(𑁨𑁧) 𑁧. 𑀓𑀭𑀚𑀓𑀸𑀬𑀯𑀕𑁆𑀕𑁄

𑁧. 𑀧𑀞𑀫𑀦𑀺𑀭𑀬𑀲𑀕𑁆𑀕𑀲𑀼𑀢𑁆𑀢𑀁

𑁨𑁧𑁧. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼 [𑀦𑀢𑁆𑀣𑁂𑀢𑁆𑀣 𑀧𑀸𑀞𑀪𑁂𑀤𑁄].

‘‘𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀲𑀸𑀫𑀺𑀓𑀸 𑀲𑀧𑀭𑀺𑀤𑀡𑁆𑀟𑀸 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺.

‘‘𑀫𑀼𑀲𑀸𑀯𑀸𑀤𑀻 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻, 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀯𑀸𑀘𑁄 𑀳𑁄𑀢𑀺 𑁋 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺 𑀅𑀓𑀸𑀮𑀯𑀸𑀤𑀻 𑀅𑀪𑀽𑀢𑀯𑀸𑀤𑀻 𑀅𑀦𑀢𑁆𑀣𑀯𑀸𑀤𑀻 𑀅𑀥𑀫𑁆𑀫𑀯𑀸𑀤𑀻 𑀅𑀯𑀺𑀦𑀬𑀯𑀸𑀤𑀻, 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀅𑀓𑀸𑀮𑁂𑀦 𑀅𑀦𑀧𑀤𑁂𑀲𑀁 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁.

‘‘𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫 𑀅𑀲𑁆𑀲𑀸’𑀢𑀺.

‘‘𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀩𑀚𑁆𑀛𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’𑀦𑁆𑀢𑀺.

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀦 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸…𑀧𑁂… 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀦 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺.

‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀦 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻, 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻, 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁.

‘‘𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀦𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢 𑀬𑀁 𑀧𑀭𑀲𑁆𑀲 𑀢𑀁 𑀫𑀫 𑀅𑀲𑁆𑀲𑀸’𑀢𑀺.

‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀅𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀫𑀸𑀢𑀸, 𑀅𑀢𑁆𑀣𑀺 𑀧𑀺𑀢𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀦𑀺𑀭𑀬𑀲𑀕𑁆𑀕𑀲𑀼𑀢𑁆𑀢𑀁

𑁨𑁧𑁨. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼.

‘‘𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺… 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺… 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺 … 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺… 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀁

𑁨𑁧𑁩. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺… 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺… 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺… 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺…. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺… 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀸𑀢𑀼𑀕𑀸𑀫𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺. 𑀢𑀢𑀺𑀬𑀁.

𑁪. 𑀉𑀧𑀸𑀲𑀺𑀓𑀸𑀲𑀼𑀢𑁆𑀢𑀁

𑁨𑁧𑁪. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀺𑀦𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀳𑁄𑀢𑀺…. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀦𑀺𑀭𑀬𑁂.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀳𑁄𑀢𑀺…. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑀸 𑀏𑀯𑀁 𑀲𑀕𑁆𑀕𑁂’’. 𑀘𑀢𑀼𑀢𑁆𑀣𑀁.

𑁫. 𑀯𑀺𑀲𑀸𑀭𑀤𑀲𑀼𑀢𑁆𑀢𑀁

𑁨𑁧𑁫. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀅𑀯𑀺𑀲𑀸𑀭𑀤𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀺𑀦𑀻 𑀳𑁄𑀢𑀺… 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑀻 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑀻 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀺𑀦𑀻 𑀳𑁄𑀢𑀺… 𑀧𑀺𑀲𑀼𑀡𑀸𑀯𑀸𑀘𑀸 𑀳𑁄𑀢𑀺… 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑀻 𑀳𑁄𑀢𑀺… 𑀅𑀪𑀺𑀚𑁆𑀛𑀸𑀮𑀼𑀦𑀻 𑀳𑁄𑀢𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀳𑁄𑀢𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀳𑁄𑀢𑀺…. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀅𑀯𑀺𑀲𑀸𑀭𑀤𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀯𑀺𑀲𑀸𑀭𑀤𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸 𑀳𑁄𑀢𑀺… 𑀅𑀦𑀪𑀺𑀚𑁆𑀛𑀸𑀮𑀼𑀦𑀻 𑀳𑁄𑀢𑀺… 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀳𑁄𑀢𑀺…. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀉𑀧𑀸𑀲𑀺𑀓𑀸 𑀯𑀺𑀲𑀸𑀭𑀤𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀁𑀲𑀧𑁆𑀧𑀦𑀻𑀬𑀲𑀼𑀢𑁆𑀢𑀁

