(𑁭) 𑁨. 𑀬𑀫𑀓𑀯𑀕𑁆𑀕𑁄

𑁧. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀁

𑁬𑁧. ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬 𑁋 ‘𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑁋 ‘𑀇𑀤𑀧𑁆𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’𑀢𑀺.

‘‘𑀅𑀯𑀺𑀚𑁆𑀚𑀫𑁆𑀧𑀸𑀳𑀁 [𑀅𑀯𑀺𑀚𑁆𑀚𑀫𑁆𑀧𑀳𑀁 (𑀲𑀻. 𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀯𑀺𑀚𑁆𑀚𑀸𑀬? ‘𑀧𑀜𑁆𑀘 𑀦𑀻𑀯𑀭𑀡𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀜𑁆𑀘𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀻𑀯𑀭𑀡𑁂 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁? ‘𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀢𑀻𑀡𑀺𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀸𑀳𑀸𑀭𑀸𑀦𑀺 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀸𑀦𑀺. 𑀓𑁄 𑀘𑀸𑀳𑀸𑀭𑁄 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁? ‘𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀲𑁆𑀲? ‘𑀅𑀲𑀢𑀸𑀲𑀫𑁆𑀧𑀚𑀜𑁆𑀜’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀲𑁆𑀲? ‘𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲? ‘𑀅𑀲𑁆𑀲𑀤𑁆𑀥𑀺𑀬’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑁆𑀲𑀤𑁆𑀥𑀺𑀬𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑁆𑀲𑀤𑁆𑀥𑀺𑀬𑀲𑁆𑀲? ‘𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲? ‘𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀭𑀺𑀧𑀽𑀭𑀸 𑀅𑀯𑀺𑀚𑁆𑀚𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀏𑀯𑀫𑁂𑀢𑀺𑀲𑁆𑀲𑀸 𑀅𑀯𑀺𑀚𑁆𑀚𑀸𑀬 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 ( ) [(𑀕𑀮𑀕𑀮𑀸𑀬𑀦𑁆𑀢𑁂) (𑀲𑀻.), (𑀕𑀴𑀕𑀴𑀸𑀬𑀦𑁆𑀢𑁂) (𑀲𑁆𑀬𑀸.)] 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺, 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂 [𑀓𑀼𑀲𑁆𑀲𑀼𑀩𑁆𑀪𑁂 (𑀲𑀻.), 𑀓𑀼𑀲𑀼𑀩𑁆𑀪𑁂 (𑀲𑁆𑀬𑀸.), 𑀓𑀼𑀲𑁄𑀫𑁆𑀪𑁂 (𑀓.) 𑀅. 𑀦𑀺. 𑁩.𑁯𑁬] 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀓𑀼𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀫𑀳𑀸𑀲𑁄𑀩𑁆𑀪𑁂 [𑀫𑀳𑀸𑀲𑁄𑀫𑁆𑀪𑁂 (𑀓.)] 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀲𑀫𑀼𑀤𑁆𑀤𑀁 𑀲𑀸𑀕𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀲𑀸𑀕𑀭𑀲𑁆𑀲 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀭𑀺𑀧𑀽𑀭𑀸 𑀅𑀯𑀺𑀚𑁆𑀚𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀢𑀺𑀲𑁆𑀲𑀸 𑀅𑀯𑀺𑀚𑁆𑀚𑀸𑀬 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑀸? ‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀢𑁆𑀢𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑁂 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁? ‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀘𑀢𑁆𑀢𑀸𑀭𑁄𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑁂 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁? ‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀢𑀻𑀡𑀺𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀼𑀘𑀭𑀺𑀢𑀸𑀦𑀺 𑀲𑀸𑀳𑀸𑀭𑀸𑀦𑀺 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀸𑀦𑀺. 𑀓𑁄 𑀘𑀸𑀳𑀸𑀭𑁄 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁? ‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲? ‘𑀲𑀢𑀺𑀲𑀫𑁆𑀧𑀚𑀜𑁆𑀜’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲? ‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲? ‘𑀲𑀤𑁆𑀥𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀤𑁆𑀥𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀤𑁆𑀥𑀸𑀬? ‘𑀲𑀤𑁆𑀥𑀫𑁆𑀫𑀲𑁆𑀲𑀯𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲? ‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀲𑀤𑁆𑀥𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀤𑁆𑀥𑀸 𑀧𑀭𑀺𑀧𑀽𑀭𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀭𑀺𑀧𑀽𑀭𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀧𑀭𑀺𑀧𑀽𑀭𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀢𑀺𑀲𑁆𑀲𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑀸 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺, 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀫𑀳𑀸𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀲𑀫𑀼𑀤𑁆𑀤𑀁 𑀲𑀸𑀕𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀲𑀸𑀕𑀭𑀲𑁆𑀲 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀲𑀤𑁆𑀥𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀤𑁆𑀥𑀸 𑀧𑀭𑀺𑀧𑀽𑀭𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀭𑀺𑀧𑀽𑀭𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀧𑀭𑀺𑀧𑀽𑀭𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀢𑀺𑀲𑁆𑀲𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑀸 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀻’’𑀢𑀺. 𑀧𑀞𑀫𑀁.

