𑁩. 𑀢𑀢𑀺𑀬𑀧𑀡𑁆𑀡𑀸𑀲𑀓𑀁

(𑁧𑁧) 𑁧. 𑀲𑀫𑀡𑀲𑀜𑁆𑀜𑀸𑀯𑀕𑁆𑀕𑁄

𑁧. 𑀲𑀫𑀡𑀲𑀜𑁆𑀜𑀸𑀲𑀼𑀢𑁆𑀢𑀁

𑁧𑁦𑁧. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀢𑀫𑀸 𑀢𑀺𑀲𑁆𑀲𑁄? 𑀯𑁂𑀯𑀡𑁆𑀡𑀺𑀬𑀫𑁆𑀳𑀺 𑀅𑀚𑁆𑀛𑀼𑀧𑀕𑀢𑁄, 𑀧𑀭𑀧𑀝𑀺𑀩𑀤𑁆𑀥𑀸 𑀫𑁂 𑀚𑀻𑀯𑀺𑀓𑀸, 𑀅𑀜𑁆𑀜𑁄 𑀫𑁂 𑀆𑀓𑀧𑁆𑀧𑁄 𑀓𑀭𑀡𑀻𑀬𑁄𑀢𑀺 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀺.

‘‘𑀓𑀢𑀫𑁂 𑀲𑀢𑁆𑀢? 𑀲𑀦𑁆𑀢𑀢𑀓𑀸𑀭𑀻 [𑀲𑀢𑀢𑀓𑀸𑀭𑀻 (𑀲𑁆𑀬𑀸. 𑀧𑀻. 𑀓.)] 𑀳𑁄𑀢𑀺 𑀲𑀦𑁆𑀢𑀢𑀯𑀼𑀢𑁆𑀢𑀺 [𑀲𑀢𑀢𑀯𑀼𑀢𑁆𑀢𑀺 (𑀲𑁆𑀬𑀸. 𑀧𑀻.)] 𑀲𑀻𑀮𑁂𑀲𑀼, 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑁄 𑀳𑁄𑀢𑀺, 𑀅𑀦𑀢𑀺𑀫𑀸𑀦𑀻 𑀳𑁄𑀢𑀺, 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀇𑀤𑀫𑀢𑁆𑀣𑀁𑀢𑀺𑀲𑁆𑀲 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀼, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 [𑀆𑀭𑀤𑁆𑀥𑀯𑀺𑀭𑀺𑀬𑁄 𑀘 (𑀲𑀻. 𑀧𑀻.), 𑀆𑀭𑀤𑁆𑀥𑀯𑀺𑀭𑀺𑀬𑁄 (𑀲𑁆𑀬𑀸.)] 𑀯𑀺𑀳𑀭𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀇𑀫𑁂 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺. 𑀧𑀞𑀫𑀁.

𑁨. 𑀩𑁄𑀚𑁆𑀛𑀗𑁆𑀕𑀲𑀼𑀢𑁆𑀢𑀁

𑁧𑁦𑁨. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀢𑀫𑀸 𑀢𑀺𑀲𑁆𑀲𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀺𑀘𑁆𑀙𑀢𑁆𑀢𑀲𑀼𑀢𑁆𑀢𑀁

𑁧𑁦𑁩. ‘‘𑀫𑀺𑀘𑁆𑀙𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀆𑀕𑀫𑁆𑀫 𑀯𑀺𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀆𑀭𑀸𑀥𑀦𑀸. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀢𑁆𑀢𑀁 𑀆𑀕𑀫𑁆𑀫 𑀯𑀺𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀆𑀭𑀸𑀥𑀦𑀸? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀸 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀘𑀲𑁆𑀲 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀫𑀺𑀘𑁆𑀙𑀸𑀲𑀢𑀺 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺𑀲𑁆𑀲 𑀫𑀺𑀘𑁆𑀙𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀁 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀜𑀸𑀡𑀺𑀲𑁆𑀲 [𑀫𑀺𑀘𑁆𑀙𑀸𑀜𑀸𑀡𑀲𑁆𑀲 (𑀧𑀻. 𑀓.)] 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀢𑁆𑀢𑀁 𑀆𑀕𑀫𑁆𑀫 𑀯𑀺𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀆𑀭𑀸𑀥𑀦𑀸.

‘‘𑀲𑀫𑁆𑀫𑀢𑁆𑀢𑀁, 𑀪𑀺𑀓𑁆𑀔𑀯𑁂, 𑀆𑀕𑀫𑁆𑀫 𑀆𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀯𑀺𑀭𑀸𑀥𑀦𑀸. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀢𑁆𑀢𑀁 𑀆𑀕𑀫𑁆𑀫 𑀆𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀯𑀺𑀭𑀸𑀥𑀦𑀸? 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺, 𑀲𑀫𑁆𑀫𑀸𑀜𑀸𑀡𑀺𑀲𑁆𑀲 [𑀲𑀫𑁆𑀫𑀸𑀜𑀸𑀡𑀲𑁆𑀲 (𑀧𑀻. 𑀓.)] 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀢𑁆𑀢𑀁 𑀆𑀕𑀫𑁆𑀫 𑀆𑀭𑀸𑀥𑀦𑀸 𑀳𑁄𑀢𑀺, 𑀦𑁄 𑀯𑀺𑀭𑀸𑀥𑀦𑀸’’𑀢𑀺. 𑀢𑀢𑀺𑀬𑀁.

