(𑁯) 𑁪. 𑀣𑁂𑀭𑀯𑀕𑁆𑀕𑁄

𑁧. 𑀯𑀸𑀳𑀦𑀲𑀼𑀢𑁆𑀢𑀁

𑁮𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀸𑀳𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀯𑀸𑀳𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑁂𑀳𑀺 𑀢𑀣𑀸𑀕𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺?

‘‘𑀤𑀲𑀳𑀺 𑀔𑁄, 𑀯𑀸𑀳𑀦, 𑀥𑀫𑁆𑀫𑁂𑀳𑀺 𑀢𑀣𑀸𑀕𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀓𑀢𑀫𑁂𑀳𑀺 𑀤𑀲𑀳𑀺? 𑀭𑀽𑀧𑁂𑀦 𑀔𑁄, 𑀯𑀸𑀳𑀦, 𑀢𑀣𑀸𑀕𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀯𑁂𑀤𑀦𑀸𑀬 𑀔𑁄, 𑀯𑀸𑀳𑀦…𑀧𑁂… 𑀲𑀜𑁆𑀜𑀸𑀬 𑀔𑁄, 𑀯𑀸𑀳𑀦… 𑀲𑀗𑁆𑀔𑀸𑀭𑁂𑀳𑀺 𑀔𑁄, 𑀯𑀸𑀳𑀦… 𑀯𑀺𑀜𑁆𑀜𑀸𑀡𑁂𑀦 𑀔𑁄, 𑀯𑀸𑀳𑀦… 𑀚𑀸𑀢𑀺𑀬𑀸 𑀔𑁄, 𑀯𑀸𑀳𑀦… 𑀚𑀭𑀸𑀬 𑀔𑁄, 𑀯𑀸𑀳𑀦… 𑀫𑀭𑀡𑁂𑀦 𑀔𑁄, 𑀯𑀸𑀳𑀦… 𑀤𑀼𑀓𑁆𑀔𑁂𑀳𑀺 𑀔𑁄, 𑀯𑀸𑀳𑀦… 𑀓𑀺𑀮𑁂𑀲𑁂𑀳𑀺 𑀔𑁄, 𑀯𑀸𑀳𑀦, 𑀢𑀣𑀸𑀕𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀯𑀸𑀳𑀦, 𑀉𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀧𑀼𑀡𑁆𑀟𑀭𑀻𑀓𑀁 𑀯𑀸 𑀉𑀤𑀓𑁂 𑀚𑀸𑀢𑀁 𑀉𑀤𑀓𑁂 𑀲𑀁𑀯𑀟𑁆𑀠𑀁 𑀉𑀤𑀓𑀸 𑀧𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀁 𑀅𑀦𑀼𑀧𑀮𑀺𑀢𑁆𑀢𑀁 𑀉𑀤𑀓𑁂𑀦; 𑀏𑀯𑀫𑁂𑀯𑀁 𑀔𑁄, 𑀯𑀸𑀳𑀦, 𑀇𑀫𑁂𑀳𑀺 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀢𑀣𑀸𑀕𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺. 𑀧𑀞𑀫𑀁.

𑁨. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁮𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀅𑀧𑁆𑀧𑀲𑁆𑀲𑀼𑀢𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀤𑀼𑀩𑁆𑀩𑀘𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀧𑀸𑀧𑀫𑀺𑀢𑁆𑀢𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀓𑀼𑀲𑀻𑀢𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀫𑀼𑀝𑁆𑀞𑀲𑁆𑀲𑀢𑀺 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀅𑀲𑀦𑁆𑀢𑀼𑀝𑁆𑀞𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀧𑀸𑀧𑀺𑀘𑁆𑀙𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀇𑀫𑁂𑀳𑀺 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀲𑀤𑁆𑀥𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀲𑀻𑀮𑀯𑀸 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀭𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀲𑀼𑀯𑀘𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀲𑀦𑁆𑀢𑀼𑀝𑁆𑀞𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀅𑀧𑁆𑀧𑀺𑀘𑁆𑀙𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 ‘𑀇𑀫𑁂𑀳𑀺 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀼𑀡𑁆𑀡𑀺𑀬𑀲𑀼𑀢𑁆𑀢𑀁

𑁮𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀅𑀧𑁆𑀧𑁂𑀓𑀤𑀸 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺 𑀅𑀧𑁆𑀧𑁂𑀓𑀤𑀸 𑀦𑀧𑁆𑀧𑀝𑀺𑀪𑀸𑀢𑀻’’𑀢𑀺?

‘‘𑀲𑀤𑁆𑀥𑁄 𑀘, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘 𑀉𑀧𑀲𑀗𑁆𑀓𑀫𑀺𑀢𑀸; 𑀦𑁂𑀯 𑀢𑀸𑀯 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀬𑀢𑁄 𑀘 𑀔𑁄, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀉𑀧𑀲𑀗𑁆𑀓𑀫𑀺𑀢𑀸 𑀘, 𑀏𑀯𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺.

‘‘𑀲𑀤𑁆𑀥𑁄 𑀘, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀳𑁄𑀢𑀺 𑀉𑀧𑀲𑀗𑁆𑀓𑀫𑀺𑀢𑀸 𑀘, 𑀦𑁄 𑀘 𑀧𑀬𑀺𑀭𑀼𑀧𑀸𑀲𑀺𑀢𑀸…𑀧𑁂… 𑀧𑀬𑀺𑀭𑀼𑀧𑀸𑀲𑀺𑀢𑀸 𑀘, 𑀦𑁄 𑀘 𑀧𑀭𑀺𑀧𑀼𑀘𑁆𑀙𑀺𑀢𑀸… 𑀧𑀭𑀺𑀧𑀼𑀘𑁆𑀙𑀺𑀢𑀸 𑀘, 𑀦𑁄 𑀘 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺… 𑀑𑀳𑀺𑀢𑀲𑁄𑀢𑁄 𑀘 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀦𑁄 𑀘 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑁂𑀢𑀺… 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀦𑁄 𑀘 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺… 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺 𑀦𑁄 𑀘 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺… 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺, 𑀦𑁄 𑀘 𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸… 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸, 𑀦𑁄 𑀘 𑀲𑀦𑁆𑀤𑀲𑁆𑀲𑀓𑁄 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀦𑁂𑀯 𑀢𑀸𑀯 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺.

