(𑁮) 𑁩. 𑀆𑀓𑀗𑁆𑀔𑀯𑀕𑁆𑀕𑁄

𑁧. 𑀆𑀓𑀗𑁆𑀔𑀲𑀼𑀢𑁆𑀢𑀁

𑁭𑁧. [𑀅. 𑀦𑀺. 𑁪.𑁧𑁨; 𑀇𑀢𑀺𑀯𑀼. 𑁧𑁧𑁧] 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸 𑀯𑀺𑀳𑀭𑀣 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀺𑀦𑁄, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀣 𑀲𑀺𑀓𑁆𑀔𑀸𑀧𑀤𑁂𑀲𑀼.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀮𑀸𑀪𑀻 𑀅𑀲𑁆𑀲𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀬𑁂𑀲𑀸𑀳𑀁 𑀧𑀭𑀺𑀪𑀼𑀜𑁆𑀚𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀢𑁂𑀲𑀁 𑀢𑁂 𑀓𑀸𑀭𑀸 𑀫𑀳𑀧𑁆𑀨𑀮𑀸 𑀅𑀲𑁆𑀲𑀼 𑀫𑀳𑀸𑀦𑀺𑀲𑀁𑀲𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀬𑁂 𑀫𑁂 [𑀬𑁂 𑀫𑀁 (𑀫. 𑀦𑀺. 𑁧.𑁬𑁫)] 𑀧𑁂𑀢𑀸 𑀜𑀸𑀢𑀻 𑀲𑀸𑀮𑁄𑀳𑀺𑀢𑀸 𑀓𑀸𑀮𑀗𑁆𑀓𑀢𑀸 [𑀓𑀸𑀮𑀓𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀦𑀼𑀲𑁆𑀲𑀭𑀦𑁆𑀢𑀺 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀅𑀲𑁆𑀲 𑀫𑀳𑀸𑀦𑀺𑀲𑀁𑀲’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀲𑀦𑁆𑀢𑀼𑀝𑁆𑀞𑁄 𑀅𑀲𑁆𑀲𑀁 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦𑀸’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀔𑀫𑁄 𑀅𑀲𑁆𑀲𑀁 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁, 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 [𑀢𑀺𑀧𑁆𑀧𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀅𑀲𑁆𑀲’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀅𑀭𑀢𑀺𑀭𑀢𑀺𑀲𑀳𑁄 𑀅𑀲𑁆𑀲𑀁, 𑀦 𑀘 𑀫𑀁 𑀅𑀭𑀢𑀺𑀭𑀢𑀺 𑀲𑀳𑁂𑀬𑁆𑀬, 𑀉𑀧𑁆𑀧𑀦𑁆𑀦𑀁 𑀅𑀭𑀢𑀺𑀭𑀢𑀺𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀪𑀬𑀪𑁂𑀭𑀯𑀲𑀳𑁄 𑀅𑀲𑁆𑀲𑀁, 𑀦 𑀘 𑀫𑀁 𑀪𑀬𑀪𑁂𑀭𑀯𑁄 𑀲𑀳𑁂𑀬𑁆𑀬, 𑀉𑀧𑁆𑀧𑀦𑁆𑀦𑀁 𑀪𑀬𑀪𑁂𑀭𑀯𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀲𑁆𑀲𑀁 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲…𑀧𑁂… 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄 𑀯𑀺𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦𑀁.

‘‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸 𑀯𑀺𑀳𑀭𑀣 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀺𑀦𑁄, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀣 𑀲𑀺𑀓𑁆𑀔𑀸𑀧𑀤𑁂𑀲𑀽’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀧𑀞𑀫𑀁.

𑁨. 𑀓𑀡𑁆𑀝𑀓𑀲𑀼𑀢𑁆𑀢𑀁

𑁭𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀲𑀫𑁆𑀩𑀳𑀼𑀮𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑁋 𑀆𑀬𑀲𑁆𑀫𑀢𑀸 𑀘 𑀘𑀸𑀮𑁂𑀦 [𑀧𑀸𑀮𑁂𑀦 (𑀲𑁆𑀬𑀸.)], 𑀆𑀬𑀲𑁆𑀫𑀢𑀸 𑀘 𑀉𑀧𑀘𑀸𑀮𑁂𑀦 [𑀉𑀧𑁆𑀧𑀸𑀮𑁂𑀦 (𑀲𑁆𑀬𑀸.)], 𑀆𑀬𑀲𑁆𑀫𑀢𑀸 𑀘 𑀓𑀼𑀓𑁆𑀓𑀼𑀝𑁂𑀦 [𑀓𑀓𑁆𑀓𑀝𑁂𑀦 (𑀲𑀻. 𑀲𑁆𑀬𑀸.)], 𑀆𑀬𑀲𑁆𑀫𑀢𑀸 𑀘 𑀓𑀴𑀺𑀫𑁆𑀪𑁂𑀦 [𑀓𑀯𑀺𑀫𑁆𑀪𑁂𑀦 (𑀲𑀻.)], 𑀆𑀬𑀲𑁆𑀫𑀢𑀸 𑀘 𑀦𑀺𑀓𑀝𑁂𑀦 [𑀓𑀝𑁂𑀦 (𑀲𑀻.)], 𑀆𑀬𑀲𑁆𑀫𑀢𑀸 𑀘 𑀓𑀝𑀺𑀲𑁆𑀲𑀳𑁂𑀦; 𑀅𑀜𑁆𑀜𑁂𑀳𑀺 𑀘 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀧𑀭𑀧𑀼𑀭𑀸𑀬 [𑀧𑀭𑀁𑀧𑀼𑀭𑀸𑀬 (𑀲𑁆𑀬𑀸. 𑀅𑀝𑁆𑀞.)] 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀣 𑀔𑁄 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀧𑀭𑀧𑀼𑀭𑀸𑀬 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. ‘𑀲𑀤𑁆𑀤𑀓𑀡𑁆𑀝𑀓𑀸 𑀔𑁄 𑀧𑀦 𑀛𑀸𑀦𑀸’ 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫. 𑀢𑀢𑁆𑀣 𑀫𑀬𑀁 𑀅𑀧𑁆𑀧𑀲𑀤𑁆𑀤𑀸 𑀅𑀧𑁆𑀧𑀸𑀓𑀺𑀡𑁆𑀡𑀸 𑀨𑀸𑀲𑀼𑀁 [𑀨𑀸𑀲𑀼 (𑀲𑁆𑀬𑀸. 𑀓.)] 𑀯𑀺𑀳𑀭𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀢𑀢𑁆𑀣 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀧𑁆𑀧𑀲𑀤𑁆𑀤𑀸 𑀅𑀧𑁆𑀧𑀸𑀓𑀺𑀡𑁆𑀡𑀸 𑀨𑀸𑀲𑀼𑀁 𑀯𑀺𑀳𑀭𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀳𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀘𑀸𑀮𑁄, 𑀓𑀳𑀁 𑀉𑀧𑀘𑀸𑀮𑁄, 𑀓𑀳𑀁 𑀓𑀼𑀓𑁆𑀓𑀼𑀝𑁄, 𑀓𑀳𑀁 𑀓𑀴𑀺𑀫𑁆𑀪𑁄, 𑀓𑀳𑀁 𑀦𑀺𑀓𑀝𑁄, 𑀓𑀳𑀁 𑀓𑀝𑀺𑀲𑁆𑀲𑀳𑁄; 𑀓𑀳𑀁 𑀦𑀼 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀣𑁂𑀭𑀸 𑀲𑀸𑀯𑀓𑀸 𑀕𑀢𑀸’’𑀢𑀺?