𑁨𑁧𑁬. ‘‘𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄? 𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄, 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼. 𑀲𑁄 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀚𑀺𑀫𑁆𑀳𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀚𑀺𑀫𑁆𑀳𑀁 𑀯𑀘𑀻𑀓𑀫𑁆𑀫𑀁, 𑀚𑀺𑀫𑁆𑀳𑀁 𑀫𑀦𑁄𑀓𑀫𑁆𑀫𑀁, 𑀚𑀺𑀫𑁆𑀳𑀸 𑀕𑀢𑀺, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺.

‘‘𑀚𑀺𑀫𑁆𑀳𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀤𑀼𑀓𑁆𑀔𑀸 𑀦𑀺𑀭𑀬𑀸 𑀬𑀸 𑀯𑀸 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺? 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻 𑀦𑀓𑀼𑀮𑀸 𑀩𑀺𑀴𑀸𑀭𑀸 𑀫𑀽𑀲𑀺𑀓𑀸 𑀉𑀮𑀽𑀓𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀲𑀢𑁆𑀢𑀸 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀲𑀁𑀲𑀧𑁆𑀧𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺… 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺… 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺… 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀲𑁄 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀚𑀺𑀫𑁆𑀳𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀚𑀺𑀫𑁆𑀳𑀁 𑀯𑀘𑀻𑀓𑀫𑁆𑀫𑀁, 𑀚𑀺𑀫𑁆𑀳𑀁 𑀫𑀦𑁄𑀓𑀫𑁆𑀫𑀁, 𑀚𑀺𑀫𑁆𑀳𑀸 𑀕𑀢𑀺, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺.

‘‘𑀚𑀺𑀫𑁆𑀳𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀚𑀺𑀫𑁆𑀳𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀤𑀼𑀓𑁆𑀔𑀸 𑀦𑀺𑀭𑀬𑀸 𑀬𑀸 𑀯𑀸 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀚𑀸𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺? 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻 𑀦𑀓𑀼𑀮𑀸 𑀩𑀺𑀴𑀸𑀭𑀸 𑀫𑀽𑀲𑀺𑀓𑀸 𑀉𑀮𑀽𑀓𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸 𑀲𑀢𑁆𑀢𑀸 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀲𑀁𑀲𑀧𑁆𑀧𑀦𑁆𑀢𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺. 𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺.

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄, 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀲𑁄 𑀦 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀦 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀦 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀉𑀚𑀼 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀉𑀚𑀼 𑀯𑀘𑀻𑀓𑀫𑁆𑀫𑀁, 𑀉𑀚𑀼 𑀫𑀦𑁄𑀓𑀫𑁆𑀫𑀁, 𑀉𑀚𑀼 𑀕𑀢𑀺, 𑀉𑀚𑀼𑀧𑀧𑀢𑁆𑀢𑀺.

