অত্থাপত্তিসমুট্ঠানং

১. পারাজিকং

৪৭০. অত্থাপত্তি অচিত্তকো আপজ্জতি, সচিত্তকো ৰুট্ঠাতি. অত্থাপত্তি সচিত্তকো আপজ্জতি, অচিত্তকো ৰুট্ঠাতি. অত্থাপত্তি অচিত্তকো আপজ্জতি, অচিত্তকো ৰুট্ঠাতি. অত্থাপত্তি সচিত্তকো আপজ্জতি, সচিত্তকো ৰুট্ঠাতি. অত্থাপত্তি কুসলচিত্তো আপজ্জতি, কুসলচিত্তো ৰুট্ঠাতি. অত্থাপত্তি কুসলচিত্তো আপজ্জতি, অকুসলচিত্তো ৰুট্ঠাতি. অত্থাপত্তি কুসলচিত্তো আপজ্জতি, অব্যাকতচিত্তো ৰুট্ঠাতি. অত্থাপত্তি অকুসলচিত্তো আপজ্জতি, কুসলচিত্তো ৰুট্ঠাতি. অত্থাপত্তি অকুসলচিত্তো আপজ্জতি, অকুসলচিত্তো ৰুট্ঠাতি. অত্থাপত্তি অকুসলচিত্তো আপজ্জতি, অব্যাকতচিত্তো ৰুট্ঠাতি. অত্থাপত্তি অব্যাকতচিত্তো আপজ্জতি, কুসলচিত্তো ৰুট্ঠাতি. অত্থাপত্তি অব্যাকতচিত্তো আপজ্জতি, অকুসলচিত্তো ৰুট্ঠাতি. অত্থাপত্তি অব্যাকতচিত্তো আপজ্জতি, অব্যাকতচিত্তো ৰুট্ঠাতি.

পঠমং পারাজিকং কতিহি সমুট্ঠানেহি সমুট্ঠাতি? পঠমং পারাজিকং একেন সমুট্ঠানেন সমুট্ঠাতি. কাযতো চ চিত্ততো চ সমুট্ঠাতি, ন ৰাচতো.

দুতিযং পারাজিকং কতিহি সমুট্ঠানেহি সমুট্ঠাতি? দুতিযং পারাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি.

ততিযং পারাজিকং কতিহি সমুট্ঠানেহি সমুট্ঠাতি? ততিযং পারাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি.

চতুত্থং পারাজিকং কতিহি সমুট্ঠানেহি সমুট্ঠাতি? চতুত্থং পারাজিকং তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি.

চত্তারো পারাজিকা নিট্ঠিতা.

২. সঙ্ঘাদিসেসং

৪৭১. উপক্কমিত্ৰা অসুচিং মোচেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? উপক্কমিত্ৰা অসুচিং মোচেন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো.

মাতুগামেন সদ্ধিং কাযসংসগ্গং সমাপজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামেন সদ্ধিং কাযসংসগ্গং সমাপজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো.

মাতুগামং দুট্ঠুল্লাহি ৰাচাহি ওভাসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামং দুট্ঠুল্লাহি ৰাচাহি ওভাসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি – সিযা কাযতো চ চিত্ততো চ সমুট্ঠাতি ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি.

মাতুগামস্স সন্তিকে অত্তকামপারিচরিযায ৰণ্ণং ভাসন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মাতুগামস্স সন্তিকে অত্তকামপারিচরিযায ৰণ্ণং ভাসন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

সঞ্চরিত্তং সমাপজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঞ্চরিত্তং সমাপজ্জন্তস্স সঙ্ঘাদিসেসো ছহি সমুট্ঠানেহি সমুট্ঠাতি – সিযা কাযতো সমুট্ঠাতি, ন ৰাচতো ন চিত্ততো; সিযা ৰাচতো সমুট্ঠাতি, ন কাযতো ন চিত্ততো; সিযা কাযতো চ ৰাচতো চ সমুট্ঠাতি, ন চিত্ততো; সিযা কাযতো চ চিত্ততো চ সমুট্ঠাতি, ন ৰাচতো; সিযা ৰাচতো চ চিত্ততো চ সমুট্ঠাতি, ন কাযতো; সিযা কাযতো চ ৰাচতো চ চিত্ততো চ সমুট্ঠাতি.

সঞ্ঞাচিকায কুটিং কারাপেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঞ্ঞাচিকায কুটিং কারাপেন্তস্স সঙ্ঘাদিসেসো ছহি সমুট্ঠানেহি সমুট্ঠাতি…পে….

মহল্লকং ৰিহারং কারাপেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? মহল্লকং ৰিহারং কারাপেন্তস্স সঙ্ঘাদিসেসো ছহি সমুট্ঠানেহি সমুট্ঠাতি…পে….