‘‘𑀇𑀥, 𑀪𑀦𑁆𑀢𑁂, 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀇𑀫𑁂 𑀔𑁄 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀪𑀤𑁆𑀭𑁂𑀳𑀺 𑀪𑀤𑁆𑀭𑁂𑀳𑀺 𑀬𑀸𑀦𑁂𑀳𑀺 𑀧𑀭𑀧𑀼𑀭𑀸𑀬 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 ‘𑀲𑀤𑁆𑀤𑀓𑀡𑁆𑀝𑀓𑀸 𑀔𑁄 𑀧𑀦 𑀛𑀸𑀦𑀸𑀯𑀼𑀢𑁆𑀢𑀸 𑀪𑀕𑀯𑀢𑀸 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀢𑀢𑁆𑀣 𑀫𑀬𑀁 𑀅𑀧𑁆𑀧𑀲𑀤𑁆𑀤𑀸 𑀅𑀧𑁆𑀧𑀸𑀓𑀺𑀡𑁆𑀡𑀸 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀸𑀫𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑁄 𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀧𑁆𑀧𑀲𑀤𑁆𑀤𑀸 𑀅𑀧𑁆𑀧𑀸𑀓𑀺𑀡𑁆𑀡𑀸 𑀨𑀸𑀲𑀼𑀁 𑀯𑀺𑀳𑀭𑀦𑁆𑀢𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀬𑀣𑀸 𑀢𑁂 𑀫𑀳𑀸𑀲𑀸𑀯𑀓𑀸 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑀸 𑀩𑁆𑀬𑀸𑀓𑀭𑁂𑀬𑁆𑀬𑀼𑀁, ‘𑀲𑀤𑁆𑀤𑀓𑀡𑁆𑀝𑀓𑀸 𑀳𑀺, 𑀪𑀺𑀓𑁆𑀔𑀯𑁂, 𑀛𑀸𑀦𑀸’ 𑀯𑀼𑀢𑁆𑀢𑀸 𑀫𑀬𑀸.

‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀡𑁆𑀝𑀓𑀸. 𑀓𑀢𑀫𑁂 𑀤𑀲? 𑀧𑀯𑀺𑀯𑁂𑀓𑀸𑀭𑀸𑀫𑀲𑁆𑀲 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀓𑀡𑁆𑀝𑀓𑁄, 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀼𑀬𑁄𑀕𑁄 𑀓𑀡𑁆𑀝𑀓𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀲𑁆𑀲 𑀯𑀺𑀲𑀽𑀓𑀤𑀲𑁆𑀲𑀦𑀁 𑀓𑀡𑁆𑀝𑀓𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀫𑀸𑀢𑀼𑀕𑀸𑀫𑀽𑀧𑀘𑀸𑀭𑁄 [𑀫𑀸𑀢𑀼𑀕𑀸𑀫𑁄𑀧𑀯𑀺𑀘𑀸𑀭𑁄 (𑀲𑀻.), 𑀫𑀸𑀢𑀼𑀕𑀸𑀫𑀽𑀧𑀯𑀺𑀘𑀭𑁄 (𑀓.)] 𑀓𑀡𑁆𑀝𑀓𑁄, [𑀓𑀣𑀸. 𑁩𑁩𑁩] 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀓𑀡𑁆𑀝𑀓𑀸, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀧𑀻𑀢𑀺 𑀓𑀡𑁆𑀝𑀓𑁄, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀓𑀡𑁆𑀝𑀓𑁄, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀓𑀡𑁆𑀝𑀓𑁄 𑀭𑀸𑀕𑁄 𑀓𑀡𑁆𑀝𑀓𑁄 𑀤𑁄𑀲𑁄 𑀓𑀡𑁆𑀝𑀓𑁄 𑀫𑁄𑀳𑁄 𑀓𑀡𑁆𑀝𑀓𑁄.

‘‘𑀅𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣. 𑀦𑀺𑀓𑁆𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣. 𑀅𑀓𑀡𑁆𑀝𑀓𑀦𑀺𑀓𑁆𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣. 𑀅𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑁄; 𑀦𑀺𑀓𑁆𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑁄; 𑀅𑀓𑀡𑁆𑀝𑀓𑀦𑀺𑀓𑁆𑀓𑀡𑁆𑀝𑀓𑀸, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀇𑀝𑁆𑀞𑀥𑀫𑁆𑀫𑀲𑀼𑀢𑁆𑀢𑀁

𑁭𑁩. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀤𑀲? 𑀪𑁄𑀕𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁; 𑀯𑀡𑁆𑀡𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁; 𑀆𑀭𑁄𑀕𑁆𑀬𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀤𑀼𑀮𑁆𑀮𑀪𑀁 𑀮𑁄𑀓𑀲𑁆𑀫𑀺𑀁; 𑀲𑀻𑀮𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀤𑀼𑀮𑁆𑀮𑀪𑀁 𑀮𑁄𑀓𑀲𑁆𑀫𑀺𑀁; 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀤𑀼𑀮𑁆𑀮𑀪𑀁 𑀮𑁄𑀓𑀲𑁆𑀫𑀺𑀁; 𑀫𑀺𑀢𑁆𑀢𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁; 𑀩𑀸𑀳𑀼𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀤𑀼𑀮𑁆𑀮𑀪𑀁 𑀮𑁄𑀓𑀲𑁆𑀫𑀺𑀁; 𑀧𑀜𑁆𑀜𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁; 𑀥𑀫𑁆𑀫𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁; 𑀲𑀕𑁆𑀕𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁.

‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀤𑀲 𑀥𑀫𑁆𑀫𑀸 𑀧𑀭𑀺𑀧𑀦𑁆𑀣𑀸 [𑀧𑀭𑀺𑀩𑀦𑁆𑀥𑀸 (𑀓.)] 𑁋 𑀆𑀮𑀲𑁆𑀬𑀁 𑀅𑀦𑀼𑀝𑁆𑀞𑀸𑀦𑀁 𑀪𑁄𑀕𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀅𑀫𑀡𑁆𑀟𑀦𑀸 𑀅𑀯𑀺𑀪𑀽𑀲𑀦𑀸 𑀯𑀡𑁆𑀡𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀅𑀲𑀧𑁆𑀧𑀸𑀬𑀓𑀺𑀭𑀺𑀬𑀸 𑀆𑀭𑁄𑀕𑁆𑀬𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀧𑀸𑀧𑀫𑀺𑀢𑁆𑀢𑀢𑀸 𑀲𑀻𑀮𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀯𑀺𑀲𑀁𑀯𑀸𑀤𑀦𑀸 𑀫𑀺𑀢𑁆𑀢𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀅𑀲𑀚𑁆𑀛𑀸𑀬𑀓𑀺𑀭𑀺𑀬𑀸 𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀭𑀺𑀧𑀦𑁆𑀣𑁄, 𑀅𑀲𑀼𑀲𑁆𑀲𑀽𑀲𑀸 𑀅𑀧𑀭𑀺𑀧𑀼𑀘𑁆𑀙𑀸 𑀧𑀜𑁆𑀜𑀸𑀬 𑀧𑀭𑀺𑀧𑀦𑁆𑀣𑁄, 𑀅𑀦𑀦𑀼𑀬𑁄𑀕𑁄 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 𑀥𑀫𑁆𑀫𑀸𑀦𑀁 𑀧𑀭𑀺𑀧𑀦𑁆𑀣𑁄, 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺 𑀲𑀕𑁆𑀕𑀸𑀦𑀁 𑀧𑀭𑀺𑀧𑀦𑁆𑀣𑁄. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀦𑁆𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀇𑀫𑁂 𑀤𑀲 𑀥𑀫𑁆𑀫𑀸 𑀧𑀭𑀺𑀧𑀦𑁆𑀣𑀸.

‘‘𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀤𑀲 𑀥𑀫𑁆𑀫𑀸 𑀆𑀳𑀸𑀭𑀸 𑁋 𑀉𑀝𑁆𑀞𑀸𑀦𑀁 𑀅𑀦𑀸𑀮𑀲𑁆𑀬𑀁 𑀪𑁄𑀕𑀸𑀦𑀁 𑀆𑀳𑀸𑀭𑁄, 𑀫𑀡𑁆𑀟𑀦𑀸 𑀯𑀺𑀪𑀽𑀲𑀦𑀸 𑀯𑀡𑁆𑀡𑀲𑁆𑀲 𑀆𑀳𑀸𑀭𑁄, 𑀲𑀧𑁆𑀧𑀸𑀬𑀓𑀺𑀭𑀺𑀬𑀸 𑀆𑀭𑁄𑀕𑁆𑀬𑀲𑁆𑀲 𑀆𑀳𑀸𑀭𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀻𑀮𑀸𑀦𑀁 𑀆𑀳𑀸𑀭𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀳𑀸𑀭𑁄, 𑀅𑀯𑀺𑀲𑀁𑀯𑀸𑀤𑀦𑀸 𑀫𑀺𑀢𑁆𑀢𑀸𑀦𑀁 𑀆𑀳𑀸𑀭𑁄, 𑀲𑀚𑁆𑀛𑀸𑀬𑀓𑀺𑀭𑀺𑀬𑀸 𑀩𑀸𑀳𑀼𑀲𑀘𑁆𑀘𑀲𑁆𑀲 𑀆𑀳𑀸𑀭𑁄, 𑀲𑀼𑀲𑁆𑀲𑀽𑀲𑀸 𑀧𑀭𑀺𑀧𑀼𑀘𑁆𑀙𑀸 𑀧𑀜𑁆𑀜𑀸𑀬 𑀆𑀳𑀸𑀭𑁄, 𑀅𑀦𑀼𑀬𑁄𑀕𑁄 𑀧𑀘𑁆𑀘𑀯𑁂𑀓𑁆𑀔𑀡𑀸 𑀥𑀫𑁆𑀫𑀸𑀦𑀁 𑀆𑀳𑀸𑀭𑁄, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀕𑁆𑀕𑀸𑀦𑀁 𑀆𑀳𑀸𑀭𑁄. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀦𑁆𑀦𑀁 𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀤𑀼𑀮𑁆𑀮𑀪𑀸𑀦𑀁 𑀮𑁄𑀓𑀲𑁆𑀫𑀺𑀁 𑀇𑀫𑁂 𑀤𑀲 𑀥𑀫𑁆𑀫𑀸 𑀆𑀳𑀸𑀭𑀸’’𑀢𑀺. 𑀢𑀢𑀺𑀬𑀁.

𑁪. 𑀯𑀟𑁆𑀠𑀺𑀲𑀼𑀢𑁆𑀢𑀁

𑁭𑁪. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀯𑀟𑁆𑀠𑀻𑀳𑀺 𑀯𑀟𑁆𑀠𑀫𑀸𑀦𑁄 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀬 𑀯𑀟𑁆𑀠𑀺𑀬𑀸 𑀯𑀟𑁆𑀠𑀢𑀺, 𑀲𑀸𑀭𑀸𑀤𑀸𑀬𑀻 𑀘 𑀳𑁄𑀢𑀺 𑀯𑀭𑀸𑀤𑀸𑀬𑀻 𑀓𑀸𑀬𑀲𑁆𑀲. 𑀓𑀢𑀫𑁂𑀳𑀺 𑀤𑀲𑀳𑀺? 𑀔𑁂𑀢𑁆𑀢𑀯𑀢𑁆𑀣𑀽𑀳𑀺 𑀯𑀟𑁆𑀠𑀢𑀺, 𑀥𑀦𑀥𑀜𑁆𑀜𑁂𑀦 𑀯𑀟𑁆𑀠𑀢𑀺, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑀢𑀺, 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀯𑀟𑁆𑀠𑀢𑀺, 𑀘𑀢𑀼𑀧𑁆𑀧𑀤𑁂𑀳𑀺 𑀯𑀟𑁆𑀠𑀢𑀺, 𑀲𑀤𑁆𑀥𑀸𑀬 𑀯𑀟𑁆𑀠𑀢𑀺, 𑀲𑀻𑀮𑁂𑀦 𑀯𑀟𑁆𑀠𑀢𑀺, 𑀲𑀼𑀢𑁂𑀦 𑀯𑀟𑁆𑀠𑀢𑀺, 𑀘𑀸𑀕𑁂𑀦 𑀯𑀟𑁆𑀠𑀢𑀺, 𑀧𑀜𑁆𑀜𑀸𑀬 𑀯𑀟𑁆𑀠𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀯𑀟𑁆𑀠𑀻𑀳𑀺 𑀯𑀟𑁆𑀠𑀫𑀸𑀦𑁄 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀬 𑀯𑀟𑁆𑀠𑀺𑀬𑀸 𑀯𑀟𑁆𑀠𑀢𑀺, 𑀲𑀸𑀭𑀸𑀤𑀸𑀬𑀻 𑀘 𑀳𑁄𑀢𑀺 𑀯𑀭𑀸𑀤𑀸𑀬𑀻 𑀓𑀸𑀬𑀲𑁆𑀲𑀸𑀢𑀺.

