀺 𑀲𑀘𑁆𑀘𑀧𑀭𑀓𑁆𑀓𑀫𑁄 𑀫𑀼𑀦𑀺;

𑀧𑀲𑀬𑁆𑀳 𑀫𑀸𑀭𑀁 𑀅𑀪𑀺𑀪𑀼𑀬𑁆𑀬 𑀅𑀦𑁆𑀢𑀓𑀁,

𑀬𑁄 𑀘 𑀨𑀼𑀲𑀻 𑀚𑀸𑀢𑀺𑀓𑁆𑀔𑀬𑀁 𑀧𑀥𑀸𑀦𑀯𑀸;

𑀲𑁄 𑀢𑀸𑀤𑀺𑀲𑁄 𑀮𑁄𑀓𑀯𑀺𑀤𑀽 𑀲𑀼𑀫𑁂𑀥𑁄,

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑀫𑁆𑀫𑀬𑁄 𑀫𑀼𑀦𑀻’’𑀢𑀺. 𑀤𑀲𑀫𑀁;

𑀤𑁂𑀯𑀤𑀽𑀢𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.