(𑁧𑁪) 𑁪. 𑀲𑀸𑀥𑀼𑀯𑀕𑁆𑀕𑁄

𑁧. 𑀲𑀸𑀥𑀼𑀲𑀼𑀢𑁆𑀢𑀁

𑁧𑁩𑁪. [𑀅. 𑀦𑀺. 𑁧𑁦.𑁧𑁭𑁮] ‘‘𑀲𑀸𑀥𑀼𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀸𑀥𑀼𑀜𑁆𑀘. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀸𑀥𑀼? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀫𑀺𑀘𑁆𑀙𑀸𑀲𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀫𑀺𑀘𑁆𑀙𑀸𑀜𑀸𑀡𑀁, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀸𑀥𑀼. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀸𑀥𑀼? 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀜𑀸𑀡𑀁, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀥𑀽’’𑀢𑀺. 𑀧𑀞𑀫𑀁.

𑁨. 𑀅𑀭𑀺𑀬𑀥𑀫𑁆𑀫𑀲𑀼𑀢𑁆𑀢𑀁

𑁧𑁩𑁫. ‘‘𑀅𑀭𑀺𑀬𑀥𑀫𑁆𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀭𑀺𑀬𑀥𑀫𑁆𑀫𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑁄 𑀥𑀫𑁆𑀫𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀓𑀼𑀲𑀮𑀲𑀼𑀢𑁆𑀢𑀁

𑁧𑁩𑁬. ‘‘𑀅𑀓𑀼𑀲𑀮𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀓𑀼𑀲𑀮𑀜𑁆𑀘. 𑀢𑀁 𑀲𑀼𑀡𑀸𑀣 …𑀧𑁂… 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀁? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀓𑀼𑀲𑀮𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀁? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀢𑁆𑀣𑀲𑀼𑀢𑁆𑀢𑀁

𑁧𑁩𑁭. ‘‘𑀅𑀢𑁆𑀣𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀢𑁆𑀣𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 …𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀥𑀫𑁆𑀫𑀲𑀼𑀢𑁆𑀢𑀁

𑁧𑁩𑁮. ‘‘𑀥𑀫𑁆𑀫𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀥𑀫𑁆𑀫𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀸𑀲𑀯𑀲𑀼𑀢𑁆𑀢𑀁

𑁧𑁩𑁯. ‘‘𑀲𑀸𑀲𑀯𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀸𑀲𑀯𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀸𑀲𑀯𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀲𑀯𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀲𑀯𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀲𑀯𑁄 𑀥𑀫𑁆𑀫𑁄’’𑀢𑀺. 𑀙𑀝𑁆𑀞𑀁.

𑁭. 𑀲𑀸𑀯𑀚𑁆𑀚𑀲𑀼𑀢𑁆𑀢𑀁

𑁧𑁪𑁦. ‘‘𑀲𑀸𑀯𑀚𑁆𑀚𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀯𑀚𑁆𑀚𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀸𑀯𑀚𑁆𑀚𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀯𑀚𑁆𑀚𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀯𑀚𑁆𑀚𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀯𑀚𑁆𑀚𑁄 𑀥𑀫𑁆𑀫𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀢𑀧𑀦𑀻𑀬𑀲𑀼𑀢𑁆𑀢𑀁

𑁧𑁪𑁧. ‘‘𑀢𑀧𑀦𑀻𑀬𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀢𑀧𑀦𑀻𑀬𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀢𑀧𑀦𑀻𑀬𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀢𑀧𑀦𑀻𑀬𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀢𑀧𑀦𑀻𑀬𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀧𑀦𑀻𑀬𑁄 𑀥𑀫𑁆𑀫𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀆𑀘𑀬𑀕𑀸𑀫𑀺𑀲𑀼𑀢𑁆𑀢𑀁

𑁧𑁪𑁨. ‘‘𑀆𑀘𑀬𑀕𑀸𑀫𑀺𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀅𑀧𑀘𑀬𑀕𑀸𑀫𑀺𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀆𑀘𑀬𑀕𑀸𑀫𑀻 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀘𑀬𑀕𑀸𑀫𑀻 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀧𑀘𑀬𑀕𑀸𑀫𑀻 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀧𑀘𑀬𑀕𑀸𑀫𑀻 𑀥𑀫𑁆𑀫𑁄’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀓𑁆𑀔𑀼𑀤𑁆𑀭𑀬𑀲𑀼𑀢𑁆𑀢𑀁

𑁧𑁪𑁩. ‘‘𑀤𑀼𑀓𑁆𑀔𑀼𑀤𑁆𑀭𑀬𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀼𑀔𑀼𑀤𑁆𑀭𑀬𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀼𑀤𑁆𑀭𑀬𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀼𑀤𑁆𑀭𑀬𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀼𑀔𑀼𑀤𑁆𑀭𑀬𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀼𑀤𑁆𑀭𑀬𑁄 𑀥𑀫𑁆𑀫𑁄’’𑀢𑀺. 𑀤𑀲𑀫𑀁.

𑁧𑁧. 𑀤𑀼𑀓𑁆𑀔𑀯𑀺𑀧𑀸𑀓𑀲𑀼𑀢𑁆𑀢𑀁

𑁧𑁪𑁪. ‘‘𑀤𑀼𑀓𑁆𑀔𑀯𑀺𑀧𑀸𑀓𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀼𑀔𑀯𑀺𑀧𑀸𑀓𑀜𑁆𑀘. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀯𑀺𑀧𑀸𑀓𑁄 𑀥𑀫𑁆𑀫𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀯𑀺𑀧𑀸𑀓𑁄 𑀥𑀫𑁆𑀫𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀼𑀔𑀯𑀺𑀧𑀸𑀓𑁄 𑀥𑀫𑁆𑀫𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀼𑀔𑀯𑀺𑀧𑀸𑀓𑁄 𑀥𑀫𑁆𑀫𑁄’’𑀢𑀺. 𑀏𑀓𑀸𑀤𑀲𑀫𑀁.

𑀲𑀸𑀥𑀼𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.