‘‘𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀬𑁄𑀥 𑀯𑀟𑁆𑀠𑀢𑀺,

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀘𑀢𑀼𑀧𑁆𑀧𑀤𑁂𑀳𑀺 𑀘;

𑀲 𑀪𑁄𑀕𑀯𑀸 𑀳𑁄𑀢𑀺 𑀬𑀲𑀲𑁆𑀲𑀺 𑀧𑀽𑀚𑀺𑀢𑁄,

𑀜𑀸𑀢𑀻𑀳𑀺 𑀫𑀺𑀢𑁆𑀢𑁂𑀳𑀺 𑀅𑀣𑁄𑀧𑀺 𑀭𑀸𑀚𑀼𑀪𑀺.

‘‘𑀲𑀤𑁆𑀥𑀸𑀬 𑀲𑀻𑀮𑁂𑀦 𑀘 𑀬𑁄𑀥 𑀯𑀟𑁆𑀠𑀢𑀺,

𑀧𑀜𑁆𑀜𑀸𑀬 𑀘𑀸𑀕𑁂𑀦 𑀲𑀼𑀢𑁂𑀦 𑀘𑀽𑀪𑀬𑀁;

𑀲𑁄 𑀢𑀸𑀤𑀺𑀲𑁄 𑀲𑀧𑁆𑀧𑀼𑀭𑀺𑀲𑁄 𑀯𑀺𑀘𑀓𑁆𑀔𑀡𑁄,

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀉𑀪𑀬𑁂𑀦 𑀯𑀟𑁆𑀠𑀢𑀻’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀫𑀺𑀕𑀲𑀸𑀮𑀸𑀲𑀼𑀢𑁆𑀢𑀁

𑁭𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋

‘‘𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀁. 𑀧𑀺𑀢𑀸 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑁄 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺 𑀆𑀭𑀸𑀘𑀸𑀭𑀻 [𑀅𑀦𑀸𑀘𑀸𑀭𑀻 (𑀓.)] 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀲𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑁋 ‘𑀲𑀓𑀤𑀸𑀕𑀸𑀫𑀻 𑀲𑀢𑁆𑀢𑁄 [𑀲𑀓𑀤𑀸𑀕𑀸𑀫𑀺𑀲𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄’𑀢𑀺. 𑀧𑀺𑀢𑀸𑀫𑀳𑁄 𑀫𑁂 [𑀧𑁂𑀢𑁆𑀢𑀸𑀧𑀺 𑀬𑁄 𑀫𑁂 (𑀲𑀻.), 𑀧𑀺𑀢 𑀧𑀺𑀬𑁄 𑀫𑁂 (𑀲𑁆𑀬𑀸.) 𑀅. 𑀦𑀺. 𑁬.𑁪𑁪], 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀲𑁄𑀧𑀺 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑁋 ‘𑀲𑀓𑀤𑀸𑀕𑀸𑀫𑀻 𑀲𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄’𑀢𑀺.

‘‘𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺? ‘‘𑀏𑀯𑀁 𑀔𑁄 𑀧𑀦𑁂𑀢𑀁, 𑀪𑀕𑀺𑀦𑀺, 𑀪𑀕𑀯𑀢𑀸 𑀩𑁆𑀬𑀸𑀓𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑁂 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀫𑀺𑀕𑀲𑀸𑀮𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀫𑀁 𑀏𑀢𑀤𑀯𑁄𑀘 𑁋

‘𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀁. 𑀧𑀺𑀢𑀸 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑁄 𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀲𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑀲𑀓𑀤𑀸𑀕𑀸𑀫𑀻 𑀲𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀧𑀺𑀢𑀸𑀫𑀳𑁄 𑀫𑁂, 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀺 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀲𑁄𑀧𑀺 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 𑁋 𑀲𑀓𑀤𑀸𑀕𑀸𑀫𑀻 𑀲𑀢𑁆𑀢𑁄 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄𑀢𑀺.

𑀓𑀣𑀁 𑀓𑀣𑀁 𑀦𑀸𑀫𑀸𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀅𑀜𑁆𑀜𑁂𑀬𑁆𑀬𑁄, 𑀬𑀢𑁆𑀭 𑀳𑀺 𑀦𑀸𑀫 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀘 𑀉𑀪𑁄 𑀲𑀫𑀲𑀫𑀕𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀅𑀪𑀺𑀲𑀫𑁆𑀧𑀭𑀸𑀬’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀦𑁆𑀢𑁂, 𑀫𑀺𑀕𑀲𑀸𑀮𑀁 𑀉𑀧𑀸𑀲𑀺𑀓𑀁 𑀏𑀢𑀤𑀯𑁄𑀘𑀁 𑁋 ‘𑀏𑀯𑀁 𑀔𑁄 𑀧𑀦𑁂𑀢𑀁, 𑀪𑀕𑀺𑀦𑀺, 𑀪𑀕𑀯𑀢𑀸 𑀩𑁆𑀬𑀸𑀓𑀢’’’𑀦𑁆𑀢𑀺.

‘‘𑀓𑀸 𑀘𑀸𑀦𑀦𑁆𑀤, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀫𑁆𑀫𑀓𑀸 𑀅𑀫𑁆𑀫𑀓𑀧𑀜𑁆𑀜𑀸 [𑀅𑀫𑁆𑀩𑀓𑀸 𑀅𑀫𑁆𑀩𑀓𑀧𑀜𑁆𑀜𑀸 (𑀲𑀻. 𑀧𑀻.), 𑀅𑀦𑁆𑀥𑀓𑀸 𑀅𑀦𑁆𑀥𑀓𑀧𑀜𑁆𑀜𑀸 (𑀲𑁆𑀬𑀸.)], 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑁂 𑀜𑀸𑀡𑁂?