𑁪. 𑀩𑀻𑀚𑀲𑀼𑀢𑁆𑀢𑀁

𑁧𑁦𑁪. [𑀅. 𑀦𑀺. 𑁧.𑁩𑁦𑁬; 𑀓𑀣𑀸. 𑁭𑁦𑁮] ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀲𑁆𑀲 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀫𑀺𑀘𑁆𑀙𑀸𑀲𑀢𑀺𑀲𑁆𑀲 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀺𑀲𑁆𑀲 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀲𑁆𑀲 𑀬𑀜𑁆𑀘 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 [𑀲𑀫𑀸𑀤𑀺𑀡𑁆𑀡𑀁 (𑀧𑀻. 𑀓.)] 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 [𑀤𑀺𑀝𑁆𑀞𑀺 𑀳𑀺 (𑀲𑀻. 𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀺𑀫𑁆𑀩𑀩𑀻𑀚𑀁 𑀯𑀸 𑀓𑁄𑀲𑀸𑀢𑀓𑀺𑀩𑀻𑀚𑀁 𑀯𑀸 𑀢𑀺𑀢𑁆𑀢𑀓𑀸𑀮𑀸𑀩𑀼𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁 𑀬𑀜𑁆𑀘𑁂𑀯 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺, 𑀲𑀩𑁆𑀩𑀁 𑀢𑀁 𑀢𑀺𑀢𑁆𑀢𑀓𑀢𑁆𑀢𑀸𑀬 𑀓𑀝𑀼𑀓𑀢𑁆𑀢𑀸𑀬 𑀅𑀲𑀸𑀢𑀢𑁆𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀓𑀁. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀲𑁆𑀲 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀫𑀺𑀘𑁆𑀙𑀸𑀲𑀢𑀺𑀲𑁆𑀲 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀺𑀲𑁆𑀲 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸.

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀜𑀸𑀡𑀺𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀓𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀩𑀻𑀚𑀁 𑀯𑀸 𑀲𑀸𑀮𑀺𑀩𑀻𑀚𑀁 𑀯𑀸 𑀫𑀼𑀤𑁆𑀤𑀺𑀓𑀸𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁 𑀬𑀜𑁆𑀘 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺 𑀲𑀩𑁆𑀩𑀁 𑀢𑀁 𑀲𑀸𑀢𑀢𑁆𑀢𑀸𑀬 𑀫𑀥𑀼𑀭𑀢𑁆𑀢𑀸𑀬 𑀅𑀲𑁂𑀘𑀦𑀓𑀢𑁆𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀜𑁆𑀳𑀺 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀁. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲…𑀧𑁂. … 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀓𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀯𑀺𑀚𑁆𑀚𑀸𑀲𑀼𑀢𑁆𑀢𑀁

𑁧𑁦𑁫. ‘‘𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸, 𑀅𑀦𑁆𑀯𑀤𑁂𑀯 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀅𑀯𑀺𑀚𑁆𑀚𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀯𑀺𑀤𑁆𑀤𑀲𑀼𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀲𑁆𑀲 𑀫𑀺𑀘𑁆𑀙𑀸𑀯𑀸𑀘𑀸 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀘𑀲𑁆𑀲 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀫𑀺𑀘𑁆𑀙𑀸𑀲𑀢𑀺 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀢𑀺𑀲𑁆𑀲 𑀫𑀺𑀘𑁆𑀙𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀁 𑀧𑀳𑁄𑀢𑀺, 𑀫𑀺𑀘𑁆𑀙𑀸𑀜𑀸𑀡𑀺𑀲𑁆𑀲 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺.

‘‘𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸, 𑀅𑀦𑁆𑀯𑀤𑁂𑀯 𑀳𑀺𑀭𑁄𑀢𑁆𑀢𑀧𑁆𑀧𑀁. 𑀯𑀺𑀚𑁆𑀚𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀤𑁆𑀤𑀲𑀼𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺, 𑀲𑀫𑁆𑀫𑀸𑀜𑀸𑀡𑀺𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀦𑀺𑀚𑁆𑀚𑀭𑀲𑀼𑀢𑁆𑀢𑀁

𑁧𑁦𑁬. [𑀤𑀻. 𑀦𑀺. 𑁩.𑁩𑁬𑁦] ‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀤𑀲? 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀦𑀺𑀚𑁆𑀚𑀺𑀡𑁆𑀡𑁄 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀘𑀸 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀸𑀘𑀸𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀦𑀺𑀚𑁆𑀚𑀺𑀡𑁆𑀡𑁄 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀦𑀺𑀚𑁆𑀚𑀺𑀡𑁆𑀡𑁄 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀆𑀚𑀻𑀯𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀆𑀚𑀻𑀯𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀦𑀺𑀚𑁆𑀚𑀺𑀡𑁆𑀡𑁄 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀸𑀬𑀸𑀫𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀸𑀬𑀸𑀫𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀢𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀲𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀲𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀦𑀺𑀚𑁆𑀚𑀺𑀡𑁆𑀡𑁄 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀲𑀫𑀸𑀥𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀲𑀫𑀸𑀥𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀜𑀸𑀡𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀦𑀺𑀚𑁆𑀚𑀺𑀡𑁆𑀡𑀁 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀜𑀸𑀡𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀜𑀸𑀡𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀥𑁄𑀯𑀦𑀲𑀼𑀢𑁆𑀢𑀁