‘‘𑀬𑀢𑁄 𑀘 𑀔𑁄, 𑀧𑀼𑀡𑁆𑀡𑀺𑀬, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺, 𑀉𑀧𑀲𑀗𑁆𑀓𑀫𑀺𑀢𑀸 𑀘, 𑀧𑀬𑀺𑀭𑀼𑀧𑀸𑀲𑀺𑀢𑀸 𑀘, 𑀧𑀭𑀺𑀧𑀼𑀘𑁆𑀙𑀺𑀢𑀸 𑀘, 𑀑𑀳𑀺𑀢𑀲𑁄𑀢𑁄 𑀘 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀢𑀺, 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺, 𑀓𑀮𑁆𑀬𑀸𑀡𑀯𑀸𑀘𑁄 𑀘 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸, 𑀲𑀦𑁆𑀤𑀲𑁆𑀲𑀓𑁄 𑀘 𑀳𑁄𑀢𑀺 𑀲𑀫𑀸𑀤𑀧𑀓𑁄 𑀲𑀫𑀼𑀢𑁆𑀢𑁂𑀚𑀓𑁄 𑀲𑀫𑁆𑀧𑀳𑀁𑀲𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑁋 𑀏𑀯𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀇𑀫𑁂𑀳𑀺 𑀔𑁄, 𑀧𑀼𑀡𑁆𑀡𑀺𑀬, 𑀤𑀲𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 [𑀲𑀫𑀦𑁆𑀦𑀸𑀕𑀢𑁄 (𑀓.)] [𑀏𑀓𑀦𑁆𑀢𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀻𑀢𑀺 (𑀲𑁆𑀬𑀸.)] 𑀏𑀓𑀦𑁆𑀢𑀧𑀝𑀺𑀪𑀸𑀦𑀸 [𑀏𑀓𑀦𑁆𑀢𑀧𑀝𑀺𑀪𑀸𑀦𑀁 (𑀲𑀻.)] 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻’’𑀢𑀺 [𑀏𑀓𑀦𑁆𑀢𑀁 𑀢𑀣𑀸𑀕𑀢𑀁 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀻𑀢𑀺 (𑀲𑁆𑀬𑀸.)]. 𑀢𑀢𑀺𑀬𑀁.

𑁪. 𑀩𑁆𑀬𑀸𑀓𑀭𑀡𑀲𑀼𑀢𑁆𑀢𑀁

𑁮𑁪. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺. 𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑁆𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺. 𑀲𑁄 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀛𑀸𑀬𑀺𑀦𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀇𑀭𑀻𑀡𑀁 𑀆𑀧𑀚𑁆𑀚𑀢𑀺 𑀯𑀺𑀘𑀺𑀦𑀁 [𑀯𑀺𑀲𑀺𑀦𑀁 (𑀲𑀻. 𑀅𑀝𑁆𑀞.)] 𑀆𑀧𑀚𑁆𑀚𑀢𑀺 𑀅𑀦𑀬𑀁 𑀆𑀧𑀚𑁆𑀚𑀢𑀺 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺?

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀓𑁄𑀥𑀦𑁄 𑀔𑁄 𑀅𑀬𑀫𑀸𑀬𑀲𑁆𑀫𑀸; 𑀓𑁄𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀓𑁄𑀥𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀉𑀧𑀦𑀸𑀳𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀉𑀧𑀦𑀸𑀳𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀉𑀧𑀦𑀸𑀳𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀫𑀓𑁆𑀔𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀫𑀓𑁆𑀔𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀫𑀓𑁆𑀔𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀧𑀴𑀸𑀲𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀧𑀴𑀸𑀲𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀧𑀴𑀸𑀲𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀇𑀲𑁆𑀲𑀼𑀓𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀇𑀲𑁆𑀲𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀇𑀲𑁆𑀲𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀫𑀘𑁆𑀙𑀭𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀫𑀘𑁆𑀙𑁂𑀭𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀫𑀘𑁆𑀙𑁂𑀭𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀲𑀞𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀲𑀸𑀞𑁂𑀬𑁆𑀬𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀲𑀸𑀞𑁂𑀬𑁆𑀬𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀫𑀸𑀬𑀸𑀯𑀻 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀫𑀸𑀬𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀫𑀸𑀬𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀧𑀸𑀧𑀺𑀘𑁆𑀙𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀇𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀇𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀲𑀢𑀺 [𑀫𑀼𑀝𑁆𑀞𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)] 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀉𑀢𑁆𑀢𑀭𑀺 𑀓𑀭𑀡𑀻𑀬𑁂 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀦𑁆𑀦𑁄. 𑀅𑀦𑁆𑀢𑀭𑀸 𑀯𑁄𑀲𑀸𑀦𑀕𑀫𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁’.