‘‘𑀤𑀲𑀬𑀺𑀫𑁂, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀤𑀲? 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺, 𑀦𑁄 𑀯𑀺𑀲𑁂𑀲𑀸𑀬; 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 [𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁 (𑀲𑁆𑀬𑀸.)] 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺, 𑀦𑁄 𑀳𑀸𑀦𑀸𑀬; 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺 𑁋 ‘𑀇𑀫𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸, 𑀅𑀧𑀭𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸. 𑀓𑀲𑁆𑀫𑀸 𑀦𑁂𑀲𑀁 𑀏𑀓𑁄 𑀳𑀻𑀦𑁄 𑀏𑀓𑁄 𑀧𑀡𑀻𑀢𑁄’𑀢𑀺? 𑀢𑀜𑁆𑀳𑀺 𑀢𑁂𑀲𑀁, 𑀆𑀦𑀦𑁆𑀤, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀅𑀫𑀼𑀦𑀸 𑀧𑀼𑀭𑀺𑀫𑁂𑀦 𑀧𑀼𑀕𑁆𑀕𑀮𑁂𑀦 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑀁 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦! 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀺𑀓𑀸 𑀅𑀳𑀼𑀯𑀢𑁆𑀣, 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀺𑀢𑁆𑀣. 𑀔𑀜𑁆𑀜𑀢𑀺 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀦𑁆𑀢𑁄. 𑀅𑀳𑀁 𑀯𑀸, 𑀆𑀦𑀦𑁆𑀤 [𑀅𑀳𑀜𑁆𑀘𑀸𑀦𑀦𑁆𑀤 (𑀲𑀻. 𑀲𑁆𑀬𑀸. 𑀓.) 𑀅. 𑀦𑀺. 𑁬.𑁪𑁪 𑀧𑀲𑁆𑀲𑀺𑀢𑀩𑁆𑀩𑀁], 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀯𑀸 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀲𑀻𑀮𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺, 𑀦𑁄 𑀯𑀺𑀲𑁂𑀲𑀸𑀬; 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀯𑀸 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀲𑀻𑀮𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺, 𑀦𑁄 𑀳𑀸𑀦𑀸𑀬; 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺…𑀧𑁂… 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀩𑁆𑀩𑀭𑀸𑀕𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀲𑁄 𑀭𑀸𑀕𑁄 𑀅𑀧𑀭𑀺𑀲𑁂𑀲𑁄 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺, 𑀦𑁄 𑀯𑀺𑀲𑁂𑀲𑀸𑀬; 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀩𑁆𑀩𑀭𑀸𑀕𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀲𑁄 𑀭𑀸𑀕𑁄 𑀅𑀧𑀭𑀺𑀲𑁂𑀲𑁄 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺, 𑀦𑁄 𑀳𑀸𑀦𑀸𑀬; 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺…𑀧𑁂… 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀲𑁄 𑀓𑁄𑀥𑁄 𑀅𑀧𑀭𑀺𑀲𑁂𑀲𑁄 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺, 𑀦𑁄 𑀯𑀺𑀲𑁂𑀲𑀸𑀬; 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀓𑁄𑀥𑀦𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀲𑁄 𑀓𑁄𑀥𑁄 𑀅𑀧𑀭𑀺𑀲𑁂𑀲𑁄 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺, 𑀦𑁄 𑀳𑀸𑀦𑀸𑀬; 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺…𑀧𑁂… 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀤𑁆𑀥𑀢𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀉𑀤𑁆𑀥𑀘𑁆𑀘𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀅𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀦 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀳𑀸𑀦𑀸𑀬 𑀧𑀭𑁂𑀢𑀺, 𑀦𑁄 𑀯𑀺𑀲𑁂𑀲𑀸𑀬; 𑀳𑀸𑀦𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀯𑀺𑀲𑁂𑀲𑀕𑀸𑀫𑀻.

‘‘𑀇𑀥 𑀧𑀦𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀤𑁆𑀥𑀢𑁄 𑀳𑁄𑀢𑀺. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀉𑀤𑁆𑀥𑀘𑁆𑀘𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀺𑀲𑁂𑀲𑀸𑀬 𑀧𑀭𑁂𑀢𑀺, 𑀦𑁄 𑀳𑀸𑀦𑀸𑀬; 𑀯𑀺𑀲𑁂𑀲𑀕𑀸𑀫𑀻𑀬𑁂𑀯 𑀳𑁄𑀢𑀺, 𑀦𑁄 𑀳𑀸𑀦𑀕𑀸𑀫𑀻.

‘‘𑀢𑀢𑁆𑀭𑀸𑀦𑀦𑁆𑀤, 𑀧𑀫𑀸𑀡𑀺𑀓𑀸 𑀧𑀫𑀺𑀡𑀦𑁆𑀢𑀺 𑁋 ‘𑀇𑀫𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸, 𑀅𑀧𑀭𑀲𑁆𑀲𑀧𑀺 𑀢𑁂𑀯 𑀥𑀫𑁆𑀫𑀸. 𑀓𑀲𑁆𑀫𑀸 𑀦𑁂𑀲𑀁 𑀏𑀓𑁄 𑀳𑀻𑀦𑁄 𑀏𑀓𑁄 𑀧𑀡𑀻𑀢𑁄’𑀢𑀺? 𑀢𑀜𑁆𑀳𑀺 𑀢𑁂𑀲𑀁, 𑀆𑀦𑀦𑁆𑀤, 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀉𑀤𑁆𑀥𑀢𑁄 𑀳𑁄𑀢𑀺 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀢𑁆𑀣𑀲𑁆𑀲 𑀢𑀁 𑀉𑀤𑁆𑀥𑀘𑁆𑀘𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀲𑀯𑀦𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀓𑀢𑀁 𑀳𑁄𑀢𑀺, 𑀤𑀺𑀝𑁆𑀞𑀺𑀬𑀸𑀧𑀺 𑀧𑀝𑀺𑀯𑀺𑀤𑁆𑀥𑀁 𑀳𑁄𑀢𑀺, 𑀲𑀸𑀫𑀸𑀬𑀺𑀓𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀁 𑀮𑀪𑀢𑀺. 𑀅𑀬𑀁, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀅𑀫𑀼𑀦𑀸 𑀧𑀼𑀭𑀺𑀫𑁂𑀦 𑀧𑀼𑀕𑁆𑀕𑀮𑁂𑀦 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑀁 𑀥𑀫𑁆𑀫𑀲𑁄𑀢𑁄 𑀦𑀺𑀩𑁆𑀩𑀳𑀢𑀺. 𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦! 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀺𑀓𑀸 𑀅𑀳𑀼𑀯𑀢𑁆𑀣; 𑀫𑀸 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀺𑀢𑁆𑀣. 𑀔𑀜𑁆𑀜𑀢𑀺 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑀦𑁆𑀢𑁄. 𑀅𑀳𑀁 𑀯𑀸, 𑀆𑀦𑀦𑁆𑀤, 𑀧𑀼𑀕𑁆𑀕𑀮𑁂𑀲𑀼 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬𑀁 𑀬𑁄 𑀯𑀸 𑀧𑀦𑀲𑁆𑀲 𑀫𑀸𑀤𑀺𑀲𑁄.