𑁨. 𑀢𑀡𑁆𑀳𑀸𑀲𑀼𑀢𑁆𑀢𑀁

𑁬𑁨. ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬 𑁋 ‘𑀇𑀢𑁄 𑀧𑀼𑀩𑁆𑀩𑁂 𑀪𑀯𑀢𑀡𑁆𑀳𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺, 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑁋 ‘𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑀢𑀡𑁆𑀳𑀸’𑀢𑀺.

‘‘𑀪𑀯𑀢𑀡𑁆𑀳𑀸𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀪𑀯𑀢𑀡𑁆𑀳𑀸𑀬? ‘𑀅𑀯𑀺𑀚𑁆𑀚𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀯𑀺𑀚𑁆𑀚𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀯𑀺𑀚𑁆𑀚𑀸𑀬? ‘𑀧𑀜𑁆𑀘 𑀦𑀻𑀯𑀭𑀡𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀜𑁆𑀘 𑀦𑀻𑀯𑀭𑀡𑁂𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁? ‘𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀢𑀻𑀡𑀺𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀸𑀳𑀸𑀭𑀸𑀦𑀺 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀸𑀦𑀺. 𑀓𑁄 𑀘𑀸𑀳𑀸𑀭𑁄 𑀢𑀺𑀡𑁆𑀡𑀦𑁆𑀦𑀁 𑀤𑀼𑀘𑁆𑀘𑀭𑀺𑀢𑀸𑀦𑀁? ‘𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀲𑁆𑀲? ‘𑀅𑀲𑀢𑀸𑀲𑀫𑁆𑀧𑀚𑀜𑁆𑀜’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑀢𑀸 𑀲𑀫𑁆𑀧𑀚𑀜𑁆𑀜𑀲𑁆𑀲? ‘𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲? ‘𑀅𑀲𑁆𑀲𑀤𑁆𑀥𑀺𑀬’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑁆𑀲𑀤𑁆𑀥𑀺𑀬𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑁆𑀲𑀤𑁆𑀥𑀺𑀬𑀲𑁆𑀲? ‘𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲? ‘𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀭𑀺𑀧𑀽𑀭𑀸 𑀅𑀯𑀺𑀚𑁆𑀚𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀅𑀯𑀺𑀚𑁆𑀚𑀸 𑀧𑀭𑀺𑀧𑀽𑀭𑀸 𑀪𑀯𑀢𑀡𑁆𑀳𑀁 𑀧𑀭𑀺𑀧𑀽𑀭𑁂𑀢𑀺; 𑀏𑀯𑀫𑁂𑀢𑀺𑀲𑁆𑀲𑀸 𑀪𑀯𑀢𑀡𑁆𑀳𑀸𑀬 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑀁 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑁆𑀲𑀤𑁆𑀥𑀺𑀬𑀁 𑀧𑀭𑀺𑀧𑀽𑀭𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀭𑀺𑀧𑀽𑀭𑁄 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺, 𑀅𑀲𑀢𑀸𑀲𑀫𑁆𑀧𑀚𑀜𑁆𑀜𑀁 𑀧𑀭𑀺𑀧𑀽𑀭𑀁 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀅𑀲𑀁𑀯𑀭𑁄 𑀧𑀭𑀺𑀧𑀽𑀭𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺, 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀭𑀺𑀧𑀽𑀭𑀸 𑀅𑀯𑀺𑀚𑁆𑀚𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀅𑀯𑀺𑀚𑁆𑀚𑀸 𑀧𑀭𑀺𑀧𑀽𑀭𑀸 𑀪𑀯𑀢𑀡𑁆𑀳𑀁 𑀧𑀭𑀺𑀧𑀽𑀭𑁂𑀢𑀺; 𑀏𑀯𑀫𑁂𑀢𑀺𑀲𑁆𑀲𑀸 𑀪𑀯𑀢𑀡𑁆𑀳𑀸𑀬 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺.

