𑁬. 𑀲𑀁𑀲𑀧𑁆𑀧𑀦𑀻𑀬𑀲𑀼𑀢𑁆𑀢𑀁

𑁨𑁧𑁬. ‘‘𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄, 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼. 𑀲𑁄 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀚𑀺𑀫𑁆𑀳𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀚𑀺𑀫𑁆𑀳𑀁 𑀯𑀘𑀻𑀓𑀫𑁆𑀫𑀁, 𑀚𑀺𑀫𑁆𑀳𑀁 𑀫𑀦𑁄𑀓𑀫𑁆𑀫𑀁, 𑀚𑀺𑀫𑁆𑀳𑀸 𑀕𑀢𑀺, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺.

‘‘𑀚𑀺𑀫𑁆𑀳𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀤𑀼𑀓𑁆𑀔𑀸 𑀦𑀺𑀭𑀬𑀸 𑀬𑀸 𑀯𑀸 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺? 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻 𑀦𑀓𑀼𑀮𑀸 𑀩𑀺𑀴𑀸𑀭𑀸 𑀫𑀽𑀲𑀺𑀓𑀸 𑀉𑀮𑀽𑀓𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀲𑀢𑁆𑀢𑀸 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀲𑀁𑀲𑀧𑁆𑀧𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺… 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺… 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺… 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀲𑁄 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀚𑀺𑀫𑁆𑀳𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀚𑀺𑀫𑁆𑀳𑀁 𑀯𑀘𑀻𑀓𑀫𑁆𑀫𑀁, 𑀚𑀺𑀫𑁆𑀳𑀁 𑀫𑀦𑁄𑀓𑀫𑁆𑀫𑀁, 𑀚𑀺𑀫𑁆𑀳𑀸 𑀕𑀢𑀺, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺.

‘‘𑀚𑀺𑀫𑁆𑀳𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀤𑀼𑀓𑁆𑀔𑀸 𑀦𑀺𑀭𑀬𑀸 𑀬𑀸 𑀯𑀸 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺? 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻 𑀦𑀓𑀼𑀮𑀸 𑀩𑀺𑀴𑀸𑀭𑀸 𑀫𑀽𑀲𑀺𑀓𑀸 𑀉𑀮𑀽𑀓𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀲𑀢𑁆𑀢𑀸 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀲𑀁𑀲𑀧𑁆𑀧𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺. 𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄, 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀲𑁄 𑀦 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀦 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀦 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀉𑀚𑀼 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀉𑀚𑀼 𑀯𑀘𑀻𑀓𑀫𑁆𑀫𑀁, 𑀉𑀚𑀼 𑀫𑀦𑁄𑀓𑀫𑁆𑀫𑀁, 𑀉𑀚𑀼 𑀕𑀢𑀺, 𑀉𑀚𑀼𑀧𑀧𑀢𑁆𑀢𑀺.

‘‘𑀉𑀚𑀼𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀉𑀚𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀲𑀼𑀔𑀸 𑀲𑀕𑁆𑀕𑀸 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀉𑀘𑁆𑀘𑀸𑀓𑀼𑀮𑀸𑀦𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀅𑀟𑁆𑀠𑀸𑀦𑀺 𑀫𑀳𑀤𑁆𑀥𑀦𑀸𑀦𑀺 𑀫𑀳𑀸𑀪𑁄𑀕𑀸𑀦𑀺 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸𑀦𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺 𑀧𑀳𑀽𑀢𑀥𑀦𑀥𑀜𑁆𑀜𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀲𑁄 𑀦 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀦 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀦 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀉𑀚𑀼 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀉𑀚𑀼 𑀯𑀘𑀻𑀓𑀫𑁆𑀫𑀁, 𑀉𑀚𑀼 𑀫𑀦𑁄𑀓𑀫𑁆𑀫𑀁, 𑀉𑀚𑀼 𑀕𑀢𑀺, 𑀉𑀚𑀼𑀧𑀧𑀢𑁆𑀢𑀺.

‘‘𑀉𑀚𑀼𑀕𑀢𑀺𑀓𑀲𑁆𑀲 𑀔𑁄 𑀧𑀦 𑀅𑀳𑀁, 𑀪𑀺𑀓𑁆𑀔𑀯𑁂, 𑀉𑀚𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀲𑀼𑀔𑀸 𑀲𑀕𑁆𑀕𑀸 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀉𑀘𑁆𑀘𑀸𑀓𑀼𑀮𑀸𑀦𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀅𑀟𑁆𑀠𑀸𑀦𑀺 𑀫𑀳𑀤𑁆𑀥𑀦𑀸𑀦𑀺 𑀫𑀳𑀸𑀪𑁄𑀕𑀸𑀦𑀺 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸𑀦𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺 𑀧𑀳𑀽𑀢𑀥𑀦𑀥𑀜𑁆𑀜𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺. 𑀅𑀬𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀙𑀝𑁆𑀞𑀁.