‘‘𑀓𑀸 𑀘𑀸𑀦𑀦𑁆𑀤, 𑀫𑀺𑀕𑀲𑀸𑀮𑀸 𑀉𑀧𑀸𑀲𑀺𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀫𑁆𑀫𑀓𑀸 𑀅𑀫𑁆𑀫𑀓𑀧𑀜𑁆𑀜𑀸, 𑀓𑁂 𑀘 𑀧𑀼𑀭𑀺𑀲𑀧𑀼𑀕𑁆𑀕𑀮𑀧𑀭𑁄𑀧𑀭𑀺𑀬𑁂 𑀜𑀸𑀡𑁂! 𑀇𑀫𑁂 𑀔𑁄, 𑀆𑀦𑀦𑁆𑀤, 𑀤𑀲 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀬𑀣𑀸𑀭𑀽𑀧𑁂𑀦, 𑀆𑀦𑀦𑁆𑀤, 𑀲𑀻𑀮𑁂𑀦 𑀧𑀼𑀭𑀸𑀡𑁄 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺 𑀢𑀣𑀸𑀭𑀽𑀧𑁂𑀦 𑀲𑀻𑀮𑁂𑀦 𑀇𑀲𑀺𑀤𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀪𑀯𑀺𑀲𑁆𑀲, 𑀦𑀬𑀺𑀥 𑀧𑀼𑀭𑀸𑀡𑁄 𑀇𑀲𑀺𑀤𑀢𑁆𑀢𑀲𑁆𑀲 𑀕𑀢𑀺𑀫𑁆𑀧𑀺 𑀅𑀜𑁆𑀜𑀲𑁆𑀲. 𑀬𑀣𑀸𑀭𑀽𑀧𑀸𑀬 𑀘𑀸𑀦𑀦𑁆𑀤, 𑀧𑀜𑁆𑀜𑀸𑀬 𑀇𑀲𑀺𑀤𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺 𑀢𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀧𑀼𑀭𑀸𑀡𑁄 𑀲𑀫𑀦𑁆𑀦𑀸𑀕𑀢𑁄 𑀅𑀪𑀯𑀺𑀲𑁆𑀲, 𑀦𑀬𑀺𑀥 𑀇𑀲𑀺𑀤𑀢𑁆𑀢𑁄 𑀧𑀼𑀭𑀸𑀡𑀲𑁆𑀲 𑀕𑀢𑀺𑀫𑁆𑀧𑀺 𑀅𑀜𑁆𑀜𑀲𑁆𑀲. 𑀇𑀢𑀺 𑀔𑁄, 𑀆𑀦𑀦𑁆𑀤, 𑀇𑀫𑁂 𑀧𑀼𑀕𑁆𑀕𑀮𑀸 𑀉𑀪𑁄 𑀏𑀓𑀗𑁆𑀕𑀳𑀻𑀦𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀢𑀬𑁄𑀥𑀫𑁆𑀫𑀲𑀼𑀢𑁆𑀢𑀁

𑁭𑁬. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀮𑁄𑀓𑁂 𑀦 𑀲𑀁𑀯𑀺𑀚𑁆𑀚𑁂𑀬𑁆𑀬𑀼𑀁, 𑀦 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄 𑀥𑀫𑁆𑀫𑀯𑀺𑀦𑀬𑁄 𑀮𑁄𑀓𑁂 𑀤𑀺𑀩𑁆𑀩𑁂𑀬𑁆𑀬. 𑀓𑀢𑀫𑁂 𑀢𑀬𑁄? 𑀚𑀸𑀢𑀺 𑀘, 𑀚𑀭𑀸 𑀘, 𑀫𑀭𑀡𑀜𑁆𑀘 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑀸 𑀮𑁄𑀓𑁂 𑀦 𑀲𑀁𑀯𑀺𑀚𑁆𑀚𑁂𑀬𑁆𑀬𑀼𑀁, 𑀦 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄 𑀥𑀫𑁆𑀫𑀯𑀺𑀦𑀬𑁄 𑀮𑁄𑀓𑁂 𑀤𑀺𑀩𑁆𑀩𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀮𑁄𑀓𑁂 𑀲𑀁𑀯𑀺𑀚𑁆𑀚𑀦𑁆𑀢𑀺 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄 𑀥𑀫𑁆𑀫𑀯𑀺𑀦𑀬𑁄 𑀮𑁄𑀓𑁂 𑀤𑀺𑀩𑁆𑀩𑀢𑀺.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀭𑀸𑀕𑀁 𑀅𑀧𑁆𑀧𑀳𑀸𑀬, 𑀤𑁄𑀲𑀁 𑀅𑀧𑁆𑀧𑀳𑀸𑀬, 𑀫𑁄𑀳𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀅𑀧𑁆𑀧𑀳𑀸𑀬, 𑀯𑀺𑀘𑀺𑀓𑀺𑀘𑁆𑀙𑀁 𑀅𑀧𑁆𑀧𑀳𑀸𑀬, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀅𑀧𑁆𑀧𑀳𑀸𑀬, 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀅𑀧𑁆𑀧𑀳𑀸𑀬, 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀫𑀼𑀝𑁆𑀞𑀲𑀘𑁆𑀘𑀁 𑀅𑀧𑁆𑀧𑀳𑀸𑀬, 𑀅𑀲𑀫𑁆𑀧𑀚𑀜𑁆𑀜𑀁 𑀅𑀧𑁆𑀧𑀳𑀸𑀬, 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀫𑀼𑀝𑁆𑀞𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀅𑀧𑁆𑀧𑀳𑀸𑀬, 𑀅𑀭𑀺𑀬𑀥𑀫𑁆𑀫𑀲𑁆𑀲 [𑀅𑀭𑀺𑀬𑀥𑀫𑁆𑀫𑀁 (𑀲𑁆𑀬𑀸.)] 𑀅𑀲𑁄𑀢𑀼𑀓𑀫𑁆𑀬𑀢𑀁 𑀅𑀧𑁆𑀧𑀳𑀸𑀬, 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀫𑀼𑀝𑁆𑀞𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀉𑀤𑁆𑀥𑀘𑁆𑀘𑀁 𑀅𑀧𑁆𑀧𑀳𑀸𑀬, 𑀅𑀲𑀁𑀯𑀭𑀁 𑀅𑀧𑁆𑀧𑀳𑀸𑀬, 𑀤𑀼𑀲𑁆𑀲𑀻𑀮𑁆𑀬𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀲𑁆𑀲𑀤𑁆𑀥𑀺𑀬𑀁 𑀅𑀧𑁆𑀧𑀳𑀸𑀬, 𑀅𑀯𑀤𑀜𑁆𑀜𑀼𑀢𑀁 𑀅𑀧𑁆𑀧𑀳𑀸𑀬, 𑀓𑁄𑀲𑀚𑁆𑀚𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀦𑀸𑀤𑀭𑀺𑀬𑀁 𑀅𑀧𑁆𑀧𑀳𑀸𑀬, 𑀤𑁄𑀯𑀘𑀲𑁆𑀲𑀢𑀁 𑀅𑀧𑁆𑀧𑀳𑀸𑀬, 𑀧𑀸𑀧𑀫𑀺𑀢𑁆𑀢𑀢𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀳𑀺𑀭𑀺𑀓𑀁 𑀅𑀧𑁆𑀧𑀳𑀸𑀬, 𑀅𑀦𑁄𑀢𑁆𑀢𑀧𑁆𑀧𑀁 𑀅𑀧𑁆𑀧𑀳𑀸𑀬, 𑀧𑀫𑀸𑀤𑀁 𑀅𑀧𑁆𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁.

