𑁧. 𑀲𑀫𑀡𑀲𑀜𑁆𑀜𑀸𑀲𑀼𑀢𑁆𑀢𑀁

𑁧𑁦𑁧. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀢𑀫𑀸 𑀢𑀺𑀲𑁆𑀲𑁄? 𑀯𑁂𑀯𑀡𑁆𑀡𑀺𑀬𑀫𑁆𑀳𑀺 𑀅𑀚𑁆𑀛𑀼𑀧𑀕𑀢𑁄, 𑀧𑀭𑀧𑀝𑀺𑀩𑀤𑁆𑀥𑀸 𑀫𑁂 𑀚𑀻𑀯𑀺𑀓𑀸, 𑀅𑀜𑁆𑀜𑁄 𑀫𑁂 𑀆𑀓𑀧𑁆𑀧𑁄 𑀓𑀭𑀡𑀻𑀬𑁄𑀢𑀺 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀺.

‘‘𑀓𑀢𑀫𑁂 𑀲𑀢𑁆𑀢? 𑀲𑀦𑁆𑀢𑀢𑀓𑀸𑀭𑀻 [𑀲𑀢𑀢𑀓𑀸𑀭𑀻 (𑀲𑁆𑀬𑀸. 𑀧𑀻. 𑀓.)] 𑀳𑁄𑀢𑀺 𑀲𑀦𑁆𑀢𑀢𑀯𑀼𑀢𑁆𑀢𑀺 [𑀲𑀢𑀢𑀯𑀼𑀢𑁆𑀢𑀺 (𑀲𑁆𑀬𑀸. 𑀧𑀻.)] 𑀲𑀻𑀮𑁂𑀲𑀼, 𑀅𑀦𑀪𑀺𑀚𑁆𑀛𑀸𑀮𑀼 𑀳𑁄𑀢𑀺, 𑀅𑀩𑁆𑀬𑀸𑀧𑀚𑁆𑀚𑁄 𑀳𑁄𑀢𑀺, 𑀅𑀦𑀢𑀺𑀫𑀸𑀦𑀻 𑀳𑁄𑀢𑀺, 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀇𑀤𑀫𑀢𑁆𑀣𑀁𑀢𑀺𑀲𑁆𑀲 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂𑀲𑀼, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 [𑀆𑀭𑀤𑁆𑀥𑀯𑀺𑀭𑀺𑀬𑁄 𑀘 (𑀲𑀻. 𑀧𑀻.), 𑀆𑀭𑀤𑁆𑀥𑀯𑀺𑀭𑀺𑀬𑁄 (𑀲𑁆𑀬𑀸.)] 𑀯𑀺𑀳𑀭𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀲𑀫𑀡𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀇𑀫𑁂 𑀲𑀢𑁆𑀢 𑀥𑀫𑁆𑀫𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺. 𑀧𑀞𑀫𑀁.