‘‘𑀉𑀚𑀼𑀕𑀢𑀺𑀓𑀲𑁆𑀲 𑀔𑁄 𑀧𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀉𑀚𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀲𑀼𑀔𑀸 𑀲𑀕𑁆𑀕𑀸 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀉𑀘𑁆𑀘𑀸𑀓𑀼𑀮𑀸𑀦𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀅𑀟𑁆𑀠𑀸𑀦𑀺 𑀫𑀳𑀤𑁆𑀥𑀦𑀸𑀦𑀺 𑀫𑀳𑀸𑀪𑁄𑀕𑀸𑀦𑀺 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸𑀦𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺 𑀧𑀳𑀽𑀢𑀥𑀦𑀥𑀜𑁆𑀜𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺… 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺… 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀲𑁄 𑀦 𑀲𑀁𑀲𑀧𑁆𑀧𑀢𑀺 𑀓𑀸𑀬𑁂𑀦, 𑀦 𑀲𑀁𑀲𑀧𑁆𑀧𑀢𑀺 𑀯𑀸𑀘𑀸𑀬, 𑀦 𑀲𑀁𑀲𑀧𑁆𑀧𑀢𑀺 𑀫𑀦𑀲𑀸. 𑀢𑀲𑁆𑀲 𑀉𑀚𑀼 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀉𑀚𑀼 𑀯𑀘𑀻𑀓𑀫𑁆𑀫𑀁, 𑀉𑀚𑀼 𑀫𑀦𑁄𑀓𑀫𑁆𑀫𑀁, 𑀉𑀚𑀼 𑀕𑀢𑀺, 𑀉𑀚𑀼𑀧𑀧𑀢𑁆𑀢𑀺.

‘‘𑀉𑀚𑀼𑀕𑀢𑀺𑀓𑀲𑁆𑀲 𑀔𑁄 𑀧𑀦 𑀅𑀳𑀁, 𑀪𑀺𑀓𑁆𑀔𑀯𑁂, 𑀉𑀚𑀼𑀧𑀧𑀢𑁆𑀢𑀺𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀬𑁂 𑀯𑀸 𑀏𑀓𑀦𑁆𑀢𑀲𑀼𑀔𑀸 𑀲𑀕𑁆𑀕𑀸 𑀬𑀸𑀦𑀺 𑀯𑀸 𑀧𑀦 𑀢𑀸𑀦𑀺 𑀉𑀘𑁆𑀘𑀸𑀓𑀼𑀮𑀸𑀦𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀸 𑀅𑀟𑁆𑀠𑀸𑀦𑀺 𑀫𑀳𑀤𑁆𑀥𑀦𑀸𑀦𑀺 𑀫𑀳𑀸𑀪𑁄𑀕𑀸𑀦𑀺 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸𑀦𑀺 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺 𑀧𑀳𑀽𑀢𑀥𑀦𑀥𑀜𑁆𑀜𑀸𑀦𑀺. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀽𑀢𑀸 𑀪𑀽𑀢𑀲𑁆𑀲 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀺. 𑀉𑀧𑀧𑀦𑁆𑀦𑀫𑁂𑀦𑀁 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀯𑀫𑀳𑀁, 𑀪𑀺𑀓𑁆𑀔𑀯𑁂, ‘𑀓𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀢𑀸’𑀢𑀺 𑀯𑀤𑀸𑀫𑀺.

‘‘𑀓𑀫𑁆𑀫𑀲𑁆𑀲𑀓𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀫𑁆𑀫𑀤𑀸𑀬𑀸𑀤𑀸 𑀓𑀫𑁆𑀫𑀬𑁄𑀦𑀻 𑀓𑀫𑁆𑀫𑀩𑀦𑁆𑀥𑀽 𑀓𑀫𑁆𑀫𑀧𑀝𑀺𑀲𑀭𑀡𑀸, 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺 𑁋 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸 𑁋 𑀢𑀲𑁆𑀲 𑀤𑀸𑀬𑀸𑀤𑀸 𑀪𑀯𑀦𑁆𑀢𑀺. 𑀅𑀬𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀁𑀲𑀧𑁆𑀧𑀦𑀻𑀬𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀲𑀜𑁆𑀘𑁂𑀢𑀦𑀺𑀓𑀲𑀼𑀢𑁆𑀢𑀁