‘‘𑀅𑀳𑀺𑀭𑀺𑀓𑁄𑀬𑀁, 𑀪𑀺𑀓𑁆𑀔𑀯𑁂, 𑀅𑀦𑁄𑀢𑁆𑀢𑀸𑀧𑀻 𑀧𑀫𑀢𑁆𑀢𑁄 𑀳𑁄𑀢𑀺. 𑀲𑁄 𑀧𑀫𑀢𑁆𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀲𑁄 𑀧𑀸𑀧𑀫𑀺𑀢𑁆𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁. 𑀲𑁄 𑀓𑀼𑀲𑀻𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁. 𑀲𑁄 𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀲𑁄 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀫𑀼𑀝𑁆𑀞𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁. 𑀲𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁. 𑀲𑁄 𑀮𑀻𑀦𑀘𑀺𑀢𑁆𑀢𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁. 𑀲𑁄 𑀯𑀺𑀘𑀺𑀓𑀺𑀘𑁆𑀙𑁄 𑀲𑀫𑀸𑀦𑁄 𑀅𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁. 𑀲𑁄 𑀭𑀸𑀕𑀁 𑀅𑀧𑁆𑀧𑀳𑀸𑀬 𑀤𑁄𑀲𑀁 𑀅𑀧𑁆𑀧𑀳𑀸𑀬 𑀫𑁄𑀳𑀁 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀭𑀸𑀕𑀁 𑀧𑀳𑀸𑀬, 𑀤𑁄𑀲𑀁 𑀧𑀳𑀸𑀬, 𑀫𑁄𑀳𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀬, 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀬, 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀬, 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀫𑀼𑀝𑁆𑀞𑀲𑀘𑁆𑀘𑀁 𑀧𑀳𑀸𑀬, 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀬, 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀫𑀼𑀝𑁆𑀞𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀬, 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀬, 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀉𑀤𑁆𑀥𑀘𑁆𑀘𑀁 𑀧𑀳𑀸𑀬, 𑀅𑀲𑀁𑀯𑀭𑀁 𑀧𑀳𑀸𑀬, 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀬, 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀬, 𑀓𑁄𑀲𑀚𑁆𑀚𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀦𑀸𑀤𑀭𑀺𑀬𑀁 𑀧𑀳𑀸𑀬, 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀬, 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀓𑀢𑀫𑁂 𑀢𑀬𑁄? 𑀅𑀳𑀺𑀭𑀺𑀓𑀁 𑀧𑀳𑀸𑀬, 𑀅𑀦𑁄𑀢𑁆𑀢𑀧𑁆𑀧𑀁 𑀧𑀳𑀸𑀬, 𑀧𑀫𑀸𑀤𑀁 𑀧𑀳𑀸𑀬 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁.

‘‘𑀳𑀺𑀭𑀻𑀫𑀸𑀬𑀁, 𑀪𑀺𑀓𑁆𑀔𑀯𑁂, 𑀑𑀢𑁆𑀢𑀸𑀧𑀻 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺. 𑀲𑁄 𑀅𑀧𑁆𑀧𑀫𑀢𑁆𑀢𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀅𑀦𑀸𑀤𑀭𑀺𑀬𑀁 𑀧𑀳𑀸𑀢𑀼𑀁 𑀤𑁄𑀯𑀘𑀲𑁆𑀲𑀢𑀁 𑀧𑀳𑀸𑀢𑀼𑀁 𑀧𑀸𑀧𑀫𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀅𑀲𑁆𑀲𑀤𑁆𑀥𑀺𑀬𑀁 𑀧𑀳𑀸𑀢𑀼𑀁 𑀅𑀯𑀤𑀜𑁆𑀜𑀼𑀢𑀁 𑀧𑀳𑀸𑀢𑀼𑀁 𑀓𑁄𑀲𑀚𑁆𑀚𑀁 𑀧𑀳𑀸𑀢𑀼𑀁. 𑀲𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀉𑀤𑁆𑀥𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀁𑀯𑀭𑀁 𑀧𑀳𑀸𑀢𑀼𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀳𑀸𑀢𑀼𑀁. 𑀲𑁄 𑀲𑀻𑀮𑀯𑀸 𑀲𑀫𑀸𑀦𑁄 𑀪𑀩𑁆𑀩𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀲𑁄𑀢𑀼𑀓𑀫𑁆𑀬𑀢𑀁 𑀧𑀳𑀸𑀢𑀼𑀁 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀁 𑀧𑀳𑀸𑀢𑀼𑀁. 𑀲𑁄 𑀅𑀦𑀼𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀧𑀳𑀸𑀢𑀼𑀁 𑀅𑀲𑀫𑁆𑀧𑀚𑀜𑁆𑀜𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑀁 𑀧𑀳𑀸𑀢𑀼𑀁. 𑀲𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀳𑀸𑀢𑀼𑀁 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀁 𑀧𑀳𑀸𑀢𑀼𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀧𑀳𑀸𑀢𑀼𑀁. 𑀲𑁄 𑀅𑀮𑀻𑀦𑀘𑀺𑀢𑁆𑀢𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀧𑀳𑀸𑀢𑀼𑀁 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀢𑀼𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁 𑀧𑀳𑀸𑀢𑀼𑀁. 𑀲𑁄 𑀅𑀯𑀺𑀘𑀺𑀓𑀺𑀘𑁆𑀙𑁄 𑀲𑀫𑀸𑀦𑁄 𑀪𑀩𑁆𑀩𑁄 𑀭𑀸𑀕𑀁 𑀧𑀳𑀸𑀢𑀼𑀁 𑀤𑁄𑀲𑀁 𑀧𑀳𑀸𑀢𑀼𑀁 𑀫𑁄𑀳𑀁 𑀧𑀳𑀸𑀢𑀼𑀁. 𑀲𑁄 𑀭𑀸𑀕𑀁 𑀧𑀳𑀸𑀬 𑀤𑁄𑀲𑀁 𑀧𑀳𑀸𑀬 𑀫𑁄𑀳𑀁 𑀧𑀳𑀸𑀬 𑀪𑀩𑁆𑀩𑁄 𑀚𑀸𑀢𑀺𑀁 𑀧𑀳𑀸𑀢𑀼𑀁 𑀚𑀭𑀁 𑀧𑀳𑀸𑀢𑀼𑀁 𑀫𑀭𑀡𑀁 𑀧𑀳𑀸𑀢𑀼’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀓𑀸𑀓𑀲𑀼𑀢𑁆𑀢𑀁