‘‘𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑀢𑁆𑀣𑀻𑀲𑀼𑀢𑁆𑀢𑀁

𑁮𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀘𑁂𑀢𑀻𑀲𑀼 𑀯𑀺𑀳𑀭𑀢𑀺 𑀲𑀳𑀚𑀸𑀢𑀺𑀬𑀁. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀘𑀼𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻 𑀅𑀥𑀺𑀕𑀫𑁂𑀲𑀼 𑁋 ‘𑀅𑀳𑀁 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑁆𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺. 𑀲𑁄 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀛𑀸𑀬𑀺𑀦𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀇𑀭𑀻𑀡𑀁 𑀆𑀧𑀚𑁆𑀚𑀢𑀺 𑀯𑀺𑀘𑀺𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀁 𑀆𑀧𑀚𑁆𑀚𑀢𑀺 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻 𑀅𑀥𑀺𑀕𑀫𑁂𑀲𑀼 𑁋 𑀅𑀳𑀁 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺…𑀧𑁂… 𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀔𑀡𑁆𑀟𑀓𑀸𑀭𑀻 𑀙𑀺𑀤𑁆𑀤𑀓𑀸𑀭𑀻 𑀲𑀩𑀮𑀓𑀸𑀭𑀻 𑀓𑀫𑁆𑀫𑀸𑀲𑀓𑀸𑀭𑀻 𑀦 𑀲𑀦𑁆𑀢𑀢𑀓𑀸𑀭𑀻 𑀦 𑀲𑀦𑁆𑀢𑀢𑀯𑀼𑀢𑁆𑀢𑀺 𑀲𑀻𑀮𑁂𑀲𑀼. 𑀤𑀼𑀲𑁆𑀲𑀻𑀮𑁄 𑀔𑁄 𑀅𑀬𑀫𑀸𑀬𑀲𑁆𑀫𑀸. 𑀤𑀼𑀲𑁆𑀲𑀺𑀮𑁆𑀬𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀅𑀲𑁆𑀲𑀤𑁆𑀥𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀅𑀲𑁆𑀲𑀤𑁆𑀥𑀺𑀬𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀅𑀧𑁆𑀧𑀲𑁆𑀲𑀼𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀅𑀦𑀸𑀘𑀸𑀭𑁄; 𑀅𑀧𑁆𑀧𑀲𑀘𑁆𑀘𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀩𑁆𑀩𑀘𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑁄𑀯𑀘𑀲𑁆𑀲𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀧𑀸𑀧𑀫𑀺𑀢𑁆𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀧𑀸𑀧𑀫𑀺𑀢𑁆𑀢𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀓𑀼𑀲𑀻𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀓𑁄𑀲𑀚𑁆𑀚𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀫𑀼𑀝𑁆𑀞𑀲𑁆𑀲𑀢𑀺 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀓𑀼𑀳𑀓𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀓𑁄𑀳𑀜𑁆𑀜𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀩𑁆𑀪𑀭𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑀼𑀩𑁆𑀪𑀭𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀧𑁆𑀧𑀜𑁆𑀜𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑀼𑀧𑁆𑀧𑀜𑁆𑀜𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁’.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀤𑀸 𑀢𑁂, 𑀲𑀫𑁆𑀫, 𑀥𑀦𑁂𑀦 [𑀩𑀦𑁆𑀥𑁄 (𑀓.)] 𑀥𑀦𑀓𑀭𑀡𑀻𑀬𑀁 𑀅𑀲𑁆𑀲, 𑀬𑀸𑀘𑁂𑀬𑁆𑀬𑀸𑀲𑀺 𑀫𑀁 [𑀬𑀸𑀘𑀺𑀲𑁆𑀲𑀲𑀺 𑀫𑀁 (𑀲𑀻.), 𑀧𑀯𑁂𑀤𑁂𑀬𑁆𑀬𑀸𑀲𑀺 𑀫𑀁 (𑀲𑁆𑀬𑀸.), 𑀧𑀭𑀸𑀚𑁂𑀬𑁆𑀬𑀸𑀧𑀺 𑀫𑀁 (𑀓.)] 𑀥𑀦𑀁. 𑀤𑀲𑁆𑀲𑀸𑀫𑀺 𑀢𑁂 𑀥𑀦’𑀦𑁆𑀢𑀺. 𑀲𑁄 𑀓𑀺𑀜𑁆𑀘𑀺𑀤𑁂𑀯 𑀥𑀦𑀓𑀭𑀡𑀻𑀬𑁂 𑀲𑀫𑀼𑀧𑁆𑀧𑀦𑁆𑀦𑁂 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀢𑁆𑀣𑁄 𑀫𑁂, 𑀲𑀫𑁆𑀫, 𑀥𑀦𑁂𑀦. 𑀤𑁂𑀳𑀺 𑀫𑁂 𑀥𑀦’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀢𑁂𑀦 𑀳𑀺, 𑀲𑀫𑁆𑀫, 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀢𑀢𑁆𑀭 𑀔𑀦𑀦𑁆𑀢𑁄 𑀦𑀸𑀥𑀺𑀕𑀘𑁆𑀙𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀮𑀺𑀓𑀁 𑀫𑀁, 𑀲𑀫𑁆𑀫, 𑀅𑀯𑀘; 𑀢𑀼𑀘𑁆𑀙𑀓𑀁 𑀫𑀁, 𑀲𑀫𑁆𑀫, 𑀅𑀯𑀘 𑁋 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦𑀸𑀳𑀁 𑀢𑀁, 𑀲𑀫𑁆𑀫, 𑀅𑀮𑀺𑀓𑀁 𑀅𑀯𑀘𑀁, 𑀢𑀼𑀘𑁆𑀙𑀓𑀁 𑀅𑀯𑀘𑀁. 𑀢𑁂𑀦 𑀳𑀺, 𑀲𑀫𑁆𑀫, 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀢𑀢𑁆𑀭𑀧𑀺 𑀔𑀦𑀦𑁆𑀢𑁄 𑀦𑀸𑀥𑀺𑀕𑀘𑁆𑀙𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀮𑀺𑀓𑀁 𑀫𑀁, 𑀲𑀫𑁆𑀫, 𑀅𑀯𑀘, 𑀢𑀼𑀘𑁆𑀙𑀓𑀁 𑀫𑀁, 𑀲𑀫𑁆𑀫, 𑀅𑀯𑀘 𑁋 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦𑀸𑀳𑀁 𑀢𑀁, 𑀲𑀫𑁆𑀫, 𑀅𑀮𑀺𑀓𑀁 𑀅𑀯𑀘𑀁, 𑀢𑀼𑀘𑁆𑀙𑀓𑀁 𑀅𑀯𑀘𑀁. 𑀢𑁂𑀦 𑀳𑀺, 𑀲𑀫𑁆𑀫, 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀢𑀢𑁆𑀭𑀧𑀺 𑀔𑀦𑀦𑁆𑀢𑁄 𑀦𑀸𑀥𑀺𑀕𑀘𑁆𑀙𑁂𑀬𑁆𑀬. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀮𑀺𑀓𑀁 𑀫𑀁, 𑀲𑀫𑁆𑀫, 𑀅𑀯𑀘, 𑀢𑀼𑀘𑁆𑀙𑀓𑀁 𑀫𑀁, 𑀲𑀫𑁆𑀫, 𑀅𑀯𑀘 𑁋 𑀇𑀥 𑀔𑀦𑀸𑀳𑀻’𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦𑀸𑀳𑀁 𑀢𑀁, 𑀲𑀫𑁆𑀫, 𑀅𑀮𑀺𑀓𑀁 𑀅𑀯𑀘𑀁, 𑀢𑀼𑀘𑁆𑀙𑀓𑀁 𑀅𑀯𑀘𑀁. 𑀅𑀧𑀺 𑀘 𑀅𑀳𑀫𑁂𑀯 𑀉𑀫𑁆𑀫𑀸𑀤𑀁 𑀧𑀸𑀧𑀼𑀡𑀺𑀁 𑀘𑁂𑀢𑀲𑁄 𑀯𑀺𑀧𑀭𑀺𑀬𑀸𑀬’𑀦𑁆𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻 𑀅𑀥𑀺𑀕𑀫𑁂𑀲𑀼 𑁋 ‘𑀅𑀳𑀁 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀺, 𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑁆𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺. 𑀲𑁄 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀛𑀸𑀬𑀺𑀦𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀇𑀭𑀻𑀡𑀁 𑀆𑀧𑀚𑁆𑀚𑀢𑀺 𑀯𑀺𑀘𑀺𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀁 𑀆𑀧𑀚𑁆𑀚𑀢𑀺 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻 𑀅𑀥𑀺𑀕𑀫𑁂𑀲𑀼 𑁋 𑀅𑀳𑀁 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺…𑀧𑁂… 𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀸𑀫𑀺𑀧𑀺 𑀯𑀼𑀝𑁆𑀞𑀳𑀸𑀫𑀺𑀧𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀔𑀡𑁆𑀟𑀓𑀸𑀭𑀻 𑀙𑀺𑀤𑁆𑀤𑀓𑀸𑀭𑀻 𑀲𑀩𑀮𑀓𑀸𑀭𑀻 𑀓𑀫𑁆𑀫𑀸𑀲𑀓𑀸𑀭𑀻, 𑀦 𑀲𑀦𑁆𑀢𑀢𑀓𑀸𑀭𑀻 𑀦 𑀲𑀦𑁆𑀢𑀢𑀯𑀼𑀢𑁆𑀢𑀺 𑀲𑀻𑀮𑁂𑀲𑀼. 𑀤𑀼𑀲𑁆𑀲𑀻𑀮𑁄 𑀔𑁄 𑀅𑀬𑀫𑀸𑀬𑀲𑁆𑀫𑀸; 𑀤𑀼𑀲𑁆𑀲𑀺𑀮𑁆𑀬𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀅𑀲𑁆𑀲𑀤𑁆𑀥𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀅𑀲𑁆𑀲𑀤𑁆𑀥𑀺𑀬𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀅𑀧𑁆𑀧𑀲𑁆𑀲𑀼𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀅𑀦𑀸𑀘𑀸𑀭𑁄; 𑀅𑀧𑁆𑀧𑀲𑀘𑁆𑀘𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀩𑁆𑀩𑀘𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑁄𑀯𑀘𑀲𑁆𑀲𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀧𑀸𑀧𑀫𑀺𑀢𑁆𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀧𑀸𑀧𑀫𑀺𑀢𑁆𑀢𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀓𑀼𑀲𑀻𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀓𑁄𑀲𑀚𑁆𑀚𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀫𑀼𑀝𑁆𑀞𑀲𑁆𑀲𑀢𑀺 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀓𑀼𑀳𑀓𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀓𑁄𑀳𑀜𑁆𑀜𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀩𑁆𑀪𑀭𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑀼𑀩𑁆𑀪𑀭𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀤𑀼𑀧𑁆𑀧𑀜𑁆𑀜𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀤𑀼𑀧𑁆𑀧𑀜𑁆𑀜𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁’.