𑁨𑁧𑁭. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 [𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺. 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 [𑀉𑀧𑀧𑀚𑁆𑀚𑀁 𑀯𑀸 (𑀓.) 𑀅. 𑀦𑀺. 𑁬.𑁬𑁩 𑀧𑀲𑁆𑀲𑀺𑀢𑀩𑁆𑀩𑀁, 𑀉𑀧𑀧𑀚𑁆𑀚 𑀯𑀸 (𑀫. 𑀦𑀺. 𑁩.𑁩𑁦𑁩)] 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 [𑀅𑀓𑀼𑀲𑀮𑀁 𑀲𑀜𑁆𑀘𑁂𑀢𑀦𑀺𑀓𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀁 (𑀓.)] 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀺 𑀳𑀢𑀧𑀳𑀢𑁂 𑀦𑀺𑀯𑀺𑀝𑁆𑀞𑁄 𑀅𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑁂𑀲𑀼.

‘‘𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸…𑀧𑁂… 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺. 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀢𑁆𑀢𑀸 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀯𑀕𑁆𑀕𑀸𑀭𑀸𑀫𑁄 𑀯𑀕𑁆𑀕𑀭𑀢𑁄 𑀯𑀕𑁆𑀕𑀦𑀦𑁆𑀤𑀻, 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀯𑀸𑀘𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸. 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺 𑀅𑀓𑀸𑀮𑀯𑀸𑀤𑀻 𑀅𑀪𑀽𑀢𑀯𑀸𑀤𑀻 𑀅𑀦𑀢𑁆𑀣𑀯𑀸𑀤𑀻 𑀅𑀥𑀫𑁆𑀫𑀯𑀸𑀤𑀻 𑀅𑀯𑀺𑀦𑀬𑀯𑀸𑀤𑀻, 𑀅𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀅𑀓𑀸𑀮𑁂𑀦 𑀅𑀦𑀧𑀤𑁂𑀲𑀁 𑀅𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁, 𑀢𑀁 𑀅𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢, 𑀬𑀁 𑀧𑀭𑀲𑁆𑀲 𑀢𑀁 𑀫𑀫 𑀅𑀲𑁆𑀲𑀸’𑀢𑀺.

‘‘𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀩𑀚𑁆𑀛𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼’𑀦𑁆𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀦𑀢𑁆𑀣𑀺 𑀤𑀺𑀦𑁆𑀦𑀁…𑀧𑁂. … 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀢𑀺𑀯𑀺𑀥 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 [… 𑀲𑀜𑁆𑀘𑁂𑀢𑀦𑀺𑀓𑀳𑁂𑀢𑀼 (𑀓.)] 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑀡𑁆𑀡𑀓𑁄 𑀫𑀡𑀺 𑀉𑀤𑁆𑀥𑀁𑀔𑀺𑀢𑁆𑀢𑁄 𑀬𑁂𑀦 𑀬𑁂𑀦𑁂𑀯 𑀧𑀢𑀺𑀝𑁆𑀞𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁𑀬𑁂𑀯 𑀧𑀢𑀺𑀝𑁆𑀞𑀸𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺.

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺, 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺…𑀧𑁂….

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀕𑀸𑀫𑀕𑀢𑀁 𑀯𑀸 𑀅𑀭𑀜𑁆𑀜𑀕𑀢𑀁 𑀯𑀸, 𑀦 𑀢𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀸 𑀳𑁄𑀢𑀺.

‘‘𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀧𑀳𑀸𑀬, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸 …𑀧𑁂… 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺, 𑀢𑀣𑀸𑀭𑀽𑀧𑀸𑀲𑀼 𑀦 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 ‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 ‘𑀦 𑀚𑀸𑀦𑀸𑀫𑀻’𑀢𑀺, 𑀚𑀸𑀦𑀁 𑀯𑀸 𑀆𑀳 ‘𑀚𑀸𑀦𑀸𑀫𑀻’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 ‘𑀦 𑀧𑀲𑁆𑀲𑀸𑀫𑀻’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 ‘𑀧𑀲𑁆𑀲𑀸𑀫𑀻’𑀢𑀺, 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀦 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑁋 𑀦 𑀇𑀢𑁄 𑀲𑀼𑀢𑁆𑀯𑀸 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀺𑀁, 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺. 𑀬𑀁 𑀢𑀁 𑀧𑀭𑀲𑁆𑀲 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀅𑀦𑀪𑀺𑀚𑁆𑀛𑀸𑀢𑀸 𑀳𑁄𑀢𑀺 𑁋 ‘𑀅𑀳𑁄 𑀯𑀢, 𑀬𑀁 𑀧𑀭𑀲𑁆𑀲 𑀢𑀁 𑀫𑀫𑀲𑁆𑀲𑀸’𑀢𑀺.