‘‘𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑀸? ‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀢𑁆𑀢𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀩𑁄𑀚𑁆𑀛𑀗𑁆𑀕𑁂 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁? ‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀘𑀢𑁆𑀢𑀸𑀭𑁄𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑁂 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘𑀸𑀳𑀸𑀭𑁄 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁? ‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀢𑀻𑀡𑀺𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀼𑀘𑀭𑀺𑀢𑀸𑀦𑀺 𑀲𑀸𑀳𑀸𑀭𑀸𑀦𑀺 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀸𑀦𑀺. 𑀓𑁄 𑀘𑀸𑀳𑀸𑀭𑁄 𑀢𑀺𑀡𑁆𑀡𑀦𑁆𑀦𑀁 𑀲𑀼𑀘𑀭𑀺𑀢𑀸𑀦𑀁? ‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲? ‘𑀲𑀢𑀺𑀲𑀫𑁆𑀧𑀚𑀜𑁆𑀜’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲? ‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲? ‘𑀲𑀤𑁆𑀥𑀸’𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀤𑁆𑀥𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀤𑁆𑀥𑀸𑀬? ‘𑀲𑀤𑁆𑀥𑀫𑁆𑀫𑀲𑁆𑀲𑀯𑀦’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘𑀸𑀳𑀸𑀭𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲? ‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄’𑀢𑀺𑀲𑁆𑀲 𑀯𑀘𑀦𑀻𑀬𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀲𑀸𑀕𑀭𑀲𑁆𑀲 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀧𑀭𑀺𑀧𑀽𑀭𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀏𑀯𑀫𑁂𑀢𑀺𑀲𑁆𑀲𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑀸 𑀆𑀳𑀸𑀭𑁄 𑀳𑁄𑀢𑀺, 𑀏𑀯𑀜𑁆𑀘 𑀧𑀸𑀭𑀺𑀧𑀽𑀭𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀦𑀺𑀝𑁆𑀞𑀗𑁆𑀕𑀢𑀲𑀼𑀢𑁆𑀢𑀁

𑁬𑁩. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀦𑀺𑀝𑁆𑀞𑀁 𑀕𑀢𑀸 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸. 𑀢𑁂𑀲𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸? 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲, 𑀓𑁄𑀮𑀁𑀓𑁄𑀮𑀲𑁆𑀲, 𑀏𑀓𑀩𑀻𑀚𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀤𑁆𑀥𑀁𑀲𑁄𑀢𑀲𑁆𑀲 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀦𑀺𑀝𑁆𑀞𑀁 𑀕𑀢𑀸, 𑀲𑀩𑁆𑀩𑁂 𑀢𑁂 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸. 𑀢𑁂𑀲𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺. 𑀢𑀢𑀺𑀬𑀁.

𑁪. 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀲𑀼𑀢𑁆𑀢𑀁

𑁬𑁪. ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸, 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸? 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲, 𑀓𑁄𑀮𑀁𑀓𑁄𑀮𑀲𑁆𑀲, 𑀏𑀓𑀩𑀻𑀚𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀬𑁄 𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀭𑀳𑀸 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸? 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀉𑀤𑁆𑀥𑀁𑀲𑁄𑀢𑀲𑁆𑀲 𑀅𑀓𑀦𑀺𑀝𑁆𑀞𑀕𑀸𑀫𑀺𑀦𑁄 𑁋 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸. 𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀫𑀬𑀺 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸 𑀲𑀩𑁆𑀩𑁂 𑀢𑁂 𑀲𑁄𑀢𑀸𑀧𑀦𑁆𑀦𑀸. 𑀢𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀯𑀺𑀳𑀸𑀬 𑀦𑀺𑀝𑁆𑀞𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀲𑀼𑀔𑀲𑀼𑀢𑁆𑀢𑀁

