𑁪. 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀲𑀼𑀢𑁆𑀢𑀁

𑁬𑁪. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸? 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲, 𑀓𑁄𑀮𑀁𑀓𑁄𑀮𑀲𑁆𑀲, 𑀏𑀓𑀩𑀻𑀚𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀤𑁆𑀥𑀁𑀲𑁄𑀢𑀲𑁆𑀲 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺. 𑀘𑀢𑀼𑀢𑁆𑀣𑀁.