‘‘𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺 𑀅𑀧𑁆𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑁋 ‘𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼 𑀅𑀩𑁆𑀬𑀸𑀧𑀚𑁆𑀚𑀸 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽’𑀢𑀺.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑁋 ‘𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻’𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀢𑀺𑀯𑀺𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑀡𑁆𑀡𑀓𑁄 𑀫𑀡𑀺 𑀉𑀤𑁆𑀥𑀁𑀔𑀺𑀢𑁆𑀢𑁄 𑀬𑁂𑀦 𑀬𑁂𑀦𑁂𑀯 𑀧𑀢𑀺𑀝𑁆𑀞𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁𑀬𑁂𑀯 𑀧𑀢𑀺𑀝𑁆𑀞𑀸𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺. 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀻’’𑀢𑀺. 𑀲𑀢𑁆𑀢𑀫𑀁. [𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀝𑁆𑀞𑀫𑀲𑀼𑀢𑁆𑀢𑀫𑁆𑀧𑀺 𑀏𑀢𑁆𑀣𑁂𑀯 𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀬 𑀲𑀁𑀯𑀡𑁆𑀡𑀦𑀸 𑀤𑀺𑀲𑁆𑀲𑀢𑀺]

𑁮. 𑀤𑀼𑀢𑀺𑀬𑀲𑀜𑁆𑀘𑁂𑀢𑀦𑀺𑀓𑀲𑀼𑀢𑁆𑀢𑀁

𑁨𑁧𑁮. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺, 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀤𑀼𑀓𑁆𑀔𑀼𑀤𑁆𑀭𑀬𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀢𑀺𑀯𑀺𑀥 𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢…𑀧𑁂… 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀩𑁆𑀬𑀸𑀧𑀢𑁆𑀢𑀺 𑀅𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺, 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀩𑁆𑀩𑀺𑀥𑀸 𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀯𑀺𑀥𑀸 𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺 𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀔𑀼𑀤𑁆𑀭𑀬𑀸 𑀲𑀼𑀔𑀯𑀺𑀧𑀸𑀓𑀸 𑀳𑁄𑀢𑀺.

‘‘𑀢𑀺𑀯𑀺𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺; 𑀘𑀢𑀼𑀩𑁆𑀩𑀺𑀥𑀯𑀘𑀻𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺…𑀧𑁂… 𑀢𑀺𑀯𑀺𑀥𑀫𑀦𑁄𑀓𑀫𑁆𑀫𑀦𑁆𑀢𑀲𑀫𑁆𑀧𑀢𑁆𑀢𑀺𑀓𑀼𑀲𑀮𑀲𑀜𑁆𑀘𑁂𑀢𑀦𑀺𑀓𑀸𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺…𑀧𑁂…. [𑀉𑀧𑀧𑀚𑁆𑀚𑀦𑁆𑀢𑀺. (𑀲𑁆𑀬𑀸. 𑀓.) 𑀢𑀣𑀸 𑀲𑀢𑀺 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀲𑀜𑁆𑀘𑁂𑀢𑀦𑀺𑀓𑀸𑀦’’ 𑀫𑀺𑀘𑁆𑀘𑀸𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀯𑀘𑀦𑁂𑀦 𑀲𑀳 𑀏𑀓𑀲𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑁂𑀬𑁆𑀬𑀸𑀮𑁂𑀦 𑀧𑀦 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀺𑀬 𑀦𑀺𑀕𑀫𑀦𑀁 𑀤𑀲𑁆𑀲𑀺𑀢𑀁] 𑀅𑀝𑁆𑀞𑀫𑀁.