‘‘𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀅𑀥𑀺𑀫𑀸𑀦𑀲𑀼𑀢𑁆𑀢𑀁

𑁮𑁬. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺. 𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀲𑀫𑀦𑀼𑀬𑀼𑀜𑁆𑀚𑀢𑀺 𑀲𑀫𑀦𑀼𑀕𑁆𑀕𑀸𑀳𑀢𑀺 𑀲𑀫𑀦𑀼𑀪𑀸𑀲𑀢𑀺. 𑀲𑁄 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀛𑀸𑀬𑀺𑀦𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀓𑀼𑀲𑀮𑁂𑀦 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑁄 𑀇𑀭𑀻𑀡𑀁 𑀆𑀧𑀚𑁆𑀚𑀢𑀺 𑀯𑀺𑀘𑀺𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀁 𑀆𑀧𑀚𑁆𑀚𑀢𑀺 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀅𑀥𑀺𑀫𑀸𑀦𑀺𑀓𑁄 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀅𑀥𑀺𑀫𑀸𑀦𑀲𑀘𑁆𑀘𑁄, 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻, 𑀅𑀓𑀢𑁂 𑀓𑀢𑀲𑀜𑁆𑀜𑀻, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀻. 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀬𑀫𑀸𑀬𑀲𑁆𑀫𑀸 𑀦𑀺𑀲𑁆𑀲𑀸𑀬 𑀅𑀥𑀺𑀫𑀸𑀦𑀺𑀓𑁄 𑀅𑀥𑀺𑀫𑀸𑀦𑀲𑀘𑁆𑀘𑁄, 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻, 𑀅𑀓𑀢𑁂 𑀓𑀢𑀲𑀜𑁆𑀜𑀻, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀻. 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀩𑀳𑀼𑀲𑁆𑀲𑀼𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄, 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀢𑀲𑁆𑀫𑀸 𑀅𑀬𑀫𑀸𑀬𑀲𑁆𑀫𑀸 𑀅𑀥𑀺𑀫𑀸𑀦𑀺𑀓𑁄 𑀅𑀥𑀺𑀫𑀸𑀦𑀲𑀘𑁆𑀘𑁄, 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻, 𑀅𑀓𑀢𑁂 𑀓𑀢𑀲𑀜𑁆𑀜𑀻, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀻. 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺 𑁋 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀻’𑀢𑀺.