𑁬𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀦𑀸𑀮𑀓𑀕𑀸𑀫𑀓𑁂. 𑀅𑀣 𑀔𑁄 𑀲𑀸𑀫𑀡𑁆𑀟𑀓𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀸𑀫𑀡𑁆𑀟𑀓𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀔𑀁, 𑀓𑀺𑀁 𑀤𑀼𑀓𑁆𑀔’’𑀦𑁆𑀢𑀺? ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀸, 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺 𑀲𑀼𑀔𑀸. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀅𑀕𑁆𑀕𑀺𑀲𑀫𑁆𑀨𑀲𑁆𑀲𑁄 𑀤𑀡𑁆𑀟𑀲𑀫𑁆𑀨𑀲𑁆𑀲𑁄 𑀲𑀢𑁆𑀣𑀲𑀫𑁆𑀨𑀲𑁆𑀲𑁄 𑀜𑀸𑀢𑀻𑀧𑀺 𑀫𑀺𑀢𑁆𑀢𑀸𑀧𑀺 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀭𑁄𑀲𑁂𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀧𑀸𑀝𑀺𑀓𑀗𑁆𑀔𑀁. 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀲𑀼𑀔𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀦 𑀲𑀻𑀢𑀁 𑀦 𑀉𑀡𑁆𑀳𑀁 𑀦 𑀚𑀺𑀖𑀘𑁆𑀙𑀸 𑀦 𑀧𑀺𑀧𑀸𑀲𑀸 𑀦 𑀉𑀘𑁆𑀘𑀸𑀭𑁄 𑀦 𑀧𑀲𑁆𑀲𑀸𑀯𑁄 𑀦 𑀅𑀕𑁆𑀕𑀺𑀲𑀫𑁆𑀨𑀲𑁆𑀲𑁄 𑀦 𑀤𑀡𑁆𑀟𑀲𑀫𑁆𑀨𑀲𑁆𑀲𑁄 𑀦 𑀲𑀢𑁆𑀣𑀲𑀫𑁆𑀨𑀲𑁆𑀲𑁄 𑀜𑀸𑀢𑀻𑀧𑀺 𑀫𑀺𑀢𑁆𑀢𑀸𑀧𑀺 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀦 𑀭𑁄𑀲𑁂𑀦𑁆𑀢𑀺. 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀲𑀼𑀔𑀁 𑀧𑀸𑀝𑀺𑀓𑀗𑁆𑀔’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀼𑀔𑀲𑀼𑀢𑁆𑀢𑀁

𑁬𑁬. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀦𑀸𑀮𑀓𑀕𑀸𑀫𑀓𑁂. 𑀅𑀣 𑀔𑁄 𑀲𑀸𑀫𑀡𑁆𑀟𑀓𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀸𑀫𑀡𑁆𑀟𑀓𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀼𑀔𑀁, 𑀓𑀺𑀁 𑀤𑀼𑀓𑁆𑀔’’𑀦𑁆𑀢𑀺? ‘‘𑀅𑀦𑀪𑀺𑀭𑀢𑀺 𑀔𑁄, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀤𑀼𑀓𑁆𑀔𑀸, 𑀅𑀪𑀺𑀭𑀢𑀺 𑀲𑀼𑀔𑀸. 𑀅𑀦𑀪𑀺𑀭𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀕𑀘𑁆𑀙𑀦𑁆𑀢𑁄𑀧𑀺 𑀲𑀼𑀔𑀁 𑀲𑀸𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀞𑀺𑀢𑁄𑀧𑀺… 𑀦𑀺𑀲𑀺𑀦𑁆𑀦𑁄𑀧𑀺… 𑀲𑀬𑀸𑀦𑁄𑀧𑀺… 𑀕𑀸𑀫𑀕𑀢𑁄𑀧𑀺… 𑀅𑀭𑀜𑁆𑀜𑀕𑀢𑁄𑀧𑀺… 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺… 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺… 𑀅𑀩𑁆𑀪𑁄𑀓𑀸𑀲𑀕𑀢𑁄𑀧𑀺… 𑀪𑀺𑀓𑁆𑀔𑀼𑀫𑀚𑁆𑀛𑀕𑀢𑁄𑀧𑀺 𑀲𑀼𑀔𑀁 𑀲𑀸𑀢𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀅𑀦𑀪𑀺𑀭𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀧𑀸𑀝𑀺𑀓𑀗𑁆𑀔𑀁.