𑁯. 𑀓𑀭𑀚𑀓𑀸𑀬𑀲𑀼𑀢𑁆𑀢𑀁

𑁨𑁧𑁯. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀩𑁆𑀬𑀦𑁆𑀢𑀻𑀪𑀸𑀯𑀁 𑀯𑀤𑀸𑀫𑀺, 𑀢𑀜𑁆𑀘 𑀔𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀉𑀧𑀘𑀺𑀢𑀸𑀦𑀁 𑀅𑀧𑁆𑀧𑀝𑀺𑀲𑀁𑀯𑁂𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀏𑀯𑀁 𑀯𑀺𑀕𑀢𑀸𑀪𑀺𑀚𑁆𑀛𑁄 𑀯𑀺𑀕𑀢𑀩𑁆𑀬𑀸𑀧𑀸𑀤𑁄 𑀅𑀲𑀫𑁆𑀫𑀽𑀴𑁆𑀳𑁄 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁 [𑀘𑀢𑀼𑀢𑁆𑀣𑀺𑀁 (?)]. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀧𑀼𑀩𑁆𑀩𑁂 𑀔𑁄 𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀳𑁄𑀲𑀺 𑀅𑀪𑀸𑀯𑀺𑀢𑀁, 𑀏𑀢𑀭𑀳𑀺 𑀧𑀦 𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁, 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀤𑀳𑀭𑀢𑀕𑁆𑀕𑁂 𑀘𑁂 𑀲𑁄 𑀅𑀬𑀁 [𑀘𑁂 𑀅𑀬𑀁 (𑀲𑁆𑀬𑀸.)] 𑀓𑀼𑀫𑀸𑀭𑁄 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀪𑀸𑀯𑁂𑀬𑁆𑀬, 𑀅𑀧𑀺 𑀦𑀼 𑀔𑁄 [𑀅𑀧𑀺 𑀦𑀼 𑀲𑁄 (?)] 𑀧𑀸𑀧𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀓𑀭𑁄𑀦𑁆𑀢𑀁 𑀔𑁄 𑀧𑀦 𑀧𑀸𑀧𑀓𑀫𑁆𑀫𑀁 𑀅𑀧𑀺 𑀦𑀼 𑀔𑁄 𑀤𑀼𑀓𑁆𑀔𑀁 𑀨𑀼𑀲𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀓𑀭𑁄𑀦𑁆𑀢𑀜𑁆𑀳𑀺, 𑀪𑀦𑁆𑀢𑁂, 𑀧𑀸𑀧𑀓𑀫𑁆𑀫𑀁 𑀓𑀼𑀢𑁄 𑀤𑀼𑀓𑁆𑀔𑀁 𑀨𑀼𑀲𑀺𑀲𑁆𑀲𑀢𑀻’’𑀢𑀺!

‘‘𑀪𑀸𑀯𑁂𑀢𑀩𑁆𑀩𑀸 𑀔𑁄 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸. 𑀇𑀢𑁆𑀣𑀺𑀬𑀸 𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀯𑀸 𑀦𑀸𑀬𑀁 𑀓𑀸𑀬𑁄 𑀆𑀤𑀸𑀬 𑀕𑀫𑀦𑀻𑀬𑁄. 𑀘𑀺𑀢𑁆𑀢𑀦𑁆𑀢𑀭𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀘𑁆𑀘𑁄. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑀁 𑀔𑁄 𑀫𑁂 𑀇𑀤𑀁 𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀇𑀫𑀺𑀦𑀸 𑀓𑀭𑀚𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀲𑀩𑁆𑀩𑀁 𑀢𑀁 𑀇𑀥 𑀯𑁂𑀤𑀦𑀻𑀬𑀁; 𑀦 𑀢𑀁 𑀅𑀦𑀼𑀕𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀇𑀥 𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄.

