𑁩. 𑀢𑀢𑀺𑀬𑀯𑀕𑁆𑀕𑁄

𑁩𑁦𑁮. ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀅𑀳𑀺𑀢𑀸𑀬 𑀩𑀳𑀼𑀚𑀦𑀅𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀲𑁄 𑀩𑀳𑀼𑀚𑀦𑀁 𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀧𑀼𑀕𑁆𑀕𑀮𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀅𑀳𑀺𑀢𑀸𑀬 𑀩𑀳𑀼𑀚𑀦𑀅𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑁩𑁦𑁯. ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀲𑁄 𑀩𑀳𑀼𑀚𑀦𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀧𑀼𑀕𑁆𑀕𑀮𑁄 𑀮𑁄𑀓𑁂 𑀉𑀧𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑁩𑁧𑁦. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀸𑀯𑀚𑁆𑀚𑀸𑀦𑀻’’𑀢𑀺 [𑀯𑀚𑁆𑀚𑀸𑀦𑀻𑀢𑀺 (𑀲𑀻. 𑀲𑁆𑀬𑀸. 𑀓𑀁.)].

𑁩𑁧𑁧. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁄 𑀏𑀯𑀁 𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀅𑀲𑀼𑀔𑀸𑀬, 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀤𑀻𑀫𑀼𑀔𑁂 𑀔𑀺𑀧𑁆𑀧𑀁 [𑀔𑀺𑀧𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀟𑁆𑀟𑁂𑀬𑁆𑀬 [𑀑𑀟𑁆𑀟𑁂𑀬𑁆𑀬 (𑀲𑀻.), 𑀉𑀚𑁆𑀛𑁂𑀬𑁆𑀬 (𑀓.)] 𑀩𑀳𑀽𑀦𑀁 𑀫𑀘𑁆𑀙𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀦𑀬𑀸𑀬 𑀩𑁆𑀬𑀲𑀦𑀸𑀬; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀓𑁆𑀔𑀮𑀺 𑀫𑁄𑀖𑀧𑀼𑀭𑀺𑀲𑁄 𑀫𑀦𑀼𑀲𑁆𑀲𑀔𑀺𑀧𑁆𑀧𑀁 𑀫𑀜𑁆𑀜𑁂 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀩𑀳𑀽𑀦𑀁 𑀲𑀢𑁆𑀢𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀦𑀬𑀸𑀬 𑀩𑁆𑀬𑀲𑀦𑀸𑀬𑀸’’𑀢𑀺.

𑁩𑁧𑁨. ‘‘𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀘 𑀲𑀫𑀸𑀤𑀧𑁂𑀢𑀺 [𑀲𑀫𑀸𑀤𑀸𑀧𑁂𑀢𑀺 (?)] 𑀬𑀜𑁆𑀘 𑀲𑀫𑀸𑀤𑀧𑁂𑀢𑀺 𑀬𑁄 𑀘 𑀲𑀫𑀸𑀤𑀧𑀺𑀢𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀢𑀺 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀭𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁩. ‘‘𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀘 𑀲𑀫𑀸𑀤𑀧𑁂𑀢𑀺 𑀬𑀜𑁆𑀘 𑀲𑀫𑀸𑀤𑀧𑁂𑀢𑀺 𑀬𑁄 𑀘 𑀲𑀫𑀸𑀤𑀧𑀺𑀢𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀢𑀺 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁆𑀯𑀸𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁪. ‘‘𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀤𑀸𑀬𑀓𑁂𑀦 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸, 𑀦𑁄 𑀧𑀝𑀺𑀕𑁆𑀕𑀸𑀳𑀓𑁂𑀦. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀭𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁫. ‘‘𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀧𑀝𑀺𑀕𑁆𑀕𑀸𑀳𑀓𑁂𑀦 𑀫𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀸, 𑀦𑁄 𑀤𑀸𑀬𑀓𑁂𑀦. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁆𑀯𑀸𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁬. ‘‘𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀭𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁭. ‘‘𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀓𑀼𑀲𑀻𑀢𑁄 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁆𑀯𑀸𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁮. ‘‘𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀓𑀼𑀲𑀻𑀢𑁄 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀼𑀭𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁧𑁯. ‘‘𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑁆𑀯𑀸𑀓𑁆𑀔𑀸𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑁆𑀲𑀸’’𑀢𑀺.

𑁩𑁨𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀺, 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺’’.

𑁩𑁨𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀫𑀼𑀢𑁆𑀢𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺… 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀔𑁂𑀴𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺… 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀧𑀼𑀩𑁆𑀩𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺… 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀮𑁄𑀳𑀺𑀢𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀺, 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺’’.

𑀯𑀕𑁆𑀕𑁄 𑀢𑀢𑀺𑀬𑁄.