𑁧𑁦𑁭. ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑀺𑀡𑁂𑀲𑀼 𑀚𑀦𑀧𑀤𑁂𑀲𑀼 𑀥𑁄𑀯𑀦𑀁 𑀦𑀸𑀫. 𑀢𑀢𑁆𑀣 𑀳𑁄𑀢𑀺 𑀅𑀦𑁆𑀦𑀫𑁆𑀧𑀺 𑀧𑀸𑀦𑀫𑁆𑀧𑀺 𑀔𑀚𑁆𑀚𑀫𑁆𑀧𑀺 𑀪𑁄𑀚𑁆𑀚𑀫𑁆𑀧𑀺 𑀮𑁂𑀬𑁆𑀬𑀫𑁆𑀧𑀺 𑀧𑁂𑀬𑁆𑀬𑀫𑁆𑀧𑀺 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺. 𑀅𑀢𑁆𑀣𑁂𑀢𑀁, 𑀪𑀺𑀓𑁆𑀔𑀯𑁂, 𑀥𑁄𑀯𑀦𑀁; ‘𑀦𑁂𑀢𑀁 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀢𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀥𑁄𑀯𑀦𑀁 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀅𑀳𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀥𑁄𑀯𑀦𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀬𑀁 𑀥𑁄𑀯𑀦𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀁 𑀥𑁄𑀯𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀜𑁆𑀘 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀥𑁄𑀯𑀦𑀁, (𑀬𑀁 𑀥𑁄𑀯𑀦𑀁) [( ) 𑀦𑀢𑁆𑀣𑀺 𑀲𑁆𑀬𑀸𑀫𑀧𑁄𑀢𑁆𑀣𑀓𑁂] 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀁 𑀥𑁄𑀯𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺?

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀤𑁆𑀥𑁄𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀤𑁆𑀥𑁄𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀦𑀺𑀤𑁆𑀥𑁄𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀘𑀸 𑀦𑀺𑀤𑁆𑀥𑁄𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀦𑀺𑀤𑁆𑀥𑁄𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀦𑀺𑀤𑁆𑀥𑁄𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀦𑀺𑀤𑁆𑀥𑁄𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀲𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀢𑀺 𑀦𑀺𑀤𑁆𑀥𑁄𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀦𑀺𑀤𑁆𑀥𑁄𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀜𑀸𑀡𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀦𑀺𑀤𑁆𑀥𑁄𑀢𑀁 𑀳𑁄𑀢𑀺…𑀧𑁂….

‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀦𑀺𑀤𑁆𑀥𑁄𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀤𑁆𑀥𑁄𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀥𑁄𑀯𑀦𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀁 𑀥𑁄𑀯𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀢𑀺𑀓𑀺𑀘𑁆𑀙𑀓𑀲𑀼𑀢𑁆𑀢𑀁

𑁧𑁦𑁮. ‘‘𑀢𑀺𑀓𑀺𑀘𑁆𑀙𑀓𑀸, 𑀪𑀺𑀓𑁆𑀔𑀯𑁂, 𑀯𑀺𑀭𑁂𑀘𑀦𑀁 𑀤𑁂𑀦𑁆𑀢𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀅𑀢𑁆𑀣𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀭𑁂𑀘𑀦𑀁; ‘𑀦𑁂𑀢𑀁 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀢𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀭𑁂𑀘𑀦𑀁 𑀲𑀫𑁆𑀧𑀚𑁆𑀚𑀢𑀺𑀧𑀺 𑀯𑀺𑀧𑀚𑁆𑀚𑀢𑀺𑀧𑀺.

‘‘𑀅𑀳𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀺𑀭𑁂𑀘𑀦𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀬𑀁 𑀯𑀺𑀭𑁂𑀘𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀺𑀭𑁂𑀘𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀜𑁆𑀘 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀺𑀭𑁂𑀘𑀦𑀁, 𑀬𑀁 𑀯𑀺𑀭𑁂𑀘𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀺𑀭𑁂𑀘𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺?

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀭𑀺𑀢𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀯𑀺𑀭𑀺𑀢𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀯𑀺𑀭𑀺𑀢𑁆𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀘𑀸 𑀯𑀺𑀭𑀺𑀢𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀯𑀺𑀭𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀯𑀺𑀭𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀯𑀺𑀭𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀲𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀢𑀺 𑀯𑀺𑀭𑀺𑀢𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀯𑀺𑀭𑀺𑀢𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀜𑀸𑀡𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀯𑀺𑀭𑀺𑀢𑁆𑀢𑀁 𑀳𑁄𑀢𑀺…𑀧𑁂….

‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀯𑀺𑀭𑀺𑀢𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀯𑀺𑀭𑀺𑀢𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀺𑀭𑁂𑀘𑀦𑀁 𑀬𑀁 𑀯𑀺𑀭𑁂𑀘𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀺𑀭𑁂𑀘𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑀫𑀦𑀲𑀼𑀢𑁆𑀢𑀁

𑁧𑁦𑁯. ‘‘𑀢𑀺𑀓𑀺𑀘𑁆𑀙𑀓𑀸, 𑀪𑀺𑀓𑁆𑀔𑀯𑁂, 𑀯𑀫𑀦𑀁 𑀤𑁂𑀦𑁆𑀢𑀺 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀯𑀸𑀢𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀆𑀩𑀸𑀥𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀅𑀢𑁆𑀣𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀫𑀦𑀁; ‘𑀦𑁂𑀢𑀁 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀢𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀧𑀺 𑀯𑀺𑀧𑀚𑁆𑀚𑀢𑀺𑀧𑀺.

‘‘𑀅𑀳𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀫𑀦𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀬𑀁 𑀯𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀫𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑁂𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀢𑀁 𑀲𑀼𑀡𑀸𑀣…𑀧𑁂….

‘‘𑀓𑀢𑀫𑀜𑁆𑀘 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀫𑀦𑀁, 𑀬𑀁 𑀯𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀫𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺?

‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀦𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀯𑀦𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀯𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀘𑀸 𑀯𑀦𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀯𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀯𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀯𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀲𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀢𑀺 𑀯𑀦𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀯𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀜𑀸𑀡𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀯𑀦𑁆𑀢𑀁 𑀳𑁄𑀢𑀺 …𑀧𑁂….

‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀯𑀦𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀯𑀦𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀯𑀫𑀦𑀁 𑀬𑀁 𑀯𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯 𑀦𑁄 𑀯𑀺𑀧𑀚𑁆𑀚𑀢𑀺, 𑀬𑀁 𑀯𑀫𑀦𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀦𑀺𑀤𑁆𑀥𑀫𑀦𑀻𑀬𑀲𑀼𑀢𑁆𑀢𑀁

𑁧𑁧𑁦. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀦𑀺𑀤𑁆𑀥𑀫𑀦𑀻𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀤𑀲? 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀤𑁆𑀥𑀦𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀤𑁆𑀥𑀦𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺.

‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀦𑀺𑀤𑁆𑀥𑀦𑁆𑀢𑁄 𑀳𑁄𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀲𑁆𑀲 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀘𑀸 𑀦𑀺𑀤𑁆𑀥𑀦𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀦𑀺𑀤𑁆𑀥𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀆𑀚𑀻𑀯𑁄 𑀦𑀺𑀤𑁆𑀥𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀦𑀺𑀤𑁆𑀥𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀲𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀢𑀺 𑀦𑀺𑀤𑁆𑀥𑀦𑁆𑀢𑀸 𑀳𑁄𑀢𑀺… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀲𑀫𑀸𑀥𑀺 𑀦𑀺𑀤𑁆𑀥𑀦𑁆𑀢𑁄 𑀳𑁄𑀢𑀺… 𑀲𑀫𑁆𑀫𑀸𑀜𑀸𑀡𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀦𑀺𑀤𑁆𑀥𑀦𑁆𑀢𑀁 𑀳𑁄𑀢𑀺….

‘‘𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀦𑀺𑀤𑁆𑀥𑀦𑁆𑀢𑀸 𑀳𑁄𑀢𑀺; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑀢𑁂 𑀘𑀲𑁆𑀲 𑀦𑀺𑀤𑁆𑀥𑀦𑁆𑀢𑀸 𑀳𑁄𑀦𑁆𑀢𑀺; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀦𑀺𑀤𑁆𑀥𑀫𑀦𑀻𑀬𑀸 𑀥𑀫𑁆𑀫𑀸’’𑀢𑀺. 𑀤𑀲𑀫𑀁.

𑁧𑁧. 𑀧𑀞𑀫𑀅𑀲𑁂𑀔𑀲𑀼𑀢𑁆𑀢𑀁

𑁧𑁧𑁧. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘‘𑀅𑀲𑁂𑀔𑁄 𑀅𑀲𑁂𑀔𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀅𑀲𑁂𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀆𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑁂𑀦 𑀲𑀫𑁆𑀫𑀸𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀔𑀸𑀬 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀅𑀲𑁂𑀔𑁄 𑀳𑁄𑀢𑀻’’𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀤𑀼𑀢𑀺𑀬𑀅𑀲𑁂𑀔𑀲𑀼𑀢𑁆𑀢𑀁

𑁧𑁧𑁨. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀲𑁂𑀔𑀺𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀤𑀲? 𑀅𑀲𑁂𑀔𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀲𑁂𑀔𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀅𑀲𑁂𑀔𑀸 𑀲𑀫𑁆𑀫𑀸𑀯𑀸𑀘𑀸, 𑀅𑀲𑁂𑀔𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀅𑀲𑁂𑀔𑁄 𑀲𑀫𑁆𑀫𑀸𑀆𑀚𑀻𑀯𑁄, 𑀅𑀲𑁂𑀔𑁄 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀅𑀲𑁂𑀔𑀸 𑀲𑀫𑁆𑀫𑀸𑀲𑀢𑀺, 𑀅𑀲𑁂𑀔𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀲𑁂𑀔𑀁 𑀲𑀫𑁆𑀫𑀸𑀜𑀸𑀡𑀁, 𑀅𑀲𑁂𑀔𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀅𑀲𑁂𑀔𑀺𑀬𑀸 𑀥𑀫𑁆𑀫𑀸’’𑀢𑀺. 𑀤𑁆𑀯𑀸𑀤𑀲𑀫𑀁.

𑀲𑀫𑀡𑀲𑀜𑁆𑀜𑀸𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀜𑁆𑀜𑀸 𑀩𑁄𑀚𑁆𑀛𑀗𑁆𑀕𑀸 𑀫𑀺𑀘𑁆𑀙𑀢𑁆𑀢𑀁, 𑀩𑀻𑀚𑀁 𑀯𑀺𑀚𑁆𑀚𑀸𑀬 𑀦𑀺𑀚𑁆𑀚𑀭𑀁;

𑀥𑁄𑀯𑀦𑀁 𑀢𑀺𑀓𑀺𑀘𑁆𑀙𑀸 𑀯𑀫𑀦𑀁 𑀦𑀺𑀤𑁆𑀥𑀫𑀦𑀁 𑀤𑁆𑀯𑁂 𑀅𑀲𑁂𑀔𑀸𑀢𑀺.

(𑁧𑁨) 𑁨. 𑀧𑀘𑁆𑀘𑁄𑀭𑁄𑀳𑀡𑀺𑀯𑀕𑁆𑀕𑁄

𑁧. 𑀧𑀞𑀫𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁧𑁩. [𑀅. 𑀦𑀺. 𑁧𑁦.𑁧𑁭𑁧] ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀅𑀦𑀢𑁆𑀣𑁄 𑀘; 𑀥𑀫𑁆𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀦𑀢𑁆𑀣𑀜𑁆𑀘, 𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄 𑀘 𑀅𑀦𑀢𑁆𑀣𑁄 𑀘? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀫𑀺𑀘𑁆𑀙𑀸𑀲𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀫𑀺𑀘𑁆𑀙𑀸𑀜𑀸𑀡𑀁, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄 𑀘 𑀅𑀦𑀢𑁆𑀣𑁄 𑀘.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀘 𑀅𑀢𑁆𑀣𑁄 𑀘? 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺, 𑀲𑀫𑁆𑀫𑀸𑀜𑀸𑀡𑀁, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁄 𑀘 𑀅𑀢𑁆𑀣𑁄 𑀘.