‘‘𑀅𑀪𑀺𑀭𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀲𑀼𑀔𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀕𑀘𑁆𑀙𑀦𑁆𑀢𑁄𑀧𑀺 𑀲𑀼𑀔𑀁 𑀲𑀸𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀞𑀺𑀢𑁄𑀧𑀺… 𑀦𑀺𑀲𑀺𑀦𑁆𑀦𑁄𑀧𑀺… 𑀲𑀬𑀸𑀦𑁄𑀧𑀺… 𑀕𑀸𑀫𑀕𑀢𑁄𑀧𑀺… 𑀅𑀭𑀜𑁆𑀜𑀕𑀢𑁄𑀧𑀺… 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺… 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺… 𑀅𑀩𑁆𑀪𑁄𑀓𑀸𑀲𑀕𑀢𑁄𑀧𑀺… 𑀪𑀺𑀓𑁆𑀔𑀼𑀫𑀚𑁆𑀛𑀕𑀢𑁄𑀧𑀺 𑀲𑀼𑀔𑀁 𑀲𑀸𑀢𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀪𑀺𑀭𑀢𑀺𑀬𑀸, 𑀆𑀯𑀼𑀲𑁄, 𑀲𑀢𑀺 𑀇𑀤𑀁 𑀲𑀼𑀔𑀁 𑀧𑀸𑀝𑀺𑀓𑀗𑁆𑀔’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀧𑀞𑀫𑀦𑀴𑀓𑀧𑀸𑀦𑀲𑀼𑀢𑁆𑀢𑀁

𑁬𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀴𑀓𑀧𑀸𑀦𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀦𑀺𑀕𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀦𑀴𑀓𑀧𑀸𑀦𑁂 𑀯𑀺𑀳𑀭𑀢𑀺 𑀧𑀮𑀸𑀲𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋

‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 [𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀧𑀝𑀺𑀪𑀸𑀢𑀼 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻 𑀓𑀣𑀸. 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺; 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀯𑀼𑀲𑁄, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 [𑀳𑀺𑀭𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺 … 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦 𑀳𑀸𑀬𑀢𑀺 𑀫𑀡𑁆𑀟𑀮𑁂𑀦 𑀳𑀸𑀬𑀢𑀺 𑀆𑀪𑀸𑀬 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺.

‘‘𑀅𑀲𑁆𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀳𑀺𑀭𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀦𑁄𑀢𑁆𑀢𑀧𑁆𑀧𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀓𑀼𑀲𑀻𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀤𑀼𑀧𑁆𑀧𑀜𑁆𑀜𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀓𑁄𑀥𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀉𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀧𑀸𑀧𑀺𑀘𑁆𑀙𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀧𑀸𑀧𑀫𑀺𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁; ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀧𑀭𑀺𑀳𑀸𑀦𑀫𑁂𑀢𑀁.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀯𑀼𑀲𑁄, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦 𑀯𑀟𑁆𑀠𑀢𑀺 𑀆𑀪𑀸𑀬 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺.

‘‘‘𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀳𑀺𑀭𑀻𑀫𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀑𑀢𑁆𑀢𑀧𑁆𑀧𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀧𑀜𑁆𑀜𑀯𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀓𑁆𑀓𑁄𑀥𑀦𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀦𑀼𑀧𑀦𑀸𑀳𑀻 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀅𑀧𑁆𑀧𑀺𑀘𑁆𑀙𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢𑀁; ‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀆𑀯𑀼𑀲𑁄, 𑀅𑀧𑀭𑀺𑀳𑀸𑀦𑀫𑁂𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀲𑁆𑀲 𑀓𑀲𑁆𑀲𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦 𑀳𑀸𑀬𑀢𑀺 𑀫𑀡𑁆𑀟𑀮𑁂𑀦 𑀳𑀸𑀬𑀢𑀺 𑀆𑀪𑀸𑀬 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 …𑀧𑁂… 𑀦𑁄 𑀯𑀼𑀤𑁆𑀥𑀺.