𑁭𑁭. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀸𑀓𑁄. 𑀓𑀢𑀫𑁂𑀳𑀺 𑀤𑀲𑀳𑀺? 𑀥𑀁𑀲𑀻 𑀘, 𑀧𑀕𑀩𑁆𑀪𑁄 𑀘, 𑀢𑀺𑀦𑁆𑀢𑀺𑀡𑁄 [𑀦𑀺𑀮𑁆𑀮𑀚𑁆𑀚𑁄 (𑀓.) 𑀢𑀺𑀦𑁆𑀢𑀺𑀡𑁄𑀢𑀺 𑀢𑀺𑀦𑁆𑀢𑀺𑀡𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸… (𑀲𑀻. 𑀲𑁆𑀬𑀸. 𑀅𑀝𑁆𑀞.) 𑀅𑀪𑀺𑀥𑀫𑁆𑀫𑁂 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 𑀢𑀺𑀦𑁆𑀢𑀺𑀡𑀧𑀤𑀦𑀺𑀤𑁆𑀤𑁂𑀲𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀘, 𑀫𑀳𑀕𑁆𑀖𑀲𑁄 𑀘, 𑀮𑀼𑀤𑁆𑀤𑁄 𑀘, 𑀅𑀓𑀸𑀭𑀼𑀡𑀺𑀓𑁄 𑀘, 𑀤𑀼𑀩𑁆𑀩𑀮𑁄 𑀘, 𑀑𑀭𑀯𑀺𑀢𑀸 𑀘, 𑀫𑀼𑀝𑁆𑀞𑀲𑁆𑀲𑀢𑀺 𑀘, 𑀦𑁂𑀘𑀬𑀺𑀓𑁄 [𑀦𑁂𑀭𑀲𑀺𑀓𑁄 (𑀲𑀻.) 𑀢𑀤𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀦𑁂𑀘𑀬𑀺𑀓𑁄’’ 𑀢𑁆𑀯𑁂𑀯 𑀤𑀺𑀲𑁆𑀲𑀢𑀺] 𑀘 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀓𑀸𑀓𑁄. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀸𑀧𑀪𑀺𑀓𑁆𑀔𑀼. 𑀓𑀢𑀫𑁂𑀳𑀺 𑀤𑀲𑀳𑀺? 𑀥𑀁𑀲𑀻 𑀘, 𑀧𑀕𑀩𑁆𑀪𑁄 𑀘, 𑀢𑀺𑀦𑁆𑀢𑀺𑀡𑁄 𑀘, 𑀫𑀳𑀕𑁆𑀖𑀲𑁄 𑀘, 𑀮𑀼𑀤𑁆𑀤𑁄 𑀘, 𑀅𑀓𑀸𑀭𑀼𑀡𑀺𑀓𑁄 𑀘, 𑀤𑀼𑀩𑁆𑀩𑀮𑁄 𑀘, 𑀑𑀭𑀯𑀺𑀢𑀸 𑀘, 𑀫𑀼𑀝𑁆𑀞𑀲𑁆𑀲𑀢𑀺 𑀘, 𑀦𑁂𑀘𑀬𑀺𑀓𑁄 𑀘 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀸𑀧𑀪𑀺𑀓𑁆𑀔𑀽’’𑀢𑀺. 𑀲𑀢𑁆𑀢𑀫𑀁.

𑁮. 𑀦𑀺𑀕𑀡𑁆𑀞𑀲𑀼𑀢𑁆𑀢𑀁

𑁭𑁮. ‘‘𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀦𑀺𑀕𑀡𑁆𑀞𑀸. 𑀓𑀢𑀫𑁂𑀳𑀺 𑀤𑀲𑀳𑀺? 𑀅𑀲𑁆𑀲𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀤𑀼𑀲𑁆𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀅𑀳𑀺𑀭𑀺𑀓𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀅𑀦𑁄𑀢𑁆𑀢𑀧𑁆𑀧𑀺𑀦𑁄, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀅𑀲𑀧𑁆𑀧𑀼𑀭𑀺𑀲𑀲𑀫𑁆𑀪𑀢𑁆𑀢𑀺𑀦𑁄, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀅𑀢𑁆𑀢𑀼𑀓𑁆𑀓𑀁𑀲𑀓𑀧𑀭𑀯𑀫𑁆𑀪𑀓𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀸 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀦𑁄, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀓𑀼𑀳𑀓𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀧𑀸𑀧𑀺𑀘𑁆𑀙𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸; 𑀧𑀸𑀧𑀫𑀺𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀦𑀺𑀕𑀡𑁆𑀞𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀆𑀖𑀸𑀢𑀯𑀢𑁆𑀣𑀼𑀲𑀼𑀢𑁆𑀢𑀁

𑁭𑁯. [𑀅. 𑀦𑀺. 𑁯.𑁨𑁯] ‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀤𑀲? ‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺; ‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺; ‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺; ‘𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀻’𑀢𑀺…𑀧𑁂… ‘𑀅𑀦𑀢𑁆𑀣𑀁 𑀘𑀭𑀢𑀻’𑀢𑀺…𑀧𑁂… ‘𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺, ‘𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀻’𑀢𑀺…𑀧𑁂… ‘𑀅𑀢𑁆𑀣𑀁 𑀘𑀭𑀢𑀻’𑀢𑀺…𑀧𑁂… ‘𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻’𑀢𑀺 𑀆𑀖𑀸𑀢𑀁 𑀩𑀦𑁆𑀥𑀢𑀺; 𑀅𑀝𑁆𑀞𑀸𑀦𑁂 𑀘 𑀓𑀼𑀧𑁆𑀧𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀻’’𑀢𑀺. 𑀦𑀯𑀫𑀁.

𑁧𑁦. 𑀆𑀖𑀸𑀢𑀧𑀝𑀺𑀯𑀺𑀦𑀬𑀲𑀼𑀢𑁆𑀢𑀁

𑁮𑁦. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀓𑀢𑀫𑁂 𑀤𑀲? ‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺, ‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺, ‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺…𑀧𑁂… 𑀘𑀭𑀢𑀺…𑀧𑁂… 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺, 𑀅𑀝𑁆𑀞𑀸𑀦𑁂 𑀘 𑀦 𑀓𑀼𑀧𑁆𑀧𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀆𑀖𑀸𑀢𑀧𑀝𑀺𑀯𑀺𑀦𑀬𑀸’’𑀢𑀺. 𑀤𑀲𑀫𑀁.

𑀆𑀓𑀗𑁆𑀔𑀯𑀕𑁆𑀕𑁄 𑀢𑀢𑀺𑀬𑁄.