‘‘𑀢𑀫𑁂𑀦𑀁 𑀢𑀣𑀸𑀕𑀢𑁄 𑀯𑀸 𑀢𑀣𑀸𑀕𑀢𑀲𑀸𑀯𑀓𑁄 𑀯𑀸 𑀛𑀸𑀬𑀻 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀓𑀼𑀲𑀮𑁄 𑀧𑀭𑀘𑀺𑀢𑁆𑀢𑀧𑀭𑀺𑀬𑀸𑀬𑀓𑀼𑀲𑀮𑁄 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋

‘𑀅𑀪𑀺𑀚𑁆𑀛𑀸𑀮𑀼 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀅𑀪𑀺𑀚𑁆𑀛𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀅𑀪𑀺𑀚𑁆𑀛𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀩𑁆𑀬𑀸𑀧𑀦𑁆𑀦𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀣𑀺𑀦𑀫𑀺𑀤𑁆𑀥𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀉𑀤𑁆𑀥𑀢𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀉𑀤𑁆𑀥𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀉𑀤𑁆𑀥𑀘𑁆𑀘𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀯𑀺𑀘𑀺𑀓𑀺𑀘𑁆𑀙𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸; 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀓𑀫𑁆𑀫𑀸𑀭𑀸𑀫𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀓𑀫𑁆𑀫𑀭𑀢𑁄 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀓𑀫𑁆𑀫𑀸𑀭𑀸𑀫𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀪𑀲𑁆𑀲𑀸𑀭𑀸𑀫𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀪𑀲𑁆𑀲𑀭𑀢𑁄 𑀪𑀲𑁆𑀲𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀪𑀲𑁆𑀲𑀸𑀭𑀸𑀫𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀦𑀺𑀤𑁆𑀤𑀸𑀭𑀸𑀫𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀦𑀺𑀤𑁆𑀤𑀸𑀭𑀢𑁄 𑀦𑀺𑀤𑁆𑀤𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀦𑀺𑀤𑁆𑀤𑀸𑀭𑀸𑀫𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀲𑀗𑁆𑀕𑀡𑀺𑀓𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄. 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁.

‘𑀲𑀢𑀺 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀉𑀢𑁆𑀢𑀭𑀺 𑀓𑀭𑀡𑀻𑀬𑁂 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀦𑁆𑀦𑁄. 𑀅𑀦𑁆𑀢𑀭𑀸 𑀯𑁄𑀲𑀸𑀦𑀕𑀫𑀦𑀁 𑀔𑁄 𑀧𑀦 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀭𑀺𑀳𑀸𑀦𑀫𑁂𑀢𑀁’.

‘‘𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢𑀸𑀯𑀼𑀲𑁄, 𑀪𑀺𑀓𑁆𑀔𑀼 ‘𑀇𑀫𑁂 𑀤𑀲 𑀥𑀫𑁆𑀫𑁂 𑀧𑀳𑀸𑀬 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀦𑀧𑁆𑀧𑀺𑀬𑀲𑀼𑀢𑁆𑀢𑀁