‘‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀅𑀦𑀢𑁆𑀣𑁄 𑀘; 𑀥𑀫𑁆𑀫𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀦𑀢𑁆𑀣𑀜𑁆𑀘, 𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁧𑁪. ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄, 𑀓𑀢𑀫𑁄 𑀘 𑀥𑀫𑁆𑀫𑁄, 𑀓𑀢𑀫𑁄 𑀘 𑀅𑀦𑀢𑁆𑀣𑁄, 𑀓𑀢𑀫𑁄 𑀘 𑀅𑀢𑁆𑀣𑁄?

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀯𑀸𑀘𑀸𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀆𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀆𑀚𑀻𑀯𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀆𑀚𑀻𑀯𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀯𑀸𑀬𑀸𑀫𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀯𑀸𑀬𑀸𑀫𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀲𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀲𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀲𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀲𑀫𑀸𑀥𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀲𑀫𑀸𑀥𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀲𑀫𑀸𑀥𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀜𑀸𑀡𑀁 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀜𑀸𑀡𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀜𑀸𑀡𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀅𑀥𑀫𑁆𑀫𑀲𑀼𑀢𑁆𑀢𑀁

𑁧𑁧𑁫. ‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’’𑀢𑀺?

𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫 [𑀧𑀼𑀘𑁆𑀙𑁂𑀬𑁆𑀬𑀸𑀫 (𑀲𑀻. 𑀲𑁆𑀬𑀸. 𑀧𑀻.) 𑀫. 𑀦𑀺. 𑁧.𑁨𑁦𑁨 𑀧𑀲𑁆𑀲𑀺𑀢𑀩𑁆𑀩𑀁]. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀅𑀥𑀫𑁆𑀫𑁄 𑀘…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺?

‘‘𑀢𑁂𑀲𑀁 𑀦𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’𑀢𑀺. 𑀯𑀺𑀪𑀚𑀢𑀼 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻 𑀲𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀲𑀸𑀭𑀯𑀢𑁄 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫 𑀔𑀦𑁆𑀥𑀁 𑀲𑀸𑀔𑀸𑀧𑀮𑀸𑀲𑁂 𑀲𑀸𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬; 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀢𑁆𑀣𑀭𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀲𑀺𑀢𑁆𑀯𑀸 𑀅𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀣. 𑀲𑁄 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀢𑀼𑀫𑁆𑀳𑁂 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣. 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀅𑀤𑁆𑀥𑀸𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀲𑁄 𑀘𑁂𑀯 𑀧𑀦𑁂𑀢𑀲𑁆𑀲 𑀓𑀸𑀮𑁄 𑀅𑀳𑁄𑀲𑀺 𑀬𑀁 𑀫𑀬𑀁 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫, 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀫. 𑀅𑀧𑀺 𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀯𑀺𑀪𑀚𑀢𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀕𑀭𑀼𑀁 𑀓𑀢𑁆𑀯𑀸’’𑀢𑀺.

‘‘𑀢𑁂𑀦𑀳𑀸𑀯𑀼𑀲𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

𑀓𑀢𑀫𑁄 𑀘𑀸𑀯𑀼𑀲𑁄, 𑀅𑀥𑀫𑁆𑀫𑁄, 𑀓𑀢𑀫𑁄 𑀘 𑀥𑀫𑁆𑀫𑁄, 𑀓𑀢𑀫𑁄 𑀘 𑀅𑀦𑀢𑁆𑀣𑁄, 𑀓𑀢𑀫𑁄 𑀘 𑀅𑀢𑁆𑀣𑁄?

‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀯𑀸𑀘𑀸, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄 … 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀲𑀢𑀺, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀜𑀸𑀡𑀁, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀜𑀸𑀡𑀁 𑀥𑀫𑁆𑀫𑁄….

𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺, 𑀆𑀯𑀼𑀲𑁄, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀅𑀬𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’𑀦𑁆𑀢𑀺, 𑀇𑀫𑀲𑁆𑀲 𑀔𑁄 𑀅𑀳𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣. 𑀬𑀣𑀸 𑀯𑁄 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺 [𑀩𑁆𑀬𑀸𑀓𑀭𑁂𑀬𑁆𑀬 (𑀲𑁆𑀬𑀸.)] 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀬𑀁 𑀔𑁄 𑀦𑁄 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀚𑁆𑀚𑀺𑀢𑀩𑁆𑀩’𑀦𑁆𑀢𑀺.

‘‘𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘𑀇𑀤𑀁 𑀔𑁄 𑀦𑁄, 𑀆𑀯𑀼𑀲𑁄, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄…𑀧𑁂… 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺. 𑀓𑁄 𑀦𑀼 𑀔𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀬𑁆𑀬𑀸’𑀢𑀺?

‘‘𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄 𑀲𑀫𑁆𑀪𑀸𑀯𑀺𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀧𑀳𑁄𑀢𑀺 𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀢𑁆𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀫. 𑀬𑀣𑀸 𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’𑀢𑀺.

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳𑀸; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀢𑁆𑀣𑁄 𑀲𑀼𑀯𑀺𑀪𑀢𑁆𑀢𑁄’’𑀢𑀺 [𑀯𑀺𑀪𑀢𑁆𑀢𑁄𑀢𑀺 (?) 𑀏𑀯𑀫𑁂𑀯 𑀳𑀺 𑀅𑀜𑁆𑀜𑁂𑀲𑀼 𑀈𑀤𑀺𑀲𑀲𑀼𑀢𑁆𑀢𑁂𑀲𑀼 𑀤𑀺𑀲𑁆𑀲𑀢𑀺].

