(𑁨𑁨) 𑁨. 𑀲𑀸𑀫𑀜𑁆𑀜𑀯𑀕𑁆𑀕𑁄

𑁨𑁨𑁧. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀤𑀲𑀳𑀺? 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁨𑁨𑁨. ‘‘𑀯𑀻𑀲𑀢𑀺𑀬𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀻𑀲𑀢𑀺𑀬𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀯𑀻𑀲𑀢𑀺𑀬𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀯𑀻𑀲𑀢𑀺𑀬𑀸? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀦𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀻𑀲𑀢𑀺𑀬𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁨𑁨𑁩. ‘‘𑀢𑀺𑀁𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀢𑀺𑀁𑀲𑀸𑀬? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀫𑀸𑀤𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀲𑀫𑀸𑀤𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀫𑀼𑀲𑀸𑀯𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑁂 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀪𑀺𑀚𑁆𑀛𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀩𑁆𑀬𑀸𑀧𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀁𑀲𑀸𑀬 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀢𑀺𑀁𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀢𑀺𑀁𑀲𑀸𑀬? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀦𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀦𑀪𑀺𑀚𑁆𑀛𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀅𑀩𑁆𑀬𑀸𑀧𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀁𑀲𑀸𑀬 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁨𑁨𑁪. ‘‘𑀘𑀢𑁆𑀢𑀸𑀭𑀻𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀘𑀢𑁆𑀢𑀸𑀭𑀻𑀲𑀸𑀬? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑁂 𑀲𑀫𑀸𑀤𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑁂 𑀲𑀫𑀸𑀤𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀲𑀫𑀸𑀤𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀫𑀼𑀲𑀸𑀯𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀯𑀸𑀘𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀲𑀫𑀸𑀤𑀧𑁂𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀻 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑁂 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀅𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀪𑀺𑀚𑁆𑀛𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀅𑀪𑀺𑀚𑁆𑀛𑀸𑀬 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀩𑁆𑀬𑀸𑀧𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀩𑁆𑀬𑀸𑀧𑀸𑀤𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀻𑀲𑀸𑀬 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀘𑀢𑁆𑀢𑀸𑀭𑀻𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀘𑀢𑁆𑀢𑀸𑀭𑀻𑀲𑀸𑀬? 𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀸𑀤𑀧𑁂𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀧𑀭𑀜𑁆𑀘 𑀅𑀦𑀪𑀺𑀚𑁆𑀛𑀸𑀬 𑀲𑀫𑀸𑀤𑀧𑁂𑀢𑀺, 𑀅𑀦𑀪𑀺𑀚𑁆𑀛𑀸𑀬 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸𑀬 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀅𑀩𑁆𑀬𑀸𑀧𑀸𑀤𑁂 𑀲𑀫𑀸𑀤𑀧𑁂𑀢𑀺, 𑀅𑀩𑁆𑀬𑀸𑀧𑀸𑀤𑁂 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀅𑀩𑁆𑀬𑀸𑀧𑀸𑀤𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀢𑀺; 𑀅𑀢𑁆𑀢𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀧𑀭𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀧𑁂𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀻𑀲𑀸𑀬 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁨𑁨𑁫-𑁨𑁨𑁮. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺…𑀧𑁂… 𑀅𑀓𑁆𑀔𑀢𑀁 𑀅𑀦𑀼𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺…𑀧𑁂… 𑀯𑀻𑀲𑀢𑀺𑀬𑀸, 𑀪𑀺𑀓𑁆𑀔𑀯𑁂…𑀧𑁂… 𑀢𑀺𑀁𑀲𑀸𑀬, 𑀪𑀺𑀓𑁆𑀔𑀯𑁂…𑀧𑁂… 𑀘𑀢𑁆𑀢𑀸𑀭𑀻𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀔𑀢𑀁 𑀉𑀧𑀳𑀢𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀺…𑀧𑁂….

𑁨𑁨𑁯-𑁨𑁩𑁨. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺…𑀧𑁂… 𑀇𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀯𑀻𑀲𑀢𑀺𑀬𑀸, 𑀪𑀺𑀓𑁆𑀔𑀯𑁂…𑀧𑁂… 𑀢𑀺𑀁𑀲𑀸𑀬, 𑀪𑀺𑀓𑁆𑀔𑀯𑁂,…𑀧𑁂… 𑀘𑀢𑁆𑀢𑀸𑀭𑀻𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺…𑀧𑁂… 𑀇𑀥𑁂𑀓𑀘𑁆𑀘𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺’’.

𑁨𑁩𑁩-𑁨𑁩𑁬. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀸𑀮𑁄 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀧𑀡𑁆𑀟𑀺𑀢𑁄 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀯𑀻𑀲𑀢𑀺𑀬𑀸, 𑀪𑀺𑀓𑁆𑀔𑀯𑁂…𑀧𑁂… 𑀢𑀺𑀁𑀲𑀸𑀬, 𑀪𑀺𑀓𑁆𑀔𑀯𑁂…𑀧𑁂… 𑀘𑀢𑁆𑀢𑀸𑀭𑀻𑀲𑀸𑀬, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀩𑀸𑀮𑁄 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀧𑀡𑁆𑀟𑀺𑀢𑁄 𑀯𑁂𑀤𑀺𑀢𑀩𑁆𑀩𑁄 …𑀧𑁂… 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀻𑀲𑀸𑀬 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀡𑁆𑀟𑀺𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀲𑀸𑀫𑀜𑁆𑀜𑀯𑀕𑁆𑀕𑁄 𑀤𑀼𑀢𑀺𑀬𑁄.