‘‘𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀧𑀼𑀩𑁆𑀩𑁂 𑀔𑁄 𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀳𑁄𑀲𑀺 𑀅𑀪𑀸𑀯𑀺𑀢𑀁, 𑀏𑀢𑀭𑀳𑀺 𑀧𑀦 𑀫𑁂 𑀇𑀤𑀁 𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁, 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀤𑀳𑀭𑀢𑀕𑁆𑀕𑁂 𑀘𑁂 𑀲𑁄 𑀅𑀬𑀁 𑀓𑀼𑀫𑀸𑀭𑁄 𑀉𑀧𑁂𑀓𑁆𑀔𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀪𑀸𑀯𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀧𑀸𑀧𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀓𑀭𑁄𑀦𑁆𑀢𑀁 𑀔𑁄 𑀧𑀦 𑀧𑀸𑀧𑀓𑀫𑁆𑀫𑀁 𑀅𑀧𑀺 𑀦𑀼 𑀔𑁄 𑀤𑀼𑀓𑁆𑀔𑀁 𑀨𑀼𑀲𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀓𑀭𑁄𑀦𑁆𑀢𑀜𑁆𑀳𑀺, 𑀪𑀦𑁆𑀢𑁂, 𑀧𑀸𑀧𑀓𑀫𑁆𑀫𑀁 𑀓𑀼𑀢𑁄 𑀤𑀼𑀓𑁆𑀔𑀁 𑀨𑀼𑀲𑀺𑀲𑁆𑀲𑀢𑀻’’𑀢𑀺!

‘‘𑀪𑀸𑀯𑁂𑀢𑀩𑁆𑀩𑀸 𑀔𑁄 𑀧𑀦𑀸𑀬𑀁, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑁂𑀦 𑀯𑀸. 𑀇𑀢𑁆𑀣𑀺𑀬𑀸 𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀯𑀸 𑀦𑀸𑀬𑀁 𑀓𑀸𑀬𑁄 𑀆𑀤𑀸𑀬 𑀕𑀫𑀦𑀻𑀬𑁄. 𑀘𑀺𑀢𑁆𑀢𑀦𑁆𑀢𑀭𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀘𑁆𑀘𑁄. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀬𑀁 𑀔𑁄 𑀫𑁂 𑀇𑀤𑀁 𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀇𑀫𑀺𑀦𑀸 𑀓𑀭𑀚𑀓𑀸𑀬𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀲𑀩𑁆𑀩𑀁 𑀢𑀁 𑀇𑀥 𑀯𑁂𑀤𑀦𑀻𑀬𑀁; 𑀦 𑀢𑀁 𑀅𑀦𑀼𑀕𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀇𑀥 𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺 𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄’’𑀢𑀺. 𑀦𑀯𑀫𑀁.

𑁧𑁦. 𑀅𑀥𑀫𑁆𑀫𑀘𑀭𑀺𑀬𑀸𑀲𑀼𑀢𑁆𑀢𑀁

𑁨𑁨𑁦. [𑀅. 𑀦𑀺. 𑁨.𑁧𑁬] 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀦 𑀔𑁄 𑀅𑀳𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀺𑀯𑀺𑀥𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀓𑀸𑀬𑁂𑀦 𑀅𑀥𑀫𑁆𑀫𑀘𑀭𑀺𑀬𑀸 𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸 𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀫𑀦𑀲𑀸 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀺. 𑀏𑀯𑀁 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺.

‘‘𑀢𑀺𑀯𑀺𑀥𑀸 𑀩𑁆𑀭𑀸𑀳𑁆𑀫𑀡, 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺; 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺; 𑀢𑀺𑀯𑀺𑀥𑀸 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀩𑁆𑀩𑀺𑀥𑀸 𑀯𑀸𑀘𑀸𑀬 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺.

‘‘𑀓𑀣𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺…𑀧𑁂… 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀯𑀺𑀥𑀸 𑀫𑀦𑀲𑀸 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀺. 𑀏𑀯𑀁 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑀲𑀫𑀁.

𑀓𑀭𑀚𑀓𑀸𑀬𑀯𑀕𑁆𑀕𑁄 𑀧𑀞𑀫𑁄.