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄. 𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄. 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀘𑁂𑀢𑀁 𑀏𑀯𑀫𑁂𑀯𑀁 [𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 (𑀫. 𑀦𑀺. 𑁧.𑁨𑁦𑁫)] 𑀩𑁆𑀬𑀸𑀓𑀭𑁂𑀬𑁆𑀬𑀁 𑀬𑀣𑀸 𑀢𑀁 𑀆𑀦𑀦𑁆𑀤𑁂𑀦 𑀩𑁆𑀬𑀸𑀓𑀢𑀁. 𑀏𑀲𑁄 𑀘𑁂𑀯 𑀢𑀲𑁆𑀲 [𑀏𑀲𑁄 𑀘𑁂𑀯𑁂𑀢𑀲𑁆𑀲 (𑀫. 𑀦𑀺. 𑁧.𑁨𑁦𑁫)] 𑀅𑀢𑁆𑀣𑁄 𑀏𑀯𑀜𑁆𑀘 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺. 𑀢𑀢𑀺𑀬𑀁.

𑁪. 𑀅𑀚𑀺𑀢𑀲𑀼𑀢𑁆𑀢𑀁

𑁧𑁧𑁬. 𑀅𑀣 𑀔𑁄 𑀅𑀚𑀺𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀚𑀺𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀫𑁆𑀳𑀸𑀓𑀁, 𑀪𑁄 𑀕𑁄𑀢𑀫, 𑀧𑀡𑁆𑀟𑀺𑀢𑁄 𑀦𑀸𑀫 𑀲𑀩𑁆𑀭𑀳𑁆𑀫𑀘𑀸𑀭𑀻. 𑀢𑁂𑀦 𑀧𑀜𑁆𑀘𑀫𑀢𑁆𑀢𑀸𑀦𑀺 𑀘𑀺𑀢𑁆𑀢𑀝𑁆𑀞𑀸𑀦𑀲𑀢𑀸𑀦𑀺 𑀘𑀺𑀦𑁆𑀢𑀺𑀢𑀸𑀦𑀺, 𑀬𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀉𑀧𑀸𑀭𑀤𑁆𑀥𑀸𑀯 𑀚𑀸𑀦𑀦𑁆𑀢𑀺 [𑀉𑀧𑀸𑀭𑀤𑁆𑀥𑀸 𑀧𑀚𑀸𑀦𑀦𑁆𑀢𑀺 (𑀲𑀻.)] 𑀉𑀧𑀸𑀭𑀤𑁆𑀥𑀲𑁆𑀫𑀸’’𑀢𑀺 [𑀉𑀧𑀸𑀭𑀤𑁆𑀥𑀫𑁆𑀳𑀸𑀢𑀺 (𑀲𑀻. 𑀧𑀻.)].

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀥𑀸𑀭𑁂𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀯𑀢𑁆𑀣𑀽𑀦𑀻’’𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄 𑀬𑀁 𑀪𑀕𑀯𑀸 𑀪𑀸𑀲𑁂𑀬𑁆𑀬, 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀥𑀫𑁆𑀫𑀺𑀓𑁂𑀦 𑀯𑀸𑀤𑁂𑀦 𑀅𑀥𑀫𑁆𑀫𑀺𑀓𑀁 𑀯𑀸𑀤𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀸𑀢𑀺 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑀺, 𑀢𑁂𑀦 𑀘 𑀅𑀥𑀫𑁆𑀫𑀺𑀓𑀁 𑀧𑀭𑀺𑀲𑀁 𑀭𑀜𑁆𑀚𑁂𑀢𑀺. 𑀢𑁂𑀦 𑀲𑀸 𑀅𑀥𑀫𑁆𑀫𑀺𑀓𑀸 𑀧𑀭𑀺𑀲𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀳𑁄𑀢𑀺 𑁋 ‘𑀧𑀡𑁆𑀟𑀺𑀢𑁄 𑀯𑀢, 𑀪𑁄, 𑀧𑀡𑁆𑀟𑀺𑀢𑁄 𑀯𑀢, 𑀪𑁄’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀥𑀫𑁆𑀫𑀺𑀓𑁂𑀦 𑀯𑀸𑀤𑁂𑀦 𑀥𑀫𑁆𑀫𑀺𑀓𑀁 𑀯𑀸𑀤𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀸𑀢𑀺 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑀺, 𑀢𑁂𑀦 𑀘 𑀅𑀥𑀫𑁆𑀫𑀺𑀓𑀁 𑀧𑀭𑀺𑀲𑀁 𑀭𑀜𑁆𑀚𑁂𑀢𑀺. 𑀢𑁂𑀦 𑀲𑀸 𑀅𑀥𑀫𑁆𑀫𑀺𑀓𑀸 𑀧𑀭𑀺𑀲𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀳𑁄𑀢𑀺 𑁋 ‘𑀧𑀡𑁆𑀟𑀺𑀢𑁄 𑀯𑀢, 𑀪𑁄, 𑀧𑀡𑁆𑀟𑀺𑀢𑁄 𑀯𑀢, 𑀪𑁄’𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀥𑀫𑁆𑀫𑀺𑀓𑁂𑀦 𑀯𑀸𑀤𑁂𑀦 𑀥𑀫𑁆𑀫𑀺𑀓𑀜𑁆𑀘 𑀯𑀸𑀤𑀁 𑀅𑀥𑀫𑁆𑀫𑀺𑀓𑀜𑁆𑀘 𑀯𑀸𑀤𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀸𑀢𑀺 𑀅𑀪𑀺𑀦𑀺𑀧𑁆𑀧𑀻𑀴𑁂𑀢𑀺, 𑀢𑁂𑀦 𑀘 𑀅𑀥𑀫𑁆𑀫𑀺𑀓𑀁 𑀧𑀭𑀺𑀲𑀁 𑀭𑀜𑁆𑀚𑁂𑀢𑀺. 𑀢𑁂𑀦 𑀲𑀸 𑀅𑀥𑀫𑁆𑀫𑀺𑀓𑀸 𑀧𑀭𑀺𑀲𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀳𑁄𑀢𑀺 𑁋 ‘𑀧𑀡𑁆𑀟𑀺𑀢𑁄 𑀯𑀢, 𑀪𑁄, 𑀧𑀡𑁆𑀟𑀺𑀢𑁄 𑀯𑀢, 𑀪𑁄’𑀢𑀺.

