𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁨𑁯𑁮. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁨𑁯𑁯. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑁩𑁦𑁦. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺.

𑁩𑁦𑁧. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺.

𑁩𑁦𑁨. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀯𑀟𑁆𑀠𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀯𑀟𑁆𑀠𑀢𑀻’’𑀢𑀺.

𑁩𑁦𑁩. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀦𑁆𑀦𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀯𑀟𑁆𑀠𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺 𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀯𑀟𑁆𑀠𑀢𑀻’’𑀢𑀺.

𑁩𑁦𑁪. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 [𑀬𑁂𑀦𑁂𑀯𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

𑁩𑁦𑁫. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

𑁩𑁦𑁬. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲 [𑀤𑀺𑀝𑁆𑀞𑀺 𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀺𑀫𑁆𑀩𑀩𑀻𑀚𑀁 𑀯𑀸 𑀓𑁄𑀲𑀸𑀢𑀓𑀺𑀩𑀻𑀚𑀁 𑀯𑀸 𑀢𑀺𑀢𑁆𑀢𑀓𑀮𑀸𑀩𑀼𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 [𑀧𑀞𑀯𑀺𑀬𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀺𑀓𑁆𑀔𑀺𑀢𑁆𑀢𑀁 𑀬𑀜𑁆𑀘𑁂𑀯 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺 𑀲𑀩𑁆𑀩𑀁 𑀢𑀁 𑀢𑀺𑀢𑁆𑀢𑀓𑀢𑁆𑀢𑀸𑀬 𑀓𑀝𑀼𑀓𑀢𑁆𑀢𑀸𑀬 𑀅𑀲𑀸𑀢𑀢𑁆𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀁 𑀳𑀺𑀲𑁆𑀲 [𑀯𑀻𑀚𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀪𑀺𑀓𑁆𑀔𑀯𑁂, 𑀧𑀸𑀧𑀓𑀁. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬 𑀅𑀓𑀦𑁆𑀢𑀸𑀬 𑀅𑀫𑀦𑀸𑀧𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀓𑀸’’𑀢𑀺.

𑁩𑁦𑁭. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀓𑀸. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀩𑀻𑀚𑀁 𑀯𑀸 𑀲𑀸𑀮𑀺𑀩𑀻𑀚𑀁 𑀯𑀸 𑀫𑀼𑀤𑁆𑀤𑀺𑀓𑀸𑀩𑀻𑀚𑀁 𑀯𑀸 𑀅𑀮𑁆𑀮𑀸𑀬 𑀧𑀣𑀯𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀁 𑀬𑀜𑁆𑀘𑁂𑀯 𑀧𑀣𑀯𑀺𑀭𑀲𑀁 𑀉𑀧𑀸𑀤𑀺𑀬𑀢𑀺 𑀬𑀜𑁆𑀘 𑀆𑀧𑁄𑀭𑀲𑀁 𑀉𑀧𑀸𑀤𑀺𑀬𑀢𑀺 𑀲𑀩𑁆𑀩𑀁 𑀢𑀁 𑀫𑀥𑀼𑀭𑀢𑁆𑀢𑀸𑀬 𑀲𑀸𑀢𑀢𑁆𑀢𑀸𑀬 𑀅𑀲𑁂𑀘𑀦𑀓𑀢𑁆𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀻𑀚𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀁. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀜𑁆𑀘 𑀯𑀘𑀻𑀓𑀫𑁆𑀫𑀁…𑀧𑁂… 𑀬𑀜𑁆𑀘 𑀫𑀦𑁄𑀓𑀫𑁆𑀫𑀁 𑀬𑀣𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁 𑀬𑀸 𑀘 𑀘𑁂𑀢𑀦𑀸 𑀬𑀸 𑀘 𑀧𑀢𑁆𑀣𑀦𑀸 𑀬𑁄 𑀘 𑀧𑀡𑀺𑀥𑀺 𑀬𑁂 𑀘 𑀲𑀗𑁆𑀔𑀸𑀭𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀇𑀝𑁆𑀞𑀸𑀬 𑀓𑀦𑁆𑀢𑀸𑀬 𑀫𑀦𑀸𑀧𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀝𑁆𑀞𑀺 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀺𑀓𑀸’’𑀢𑀺.

𑀯𑀕𑁆𑀕𑁄 𑀤𑀼𑀢𑀺𑀬𑁄.