𑁮𑁭. 𑀢𑀢𑁆𑀭 𑀔𑁄 𑀪𑀕𑀯𑀸 𑀓𑀸𑀮𑀗𑁆𑀓𑀢𑀁 𑀪𑀺𑀓𑁆𑀔𑀼𑀁 [𑀓𑀮𑀦𑁆𑀤𑀓𑀁 𑀪𑀺𑀓𑁆𑀔𑀼𑀁 (𑀲𑀻.), 𑀓𑀸𑀴𑀓𑀪𑀺𑀓𑁆𑀔𑀼𑀁 (𑀲𑁆𑀬𑀸.)] 𑀆𑀭𑀩𑁆𑀪 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀓𑀭𑀡𑀺𑀓𑁄 𑀳𑁄𑀢𑀺, 𑀅𑀥𑀺𑀓𑀭𑀡𑀲𑀫𑀣𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀓𑀭𑀡𑀺𑀓𑁄 𑀳𑁄𑀢𑀺 𑀅𑀥𑀺𑀓𑀭𑀡𑀲𑀫𑀣𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀲𑁆𑀲 [𑀲𑀺𑀓𑁆𑀔𑀸𑀓𑀸𑀫𑀲𑁆𑀲 (𑀓.)] 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺, 𑀇𑀘𑁆𑀙𑀸𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀇𑀘𑁆𑀙𑀸𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺, 𑀓𑁄𑀥𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁄𑀥𑀦𑁄 𑀳𑁄𑀢𑀺 𑀓𑁄𑀥𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺, 𑀫𑀓𑁆𑀔𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀓𑁆𑀔𑀻 𑀳𑁄𑀢𑀺 𑀫𑀓𑁆𑀔𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀞𑁄 𑀳𑁄𑀢𑀺, 𑀲𑀸𑀞𑁂𑀬𑁆𑀬𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀞𑁄 𑀳𑁄𑀢𑀺 𑀲𑀸𑀞𑁂𑀬𑁆𑀬𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀬𑀸𑀯𑀻 𑀳𑁄𑀢𑀺, 𑀫𑀸𑀬𑀸𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀸𑀬𑀸𑀯𑀻 𑀳𑁄𑀢𑀺 𑀫𑀸𑀬𑀸𑀯𑀺𑀦𑀬𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀁 𑀦 𑀦𑀺𑀲𑀸𑀫𑀓𑀚𑀸𑀢𑀺𑀓𑁄 𑀳𑁄𑀢𑀺, 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀁 𑀦 𑀦𑀺𑀲𑀸𑀫𑀓𑀚𑀸𑀢𑀺𑀓𑁄 𑀳𑁄𑀢𑀺 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺, 𑀧𑀝𑀺𑀲𑀮𑁆𑀮𑀸𑀦𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀦 𑀧𑀝𑀺𑀲𑀦𑁆𑀣𑀸𑀭𑀓𑁄 [𑀧𑀝𑀺𑀲𑀦𑁆𑀥𑀸𑀭𑀓𑁄 (𑀓.)] 𑀳𑁄𑀢𑀺, 𑀧𑀝𑀺𑀲𑀦𑁆𑀣𑀸𑀭𑀓𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀦 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺 𑀧𑀝𑀺𑀲𑀦𑁆𑀣𑀸𑀭𑀓𑀲𑁆𑀲 𑀦 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀦 𑀧𑀺𑀬𑀢𑀸𑀬 𑀦 𑀕𑀭𑀼𑀢𑀸𑀬 𑀦 𑀪𑀸𑀯𑀦𑀸𑀬 𑀦 𑀲𑀸𑀫𑀜𑁆𑀜𑀸𑀬 𑀦 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 [𑀕𑀭𑀼𑀓𑀭𑁂𑀬𑁆𑀬𑀼𑀁 (𑀲𑀻. 𑀲𑁆𑀬𑀸.)] 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀦 𑀘𑁂𑀯 𑀲𑀓𑁆𑀓𑀭𑁄𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺 [𑀕𑀭𑀼𑀓𑀭𑁄𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀦 𑀫𑀸𑀦𑁂𑀦𑁆𑀢𑀺 𑀦 𑀧𑀽𑀚𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀧𑁆𑀧𑀳𑀻𑀦𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀔𑀴𑀼𑀗𑁆𑀓𑀲𑁆𑀲 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀫𑀦𑀼𑀲𑁆𑀲𑀸 𑀆𑀚𑀸𑀦𑀻𑀬𑀝𑁆𑀞𑀸𑀦𑁂 𑀞𑀧𑁂𑀬𑁆𑀬𑀼𑀁, 𑀆𑀚𑀸𑀦𑀻𑀬𑀪𑁄𑀚𑀦𑀜𑁆𑀘 𑀪𑁄𑀚𑁂𑀬𑁆𑀬𑀼𑀁, 𑀆𑀚𑀸𑀦𑀻𑀬𑀧𑀭𑀺𑀫𑀚𑁆𑀚𑀦𑀜𑁆𑀘 𑀧𑀭𑀺𑀫𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀫𑀦𑀼𑀲𑁆𑀲𑀸 𑀦 𑀘𑁂𑀯 𑀆𑀚𑀸𑀦𑀻𑀬𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀺 𑀦 𑀘 𑀆𑀚𑀸𑀦𑀻𑀬𑀪𑁄𑀚𑀦𑀁 𑀪𑁄𑀚𑁂𑀦𑁆𑀢𑀺 𑀦 𑀘 𑀆𑀚𑀸𑀦𑀻𑀬𑀧𑀭𑀺𑀫𑀚𑁆𑀚𑀦𑀁 𑀧𑀭𑀺𑀫𑀚𑁆𑀚𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀫𑀦𑀼𑀲𑁆𑀲𑀸 𑀢𑀸𑀦𑀺 𑀲𑀸𑀞𑁂𑀬𑁆𑀬𑀸𑀦𑀺 𑀓𑀽𑀝𑁂𑀬𑁆𑀬𑀸𑀦𑀺 𑀚𑀺𑀫𑁆𑀳𑁂𑀬𑁆𑀬𑀸𑀦𑀺 𑀯𑀗𑁆𑀓𑁂𑀬𑁆𑀬𑀸𑀦𑀺 𑀅𑀧𑁆𑀧𑀳𑀻𑀦𑀸𑀦𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀦 𑀘𑁂𑀯 𑀲𑀓𑁆𑀓𑀭𑁄𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀦 𑀫𑀸𑀦𑁂𑀦𑁆𑀢𑀺 𑀦 𑀧𑀽𑀚𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀧𑁆𑀧𑀳𑀻𑀦𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀺.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀅𑀥𑀺𑀓𑀭𑀡𑀺𑀓𑁄 𑀳𑁄𑀢𑀺, 𑀅𑀥𑀺𑀓𑀭𑀡𑀲𑀫𑀣𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀅𑀥𑀺𑀓𑀭𑀡𑀺𑀓𑁄 𑀳𑁄𑀢𑀺 𑀅𑀥𑀺𑀓𑀭𑀡𑀲𑀫𑀣𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀧𑀺𑀬𑀢𑀸𑀬 𑀕𑀭𑀼𑀢𑀸𑀬 𑀪𑀸𑀯𑀦𑀸𑀬 𑀲𑀸𑀫𑀜𑁆𑀜𑀸𑀬 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀧𑀺𑀬𑀢𑀸𑀬 𑀕𑀭𑀼𑀢𑀸𑀬 𑀪𑀸𑀯𑀦𑀸𑀬 𑀲𑀸𑀫𑀜𑁆𑀜𑀸𑀬 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺, 𑀇𑀘𑁆𑀙𑀸𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀇𑀘𑁆𑀙𑀸𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺, 𑀓𑁄𑀥𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀓𑁄𑀥𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀫𑀓𑁆𑀔𑀻 𑀳𑁄𑀢𑀺, 𑀫𑀓𑁆𑀔𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀫𑀓𑁆𑀔𑀻 𑀳𑁄𑀢𑀺 𑀫𑀓𑁆𑀔𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀞𑁄 𑀳𑁄𑀢𑀺, 𑀲𑀸𑀞𑁂𑀬𑁆𑀬𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑀞𑁄 𑀳𑁄𑀢𑀺 𑀲𑀸𑀞𑁂𑀬𑁆𑀬𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀫𑀸𑀬𑀸𑀯𑀻 𑀳𑁄𑀢𑀺, 𑀫𑀸𑀬𑀸𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀫𑀸𑀬𑀸𑀯𑀻 𑀳𑁄𑀢𑀺 𑀫𑀸𑀬𑀸𑀯𑀺𑀦𑀬𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀁 𑀦𑀺𑀲𑀸𑀫𑀓𑀚𑀸𑀢𑀺𑀓𑁄 𑀳𑁄𑀢𑀺, 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀁 𑀦𑀺𑀲𑀸𑀫𑀓𑀚𑀸𑀢𑀺𑀓𑁄 𑀳𑁄𑀢𑀺 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺, 𑀧𑀝𑀺𑀲𑀮𑁆𑀮𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄…𑀧𑁂… 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺, 𑀧𑀝𑀺𑀲𑀦𑁆𑀣𑀸𑀭𑀓𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺 𑀧𑀝𑀺𑀲𑀦𑁆𑀣𑀸𑀭𑀓𑀲𑁆𑀲 𑀯𑀡𑁆𑀡𑀯𑀸𑀤𑀻, 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀧𑀺𑀬𑀢𑀸𑀬 𑀕𑀭𑀼𑀢𑀸𑀬 𑀪𑀸𑀯𑀦𑀸𑀬 𑀲𑀸𑀫𑀜𑁆𑀜𑀸𑀬 𑀏𑀓𑀻𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀏𑀯𑀭𑀽𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀲𑁆𑀲 𑀅𑀲𑁆𑀲𑀸𑀚𑀸𑀦𑀻𑀬𑀲𑁆𑀲 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀫𑀦𑀼𑀲𑁆𑀲𑀸 𑀆𑀚𑀸𑀦𑀻𑀬𑀝𑁆𑀞𑀸𑀦𑁂 𑀞𑀧𑁂𑀬𑁆𑀬𑀼𑀁, 𑀆𑀚𑀸𑀦𑀻𑀬𑀪𑁄𑀚𑀦𑀜𑁆𑀘 𑀪𑁄𑀚𑁂𑀬𑁆𑀬𑀼𑀁, 𑀆𑀚𑀸𑀦𑀻𑀬𑀧𑀭𑀺𑀫𑀚𑁆𑀚𑀦𑀜𑁆𑀘 𑀧𑀭𑀺𑀫𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀫𑀦𑀼𑀲𑁆𑀲𑀸 𑀆𑀚𑀸𑀦𑀻𑀬𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑀺 𑀆𑀚𑀸𑀦𑀻𑀬𑀪𑁄𑀚𑀦𑀜𑁆𑀘 𑀪𑁄𑀚𑁂𑀦𑁆𑀢𑀺 𑀆𑀚𑀸𑀦𑀻𑀬𑀧𑀭𑀺𑀫𑀚𑁆𑀚𑀦𑀜𑁆𑀘 𑀧𑀭𑀺𑀫𑀚𑁆𑀚𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀫𑀦𑀼𑀲𑁆𑀲𑀸 𑀢𑀸𑀦𑀺 𑀲𑀸𑀞𑁂𑀬𑁆𑀬𑀸𑀦𑀺 𑀓𑀽𑀝𑁂𑀬𑁆𑀬𑀸𑀦𑀺 𑀚𑀺𑀫𑁆𑀳𑁂𑀬𑁆𑀬𑀸𑀦𑀺 𑀯𑀗𑁆𑀓𑁂𑀬𑁆𑀬𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁂𑀬𑁆𑀬𑀼𑀁 𑀕𑀭𑀼𑀁 𑀓𑀭𑁂𑀬𑁆𑀬𑀼𑀁 𑀫𑀸𑀦𑁂𑀬𑁆𑀬𑀼𑀁 𑀧𑀽𑀚𑁂𑀬𑁆𑀬𑀼’𑀦𑁆𑀢𑀺, 𑀅𑀣 𑀔𑁄 𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀢𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀓𑁆𑀓𑁄𑀲𑀓𑀲𑀼𑀢𑁆𑀢𑀁