‘‘‘𑀅𑀲𑁆𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀳𑀸𑀦𑀫𑁂𑀢𑀁; 𑀅𑀳𑀺𑀭𑀺𑀓𑁄… 𑀅𑀦𑁄𑀢𑁆𑀢𑀧𑁆𑀧𑀻… 𑀓𑀼𑀲𑀻𑀢𑁄… 𑀤𑀼𑀧𑁆𑀧𑀜𑁆𑀜𑁄… 𑀓𑁄𑀥𑀦𑁄… 𑀉𑀧𑀦𑀸𑀳𑀻… 𑀧𑀸𑀧𑀺𑀘𑁆𑀙𑁄… 𑀧𑀸𑀧𑀫𑀺𑀢𑁆𑀢𑁄… ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀳𑀸𑀦𑀫𑁂𑀢𑀁.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦 𑀯𑀟𑁆𑀠𑀢𑀺 𑀆𑀪𑀸𑀬 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺.

‘‘‘𑀲𑀤𑁆𑀥𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀧𑀭𑀺𑀳𑀸𑀦𑀫𑁂𑀢𑀁; 𑀳𑀺𑀭𑀻𑀫𑀸… 𑀑𑀢𑁆𑀢𑀧𑁆𑀧𑀻… 𑀆𑀭𑀤𑁆𑀥𑀯𑀻𑀭𑀺𑀬𑁄… 𑀧𑀜𑁆𑀜𑀯𑀸… 𑀅𑀓𑁆𑀓𑁄𑀥𑀦𑁄… 𑀅𑀦𑀼𑀧𑀦𑀸𑀳𑀻… 𑀅𑀧𑁆𑀧𑀺𑀘𑁆𑀙𑁄… 𑀓𑀮𑁆𑀬𑀸𑀡𑀫𑀺𑀢𑁆𑀢𑁄… ‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀧𑀭𑀺𑀳𑀸𑀦𑀫𑁂𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀦𑀴𑀓𑀧𑀸𑀦𑀲𑀼𑀢𑁆𑀢𑀁

𑁬𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀴𑀓𑀧𑀸𑀦𑁂 𑀯𑀺𑀳𑀭𑀢𑀺 𑀧𑀮𑀸𑀲𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋

‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀧𑀝𑀺𑀪𑀸𑀢𑀼 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻 𑀓𑀣𑀸. 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺; 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂’’𑀢𑀺! ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀯𑀼𑀲𑁄, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺… 𑀲𑁄𑀢𑀸𑀯𑀥𑀸𑀦𑀁 𑀦𑀢𑁆𑀣𑀺… 𑀥𑀫𑁆𑀫𑀥𑀸𑀭𑀡𑀸 𑀦𑀢𑁆𑀣𑀺… 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸 𑀦𑀢𑁆𑀣𑀺… 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀦𑀢𑁆𑀣𑀺… 𑀅𑀧𑁆𑀧𑀫𑀸𑀤𑁄 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦 𑀳𑀸𑀬𑀢𑀺 𑀫𑀡𑁆𑀟𑀮𑁂𑀦 𑀳𑀸𑀬𑀢𑀺 𑀆𑀪𑀸𑀬 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺… 𑀲𑁄𑀢𑀸𑀯𑀥𑀸𑀦𑀁 𑀦𑀢𑁆𑀣𑀺… 𑀥𑀫𑁆𑀫𑀥𑀸𑀭𑀡𑀸 𑀦𑀢𑁆𑀣𑀺… 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸 𑀦𑀢𑁆𑀣𑀺… 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀦𑀢𑁆𑀣𑀺… 𑀅𑀧𑁆𑀧𑀫𑀸𑀤𑁄 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀯𑀼𑀲𑁄, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺… 𑀲𑁄𑀢𑀸𑀯𑀥𑀸𑀦𑀁 𑀅𑀢𑁆𑀣𑀺… 𑀥𑀫𑁆𑀫𑀥𑀸𑀭𑀡𑀸 𑀅𑀢𑁆𑀣𑀺… 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸 𑀅𑀢𑁆𑀣𑀺… 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀅𑀢𑁆𑀣𑀺… 𑀅𑀧𑁆𑀧𑀫𑀸𑀤𑁄 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦 𑀯𑀟𑁆𑀠𑀢𑀺 𑀆𑀪𑀸𑀬 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀆𑀯𑀼𑀲𑁄, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀅𑀧𑁆𑀧𑀫𑀸𑀤𑁄 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀬𑀲𑁆𑀲 𑀓𑀲𑁆𑀲𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀳𑀺𑀭𑀻 𑀦𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺… 𑀧𑀜𑁆𑀜𑀸 𑀦𑀢𑁆𑀣𑀺… 𑀯𑀻𑀭𑀺𑀬𑀁 𑀦𑀢𑁆𑀣𑀺… 𑀲𑁄𑀢𑀸𑀯𑀥𑀸𑀦𑀁 𑀦𑀢𑁆𑀣𑀺… 𑀥𑀫𑁆𑀫𑀥𑀸𑀭𑀡𑀸 𑀦𑀢𑁆𑀣𑀺… 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸 𑀦𑀢𑁆𑀣𑀺… 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀦𑀢𑁆𑀣𑀺… 𑀅𑀧𑁆𑀧𑀫𑀸𑀤𑁄 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀴𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀬𑀢𑁂𑀯 𑀯𑀡𑁆𑀡𑁂𑀦 𑀳𑀸𑀬𑀢𑀺 𑀫𑀡𑁆𑀟𑀮𑁂𑀦 𑀳𑀸𑀬𑀢𑀺 𑀆𑀪𑀸𑀬 𑀳𑀸𑀬𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀅𑀧𑁆𑀧𑀫𑀸𑀤𑁄 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀳𑀸𑀦𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀯𑀼𑀤𑁆𑀥𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀳𑀺𑀭𑀻 𑀅𑀢𑁆𑀣𑀺… 𑀑𑀢𑁆𑀢𑀧𑁆𑀧𑀁 𑀅𑀢𑁆𑀣𑀺… 𑀯𑀻𑀭𑀺𑀬𑀁 𑀅𑀢𑁆𑀣𑀺… 𑀧𑀜𑁆𑀜𑀸 𑀅𑀢𑁆𑀣𑀺… 𑀲𑁄𑀢𑀸𑀯𑀥𑀸𑀦𑀁 𑀅𑀢𑁆𑀣𑀺… 𑀥𑀫𑁆𑀫𑀥𑀸𑀭𑀡𑀸 𑀅𑀢𑁆𑀣𑀺… 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸 𑀅𑀢𑁆𑀣𑀺… 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺 𑀅𑀢𑁆𑀣𑀺… 𑀅𑀧𑁆𑀧𑀫𑀸𑀤𑁄 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀚𑀼𑀡𑁆𑀳𑀧𑀓𑁆𑀔𑁂 𑀘𑀦𑁆𑀤𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀟𑁆𑀠𑀢𑁂𑀯 𑀯𑀡𑁆𑀡𑁂𑀦 𑀯𑀟𑁆𑀠𑀢𑀺 𑀫𑀡𑁆𑀟𑀮𑁂𑀦 𑀯𑀟𑁆𑀠𑀢𑀺 𑀆𑀪𑀸𑀬 𑀯𑀟𑁆𑀠𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑁂𑀦; 𑀏𑀯𑀫𑁂𑀯𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀤𑁆𑀥𑀸 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼…𑀧𑁂… 𑀅𑀧𑁆𑀧𑀫𑀸𑀤𑁄 𑀅𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀢𑀲𑁆𑀲 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀘𑁆𑀙𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀁

𑁬𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 [𑀤𑀻. 𑀦𑀺. 𑁧.𑁧𑁭; 𑀫. 𑀦𑀺. 𑁨.𑁨𑁨𑁩; 𑀲𑀁. 𑀦𑀺. 𑁫.𑁧𑁦𑁮𑁦; 𑀧𑀸𑀘𑀺. 𑁫𑁦𑁮] 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 (𑀓.) 𑀫. 𑀦𑀺. 𑀅𑀝𑁆𑀞. 𑁨.𑁨𑁨𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀉𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?

‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀸𑀫, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸’’𑀢𑀺. ‘‘𑀦 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀤𑁆𑀥𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸𑀦𑀁, 𑀬𑀁 𑀢𑀼𑀫𑁆𑀳𑁂 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑁂𑀬𑁆𑀬𑀸𑀣, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸𑀢𑀺.

‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀓𑀣𑀸𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀤𑀲? 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀲𑀦𑁆𑀢𑀼𑀝𑁆𑀞𑀺𑀓𑀣𑀸, 𑀧𑀯𑀺𑀯𑁂𑀓𑀓𑀣𑀸, 𑀅𑀲𑀁𑀲𑀕𑁆𑀕𑀓𑀣𑀸, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸, 𑀲𑀻𑀮𑀓𑀣𑀸, 𑀲𑀫𑀸𑀥𑀺𑀓𑀣𑀸, 𑀧𑀜𑁆𑀜𑀸𑀓𑀣𑀸, 𑀯𑀺𑀫𑀼𑀢𑁆𑀢𑀺𑀓𑀣𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸𑀢𑀺 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺.

‘‘𑀇𑀫𑁂𑀲𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀓𑀣𑀁 𑀓𑀣𑁂𑀬𑁆𑀬𑀸𑀣, 𑀇𑀫𑁂𑀲𑀫𑁆𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀏𑀯𑀁𑀫𑀳𑀺𑀤𑁆𑀥𑀺𑀓𑀸𑀦𑀁 𑀏𑀯𑀁𑀫𑀳𑀸𑀦𑀼𑀪𑀸𑀯𑀸𑀦𑀁 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑁂𑀬𑁆𑀬𑀸𑀣, 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦’’𑀦𑁆𑀢𑀺! 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀓𑀣𑀸𑀯𑀢𑁆𑀣𑀼𑀲𑀼𑀢𑁆𑀢𑀁

𑁭𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸𑀢𑀺.

‘‘𑀤𑀲𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀸𑀲𑀁𑀲𑀸𑀦𑀺 𑀞𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺, 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀅𑀧𑁆𑀧𑀺𑀘𑁆𑀙𑁄 𑀪𑀺𑀓𑁆𑀔𑀼 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑀼𑀝𑁆𑀞𑀺𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀲𑀦𑁆𑀢𑀼𑀝𑁆𑀞𑁄 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑀺𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀧𑀯𑀺𑀯𑀺𑀢𑁆𑀢𑁄 𑀳𑁄𑀢𑀺, 𑀧𑀯𑀺𑀯𑁂𑀓𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀧𑀯𑀺𑀯𑀺𑀢𑁆𑀢𑁄 𑀪𑀺𑀓𑁆𑀔𑀼 𑀧𑀯𑀺𑀯𑁂𑀓𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀅𑀲𑀁𑀲𑀝𑁆𑀞𑁄 𑀳𑁄𑀢𑀺, 𑀅𑀲𑀁𑀲𑀝𑁆𑀞𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀅𑀲𑀁𑀲𑀝𑁆𑀞𑁄 𑀪𑀺𑀓𑁆𑀔𑀼 𑀅𑀲𑀁𑀲𑀝𑁆𑀞𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀲𑀻𑀮𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀲𑀻𑀮𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀲𑀫𑀸𑀥𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀫𑀸𑀥𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀜𑁆𑀜𑀸𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀧𑀜𑁆𑀜𑀸𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁.

‘‘𑀅𑀢𑁆𑀢𑀦𑀸 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸 𑀳𑁄𑀢𑀺. ‘𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’𑀢𑀺 𑀧𑀸𑀲𑀁𑀲𑀫𑁂𑀢𑀁 𑀞𑀸𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀧𑀸𑀲𑀁𑀲𑀸𑀦𑀺 𑀞𑀸𑀦𑀸𑀦𑀻’’𑀢𑀺. 𑀤𑀲𑀫𑀁.

𑀬𑀫𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.