ভিক্খুং অমূলকেন পারাজিকেন ধম্মেন অনুদ্ধংসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? ভিক্খুং অমূলকেন পারাজিকেন ধম্মেন অনুদ্ধংসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? ভিক্খুং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেন্তস্স সঙ্ঘাদিসেসো তীহি সমুট্ঠানেহি সমুট্ঠাতি…পে….

সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? সঙ্ঘভেদকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি.

ভেদকানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জন্তানং সঙ্ঘাদিসেসো কতিহি সমুট্ঠানেহি সমুট্ঠাতি? ভেদকানুৰত্তকানং ভিক্খূনং যাৰততিযং সমনুভাসনায ন পটিনিস্সজ্জন্তানং সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি.

দুব্বচস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? দুব্বচস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি.

কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো কতিহি সমুট্ঠানেহি সমুট্ঠাতি? কুলদূসকস্স ভিক্খুনো যাৰততিযং সমনুভাসনায ন পটিনিস্সজ্জন্তস্স সঙ্ঘাদিসেসো একেন সমুট্ঠানেন সমুট্ঠাতি – কাযতো চ ৰাচতো চ চিত্ততো চ সমুট্ঠাতি.

তেরস সঙ্ঘাদিসেসা নিট্ঠিতা.

৪৭২. …পে… অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করোন্তস্স দুক্কটং কতিহি সমুট্ঠানেহি সমুট্ঠাতি? অনাদরিযং পটিচ্চ উদকে উচ্চারং ৰা পস্সাৰং ৰা খেল়ং ৰা করোন্তস্স দুক্কটং একেন সমুট্ঠানেন সমুট্ঠাতি – কাযতো চ চিত্ততো চ সমুট্ঠাতি, ন ৰাচতো.

সেখিযা নিট্ঠিতা.

৩. পারাজিকাদি

৪৭৩. চত্তারো পারাজিকা কতিহি সমুট্ঠানেহি সমুট্ঠন্তি? চত্তারো পারাজিকা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

তেরস সঙ্ঘাদিসেসা কতিহি সমুট্ঠানেহি সমুট্ঠন্তি? তেরস সঙ্ঘাদিসেসা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৰাচতো ন চিত্ততো; সিযা ৰাচতো সমুট্ঠন্তি, ন কাযতো ন চিত্ততো; সিযা কাযতো চ ৰাচতো ন সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

দ্ৰে অনিযতা কতিহি সমুট্ঠানেহি সমুট্ঠন্তি? দ্ৰে অনিযতা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

তিংস নিস্সগ্গিযা পাচিত্তিযা কতিহি সমুট্ঠানেহি সমুট্ঠন্তি? তিংস নিস্সগ্গিযা পাচিত্তিযা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৰাচতো ন চিত্ততো; সিযা ৰাচতো সমুট্ঠন্তি, ন কাযতো ন চিত্ততো; সিযা কাযতো চ ৰাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

দ্ৰেনৰুতি পাচিত্তিযা কতিহি সমুট্ঠানেহি সমুট্ঠন্তি? দ্ৰেনৰুতি পাচিত্তিযা ছহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৰাচতো ন চিত্ততো; সিযা ৰাচতো সমুট্ঠন্তি, ন কাযতো ন চিত্ততো; সিযা কাযতো চ ৰাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

চত্তারো পাটিদেসনীযা কতিহি সমুট্ঠানেহি সমুট্ঠন্তি? চত্তারো পাটিদেসনীযা চতূহি সমুট্ঠানেহি সমুট্ঠন্তি – সিযা কাযতো সমুট্ঠন্তি, ন ৰাচতো ন চিত্ততো; সিযা কাযতো চ ৰাচতো চ সমুট্ঠন্তি, ন চিত্ততো; সিযা কাযতো চ চিত্ততো চ সমুট্ঠন্তি, ন ৰাচতো; সিযা কাযতো চ ৰাচতো চ চিত্ততো চ সমুট্ঠন্তি.

পঞ্চসত্ততি সেখিযা কতিহি সমুট্ঠানেহি সমুট্ঠন্তি? পঞ্চসত্ততি সেখিযা তীহি সমুট্ঠানেহি সমুট্ঠন্তি – সিযা কাযতো চ চিত্ততো চ সমুট্ঠন্তি, ন ৰাচতো; সিযা ৰাচতো চ চিত্ততো চ সমুট্ঠন্তি, ন কাযতো; সিযা কাযতো চ ৰাচতো চ চিত্ততো চ সমুট্ঠন্তি.

সমুট্ঠানং নিট্ঠিতং.