𑁮𑁮. ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑀻 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀞𑀸𑀦𑀫𑁂𑀢𑀁 𑀅𑀯𑀓𑀸𑀲𑁄 [𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 (𑀲𑀻. 𑀲𑁆𑀬𑀸. 𑀧𑀻.)] 𑀬𑀁 𑀲𑁄 𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑁂𑀬𑁆𑀬 [𑀦 𑀦𑀺𑀕𑀘𑁆𑀙𑁂𑀬𑁆𑀬 (𑀲𑀻. 𑀲𑁆𑀬𑀸. 𑀧𑀻.)]. 𑀓𑀢𑀫𑁂𑀲𑀁 𑀤𑀲𑀦𑁆𑀦𑀁? 𑀅𑀦𑀥𑀺𑀕𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀧𑀭𑀺𑀳𑀸𑀬𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦 𑀯𑁄𑀤𑀸𑀬𑀦𑁆𑀢𑀺, 𑀲𑀤𑁆𑀥𑀫𑁆𑀫𑁂𑀲𑀼 𑀯𑀸 𑀅𑀥𑀺𑀫𑀸𑀦𑀺𑀓𑁄 𑀳𑁄𑀢𑀺 𑀅𑀦𑀪𑀺𑀭𑀢𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀕𑀸𑀴𑁆𑀳𑀁 𑀯𑀸 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀉𑀫𑁆𑀫𑀸𑀤𑀁 𑀯𑀸 𑀧𑀸𑀧𑀼𑀡𑀸𑀢𑀺 𑀘𑀺𑀢𑁆𑀢𑀓𑁆𑀔𑁂𑀧𑀁, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑀻 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀞𑀸𑀦𑀫𑁂𑀢𑀁 𑀅𑀯𑀓𑀸𑀲𑁄 𑀬𑀁 𑀲𑁄 𑀇𑀫𑁂𑀲𑀁 𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀁

𑁮𑁯. [𑀲𑀁. 𑀦𑀺. 𑁧.𑁧𑁮𑁧; 𑀲𑀼. 𑀦𑀺. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢] 𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀸𑀧𑀺𑀘𑁆𑀙𑀸, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺. ‘‘𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓, 𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓! 𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀜𑁆𑀘𑀸𑀧𑀺 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀤𑁆𑀥𑀸𑀬𑀺𑀓𑁄 𑀧𑀘𑁆𑀘𑀬𑀺𑀓𑁄, 𑀅𑀣 𑀔𑁄 𑀧𑀸𑀧𑀺𑀘𑁆𑀙𑀸𑀯 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺. ‘‘𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓, 𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓! 𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀜𑁆𑀘𑀸𑀧𑀺 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀤𑁆𑀥𑀸𑀬𑀺𑀓𑁄 𑀧𑀘𑁆𑀘𑀬𑀺𑀓𑁄, 𑀅𑀣 𑀔𑁄 𑀧𑀸𑀧𑀺𑀘𑁆𑀙𑀸𑀯 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺. ‘‘𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓, 𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓! 𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺.

𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀘 𑀓𑁄𑀓𑀸𑀮𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀲𑀧𑀫𑀢𑁆𑀢𑀻𑀳𑀺 𑀧𑀻𑀴𑀓𑀸𑀳𑀺 𑀲𑀩𑁆𑀩𑁄 𑀓𑀸𑀬𑁄 𑀨𑀼𑀝𑁄 𑀅𑀳𑁄𑀲𑀺. 𑀲𑀸𑀲𑀧𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀫𑀼𑀕𑁆𑀕𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀫𑀼𑀕𑁆𑀕𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑀮𑀸𑀬𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀓𑀮𑀸𑀬𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑁄𑀮𑀝𑁆𑀞𑀺𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀓𑁄𑀮𑀝𑁆𑀞𑀺𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑁄𑀮𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀓𑁄𑀮𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀆𑀫𑀮𑀓𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀆𑀫𑀮𑀓𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 (𑀢𑀺𑀡𑁆𑀟𑀼𑀓𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀢𑀺𑀡𑁆𑀟𑀼𑀓𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸,) [𑀲𑀁. 𑀦𑀺. 𑁧.𑁧𑁮𑁧; 𑀲𑀼. 𑀦𑀺. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢 𑀦𑀢𑁆𑀣𑀺] 𑀩𑁂𑀴𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀩𑁂𑀴𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀩𑀺𑀮𑁆𑀮𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁, 𑀩𑀺𑀮𑁆𑀮𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀧𑀪𑀺𑀚𑁆𑀚𑀺𑀁𑀲𑀼, 𑀧𑀼𑀩𑁆𑀩𑀜𑁆𑀘 𑀮𑁄𑀳𑀺𑀢𑀜𑁆𑀘 𑀧𑀕𑁆𑀖𑀭𑀺𑀁𑀲𑀼. 𑀲𑁄 𑀲𑀼𑀤𑀁 𑀓𑀤𑀮𑀺𑀧𑀢𑁆𑀢𑁂𑀲𑀼 𑀲𑁂𑀢𑀺 𑀫𑀘𑁆𑀙𑁄𑀯 𑀯𑀺𑀲𑀕𑀺𑀮𑀺𑀢𑁄.

𑀅𑀣 𑀔𑁄 𑀢𑀼𑀭𑀽 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 [𑀢𑀼𑀤𑀼𑀧𑁆𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 (𑀲𑀻. 𑀧𑀻.), 𑀢𑀼𑀤𑀺 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 (𑀲𑁆𑀬𑀸.), 𑀢𑀼𑀭𑀺 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 (𑀓.) 𑀲𑀁. 𑀦𑀺. 𑁧.𑁧𑁮𑁦] 𑀬𑁂𑀦 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑁂𑀳𑀸𑀲𑁂 𑀞𑀢𑁆𑀯𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺. ‘‘𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄’’𑀢𑀺? ‘‘𑀅𑀳𑀁 𑀢𑀼𑀭𑀽 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸’’𑀢𑀺. ‘‘𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑀸𑀕𑀸𑀫𑀻 𑀩𑁆𑀬𑀸𑀓𑀢𑁄, 𑀅𑀣 𑀓𑀺𑀜𑁆𑀘𑀭𑀳𑀺 𑀇𑀥𑀸𑀕𑀢𑁄? 𑀧𑀲𑁆𑀲 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥’’𑀦𑁆𑀢𑀺.

𑀅𑀣 𑀔𑁄 𑀢𑀼𑀭𑀽 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀞𑀸𑀭𑀻 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁.

‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺, 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁, 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺.

‘‘𑀅𑀧𑁆𑀧𑀫𑀢𑁆𑀢𑀓𑁄 𑀅𑀬𑀁 𑀓𑀮𑀺, 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄;

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸, 𑀅𑀬𑀫𑁂𑀯 𑀫𑀳𑀢𑁆𑀢𑀭𑁄 𑀓𑀮𑀺;

𑀬𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑀽𑀲𑀬𑁂.

‘‘𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀙𑀢𑁆𑀢𑀺𑀁𑀲𑀢𑀺 𑀧𑀜𑁆𑀘 𑀘 𑀅𑀩𑁆𑀩𑀼𑀤𑀸𑀦𑀺;

𑀬𑀫𑀭𑀺𑀬𑀕𑀭𑀳𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓’’𑀦𑁆𑀢𑀺.

𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀗𑁆𑀓𑀢𑁄 𑀘 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄𑀓𑀸𑀮𑀺𑀓𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄. 𑀓𑀸𑀮𑀗𑁆𑀓𑀢𑁄 𑀘, 𑀪𑀦𑁆𑀢𑁂, 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺. 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀫𑀁 𑀏𑀢𑀤𑀯𑁄𑀘 𑁋 ‘𑀓𑁄𑀓𑀸𑀮𑀺𑀓𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄; 𑀓𑀸𑀮𑀗𑁆𑀓𑀢𑁄 𑀘, 𑀪𑀦𑁆𑀢𑁂, 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.