‘‘𑀅𑀥𑀫𑁆𑀫𑁄 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀺𑀢𑀩𑁆𑀩𑁄 𑀥𑀫𑁆𑀫𑁄 𑀘; 𑀅𑀦𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄 𑀅𑀢𑁆𑀣𑁄 𑀘. 𑀅𑀥𑀫𑁆𑀫𑀜𑁆𑀘 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀜𑁆𑀘, 𑀅𑀦𑀢𑁆𑀣𑀜𑁆𑀘 𑀯𑀺𑀤𑀺𑀢𑁆𑀯𑀸 𑀅𑀢𑁆𑀣𑀜𑁆𑀘 𑀬𑀣𑀸 𑀥𑀫𑁆𑀫𑁄 𑀬𑀣𑀸 𑀅𑀢𑁆𑀣𑁄 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄, 𑀓𑀢𑀫𑁄 𑀘 𑀥𑀫𑁆𑀫𑁄, 𑀓𑀢𑀫𑁄 𑀘 𑀅𑀦𑀢𑁆𑀣𑁄, 𑀓𑀢𑀫𑁄 𑀘 𑀅𑀢𑁆𑀣𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑁄; 𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀬𑀁 𑀅𑀦𑀢𑁆𑀣𑁄; 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀅𑀬𑀁 𑀅𑀢𑁆𑀣𑁄.

‘‘𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀘𑀸 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀆𑀚𑀻𑀯𑁄 𑀥𑀫𑁆𑀫𑁄 … 𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀯𑀸𑀬𑀸𑀫𑁄 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀲𑀢𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀢𑀺 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀪𑀺𑀓𑁆𑀔𑀯𑁂 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀲𑀫𑀸𑀥𑀺 𑀥𑀫𑁆𑀫𑁄… 𑀫𑀺𑀘𑁆𑀙𑀸𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑁄; 𑀲𑀫𑁆𑀫𑀸𑀜𑀸𑀡𑀁 𑀥𑀫𑁆𑀫𑁄.

𑁫. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁

𑁧𑁧𑁭. [𑀅. 𑀦𑀺. 𑁧𑁦.𑁧𑁬𑁯] 𑀅𑀣 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀑𑀭𑀺𑀫𑀁 𑀢𑀻𑀭𑀁, 𑀓𑀺𑀁 𑀧𑀸𑀭𑀺𑀫𑀁 𑀢𑀻𑀭’’𑀦𑁆𑀢𑀺? ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀯𑀸𑀘𑀸 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀯𑀸𑀘𑀸 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀆𑀚𑀻𑀯𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀆𑀚𑀻𑀯𑁄 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀲𑀢𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀲𑀢𑀺 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀲𑀫𑀸𑀥𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀲𑀫𑀸𑀥𑀺 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀜𑀸𑀡𑀁 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀜𑀸𑀡𑀁 𑀧𑀸𑀭𑀺𑀫𑀁 𑀢𑀻𑀭𑀁; 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺. 𑀇𑀤𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀑𑀭𑀺𑀫𑀁 𑀢𑀻𑀭𑀁, 𑀇𑀤𑀁 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺.

‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

‘‘𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

‘‘𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

‘‘𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄 [𑀚𑀼𑀢𑀻𑀫𑀦𑁆𑀢𑁄 (𑀲𑀻.)], 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺. 𑀧𑀜𑁆𑀘𑀫𑀁;

𑁬. 𑀑𑀭𑀺𑀫𑀢𑀻𑀭𑀲𑀼𑀢𑁆𑀢𑀁

𑁧𑁧𑁮. ‘‘𑀑𑀭𑀺𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀢𑀻𑀭𑀁 𑀤𑁂𑀲𑁂𑀲𑁆𑀲𑀸𑀫𑀺 𑀧𑀸𑀭𑀺𑀫𑀜𑁆𑀘 𑀢𑀻𑀭𑀁. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀭𑀺𑀫𑀁 𑀢𑀻𑀭𑀁, 𑀓𑀢𑀫𑀜𑁆𑀘 𑀧𑀸𑀭𑀺𑀫𑀁 𑀢𑀻𑀭𑀁? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀸𑀭𑀺𑀫𑀁 𑀢𑀻𑀭𑀁…𑀧𑁂… 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀑𑀭𑀺𑀫𑀁 𑀢𑀻𑀭𑀁, 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀸𑀭𑀺𑀫𑀁 𑀢𑀻𑀭𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀑𑀭𑀺𑀫𑀁 𑀢𑀻𑀭𑀁, 𑀇𑀤𑀁 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺.

‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

‘‘𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓 𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

‘‘𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

‘‘𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄, 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺. 𑀙𑀝𑁆𑀞𑀁;

𑁭. 𑀧𑀞𑀫𑀧𑀘𑁆𑀘𑁄𑀭𑁄𑀳𑀡𑀻𑀲𑀼𑀢𑁆𑀢𑀁

𑁧𑁧𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀸𑀡𑀼𑀲𑁆𑀲𑁄𑀡𑀺 [𑀚𑀸𑀦𑀼𑀲𑁆𑀲𑁄𑀦𑀺 (𑀓. 𑀲𑀻.), 𑀚𑀸𑀦𑀼𑀲𑁆𑀲𑁄𑀡𑀺 (𑀓. 𑀲𑀻.), 𑀚𑀸𑀡𑀼𑀲𑁄𑀡𑀺 (𑀓.)] 𑀩𑁆𑀭𑀸𑀳𑁆𑀫𑀡𑁄 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑁄 [𑀲𑀻𑀲𑀁𑀦𑀳𑀸𑀢𑁄 (𑀲𑀻. 𑀧𑀻.), 𑀲𑀻𑀲𑀦𑁆𑀳𑀸𑀢𑁄 (𑀲𑁆𑀬𑀸.)] 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑁄 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑁄𑀢𑀺.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀚𑀸𑀡𑀼𑀲𑁆𑀲𑁄𑀡𑀺𑀁 𑀩𑁆𑀭𑀸𑀳𑁆𑀫𑀡𑀁 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑀁 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑀁 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀏𑀓𑀫𑀦𑁆𑀢𑀁 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀚𑀸𑀡𑀼𑀲𑁆𑀲𑁄𑀡𑀺𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑁄 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑁄 𑀅𑀮𑁆𑀮𑀓𑀼𑀲𑀫𑀼𑀝𑁆𑀞𑀺𑀁 𑀆𑀤𑀸𑀬 𑀏𑀓𑀫𑀦𑁆𑀢𑀁 𑀞𑀺𑀢𑁄? 𑀓𑀺𑀁 𑀦𑁆𑀯𑀚𑁆𑀚 [𑀓𑀺𑀁 𑀦𑀼 𑀅𑀚𑁆𑀚 (𑀲𑁆𑀬𑀸.), 𑀓𑀺𑀁 𑀦𑀼 𑀔𑁄 𑀅𑀚𑁆𑀚 (𑀧𑀻.), 𑀓𑀺𑀁 𑀦𑀼 𑀔𑁆𑀯𑀚𑁆𑀚 (𑀓.)] 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁆𑀲𑀸’’𑀢𑀺 [𑀩𑁆𑀭𑀸𑀳𑁆𑀫𑀡 𑀩𑁆𑀭𑀳𑁆𑀫𑀓𑀼𑀲𑀮𑀲𑁆𑀲𑀸𑀢𑀺 (𑀓.)]? ‘‘𑀧𑀘𑁆𑀘𑁄𑀭𑁄𑀳𑀡𑀻, 𑀪𑁄 𑀕𑁄𑀢𑀫, 𑀅𑀚𑁆𑀚 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁆𑀲𑀸’’𑀢𑀺 [𑀩𑁆𑀭𑀳𑁆𑀫𑀓𑀼𑀲𑀮𑀲𑁆𑀲𑀸𑀢𑀺 (𑀓.)].

‘‘𑀬𑀣𑀸 𑀓𑀣𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺? ‘‘𑀇𑀥, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀢𑀤𑀳𑀼𑀧𑁄𑀲𑀣𑁂 𑀲𑀻𑀲𑀁𑀦𑁆𑀳𑀸𑀢𑀸 𑀦𑀯𑀁 𑀔𑁄𑀫𑀬𑀼𑀕𑀁 𑀦𑀺𑀯𑀢𑁆𑀣𑀸 𑀅𑀮𑁆𑀮𑁂𑀦 𑀕𑁄𑀫𑀬𑁂𑀦 𑀧𑀣𑀯𑀺𑀁 𑀑𑀧𑀼𑀜𑁆𑀚𑀺𑀢𑁆𑀯𑀸 𑀳𑀭𑀺𑀢𑁂𑀳𑀺 𑀓𑀼𑀲𑁂𑀳𑀺 𑀧𑀢𑁆𑀣𑀭𑀺𑀢𑁆𑀯𑀸 [𑀧𑀯𑀺𑀢𑁆𑀣𑀸𑀭𑁂𑀢𑁆𑀯𑀸 (𑀓.)] 𑀅𑀦𑁆𑀢𑀭𑀸 𑀘 𑀯𑁂𑀮𑀁 𑀅𑀦𑁆𑀢𑀭𑀸 𑀘 𑀅𑀕𑁆𑀬𑀸𑀕𑀸𑀭𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺. 𑀢𑁂 𑀢𑀁 𑀭𑀢𑁆𑀢𑀺𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀼𑀝𑁆𑀞𑀸𑀬 𑀧𑀜𑁆𑀚𑀮𑀺𑀓𑀸 𑀅𑀕𑁆𑀕𑀺𑀁 𑀦𑀫𑀲𑁆𑀲𑀦𑁆𑀢𑀺 𑁋 ‘𑀧𑀘𑁆𑀘𑁄𑀭𑁄𑀳𑀸𑀫 𑀪𑀯𑀦𑁆𑀢𑀁, 𑀧𑀘𑁆𑀘𑁄𑀭𑁄𑀳𑀸𑀫 𑀪𑀯𑀦𑁆𑀢’𑀦𑁆𑀢𑀺. 𑀩𑀳𑀼𑀓𑁂𑀦 𑀘 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑁂𑀦 𑀅𑀕𑁆𑀕𑀺𑀁 𑀲𑀦𑁆𑀢𑀧𑁆𑀧𑁂𑀦𑁆𑀢𑀺. 𑀢𑀲𑁆𑀲𑀸 𑀘 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑁆𑀭𑀸𑀳𑁆𑀫𑀡𑁂 𑀲𑀦𑁆𑀢𑀧𑁆𑀧𑁂𑀦𑁆𑀢𑀺. 𑀏𑀯𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀘𑁆𑀘𑁄𑀭𑁄𑀳𑀡𑀻 𑀳𑁄𑀢𑀻’’𑀢𑀺.